ଶ୍ରୀରାମସୌନ୍ଦର୍ୟଲହରୀ
ଶ୍ରୀରାମସୌନ୍ଦର୍ୟଲହରୀ
ଯଦ୍ଦୀନେଷୁ ଧରାସୁତାରମଣ ତେ ନେତ୍ରଦ୍ୱୟଂ ଜାତ୍ୱପି
ପ୍ରାନ୍ତେକ୍ଷାକନିତାଖିଲାର୍ତ୍ୟପଗମଦ୍ଧ୍ୟାନାଦ୍ୟକୁର୍ୱତ୍ସ୍ୱପି ।
ନିତ୍ୟଂ ପ୍ରେମଦୟୋର୍ଜିତଂ ନିବିଶତେ ତତ୍ସନ୍ତତଂ ଭକ୍ତିତଃ
ତ୍ୱତ୍ସେବୈକହୃଦଃ କଥଂ ନ ବିଷୟୀକୁର୍ୟାତ୍ତଥା ନଃ କୃଶାନ୍ ॥ ୧॥
ମୁଗ୍ଧଂ ରାମ ତବାନନଂ ସହୃଦୟଂ ଲୋକସ୍ୟ ସମ୍ପଶ୍ୟତୋ
ନେତ୍ରଂ ବିସ୍ତୃତପକ୍ଷ୍ମବିଭ୍ରମମିତୋ ନାପୈତି ଲକ୍ଷ୍ମ୍ୟା ଯୟା ।
ଶୀତାଂଶୁଂ ବିମଲଂ ନ ସା ବହୁଶରଦ୍ରାକୋଦ୍ଭବାସ୍ୱେକଦା
ଶ୍ରୀଷ୍ୱପ୍ୟାର୍ୟ ଗତାସୁ ତାଦୃଶି ମନାଗ୍ଲକ୍ଷ୍ୟେତ ଭିନ୍ନେ କିମୁ ॥ ୨॥
ଚନ୍ଦ୍ରଂ ତବାନନସମଂ ଦ୍ରୁହିଣୋ ବିଧାତୁ-
ମେକୈକୟା ପ୍ରତିଦିନଂ କଲୟା ଯୁନକ୍ତି ।
ପର୍ୱଣ୍ୟବେକ୍ଷ୍ୟ ସ ତୟୋର୍ୱିଷମତ୍ୱମୁଚ୍ଚୈ-
ରାଦର୍ଶମାକ୍ଷିପତି ତା ହି ତଥାଧୁନାପି ॥ ୩॥
ରାମାହ୍ନି ତେ ସଦୃଶତାଂ କମଲାନି ଦୃଗ୍ଭ୍ୟାଂ
ଗନ୍ତୁଂ ଜଲେଷୁ ବରଦଂ ସମୁପାସତେଽର୍କମ୍ ।
ତତ୍କାନ୍ତିଲେଶମନବାପ୍ୟ ତତୋଽପି ରାତ୍ର୍ୟାଂ
ଶୁଷ୍ୟନ୍ତି ମୀଲନମିଷାଦତିଦୁଃଖିତାନି ॥ ୪॥
ରମ୍ୟଂ ଦୃଶୌ ଜଗତି ରାଘବ ତେ ସିସୃକ୍ଷୁ-
ର୍ଧାତାବ୍ଜକୋଟିମସୃଜତ୍କରପାଟବାୟ ।
ସୃଷ୍ଟ୍ୱାଥ ତେ ସ ତୁ ତୟୋରନୁରୂପମେକଂ
ଲବ୍ଧୁଂ ପୁନଃ ସୃଜତି ପଦ୍ମକୁଲଂ ନ ଲେଭେ ॥ ୫॥
ସ୍ନିଗ୍ଧାନି ରାମ ନବ ସାନ୍ଦ୍ରତରାଣି ଭାନ୍ତି
ପକ୍ଷ୍ମାଣି ନୀଲନିବିଡାନି ଦରୋନ୍ନତାନି ।
ପ୍ରାୟେଣ ଲଗ୍ନନୟନାମ୍ବୁରୁହପ୍ରବେକ-
ନୀଲାନ୍ୟନୁକ୍ଷଣନିମେଷକୁଲୈରିବ ସ୍ୱୈଃ ॥ ୬॥
ନୀଲୋତ୍ପଲାଦହନି ପଦ୍ମକୁଲାଦ୍ରଜନ୍ୟାଂ
ଲକ୍ଷ୍ମୀରପୈତି କୁତ ଇତ୍ୟବଧାର୍ୟ ବେଧାଃ ।
ତ୍ୱନ୍ନେତ୍ରୟୋର୍ୱିରଚିତାମନପାୟିନୀଂ ତାଂ
କର୍ତୁଂ ଚକାର ନୃପ ପକ୍ଷ୍ମମିଷେଣ ବପ୍ରାମ୍ ॥ ୭॥
ଆପ୍ରାନ୍ତମାୟତନତେ ରଘୁବଂଶଚନ୍ଦ୍ର
ଦେବ ଭ୍ରୁବୌ ନୟନୟୋର୍ଜିତମାର ଭାତଃ ।
ସଞ୍ଜାତରକ୍ତନଲିନଜ୍ୱଲଦଗ୍ରଭାଗେ
ବଲ୍ଲ୍ୟାବିବାଦ୍ଭୁତତରେ ଜଗତୀହ କେଽପି ॥ ୮॥
ମୁଗ୍ଧାଙ୍ଗନାଜୟସିସାଧୟିଷୋଦୟେନ
ସ୍ୱପ୍ରାର୍ଥିତେନ ମଦନଃ କମଲାସନେନ ।
ତଂ ସଂହିତଂ ସୁମୁଖ ମାଦ୍ୟତି ନେତ୍ରକୋଣଂ
ତ୍ୱଦ୍ଭୂଧନୁଷ୍ୟୁପରିପକ୍ଷ୍ମଗୁଣେଽଧିଗତ୍ୟ ॥ ୯॥
ଦୀର୍ଘଂ ବିଶାଲମଲମୁତ୍ତରକୋସଲେନ୍ଦ୍ର
ମଧ୍ୟେ ବିଶେଷକବିଶୋଭ୍ୟଲିକଂ ତବାଚ୍ଛମ୍ ।
ତ୍ୱଦ୍ୱର୍ଷ୍ମନିଷ୍କୁଟତଟେଷୁ ସଦା ଚରନ୍ତ୍ୟା
ବିଶ୍ରାନ୍ତିପୀଠମିବ ରାଜତି ରୂପଲକ୍ଷ୍ମ୍ୟାଃ ॥ ୧୦॥
ରେଖାତ୍ରୟେଣ ତବ ରାମ ଲସଲ୍ଲଲାଟଂ
ତିର୍ୟଗ୍ୱିଭାତି ନନୁ ସୂକ୍ଷ୍ମତରେଣ ମଧ୍ୟେ ।
ସମ୍ଭାବିତର୍ଧବଦନୋଜ୍ଜ୍ୱଲତାପ୍ରବାହ-
ବେଗାହିତାନଭିହତାୟତସତ୍ରିନିମ୍ନମ୍ ॥ ୧୧॥
ତୀକ୍ଷ୍ଣୋନ୍ନତାଗ୍ରମହିମାଂଶୁକୁଲାବତଂସ
ଘ୍ରାଣଂ ମନାକ୍ ତବ ବିଜୃମ୍ଭିତଚମ୍ପକଶ୍ରି ।
ସୌନ୍ଦର୍ୟନିର୍ଝରଚରଦ୍ୱନିତାକ୍ଷିମତ୍ସ୍ୟା
ନାଦାତୁମତ୍ର ବଡିଶଂ ନିହିତଂ ନୁ ଭାତି ॥ ୧୨॥
କାକୁତ୍ସ୍ଥ ତେ ସୁମନସାଂ ଚୟମବ୍ଜୟୋନି-
ର୍ନାସାଂ ତତାନ ତିଲପୁଷ୍ଷସମାଂ ଗୃହୀତ୍ୱା ।
ତନ୍ନିର୍ଗତସ୍ୟ ପବନସ୍ୟ ଯତଃ ସ ଗନ୍ଧୋ
ଯଃ ସ୍ୟାତ୍ତରାମୁପବନେ ଚରତୋ ବସନ୍ତେ ॥ ୧୩॥
ଓଷ୍ଠୋପରି ସ୍ଫୁରଦନଙ୍ଗସମାଙ୍ଗ ନିମ୍ନମ୍
ଗାଢଂ ତବୋଲ୍ଲସତି ଦାଡିମବୀଜଦଘ୍ନମ୍ ।
ତ୍ୱାମେବ ଚେତସି ଶୁଚିଂ ସତତଂ ଦଧତ୍ୟାଃ
ସ୍ୱପ୍ନୋପଭୋଗଦଶନକ୍ଷତମଙ୍ଗନାୟାଃ ॥ ୧୪॥
ନିର୍ମାୟ ତେ ମୃଦୁତୟୋତ୍ପଲଭାସ୍ୱରୋଷ୍ଠଂ
ଭୂୟଃ ପରୀକ୍ଷିତୁମିମଂ ଚତୁରାନନେନ ।
ତସ୍ମିନ୍ନସାନ୍ଦ୍ରନିହିତାଗ୍ରକନିଷ୍ଠିକାୟା
ବିଦ୍ୟୋତତେ ପଦମିବୋଷ୍ଠତଲୋର୍ଧ୍ୱନିମ୍ନମ୍ ॥ ୧୫॥
ଲକ୍ଷ୍ୟେତ ରାମ ତବ ଚେଦଧରଃ କବୀନ୍ଦ୍ରୈଃ
କଥ୍ୟେତ ବିଦ୍ରୁମଗଣେଷୁ କଥଂ ତଥା ଶ୍ରୀଃ ।
ଜ୍ଞାୟେତ ଚେତ୍ସ ମଧୁରୋଽତିଶୟଃ ସୁଧାୟାଂ
ସ୍ପୃଶ୍ୟେତ ଚେଦଭିନବେ ମୃଦୁତା ଶିରୀଷେ ॥ ୧୬॥
ବିମ୍ବୈଃ ଫଲୈର୍ଜଗତି ଯତ୍କବିନାଧରାଣାଂ
ରାମୋପମାମଧରବିମ୍ବପଦଂ ପ୍ରୟୁକ୍ତମ୍ ।
ତତ୍ତେଽଧରସ୍ୟ ଗୁଣବାଚି କଥଂ ନ ବା ସ୍ୟା-
ଦତ୍ୟନ୍ତତୁଚ୍ଛମିତି ବିମ୍ବଫଲଂ କିଲାତଃ ॥ ୧୭॥
ମୁକ୍ତାଫଲାନି ଭୁବି ଯାନ୍ୟତିସୁନ୍ଦରାଣି
ତାନ୍ୟେବ ଚେଦବନିଚନ୍ଦ୍ର ନରୋ ଦିଦୃକ୍ଷୁଃ ।
ସ୍ୱଚ୍ଛଂ ସମୁଜ୍ଜ୍ୱଲ୍ଲମିଦଂ ନିଶତାଗ୍ରଶାଲି
ପଶ୍ୟେତ୍ସମଂ ସ ମସୃଣଂ ତବ ଦ୍ନ୍ତଜାଲମ୍ ॥ ୧୮॥
ଊର୍ଧ୍ୱଂ ସ୍ଥିତେଷୁ ଭରତାଗ୍ରଜ ତେଽପ୍ୟଧସ୍ତାତ୍
ସତ୍ସ୍ୱମ୍ବୁଜାକ୍ଷତନୟଃ ସମମାନସିଦ୍ଧ୍ୟୈ ।
ଚକ୍ରେ ଧ୍ରୁବଂ ତନୁଶଲାକିକୟାନ୍ତରନ୍ତ-
ର୍ଲେଖାଃ କୃଶା ବିରଲସନ୍ଧିମିଷାଦନେକାଃ ॥ ୧୯॥
ସୌମିତ୍ରିପୂର୍ୱଜ ତବାନିଶମାସ୍ୟଭାଜଃ
ଶୁଦ୍ଧାତ୍ୱଷଃ ସୁମୁଖ ବାଗଧିଦେବତାୟାଃ
ତେଜୋ ବହିଃ ପ୍ରସରଦେବ ଶରଦ୍ଧବାଚ୍ଛ
ଜ୍ୟୋତ୍ସ୍ନାବିଶୋଭି ତନୁହାସ ଇତୀର୍ୟତେଽନ୍ୟୈଃ ॥ ୨୦॥
ମନ୍ଦସ୍ମିତଂ ଦଶରଥାତ୍ମଜ ତେ ଯଦଚ୍ଛଂ
ତ୍ୱଦ୍ୱକ୍ତ୍ରପୂର୍ଣଶଶିଜା ନନୁ ଚନ୍ଦ୍ରିକା ସା ।
ଆଲୋକତଃ ସରସତାଂ ଯଦମୁଷ୍ୟ ଚନ୍ଦ୍ର-
କାନ୍ତାନନଂ ଭଜତି ହି ପ୍ରମଦାଜନସ୍ୟ ॥ ୨୧॥
ସଙ୍କ୍ଷିପ୍ତଶବ୍ଦମପି ଦୁର୍ଗ୍ରହମର୍ଥଜାଲୈଃ
ଯଦ୍ରୋଚତେ ବିବୁଧ ତେ ବଚନଂ ପଶୁଭ୍ୟଃ ।
ତନ୍ମନ୍ଦହାସଶରଦୁଦ୍ଭବଚନ୍ଦ୍ରିକୋଷ୍ଠ
ପୀୟ୍ୟୂଷସଙ୍ଗଜମହୋ ମଧୁରତ୍ୱମସ୍ୟ ॥ ୨୨॥
ଆଦୀୟତେ ସ୍ମ ସୁତ କୋସଲରାଜପୁତ୍ର୍ୟାଃ
ବାଗ୍ଭ୍ୟୋଽନୁ ତେ କିସଲୟୈର୍ମୃଦୁତା ନବୀନୈଃ ।
ଆହୋସ୍ୱିଦତ୍ର କିମୁ ସୁସ୍ମିତ ବୈପରୀତ୍ୟଂ
ବାକ୍ତାଂ ତବାପୁରୁତ ତାନି ନୁ ଯନ୍ନ ଭେଦଃ ॥ ୨୩॥
ସମ୍ପଶ୍ୟତାଂ ଗୁଣାଗଣାମ୍ବୁନିଧେ ଖନୀଂ ନଃ
ବୃତ୍ତାଂ ସ୍ଥିତାଂ ଭବତି ତେ ଚୁବୁକାଦଧୋଽତ୍ର ।
ଧାତ୍ରୋନ୍ନମୟ୍ୟ ମୁଖମେତଦବେକ୍ଷିତୁଂ ତେ
ଦତ୍ତାଦିମାଙ୍ଗୁଲିତଲାଗ୍ରଖନୀତି ଶଙ୍କା ॥ ୨୪॥
ଆଦର୍ଶସାମ୍ୟମନୁଚିନ୍ତ୍ୟ ନିଷେଧୟାମୋ
ଗଣ୍ଡଦ୍ୱୟସ୍ୟ ତବ ରାମ କବୀନ୍ଦ୍ରବଦ୍ଧମ୍ ।
ଅସ୍ମିନ୍ୟଥାଽଭିମୁଖସଂସ୍ଥିତମଚ୍ଛମେବ-
ମନ୍ୟତ୍ର ନ ପ୍ରତିଫଲତ୍ୟୁପମାନମାତ୍ମା ॥ ୨୫॥
ମନ୍ଦସ୍ମିତସ୍ୟ ବିଶଦୈସ୍ତବ ତୈର୍ମହୋଭୀ
ରାମାଭିତୋ ବିତତମଚ୍ଛକପୋଲୟୁଗ୍ମମ୍ ।
ସାନ୍ଦ୍ରଂ ସରୋରୁହଭୁବା ପରିତୋ ବିଲିପ୍ତଂ
ଶୁଦ୍ଧାମୃତସ୍ୟ କଣିକାଭିରିବାଦ୍ୟ ଭାତି ॥ ୨୬॥
ଊର୍ଧ୍ୱସ୍ଫୁରନ୍ମକରକୁଣ୍ଡଲଭାବିଲିପ୍ତ-
ରନ୍ଧ୍ରଶ୍ରୁତିଦ୍ୱୟଯୁଜୀ ତବ ରାମ ନେତ୍ରେ ।
ସୌନ୍ଦର୍ୟନିର୍ଝରମହୃଦୟୁଗ୍ମତୋଽଲଂ
ତୀରେ ଝଷାବିବ ତତଃ ପତିତୌ ଚଲନ୍ତୌ ॥ ୨୭॥
ଶ୍ରୀରାମ କାମସମ ବୃତ୍ତତୟା ତ୍ୱଦୀୟଂ
କର୍ଣଦ୍ୱୟଂ ପ୍ରତିନିଧୀକୃତଶଷ୍କୁଲୀକମ୍ ।
ଦୋର୍ମୂଲଦେଶୟୁଗଲେ ବିନିହୀର୍ଷୟାଽଽଭା-
ମୁତ୍ତଭ୍ୟ କୁଣ୍ଡଲୟୁଗସ୍ୟ ଶନୈରୁପୈତି ॥ ୨୮॥
ଅନ୍ତର୍ଜନସ୍ୟ ତବ ଯୋଽସ୍ତି ଗୁଣାଢ୍ୟ ରାଗଃ
ସ୍ଥାତୁଂ ଶଶାକ ନ ମୁହୁଃ ସ ସମେଧୃମାନଃ ।
ଶିଷ୍ଟସ୍ତତଃ ଶ୍ରବଣରନ୍ଧ୍ରୟୁଗାଦୁପାସ୍ତେ
ନିର୍ଗତ୍ୟ ତତ୍କନକକୁଣ୍ଡଲୟୁଗ୍ମରୂପାତ୍ ॥ ୨୯॥
ଅଙ୍ଗସ୍ୟ ଯସ୍ୟ ଭୁବି ଯା କମନୀୟଭୂଷା
ସା ନିର୍ମଲାପି ଯଦି ତଚ୍ଛ୍ରିୟମାତନୋତି ।
ଗଣ୍ଡପ୍ରଭାବ୍ୟତିକରାଦିବ କର୍ଣଭୂଷେ
କାଷ୍ଠାମୁପେତ୍ୟ ତୁ ବିଭୂଷୟତସ୍ତବାସ୍ୟମ୍ ॥ ୩୦॥
ଶ୍ରୀରାମ ତେ ସଦୟ ଲୋଚନୟୋରୁପାନ୍ତେ
ରାଗୋ ବିନିର୍ଜିତନବାଙ୍କୁରକାନ୍ତିଦର୍ପଃ ।
ମନ୍ୟେ ତମଦ୍ୟ ମନୁଜେଷୁ ନିଜାନୁରାଗଂ
ଦୃଗ୍ଭ୍ୟାଂ ସ୍ୱତଃ ପ୍ରକଟିତଂ ପ୍ରଚୁରଞ୍ଜନାୟ ॥ ୩୧॥
ଆତାମ୍ରକୃଷ୍ଣସିତନେତ୍ରୟୁଗାତ୍ସ୍ରବନ୍ତ୍ୟୋ
ଭାସୋ ବିଭାନ୍ତି ବହୁବର୍ଣମନୋଜ୍ଞରୂପାଃ ।
ପୃଜ୍ୟାଗ୍ରତସ୍ତବ ମୁଦେ ଗଗନାନ୍ତରାଲେ
ସିଦ୍ଧେନ ରାମ ରଚିତା ଇବ ଚିତ୍ରଲେଖାଃ ॥ ୩୨॥
ଭୂତେଷୁ ଜନ୍ମସୁ ନ ଯୈର୍ବହୁ ଚେଦକାରି
ପୁଣ୍ୟଂ ନ ତେଷୁ ପୁରୁଷୋତ୍ତମ ତଂ କଟାକ୍ଷଃ ।
ଇଷ୍ଟାର୍ଥଦଃ ସ ତୁ ସୁଧାରସପୂରତୁଲ୍ୟ-
ସ୍ତାପଂ ହରନ୍ପରମ ମାଂ ବିଷୟୀକରୋତି ॥ ୩୩॥
ପଶ୍ଚାତ୍କୃତସ୍ୟ ପଶୁନା ବୁଧ ଚାମରସ୍ୟ
ମୂର୍ଧ୍ନି ତ୍ୱୟାଽଦ୍ୟ ବିଧୃତସ୍ୟ ସୁକେଶରାଶେଃ ।
ନେହେଽସ୍ମି ସାମ୍ୟମନୁବର୍ଣୟିତୁଂ ସୁଗନ୍ନୁ
ଯାନଞ୍ଜନସ୍ୟ ବିମତେରପହାସ୍ୟତାୟାଃ ॥ ୩୪॥
ଦୃଗ୍ଭ୍ୟାଂ ସରୋରୁହରୁଚିକ୍ଷତିକୃତ୍ସୁଧାବ-
ଦ୍ବିମ୍ବାଧରେଣ ହସିତେନ ସଚନ୍ଦ୍ରିକଂ ଚ ।
ପଦ୍ମେକ୍ଷଣାନନସୁଧାକରମଣ୍ଡଲଂ ତେ
ନଃ ପଶ୍ୟତାଂ ଶଶିସମୀକ୍ଷଣତୋ ବିରକ୍ତିଃ ॥ ୩୫॥
ଆସ୍ୟଂ ତ୍ରିଲୋକମପି ଦାଶରଥେ ସ୍ଫୁଟାକ୍ଷଂ
ବିସ୍ମେରମାବହତ ଉଜ୍ୱଲତାଗୁଣସ୍ୟ ।
ବିଶ୍ରାମଭୂରୁହମନାପ୍ୟ ନ ପାପକୃତ୍କଃ
ଜଙ୍ଘାଲମେଣଧରଦର୍ପଭିଦାକୃତୀଦମ୍ ॥ ୩୬॥
ଉନ୍ନିଦ୍ରମର୍ଧମହିମାଂଶୁମହୋଭିରର୍ଧ-
ନିଦ୍ରାୟିତଂ ଚ କମଲଂ ବିଧୁନୈକଦା ଚେତ୍ ।
ତେନାତିସୁନ୍ଦର ତବୈବ ସମୀକ୍ରିୟେତ
ଗ୍ରୀବା ତୁ ସୁନ୍ଦରତୟା ରହିତୋ ହି କମ୍ବୁଃ ॥ ୩୭॥
ଆଶ୍ଲେଷସକ୍ତହୃଦୟେନ ଯଦା ଯଦା ତେ
କଣ୍ଠୋ ବ୍ୟଲୋକି ସୁୟଶୋ ବନିତାଜନେନ ।
ରାଗସ୍ତଦୀୟମନସୋଽତ୍ର ତଦା ତଦାଲଂ
ସକ୍ତସ୍ତତୋଽସ୍ତି ନୁ ଭବାନତିରକ୍ତକଣ୍ଠଃ ॥ ୩୮॥
ସତ୍ୱେନ ରାମ ମିଲିତେନ ସହାତିରିକ୍ତୈ-
ସ୍ତୈରାମଣୀୟକରସୈଃ ସ୍ୱକରୋପପୀଡମ୍ ।
ତେ ପିଣ୍ଡିତେନ ରଚିତସ୍ୟ ଗଲସ୍ୟ ତିର୍ୟ-
ଗାକୁଞ୍ଚନାତ୍ତ୍ରିବଲି ବିଶ୍ୱସୃଜୋଦଗାତ୍କିମ୍ ॥ ୩୯॥
ଲୋକତ୍ରୟସ୍ୟ ବିଜୟେ ମଦନେନ ସାକ୍ଷା-
ଦ୍ୟଃ ପୂର୍ୟତେ ମୁସ୍ୱମରୁଦ୍ଭିରନନ୍ୟସାଧ୍ୟେ ।
ଶଙ୍ଖଃ ସ ଏବ ତବ କଣ୍ଠମିଷେଣ ରାମ
ହାରୈରନର୍ଘତରଲୈରମଲୈର୍ୱିଭାତି ॥ ୪୦॥
ସ୍କନ୍ଧୌ ତବାମରନିଭାଚ୍ଛସୁବର୍ଣକର୍ଣ
ଭୂଷାପ୍ରଭାରସଝରସ୍ୟ କପୋଲୟୁଗ୍ମମ୍ ।
ଆକ୍ରମ୍ୟ ସମ୍ପ୍ରବହତଃ ପୂନରପ୍ୟଧସ୍ତାତ୍
ବ୍ୟୂଢତ୍ୱମାପତୁରିବାଧରଣାୟ କାମମ୍ ॥ ୪୧॥
ସୃଷ୍ଟ୍ୱା ବିଧିସ୍ତବ ଶରଣ୍ୟ ବିଶାଲମଂସଂ
ମେନେ ପୁନର୍ବହୁବିଶାଲତୟା ବିହୀନମ୍ ।
ଜତ୍ର୍ୱଙ୍ଗମସ୍ୟ ସମବାୟି ଚକାର ସୋଽତ-
ସ୍ତସ୍ମାନ୍ନ ସମ୍ପ୍ରତି ବିଭୋ ବୟି ଦୃଶ୍ୟତେ ତତ୍ ॥ ୪୨॥
ସଙ୍ଖ୍ୟାବତାଂ ଜଗତି ରାମ ଭୁଜୋତ୍ତମାଙ୍ଗ-
ମଂସଂ ବଦନ୍ତି ନିକରାଃ ପ୍ରଥିତୋରୁକୀର୍ତ୍ୟା ।
ତେନାହମେବ ଭୁଜତଶ୍ଚ କିଲୋତ୍ତମାଙ୍ଗ-
ମିତ୍ୟୁନ୍ନତିଂ କିମଭଜନ୍ନୁ ତବାଂସୟୁଗ୍ମମ୍ ॥ ୪୩॥
ଶୁଦ୍ଧା ପ୍ରଭା ବହୁଗୁଣୈରମଲଂ ସ୍ୱହାର-
ମାଚ୍ଛାଦ୍ୟ ରାମ ନିବିଡୋପରିସଂସରନ୍ତୀ ।
ଅତ୍ୟୁନ୍ନତାଦିବ ତବାଂସଗିରେର୍ଗଲନ୍ତୀ
ସୌନ୍ଦର୍ୟହୃଦ୍ୟରସଜା ଲହରୀ ବିଭାତି ॥ ୪୪॥
ଯତ୍ତେ ନରେନ୍ଦ୍ର ସକଲାନନିବାରିତାଭ୍ୟୋ
ବାହୂ ଜନାନୁପନତାନବତୋ ବିପଦ୍ଭ୍ୟଃ ।
ଗମ୍ଭୀରସତ୍ତ୍ୱଗୁଣୟୁକ୍ତତୟା ତତୋଽମୂଂ
ସଦ୍ୱୃତ୍ତତାଂ ନୁ କିମବାପତୁରେବ ତୌ ଦ୍ୱୌ ॥ ୪୫॥
ସଙ୍ଗ୍ରାମମୂର୍ଧ୍ନି ରିପୁଷୁ ସ୍ୱବଲେନ ସାକଂ
ପ୍ରାଣାନ୍ୱିହାୟ ପତିତେଷ୍ୱଥବା ଦ୍ରୁତେଷୁ ।
ଆବେଶତସ୍ତବ ଭୁଜୌ ବିରତିଂ ଭଜେତେ
ଦାର୍ଢ୍ୟଂ ଯତଃ ସରଲତା ନ ତୟୋଃ ଶିଲାୟାଃ ॥ ୪୬॥
ଯାବତ୍ପ୍ରଭୋ ନ ଭୁଜୟୋସ୍ତବ ସତ୍ତ୍ୱମନ୍ତଃ
ପ୍ରାପ୍ନୋତି ମାନମଧୁନାସ୍ତି ତଦୈବ ତାବତ୍ ।
ତସ୍ମାଦ୍ଧ୍ରୁବଂ ଦୃଢତୟା ଦରମପ୍ୟଭିନ୍ନୌ
ନୁନ୍ନୌ ନ ତେନ ଶିଥିଲତ୍ୱମିମୌ ଲଭନ୍ତେ ॥ ୪୭॥
ମଧ୍ୟେଽଭିରାମ ତବ ଶୈଶବସମ୍ପ୍ରୟୁକ୍ତଂ
ପୀନତ୍ୱମଦ୍ୟ ପରିଗୃହ୍ୟ ଚ ଯୌବନେନ ।
ବାହୋର୍ନ୍ୟଧାୟି ନନୁ ତଦ୍ୟଦନୁପ୍ରବେଶେ
ପୀନେ ତନୁତ୍ୱମତନୁତ୍ୱମପୀନୟୋଶ୍ଚ ॥ ୪୮॥
ସୃଷ୍ଟ୍ୱା ମିଥସ୍ତବ ଭୁଜୌ ସଦୃଶୌ ବିଧାତା
ଭୂୟଃ ପରୀକ୍ଷିତୁମନୁତ୍ତମ ତତ୍ସମତ୍ୱମ୍ ।
ଆକର୍ଷତି ସ୍ମ ଦୃଢମେବ ତତୋଽତିଦୈର୍ଘ୍ୟ-
ମାଜାନୁ ରାମ ସମଜନ୍ୟନୟୋସ୍ତୁ ନୂନମ୍ ॥ ୪୯॥
ପାରାବାରପୟୋବିଶୋଷଣଚଣୈବାଣୈର୍ନିହତ୍ୟାଶରାନ୍
କ୍ଲିଷ୍ଟାନ୍ସାଧୁଜନାନ୍ରରକ୍ଷ କୃପୟା ଧର୍ମଞ୍ଚୟୋଽସ୍ଥାପୟତ୍ ।
ସୋଽୟଂ ଶ୍ରୀଜନକାତ୍ମଜାସହଚରୋ ନିଶ୍ଶ୍ରେୟସାଧୀଶ୍ୱରଃ
କ୍ଷେମସ୍ଥୈର୍ୟଜୟାନଭୀପ୍ସିତମଥୋ ଭଦ୍ରଞ୍ଚ ଦଦ୍ୟାତ୍ସତାମ୍ ॥
ଇତି ଶ୍ରୀରାମସୌନ୍ଦର୍ୟଲହରୀ ସମାପ୍ତା ।
॥ ଶୁଭମସ୍ତୁ ॥
.
Comments
Post a Comment