ଅଧ୍ୟାତ୍ମରାମାୟଣେ 5 ସୁନ୍ଦରକାଣ୍ଡମ୍
ଅଧ୍ୟାତ୍ମରାମାୟଣେ ସୁନ୍ଦରକାଣ୍ଡମ୍
॥ ପ୍ରଥମଃ ସର୍ଗଃ ॥
ଶ୍ରୀମହାଦେବ ଉବାଚ ।
ଶତୟୋଜନବିସ୍ତୀର୍ଣଂ ସମୁଦ୍ରଂ ମକରାଲୟମ୍ ।
ଲିଲଙ୍ଘୟିଷୁରାନନ୍ଦସନ୍ଦୋହୋ ମାରୁତାତ୍ମଜଃ ॥ ୧॥
ଧ୍ୟାତ୍ୱା ରାମଂ ପରାତ୍ମାନମିଦଂ ବଚନମବ୍ରବୀତ୍ ।
ପଶ୍ୟନ୍ତୁ ବାନରାଃ ସର୍ୱେ ଗଚ୍ଛନ୍ତଂ ମାଂ ବିହାୟସା ॥ ୨॥
ଅମୋଘଂ ରାମନିର୍ମୁକ୍ତଂ ମହାବାଣମିବାଖିଲାଃ ।
ପଶ୍ୟାମ୍ୟଦ୍ୟୈବ ରାମସ୍ୟ ପତ୍ନୀଂ ଜନକନନ୍ଦିନୀମ୍ ॥ ୩॥
କୃତାର୍ଥୋଽହଂ କୃତାର୍ଥୋଽହଂ ପୁନଃ ପଶ୍ୟାମି ରାଘବମ୍ ।
ପ୍ରାଣପ୍ରୟାଣସମୟେ ଯସ୍ୟ ନାମ ସକୃତ୍ସ୍ମରନ୍ ॥ ୪॥
ନରସ୍ତୀର୍ତ୍ୱା ଭବାମ୍ଭୋଧିମପାରଂ ଯାତି ତତ୍ପଦମ୍ ।
କିଂ ପୁନସ୍ତସ୍ୟ ଦୂତୋଽହଂ ତଦଙ୍ଗାଙ୍ଗୁଲିମୁଦ୍ରିକଃ ॥ ୫॥
ତମେବ ହୃଦୟେ ଧ୍ୟାତ୍ୱା ଲଙ୍ଘୟାମ୍ୟଲ୍ପବାରିଧିମ୍ ।
ଇତ୍ୟୁକ୍ତ୍ୱା ହନୁମାନ୍ ବାହୂ ପ୍ରସାର୍ୟାୟତବାଲଧିଃ ॥ ୬॥
ଋଜୁଗ୍ରୀବୋର୍ଧ୍ୱଦୃଷ୍ଟିଃ ସନ୍ନାକୁଞ୍ଚିତପଦଦ୍ୱୟଃ ।
ଦକ୍ଷିଣାଭିମୁଖସ୍ତୂର୍ଣଂ ପୁପ୍ଲୁବେଽନିଲବିକ୍ରମଃ ॥ ୭॥
ଆକଶାତ୍ତ୍ୱରିତଂ ଦେବୈର୍ୱୀକ୍ଷ୍ୟମାଣୋ ଜଗାମ ସଃ ।
ଦୃଷ୍ଟ୍ୱାନିଲସୁତଂ ଦେବା ଗଚ୍ଛନ୍ତଂ ବାୟୁବେଗତଃ ॥ ୮॥
ପରୀକ୍ଷଣାର୍ଥଂ ସତ୍ତ୍ୱସ୍ୟ ବାନରସ୍ୟେଦମବ୍ରୁବନ୍ ।
ଗଚ୍ଛତ୍ୟେଷ ମହାସତ୍ତ୍ୱୋ ବାନରୋ ବାୟୁବିକ୍ରମଃ ॥ ୯॥
ଲଙ୍କାଂ ପ୍ରବେଷ୍ଟୁଂ ଶକ୍ତୋ ବା ନ ବା ଜାନୀମହେ ବଲମ୍ ।
ଏବଂ ବିଚାର୍ୟ ନାଗାନାଂ ମାତରଂ ସୁରସାଭିଧାମ୍ ॥ ୧୦॥
ଅବ୍ରବୀଦ୍ଦେବତାବୃନ୍ଦଃ କୌତୂହଲସମନ୍ୱିତଃ ।
ଗଚ୍ଛ ତ୍ୱଂ ବାନରେନ୍ଦ୍ରସ୍ୟ କିଞ୍ଚିଦ୍ୱିଘ୍ନଂ ସମାଚର ॥ ୧୧॥
ଜ୍ଞାତ୍ୱା ତସ୍ୟ ବଲଂ ବୁଦ୍ଧିଂ ପୁନରେହି ତ୍ୱରାନ୍ୱିତା ।
ଇତ୍ୟୁକ୍ତା ସା ଯୟୌ ଶିଘ୍ରଂ ହନୁମଦ୍ୱିଘ୍ନକାରଣାତ୍ ॥ ୧୨॥
ଆବୃତ୍ୟ ମାର୍ଗଂ ପୁରତଃ ସ୍ଥିତ୍ୱା ବାନରମବ୍ରବୀତ୍ ।
ଏହି ମେ ବଦନଂ ଶୀଘ୍ରଂ ପ୍ରବିଶସ୍ୱ ମହାମତେ ॥ ୧୩॥
ଦେବୈସ୍ତ୍ୱଂ କଲ୍ପିତୋ ଭକ୍ଷ୍ୟଃ କ୍ଷୁଧାସମ୍ପୀଡିତାତ୍ମନଃ ।
ତାମାହ ହନୁମାନ୍ ମାତରହଂ ରାମସ୍ୟ ଶାସନାତ୍ ॥ ୧୪॥
ଗଚ୍ଛାମି ଜାନକୀଂ ଦ୍ରଷ୍ଟୁଂ ପୁନରାଗମ୍ୟ ସତ୍ୱରଃ ।
ରାମାୟ କୁଶଲଂ ତସ୍ୟାଃ କଥୟିତ୍ୱା ତ୍ୱଦାନନମ୍ ॥ ୧୫॥
ନିବେକ୍ଷ୍ୟେ ଦେହି ମେ ମାର୍ଗଂ ସୁରସାୟୈ ନମୋଽସ୍ତୁ ତେ ।
ଇତ୍ୟୁକ୍ତା ପୁନରେବାହ ସୁରସା କ୍ଷୁଧିତାସ୍ମ୍ୟହମ୍ ॥ ୧୬॥
ପ୍ରବିଶ୍ୟ ଗଚ୍ଛ ମେ ବକ୍ତ୍ରଂ ନୋ ଚେତ୍ତ୍ୱାଂ ଭକ୍ଷୟାମ୍ୟହମ୍ ।
ଇତ୍ୟୁକ୍ତୋ ହନୁମାନାହ ମୁଖଂ ଶୀଘ୍ରଂ ବିଦାରୟ ॥ ୧୭॥
ପ୍ରବିଶ୍ୟ ବଦନଂ ତେଽଦ୍ୟ ଗଚ୍ଛାମି ତ୍ୱରୟାନ୍ୱିତଃ ।
ଇତ୍ୟୁକ୍ତ୍ୱା ଯୋଜନାୟାମଦେହୋ ଭୂତ୍ୱା ପୁରଃ ସ୍ଥିତଃ ॥ ୧୮॥
ଦୃଷ୍ଟ୍ୱା ହନୂମତୋ ରୂପଂ ସୁରସା ପଞ୍ଚୟୋଜନମ୍ ।
ମୁଖଂ ଚକାର ହନୁମାନ୍ ଦ୍ୱିଗୁଣଂ ରୂପମାଦଧତ୍ ॥ ୧୯॥
ତତଶ୍ଚକାର ସୁରସା ଯୋଜନାନାଂ ଚ ବିଂଶତିମ୍ ।
ବକ୍ତ୍ରଂ ଚକାର ହନୁମାଂସ୍ତ୍ରିଂଶଦ୍ୟୋଜନସମ୍ମିତମ୍ ॥ ୨୦॥
ତତଶ୍ଚକାର ସୁରସା ପଞ୍ଚାଶଦ୍ୟୋଜନାୟତମ୍ ।
ବକ୍ତ୍ରଂ ତଦା ହନୂମାଂସ୍ତୁ ବଭୂବାଙ୍ଗୁଷ୍ଠସନ୍ନିଭଃ ॥ ୨୧॥
ପ୍ରବିଶ୍ୟ ବଦନଂ ତସ୍ୟାଃ ପୁନରେତ୍ୟ ପୁରଃ ସ୍ଥିତଃ ।
ପ୍ରବିଷ୍ଟୋ ନିର୍ଗତୋଽହଂ ତେ ବଦନଂ ଦେବି ତେ ନମଃ ॥ ୨୨॥
ଏବଂ ବଦନ୍ତଂ ଦୃଷ୍ଟ୍ୱା ସା ହନୂମନ୍ତମଥାବ୍ରବୀତ୍ ।
ଗଚ୍ଛ ସାଧୟ ରାମସ୍ୟ କାର୍ୟଂ ବୁଦ୍ଧିମତାଂ ବର ॥ ୨୩॥
ଦେବୈଃ ସମ୍ପ୍ରେଷିତାହଂ ତେ ବଲଂ ଜିଜ୍ଞାସୁଭିଃ କପେ ।
ଦୃଷ୍ଟ୍ୱା ସୀତାଂ ପୁନର୍ଗତ୍ୱା ରାମଂ ଦ୍ରକ୍ଷ୍ୟସି ଗଚ୍ଛ ଭୋଃ ॥ ୨୪॥
ଇତ୍ୟୁକ୍ତ୍ୱା ସା ଯୟୌ ଦେବଲୋକଂ ବାୟୁସୁତଃ ପୁନଃ ।
ଜଗାମ ବାୟୁମାର୍ଗେଣ ଗରୁତ୍ମାନିବ ପକ୍ଷିରାଟ୍ ॥ ୨୫॥
ସମୁଦ୍ରୋଽପ୍ୟାହ ମୈନାକଂ ମଣିକାଞ୍ଚନପର୍ୱତମ୍ ।
ଗଚ୍ଛତ୍ୟେଷ ମହାସତ୍ତ୍ୱୋ ହନୂମାନ୍ମାରୁତାତ୍ମଜଃ ॥ ୨୬॥
ରାମସ୍ୟ କାର୍ୟସିଦ୍ଧ୍ୟର୍ଥଂ ତସ୍ୟ ତ୍ୱଂ ସଚିବୋ ଭବ ।
ସଗରୈର୍ୱର୍ଦ୍ଧିତୋ ଯସ୍ମାତ୍ପୁରାହଂ ସାଗରୋଽଭବମ୍ ॥ ୨୭॥
ତସ୍ୟାନ୍ୱୟେ ବଭୂବାସୌ ରାମୋ ଦାଶରଥିଃ ପ୍ରଭୁଃ ।
ତସ୍ୟ କାର୍ୟାର୍ଥସିଦ୍ଧ୍ୟର୍ଥଂ ଗଚ୍ଛତ୍ୟେଷ ମହାକପିଃ ॥ ୨୮॥
ତ୍ୱମୁତ୍ତିଷ୍ଠ ଜଲାତ୍ତୂର୍ଣଂ ତ୍ୱୟି ବିଶ୍ରମ୍ୟ ଗଚ୍ଛତୁ ।
ସ ତଥେତି ପ୍ରାଦୁରଭୂଜ୍ଜଲମଧ୍ୟାନ୍ମହୋନ୍ନତଃ ॥ ୨୯॥
ନାନାମଣିମୟୈଃ ଶୃଙ୍ଗୈସ୍ତସ୍ୟୋପରି ନରାକୃତିଃ ।
ପ୍ରାହ ଯାନ୍ତଂ ହନୂମନ୍ତଂ ମୈନାକୋଽହଂ ମହାକପେ ॥ ୩୦॥
ସମୁଦ୍ରେଣ ସମାଦିଷ୍ଟସ୍ତ୍ୱଦ୍ୱିଶ୍ରାମାୟ ମାରୁତେ ।
ଆଗଚ୍ଛାମୃତକଲ୍ପାନି ଜଗ୍ଧ୍ୱା ପକ୍ୱଫଲାନି ମେ ॥ ୩୧॥
ବିଶ୍ରମ୍ୟାତ୍ର କ୍ଷଣଂ ପଶ୍ଚାଦ୍ଗମିଷ୍ୟସି ଯଥାସୁଖମ୍ ।
ଏବମୁକ୍ତୋଽଥ ତଂ ପ୍ରାହ ହନୂମାନ୍ମାରୁତାତ୍ମଜଃ ॥ ୩୨॥
ଗଚ୍ଛତୋ ରାମକାର୍ୟାର୍ଥଂ ଭକ୍ଷଣଂ ମେ କଥଂ ଭବେତ୍ ।
ବିଶ୍ରାମୋ ବା କଥଂ ମେ ସ୍ୟାଦ୍ଗନ୍ତବ୍ୟଂ ତ୍ୱରିତଂ ମୟା ॥ ୩୩॥
ଇତ୍ୟୁକ୍ତ୍ୱା ସ୍ପୃଷ୍ଟଶିଖରଃ କରାଗ୍ରେଣ ଯୟୌ କପିଃ ।
କିଞ୍ଚିଦ୍ଦୂରଂ ଗତସ୍ୟାସ୍ୟ ଛାୟାଂ ଛାୟାଗ୍ରହୋଽଗ୍ରହୀତ୍ ॥ ୩୪॥
ସିଂହିକା ନାମ ସା ଘୋରା ଜଲମଧ୍ୟେ ସ୍ଥିତା ସଦା ।
ଆକାଶଗାମିନାଂ ଛାୟାମାକ୍ରମ୍ୟାକୃଷ୍ୟ ଭକ୍ଷୟେତ୍ ॥ ୩୫॥
ତୟା ଗୃହୀତୋ ହନୁମାଂଶ୍ଚିନ୍ତୟାମାସ ବୀର୍ୟବାନ୍ ।
କେନେଦଂ ମେ କୃତଂ ବେଗରୋଧନଂ ବିଘ୍ନକାରିଣା ॥ ୩୬॥
ଦୃଶ୍ୟତେ ନୈବ କୋଽପ୍ୟତ୍ର ବିସ୍ମୟୋ ମେ ପ୍ରଜାୟତେ ।
ଏବଂ ବିଚିନ୍ତ୍ୟ ହନୁମାନଧୋ ଦୃଷ୍ଟିଂ ପ୍ରସାରୟତ୍ ॥ ୩୭॥
ତତ୍ର ଦୃଷ୍ଟ୍ୱା ମହାକାୟାଂ ସିଂହିକାଂ ଘୋରରୂପିଣୀମ୍ ।
ପପାତ ସଲିଲେ ତୂର୍ଣଂ ପଦ୍ଭ୍ୟାମେବାହନଦ୍ରୁଷା ॥ ୩୮॥
ପୁନରୁତ୍ପ୍ଲୁତ୍ୟ ହନୂମାନ୍ ଦକ୍ଷିଣାଭିମୁଖୋ ଯୟୌ ।
ତତୋ ଦକ୍ଷିଣମାସାଦ୍ୟ କୂଲଂ ନାନାଫଲଦ୍ରୁମମ୍ ॥ ୩୯॥
ନାନାପକ୍ଷିମୃଗାକୀର୍ଣଂ ନାନାପୁଷ୍ପଲତାବୃତମ୍ ।
ତତୋ ଦଦର୍ଶ ନଗରଂ ତ୍ରିକୂଟାଚଲମୂର୍ଧନି ॥ ୪୦॥
ପ୍ରାକାରୈର୍ବହୁଭିର୍ୟୁକ୍ତଂ ପରିଖାଭିଶ୍ଚ ସର୍ୱତଃ ।
ପ୍ରବେକ୍ଷ୍ୟାମି କଥଂ ଲଙ୍କାମିତି ଚିନ୍ତାପରୋଽଭବତ୍ ॥ ୪୧॥
ରାତ୍ରୌ ବେକ୍ଷ୍ୟାମି ସୂକ୍ଷ୍ମୋଽହଂ ଲଙ୍କାଂ ରାବଣପାଲିତାମ୍ ।
ଏବଂ ବିଚିନ୍ତ୍ୟ ତତ୍ରୈବ ସ୍ଥିତ୍ୱା ଲଙ୍କାଂ ଜଗାମ ସଃ ॥ ୪୨॥
ଧୃତ୍ୱା ସୂକ୍ଷ୍ମଂ ବପୁର୍ଦ୍ୱାରଂ ପ୍ରବିବେଶ ପ୍ରତାପବାନ୍ ।
ତତ୍ର ଲଙ୍କାପୁରୀ ସାକ୍ଷାଦ୍ରାକ୍ଷସୀବେଷଧାରିଣୀ ॥ ୪୩॥
ପ୍ରବିଶନ୍ତଂ ହନୂମନ୍ତଂ ଦୃଷ୍ଟ୍ୱା ଲଙ୍କା ବ୍ୟତର୍ଜୟତ୍ ।
କସ୍ତ୍ୱଂ ବାନରରୂପେଣ ମାମନାଦୃତ୍ୟ ଲଙ୍କିନୀମ୍ ॥ ୪୪॥
ପ୍ରବିଶ୍ୟ ଚୋରବଦ୍ରାତ୍ରୌ କିଂ ଭବାନ୍ କର୍ତୁମିଚ୍ଛତି ।
ଇତ୍ୟୁକ୍ତ୍ୱା ରୋଷତାମ୍ରାକ୍ଷୀ ପାଦେନାଭିଜଘାନ ତମ୍ ॥ ୪୫॥
ହନୁମାନପି ତାଂ ବାମମୁଷ୍ଟିନାବଜ୍ଞୟାହନତ୍ ।
ତଦୈବ ପତିତା ଭୂମୌ ରକ୍ତମୁଦ୍ୱମତୀ ଭୃଶମ୍ ॥ ୪୬॥
ଉତ୍ଥାୟ ପ୍ରାହ ସା ଲଙ୍କା ହନୂମନ୍ତଂ ମହାବଲମ୍ ।
ହନୂମନ୍ ଗଚ୍ଛ ଭଦ୍ରଂ ତେ ଜିତା ଲଙ୍କା ତ୍ୱୟାନଘ ॥ ୪୭॥
ପୁରାହଂ ବ୍ରହ୍ମଣା ପ୍ରୋକ୍ତା ହ୍ୟଷ୍ଟାବିଂଶତିପର୍ୟଯେ ।
ତ୍ରେତାୟୁଗେ ଦାଶରଥୀ ରାମୋ ନାରାୟଣୋଽବ୍ୟଯଃ ॥ ୪୮॥
ଜନିଷ୍ୟତେ ଯୋଗମାୟା ସୀତା ଜନକବେଶ୍ମନି ।
ଭୂଭାରହରଣାର୍ଥାୟ ପ୍ରାର୍ଥିତୋଽୟଂ ମୟା କ୍ୱଚିତ୍ ॥ ୪୯॥
ସଭାର୍ୟୋ ରାଘବୋ ଭ୍ରାତ୍ରା ଗମିଷ୍ୟତି ମହାବନମ୍ ।
ତତ୍ର ସୀତାଂ ମହାମାୟାଂ ରାବଣୋଽପହରିଷ୍ୟତି ॥ ୫୦॥
ପଶ୍ଚାଦରାମେଣ ସାଚିବ୍ୟଂ ସୁଗ୍ରୀବସ୍ୟ ଭବିଷ୍ୟତି ।
ସୁଗ୍ରୀବୋ ଜାନକୀଂ ଦ୍ରଷ୍ଟୁଂ ବାନରାନ୍ ପ୍ରେଷୟିଷ୍ୟତି ॥ ୫୧॥
ତତ୍ରୈକୋ ବାନରୋ ରାତ୍ରାବାଗମିଷ୍ୟତି ତେଽନ୍ତିକମ୍ ।
ତ୍ୱୟା ଚ ଭର୍ତ୍ସିତଃ ସୋଽପି ତ୍ୱାଂ ହନିଷ୍ୟତି ମୁଷ୍ଟିନା ॥ ୫୨॥
ତେନାହତା ତ୍ୱଂ ବ୍ୟଥିତା ଭବିଷ୍ୟସି ଯଦାନଘେ ।
ତଦୈବ ରାବଣସ୍ୟାନ୍ତୋ ଭବିଷ୍ୟତି ନ ସଂଶୟଃ ॥ ୫୩॥
ତସ୍ମାତ୍ ତ୍ୱୟା ଜିତା ଲଙ୍କା ଜିତଂ ସର୍ୱଂ ତ୍ୱୟାନଘ ।
ରାବଣାନ୍ତଃପୁରବରେ କ୍ରୀଡାକାନନମୁତ୍ତମମ୍ ॥ ୫୪॥
ତନ୍ମଧ୍ୟେଽଶୋକବନିକା ଦିବ୍ୟପାଦପସଙ୍କୁଲା ।
ଅସ୍ତି ତସ୍ୟାଂ ମହାବୃକ୍ଷଃ ଶିଂଶପା ନାମ ମଧ୍ୟଗଃ ॥ ୫୫॥
ତତ୍ରାସ୍ତେ ଜାନକୀ ଘୋରରାକ୍ଷସୀଭିଃ ସୁରକ୍ଷିତା ।
ଦୃଷ୍ଟ୍ୱୈବ ଗଚ୍ଛ ତ୍ୱରିତଂ ରାଘବାୟ ନିବେଦୟ ॥ ୫୬॥
ଧନ୍ୟାହମପ୍ୟଦ୍ୟ ଚିରାୟ ରାଘବ-
ସ୍ମୃତିର୍ମମାସୀଦ୍ଭବପାଶମୋଚିନୀ ।
ତଦ୍ଭକ୍ତସଙ୍ଗୋଽପ୍ୟତିଦୁର୍ଲଭୋ ମମ
ପ୍ରସୀଦତାଂ ଦାଶରଥିଃ ସଦା ହୃଦି ॥ ୫୭॥
ଉଲ୍ଲଙ୍ଘିତେଽବ୍ଧୌ ପବନାତ୍ମଜେନ
ଧରାସୁତାୟାଶ୍ଚ ଦଶାନନସ୍ୟ ।
ପୁସ୍ଫୋର ବାମାକ୍ଷି ଭୁଜଶ୍ଚ ତୀବ୍ରଂ
ରାମସ୍ୟ ଦକ୍ଷାଙ୍ଗମତୀନ୍ଦ୍ରିୟସ୍ୟ ॥ ୫୮॥
ଇତି ଶ୍ରୀମଦଧ୍ୟାତ୍ମରାମାୟଣେ ଉମାମହେଶ୍ୱରସମ୍ବାଦେ ସୁନ୍ଦରକାଣ୍ଡେ
ପ୍ରଥମଃ ସର୍ଗଃ ॥ ୧॥
॥ ଦ୍ୱିତୀୟଃ ସର୍ଗଃ ॥
ଶ୍ରୀମହାଦେବ ଉବାଚ ।
ତତୋ ଜଗାମ ହନୁମାନ୍ ଲଙ୍କାଂ ପରମଶୋଭନାମ୍ ।
ରାତ୍ରୌ ସୂକ୍ଷ୍ମତନୁର୍ଭୂତ୍ୱା ବଭ୍ରାମ ପରିତଃ ପୁରୀମ୍ ॥ ୧॥
ସୀତାନ୍ୱେଷଣକାର୍ୟାର୍ଥୀ ପ୍ରବିବେଶ ନୃପାଲୟମ୍ ।
ତତ୍ର ସର୍ୱପ୍ରଦେଶେଷୁ ବିବିଚ୍ୟ ହନୁମାନ୍ କପିଃ ॥ ୨॥
ନାପଶ୍ୟଜ୍ଜାନକୀଂ ସ୍ମୃତ୍ୱା ତତୋ ଲଙ୍କାଭିଭାଷିତମ୍ ।
ଜଗାମ ହନୁମାନ୍ ଶୀଘ୍ରମଶୋକବନିକାଂ ଶୁଭାମ୍ ॥ ୩॥
ସୁରପାଦପସମ୍ବାଧାଂ ରତ୍ନସୋପାନବାପିକାମ୍ ।
ନାନାପକ୍ଷିମୃଗାକୀର୍ଣାଂ ସ୍ୱର୍ଣପ୍ରାସାଦଶୋଭିତାମ୍ ॥ ୪॥
ଫଲୈରାନମ୍ରଶାଖାଗ୍ରପାଦପୈଃ ପରିବାରିତାମ୍ ।
ବିଚିନ୍ୱନ୍ ଜାନକୀଂ ତତ୍ର ପ୍ରତିବୃକ୍ଷଂ ମରୁତ୍ସୁତଃ ॥ ୫॥
ଦଦର୍ଶାଭ୍ରଂଲିହଂ ତତ୍ର ଚୈତ୍ୟପ୍ରାସାଦମୁତ୍ତମମ୍ ।
ଦୃଷ୍ଟ୍ୱା ବିସ୍ମୟମାପନ୍ନୋ ମଣିସ୍ତମ୍ଭଶତାନ୍ୱିତମ୍ ॥ ୬॥
ସମତୀତ୍ୟ ପୁନର୍ଗତ୍ୱା କିଞ୍ଚିଦ୍ଦୂରଂ ସ ମାରୁତିଃ ।
ଦଦର୍ଶ ଶିଂଶପାବୃକ୍ଷମତ୍ୟନ୍ତନିବିଡଚ୍ଛଦମ୍ ॥ ୭॥
ଅଦୃଷ୍ଟାତପମାକୀର୍ଣଂ ସ୍ୱର୍ଣବର୍ଣବିହଙ୍ଗମମ୍ ।
ତନ୍ମୂଲେ ରାକ୍ଷସୀମଧ୍ୟେ ସ୍ଥିତାଂ ଜନକନନ୍ଦିନୀମ୍ ॥ ୮॥
ଦଦର୍ଶ ହନୁମାନ୍ ବୀରୋ ଦେବତାମିବ ଭୂତଲେ ।
ଏକବେଣୀଂ କୃଶାଂ ଦୀନାଂ ମଲିନାମ୍ବରଧାରିଣୀମ୍ ॥ ୯॥
ଭୁମୌ ଶୟାନାଂ ଶୋଚନ୍ତୀଂ ରାମରାମେତି ଭାଷିଣୀମ୍ ।
ତ୍ରାତାରଂ ନାଧିଗଚ୍ଛନ୍ତୀମୁପବାସକୃଶାଂ ଶୁଭାମ୍ ॥ ୧୦॥
ଶାଖାନ୍ତଚ୍ଛଦମଧ୍ୟସ୍ଥୋ ଦଦର୍ଶ କପିକୁଞ୍ଜରଃ ।
କୃତାର୍ଥୋଽହଂ କୃତାର୍ଥୋଽହଂ ଦୃଷ୍ଟ୍ୱା ଜନକନନ୍ଦିନୀମ୍ ॥ ୧୧॥
ମୟୈବ ସାଧିତଂ କାର୍ୟଂ ରାମସ୍ୟ ପରମାତ୍ମନଃ ।
ତତଃ କିଲକିଲାଶବ୍ଦୋ ବଭୂବାନ୍ତଃପୁରାଦ୍ବହିଃ ॥ ୧୨॥
କିମେତଦିତି ସଁଲ୍ଲୀନୋ ବୃକ୍ଷପତ୍ରେଷୁ ମାରୁତିଃ ।
ଆୟାନ୍ତଂ ରାବଣଂ ତତ୍ର ସ୍ତ୍ରୀଜନୈଃ ପରିବାରିତମ୍ ॥ ୧୩॥
ଦଶାସ୍ୟଂ ବିଂଶତିଭୁଜଂ ନୀଲାଞ୍ଜନଚୟୋପମମ୍ ।
ଦୃଷ୍ଟ୍ୱା ବିସ୍ମୟମାପନ୍ନଃ ପତ୍ରଖଣ୍ଡେଷ୍ୱଲୀୟତ ॥ ୧୪॥
ରାବଣୋ ରାଘବେଣାଶୁ ମରଣଂ ମେ କଥଂ ଭବେତ୍ ।
ସୀତାର୍ଥମପି ନାୟାତି ରାମଃ କିଂ କାରଣଂ ଭବେତ୍ ॥ ୧୫॥
ଇତ୍ୟେବଂ ଚିନ୍ତୟନ୍ନିତ୍ୟଂ ରାମମେବ ସଦା ହୃଦି ।
ତସ୍ମିନ୍ ଦିନେଽପରରାତ୍ରୌ ରାବଣୋ ରାକ୍ଷସାଧିପଃ ॥ ୧୬॥
ସ୍ୱପ୍ନେ ରାମେଣ ସନ୍ଦିଷ୍ଟଃ କଶ୍ଚିଦାଗତ୍ୟ ବାନରଃ ।
କାମରୂପଧରଃ ସୂକ୍ଷ୍ମୋ ବୃକ୍ଷାଗ୍ରସ୍ଥୋଽନୁପଶ୍ୟତି ॥ ୧୭॥
ଇତି ଦୃଷ୍ଟ୍ୱାଦ୍ଭୁତଂ ସ୍ୱପ୍ନଂ ସ୍ୱାତ୍ମନ୍ୟେବାନୁଚିନ୍ତ୍ୟ ସଃ ।
ସ୍ୱପ୍ନଃ କଦାଚିତ୍ସତ୍ୟଃ ସ୍ୟାଦେବଂ ତତ୍ର କରୋମ୍ୟହମ୍ ॥ ୧୮॥
ଜାନକୀଂ ବାକ୍ଶରୈର୍ୱିଦ୍ଧ୍ୱା ଦୁଃଖିତାଂ ନିତରାମହମ୍ ।
କରୋମି ଦୃଷ୍ଟ୍ୱା ରାମାୟ ନିବେଦୟତୁ ବାନରଃ ॥ ୧୯॥
ଇତ୍ୟେବଂ ଚିନ୍ତୟନ୍ ସୀତାସମୀପମଗମଦ୍ଦ୍ରୁତମ୍ ।
ନୂପୁରାଣାଂ କିଙ୍କିଣୀନାଂ ଶ୍ରୁତ୍ୱା ଶିଞ୍ଜିତମଙ୍ଗନା ॥ ୨୦॥
ସୀତା ଭୀତା ଲୀୟମାନା ସ୍ୱାତ୍ମନ୍ୟେବ ସୁମଧ୍ୟମା ।
ଅଧୋମୁଖ୍ୟଶ୍ରୁନୟନା ସ୍ଥିତା ରାମାର୍ପିତାନ୍ତରା ॥ ୨୧॥
ରାବଣୋଽପି ତଦା ସୀତାମାଲୋକ୍ୟାହ ସୁମଧ୍ୟମେ ।
ମାଂ ଦୃଷ୍ଟ୍ୱା କିଂ ବୃଥା ସୁଭ୍ରୁ ସ୍ୱାତ୍ମନ୍ୟେବ ବିଲୀୟସେ ॥ ୨୨॥
ରାମୋ ବନଚରାଣାଂ ହି ମଧ୍ୟେ ତିଷ୍ଠତି ସାନୁଜଃ ।
କଦାଚିଦ୍ଦୃଶ୍ୟତେ କୈଶ୍ଚିତ୍କଦାଚିନ୍ନୈବ ଦୃଶ୍ୟତେ ॥ ୨୩॥
ମୟା ତୁ ବହୁଧା ଲୋକାଃ ପ୍ରେଷିତାସ୍ତସ୍ୟ ଦର୍ଶନେ ।
ନ ପଶ୍ୟନ୍ତି ପ୍ରୟତ୍ନେନ ବୀକ୍ଷମାଣାଃ ସମନ୍ତତଃ ॥ ୨୪॥
କିଂ କରିଷ୍ୟସି ରାମେଣ ନିଃସ୍ପୃହେଣ ସଦା ତ୍ୱୟି ।
ତ୍ୱୟା ସଦାଲିଙ୍ଗିତୋଽପି ସମୀପସ୍ଥୋଽପି ସର୍ୱଦା ॥ ୨୫॥
ହୃଦୟେଽସ୍ୟ ନ ଚ ସ୍ନେହସ୍ତ୍ୱୟି ରାମସ୍ୟ ଜାୟତେ ।
ତ୍ୱତ୍କୃତାନ୍ ସର୍ୱଭୋଗାଂଶ୍ଚ ତ୍ୱଦ୍ଗୁଣାନପି ରାଘବଃ ॥ ୨୬॥
ଭୁଞ୍ଜାନୋଽପି ନ ଜାନାତି କୃତଘ୍ନୋ ନିର୍ଗୁଣୋଽଧମଃ ।
ତ୍ୱମାନୀତା ମୟା ସାଧ୍ୱୀ ଦୁଃଖଶୋକସମାକୁଲା ॥ ୨୭॥
ଇଦାନୀମପି ନାୟାତି ଭକ୍ତିହୀନଃ କଥଂ ବ୍ରଜେତ୍ ।
ନିଃସତ୍ତ୍ୱୋ ନିର୍ମମୋ ମାନୀ ମୂଢଃ ପଣ୍ଡିତମାନବାନ୍ ॥ ୨୮॥
ନରାଧମଂ ତ୍ୱଦ୍ୱିମୁଖଂ କିଂ କରିଷ୍ୟସି ଭାମିନି ।
ତ୍ୱୟ୍ୟତୀବ ସମାସକ୍ତଂ ମାଂ ଭଜସ୍ୱାସୁରୋତ୍ତମମ୍ ॥ ୨୯॥
ଦେବଗନ୍ଧର୍ୱନାଗାନାଂ ଯକ୍ଷକିନ୍ନରୟୋଷିତାମ୍ ।
ଭବିଷ୍ୟସି ନିୟୋକ୍ତ୍ରୀ ତ୍ୱଂ ଯଦି ମାଂ ପ୍ରତିପଦ୍ୟସେ ॥ ୩୦॥
ରାବଣସ୍ୟ ବଚଃ ଶ୍ରୁତ୍ୱା ସୀତାଽମର୍ଷସମନ୍ୱିତା ।
ଉବାଚାଧୋମୁଖୀ ଭୂତ୍ୱା ନିଧାୟ ତୃଣମନ୍ତରେ ॥ ୩୧॥
ରାଘବାଦ୍ବିଭ୍ୟତା ନୂନଂ ଭିକ୍ଷୁରୂପଂ ତ୍ୱୟା ଧୃତମ୍ ।
ରହିତେ ରାଘବାଭ୍ୟାଂ ତ୍ୱଂ ଶୁନୀବ ହବିରଧ୍ୱରେ ॥ ୩୨॥
ହୃତବାନସି ମାଂ ନୀଚ ତତ୍ଫଲଂ ପ୍ରାପ୍ସ୍ୟସେଽଚିରାତ୍ ।
ଯଦା ରାମଶରାଘାତବିଦାରିତବପୁର୍ଭବାନ୍ ॥ ୩୩॥
ଜ୍ଞାସ୍ୟସେଽମାନୁଷଂ ରାମଂ ଗମିଷ୍ୟସି ଯମାନ୍ତିକମ୍ ।
ସମୁଦ୍ରଂ ଶୋଷୟିତ୍ୱା ବା ଶରୈର୍ବଦ୍ଧ୍ୱାଥ ବାରିଧିମ୍ ॥ ୩୪॥
ହନ୍ତୁଂ ତ୍ୱାଂ ସମରେ ରାମୋ ଲକ୍ଷ୍ମଣେନ ସମନ୍ୱିତଃ ।
ଆଗମିଷ୍ୟତ୍ୟସନ୍ଦେହୋ ଦ୍ରକ୍ଷ୍ୟସେ ରାକ୍ଷସାଧମ ॥ ୩୫॥
ତ୍ୱାଂ ସପୁତ୍ରଂ ସହବଲଂ ହତ୍ୱା ନେଷ୍ୟତି ମାଂ ପୁରମ୍ ॥
ଶ୍ରୁତ୍ୱା ରକ୍ଷଃପତିଃ କ୍ରୁଦ୍ଧୋ ଜାନକ୍ୟାଃ ପରୁଷାକ୍ଷରମ୍ ॥ ୩୬॥
ବାକ୍ୟଂ କ୍ରୋଧସମାବିଷ୍ଟଃ ଖଡ୍ଗମୁଦ୍ୟମ୍ୟ ସତ୍ୱରଃ ।
ହନ୍ତୁଂ ଜନକରାଜସ୍ୟ ତନୟାଂ ତାମ୍ରଲୋଚନଃ ॥ ୩୭॥
ମନ୍ଦୋଦରୀ ନିବାର୍ୟାହ ପତିଂ ପତିହିତେ ରତା ।
ତ୍ୟଜୈନାଂ ମାନୁଷୀଂ ଦୀନାଂ ଦୁଃଖିତାଂ କୃପଣାଂ କୃଶାମ୍ ॥ ୩୮॥
ଦେବଗନ୍ଧର୍ୱନାଗାନାଂ ବହ୍ୱ୍ୟଃ ସନ୍ତି ବରାଙ୍ଗନାଃ ।
ତ୍ୱାମେବ ବରୟନ୍ତ୍ୟୁଚ୍ଚୈର୍ମଦମତ୍ତବିଲୋଚନାଃ ॥ ୩୯॥
ତତୋଽବ୍ରବୀଦ୍ଦଶଗ୍ରୀବୋ ରାକ୍ଷସୀର୍ୱିକୃତାନନାଃ ।
ଯଥା ମେ ବଶଗା ସୀତା ଭବିଷ୍ୟତି ସକାମନା ।
ତଥା ଯତଧ୍ୱଂ ତ୍ୱରିତଂ ତର୍ଜନାଦରଣାଦିଭିଃ ॥ ୪୦॥
ଦ୍ୱିମାସାଭ୍ୟନ୍ତରେ ସୀତା ଯଦି ମେ ବଶଗା ଭବେତ୍ ।
ତଦା ସର୍ୱସୁଖୋପେତା ରାଜ୍ୟଂ ଭୋକ୍ଷ୍ୟତି ସା ମୟା ॥ ୪୧॥
ଯଦି ମାସଦ୍ୱୟାଦୂର୍ଧ୍ୱଂ ମଚ୍ଛୟ୍ୟାଂ ନାଭିନନ୍ଦତି ।
ତଦା ମେ ପ୍ରାତରାଶାୟ ହତ୍ୱା କୁରୁତ ମାନୁଷୀମ୍ ॥ ୪୨॥
ଇତ୍ୟୁକ୍ତ୍ୱା ପ୍ରୟଯୌ ସ୍ତ୍ରୀଭୀ ରାବଣୋଽନ୍ତଃପୁରାଲୟମ୍ ।
ରାକ୍ଷସ୍ୟୋ ଜାନକୀମେତ୍ୟ ଭୀଷୟନ୍ତ୍ୟଃ ସ୍ୱତର୍ଜନୈଃ ॥ ୪୩॥
ତତ୍ରୈକା ଜାନକୀମାହ ଯୌବନଂ ତେ ବୃଥା ଗତମ୍ ।
ରାବଣେନ ସମାସାଦ୍ୟ ସଫଲଂ ତୁ ଭବିଷ୍ୟତି ॥ ୪୪॥
ଅପରା ଚାହ କୋପେନ କିଂ ବିଲମ୍ବେନ ଜାନକି ।
ଇଦାନୀଂ ଛେଦ୍ୟତାମଙ୍ଗଂ ବିଭଜ୍ୟ ଚ ପୃଥକ୍ ପୃଥକ୍ ॥ ୪୫॥
ଅନ୍ୟା ତୁ ଖଡ୍ଗମୁଦ୍ୟମ୍ୟ ଜାନକୀଂ ହନ୍ତୁମୁଦ୍ୟତା ।
ଅନ୍ୟା କରାଲବଦନା ବିଦାର୍ୟାସ୍ୟମଭୀଷୟତ୍ ॥ ୪୬॥
ଏବଂ ତାଂ ଭୀଷୟନ୍ତୀସ୍ତା ରାକ୍ଷସୀର୍ୱିକୃତାନନାଃ ।
ନିବାର୍ୟ ତ୍ରିଜଟା ବୃଦ୍ଧା ରାକ୍ଷସୀ ବାକ୍ୟମବ୍ରବୀତ୍ ॥ ୪୭॥
ଶୃଣୁଧ୍ୱଂ ଦୁଷ୍ଟରାକ୍ଷସ୍ୟୋ ମଦ୍ୱାକ୍ୟଂ ବୋ ହିତଂ ଭବେତ୍ ॥ ୪୮॥
ନ ଭୀଷୟଧ୍ୱଂ ରୁଦତୀଂ ନମସ୍କୁରୁତ ଜାନକୀମ୍ ।
ଇଦାନୀମେବ ମେ ସ୍ୱପ୍ନେ ରାମଃ କମଲଲୋଚନଃ ॥ ୪୯॥
ଆରୁହ୍ୟୈରାବତଂ ଶୁଭ୍ରଂ ଲକ୍ଷ୍ମଣେନ ସମାଗତଃ ।
ଦଗ୍ଧ୍ୱା ଲଙ୍କାପୁରୀଂ ସର୍ୱାଂ ହତ୍ୱା ରାବଣମାହବେ ॥ ୫୦॥
ଆରୋପ୍ୟ ଜାନକୀଂ ସ୍ୱାଙ୍କେ ସ୍ଥିତୋ ଦୃଷ୍ଟୋଽଗମୂର୍ଧନି ।
ରାବଣୋ ଗୋମୟହ୍ରଦେ ତୈଲାଭ୍ୟକ୍ତୋ ଦିଗମ୍ବରଃ ॥ ୫୧॥
ଅଗାହତ୍ପୁତ୍ରପୌତ୍ରୈଶ୍ଚ କୃତ୍ୱା ବଦନମାଲିକାମ୍ ।
ବିଭୀଷଣସ୍ତୁ ରାମସ୍ୟ ସନ୍ନିଧୌ ହୃଷ୍ଟମାନସଃ ॥ ୫୨॥
ସେବାଂ କରୋତି ରାମସ୍ୟ ପାଦୟୋର୍ଭକ୍ତିସଂୟୁତଃ ।
ସର୍ୱଥା ରାବଣଂ ରାମୋ ହତ୍ୱା ସକୁଲମଞ୍ଜସା ॥ ୫୩॥
ବିଭୀଷଣାୟାଧିପତ୍ୟଂ ଦତ୍ତ୍ୱା ସୀତାଂ ଶୁଭାନନାମ୍ ।
ଅଙ୍କେ ନିଧାୟ ସ୍ୱପୁରୀଂ ଗମିଷ୍ୟତି ନ ସଂଶୟଃ ॥ ୫୪॥
ତ୍ରିଜଟାୟା ବଚଃ ଶ୍ରୁତ୍ୱା ଭୀତାସ୍ତା ରାକ୍ଷସସ୍ତ୍ରିୟଃ ।
ତୂଷ୍ଣୀମାସଂସ୍ତତ୍ର ତତ୍ର ନିଦ୍ରାବଶମୁପାଗତାଃ ॥ ୫୫॥
ତର୍ଜିତା ରାକ୍ଷସୀଭିଃ ସା ସୀତା ଭୀତାତିବିହ୍ୱଲା ।
ତ୍ରାତାରଂ ନାଧିଗଚ୍ଛନ୍ତୀ ଦୁଃଖେନ ପରିମୂର୍ଚ୍ଛିତା ॥ ୫୬॥
ଅଶ୍ରୁଭିଃ ପୂର୍ଣନୟନା ଚିନ୍ତୟନ୍ତୀଦମବ୍ରବୀତ୍ ।
ପ୍ରଭାତେ ଭକ୍ଷୟିଷ୍ୟନ୍ତି ରାକ୍ଷସ୍ୟୋ ମାଂ ନ ସଂଶୟଃ ।
ଇଦାନୀମେବ ମରଣଂ କେନୋପାୟେନ ମେ ଭବେତ୍ ॥ ୫୭॥
ଏବଂ ସୁଦୁଃଖେନ ପରିପ୍ଲୁତା ସା
ବିମୁକ୍ତକଣ୍ଠଂ ରୁଦତୀ ଚିରାୟ ।
ଆଲମ୍ବ୍ୟ ଶାଖାଂ କୃତନିଶ୍ଚୟା ମୃତୌ
ନ ଜାନତୀ କଶ୍ଚିଦୁପାୟମଙ୍ଗନା ॥ ୫୮॥
ଇତି ଶ୍ରୀମଦଧ୍ୟାତ୍ମରାମାୟଣେ ଉମାମହେଶ୍ୱରସମ୍ବାଦେ ସୁନ୍ଦରକାଣ୍ଡେ
ଦ୍ୱିତୀୟଃ ସର୍ଗଃ ॥ ୨॥
॥ ତୃତୀୟଃ ସର୍ଗଃ ॥
ଶ୍ରୀମହାଦେବ ଉବାଚ ।
ଉଦ୍ବନ୍ଧନେନ ବା ମୋକ୍ଷ୍ୟେ ଶରୀରଂ ରାଘବଂ ବିନା ।
ଜୀବିତେନ ଫଲଂ କିଂ ସ୍ୟାନ୍ମମ ରକ୍ଷୋଽଧିମଧ୍ୟତଃ ॥ ୧॥
ଦୀର୍ଘା ବେଣୀ ମମାତ୍ୟର୍ଥମୁଦ୍ବନ୍ଧାୟ ଭବିଷ୍ୟତି ।
ଏବଂ ନିଶ୍ଚିତବୁଦ୍ଧିଂ ତାଂ ମରଣାୟାଥ ଜାନକୀମ୍ ॥ ୨॥
ବିଲୋକ୍ୟ ହନୁମାନ୍ କିଞ୍ଚିଦ୍ୱିଚାର୍ୟୈତଦଭାଷତ ।
ଶନୈଃ ଶନୈଃ ସୂକ୍ଷ୍ମରୂପୋ ଜାନକ୍ୟାଃ ଶ୍ରୋତ୍ରଗଂ ବଚଃ ॥ ୩॥
ଇକ୍ଷ୍ୱାକୁବଂଶସମ୍ଭୂତୋ ରାଜା ଦଶରଥୋ ମହାନ୍ ।
ଅୟୋଧ୍ୟାଧିପତିସ୍ତସ୍ୟ ଚତ୍ୱାରୋ ଲୋକବିଶ୍ରୁତାଃ ॥ ୪॥
ପୁତ୍ରା ଦେବସମାଃ ସର୍ୱେ ଲକ୍ଷଣୈରୁପଲକ୍ଷିତାଃ ।
ରାମଶ୍ଚଲକ୍ଷ୍ମଣଶ୍ଚୈବ ଭରତଶ୍ଚୈବ ଶତ୍ରୁହା ॥ ୫॥
ଜ୍ୟେଷ୍ଠୋ ରାମଃ ପିତୁର୍ୱାକ୍ୟାଦ୍ଦଣ୍ଡକାରଣ୍ୟମାଗତଃ ।
ଲକ୍ଷ୍ମଣେନ ସହ ଭ୍ରାତ୍ରା ସୀତୟା ଭାର୍ୟଯା ସହ ॥ ୬॥
ଉବାସ ଗୌତମୀତୀରେ ପଞ୍ଚବଟ୍ୟାଂ ମହାମନାଃ ।
ତତ୍ର ନୀତା ମହାଭାଗା ସୀତା ଜନକନନ୍ଦିନୀ ॥ ୭॥
ରହିତେ ରାମଚନ୍ଦ୍ରେଣ ରାବଣେନ ଦୁରାତ୍ମନା ।
ତତୋ ରାମୋଽତିଦୁଃଖାର୍ତୋ ମାର୍ଗମାଣୋଽଥ ଜାନକୀମ୍ ॥ ୮॥
ଜଟାୟୁଷଂ ପକ୍ଷିରାଜମପଶ୍ୟତ୍ପତିତଂ ଭୁବି ।
ତସ୍ମୈ ଦତ୍ତ୍ୱା ଦିବଂ ଶୀଘ୍ରମୃଷ୍ୟମୂକମୁପାଗମତ୍ ॥ ୯॥
ସୁଗ୍ରୀବେଣ କୃତା ମୈତ୍ରୀ ରାମସ୍ୟ ବିଦିତାତ୍ମନଃ ।
ତଦ୍ଭାର୍ୟାହାରିଣଂ ହତ୍ୱା ବାଲିନଂ ରଘୁନନ୍ଦନଃ ॥ ୧୦॥
ରାଜ୍ୟେଽଭିଷିଚ୍ୟ ସୁଗ୍ରୀବଂ ମିତ୍ରକାର୍ୟଂ ଚକାର ସଃ ।
ସୁଗ୍ରୀବସ୍ତୁ ସମାନାୟ୍ୟ ବାନରାନ୍ ବାନରପ୍ରଭୁଃ ॥ ୧୧॥
ପ୍ରେଷୟାମାସ ପରିତୋ ବାନରାନ୍ ପରିମାର୍ଗଣେ ।
ସୀତାୟାସ୍ତତ୍ର ଚୈକୋଽହଂ ସୁଗ୍ରୀବସଚିବୋ ହରିଃ ॥ ୧୨॥
ସମ୍ପାତିବଚନାଚ୍ଛୀଘ୍ରମୁଲ୍ଲଙ୍ଘ୍ୟ ଶତୟୋଜନମ୍ ।
ସମୁଦ୍ରଂ ନଗରୀଂ ଲଙ୍କାଂ ବିଚିନ୍ୱନ୍ ଜାନକୀଂ ଶୁଭାମ୍ ॥ ୧୩॥
ଶନୈରଶୋକବନିକାଂ ବିଚିନ୍ୱନ୍ ଶିଂଶପାତରୁମ୍ ।
ଅଦ୍ରାକ୍ଷଂ ଜାନକୀମତ୍ର ଶୋଚନ୍ତୀଂ ଦୁଃଖସମ୍ପ୍ଲୁତାମ୍ ॥ ୧୪॥
ରାମସ୍ୟ ମହିଷୀଂ ଦେବୀଂ କୃତକୃତ୍ୟୋଽହମାଗତଃ ।
ଇତ୍ୟୁକ୍ତ୍ୱୋପରରାମାଥ ମାରୁତିର୍ବୁଦ୍ଧିମତ୍ତରଃ ॥ ୧୫॥
ସୀତା କ୍ରମେଣ ତତ୍ସର୍ୱଂ ଶ୍ରୁତ୍ୱା ବିସ୍ମୟମାୟଯୌ ।
କିମିଦଂ ମେ ଶ୍ରୁତଂ ବ୍ୟୋମ୍ନି ବାୟୁନା ସମୁଦୀରିତମ୍ ॥ ୧୬॥
ସ୍ୱପ୍ନୋ ବା ମେ ମନୋଭ୍ରାନ୍ତିର୍ୟଦି ବା ସତ୍ୟମେବ ତତ୍ ।
ନିଦ୍ରା ମେ ନାସ୍ତି ଦୁଃଖେନ ଜାନାମ୍ୟେତତ୍କୁତୋ ଭ୍ରମଃ ॥ ୧୭॥
ଯେନ ମେ କର୍ଣପୀୟୁଷଂ ବଚନଂ ସମୁଦୀରିତମ୍ ।
ସ ଦୃଶ୍ୟତାଂ ମହାଭାଗଃ ପ୍ରିୟବାଦୀ ମମାଗ୍ରତଃ ॥ ୧୮॥
ଶ୍ରୁତ୍ୱା ତଜ୍ଜାନକୀବାକ୍ୟଂ ହନୁମାନ୍ ପତ୍ରଖଣ୍ଡତଃ ।
ଅବତୀର୍ୟ ଶନୈଃ ସୀତାପୁରତଃ ସମବସ୍ଥିତଃ ॥ ୧୯॥
କଲବିଙ୍କପ୍ରମାଣାଙ୍ଗୋ ରକ୍ତାସ୍ୟଃ ପୀତବାନରଃ ।
ନନାମ ଶନକୈଃ ସୀତାଂ ପ୍ରାଞ୍ଜଲିଃ ପୁରତଃ ସ୍ଥିତଃ ॥ ୨୦॥
ଦୃଷ୍ଟ୍ୱା ତଂ ଜାନକୀ ଭୀତା ରାବଣୋଽୟମୁପାଗତଃ ।
ମାଂ ମୋହୟିତୁମାୟାତୋ ମାୟଯା ବାନରାକୃତିଃ ॥ ୨୧॥
ଇତ୍ୟେବଂ ଚିନ୍ତୟିତ୍ୱା ସା ତୂଷ୍ଣିମାସୀଦଧୋମୁଖୀ ।
ପୁନରପ୍ୟାହ ତାଂ ସୀତାଂ ଦେବି ଯତ୍ତ୍ୱଂ ବିଶଙ୍କସେ ॥ ୨୨॥
ନାହଂ ତଥାବିଧୋ ମାତସ୍ତ୍ୟଜ ଶଙ୍କାଂ ମୟି ସ୍ଥିତାମ୍ ।
ଦାସୋଽହଂ କୋସଲେନ୍ଦ୍ରସ୍ୟ ରାମସ୍ୟ ପରମାତ୍ମନଃ ॥ ୨୩॥
ସଚିବୋଽହଂ ହରୀନ୍ଦ୍ରସ୍ୟ ସୁଗ୍ରୀବସ୍ୟ ଶୁଭପ୍ରଦେ ।
ବାୟୋଃ ପୁତ୍ରୋଽହମଖିଲପ୍ରାଣଭୂତସ୍ୟ ଶୋଭନେ ॥ ୨୪॥
ତଚ୍ଛ୍ରୁତ୍ୱା ଜାନକୀ ପ୍ରାହ ହନୂମନ୍ତଂ କୃତାଞ୍ଜଲିମ୍ ।
ବାନରାଣାଂ ମନୁଷ୍ୟାଣାଂ ସଙ୍ଗତିର୍ଘଟତେ କଥମ୍ ॥ ୨୫॥
ଯଥା ତ୍ୱଂ ରାମଚନ୍ଦ୍ରସ୍ୟ ଦାସୋଽହମିତି ଭାଷସେ ।
ତାମାହ ମାରୁତିଃ ପ୍ରୀତୋ ଜାନକୀଂ ପୁରତଃ ସ୍ଥିତଃ ॥ ୨୬॥
ଋଷ୍ୟମୂକମଗାଦ୍ରାମଃ ଶବର୍ୟା ନୋଦିତଃ ସୁଧୀଃ ।
ସୁଗ୍ରୀବୋ ଋଷ୍ୟମୂକସ୍ଥୋ ଦୃଷ୍ଟବାନ୍ ରାମଲକ୍ଷ୍ମଣୌ ॥ ୨୭॥
ଭୀତୋ ମାଂ ପ୍ରେଷୟାମାସ ଜ୍ଞାତୁଂ ରାମସ୍ୟ ହୃଦ୍ଗତମ୍ ।
ବ୍ରହ୍ମଚାରିବପୁର୍ଧୃତ୍ୱା ଗତୋଽହଂ ରାମସନ୍ନିଧିମ୍ ॥ ୨୮॥
ଜ୍ଞାତ୍ୱା ରାମସ୍ୟ ସଦ୍ଭାବଂ ସ୍କନ୍ଧୋପରି ନିଧାୟ ତୌ ।
ନୀତ୍ୱା ସୁଗ୍ରୀବସାମୀପ୍ୟଂ ସଖ୍ୟଂ ଚାକରବଂ ତୟୋଃ ॥ ୨୯॥
ସୁଗ୍ରୀବସ୍ୟ ହୃତା ଭାର୍ୟା ବାଲିନା ତଂ ରଘୂତ୍ତମଃ ।
ଜଘାନୈକେନ ବାଣେନ ତତୋ ରାଜ୍ୟେଽଭ୍ୟଷେଚୟତ୍ ॥ ୩୦॥
ସୁଗ୍ରୀବଂ ବାନରାଣାଂ ସ ପ୍ରେଷୟାମାସ ବାନରାନ୍ ।
ଦିଗ୍ଭ୍ୟୋ ମହାବଲାନ୍ ବୀରାନ୍ ଭବତ୍ୟାଃ ପରିମାର୍ଗଣେ ॥ ୩୧॥
ଗଚ୍ଛନ୍ତଂ ରାଘବୋ ଦୃଷ୍ଟ୍ୱା ମାମଭାଷତ ସାଦରମ୍ ॥ ୩୨॥
ତ୍ୱୟି କାର୍ୟମଶେଷଂ ମେ ସ୍ଥିତଂ ମାରୁତନନ୍ଦନ ।
ବ୍ରୂହି ମେ କୁଶଲଂ ସର୍ୱଂ ସୀତାୟୈ ଲକ୍ଷ୍ମଣସ୍ୟ ଚ ॥ ୩୩॥
ଅଙ୍ଗୁଲୀୟକମେତନ୍ମେ ପରିଜ୍ଞାନାର୍ଥମୁତ୍ତମମ୍ ।
ସୀତାୟୈ ଦୀୟତାଂ ସାଧୁ ମନ୍ନାମାକ୍ଷରମୁଦ୍ରିତମ୍ ॥ ୩୪॥
ଇତ୍ୟୁକ୍ତ୍ୱା ପ୍ରଦଦୌ ମହ୍ୟଂ କରାଗ୍ରାଦଙ୍ଗୁଲୀୟକମ୍ ।
ପ୍ରୟତ୍ନେନ ମୟାନୀତଂ ଦେବି ପଶ୍ୟାଙ୍ଗୁଲୀୟକମ୍ ॥ ୩୫॥
ଇତ୍ୟୁକ୍ତ୍ୱା ପ୍ରଦଦୌ ଦେବ୍ୟୈ ମୁଦ୍ରିକାଂ ମାରୁତାତ୍ମଜଃ ।
ନମସ୍କୃତ୍ୟ ସ୍ଥିତୋ ଦୂରାଦ୍ବଦ୍ଧାଞ୍ଜଲିପୁଟୋ ହରିଃ ॥ ୩୬॥
ଦୃଷ୍ଟ୍ୱା ସୀତା ପ୍ରମୁଦିତା ରାମନାମାଙ୍କିତାଂ ତଦା ।
ମୁଦ୍ରିକାଂ ଶିରସା ଧୃତ୍ୱା ସ୍ରବଦାନନ୍ଦନେତ୍ରଜା ॥ ୩୭॥
କପେ ମେ ପ୍ରାଣଦାତା ତ୍ୱଂ ବୁଦ୍ଧିମାନସି ରାଘବେ ।
ଭକ୍ତୋଽସି ପ୍ରିୟକାରୀ ତ୍ୱଂ ବିଶ୍ୱାସୋଽସ୍ତି ତବୈବ ହି ॥ ୩୮॥
ନୋ ଚେନ୍ମତ୍ସନ୍ନିଧିଂ ଚାନ୍ୟଂ ପୁରୁଷଂ ପ୍ରେଷୟେତ୍କଥମ୍ ।
ହନୂମନ୍ ଦୃଷ୍ଟମଖିଲଂ ମମ ଦୁଃଖାଦିକଂ ତ୍ୱୟା ॥ ୩୯॥
ସର୍ୱଂ କଥୟ ରାମାୟ ଯଥା ମେ ଜାୟତେ ଦୟା ।
ମାସଦ୍ୱୟାବଧି ପ୍ରାଣାଃ ସ୍ଥାସ୍ୟନ୍ତି ମମ ସତ୍ତମ ॥ ୪୦॥
ନାଗମିଷ୍ୟତି ଚେଦ୍ରାମୋ ଭକ୍ଷୟିଷ୍ୟତି ମାଂ ଖଲଃ ।
ଅତଃ ଶୀଘ୍ରଂ କପୀନ୍ଦ୍ରେଣ ସୁଗ୍ରୀବେଣ ସମନ୍ୱିତଃ ॥ ୪୧॥
ବାନରାନୀକପୈଃ ସାର୍ଧଂ ହତ୍ୱା ରାବଣମାହବେ ।
ସପୁତ୍ରଂ ସବଲଂ ରାମୋ ଯଦି ମାଂ ମୋଚୟେତ୍ପ୍ରଭୁଃ ॥ ୪୨॥
ତତ୍ତସ୍ୟ ସଦୃଶଂ ବୀର୍ୟଂ ବୀର ବର୍ଣୟ ବର୍ଣିତମ୍ ।
ଯଥା ମାଂ ତାରୟେଦ୍ରାମୋ ହତ୍ୱା ଶୀଘ୍ରଂ ଦଶାନନମ୍ ॥ ୪୩॥
ତଥା ଯତସ୍ୱ ହନୁମନ୍ ବାଚା ଧର୍ମମବାପ୍ନୁହି ।
ହନୁମାନପି ତାମାହ ଦେବି ଦୃଷ୍ଟୋ ଯଥା ମୟା ॥ ୪୪॥
ରାମଃ ସଲକ୍ଷ୍ମଣଃ ଶୀଘ୍ରମାଗମିଷ୍ୟତି ସାୟୁଧଃ ।
ସୁଗ୍ରୀବେଣ ସସୈନ୍ୟେନ ହତ୍ୱା ଦଶମୁଖଂ ବଲାତ୍ ॥ ୪୫॥
ସମାନେଷ୍ୟତି ଦେବି ତ୍ୱାମୟୋଧ୍ୟାଂ ନାତ୍ର ସଂଶୟଃ ।
ତମାହ ଜାନକୀ ରାମଃ କଥଂ ବାରିଧିମାତତମ୍ ॥ ୪୬॥
ତୀର୍ତ୍ୱାୟାସ୍ୟତ୍ୟମେୟାତ୍ମା ବାନରାନୀକପୈଃ ସହ ।
ହନୂମାନାହ ମେ ସ୍କନ୍ଧାବାରୁହ୍ୟ ପୁରୁଷର୍ଷଭୌ ॥ ୪୭॥
ଆୟାସ୍ୟତଃ ସସୈନ୍ୟଶ୍ଚ ସୁଗ୍ରୀବୋ ବାନରେଶ୍ୱରଃ ।
ବିହାୟସା କ୍ଷଣେନୈବ ତୀର୍ତ୍ୱା ବାରିଧିମାତତମ୍ ॥ ୪୮॥
ନିର୍ଦହିଷ୍ୟତି ରକ୍ଷୌଘାଂସ୍ତ୍ୱତ୍କୃତେ ନାତ୍ର ସଂଶୟଃ ।
ଅନୁଜ୍ଞାଂ ଦେହି ମେ ଦେବି ଗଚ୍ଛାମି ତ୍ୱରୟାନ୍ୱିତଃ ॥ ୪୯॥
ଦ୍ରଷ୍ଟୁଂ ରାମଂ ସହ ଭ୍ରାତ୍ରା ତ୍ୱରୟାମି ତବାନ୍ତିକମ୍ ।
ଦେବି କିଞ୍ଚିଦଭିଜ୍ଞାନଂ ଦେହି ମେ ଯେନ ରାଘବଃ ॥ ୫୦॥
ବିଶ୍ୱସେନ୍ମାଂ ପ୍ରୟତ୍ନେନ ତତୋ ଗନ୍ତା ସମୁତ୍ସୁକଃ ।
ତତଃ କିଞ୍ଚିଦ୍ୱିଚାର୍ୟାଥ ସୀତା କମଲଲୋଚନା ॥ ୫୧॥
ବିମୁଚ୍ୟ କେଶପାଶାନ୍ତେ ସ୍ଥିତଂ ଚୂଡାମଣିଂ ଦଦୌ ।
ଅନେନ ବିଶ୍ୱସେଦ୍ରାମସ୍ତ୍ୱାଂ କପୀନ୍ଦ୍ର ସଲକ୍ଷ୍ମଣଃ ॥ ୫୨॥
ଅଭିଜ୍ଞାନାର୍ଥମନ୍ୟଚ୍ଚ ବଦାମି ତବ ସୁବ୍ରତ ।
ଚିତ୍ରକୂଟଗିରୌ ପୂର୍ୱମେକଦା ରହସି ସ୍ଥିତଃ ।
ମଦଙ୍କେ ଶିର ଆଧାୟ ନିଦ୍ରାତି ରଘୁନନ୍ଦନଃ ॥ ୫୩॥
ଐନ୍ଦ୍ରଃ କାକସ୍ତଦାଗତ୍ୟ ନଖୈସ୍ତୁଣ୍ଡେନ ଚାସକୃତ୍ ।
ମତ୍ପାଦାଙ୍ଗୁଷ୍ଠମାରକ୍ତଂ ବିଦଦାରାମିଷାଶୟା ॥ ୫୪॥
ତତୋ ରାମଃ ପ୍ରବୁଦ୍ଧ୍ୟାଥ ଦୃଷ୍ଟ୍ୱା ପାଦଂ କୃତବ୍ରଣମ୍ ।
କେନ ଭଦ୍ରେ କୃତଂ ଚୈତଦ୍ୱିପ୍ରିୟଂ ମେ ଦୁରାତ୍ମନା ॥ ୫୫॥
ଇତ୍ୟୁକ୍ତ୍ୱା ପୁରତୋଽପଶ୍ୟଦ୍ୱାୟସଂ ମାଂ ପୁନଃ ପୁନଃ ।
ଅଭିଦ୍ରବନ୍ତଂ ରକ୍ତାକ୍ତନଖତୁଣ୍ଡଂ ଚୁକୋପ ହ ॥ ୫୬॥
ତୃଣମେକମୁପାଦାୟ ଦିବ୍ୟାସ୍ତ୍ରେଣାଭିୟୋଜ୍ୟ ତତ୍ ।
ଚିକ୍ଷେପ ଲୀଲୟା ରାମୋ ବାୟସୋପରି ତଜ୍ଜ୍ୱଲନ୍ ॥ ୫୭॥
ଅଭ୍ୟଦ୍ରବଦ୍ୱାୟସଶ୍ଚ ଭୀତୋ ଲୋକାନ୍ ଭ୍ରମନ୍ ପୁନଃ ।
ଇନ୍ଦ୍ରବ୍ରହ୍ମାଦିଭିଶ୍ଚାପି ନ ଶକ୍ୟୋ ରକ୍ଷିତୁଂ ତଦା ॥ ୫୮॥
ରାମସ୍ୟ ପାଦୟୋରଗ୍ରେଽପତଦ୍ଭୀତ୍ୟା ଦୟାନିଧେଃ ।
ଶରଣାଗତମାଲୋକ୍ୟ ରାମସ୍ତମିଦମବ୍ରବୀତ୍ ॥ ୫୯॥
ଅମୋଘମେତଦସ୍ତ୍ରଂ ମେ ଦତ୍ୱୈକାକ୍ଷିମିତୋ ବ୍ରଜ ।
ସବ୍ୟଂ ଦତ୍ତ୍ୱା ଗତଃ କାକ ଏବଂ ପୌରୁଷବାନପି ॥ ୬୦॥
ଉପେକ୍ଷତେ କିମର୍ଥଂ ମାମିଦାନୀଂ ସୋଽପି ରାଘବଃ ।
ହନୂମାନପି ତାମାହ ଶ୍ରୁତ୍ୱା ସୀତାନୁଭାଷିତମ୍ ॥ ୬୧॥
ଦେବି ତ୍ୱାଂ ଯଦି ଜାନାତି ସ୍ଥିତାମତ୍ର ରଘୂତ୍ତମଃ ।
କରିଷ୍ୟତି କ୍ଷଣାଦ୍ଭସ୍ମ ଲଙ୍କାଂ ରାକ୍ଷସମଣ୍ଡିତାମ୍ ॥ ୬୨॥
ଜାନକୀ ପ୍ରାହ ତଂ ବତ୍ସ କଥଂ ତ୍ୱଂ ଯୋତ୍ସ୍ୟସେଽସୁରୈଃ ।
ଅତିସୂକ୍ଷ୍ମବପୁଃ ସର୍ୱେ ବାନରାଶ୍ଚ ଭବାଦୃଶାଃ ॥ ୬୩॥
ଶ୍ରୁତ୍ୱା ତଦ୍ୱଚନଂ ଦେବ୍ୟୈ ପୂର୍ୱରୂପମଦର୍ଶୟତ୍ ।
ମେରୁମନ୍ଦରସଙ୍କାଶଂ ରକ୍ଷୋଗଣବିଭୀଷଣମ୍ ॥ ୬୪॥
ଦୃଷ୍ଟ୍ୱା ସୀତା ହନୁମନ୍ତଂ ମହାପର୍ୱତସନ୍ନିଭମ୍ ।
ହର୍ଷେଣ ମହତାବିଷ୍ଟା ପ୍ରାହ ତଂ କପିକୁଞ୍ଜରମ୍ ॥ ୬୫॥
ସମର୍ଥୋଽସି ମହାସତ୍ତ୍ୱ ଦ୍ରକ୍ଷ୍ୟନ୍ତି ତ୍ୱାଂ ମହାବଲମ୍ ।
ରାକ୍ଷସ୍ୟସ୍ତେ ଶୁଭଃ ପନ୍ଥା ଗଚ୍ଛ ରାମାନ୍ତିକଂ ଦ୍ରୁତମ୍ ॥ ୬୬॥
ବୁଭୁକ୍ଷିତଃ କପିଃ ପ୍ରାହ ଦର୍ଶନାତ୍ପାରଣଂ ମମ ।
ଭବିଷ୍ୟତି ଫଲୈଃ ସର୍ୱୈସ୍ତବ ଦୃଷ୍ଟୌ ସ୍ଥିତୈର୍ହି ମେ ॥ ୬୭॥
ତଥେତ୍ୟୁକ୍ତଃ ସ ଜାନକ୍ୟା ଭକ୍ଷୟିତ୍ୱା ଫଲଂ କପିଃ ।
ତତଃ ପ୍ରସ୍ଥାପିତୋଽଗଚ୍ଛଜ୍ଜାନକୀଂ ପ୍ରଣିପତ୍ୟ ସଃ ।
କିଞ୍ଚିଦ୍ଦୂରମଥୋ ଗତ୍ୱା ସ୍ୱାତ୍ମନ୍ୟେବାନ୍ୱଚିନ୍ତୟତ୍ ॥ ୬୮॥
କାର୍ୟାର୍ଥମାଗତୋ ଦୂତଃ ସ୍ୱାମିକାର୍ୟାବିରୋଧତଃ ।
ଅନ୍ୟତ୍କିଞ୍ଚିଦସମ୍ପାଦ୍ୟ ଗଚ୍ଛତ୍ୟଧମ ଏବ ସଃ ॥ ୬୯॥
ଅତୋଽହଂ କିଞ୍ଚିଦନ୍ୟଚ୍ଚ କୃତ୍ୱା ଦୃଷ୍ଟ୍ୱାଥ ରାବଣମ୍ ।
ସମ୍ଭାଷ୍ୟ ଚ ତତୋ ରାମଦର୍ଶନାର୍ଥଂ ବ୍ରଜାମ୍ୟହମ୍ ॥ ୭୦॥
ଇତି ନିଶ୍ଚିତ୍ୟ ମନସା ବୃକ୍ଷଖଣ୍ଡାନ୍ ମହାବଲଃ ।
ଉତ୍ପାଟ୍ୟାଶୋକବନିକାଂ ନିର୍ୱୃକ୍ଷାମକରୋତ୍କ୍ଷଣାତ୍ ॥ ୭୧॥
ସୀତାଽଽଶ୍ରୟନଗଂ ତ୍ୟକ୍ତ୍ୱା ବନଂ ଶୂନ୍ୟଂ ଚକାର ସଃ ।
ଉତ୍ପାଟୟନ୍ତଂ ବିପିନଂ ଦୃଷ୍ଟ୍ୱା ରାକ୍ଷସୟୋଷିତଃ ॥ ୭୨॥
ଅପୃଚ୍ଛନ୍ ଜାନକୀଂ କୋଽସୌ ବାନରାକୃତିରୁଦ୍ଭଟଃ ॥ ୭୩॥
ଜାନକ୍ୟୁବାଚ ।
ଭବତ୍ୟ ଏବ ଜାନନ୍ତି ମାୟାଂ ରାକ୍ଷସନିର୍ମିତାମ୍ ।
ନାହମେନଂ ବିଜାନାମି ଦୁଃଖଶୋକସମାକୁଲା ॥ ୭୪॥
ଇତ୍ୟୁକ୍ତାସ୍ତ୍ୱରିତଂ ଗତ୍ୱା ରାକ୍ଷସ୍ୟୋ ଭୟପୀଡିତାଃ ।
ହନୂମତା କୃତଂ ସର୍ୱଂ ରାବଣାୟ ନ୍ୟବେଦୟନ୍ ॥ ୭୫॥
ଦେବ କଶ୍ଚିନ୍ମହାସତ୍ତ୍ୱୋ ବାନରାକୃତିଦେହଭୃତ୍ ।
ସୀତୟା ସହ ସମ୍ଭାଷ୍ୟ ହ୍ୟଶୋକବନିକାଂ କ୍ଷଣାତ୍ ।
ଉତ୍ପାଟ୍ୟ ଚୈତ୍ୟପ୍ରାସାଦଂ ବଭଞ୍ଜାମିତବିକ୍ରମଃ ॥ ୭୬॥
ପ୍ରାସାଦରକ୍ଷିଣଃ ସର୍ୱାନ୍ ହତ୍ୱା ତତ୍ରୈବ ତସ୍ଥିବାନ୍ ।
ତଚ୍ଛ୍ରୁତ୍ୱା ତୂର୍ଣମୁତ୍ଥାୟ ବନଭଙ୍ଗଂ ମହାଽପ୍ରିୟମ୍ ॥ ୭୭॥
କିଙ୍କରାନ୍ ପ୍ରେଷୟାମାସ ନିୟୁତଂ ରାକ୍ଷସାଧିପଃ ।
ନିଭଗ୍ନଚୈତ୍ୟପ୍ରାସାଦପ୍ରଥମାନ୍ତରସଂସ୍ଥିତଃ ॥ ୭୮॥
ହନୁମାନ୍ ପର୍ୱତାକାରୋ ଲୋହସ୍ତମ୍ଭକୃତାୟୁଧଃ ।
କିଞ୍ଚିଲ୍ଲାଙ୍ଗୂଲଚଲନୋ ରକ୍ତାସ୍ୟୋ ଭୀଷଣାକୃତିଃ ॥ ୭୯॥
ଆପତନ୍ତଂ ମହାସଙ୍ଘଂ ରାକ୍ଷସାନାଂ ଦଦର୍ଶ ସଃ ।
ଚକାର ସିଂହନାଦଂ ଚ ଶ୍ରୁତ୍ୱା ତେ ମୁମୁହୁର୍ଭୃଶମ୍ ॥ ୮୦॥
ହନୁମନ୍ତମଥୋ ଦୃଷ୍ଟ୍ୱା ରାକ୍ଷସା ଭୀଷଣାକୃତିମ୍ ।
ନିର୍ଜଘ୍ନୁର୍ୱିବିଧାସ୍ତ୍ରୌଘୈଃ ସର୍ୱରାକ୍ଷସଘାତିନମ୍ ॥ ୮୧॥
ତତ ଉତ୍ଥାୟ ହନୁମାନ୍ ମୁଦ୍ଗରେଣ ସମନ୍ତତଃ ।
ନିଷ୍ପିପେଷ କ୍ଷଣାଦେବ ମଶକାନିବ ଯୂଥପଃ ॥ ୮୨॥
ନିହତାନ୍ କିଙ୍କରାନ୍ ଶ୍ରୁତ୍ୱା ରାବଣଃ କ୍ରୋଧମୂର୍ଚ୍ଛିତଃ ।
ପଞ୍ଚ ସେନାପତୀଂସ୍ତତ୍ର ପ୍ରେଷୟାମାସ ଦୁର୍ମଦାନ୍ ॥ ୮୩॥
ହନୂମାନପି ତାନ୍ ସର୍ୱାଂଲ୍ଲୋହସ୍ତମ୍ଭେନ ଚାହନତ୍ ।
ତତଃ କ୍ରୁଦ୍ଧୋ ମନ୍ତ୍ରିସୁତାନ୍ ପ୍ରେଷୟାମାସ ସପ୍ତ ସଃ ॥ ୮୪॥
ଆଗତାନପି ତାନ୍ ସର୍ୱାନ୍ ପୂର୍ୱବଦ୍ୱାନରେଶ୍ୱରଃ ।
କ୍ଷଣାନ୍ନିଃଶେଷତୋ ହତ୍ୱା ଲୋହସ୍ତମ୍ଭେନ ମାରୁତିଃ ॥ ୮୫॥
ପୂର୍ୱସ୍ଥାନମୁପାଶ୍ରିତ୍ୟ ପ୍ରତୀକ୍ଷନ୍ ରାକ୍ଷସାନ୍ ସ୍ଥିତଃ ।
ତତୋ ଜଗାମ ବଲବାନ୍ କୁମାରୋଽକ୍ଷଃ ପ୍ରତାପବାନ୍ ॥ ୮୬॥
ତମୁତ୍ପପାତ ହନୁମାନ୍ ଦୃଷ୍ଟ୍ୱାକାଶେ ସମୁଦ୍ଗରଃ ।
ଗଗନାତ୍ତ୍ୱରିତୋ ମୂର୍ଧ୍ନି ମୁଦ୍ଗରେଣ ବ୍ୟତାଡୟତ୍ ॥ ୮୭॥
ହତ୍ୱା ତମକ୍ଷଂ ନିଃଶେଷଂ ବଲଂ ସର୍ୱଂ ଚକାର ସଃ ॥ ୮୮॥
ତତଃ ଶ୍ରୁତ୍ୱା କୁମାରସ୍ୟ ବଧଂ ରାକ୍ଷସପୁଙ୍ଗବଃ ।
କ୍ରୋଧେନ ମହତାବିଷ୍ଟ ଇନ୍ଦ୍ରଜେତାରମବ୍ରବୀତ୍ ॥ ୮୯॥
ପୁତ୍ର ଗଚ୍ଛାମ୍ୟହଂ ତତ୍ର ଯତ୍ରାସ୍ତେ ପୁତ୍ରହା ରିପୁଃ ।
ହତ୍ୱା ତମଥବା ବଦ୍ଧ୍ୱା ଆନୟିଷ୍ୟାମି ତେଽନ୍ତିକମ୍ ॥ ୯୦॥
ଇନ୍ଦ୍ରଜିତ୍ପିତରଂ ପ୍ରାହ ତ୍ୟଜ ଶୋକଂ ମହାମତେ ।
ମୟି ସ୍ଥିତେ କିମର୍ଥଂ ତ୍ୱଂ ଭାଷସେ ଦୁଃଖିତଂ ବଚଃ ॥ ୯୧॥
ବଦ୍ଧ୍ୱାଽଽନେଷ୍ୟେ ଦ୍ରୁତଂ ତାତ ବାନରଂ ବ୍ରହ୍ମପାଶତଃ ।
ଇତ୍ୟୁକ୍ତ୍ୱା ରଥମାରୁହ୍ୟ ରାକ୍ଷସୈର୍ବହୁଭିର୍ୱୃତଃ ॥ ୯୨॥
ଜଗାମ ବାୟୁପୁତ୍ରସ୍ୟ ସମୀପଂ ବୀରବିକ୍ରମଃ ।
ତତୋଽତିଗର୍ଜିତଂ ଶ୍ରୁତ୍ୱା ସ୍ତମ୍ଭମୁଦ୍ୟମ୍ୟ ବୀର୍ୟବାନ୍ ॥ ୯୩॥
ଉତ୍ପପାତ ନଭୋଦେଶଂ ଗରୁତ୍ମାନିବ ମାରୁତିଃ ।
ତତୋ ଭ୍ରମନ୍ତଂ ନଭସି ହନୂମନ୍ତଂ ଶିଲୀମୁଖୈଃ ॥ ୯୪॥
ବିଦ୍ଧ୍ୱା ତସ୍ୟ ଶିରୋଭାଗମିଷୁଭିଶ୍ଚାଷ୍ଟଭିଃ ପୁନଃ ।
ହୃଦୟଂ ପାଦୟୁଗଲଂ ଷଡ୍ଭିରେକେନ ବାଲଧିମ୍ ॥ ୯୫॥
ଭେଦୟିତ୍ୱା ତତୋ ଘୋରଂ ସିଂହନାଦମଥାକରୋତ୍ ।
ତତୋଽତିହର୍ଷାଦ୍ଧନୁମାନ୍ ସ୍ତମ୍ଭମୁଦ୍ୟସ୍ୟ ବୀର୍ୟବାନ୍ ॥ ୯୬॥
ଜଘାନ ସାରଥିଂ ସାଶ୍ୱଂ ରଥଂ ଚାଚୂର୍ଣୟତ୍କ୍ଷଣାତ୍ ।
ତତୋଽନ୍ୟଂ ରଥମାଦାୟ ମେଘନାଦୋ ମହାବଲଃ ॥ ୯୭॥
ଶୀଘ୍ରଂ ବ୍ରହ୍ମାସ୍ତ୍ରମାଦାୟ ବଦ୍ଧ୍ୱା ବାନରପୁଙ୍ଗବମ୍ ।
ନିନାୟ ନିକଟଂ ରାଜ୍ଞୋ ରାବଣସ୍ୟ ମହାବଲଃ ॥ ୯୮॥
ଯସ୍ୟ ନାମ ସତତଂ ଜପନ୍ତି ଯେ-
ଽଜ୍ଞାନକର୍ମକୃତବନ୍ଧନଂ କ୍ଷଣାତ୍ ।
ସଦ୍ୟ ଏବ ପରିମୁଚ୍ୟ ତତ୍ପଦଂ
ଯାନ୍ତି କୋଟିରବିଭାସୁରଂ ଶିବମ୍ ॥ ୯୯॥
ତସ୍ୟୈବ ରାମସ୍ୟ ପଦାମ୍ବୁଜଂ ସଦା
ହୃତ୍ପଦ୍ମମଧ୍ୟେ ସୁନିଧାୟ ମାରୁତିଃ ।
ସଦୈବ ନିର୍ମୁକ୍ତସମସ୍ତବନ୍ଧନଃ
କିଂ ତସ୍ୟ ପାଶୈରିତରୈଶ୍ଚ ବନ୍ଧନୈଃ ॥ ୧୦୦॥
ଇତି ଶ୍ରୀମଦଧ୍ୟାତ୍ମରାମାୟଣେ ଉମାମହେଶ୍ୱରସମ୍ବାଦେ ସୁନ୍ଦରକାଣ୍ଡେ
ତୃତୀୟଃ ସର୍ଗଃ ॥ ୩॥
॥ ଚତୁର୍ଥଃ ସର୍ଗଃ ॥
ଶ୍ରୀମହାଦେବ ଉବାଚ ।
ଯାନ୍ତଂ କପୀନ୍ଦ୍ରଂ ଧୃତପାଶବନ୍ଧନଂ
ବିଲୋକୟନ୍ତଂ ନଗରଂ ବିଭୀତବତ୍ ।
ଅତାଡୟନ୍ମୁଷ୍ଟିତଲୈଃ ସୁକୋପନାଃ
ପୌରାଃ ସମନ୍ତାଦନୁୟାନ୍ତ ଈକ୍ଷିତୁମ୍ ॥ ୧॥
ବ୍ରହ୍ମାସ୍ତ୍ରମେନଂ କ୍ଷଣମାତ୍ରସଙ୍ଗମଂ
କୃତ୍ୱା ଗତଂ ବ୍ରହ୍ମବରେଣ ସତ୍ୱରମ୍ ।
ଜ୍ଞାତ୍ୱା ହନୂମାନପି ଫଲ୍ଗୁରଜ୍ଜୁଭି-
ର୍ଧୃତୋ ଯୟୌ କାର୍ୟବିଶେଷଗୌରବାତ୍ ॥ ୨॥
ସଭାନ୍ତରସ୍ଥସ୍ୟ ଚ ରାବଣସ୍ୟ ତଂ
ପୁରୋ ନିଧାୟାହ ବଲାରିଜିତ୍ତଦା ।
ବଦ୍ଧୋ ମୟା ବ୍ରହ୍ମବରେଣ ବାନରଃ
ସମାଗତୋଽନେନ ହତା ମହାସୁରାଃ ॥ ୩॥
ଯଦ୍ୟୁକ୍ତମତ୍ରାର୍ୟ ବିଚାର୍ୟ ମନ୍ତ୍ରିଭି-
ର୍ୱିଧୀୟତାମେଷ ନ ଲୌକିକୋ ହରିଃ ।
ତତୋ ବିଲୋକ୍ୟାହ ସ ରାକ୍ଷସେଶ୍ୱରଃ
ପ୍ରହସ୍ତମଗ୍ରେ ସ୍ଥିତମଞ୍ଜନାଦ୍ରିଭମ୍ ॥ ୪॥
ପ୍ରହସ୍ତ ପୃଚ୍ଛୈନମସୌ କିମାଗତଃ
କିମତ୍ର କାର୍ୟଂ କୁତ ଏବ ବାନରଃ ।
ବନଂ କିମର୍ଥଂ ସକଲଂ ବିନାଶିତଂ
ହତାଃ କିମର୍ଥଂ ମମ ରାକ୍ଷସା ବଲାତ୍ ॥ ୫॥
ତତଃ ପ୍ରହସ୍ତୋ ହନୁମନ୍ତମାଦରାତ୍
ପପ୍ରଚ୍ଛ କେନ ପ୍ରହିତୋଽସି ବାନର ।
ଭୟଂ ଚ ତେ ମାସ୍ତୁ ବିମୋକ୍ଷ୍ୟସେ ମୟା
ସତ୍ୟଂ ବଦସ୍ୱାଖିଲରାଜସନ୍ନିଧୌ ॥ ୬॥
ତତୋଽତିହର୍ଷାତ୍ପବନାତ୍ମଜୋ ରିପୁଂ
ନିରୀକ୍ଷ୍ୟ ଲୋକତ୍ରୟକଣ୍ଟକାସୁରମ୍ ।
ବକ୍ତୁଂ ପ୍ରଚକ୍ରେ ରଘୁନାଥସତ୍କଥାଂ
କ୍ରମେଣ ରାମଂ ମନସା ସ୍ମରନ୍ମୁହୁଃ ॥ ୭॥
ଶୃଣୁ ସ୍ଫୁଟଂ ଦେବଗଣାଦ୍ୟମିତ୍ର ହେ
ରାମସ୍ୟ ଦୂତୋଽହମଶେଷହୃତ୍ସ୍ଥିତେଃ ।
ଯସ୍ୟାଖିଲେଶସ୍ୟ ହୃତାଧୁନା ତ୍ୱୟା
ଭାର୍ୟା ସ୍ୱନାଶାୟ ଶୁନେବ ସଦ୍ଧବିଃ ॥ ୮॥
ସ ରାଘବୋଽଭ୍ୟେତ୍ୟ ମତଙ୍ଗପର୍ୱତଂ
ସୁଗ୍ରୀବମୈତ୍ରୀମନଲସ୍ୟ ସନ୍ନିଧୌ ।
କୃତ୍ୱୈକବାଣେନ ନିହତ୍ୟ ବାଲିନଂ
ସୁଗ୍ରୀବମେବାଧିପତିଂ ଚକାର ତମ୍ ॥ ୯॥
ସ ବାନରାଣାମଧିପୋ ମହାବଲୀ
ମହାବଲୈର୍ୱାନରୟୂଥକୋଟିଭିଃ ।
ରାମେଣ ସାର୍ଧଂ ସହ ଲକ୍ଷ୍ମଣେନ ଭୋଃ
ପ୍ରବର୍ଷଣେଽମର୍ଷୟୁତୋଽବତିଷ୍ଠତେ ॥ ୧୦॥
ସଞ୍ଚୋଦିତାସ୍ତେନ ମହାହରୀଶ୍ୱରା
ଧରାସୁତାଂ ମାର୍ଗୟିତୁଂ ଦିଶୋ ଦଶ ।
ତତ୍ରାହମେକଃ ପବନାତ୍ମଜଃ କପିଃ
ସୀତାଂ ବିଚିନ୍ୱନ୍ ଶନକୈଃ ସମାଗତଃ ॥ ୧୧॥
ଦୃଷ୍ଟା ମୟା ପଦ୍ମପଲାଶଲୋଚନା
ସୀତା କପିତ୍ୱାଦ୍ୱିପିନଂ ବିନାଶିତମ୍ ।
ଦୃଷ୍ଟ୍ୱା ତତୋଽହଂ ରଭସା ସମାଗତାନ୍
ମାଂ ହନ୍ତୁକାମାନ୍ ଧୃତଚାପସାୟକାନ୍ ॥ ୧୨॥
ମୟା ହତାସ୍ତେ ପରିରକ୍ଷିତଂ ବପୁଃ
ପ୍ରିୟୋ ହି ଦେହୋଽଖିଲଦେହିନାଂ ପ୍ରଭୋ ।
ବ୍ରହ୍ମାସ୍ତ୍ରପାଶେନ ନିବଧ୍ୟ ମାଂ ତତଃ
ସମାଗମନ୍ମେଘନିନାଦନାମକଃ ॥ ୧୩॥
ସ୍ପୃଷ୍ଟ୍ୱୈବ ମାଂ ବ୍ରହ୍ମବରପ୍ରଭାବତଃ
ତ୍ୟକ୍ତ୍ୱା ଗତଂ ସର୍ୱମବୈମି ରାବଣ ।
ତଥାପ୍ୟହଂ ବଦ୍ଧ ଇବାଗତୋ ହିତଂ
ପ୍ରବକ୍ତୁକାମଃ କରୁଣାରସାର୍ଦ୍ରଧୀଃ ॥। ୧୪॥
ବିଚାର୍ୟ ଲୋକସ୍ୟ ବିବେକତୋ ଗତିଂ
ନ ରାକ୍ଷସୀଂ ବୁଦ୍ଧିମୁପୈହି ରାବଣ ।
ଦୈବୀଂ ଗତିଂ ସଂସୃତିମୋକ୍ଷହୈତୁକୀଂ
ସମାଶ୍ରୟାତ୍ୟନ୍ତହିତାୟ ଦେହିନଃ ॥ ୧୫॥
ତ୍ୱଂ ବ୍ରହ୍ମଣୋ ହ୍ୟୁତ୍ତମବଂଶସମ୍ଭବଃ ।
ପୌଲସ୍ତ୍ୟପୁତ୍ରୋଽସି କୁବେରବାନ୍ଧବଃ ।
ଦେହାତ୍ମବୁଦ୍ଧ୍ୟାପି ଚ ପଶ୍ୟ ରାକ୍ଷସୋ
ନାସ୍ୟାତ୍ମବୁଦ୍ଧ୍ୟା କିମୁ ରାକ୍ଷସୋ ନହି ॥ ୧୬॥
ଶରୀରବୁଦ୍ଧୀନ୍ଦ୍ରିୟଦୁଃଖସନ୍ତତିଃ
ନ ତେ ନ ଚ ତ୍ୱଂ ତବ ନିର୍ୱିକାରତଃ ।
ଅଜ୍ଞାନହେତୋଶ୍ଚ ତଥୈବ ସନ୍ତତେଃ
ଅସତ୍ତ୍ୱମସ୍ୟାଃ ସ୍ୱପତୋ ହି ଦୃଶ୍ୟବତ୍ ॥ ୧୭॥
ଇଦଂ ତୁ ସତ୍ୟଂ ତବ ନାସ୍ତି ବିକ୍ରିୟା
ବିକାରହେତୁର୍ନ ଚ ତେଽଦ୍ୱୟତ୍ୱତଃ ।
ଯଥା ନଭଃ ସର୍ୱଗତଂ ନ ଲିପ୍ୟତେ
ତଥା ଭବାନ୍ ଦେହଗତୋଽପି ସୂକ୍ଷ୍ମକଃ ।
ଦେହେନ୍ଦ୍ରିୟପ୍ରାଣଶରୀରସଙ୍ଗତଃ
ତ୍ୱାତ୍ମେତି ବୁଦ୍ଧ୍ୱାଖିଲବନ୍ଧଭାଗ୍ଭବେତ୍ ॥ ୧୮॥
ଚିନ୍ମାତ୍ରମେବାହମଜୋଽହମକ୍ଷରୋ
ହ୍ୟାନନ୍ଦଭାବୋଽହମିତି ପ୍ରମୁଚ୍ୟତେ ।
ଦେହୋଽପ୍ୟନାତ୍ମା ପୃଥିବୀବିକାରଜୋ
ନ ପ୍ରାଣ ଆତ୍ମାଽନିଲ ଏଷ ଏବ ସଃ ॥ ୧୯॥
ମନୋଽପ୍ୟହଙ୍କାରବିକାର ଏବ ନୋ
ନ ଚାପି ବୁଦ୍ଧିଃ ପ୍ରକୃତେର୍ୱିକାରଜା ।
ଆତ୍ମା ଚିଦାନନ୍ଦମୟୋଽବିକାରବାନ୍
ଦେହାଦିସଙ୍ଘାଦ୍ୱ୍ୟତିରିକ୍ତ ଈଶ୍ୱରଃ ॥ ୨୦॥
ନିରଞ୍ଜନୋ ମୁକ୍ତ ଉପାଧିତଃ ସଦା
ଜ୍ଞାତ୍ୱୈବମାତ୍ମାନମିତୋ ବିମୁଚ୍ୟତେ ।
ଅତୋଽହମାତ୍ୟନ୍ତିକମୋକ୍ଷସାଧନଂ
ବକ୍ଷ୍ୟେ ଶୃଣୁଷ୍ୱାବହିତୋ ମହାମତେ ॥ ୨୧॥
ବିଷ୍ଣୋର୍ହି ଭକ୍ତିଃ ସୁବିଶୋଧନଂ ଧିୟଃ
ତତୋ ଭବେଜ୍ଜ୍ଞାନମତୀବ ନିର୍ମଲମ୍ ।
ବିଶୁଦ୍ଧତତ୍ତ୍ୱାନୁଭବୋ ଭବେତ୍ତତଃ
ସମ୍ୟଗ୍ୱିଦିତ୍ୱା ପରମଂ ପଦଂ ବ୍ରଜେତ୍ ॥ ୨୨॥
ଅତୋ ଭଜସ୍ୱାଦ୍ୟ ହରିଂ ରମାପତିଂ
ରାମଂ ପୁରାଣଂ ପ୍ରକୃତେଃ ପରଂ ବିଭୁମ୍ ।
ବିସୃଜ୍ୟ ମୌର୍ଖ୍ୟଂ ହୃଦି ଶତ୍ରୁଭାବନାଂ
ଭଜସ୍ୱ ରାମଂ ଶରଣାଗତପ୍ରିୟମ୍ ।
ସୀତାଂ ପୁରସ୍କୃତ୍ୟ ସପୁତ୍ରବାନ୍ଧବୋ
ରାମଂ ନମସ୍କୃତ୍ୟ ବିମୁଚ୍ୟସେ ଭୟାତ୍ ॥ ୨୩॥
ରାମଂ ପରାତ୍ମାନମଭାବୟନ୍ ଜନୋ
ଭକ୍ତ୍ୟା ହୃଦିସ୍ଥଂ ସୁଖରୂପମଦ୍ୱୟମ୍ ।
କଥଂ ପରଂ ତୀରମବାପ୍ନୁୟାଜ୍ଜନୋ
ଭବାମ୍ବୁଧେର୍ଦୁଃଖତରଙ୍ଗମାଲିନଃ ॥ ୨୪॥
ନୋ ଚେତ୍ତ୍ୱମଜ୍ଞାନମୟେନ ବହ୍ନିନା
ଜ୍ୱଲନ୍ତମାତ୍ମାନମରକ୍ଷିତାରିବତ୍ ।
ନୟସ୍ୟଧୋଽଧଃ ସ୍ୱକୃତୈଶ୍ଚ ପାତକୈଃ
ବିମୋକ୍ଷଶଙ୍କା ନ ଚ ତେ ଭବିଷ୍ୟତି ॥ ୨୫॥
ଶ୍ରୁତ୍ୱାମୃତାସ୍ୱାଦସମାନଭାଷିତଂ
ତଦ୍ୱାୟୁସୂନୋର୍ଦଶକନ୍ଧରୋଽସୁରଃ ।
ଅମୃଷ୍ୟମାଣୋଽତିରୁଷା କପୀଶ୍ୱରଂ
ଜଗାଦ ରକ୍ତାନ୍ତବିଲୋଚନୋ ଜ୍ୱଲନ୍ ॥ ୨୬॥
କଥଂ ମମାଗ୍ରେ ବିଲପସ୍ୟଭୀତବତ୍
ପ୍ଲବଙ୍ଗମାନାମଧମୋଽସି ଦୁଷ୍ଟଧୀଃ ।
କ ଏଷ ରାମଃ କତମୋ ବନେଚରୋ
ନିହନ୍ମି ସୁଗ୍ରୀବୟୁତଂ ନରାଧମମ୍ ॥ ୨୭॥
ତ୍ୱାଂ ଚାଦ୍ୟ ହତ୍ୱା ଜନକାତ୍ମଜାଂ ତତୋ
ନିହନ୍ମି ରାମଂ ସହଲକ୍ଷ୍ମଣଂ ତତଃ ।
ସୁଗ୍ରୀବମଗ୍ରେ ବଲିନଂ କପୀଶ୍ୱରଂ
ସବାନରଂ ହନ୍ମ୍ୟଚିରେଣ ବାନର ।
ଶ୍ରୁତ୍ୱା ଦଶଗ୍ରୀବବଚଃ ସ ମାରୁତିଃ
ବିବୃଦ୍ଧକୋପେନ ଦହନ୍ନିବାସୁରମ୍ ॥ ୨୮॥
ନ ମେ ସମା ରାବଣକୋଟୟୋଽଧମ
ରାମସ୍ୟ ଦାସୋଽହମପାରବିକ୍ରମଃ ।
ଶ୍ରୁତ୍ୱାତିକୋପେନ ହନୂମତୋ ବଚୋ
ଦଶାନନୋ ରାକ୍ଷସମେବମବ୍ରବୀତ୍ ॥ ୨୯॥
ପାର୍ଶ୍ୱେ ସ୍ଥିତଂ ମାରୟ ଖଣ୍ଡଶଃ କପିଂ
ପଶ୍ୟନ୍ତୁ ସର୍ୱେଽସୁରମିତ୍ରବାନ୍ଧବାଃ ।
ନିବାରୟାମାସ ତତୋ ବିଭୀଷଣୋ
ମହାସୁରଂ ସାୟୁଧମୁଦ୍ୟତଂ ବଧେ ।
ରାଜନ୍ ବଧାର୍ହୋ ନ ଭବେତ୍କଥଞ୍ଚନ
ପ୍ରତାପୟୁକ୍ତୈଃ ପରରାଜବାନରଃ ॥ ୩୦॥
ହତେଽସ୍ମିନ୍ ବାନରେ ଦୂତେ ବାର୍ତା କୋ ବା ନିବେଦୟେତ୍
ରାମାୟ ତ୍ୱଂ ଯମୁଦ୍ଦିଶ୍ୟ ବଧାୟ ସମୁପସ୍ଥିତଃ ॥ ୩୧॥
ଅତୋ ବଧସମଂ କିଞ୍ଚିଦନ୍ୟଚ୍ଚିନ୍ତୟ ବାନରେ ।
ସଚିହ୍ନୋ ଗଚ୍ଛତୁ ହରିର୍ୟଂ ଦୃଷ୍ଟ୍ୱାଽଽୟାସ୍ୟତି ଦ୍ରୁତମ୍ ॥ ୩୨॥
ରାମଃ ସୁଗ୍ରୀବସହିତସ୍ତତୋ ଯୁଦ୍ଧଂ ଭବେତ୍ତବ ।
ବିଭୀଷଣବଚଃ ଶ୍ରୁତ୍ୱା ରାବଣୋଽପ୍ୟେତଦବ୍ରବୀତ୍ ॥ ୩୩॥
ବାନରାଣାଂ ହି ଲାଙ୍ଗୂଲେ ମହାମାନୋ ଭବେତ୍କିଲ ।
ଅତୋ ବସ୍ତ୍ରାଦିଭିଃ ପୁଚ୍ଛଂ ବେଷ୍ଟୟିତ୍ୱା ପ୍ରୟତ୍ନତଃ ॥ ୩୪॥
ବହ୍ନିନା ଯୋଜୟିତ୍ୱୈନଂ ଭ୍ରାମୟିତ୍ୱା ପୁରେଽଭିତଃ ।
ବିସର୍ଜୟତ ପଶ୍ୟନ୍ତୁ ସର୍ୱେ ବାନରୟୂଥପାଃ ॥ ୩୫॥
ତଥେତି ଶଣପଟ୍ଟୈଶ୍ଚ ବସ୍ତ୍ରୈରନ୍ୟୈରନେକଶଃ ।
ତୈଲାକ୍ତୈର୍ୱେଷ୍ଟୟାମାସୁର୍ଲାଙ୍ଗୂଲଂ ମାରୁତେର୍ଦୃଢମ୍ ॥ ୩୬॥
ପୁଚ୍ଛାଗ୍ରେ କିଞ୍ଚିଦନଲଂ ଦୀପୟିତ୍ୱାଥ ରାକ୍ଷସାଃ ।
ରଜ୍ଜୁଭିଃ ସୁଦୃଢଂ ବଦ୍ଧ୍ୱା ଧୃତ୍ୱା ତଂ ବଲିନୋଽସୁରାଃ ॥ ୩୭॥
ସମନ୍ତାଦ୍ଭ୍ରାମୟାମାସୁଶ୍ଚୋରୋଽୟମିତି ବାଦିନଃ ।
ତୂର୍ୟଘୋଷୈର୍ଘୋଷୟନ୍ତସ୍ତାଡୟନ୍ତୋ ମୁହୁର୍ମୁହୁଃ ॥ ୩୮॥
ହନୂମତାପି ତତ୍ସର୍ୱଂ ସୋଢଂ କିଞ୍ଚିଚ୍ଚିକୀର୍ଷୁଣା ।
ଗତ୍ୱା ତୁ ପଶ୍ଚିମଦ୍ୱାରସମୀପଂ ତତ୍ର ମାରୁତିଃ ॥ ୩୯॥
ସୂକ୍ଷ୍ମୋ ବଭୂବ ବନ୍ଧେଭ୍ୟୋ ନିଃସୃତଃ ପୁନରପ୍ୟସୌ ।
ବଭୂବ ପର୍ୱତାକାରସ୍ତତ ଉତ୍ପ୍ଲୁତ୍ୟ ଗୋପୁରମ୍ ॥ ୪୦॥
ତତ୍ରୈକଂ ସ୍ତମ୍ଭମାଦାୟ ହତ୍ୱା ତାନ୍ ରକ୍ଷିଣଃ କ୍ଷଣାତ୍ ।
ବିଚାର୍ୟ କାର୍ୟଶେଷଂ ସ ପ୍ରାସାଦାଗ୍ରାଦ୍ଗୃହାଦ୍ଗୃହମ୍ ॥ ୪୧॥
ଉତ୍ପ୍ଲୁତ୍ୟୋପ୍ଲୁତ୍ୟ ସନ୍ଦୀପ୍ତପୁଚ୍ଛେନ ମହତା କପିଃ ।
ଦଦାହ ଲଙ୍କାମଖିଲାଂ ସାଟ୍ଟପ୍ରାସାଦତୋରଣାମ୍ ॥ ୪୨॥
ହା ତାତ ପୁତ୍ର ନାଥେତି କ୍ରନ୍ଦମାନାଃ ସମନ୍ତତଃ ।
ବ୍ୟାପ୍ତାଃ ପ୍ରାସାଦଶିଖରେଽପ୍ୟାରୂଢା ଦୈତ୍ୟଯୋଷିତଃ ॥ ୪୩॥
ଦେବତା ଇବ ଦୃଶ୍ୟନ୍ତେ ପତନ୍ତ୍ୟଃ ପାବକେଽଖିଲାଃ ।
ବିଭୀଷଣଗୃହଂ ତ୍ୟକ୍ତ୍ୱା ସର୍ୱଂ ଭସ୍ମୀକୃତଂ ପୁରମ୍ ॥ ୪୪॥
ତତ ଉତ୍ପ୍ଲୁତ୍ୟ ଜଲଧୌ ହନୂମାନ୍ମାରୁତାତ୍ମଜଃ ।
ଲାଙ୍ଗୂଲଂ ମଜ୍ଜୟିତ୍ୱାନ୍ତଃ ସ୍ୱସ୍ଥଚିତ୍ତୋ ବଭୂବ ସଃ ॥ ୪୫॥
ବାୟୋଃ ପ୍ରିୟସଖିତ୍ୱାଚ୍ଚ ସୀତୟା ପ୍ରାର୍ଥିତୋଽନଲଃ ।
ନ ଦଦାହ ହରେଃ ପୁଚ୍ଛଂ ବଭୂବାତ୍ୟନ୍ତଶୀତଲଃ ॥ ୪୬॥
ଯନ୍ନାମସଂସ୍ମରଣଧୂତସମସ୍ତପାପାଃ
ତାପତ୍ରୟାନଲମପୀହ ତରନ୍ତି ସଦ୍ୟଃ ।
ତସ୍ୟୈବ କିଂ ରଘୁବରସ୍ୟ ବିଶିଷ୍ଟଦୂତଃ
ସନ୍ତପ୍ୟତେ କଥମସୌ ପ୍ରକୃତାନଲେନ ॥ ୪୭॥
ଇତି ଶ୍ରୀମଦଧ୍ୟାତ୍ମରାମାୟଣେ ଉମାମହେଶ୍ୱରସମ୍ବାଦେ ସୁନ୍ଦରକାଣ୍ଡେ
ଚତୁର୍ଥଃ ସର୍ଗଃ ॥ ୪॥
॥ ପଞ୍ଚମଃ ସର୍ଗଃ ॥
ଶ୍ରୀମହାଦେବ ଉବାଚ ।
ତତଃ ସୀତାଂ ନମସ୍କୃତ୍ୟ ହନୂମାନବ୍ରବୀଦ୍ୱଚଃ ।
ଆଜ୍ଞାପୟତୁ ମାଂ ଦେବି ଭବତୀ ରାମସନ୍ନିଧିମ୍ ॥ ୧॥
ଗଚ୍ଛାମି ରାମସ୍ତ୍ୱାଂ ଦ୍ରଷ୍ଟୁମାଗମିଷ୍ୟତି ସାନୁଜଃ ।
ଇତ୍ୟୁକ୍ତ୍ୱା ତ୍ରିଃପରିକ୍ରମ୍ୟ ଜାନକୀଂ ମାରୁତାତ୍ମଜଃ ॥ ୨॥
ପ୍ରଣମ୍ୟ ପ୍ରସ୍ଥିତୋ ଗନ୍ତୁମିଦଂ ବଚନମବ୍ରବୀତ୍ ।
ଦେବି ଗଚ୍ଛାମି ଭଦ୍ରଂ ତେ ତୂର୍ଣଂ ଦ୍ରକ୍ଷ୍ୟସି ରାଘବମ୍ ॥ ୩॥
ଲକ୍ଷ୍ମଣଂ ଚ ସସୁଗ୍ରୀବଂ ବାନରାୟୁତକୋଟିଭିଃ ।
ତତଃ ପ୍ରାହ ହନୂମନ୍ତଂ ଜାନକୀ ଦୁଃଖକର୍ଶିତା॥ ୪॥
ତ୍ୱାଂ ଦୃଷ୍ଟ୍ୱା ବିସ୍ମୃତଂ ଦୁଃଖମିଦାନୀଂ ତ୍ୱଂ ଗମିଷ୍ୟସି ।
ଇତଃ ପରଂ କଥଂ ବର୍ତେ ରାମବାର୍ତାଶ୍ରୁତିଂ ବିନା ॥ ୫ ॥
ମାରୁତିରୁବାଚ ।
ଯଦ୍ୟେବଂ ଦେବି ମେ ସ୍କନ୍ଧମାରୋହ କ୍ଷଣମାତ୍ରତଃ
ରାମେଣ ଯୋଜୟିଷ୍ୟାମି ମନ୍ୟସେ ଯଦି ଜାନକି ॥ ୬॥
ସୀତୋବାଚ ।
ରାମଃ ସାଗରମାଶୋଷ୍ୟ ବଦ୍ଧ୍ୱା ବା ଶରପଞ୍ଜରୈଃ ।
ଆଗତ୍ୟ ବାନରୈଃ ସାର୍ଧଂ ହତ୍ୱା ରାବଣମାହବେ ॥ ୭॥
ମାଂ ନୟେଦ୍ୟଦି ରାମସ୍ୟ କୀର୍ତିର୍ଭବତି ଶାଶ୍ୱତୀ ।
ଅତୋ ଗଚ୍ଛ କଥଂ ଚାପି ପ୍ରାଣାନ୍ ସନ୍ଧାରୟାମ୍ୟହମ୍ ॥ ୮॥
ଇତି ପ୍ରସ୍ଥାପିତୋ ବୀରଃ ସୀତୟା ପ୍ରଣିପତ୍ୟ ତାମ୍ ।
ଜଗାମ ପର୍ୱତସ୍ୟାଗ୍ରେ ଗନ୍ତୁଂ ପାରଂ ମହୋଦଧେଃ ॥ ୯॥
ତତ୍ର ଗତ୍ୱା ମହାସତ୍ତ୍ୱଃ ପାଦାଭ୍ୟାଂ ପୀଡୟନ୍ ଗିରିମ୍ ।
ଜଗାମ ବାୟୁବେଗେନ ପର୍ୱତଶ୍ଚ ମହୀତଲମ୍ ॥ ୧୦॥
ଗତୋ ମହୀସମାନତ୍ୱଂ ତ୍ରିଂଶଦ୍ୟୋଜନମୁଚ୍ଛ୍ରିତଃ ।
ମାରୁତିର୍ଗଗନାନ୍ତଃସ୍ଥୋ ମହାଶବ୍ଦଂ ଚକାର ସଃ ॥ ୧୧॥
ତଂ ଶ୍ରୁତ୍ୱା ବାନରାଃ ସର୍ୱେ ଜ୍ଞାତ୍ୱା ମାରୁତିମାଗତମ୍ ।
ହର୍ଷେଣ ମହତାବିଷ୍ଟାଃ ଶବ୍ଦଂ ଚକ୍ରୁର୍ମହାସ୍ୱନମ୍ ॥ ୧୨॥
ଶବ୍ଦେନୈବ ବିଜାନୀମଃ କୃତକାର୍ୟଃ ସମାଗତଃ ।
ହନୂମାନେବ ପଶ୍ୟଧ୍ୱଂ ବାନରା ବାନରର୍ଷଭମ୍ ॥ ୧୩॥
ଏବଂ ବ୍ରୁବତ୍ସୁ ବୀରେଷୁ ବାନରେଷୁ ସ ମାରୁତିଃ ।
ଅବତୀର୍ୟ ଗିରେର୍ମୁର୍ଧ୍ନି ବାନରାନିଦମବ୍ରବୀତ୍ ॥ ୧୪॥
ଦୃଷ୍ଟା ସୀତା ମୟା ଲଙ୍କା ଧର୍ଷିତା ଚ ସକାନନା ।
ସମ୍ଭାଷିତୋ ଦଶଗ୍ରୀବସ୍ତତୋଽହଂ ପୁନରାଗତଃ ॥ ୧୫॥
ଇଦାନୀମେବ ଗଚ୍ଛାମୋ ରାମସୁଗ୍ରୀବସନ୍ନିଧିମ୍ ।
ଇତ୍ୟୁକ୍ତା ବାନରାଃ ସର୍ୱେ ହର୍ଷେଣାଲିଙ୍ଗ୍ୟ ମାରୁତିମ୍ ॥ ୧୬॥
କେଚିଚ୍ଚୁଚୁମ୍ବୁର୍ଲାଙ୍ଗୂଲଂ ନନୃତୁଃ କେଚିଦୁତ୍ସୁକାଃ ।
ହନୂମତା ସମେତାସ୍ତେ ଜଗ୍ମୁଃ ପ୍ରସ୍ରବଣଂ ଗିରିମ୍ ॥ ୧୭॥
ଗଚ୍ଛନ୍ତୋ ଦଦୃଶୁର୍ୱୀରା ବନଂ ସୁଗ୍ରୀବରକ୍ଷିତମ୍ ।
ମଧୁସଞ୍ଜ୍ଞଂ ତଦା ପ୍ରାହୁରଙ୍ଗଦଂ ବାନରର୍ଷଭାଃ ॥ ୧୮॥
କ୍ଷୁଧିତାଃ ସ୍ମୋ ବୟଂ ବୀର ଦେହ୍ୟନୁଜ୍ଞାଂ ମହାମତେ ।
ଭକ୍ଷୟାମଃ ଫଲାନ୍ୟଦ୍ୟ ପିବାମୋଽମୃତବନ୍ମଧୁ ॥ ୧୯॥
ସନ୍ତୁଷ୍ଟା ରାଘବଂ ଦ୍ରଷ୍ଟୁଂ ଗଚ୍ଛାମୋଽଦ୍ୟୈବ ସାନୁଜମ୍ ॥ ୨୦॥
ଅଙ୍ଗଦ ଉବାଚ ।
ହନୂମାନ୍ କୃତକାର୍ୟୋଽୟଂ ପିବତୈତତ୍ପ୍ରସାଦତଃ ।
ଜକ୍ଷଧ୍ୱଂ ଫଲମୂଲାନି ତ୍ୱରିତଂ ହରିସତ୍ତମାଃ ॥ ୨୧॥
ତତଃ ପ୍ରବିଶ୍ୟ ହରୟଃ ପାତୁମାରେଭିରେ ମଧୁ ।
ରକ୍ଷିଣସ୍ତାନନାଦୃତ୍ୟ ଦଧିବକ୍ତ୍ରେଣ ନୋଦିତାନ୍ ॥ ୨୨॥
ପିବତସ୍ତାଡୟାମାସୁର୍ୱାନରାନ୍ ବାନରର୍ଷଭାଃ ।
ତତସ୍ତାନ୍ ମୁଷ୍ଟିଭିଃ ପାଦୈଶ୍ଚୂର୍ଣୟିତ୍ୱା ପପୁର୍ମଧୁ ॥ ୨୩॥
ତତୋ ଦଧିମୁଖଃ କ୍ରୁଦ୍ଧଃ ସୁଗ୍ରୀବସ୍ୟ ସ ମାତୁଲଃ ।
ଜଗାମ ରକ୍ଷିଭିଃ ସାର୍ଧଂ ଯତ୍ର ରାଜା କପୀଶ୍ୱରଃ ॥ ୨୪॥
ଗତ୍ୱା ତମବ୍ରବୀଦ୍ଦେବ ଚିରକାଲାଭିରକ୍ଷିତମ୍ ।
ନଷ୍ଟଂ ମଧୁବନଂ ତେଽଦ୍ୟ କୁମାରେଣ ହନୂମତା ॥ ୨୫॥
ଶ୍ରୁତ୍ୱା ଦଧିମୁଖେନୋକ୍ତଂ ସୁଗ୍ରୀବୋ ହୃଷ୍ଟମାନସଃ ।
ଦୃଷ୍ଟ୍ୱାଗତୋ ନ ସନ୍ଦେହଃ ସୀତାଂ ପବନନନ୍ଦନଃ ॥ ୨୬॥
ନୋ ଚେନ୍ମଧୁବନଂ ଦ୍ରଷ୍ଟୁଂ ସମର୍ଥଃ କୋ ଭବେନ୍ମମ ।
ତତ୍ରାପି ବାୟୁପୁତ୍ରେଣ କୃତଂ କାର୍ୟଂ ନ ସଂଶୟଃ ॥ ୨୭॥
ଶ୍ରୁତ୍ୱା ସୁଗ୍ରୀବବଚନଂ ହୃଷ୍ଟୋ ରାମସ୍ତମବ୍ରବୀତ୍ ।
କିମୁଚ୍ୟତେ ତ୍ୱୟା ରାଜନ୍ ବଚଃ ସୀତାକଥାନ୍ୱିତମ୍ ॥ ୨୮॥
ସୁଗ୍ରୀବସ୍ତ୍ୱବ୍ରବୀଦ୍ୱାକ୍ୟଂ ଦେବ ଦୃଷ୍ଟାବନୀସୁତା ।
ହନୁମତ୍ପ୍ରମୁଖାଃ ସର୍ୱେ ପ୍ରବିଷ୍ଟା ମଧୁକାନନମ୍ ॥ ୨୯॥
ଭକ୍ଷୟନ୍ତି ସ୍ମ ସକଲଂ ତାଡୟନ୍ତି ସ୍ମ ରକ୍ଷିଣଃ ।
ଅକୃତ୍ୱା ଦେବକାର୍ୟଂ ତେ ଦ୍ରଷ୍ଟୁଂ ମଧୁବନଂ ମମ ॥ ୩୦॥
ନ ସମର୍ଥାସ୍ତତୋ ଦେବୀ ଦୃଷ୍ଟା ସୀତେତି ନିଶ୍ଚିତମ୍ ।
ରକ୍ଷିଣୋ ବୋ ଭୟଂ ମାସ୍ତୁ ଗତ୍ୱା ବ୍ରୂତ ମମାଜ୍ଞୟା ॥ ୩୧॥
ବାନରାନଙ୍ଗଦମୁଖାନାନୟଧ୍ୱଂ ମମାନ୍ତିକମ୍ ।
ଶ୍ରୁତ୍ୱା ସୁଗ୍ରୀବବଚନଂ ଗତ୍ୱା ତେ ବାୟୁବେଗତଃ ॥ ୩୨॥
ହନୂମତ୍ପ୍ରମୁଖାନୂଚୁର୍ଗଚ୍ଛତେଶ୍ୱରଶାସନାତ୍ ।
ଦ୍ରଷ୍ଟୁମିଚ୍ଛତି ସୁଗ୍ରୀବଃ ସରାମୋ ଲକ୍ଷ୍ମଣାନ୍ୱିତଃ ॥ ୩୩॥
ଯୁଷ୍ମାନତୀବ ହୃଷ୍ଟାସ୍ତେ ତ୍ୱରୟନ୍ତି ମହାବଲାଃ ।
ତଥେତ୍ୟମ୍ବରମାସାଦ୍ୟ ଯୟୁସ୍ତେ ବାନରୋତ୍ତମାଃ ॥ ୩୪॥
ହନୂମନ୍ତଂ ପୁରସ୍କୃତ୍ୟ ଯୁବରାଜଂ ତଥାଙ୍ଗଦମ୍ ।
ରାମସୁଗ୍ରୀବୟୋରଗ୍ରେ ନିପେତୁର୍ଭୁବି ସତ୍ୱରମ୍ ॥ ୩୫॥
ହନୂମାନ୍ ରାଘବଂ ପ୍ରାହ ଦୃଷ୍ଟା ସୀତା ନିରାମୟା ।
ସାଷ୍ଟାଙ୍ଗଂ ପ୍ରଣିପତ୍ୟାଗ୍ରେ ରାମଂ ପଶ୍ଚାଦ୍ଧରୀଶ୍ୱରମ୍ ॥ ୩୬॥
କୁଶଲଂ ପ୍ରାହ ରାଜେନ୍ଦ୍ର ଜାନକୀ ତ୍ୱାଂ ଶୁଚାନ୍ୱିତା ।
ଅଶୋକବନିକାମଧ୍ୟେ ଶିଂଶପାମୂଲମାଶ୍ରିତା ॥ ୩୭॥
ରାକ୍ଷସୀଭିଃ ପରିବୃତା ନିରାହାରା କୃଶା ପ୍ରଭୋ ।
ହା ରାମ ରାମ ରାମେତି ଶୋଚନ୍ତୀ ମଲିନାମ୍ବରା ॥ ୩୮॥
ଏକବେଣୀ ମୟା ଦୃଷ୍ଟା ଶନୈରାଶ୍ୱାସିତା ଶୁଭା ।
ବୃକ୍ଷଶାଖାନ୍ତରେ ସ୍ଥିତ୍ୱା ସୂକ୍ଷ୍ମରୂପେଣ ତେ କଥାମ୍ ॥ ୩୯॥
ଜନ୍ମାରଭ୍ୟ ତବାତ୍ୟର୍ଥଂ ଦଣ୍ଡକାଗମନଂ ତଥା ।
ଦଶାନନେନ ହରଣଂ ଜାନକ୍ୟା ରହିତେ ତ୍ୱୟି ॥ ୪୦॥
ସୁଗ୍ରୀବେଣ ଯଥା ମୈତ୍ରୀ କୃତ୍ୱା ବାଲିନିବର୍ହଣମ୍ ।
ମାର୍ଗଣାର୍ଥଂ ଚ ବୈଦେହ୍ୟା ସୁଗ୍ରୀବେଣ ବିସର୍ଜିତାଃ ॥ ୪୧॥
ମହାବଲା ମହାସତ୍ତ୍ୱା ହରୟୋ ଜିତକାଶିନଃ ।
ଗତାଃ ସର୍ୱତ୍ର ସର୍ୱେ ବୈ ତତ୍ରୈକୋଽହମିହାଗତଃ ॥ ୪୨॥
ଅହଂ ସୁଗ୍ରୀବସଚିବୋ ଦାସୋଽହଂ ରାଘବସ୍ୟ ହି ।
ଦୃଷ୍ଟା ଯଜ୍ଜାନକୀ ଭାଗ୍ୟାତ୍ପ୍ରୟାସଃ ଫଲିତୋଽଦ୍ୟ ମେ ॥ ୪୩॥
ଇତ୍ୟୁଦୀରିତମାକର୍ଣ୍ୟ ସୀତା ବିସ୍ଫାରିତେକ୍ଷଣା ।
କେନ ବା କର୍ଣପୀୟୁଷଂ ଶ୍ରାବିତଂ ମେ ଶୁଭାକ୍ଷରମ୍ ॥ ୪୪॥
ଯଦି ସତ୍ୟଂ ତଦାୟାତୁ ମଦ୍ଦର୍ଶନପଥଂ ତୁ ସଃ ।
ତତୋଽହଂ ବାନରାକାରଃ ସୂକ୍ଷ୍ମରୂପେଣ ଜାନକୀମ୍ ॥ ୪୫॥
ପ୍ରଣମ୍ୟ ପ୍ରାଞ୍ଜଲିର୍ଭୂତ୍ୱା ଦୂରାଦେବ ସ୍ଥିତଃ ପ୍ରଭୋ ।
ପୃଷ୍ଟୋଽହଂ ସୀତୟା କସ୍ତ୍ୱମିତ୍ୟାଦି ବହୁବିସ୍ତରମ୍ ॥ ୪୬॥
ମୟା ସର୍ୱଂ କ୍ରମେଣୈବ ବିଜ୍ଞାପିତମରିନ୍ଦମ ।
ପଶ୍ଚାନ୍ମୟାର୍ପିତଂ ଦେବ୍ୟୈ ଭବଦ୍ଦତ୍ତାଙ୍ଗୁଲୀୟକମ୍ ॥ ୪୭॥
ତେନ ମାମତିବିଶ୍ୱସ୍ତା ବଚନଂ ଚେଦମବ୍ରବୀତ୍ ।
ଯଥା ଦୃଷ୍ଟାସ୍ମି ହନୁମନ୍ ପୀଡ୍ୟମାନା ଦିବାନିଶମ୍ ॥ ୪୮॥
ରାକ୍ଷସୀନାଂ ତର୍ଜନୈସ୍ତତ୍ସର୍ୱଂ କଥୟ ରାଘବେ ।
ମୟୋକ୍ତଂ ଦେବି ରାମୋଽପି ତ୍ୱଚ୍ଚିନ୍ତାପରିନିଷ୍ଠିତଃ ॥ ୪୯॥
ପରିଶୋଚତ୍ୟହୋରାତ୍ରଂ ତ୍ୱଦ୍ୱାର୍ତାଂ ନାଧିଗମ୍ୟ ସଃ ।
ଇଦାନୀମେବ ଗତ୍ୱାହଂ ସ୍ଥିତିଂ ରାମାୟ ତେ ବ୍ରୁବେ ॥ ୫୦॥
ରାମଃ ଶ୍ରବଣମାତ୍ରେଣ ସୁଗ୍ରୀବେଣ ସଲକ୍ଷ୍ମଣଃ ।
ବାନରାନୀକପୈଃ ସାର୍ଧମାଗମିଷ୍ୟତି ତେଽନ୍ତିକମ୍ ॥ ୫୧॥
ରାବଣଂ ସକୁଲଂ ହତ୍ୱା ନେଷ୍ୟତି ତ୍ୱାଂ ସ୍ୱକଂ ପୁରମ୍ ।
ଅଭିଜ୍ଞାଂ ଦେହି ମେ ଦେବି ଯଥା ମାଂ ବିଶ୍ୱସେଦ୍ୱିଭୁଃ ॥ ୫୨॥
ଇତ୍ୟୁକ୍ତା ସା ଶିରୋରତ୍ନଂ ଚୂଡାପାଶେ ସ୍ଥିତଂ ପ୍ରିୟମ୍ ।
ଦତ୍ତ୍ୱା କାକେନ ଯଦ୍ୱୃତ୍ତଂ ଚିତ୍ରକୂଟଗିରୌ ପୁରା ॥ ୫୩॥
ତଦପ୍ୟାହାଶ୍ରୁପୂର୍ଣାକ୍ଷୀ କୁଶଲଂ ବ୍ରୂହି ରାଘବମ୍ ।
ଲକ୍ଷ୍ମଣଂ ବ୍ରୂହି ମେ କିଞ୍ଚିଦ୍ଦୁରୁକ୍ତଂ ଭାଷିତଂ ପୁରା ॥ ୫୪॥
ତତ୍କ୍ଷମସ୍ୱାଜ୍ଞଭାବେନ ଭାଷିତଂ କୁଲନନ୍ଦନ ।
ତାରୟେନ୍ମାଂ ଯଥା ରାମସ୍ତଥା କୁରୁ କୃପାନ୍ୱିତଃ ॥ ୫୫॥
ଇତ୍ୟୁକ୍ତ୍ୱା ରୁଦତୀ ସୀତା ଦୁଃଖେନ ମହତାବୃତା ।
ମୟାପ୍ୟାଶ୍ୱାସିତା ରାମ ବଦତା ସର୍ୱମେବ ତେ ॥ ୫୬॥
ତତଃ ପ୍ରସ୍ଥାପିତୋ ରାମ ତ୍ୱତ୍ସମୀପମିହାଗତଃ ।
ତଦାଗମନବେଲାୟାମଶୋକବନିକାଂ ପ୍ରିୟାମ୍ ॥ ୫୭॥
ଉତ୍ପାଟ୍ୟ ରାକ୍ଷସାଂସ୍ତତ୍ର ବହୂନ୍ ହତ୍ୱା କ୍ଷଣାଦହମ୍ ।
ରାବଣସ୍ୟ ସୁତଂ ହତ୍ୱା ରାବଣେନାଭିଭାଷ୍ୟ ଚ ॥ ୫୮॥
ଲଙ୍କାମଶେଷତୋ ଦଗ୍ଧ୍ୱା ପୁନରପ୍ୟାଗମଂ କ୍ଷଣାତ୍ ।
ଶ୍ରୁତ୍ୱା ହନୂମତୋ ବାକ୍ୟଂ ରାମୋଽତ୍ୟନ୍ତପ୍ରହୃଷ୍ଟଧୀଃ ॥ ୫୯॥
ହନୂମଂସ୍ତେ କୃତଂ କାର୍ୟଂ ଦେବୈରପି ସୁଦୁଷ୍କରମ୍ ।
ଉପକାରଂ ନ ପଶ୍ୟାମି ତବ ପ୍ରତ୍ୟୁପକାରିଣଃ ॥ ୬୦॥
ଇଦାନୀଂ ତେ ପ୍ରୟଚ୍ଛାମି ସର୍ୱସ୍ୱଂ ମମ ମାରୁତେ ।
ଇତ୍ୟାଲିଙ୍ଗ୍ୟ ସମାକୃଷ୍ୟ ଗାଢଂ ବାନରପୁଙ୍ଗବମ୍ ॥ ୬୧॥
ସାର୍ଦ୍ରନେତ୍ରୋ ରଘୁଶ୍ରେଷ୍ଠଃ ପରାଂ ପ୍ରୀତିମବାପ ସଃ ।
ହନୂମନ୍ତମୁବାଚେଦଂ ରାଘବୋ ଭକ୍ତବତ୍ସଲଃ ॥ ୬୨॥
ପରିରମ୍ଭୋ ହି ମେ ଲୋକେ ଦୁର୍ଲଭଃ ପରମାତ୍ମନଃ ।
ଅତସ୍ତ୍ୱଂ ମମ ଭକ୍ତୋଽସି ପ୍ରିୟୋଽସି ହରିପୁଙ୍ଗବ ॥ ୬୩॥
ଯତ୍ପାଦପଦ୍ମୟୁଗଲଂ ତୁଲସୀଦଲାଦ୍ୟୈଃ
ସମ୍ପୂଜ୍ୟ ବିଷ୍ଣୁପଦବୀମତୁଲାଂ ପ୍ରୟାନ୍ତି ।
ତେନୈବ କିଂ ପୁନରସୌ ପରିରବ୍ଧମୂର୍ତୀ
ରାମେଣ ବାୟୁତନୟଃ କୃତପୁଣ୍ୟପୁଞ୍ଜଃ ॥ ୬୪॥
ଇତି ଶ୍ରୀମଦଧ୍ୟାତ୍ମରାମାୟଣେ ଉମାମହେଶ୍ୱରସମ୍ବାଦେ ସୁନ୍ଦରକାଣ୍ଡେ
ପଞ୍ଚମଃ ସର୍ଗଃ ॥ ୫॥
॥ ସମାପ୍ତମିଦମ୍ ସୁନ୍ଦରକାଣ୍ଡମ୍ ॥
ଅଧ୍ୟାତ୍ମରାମାୟଣମାହାତ୍ମ୍ୟମ୍ ବ୍ରହ୍ମାଣ୍ଡପୁରାଣେ
ଅଧ୍ୟାତ୍ମରାମାୟଣେ 2 ଅୟୋଧ୍ୟାକାଣ୍ଡମ୍
ଅଧ୍ୟାତ୍ମରାମାୟଣେ 3 ଅରଣ୍ୟକାଣ୍ଡମ୍
ଅଧ୍ୟାତ୍ମରାମାୟଣେ 4 କିଷ୍କିନ୍ଧାକାଣ୍ଡମ୍
ଅଧ୍ୟାତ୍ମରାମାୟଣେ 5 ସୁନ୍ଦରକାଣ୍ଡମ୍
ଅଧ୍ୟାତ୍ମରାମାୟଣେ 6 ଯୁଦ୍ଧକାଣ୍ଡମ୍
ଅଧ୍ୟାତ୍ମରାମାୟଣେ 7 ଉତ୍ତରକାଣ୍ଡମ୍
ଅଧ୍ୟାତ୍ମରାମାୟାଣାଧିଷ୍ଠିତା ଶ୍ରୀରାମନାମାବଲିଃ
.
Comments
Post a Comment