ବାଲ୍ମୀକି ରାମାୟଣ ବାଲକାଣ୍ଡ
ବାଲ୍ମୀକି ରାମାୟଣ ବାଲକାଣ୍ଡ
॥ ଧ୍ୟାନ ଶ୍ଲୋକାଃ ॥
ଶୁକ୍ଲାମ୍ବରଧରଂ ବିଷ୍ଣୁଂ ଶଶିବର୍ଣଂ ଚତୁର୍ଭୁଜମ୍ ।
ପ୍ରସନ୍ନବଦନଂ ଧ୍ୟାୟେତ୍ସର୍ୱବିଘ୍ନୋପଶାନ୍ତୟେ ॥ ॥
ସର୍ୱବିଘ୍ନପ୍ରଶମନଂ ସର୍ୱସିଦ୍ଧିକରଂ ପରମ୍ ।
ସର୍ୱଜୀବପ୍ରଣେତାରଂ ବନ୍ଦେ ବିଜୟଦଂ ହରିମ୍ ॥ ॥
ଯତ୍ର ଯତ୍ର ରଘୁନାଥକୀର୍ତନଂ ତତ୍ର ତତ୍ର କୃତମସ୍ତକାଞ୍ଜଲିମ୍ ।
ବାଷ୍ପବାରିପରିପୂର୍ଣଲୋଚନଂ ମାରୁତିଂ ନମତ ରାକ୍ଷସାନ୍ତକମ୍ ॥ ॥
ବେଦବେଦ୍ୟେ ପରେ ପୁଂସି ଜାତେ ଦଶରଥାତ୍ମଜେ ।
ବେଦଃ ପ୍ରାଚେଦସାଦାସୀତ୍ ସାକ୍ଷାଦ୍ରାମାୟଣାତ୍ମନା ॥ ॥
ଆପଦାମପହର୍ତାରଂ ଦାତାରଂ ସର୍ୱସମ୍ପଦାମ୍ ।
ଲୋକାଭିରାମଂ ଶ୍ରୀରାମଂ ଭୂୟୋ ଭୂୟୋ ନମାମ୍ୟହମ୍ ॥ ॥
ତଦୁପଗତ ସମାସସନ୍ଧି ଯୋଗମ୍ ।
ସମମଧୁରୋପନତାର୍ଥବାକ୍ୟବଦ୍ଧମ୍ ।
ରଘୁବରଚରିତଂ ମୁନିପ୍ରଣୀତମ୍ ।
ଦଶଶିରଶ୍ଚ ବଧଂ ନିଶାମୟଦ୍ଧ୍ୱମ୍ ॥ ॥
ବୈଦେହୀସହିତଂ ସୁରଦ୍ରୁମତଲେ ହୈମେ ମହାମଣ୍ଡପେ ।
ମଧ୍ୟେ ପୁଷ୍ପକମାସନେ ମଣିମୟେ ବୀରାସନେ ସୁସ୍ଥିତମ୍ ।
ଅଗ୍ରେ ବାଚୟତି ପ୍ରଭଞ୍ଜନସୁତେତତ୍ତ୍ୱମ୍ମୁନିଭ୍ୟଃ ପରମ୍ ।
ବ୍ୟାଖ୍ୟାନ୍ତଂ ଭରତାଦିଭିଃ ପରିବୃତଂ ରାମଂ ଭଜେ ଶ୍ୟାମଲମ୍ ॥ ॥
ବାଲ୍ମୀକେର୍ମୁନିସିଂହସ୍ୟ କବିତା ବନଚାରିଣଃ ।
ଶ୍ରୁଣ୍ୱନ୍ରାମକଥାନାଦଂ କୋ ନ ଯାତି ପରାଂ ଗତିମ୍ ॥ ॥
ହନୂମାନଞ୍ଜନାସୂନୁଃ ବାୟୁପୁତ୍ରୋ ମହାବଲଃ ।
ରାମେଷ୍ଟଃ ଫଲ୍ଗୁଣସଖଃ ପିଙ୍ଗାକ୍ଷୋଽମିତବିକ୍ରମଃ ॥ ॥
ଉଦଧିକ୍ରମଣଶ୍ଚୈବ ସୀତାସନ୍ଦେଶ ହାରକଃ ।
ଲକ୍ଷ୍ମଣପ୍ରାଣଦାତା ଚ ଦଶଗ୍ରୀବସ୍ୟ ଦର୍ପହା ॥ ॥
ମହାବ୍ୟାକରଣାମ୍ଭୋଧି ମନ୍ଥମାନସମନ୍ଦରମ୍ ।
କବୟନ୍ତଂ ରାମକୀର୍ତ୍ୟା ହନୂମନ୍ତମୁପାସ୍ମହେ ॥ ॥
ବାୟୁର୍ଭୀମୋ ଭୀମନାଦୋ ମହୂଜାଃ ସର୍ୱେଶାଂ ଚ ପ୍ରାଣିନାଂ ପ୍ରାଣଭୂତଃ ।
ଅନାବୃତ୍ତିର୍ଦେହିନାଂ ଦେହପାତେ ତସ୍ମାଦ୍ୱାୟୁର୍ଦେବଦେବୋ ବିଶିଷ୍ଟଃ ॥ ॥
ଜ୍ଞାନେ ବିରାଗେ ହରିଭକ୍ତିଭାବେ ଧୃତିସ୍ଥିତିପ୍ରାଣବଲେଷି ଯୋଗେ ।
ବୁଦ୍ଧୌ ଚ ନାନ୍ୟୋ ହନୁମତ୍ସମାନଃ ପୁମାନ୍ କଦାଚିତ୍ କ୍ୱଚକଶ୍ଚ ନୈବ ॥ ॥
ବାତେନ କୁନ୍ତ୍ୟାଂ ବଲବାନ୍ ସ ଜାତଃ ଶୂରସ୍ତପସ୍ୱୀ ଦ୍ୱିଷତାଂ ନିହନ୍ତା ।
ସତ୍ୟେ ଚ ଧର୍ମେ ଚ ରତଃ ସଦୈବ ପରାକ୍ରମେ ଶତ୍ରୁଭିରପ୍ରଧୃଷ୍ୟଃ ॥ ॥
ମନୋଜବଂ ମାରୁତତୁଲ୍ୟବେଗଂ ଜିତେନ୍ଦ୍ରିୟଂ ବୁଦ୍ଧିମତାମ୍ବରିଷ୍ଠମ୍ ।
ବାତାତ୍ମଜଂ ବାନରୟୂଥମୁଖ୍ୟଂ ଶ୍ରୀରାମଦୂତଂ ଶିରସା ନମାମି ॥ ॥
ଉଲ୍ଲଙ୍ଘ୍ୟ ସିନ୍ଧୋଃ ସଲିଲଂ ସଲୀଲଂ ଯଃ ଶୋକବହ୍ନିଂ ଜନକାତ୍ମଜାୟାଃ ।
ଆଦାୟ ତେନୈବ ଦଦାହ ଲଙ୍କାଂ ନମାମି ତଂ ପ୍ରାଞ୍ଜଲିରାଞ୍ଜନେୟମ୍ ॥ ॥
ଆଞ୍ଜନେୟମତିପାଟଲାନନଂ କାଞ୍ଚନାଦ୍ରିକମନୀୟବିଗ୍ରହମ୍ ।
ପାରିଜାତତରୁମୂଲବାସିନଂ ଭାବୟାମି ପବମାନନନ୍ଦନମ୍ ॥ ॥
ଯଃ ସର୍ୱଗୁଣସମ୍ପୂର୍ଣଃ ସର୍ୱଦୋଷ ବିବର୍ଜିତଃ ।
ପ୍ରୀୟତାଂ ପ୍ରୀତୟେବାଲଂ ବିଷ୍ଣୁର୍ମେ ପରମଃ ସୁହୃତ୍ ॥ ॥
ସୂକ୍ତିରତ୍ନାକରେ ରମ୍ୟେ ମୂଲରାମାୟଣାର୍ଣବେ ।
ବିହରନ୍ତୋ ମହୀୟାଂସଃ ପ୍ରିୟନ୍ତାଂ ଗୁରବୋ ମମ ॥ ॥
ବୁଦ୍ଧିର୍ବଲଂ ଯଶୋ ଧୈର୍ୟଂ ନିର୍ଭୟତ୍ୱଂ ଅରୋଗତା ।
ଅଜାଡ୍ୟଂ ବାକ୍ପଟୁତ୍ୱଂ ଚ ହନୂମତ୍ସ୍ମରଣାଦ୍ଭବେତ୍ ॥ ॥
॥ ସଙ୍କଲ୍ପ ॥
ଶ୍ରୀ ସୀତାଲକ୍ଷ୍ମଣଭରତଶତ୍ରୁଘ୍ନହନୁମତ୍ସମେତ ଶ୍ରୀ ରାମଚନ୍ଦ୍ର ପ୍ରଭୋଃ
ପ୍ରସାଦେନ ଅସ୍ମଚ୍ଚିନ୍ତିତ ସକଲାଭୀଷ୍ଟସିଦ୍ଧ୍ୟର୍ଥଂ ଭାର୍ଗବବିଜୟାତ୍ମକ
ଶ୍ରୀମଦ୍ରାମାୟଣଘଟ୍ଟପାରାୟଣମହଂ କରିଷ୍ୟେ ।
॥ ଅଥ ପଞ୍ଚସପ୍ତତିତମଃ ସର୍ଗଃ ॥
ରାମ ଦାଶରଥେ ରାମୋ ବିର୍ୟଂ ତେ ଶ୍ରୂୟତେଽଦ୍ଭୁତମ୍ ।
ଧନୁଷୋ ଭେଦନଂ ଚୈବ ନିଖିଲେନ ମୟା ଶ୍ରୁତମ୍ ॥ ୧॥
ତଦଦ୍ଭୁତମଚିନ୍ତ୍ୟଂ ଚ ଭେଦନଂ ଧନୁଷସ୍ତ୍ୱୟା ।
ତଚ୍ଛ୍ରୁତ୍ୱାହମନୁପ୍ରାପ୍ତୋ ଧନୁର୍ଗୃହ୍ୟାପରଂ ଶୁଭମ୍ ॥ ୨॥
ତଦିଦଂ ଘୋରସଙ୍କାଶଂ ଜାମଦଗ୍ନ୍ୟଂ ମହଦ୍ଧନୁଃ ।
ପୂଜୟସ୍ୱ ଶରେଣୈବ ସ୍ୱବଲଂ ଦର୍ଶୟସ୍ୱ ଚ ॥ ୩॥
ତଦହଂ ତେ ବଲଂ ଦୃଷ୍ଟ୍ୱା ଧନୁଷୋଽସ୍ୟ ପ୍ରପୂରଣେ ।
ଦ୍ୱନ୍ଦ୍ୱୟୁଦ୍ଧଂ ପ୍ରଦାସ୍ୟାମି ବୀର୍ୟଶ୍ଳାଘ୍ୟସ୍ୟ ରାଘବ ॥ ୪॥
ତସ୍ୟ ତଦ୍ ବଚନଂ ଶ୍ରୁତ୍ୱା ରାଜା ଦଶରଥସ୍ତଦା ।
ବିଷଣ୍ଣବଦନୋ ଦୀନଃ ପ୍ରାଞ୍ଜଲିର୍ୱାକ୍ୟମବ୍ରବୀତ୍ ॥ ୫॥
କ୍ଷତ୍ରରୋଷାତ୍ ପ୍ରଶାନ୍ତସ୍ତ୍ୱଂ ବ୍ରାହ୍ମଣଶ୍ଚ ମହାୟଶାଃ ।
ବାଲାନାଂ ମମ ପୁତ୍ରାଣାମଭୟଂ ଦାତୁମର୍ହସି ॥ ୬॥
ଭାର୍ଗବାଣାଂ କୁଲେ ଜାତଃ ସ୍ୱାଧ୍ୟାୟବ୍ରତଶାଲିନାମ୍ ।
ସହସ୍ରାକ୍ଷେ ପ୍ରତିଜ୍ଞାୟ ଶସ୍ତ୍ରଂ ନିକ୍ଷିପ୍ତବାନସି ॥ ୭॥
ସ ତ୍ୱଂ ଧର୍ମପରୋ ଭୂତ୍ୱା କଶ୍ୟପାୟ ବସୁନ୍ଧରାମ୍ ।
ଦତ୍ୱା ବନମୁପାଗମ୍ୟ ମହେନ୍ଦ୍ରକୃତକେତନଃ ॥ ୮॥
ମମ ସର୍ୱବିନାଶାୟ ସମ୍ପ୍ରାପ୍ତସ୍ତ୍ୱଂ ମହାମୁନେ ।
ନ ଚୈକସ୍ମିନ୍ ହତେ ରାମେ ସର୍ୱେ ଜୀବାମହେ ବୟମ୍ ॥ ୯॥
ବ୍ରୁବତ୍ୟେବଂ ଦଶରଥେ ଜାମଦଗ୍ନ୍ୟଃ ପ୍ରତାପବାନ୍ ।
ଅନାଦୃତ୍ୟୈବ ତଦ୍ୱାକ୍ୟଂ ରାମମେବାଭ୍ୟଭାଷତ ॥ ୧୦॥
ଇମେ ଦ୍ୱେ ଧନୁଷୀ ଶ୍ରେଷ୍ଠେ ଦିବ୍ୟେ ଲୋକାଭିବିଶ୍ରୁତେ ।
ଦୃଢେ ବଲବତୀ ମୁଖ୍ୟେ ସୁକୃତେ ବିଶ୍ୱକର୍ମଣା ॥ ୧୧॥
ଅତିସୃଷ୍ଟଂ ସୁରୈରେକଂ ତ୍ରୟମ୍ବକାୟ ଯୁୟୁତ୍ସବେ ।
ତ୍ରିପୁରଘ୍ନଂ ନରଶ୍ରେଷ୍ଠ ଭଗ୍ନଂ କାକୁତ୍ସ୍ଥ ଯତ୍ତ୍ୱୟା ॥ ୧୨॥
ଇଦଂ ଦ୍ୱିତୀୟଂ ଦୁର୍ଧର୍ଷଂ ବିଷ୍ଣୋର୍ଦତ୍ତେ ସୁରୋତ୍ତମୈଃ ॥ ୧୩॥
ତଦିଦଂ ବୈଷ୍ଣବଂ ରାମ ଧନୁଃ ପରପୁରଞ୍ଜୟମ୍ ।
ସମାନସାରଂ କାକୁତ୍ସ୍ଥ ରୌଦ୍ରେଣ ଧନୁଷା ତ୍ୱିଦଂ ॥ ୧୪॥
ତଦା ତୁ ଦେବତାଃ ସର୍ୱାଃ ପୃଚ୍ଛନ୍ତି ସ୍ମ ପିତାମହମ୍ ।
ଶିତିକଣ୍ଠସ୍ୟ ବିଷ୍ଣୋଶ୍ଚ ବଲାବଲନିରୀକ୍ଷୟା ॥ ୧୫॥
ଅଭିପ୍ରାୟଂ ତୁ ବିଜ୍ଞାୟ ଦେବତାନାଂ ପିତାମହଃ ।
ବିରୋଧଂ ଜନୟାମାସ ତୟୋଃ ସତ୍ୟବତାଂ ବରଃ ॥ ୧୬॥
ବିରୋଧେ ଚ ମହଦ୍ୟୁଦ୍ଧମଭବଦ୍ ରୋମହର୍ଷଣମ୍ ।
ଶିତିକଣ୍ଠସ୍ୟ ବିଷ୍ଣୋଶ୍ଚ ପରସ୍ପରଜିଗୀଷିଣୋଃ ॥ ୧୭॥
ତଦା ତୁ ଜୃମ୍ଭିତଂ ଶୈବଂ ଧନୁର୍ଭୀମପରାକ୍ରମମ୍ ।
ହୁଙ୍କାରେଣ ମହାଦେବଃ ସ୍ତମ୍ଭିତୋଽଥ ତ୍ରିଲୋଚନଃ ॥ ୧୮॥
ଦେବୈସ୍ତଦା ସମାଗମ୍ୟ ସର୍ଷିସଙ୍ଘୈଃ ସଚାରଣୈଃ ।
ଯାଚିତୌ ପ୍ରଶମଂ ତତ୍ର ଜଗ୍ମତୁସ୍ତୌ ସୁରୋତ୍ତମୌ ॥ ୧୯॥
ଜୃମ୍ଭିତଂ ତଦ୍ ଧନୁର୍ଦୃଷ୍ଟ୍ୱା ଶୈବଂ ବିଷ୍ଣୁପରାକ୍ରମୈଃ ।
ଅଧିକଂ ମେନିରେ ବିଷ୍ଣୁଂ ଦେବାଃ ସର୍ଷିଗଣାସ୍ତଦା ॥ ୨୦॥
ଧନୂ ରୁଦ୍ରସ୍ତୁ ସଙ୍କ୍ରୁଦ୍ଧୋ ବିଦେହେଷୁ ମହାୟଶାଃ ।
ଦେବରାତସ୍ୟ ରାଜର୍ଷେଃ ଦଦୌ ହସ୍ତେ ସସାୟକଂ ॥ ୨୧॥
ଇଦଂ ଚ ବୈଷ୍ଣବଂ ରାମ ଧନୁଃ ପରପୁରଞ୍ଜୟମ୍ ।
ଋଚୀକେ ଭାର୍ଗବେ ପ୍ରାଦାଦ୍ ବିଷ୍ଣୁଃ ସଂନ୍ୟାସମୁତ୍ତମମ୍ ॥ ୨୨॥
ଋଚୀକସ୍ତୁ ମହାତେଜାଃ ପୁତ୍ରସ୍ୟାପ୍ରତିକର୍ମଣଃ ।
ପିତୁର୍ମମ ଦଦୌ ଦିବ୍ୟଂ ଜମଦଗ୍ନେର୍ମହାତ୍ମନଃ ॥ ୨୩॥
ନ୍ୟସ୍ତଶସ୍ତ୍ରେ ପିତରି ମେ ତପୋବଲସମନ୍ୱିତେ ।
ଅର୍ଜୁନୋ ବିଦଧେ ମୃତ୍ୟୁଂ ପ୍ରାକୃତାଃ ବୁଦ୍ଧିମାସ୍ଥିତଃ ॥ ୨୪॥
ବଧମପ୍ରତିରୂପଂ ତୁ ପିତୁଃ ଶ୍ରୁତ୍ୱା ସୁଦାରୁଣମ୍ ।
କ୍ଷତ୍ରମୁତ୍ସାଦୟନ୍ ରୋଷାତ୍ ଜାତଂ ଜାତମନେକଶଃ ॥ ୨୫॥
ପୃଥିବୀଂ ଚାଖିଲାଂ ପ୍ରାପ୍ୟ କଶ୍ୟପାୟ ମହାତ୍ମନେ ।
ଯଜ୍ଞସ୍ୟାନ୍ତେ ତଦା ରାମ ଦକ୍ଷିଣାଂ ପୁଣ୍ୟକର୍ମଣେ ॥ ୨୬॥
ଦତ୍ତ୍ୱା ମହେନ୍ଦ୍ରନିଲୟସ୍ତପୋବଲସମନ୍ୱିତଃ ।
ଶ୍ରୁତବାନ୍ ଧନୁଷୋ ଭେଦଂ ତତୋଽହଂ ଦ୍ରୁତମାଗତଃ ॥ ୨୭॥
ତଦିଦଂ ବୈଷ୍ଣବଂ ରାମ ପିତୃପୈତାମହଂ ମହତ୍ ।
କ୍ଷତ୍ରଧର୍ମଂ ପୁରସ୍କୃତ୍ୟ ଗୃହ୍ଣୀଷ୍ୱ ଧନୁରୁତ୍ତମମ୍ ॥ ୨୮॥
ଯୋଜୟସ୍ୱ ଧନୁଃଶ୍ରେଷ୍ଠେ ଶରଂ ପରପୁରଞ୍ଜୟମ୍ ।
ଯଦି ଶକ୍ନୋଷି କାକୁତ୍ସ୍ଥ ଦ୍ୱନ୍ଦ୍ୱଂ ଦାସ୍ୟାମି ତେ ତତଃ ॥ ୨୯॥
॥ ଇତ୍ୟାର୍ଷେ ଶ୍ରୀମଦ୍ରାମାୟଣେ ବାଲ୍ମୀକୀୟେ ଆଦିକାବ୍ୟେ ॥
॥ ବାଲକାଣ୍ଡେ ପଞ୍ଚସପ୍ତତିତମଃ ସର୍ଗଃ ॥
॥ ଅଥ ଷଟ୍ସପ୍ତତିତମଃ ସର୍ଗଃ ॥
ଶ୍ରୁତ୍ତ୍ୱା ତଦ୍ ଜାମଦଗ୍ନ୍ୟସ୍ୟ ବାକ୍ୟଂ ଦାଶରଥିସ୍ତଦା ।
ଗୌରବାଦ୍ୟନ୍ତ୍ରିତକଥଃ ପିତୂ ରାମମଥାବ୍ରବୀତ୍ ॥ ୧॥
କୃତବାନସି ଯତ୍ କର୍ମ ଶ୍ରୁତବାନସ୍ମି ଭାର୍ଗବ ।
ଅନୁରୁଧ୍ୟାମହେ ବ୍ରହ୍ମନ୍ ପିତୁରାନୃଣ୍ୟମାସ୍ଥିତଃ ॥ ୨॥
ବୀର୍ୟହୀନମିବାଶକ୍ତଂ କ୍ଷତ୍ରଧର୍ମେଣ ଭାର୍ଗବ ।
ଅବଜାନାସି ମେ ତେଜଃ ପଶ୍ୟ ମେଽଦ୍ୟ ପରାକ୍ରମମ୍ ॥ ୩॥
ଇତ୍ୟୁକ୍ତ୍ୱା ରାଘବଃ କ୍ରୁଦ୍ଧୋ ଭାର୍ଗବସ୍ୟ ଶରାସନମ୍ ।
ଶରଂ ଚ ପ୍ରତିଜଗ୍ରାହ ହସ୍ତାଲ୍ଲଘୁପରାକ୍ରମଃ ॥ ୪॥
ଆରୋପ୍ୟ ତଦ୍ଧନୂ ରାମଃ ଶରଂ ସଜ୍ୟଂ ଚକାର ହ ।
ଜାମଦଗ୍ନ୍ୟଂ ତତୋ ରାମଂ ରାମଃ କ୍ରୁଦ୍ଧୋଽବ୍ରବୀଦ୍ୱଚଃ ॥ ୫॥
ବ୍ରାହ୍ମଣୋଽସୀତି ପୂଜ୍ୟୋ ମେ ବିଶ୍ୱାମିତ୍ରକୃତେନ ଚ ।
ତସ୍ମାଚ୍ଛକ୍ତୋ ନ ତେ ରାମ ମୋକ୍ତୁଂ ପ୍ରାଣହରଂ ଶରମ୍ ॥ ୬॥
ଇମାଂ ପାଦଗତିଂ ରାମ ତପୋବଲସମାର୍ଜିତାନ୍ ।
ଲୋକାନପ୍ରତିମାନ୍ ବାତେ ହନିଷ୍ୟାମି ଯଦିଚ୍ଛସି ॥ ୭॥
ନ ହ୍ୟଯଂ ବୈଷ୍ଣବୋ ଦିବ୍ୟଃ ଶରଃ ପରପୁରଞ୍ଜୟଃ ।
ମୋଘଃ ପତତି ବୀର୍ୟେଣ ବଲଦର୍ପବିନାଶନଃ ॥ ୮॥
ବରାୟୁଧଧରଂ ରାମଂ ଦ୍ରଷ୍ଟୁଂ ସର୍ଷିଗଣାଃ ସୁରାଃ ।
ପିତାମହଂ ପୁରସ୍କୃତ୍ୟ ସମେତାସ୍ତତ୍ର ସଙ୍ଘଶଃ ॥ ୯॥
ଗନ୍ଧର୍ୱାପ୍ସରସଶ୍ଚୈବ ସିଦ୍ଧଚାରଣକିନ୍ନରାଃ ।
ଯକ୍ଷରାକ୍ଷସନାଗାଶ୍ଚ ତଦ୍ ଦ୍ରଷ୍ଟୁଂ ମହଦଦ୍ଭୁତମ୍ ॥ ୧୦॥
ଜଡୀକୃତେ ତଦା ଲୋକେ ରାମେ ବରଧନୁର୍ଧରେ ।
ନିର୍ୱୀର୍ୟୋ ଜାମଦଗ୍ନ୍ୟୋଽସୌ ରାମୋ ରାମମୁଦୈକ୍ଷତ ॥ ୧୧॥
ତେଜୋଽଭିହତବୀର୍ୟତ୍ୱାତ୍ ଜାମଦଗ୍ନ୍ୟୋ ଜଡୀକୃତଃ ।
ରାମଂ କମଲପତ୍ରାକ୍ଷଂ ମନ୍ଦଂ ମନ୍ଦମୁବାଚ ହ ॥ ୧୨॥
କଶ୍ୟପାୟ ମୟା ଦତ୍ତା ଯଦା ପୂର୍ୱଂ ବସୁନ୍ଧରା ।
ବିଷୟେ ମେ ନ ବସ୍ତବ୍ୟମିତି ମାଂ କଶ୍ୟପୋଽବ୍ରବୀତ୍ ॥ ୧୩॥
ସୋଽହଂ ଗୁରୁବଚଃ କୁର୍ୱନ୍ ପୃଥିବ୍ୟାଂ ନ ବସେଽନିଶମ୍ ।
କୃତା ପ୍ରତିଜ୍ଞା କାକୁତ୍ସ୍ଥ କୃତା ଭୂଃ କାଶ୍ୟପସ୍ୟ ହ ॥ ୧୪॥
ତାଦିମାଂ ତ୍ୱଙ୍ଗତିଂ ବୀର ହନ୍ତୁଂ ନାର୍ହସି ରାଘବ ।
ମନୋଜବଂ ଗମିଷ୍ୟାମି ମହେନ୍ଦ୍ରଂ ପର୍ୱତୋତ୍ତମମ୍ ॥ ୧୫॥
ଲୋକାସ୍ତ୍ୱପ୍ରତିମା ରାମ ନିର୍ଜିତାସ୍ତପସା ମୟା ।
ଜହି ତାଞ୍ଛରମୁଖ୍ୟେନ ମା ଭୂତ୍ କାଲସ୍ୟ ପର୍ୟଯଃ ॥ ୧୬॥
ଅକ୍ଷୟଂ ମଧୁହନ୍ତାରଂ ଜାନାମି ତ୍ୱାଂ ସୁରୋତ୍ତମମ୍ ।
ଧନୁଷୋଽସ୍ୟ ପରାମର୍ଶାତ୍ ସ୍ୱସ୍ତି ତେଽସ୍ତୁ ପରନ୍ତପ ॥ ୧୭॥
ଏତେ ସୁରଗଣାଃ ସର୍ୱେ ନିରୀକ୍ଷନ୍ତେ ସମାଗତାଃ ।
ତ୍ୱାମପ୍ରତିମକର୍ମାଣମପ୍ରତିଦ୍ୱନ୍ଦ୍ୱମାହବେ ॥ ୧୮॥
ନ ଚେୟଂ ମମ କାକୁତ୍ସ୍ଥ ବ୍ରୀଡା ଭବିତୁମର୍ହତି ।
ତ୍ୱୟା ତ୍ରୈଲୋକ୍ୟନାଥେନ ଯଦହଂ ବିମୁଖୀକୃତଃ ॥ ୧୯॥
ଶରମପ୍ରତିମଂ ରାମ ମୋକ୍ତୁମର୍ହସି ସୁବ୍ରତ ।
ଶରମୋକ୍ଷେ ଗମିଷ୍ୟାମି ମହେନ୍ଦ୍ରଂ ପର୍ୱତୋତ୍ତମମ୍ ॥ ୨୦॥
ତଥା ବ୍ରୁବତି ରାମେ ତୁ ଜାମଦଗ୍ନ୍ୟେ ପ୍ରତାପବାନ୍ ।
ରାମୋ ଦାଶରଥିଃ ଶ୍ରୀମାଂଶ୍ଚିକ୍ଷେପ ଶରମୁତ୍ତମମ୍ ॥ ୨୧॥
ସ ହତାନ୍ ଦୃଶ୍ୟ ରାମେଣ ସ୍ୱାଁଲ୍ଲୋକାଂସ୍ତପସାର୍ଜିତାନ୍ ।
ଜାମଦଗ୍ନ୍ୟୋ ଜଗାମାଶୁ ମହେନ୍ଦ୍ରଂ ପର୍ୱତୋତ୍ତମମ୍ ॥ ୨୨॥
ତତୋ ବିତିମିରାଃ ସର୍ୱା ଦିଶଶ୍ଚୋପଦିଶସ୍ତଥା ।
ସୁରାଃ ସର୍ଷିଗଣା ରାମଂ ପ୍ରଶଶଂସୁରୁଦାୟୁଧମ୍ ॥ ୨୩॥
ରାମଂ ଦାଶରଥିଂ ରାମୋ ଜାମଦଗ୍ନ୍ୟଃ ପ୍ରଶସ୍ୟ ଚ ।
ତତଃ ପ୍ରଦକ୍ଷିଣଂ କୃତ୍ୱା ଜଗାମାତ୍ମଗତିଂ ପ୍ରଭୁଃ ॥ ୨୪॥
॥ ଇତ୍ୟାର୍ଷେ ଶ୍ରୀମଦ୍ରାମାୟଣେ ବାଲ୍ମୀକୀୟେ ଆଦିକାବ୍ୟେ ॥
॥ ବାଲକାଣ୍ଡେ ଷଟ୍ସପ୍ତତିତମଃ ସର୍ଗଃ ॥
॥ ଭାରତୀରମଣମୁଖ୍ୟପ୍ରାଣାନ୍ତର୍ଗତ ଶ୍ରୀକୃଷ୍ଣାର୍ପଣମସ୍ତୁ ॥
.
Comments
Post a Comment