ରାମଗୀତଗୋବିନ୍ଦମ୍
ରାମଗୀତଗୋବିନ୍ଦମ୍
(କବି ଜୟଦେବବିରଚିତଂ ରାଗକାବ୍ୟମ୍)
॥ ଶ୍ରୀଃ ॥
॥ ଶ୍ରୀଗଣେଶାୟ ନମଃ ॥
॥ ଶ୍ରୀରାମଚନ୍ଦ୍ରାୟ ନମଃ ॥
ପ୍ରଥମସର୍ଗଃ ୧ ସାନନ୍ଦରଘୁନନ୍ଦନଃ
ଅଷ୍ଟପଦୀ ୧ ଗୀତଂ ପ୍ରଥମମ୍
ଜୟ ଜୟ ରାମ! ହରେ ॥ ଧୃ.॥
ସ୍ମୃତିବେଦାଦ୍ୟୁଦ୍ଧାରକ ଜନତାରକ ଏ ।
ଶଙ୍ଖସୁମନ ସୁରବନ୍ଦ୍ୟ ॥ ୧॥
ନମଦାଖଣ୍ଡଲଶେଖର ଧୃତମନ୍ଦର ଏ ।
ସନ୍ତତଜଗଦାଧାର ॥ ୨॥
ହେମନୟନସଂହାରଣ ଖଲଦାରଣ ଏ ।
ଭୁବନାନନ୍ଦ ମୁକୁନ୍ଦ ॥ ୩॥
କନକକଶିପୁତନୁଘର୍ଷଣ ଘନକର୍ଷଣ ଏ ।
ଧୃତଜଗତୀବରଭାର ॥ ୪॥
ଚରଣସଲିଲକୃତପାବନ ବଟୁ ବାମନ ଏ ।
ଅଜିନଦଣ୍ଡଧର ଦେବ ॥ ୫॥
କ୍ଷତ୍ରିୟବଂଶନିକନ୍ଦନ ଭୃଗୁନନ୍ଦନ ଏ ।
କରକୋଦଣ୍ଡକୁଠାର ॥ ୬॥
ବିହିତସୁଜନସମ୍ଭାବନ ଜିତରାବଣ ଏ ।
ରଘୁକୁଲକମଲଦିନେଶ ॥ ୭॥
ମୁରଚାଣୂରବିନାଶକ ରିପୁଶାସକ ଏ ।
ସିନ୍ଧୁସୁତାସଞ୍ଚାର ॥ ୮॥
ବେଦବିହିତବିଧିଖଣ୍ଡନ ସୁରମଣ୍ଡନ ଏ ।
ଦନୁଜଭେଦକର ଦେବ ॥ ୯॥
ଯବନବିଦାରଣ ଦାରୁଣ ହୟବାହନ ଏ ।
ଧୃତକରବାଲ କରାଲ ॥ ୧୦॥
ଶ୍ରୀଜୟଦେବବିଧାୟକ ଯୁତଶାୟକ ଏ ।
କୁରୁ କୁଶଲଂ ପ୍ରଣତେଷୁ ॥ ୧୧॥
ଅଷ୍ଟପଦୀ ୨ ଗୀତଂ ଦ୍ୱିତୀୟମ୍
ବନ୍ଦେଽରବିନ୍ଦ ନୟନାମ୍ବୁଦାଭ କମନୀୟ ମୂର୍ତିଧର ପଦ୍ମନାଭ ॥ ୧॥
କୋଦଣ୍ଡ-କଲା-କୌତୁକ-ନିଧାନ ପାଖଣ୍ଡ-ବିଖଣ୍ଡନ ଗରୁଡୟାନ ॥ ୨॥
କଲ୍ପାନ୍ତକୋଲ କରୁଣାବତାର କଲ୍ୟାଣ କମଠକୃତ କର୍ଣଧାର ॥ ୩॥
ମାୟାବିଲାସ ନାନାରୂପ କୁନ୍ଦାମଦଶନ ଜୟଦେକ ଭୂପ ॥ ୪॥
ରାଜାଧିରାଜ ବୀରାଧିବୀର ରଣକର୍ମକୁଶଲ ବଲଗୁଣଗଭୀର ॥ ୫॥
ତ୍ରିଶିର ଖର ଦୂଷଣ ଦୂଷଣାନ୍ତ ଅଜ ନିର୍ୱ୍ୟଲୀକଗୋତୀତ କାନ୍ତ ॥ ୬॥
ବ୍ରହ୍ମାଦି ଦେବଗଣ ପୂଜ୍ୟପାଦ ବିଭ୍ରାଜ୍ୟମାନ ବିସ୍ମିତ ବିଷାଦ ॥ ୭॥
ଜୟଦେବ ଭଣିତମୟ ଶସ୍ତ୍ରବର୍ମ ବିଦଧାତୁ ସଦା ପ୍ରଣତେଷୁ ଶର୍ମ ॥ ୮॥
ଅଷ୍ଟପଦୀ ୩ ଗୀତଂ ତୃତୀୟମ୍
ରମ୍ୟବାଲରୂପଂ ରାମମଭିରାମମହମୀଡେ ।
ରାବଣାଭିଭବପରିତପ୍ତସୁରସିଦ୍ଧଗଣୟାଚିତଂ ଜୟତି ବରମୀଡେ ॥ ୧॥
ଇନ୍ଦ୍ରନୀଲାଭତନୁମତନୁଶତକୋଟିରୁଚିମିନ୍ଦୁମୁଖଚନ୍ଦ୍ରମୁରହାରମ୍ ।
କୌସ୍ତୁଭାମୁକ୍ତକନ୍ଧରମରୁଣପାଣିପଦମମ୍ବୁରୁହନୟନମଲିତାରମ୍ ॥ ୨॥
କମ୍ବୁନିଭକଣ୍ଠମତିନୀଲଚିକୁରାବଲୀବିଜିତ ଜଲବାହସଙ୍ଘାତମ୍ ।
ଗୂଢତରଜତ୍ରୁମାଜାନୁଭୁଜଦଣ୍ଡଧରମୁରସି ଭୃଗୁଚରଣଜଲଜାତମ୍ ॥ ୩॥
ବିବିଧମଣିଚିତ୍ରହେମାଽଭରଣଭୁଷିତଂ ହେତିସମ୍ବିହିତଜୟଗାନମ୍ ।
ମନ୍ଦମନ୍ଦସ୍ମିତ ବନ୍ଧୁବିପାଽଧରେ ପଙ୍କଗାମିତ୍ରଚରୟାନମ୍ ॥ ୪॥
କନକମୟପଟ୍ଟମଣ୍ଡିତଲଲାଟସ୍ଥଲଂ କୁନ୍ଦକୁନ୍କୁମାଭରଦଭାସମ୍ ।
ରୁଚିରମଖସୂତ୍ରଭୃତମିନ୍ଦିରାସଙ୍କୁଲଂ ପୀତକୌଶେୟଶୁଭବାସମ୍ ॥ ୫॥
ସୁଖଦନାସାପୁଟଂ ଶୀଲକରୁଣାକରଂ ସଖ୍ୟସଙ୍କଲ୍ପମହିତଲ୍ପମ୍ ।
ଦାନବାନନୀକମତେଭପଞ୍ଚାନନଂ ବିହିତପଲଦିବସୟୁଗକଲ୍ପମ୍ ॥ ୬॥
କୋଶଲାଧୀଶଜାୟାଦିଶିଶୁଶୋକହରମମ୍ଦୁତଂ ବୀକ୍ଷ୍ୟ କୌସଲ୍ୟା ।
ଅବଦଦିତି ରୂପମଧୁନା ଜହିହି କେଶବ ତ୍ରାହୀ ମାମପଗତଶଲ୍ୟା ॥ ୭॥
ପଠତି ଯା ଜ୍ଞାନମଜ୍ଞାନତିମିରାପହଂ ବୈଷ୍ଣବଂ ତ୍ରିଜଗଦତିସାରମ୍ ।
ଭାବୁକଂ ଚାରୁ ଜୟଦେବକବିନିର୍ମିତଂ ଯାତି ଭବସିନ୍ଧୁପରପାରମ୍ ॥ ୮॥
ଅଷ୍ଟପଦୀ ୪ ଗୀତଂ ଚତୁର୍ଥମ୍
ରାମବଦନମତିମଞ୍ଜୁ ବିଲୋକୟ ।
ଶାରଦ-କୋଟୀ-ଶଶିନମିବ ନିର୍ମଲମକ୍ଷୀଚକୋରଂ ରୋପୟ ॥ ୧॥
ଭୃକୁଟି-କୁଟିଲ-ଧନୁର୍ୱଲିତଂ ନବକୁଙ୍କୁମ-ତିଲକଲଲାଟମ୍ ।
ସୁହୃୟ-ହୃଦୟ-ବିଶୋକକରଂ କରୁଣାମୟ-ନୟନ-ବିପାଟମ୍ ॥ ୨॥
କ୍ଷୀରପୟୋନିଧି-ବୀଚିବିନିନ୍ଦକ-ବିଶଦମନୋହର-ହାସମ୍ ।
କୁନ୍ଦକୁସୁମ-କମନୀୟଲସଦ୍ରଶନାବଲି-କିରଣ-ବିକାଶମ୍ ॥ ୩॥
ନାଗଲତାରସ-ରାଗଧରାଧର-ପଲ୍ଲବମୟହୃଦି-ହାସମ୍ ।
କୀରମୁଖାକୃତି ଧୀରସୁଗନ୍ଧ-ସମୀକରଣ-ନାସାବାସମ୍ ॥ ୪॥
ନାନାରତ୍ନ-ବିଚିତ୍ର-ହିରଣ୍ମୟ-ମୁକୁଟ-ବିଭାଗମତୋଲମ୍ ।
ମକରାକାର-କନକକୁଣ୍ଡଲ-ଯୁଗ-ଚଲନ-ବିଭାସି-କପୋଲମ୍ ॥ ୫॥
କମ୍ବୁ-ରୁଚିରତର କଣ୍ଠମୃଦମ୍ବୁନୀଲ-ବିଜୃମ୍ଭିତକେଶମ୍ ।
ରଘୁକୁଲ-କୈରବ-କାନନ-ନିୟତ ବିକାଶକ-ଚାରୂ-ନିଶେଶମ୍ ॥ ୬॥
ମଙ୍ଗଲମୋଦକରଂ ସୁଚିରଂ ନିଜଭକ୍ତସତାମନୁକୁଲମ୍ ।
ଲୋକଚତୁର୍ଦଶ-ପାଲନଦକ୍ଷମପକ୍ଷବିନାଶମତୁଲମ୍ ॥ ୭॥
ଶ୍ରୀଜୟଦେବକବେରିଦମୁଦୟତି ହରିଚରଣସ୍ମୃତିସାରମ୍ ।
ସୁଖୟତୁ ସାଧୁଜନଂ ସତତଂ କିଲ ଶମୟତୁ ବିଷୟବିକାରମ୍ ॥ ୮॥
ଅଷ୍ଟପଦୀ ୫ ଗୀତଂ ପଞ୍ଚମମ୍
ରାମଚନ୍ଦ୍ର କରକମଲମୁଦାରମ୍ ।
ଭଜ ଭଜନୀୟମମଲମତୁଲିତରୁଚି ଦମିତଦନୁଜପରିବାରମ୍ ॥ ୧॥
ଧୃତକୋଦଣ୍ଡବିଶିଖମଣିଭୂଷଣମରୁଣମନୋହରବେଷମ୍ ।
ଭାଗଧେୟସୂଚକବିଶୁଦ୍ଧତରବିବିଧବର୍ଣଶୁଭରେଖମ୍ ॥ ୨॥
ସ୍ଫୁରଦଙ୍ଗୁଲିନଖରାଜିବିରାଜିତମମରନିକରକୃତରାଗମ୍ ।
ମୁକ୍ତାଦଲଭୂଷିତଦଲସଙ୍କୁଲସରସିଜମିବ ବରଭାଗମ୍ ॥ ୩॥
ବରମଭୀଷ୍ଟମଭୟଂ ଦଦଦଦ୍ଭୁତମାଜିକଲାସୁପବନିମ୍ ।
ଅରିଷଡ୍ୱର୍ଗମଧୁପମଦଗଞ୍ଜନମନୁପମମଞ୍ଜନହୀନମ୍ ॥ ୪॥
ଧର୍ମାଦିକଫଲନମିତମହର୍ନିଶମଜଶଙ୍କରମୁନିଗୀତମ୍ ।
କମଲାପାଣିକନଲଲାଲିତତତମମସୁରବିଘାତବିନୀତମ୍ ॥ ୫॥
କପିଲାଦିକସନକାଦିନିଷେବିତମଶୁଭଶମନମତିଭାରମ୍ ।
ବେଦପୁରାଣସକଲସମ୍ମତମିବ ସାଦିତବିଷମବିକାରମ୍ ॥ ୬॥
ଚିନ୍ତାମଣିସୁରଧେନୁକଲ୍ପତରୁକୋଟିଦାନଗୁଣଶୀଲମ୍ ।
ପ୍ରାକୃତତତ୍ତ୍ୱପ୍ରପଞ୍ଚରୋଗହରମଖିଲଚରାଚରଲୀଲମ୍ ॥ ୭॥
ଶ୍ରୀଜୟଦେବଭଣିତମତିମଞ୍ଜୁଲମଧୁରମନୋହରଗାନମ୍ ।
ଦିଶତୁ ସଦାମଙ୍ଗଲମତୁଲିତମିତି ପରମାନନ୍ଦନିଧାନମ୍ ॥ ୮॥
ଇତି ଶ୍ରୀମଦ୍ରାମଗୀତଗୋବିନ୍ଦେ ମହାକାବ୍ୟେ ଶ୍ରୀଜୟଦେବକୃତୌ
ସାନନ୍ଦରଘୁନନ୍ଦନୋ ନାମ ପ୍ରଥମ ସର୍ଗଃ ।
ଦ୍ୱିତୀୟସର୍ଗଃ ୨ ବିଜିତପରଶୁରାମୋ
ଅଷ୍ଟପଦୀ ୬ ଗୀତଂ ଷଷ୍ଠମ୍
ପ୍ରଣମାମି ରାମମନୁତ୍ତମଂ ମନୁବଂଶକଞ୍ଜରବିମ୍ ।
କନ୍ଦର୍ପକୋଟିସମାନ-ସୁନ୍ଦରରୂପମାଦିକବିମ୍ ॥ ୧॥
ବ୍ରହ୍ମାଭିଧାନମଲେପମଜମଦ୍ୱୈତମପ୍ରଲୟମ୍ ।
ସଦ୍ରୂପବନ୍ତମବାଧିକଂ ଚିନ୍ମାତ୍ରମମ୍ବୁଶୟମ୍ ॥ ୨॥
ସତ୍ୟସ୍ୱରୂପମମେୟମକ୍ଷରମପ୍ରପଞ୍ଚଗତମ୍ ।
ଅବ୍ୟକ୍ତମପ୍ରତିମଂ ନିରୀହମଖଣ୍ଡମୀଶମତମ୍ ॥ ୩॥
ସ୍ମୃତିବେଦହରଶଙ୍କାଽସୁରପ୍ରତିଘାତଦକ୍ଷତରମ୍ ।
କ୍ଷୀରୋଦମଥନମହାଗମନ୍ଦରପୃଷ୍ଠଭାଗଧରମ୍ ॥ ୪॥
ଉତ୍ତୁଙ୍ଗରଦଶିଖରେଣ ଚାୟତଭୂମିତୂଲକରମ୍ ।
ପ୍ରଲ୍ହାଦପାଲକମସୁରକାଲକମଭ୍ରଭେଦଧରମ୍ ॥ ୫॥
କୋଦଣ୍ଡବାଣକୁଠାରକରତଲମଖିଲବାହୁଜହମ୍ ।
ସାକେତଭୂପତିନନ୍ଦନଂ ସତ୍ୟାଦିବାହୁବହମ୍ ॥ ୬॥
ଜଲଦାଭମିନ୍ଦୁନିଭାନନଂ କିଞ୍ଜଲ୍କପାତପଟମ୍ ।
ମଣିଚିତ୍ରହେମକିରୀଟଭୂଷିତଚାରୁଭାଲତଟମ୍ ॥ ୭॥
ଇତି ପଠତି ଯୋ ରଘୁବୀରବର୍ଣନମୁଜ୍ଜ୍ୱଲଂ ସୁଚାରମ୍ ।
ଜୟଦେବନିର୍ମିତମିତ୍ୟନୂପମମେତି ମୋଦଭରମ୍ ॥ ୮॥
ଅଷ୍ଟପଦୀ ୭ ଗୀତଂ ସପ୍ତମମ୍
ଜୟତି ବିଦେହନଗରମନୁରୂପମ୍ ।
ଦିଶୀଦିଶୀ ରାଜମାନଚାମୀକରରଚିତବିବିଧମଣିୟୂପମ୍ ॥ ୧॥
ରୁଚିରଲତାତରୁସୁମନବାଟିକାବାପୀକୂପତଡାଗମ୍ ।
ବପ୍ରବଲୟପରିଖାବୃତମଭିନବଚିତ୍ରମୁଦୟଦନୁରାଗମ୍ ॥ ୨॥
ଶେଷଭୟଙ୍କରବେଶନୃପତିଦୁର୍ଧର୍ଷମହେଶପିନାକମ୍ ।
ମଣିମୟସୌଧସମୂହମୁଦଗ୍ରମରୁଚ୍ଚଲବିଶଦପତାକମ୍ ॥ ୩॥
ତୋରଣନିକରକିରଣସଞ୍ଚାରବିନିନ୍ଦିତସୁରପତିଚାପମ୍ ।
ଆହୁତିଗନ୍ଧସହିତମଖଧୂମବିଧୂତସକଲଜନପାପମ୍ ॥ ୪॥
ଗଜରଥତୁରଗପଦାତିବିଘଟ୍ଟବିଶୃଙ୍ଖଲଶବ୍ଦମୁଦାରମ୍ ।
ଶାରଦବିଧୁସଙ୍କାଶବିକାଶକନକକଲଶାଶ୍ରିତତାରମ୍ ॥ ୫॥
ପଣ୍ଡିତସୁମତିସୁଶୀଲସୁଧର୍ମସୁକର୍ମମନୁଜପରିବାରମ୍ ।
ପତିପଦପଦ୍ମନିହିତନିଜଚିତ୍ତଚତୁରସୁନ୍ଦରପୁରଦାରମ୍ ॥ ୬॥
ସୁଖଦବିତାନମନେକତପୋଧନଭୂଷିତମତିଶୟଲୋଭମ୍ ।
ପଙ୍କଜୟୋନିବିନିର୍ମିତମିବକୃତ ସନ୍ତତମାନସଲୋଭମ୍ ॥ ୭॥
ଶ୍ରୀଜୟଦେବକବେରୁଦିତଂ ମିଥିଲାପୁରଗୀତମଶୋକମ୍ ।
ମଙ୍ଗଲମୋଦଭରେଣ କରୋତୁ ସଦାମୁଦିତଂ ଜନଲୋକମ୍ ॥ ୮॥
ଅଷ୍ଟପଦୀ ୮ ଗୀତମଷ୍ଟମମ୍
ପରଶୁରାମମବଲୋକ୍ୟ ସକୋପମ୍ ।
ରଘୁପତିରଭିଜହର୍ଷ ଯୁଗବାହୁବିହିତବହୁବାହୁଜଲୋପମ୍ ॥ ୧॥
ଭୃକୁଟୀକୁଟିଲମରୁଣବଦନଂ ରଦଖଣ୍ଡିତରଦପରିଧାନମ୍ ।
ଦଧତମିବ ଦ୍ୟୁମଣିଂ ଶଶିନଂ ସକୁଜଂ ସସିତଂ କୃତମାନମ୍ ॥ ୨॥
ରୁଚିରଜଟାମୁକୁଟଦ୍ୟୁତିପୁଞ୍ଜବିଭାସିମନୋହରଭାଲମ୍ ।
ପାଣିସରୋଜନିହିତଶରଚାପକୁଠାରମତୀବକରାଲମ୍ ॥ ୩॥
ଏକକବିଂଶତିବାରମହାବିଜୟସ୍ଫୁଟଶଂ ଗଜଲେଖମ୍ ।
ଭୂତିବିଭୂଷିତବିଗ୍ରହଭାଗମନୂପମରୂପମଶଷେମ୍ ॥ ୪॥
ଲଲିତସୁମେରୂବଲୟପରିବୀତମୁମାପତିଶିଷ୍ୟମୁଦାରମ୍ ।
ଚନ୍ଦ୍ରବିଶଦମଖତନ୍ତୁସମେତମଲିପ୍ରଭନିଶ୍ଚଲତାରମ୍ ॥ ୫॥
ଅସ୍ତ୍ରଶସ୍ତ୍ରସମ୍ଭୂତମହାବ୍ରଣବକ୍ଷସମାହବଧୀରମ୍ ।
କଟିତଟୟୁଗଲନିଷଙ୍ଗଧରଂ ଜଲବାହକଶବ୍ଦଗଭୀରମ୍ ॥ ୬॥
ଶିବଶିବମନ୍ତ୍ରମମୁଂ ଜପମାନମରିକ୍ଷୟହେତୁମ୍ ।
ଦର୍ଭପଟୀମୃଗଚର୍ମୟୁତଂ ଭୃଗୁବଂଶମନୁତ୍ତମକେତୁମ୍ ॥ ୭॥
ଶ୍ରୀଜୟଦେବକବେରୁଦିତଂ ଦ୍ୱିଜରାଜମହାଭଟରୂପମ୍ ।
ପୂରୟତୁ ପ୍ରଣତସ୍ୟ ଜନସ୍ୟ ମନୋରଥମାମନୁରୂପମ୍ ॥ ୮॥
ଅଷ୍ଟପଦୀ ୯ ଗୀତଂ ନବମମ୍
ଜୟ ରାମଚନ୍ଦ୍ର କମଲାବିହାର ।
ଜୟ କୋଶଲେଶ କରୂଣାବତାର ॥ ୧॥
ରଘୁବଂଶ-କମଲ-କାନନ-ଦିନେଶ ।
କନ୍ଦର୍ପକୋଟୀ କମନୀୟବେଶ ॥ ୨॥
କାଲାଗ୍ନିସଦୃଶକୋପାତିରେକ ।
ଗନ୍ଧର୍ୱଗୀତପୂରିତବିବେକ ॥ ୩॥
ରଜନୀଚର-ପ୍ରକର-ବିପିନଦାବ ।
ବେଦାନ୍ତବେଦଗଣଭଣିତଭାବ ॥ ୪॥
ବାଗୀଶ ସର୍ୱବିଦ୍ୟାବିଚାର ।
ବ୍ରହ୍ମାଦିବନ୍ଦ୍ୟ ହୃତଭୂମିଭାର ॥ ୫॥
ମଦମୋହକାମ-ପନ୍ନଗଖଗେଶ ।
ଶରଦିନ୍ଦୁନିଭାନନ କୁଟିଲକେଶ ॥ ୬॥
ତଡିଦାଭବସନ ରମଣୀୟହାସ ।
କୁନ୍ଦାଭଦଶନ ମାୟାବିଲାସ ॥ ୭॥
ଜୟଦେବ ବିନୟମତିଶୟମବେହି ।
ନିଜଚରଣକମଲମଧୁମେବ ଦେହି ॥ ୮॥
ଇତି ଶ୍ରୀମଦ୍ରାମଗୀତଗୋବିନ୍ଦେ ମହାକାବ୍ୟେ ଶ୍ରୀଜୟଦେବକୃତୌ
ବିଜିତପରଶୁରାମୋ ନାମ ଦ୍ୱିତୀୟଃ ସର୍ଗଃ ।
ତୃତୀୟସର୍ଗଃ ୩ ଜଗନ୍ନିବାସଃ
ଅଷ୍ଟପଦୀ ୧୦ ଗୀତଂ ଦଶମମ୍
ଶ୍ରୀରାମରୂପମନୂପମଂ ପଶ୍ୟାମି ତାପହରମ୍ ।
ଜଲେନ୍ଦ୍ରନୀଲମଣି ପ୍ରଭଂ ଶରଦିନ୍ଦୁବକ୍ତ୍ରଧରମ୍ ॥ ୧॥
କନକାସନେ ମଣିମଣ୍ଡପେ ସପରିଚ୍ଛଦେଽଧିଗତମ୍ ।
ଜନକାଽଧିରାଜସୁତାସମେତମଶେଷୟୋଗିମତମ୍ ॥ ୨॥
ଚପଲାବିଭୂଷିତସଜଲଜଲଧରମିବ ମନୋହରଣମ୍ ।
କିଞ୍ଜଲ୍କପାତଦୁକୂଲସଙ୍କୁଲମିନ୍ଦିରାରମଣମ୍ ॥ ୩॥
କେୟୂରକୁଣ୍ଡଲମୁକୁଟକଙ୍କଣମୁଦ୍ରିକାରୁଚିରମ୍ ।
ମୁକ୍ତାଭରଦନମନଙ୍ଗସୁନ୍ଦରମଙ୍ଗୁଲୀରୁଚିରମ୍ ॥ ୪॥
ବିଦ୍ୟାବିଚାରଣଦକ୍ଷମଚ୍ଛମପକ୍ଷପକ୍ଷକରମ୍ ।
କଲ୍ୟାଣଭାଜନମୀଶ ବନ୍ଦିତମୀତିଶରମ୍ ॥ ୫॥
ଆଜାନୁବାହୁମୁଦାରବିକ୍ରମମର୍କକୋଟିରୁଚମ୍ ।
ନିଃଶେଷଲକ୍ଷଣଲକ୍ଷଣୀୟମପାସ୍ତରୋଗଶୁଚମ୍ ॥ ୬॥
ମନ୍ଦାରମଲ୍ଲୀକୁନ୍ଦତୁଲସୀଦାମସମ୍ବଲିତମ୍ ।
ଶ୍ରୀବତ୍ସାଚିହ୍ନିତବକ୍ଷସଂ ସ୍ୱର୍ଣୋପବୀତଚିତମ୍ ॥ ୭॥
ଜୟଦେବଭାଷିତମଷ୍ଟପଦମଂହୋନିରାଶପରମ୍ ।
ଶ୍ରେୟୋ ଦିଶତ୍ୱଖିଲଂ ଜନାୟ ନିଜାୟ ଲୋକବରମ୍ ॥ ୮॥
ଅଷ୍ଟପଦୀ ୧୧ ଗୀତମେକାଦଶମମ୍
ସଖେ ସାନୁରାଗଂ ଭଜତୁ ରଘୁବୀରପଦମେକମ୍ ।
ସର୍ୱସୌଭାଗ୍ୟସମ୍ପତ୍ତିସନ୍ଦେହକରମିନ୍ଦୁଶତକୋଟିରୁଚିସେକମ୍ ॥ ୧॥
କେତୁଦମ୍ଭୋଲିରେଖାଙ୍କୁଶଚ୍ଛତ୍ରବରଚିହ୍ନମମ୍ଭୋଜହାରମ୍ ।
ବ୍ରହ୍ମବାଗୀଶସନକାଦିମୁନିସେବିତଂ ବେଦବେଦାନ୍ତମତସାରମ୍ ॥ ୨॥
ନମ୍ରଦିକ୍ପାଲଗଣ ମୌଲିମଣିମାଲିକାକାନ୍ତିବିସ୍ତରଣମତିଶୋଭମ୍ ।
ସିଦ୍ଧବିଘ୍ନେଶୟଜ୍ଞେଶବିନାଶବସୁତୁଷିତଗନ୍ଧର୍ୱକୃତଲୋଭମ୍ ॥ ୩॥
ପୂରିତାନନ୍ଦକାମାରିଶିରସି ସ୍ଫୁରଦ୍ୱିମଲଗଙ୍ଗୌଘଜଟସିକ୍ତମ୍ ।
ଶାପବଶଗୌତମୀପାପପରିଣାମହରମରୁଣମୁଦ୍ୟୋତଦ୍ୟୁତିରକ୍ତମ୍ ॥ ୪॥
ଅଞ୍ଜନୀନନ୍ଦନପ୍ରେମକାସାରସରସୀରୁହଂ ଯୋଗିଗଣୟତ୍ନମ୍ ।
ଇନ୍ଦିରାପାଣିପାଥୋଜବରଲାଲିତଂ ସଦ୍ୱୃତ୍ତପାବନଂ ନିପୁଣରତ୍ନମ୍ ॥ ୫॥
ବିପୁଲବିସ୍ତାରସଂସାରସାଗରତରଣଶରଣଶୁଭକଲ୍ପଦୃଢନାବମ୍ ।
କାମମଦମୋହଲୋଭଦିକାନନମହାବିଧବିଷମତମଦାବମ୍ ॥ ୬॥
ଦର୍ଶନାଦେବ ଲୋକର୍ତିଶୋକାପହଂ ରାକ୍ଷସାଭିଭବମଭିରାମମ୍ ।
କାମତରୁକାମମଣିକାମଘୁକ୍କୋଟିଗୁଣଦାନକରପରମବିଶ୍ରାମମ୍ ॥ ୭॥
ଜୟତି ଗମ୍ଭୀରଜୟଦେବକବିଭାରତୀ ପୁଣ୍ୟଦା ଶମିତପରିତାପା ।
ରାଜରାଜେନ୍ଦ୍ର ରଘୁବୀରଚରଣାମ୍ବୁଜସ୍ମରଣଶୁଭକରଣଗତପାପା ॥ ୮॥
ଅଷ୍ଟପଦୀ ୧୨ ଗୀତଂ ଦ୍ୱାଦଶମ୍
ବିହରତି ହରିରିହ ସରୟୂକୂଲେ ।
ପଦ୍ମରାଗଚାମୀକରମରକତବଦ୍ଧବିବିଧତରୁକୁଲେ ॥ ୧॥
ସାଦରମଜ୍ଜଦମିତୟୁବତୀକୁଚକୁଙ୍କୁମପିଙ୍ଗଲନୀରେ ।
ଶମଦମାଦିସାଧନବିବେକବଶମୁନିଜନସଙ୍କୁଲତୀରେ ॥ ୨॥
ବିଲିଖିତମକରନିଶାକର ଦିନକରଚଞ୍ଚଲ ବିଶଦପତାକେ ।
ଦିବ୍ୟାସନବିଶେଷପୂରିତଦୂରୀକୃତଦୁରିତବିପାକେ ॥ ୩॥
ସାରସଜଲକୋୟଷ୍ଟିମରାଲକଚକ୍ରବିଜୃମ୍ଭିତନାଦେ ।
ପଙ୍କରୁହକେଦାରବିବୋଧନପରିମଲଶମିତବିଷାଦେ ॥ ୪॥
ଯାତାୟାତତୁରଙ୍ଗମତଙ୍ଗଜକରଭମନୁଜରଥୟାନେ ।
ଦିଶିଦିଶି ନିଜବିଶ୍ରାମକାମବହୁବିରଚିତରୁଚିରବିତାନେ ॥ ୫॥
ରାଜଦନେକଲବଙ୍ଗଲତାବଲୀମୁନିପାଦପଚୂତେ ।
ଭ୍ରାଜିତତୁରଗତରଙ୍ଗବିକାଶଲସତ୍ତୁଲସୀଦଲପୂତେ ॥ ୬॥
ଦେବଗୃହୈରଭିତଃ ସ୍ଫୁରତି ପ୍ରଣବାଦିକମନ୍ତ୍ରବିଚାରେ ।
ଧ୍ୟାନପରାୟଣସିଦ୍ଧସମୂହ-ନିରାକୃତବିଷୟବିକାରେ ॥ ୭॥
ଶ୍ରୀଜୟଦେବକବେରୁଦିତଂ ସରୟୂସରିଦୁଜ୍ଜ୍ୱଲଗାନମ୍ ।
ସର୍ୱସତାମନିଶଂ ଭବତୁ ପ୍ରିୟଦଂ ସୁଖମୋଦନିଧାନମ୍ ॥ ୮॥
ଅଷ୍ଟପଦୀ ୧୩ ଗୀତଂ ତ୍ରୟୋଦଶମ୍
ଶୃଣୁ ମମ ବଚନମିଦଂ ନୃପଭୂଷଣ
ସତ୍ୟସିନ୍ଧୁବିଦ୍ୟାହତଦୂଷଣ ।
ଦେହି ବରଂ ନାଥ ଜହି ନ ଧର୍ମପଥମ୍ ॥ ୧॥
ଦେବାସୁରରଣମଧ୍ୟସଲୀଲମ୍ ।
ଭଙ୍ଗମଗମଦୁତ୍ତମରଥକୋଲମ୍ ॥ ୨॥
ନିଜକରମର୍ପ୍ୟ ତତ୍ର ଧୃତଶାୟକ ।
ଦତ୍ତ ବିଜୟଯଶସ୍ତ୍ୱୟି ନାୟକ ॥ ୩॥
ସମୟମବାପ୍ୟ ବଦତି ବିଜ୍ଞାନୀ ।
ତସ୍ମାଦିହି ନ ନିନିନ୍ଦିତବାନୀ ॥ ୪॥
କୁରୁ ଭରତଂ କୋଶଲପୁରନାଥମ୍ ।
ରଘୁପତିରେତୁ ବିପିନମୁନିଗାଥମ୍ ॥ ୫॥
ନ ତୁ ତବ ଧର୍ମହାନି ନ ହି ପାପମ୍ ।
ତାମୁପନୟତି ସହିତମହିତାପମ୍ ॥ ୬॥
ଆକଲୟ୍ୟ ଭୂପତିରିପୁକଲ୍ପମ୍ ।
ମନସି ଚକାର ଜୀବସଙ୍କଲ୍ପମ୍ ॥ ୭॥
ଶ୍ରୀଜୟଦେବକରଚିତରହସ୍ୟମ୍ ।
ସାଧୁଜନସ୍ୟ ତନୋତୁ ଯଶସ୍ୟମ୍ ॥ ୮॥
ଅଷ୍ଟପଦୀ ୧୪ ଗୀତଂ ଚତୁର୍ଦଶମ୍
ପଶ୍ୟ ପଶ୍ୟ ରଘୁବୀର ପ୍ରୟାଗମ୍ ॥
ମଜ୍ଜଦଖିଲମୁନିଗଣମତିରାଗମ୍ ।
ସୀତୟା ସହ ସନ୍ତତମେତମ୍ ॥ ୧॥
ନୀଲପୀତାସିତଚିତ୍ରପତାକମ୍ ।
ସୁଖସମୂହଶିଥିଲୀକୃତନାକମ୍ ॥ ୨॥
ସିଂହାସନପରିପୂରିତକୂଲମ୍ ।
ଜ୍ଞାନୟୋଗଜପସାଧନମୂଲମ୍ ॥ ୩॥
ବାଣୀଜନ୍ହୁତରଣିଜାସଙ୍ଗମ୍ ।
ନିମିଷାଦେତି କଲୁଷମତିଭଙ୍ଗମ୍ ॥ ୪॥
ଉପବନବନଭୂଷିତମହିଦେଶମ୍ ।
ସକଲକଲାକଲ୍ପିତଶୁଭବେଶମ୍ ॥ ୫॥
ମନୁଜାକାରସୁରାସୁରନାଗମ୍ ।
ବିହିତନୃପତିତାପସବରୟାଗମ୍ ॥ ୬॥
ମୁକ୍ତିଚତୁର୍ୱିଧସୁଲଭମନୂପମ୍ ।
ରାଜମାନନାନାମଣିୟୂପମ୍ ॥ ୭॥
ଶ୍ରୀଜୟଦେବଭଣିତମିତି ଗୀତମ୍ ।
ସୁଖୟତୁ ରାମଚରଣମୁପନୀତମ୍ ॥ ୮॥
ଇତି ଶ୍ରୀମଦ୍ରାମଗୀତଗୋବିନ୍ଦେ ମହାକାବ୍ୟେ ଶ୍ରୀଜୟଦେବକୃତୌ
ଜଗନ୍ନିବାସୋ ନାମ ତୃତୀୟଃ ସର୍ଗଃ ।
ଚତୁର୍ଥସର୍ଗଃ ୪ ଲଙ୍କାପ୍ରବେଶୋ
ଅଷ୍ଟପଦୀ ୧୫ ଗୀତଂ ପଞ୍ଚଦଶମ୍
ଚିତ୍ରକୂଟମବଲୋକୟ ସୀତେ ।
ଉନ୍ନତଶିଖରଲିଖିତଘନମଣ୍ଡଲମଙ୍ଗଲକରଣବିନୀତେ ॥ ୧॥
ମନ୍ଦାକିନୀପ୍ରବାହବିଲଙ୍ଘନଚଞ୍ଚଲପକ୍ଷମରାଲମ୍ ।
ବିକସିତକୁନ୍ଦଲବଙ୍ଗତାଲବଲୀସରସୀରୁହମାଲମ୍ ॥ ୨॥
ଚମ୍ପକଭୂର୍ଜକଦମ୍ବତମାଲମୁନିଦ୍ରୁମଭୂଷିତମାଗମ୍ ।
ବୈରବିହୀନମତଙ୍ଗଜସିଂହମୟୂରମହାବିଷନାଗମ୍ ॥ ୩॥
ସ୍ଫଟିକପଦ୍ମରାଗେନ୍ଦ୍ରନୀଲମଣିହାରକଗୈରିକଶୋଭମ୍ ।
ଶୀତଲଧୀରସୁଗନ୍ଧସମୀରଣମୃଷିଜନମାନସଲୋଭମ୍ ॥ ୪॥
ଗବୟଶରଭହରିଣୀହରିଣାଦନକପିକୁଲବିପୁଲବିହାରମ୍ ।
ଇନ୍ଧନଦଲଫଲକୁସୁମଦର୍ଭଜଲହେତୁକମୁନିସଞ୍ଚାରମ୍ ॥ ୫॥
ଶୁକହାରୀତଚକୋରଶାରିକାଖଞ୍ଜନକୋକବିରାବମ୍ ।
ନିର୍ଝରଶରଣସଲିଲଶୀକରମରବିଗତବିଷମତରୂଦାବମ୍ ॥ ୬॥
ଗୁହାନିବାସକିରାତହୂଣଖସବିରଚିତବିଟପବିତାନମ୍ ।
ବନଦେବୀସସତାଲସୁସୁରରସଶ୍ରୁତିକୃତମଙ୍ଗଲଗାନମ୍ ॥ ୭॥
ଶ୍ରୀଜୟଦେବମହାକବିନିର୍ମିତମଦ୍ଭୁତଭୂଧରଗୀତମ୍ ।
ହରତୁ ମଲଂ ସକଲଂ ପଠତାମନିଶଂ ପ୍ରକରୋତୁ ବିନୀତମ୍ ॥ ୮॥
ଅଷ୍ଟପଦୀ ୧୬ ଗୀତଂ ଷୋଡଶମ୍
ଦଣ୍ଡକବନମତିଚାରୁ ଚକାଶେ ।
ଶାରଦେନ୍ଦୁନିର୍ମଲରୁଚିରଘୁପତି ଯଶସି ଜଗତି ସବିକାଶେ ॥ ୧॥
ନିର୍ଭୟକୁମ୍ଭଜଦିନାନାମୁନିଜନକୃତସାଧନୟେଆଗମ୍ ।
ବିଗତବୈରମୃଗଦସ୍ୟୁଖଗାଦିବଲାହକଦାବବିୟୋଗମ୍ ॥ ୨॥
ଗୋଦାତରଲତରଙ୍ଗବିଚିତ୍ରିତରୁଚିରକୂଲକୃତଶାଲମ୍ ।
ବିହିତନିବାସବିଦେହସୁତାରଘୁନାଥସୁମିତ୍ରାବାଲମ୍ ॥ ୩॥
ଖଣ୍ଡିତକାମସମାକୁଲଶୂର୍ପଣଖାଶ୍ରୁତିକରଣବିନାସମ୍ ।
ଖରଦୂଷଣରଜନୀଚରସହିତସହସ୍ରଚତୁର୍ଦଶନାଶମ୍ ॥ ୪॥
ରାବଣଶାସନକନକହରିଣମାରୀଚନିପାତନିଧାନମ୍ ।
ସୀତାହରଣବିଲାପନଗୃଧ୍ରବିଲୋକନସଙ୍ଗତିଦାନମ୍ ॥ ୫॥
ଯୋଜନବାହୁକବନ୍ଧମହାସୁରମାରଣପାବକସଙ୍ଗମ୍ ।
ନବଧାଭକ୍ତିବିବେକବିଚାରଣଶବରୀସଂସୃତିଭଗମ୍ ॥ ୬॥
ନାରଦମୁନିଦର୍ଶନବିଧିସନ୍ତତରୁଚିରକଲଧ୍ୱନିଗୀତମ୍ ।
ପମ୍ପାନିକଟସମୀରତନୟସମ୍ବାଦବିଶେଷମଭୀତମ୍ ॥ ୭॥
ଶ୍ରୀଜୟଦେବକବେରୁଦିତଂ ଦଣ୍ଡକବନଚରିତମନୂପମ୍ ।
ଯଚ୍ଛତୁ ମୁକ୍ତିପଦଂ ବିମଦଂ ସୁଚିରଂ ରୁଚିରଂ ଶୁଭରୂପମ୍ ॥ ୮॥
ଅଷ୍ଟପଦୀ ୧୭ ଗୀତଂ ସପ୍ତଦଶମ୍
ଶ୍ରୀରାମନାମ ମନୋରମଂ ଭଜାମୃତତତ୍ତ୍ୱମୟମ୍ ।
ନତନୋତି ଯତ୍ସ୍ମରଣେନ ଜନ୍ମଜରାଧିମରଣଭୟମ୍ ॥ ୧॥
ସୁକୃତେଃ ପରଂ ପ୍ରକୃତେଃପରଂ ସତ୍ତ୍ୱାଦିଭାବଗତମ୍ ।
ବିଶ୍ରାମମେକମନୋଗିରାମଜ ଶଙ୍କରାଭିମତମ୍ ॥ ୨॥
ପ୍ରଲ୍ହାଦନାରଦପୁଣ୍ଡରୀକପରାଶରାଦିନୁତମ୍ ।
ସଂସାରସାଗରସୁପ୍ଲବଂ ମନ୍ତ୍ରାଧିମନ୍ତ୍ରୟୁତମ୍ ॥ ୩॥
ଯଦି ଭଜସି ହରିମପି କେବଲଂ ହୃଦି କର୍ମଣା ବଚସା ।
ଯୋଗେନ କିଂ ଯଜ୍ଞେନ କିଂ ହ୍ୟପରେଣ କିଂ ତପସା ॥ ୪
ଉଦ୍ଗୀଥରମ୍ୟପଦକ୍ରମୋପନିଷତ୍ସୁଗୀତପରମ୍ ।
ଶବରୀଜଟାୟୁରଜାମିଲାଦିକତାପପାପହରମ୍ ॥ ୫॥
ରାଗାଦିଦୂରମଶେଷମୁନିଜନସେବିତଂ ସତତମ୍ ।
ଲୋକାଭିରାମମମାନମାନସମଞ୍ଜସାବିତତମ୍ ॥ ୬॥
ବ୍ରହ୍ମାଣ୍ଡସମ୍ପୁଟରତ୍ନମୁଜ୍ଜ୍ୱଲମକଲମପ୍ରଲୟମ୍ ।
ସର୍ୱାଶ୍ରୟଂ ସର୍ୱାତିଗଂ ସର୍ୱାର୍ତିହଂ ଚ ସମମ୍ ॥ ୭॥
ତୃଷ୍ଣାନିବିଡରଜନୀଦିବାକରମସୁରୟୂଥଭିଦମ୍ ।
ଜୟଦେବଭାଷିତମମଦ୍ଭୁତଂ ଭବସାରଭୂତମିଦମ୍ ॥ ୮॥
ଅଷ୍ଟପଦୀ ୧୮ ଗୀତମଷ୍ଟାଦଶମ୍
ଲଙ୍କାପୁରମବଲୋକ୍ୟ କରାଲମ୍ ।
ନାନାଭଟପରିପୂରିତଶାଲମ୍ ।
ସ୍ମୃତ୍ୟ ବିଭୁଂ ବାତସୁତୋ ନ ଚକାର ଭୟମ୍ ॥ ୧॥
ବହୁବିଧଲୋହୟନ୍ତ୍ରଶୃଙ୍ଗବାଣମ୍ ।
ଦୌବାରିକଘୃତପାଣିକୃପାଣମ୍ ॥ ୨॥
ରୁଚିରନିକେତନତୋରଣମାଲମ୍ ।
ଭ୍ରାଜମାନମଣିବିରଚିତଜାଲମ୍ ॥ ୩॥
ଶୁଭସୋପାନବାପିକାରମ୍ୟମ୍ ।
ସୁରତରୁଭୂଷିତବିପିନମଗମ୍ୟମ୍ ॥ ୪॥
ସନ୍ତତମସୁରନିକରସଞ୍ଚାରମ୍ ।
କୀଲିତଲୋକପାଲସୁରଦାରମ୍ ॥ ୫॥
ତୁଙ୍ଗକନକମୟସୌଧବିକାଶମ୍ ।
ମୟନିର୍ମିତମଗପତିସଙ୍କାଶମ୍ ॥ ୬॥
ଅତିଶୟରୁଚିରଦେବବରଗେହମ୍ ।
ଦେବବିନିର୍ମିତନିରୂପମଗେହମ୍ ॥ ୭॥
ଶ୍ରୀଜୟଦେବବିନିର୍ମିତଗାନମ୍ ।
ସୁଖୟତୁ ସାଧୁନିଚୟମନୁମାନମ୍ ॥ ୮॥
ଇତି ଶ୍ରୀମଦ୍ରାମଗୀତଗୋବିନ୍ଦେ ମହାକାବ୍ୟେ ଶ୍ରୀଜୟଦେବକୃତୌ
ଲଙ୍କାପ୍ରବେଶୋ ନାମ ଚତୁର୍ଥଃ ସର୍ଗଃ ।
ପଞ୍ଚମସର୍ଗଃ ୫ ଲଙ୍କାବିଜୟୋ
ଅଷ୍ଟପଦୀ ୧୯ ଗୀତମେକୋନବିଂଶମ୍
ରଜନୀଚରରମଣୀପରିବୀତା ।
ବାଲଚନ୍ଦ୍ରକଲିକେବ ସମୀତା ।
ନାଥ ହରେ ସୀଦତି ସୀତାଽଶୋକବନେ ॥ ୧॥
କୁଶଶରୀରଗତିରତିଶୟଦୀନା ।
ଭୂମିଶୟାଶନସଲିଲବିହୀନା ॥ ୨॥
ଧ୍ୟାୟତି ତବ ମୁଖଚନ୍ଦ୍ରମୁଦାରମ୍ ।
ତ୍ୟଜତି ଭୁଜଗମିବ ମଣିମୟହାରମ୍ ॥ ୩॥
ଭଜତି ନିଶେଷକିରଣମିବ ଜାଲମ୍ ।
ସ୍ପୃଶତି କରେଣ ମୁହୁର୍ନିଜଭାଲମ୍ ॥ ୪॥
କଲୟତି ଶରମିବ ମଲୟସମୀରମ୍ ।
ମୁଞ୍ଚତି ତପ୍ତବିଲୋଚନନୀରମ୍ ॥ ୫॥
ବିରହତୟା ବିଦଧାତି ନ ହାସମ୍ ।
ଜନୟତି ବନ୍ହିବିଷମନିଶ୍ୱାସମ୍ ॥ ୬॥
ରାମରାମରାମେତି ସକାମମ୍ ।
ବଦତି ବିଲାପତୟା ବସୁୟାଭମ୍ ॥ ୭॥
ଶ୍ରୀଜୟଦେବକବେରିଦମୁଦିତମ୍ ।
ମୁଖୟତୁ ରାମଭକ୍ତମତିମୁଦିତମ୍ ॥ ୮॥
ଅଷ୍ଟପଦୀ ୨୦ ଗୀତଂ ବିଂଶମ୍
ପଶ୍ୟ ପଶ୍ୟ ରଘୁବର ବରସେତୁମ୍ ।
ପରମଦୁରାସଦରୂପପୟୋନିଧିସଲିଲାବଲଙ୍ଘନହେତୁମ୍ ॥ ୧॥
ଶୈଲନିବହମାନୀୟ ସୁମନମିବ ଶତୟୋଜନପରିମାଣମ୍ ।
ନାନାକାରଶରୀରବଲୀମୁଖବୀରାବିହିତନିର୍ମାଣମ୍ ॥ ୨॥
ବାଲିତନୟସୁଗ୍ରୀବବାୟୁସୁତନଲନୀଲାଦିବିଚାରମ୍ ।
ଶଙ୍ଖଭୁଜଗତିମିମକରଚକ୍ରକୁଲସଙ୍କୁଲମତିବିସ୍ତାରମ୍ ॥ ୩॥
ଅଞ୍ଜନନୀଲନୀରନିଧିମଧ୍ୟଗମୁଜ୍ଜ୍ୱଲଫେନବିକାରମ୍ ।
ଛାୟାପଥମିବ ଗଗନସଭୁଦ୍ୟତମୁଡୁଗଣମିଲିତମୁଦାରମ୍ ॥ ୪॥
ଋକ୍ଷମଲ୍ଲବହୁରାଜିବିରାଜିତମିନ୍ଦୁକିରଣସମରୂପମ୍ ।
ଲଙ୍କାବିଜୟପତ୍ରମର୍ପିତମିବ ବିଧିନା ବିପୁଲମନୂପମ୍ ॥ ୫॥
ସିଦ୍ଧୟକ୍ଷବିଦ୍ୟାଧରକିନ୍ନରସୁରବରଲୋଚନଲୋଭମ୍ ।
ଯାତୁଧାନରମଣୀଜନଲୋଚନରୋଦନମଭିଗତଶୋଭମ୍ ॥ ୬॥
ବାଲଖିଲ୍ୟବୈଖାନସଫେନପବନଚରମୁନିକୃତଜାପମ୍ ।
ରାଜମାନରାକେୟଦୂରକୃତଦାରୁଣବନ୍ଧନପାପମ୍ ॥ ୭॥
ପଠତି ଜନଃ ସୁଚିରଂ ସୁମତିର୍ଜୟଦେବବିନିର୍ମିତଗୀତମ୍ ।
ପଶ୍ୟତି ନୈବ କଦାଚିଦପି ପ୍ରତିବନ୍ଧକସଂସୃତିଭୀତମ୍ ॥ ୮॥
ଅଷ୍ଟପଦୀ ୨୧ ଗୀତମେକବିଂଶମ୍
ଲଙ୍କାପତିରାଲୋକୟଦୀଶମ୍ ।
ଇନ୍ଦୀବରସମରୁଚିରବିଲୋଚନମରିମଦମୋଚନକୀଶମ୍ ॥ ୧॥
ରାକାପତିଶତକୋଟିମଞ୍ଜୁମୁଖମନୁପମଚିବୁକଲସନ୍ତମ୍ ।
ଭୃକୁଟୀକୁଟିବିଲାସତୟାରତିନାୟକଚାପହସମ୍ତମ୍ ॥ ୨॥
କରକୋଦଣ୍ଡଶରପ୍ରଭୟା ଲସମାନସମସ୍ତଶରୀରମ୍ ।
ଶକ୍ରସମର୍ପିତବର୍ମଭୃତଂ ସମରାବ୍ଧିବିଲଙ୍ଘନଧୀରମ୍ ॥ ୩॥
ବଦ୍ଧଜଟାମୁକୁଟଂ ନିବିଡଂ ରଜନୀଚରନାଶନଦକ୍ଷମ୍ ।
ଚାରୁରଥସ୍ଥମୁଦପ୍ରପତାକମଖଡିତରୋଷବିପକ୍ଷମ୍ ॥ ୪॥
କାଲନୀୟପଶମଂ ଖଲହଂ କଲହଂ କରଦାରୁଣମେତମ୍ ।
ମାତଲିସାରଥିସହିତମତ୍ତମହିତଲନବଲେନ ସମେତମ୍ ॥ ୫॥
ପରିକରକଟିତୂଣୀରବିଭୂଷିତମୁଦ୍ଗରବାଣକରାଲମ୍ ।
ଆକମ୍ପିତତୁଲସୀଦଲସଙ୍କୁଲକୁସୁମକଲିତବନମାଲମ୍ ॥ ୬॥
ତିଷ୍ଠ ବିମୂଢମତେ ସମରେ ଦଶକଣ୍ଠମିତି ପ୍ରବଦନ୍ତମ୍ ।
ପ୍ରସ୍ଫୁରିତାଧରପଲ୍ଲବୟୁଗପ୍ରବିଭାସିମନୋହରଦନ୍ତମ୍ ॥ ୭॥
ଶ୍ରୀଜୟଦେବଭଣିତମତିମଞ୍ଜୁଲରଘୁବରସମରବିଧାନମ୍ ।
ପଠତି ସମରଜୟମତିଶୟପୁରଜୟମେତି ମହାଭୟଦାନମ୍ ॥ ୮॥
ଅଷ୍ଟପଦୀ ୨୨ ଗୀତଂ ଦ୍ୱାବିଂଶମ୍
ଜୟ ରାମଚନ୍ଦ୍ର ମାୟାଽତିଦୂର ।
ରବିବଂଶବିଭୂଷଣ ମୁକୁଟଶୂର ॥ ୧॥
ବ୍ରହ୍ମାମହେନ୍ଦ୍ରଗନ୍ଧର୍ୱଗୀତ ।
କଲ୍ୟାଣନିପୁଣ ଗୁଣଗଣବିନୀତ ॥ ୨॥
ଚଣ୍ଡପ୍ରୟାତ ଖଣ୍ଡିତବିରାଧ ।
ସ୍ୱର୍ଗାପବର୍ଗଦ ସରଦଗାଧ ॥ ୩॥
କରୁଣାନିକେତତମ ପ୍ରବଲରୋଷ ।
ଭାବାଧିଗମ୍ୟ ଜିତସକଲଦୋଷ ॥ ୪॥
ଧାରାଧରପ୍ରତିମ ନୀଲଦେହ ।
ସଦ୍ରୂପବୋଧମୟମୋଦଗେହ ॥ ୫॥
ବ୍ୟାଲାଦପତ୍ର ଶତପତ୍ରନେତ୍ର ।
କୂଟସ୍ଥ ପାଣିତଲକଲିତବେତ୍ର ॥ ୬॥
ସୀତାପତିରଘୁପତିଜୈନରୁଦ୍ଧ ।
ବିଶସିତସମସ୍ତମାୟାବିରୁଦ୍ଧ ॥ ୭॥
ଜୟଦେବବିନିର୍ମିତମେବ ରାମ ।
କୁରୁ ତେନ ନାଥ ମମ ହୃଦୟଧାମ ॥ ୮॥
ଇତି ଶ୍ରୀମଦ୍ରାମଗୀତଗୋବିନ୍ଦେ ମହାକାବ୍ୟେ ଶ୍ରୀଜୟଦେବକୃତୌ
ଲଙ୍କାବିଜୟୋ ନାମ ପଞ୍ଚମଃ ସର୍ଗଃ ।
ଷଷ୍ଠସର୍ଗଃ ୬ ରାମାଭିଷେକଃ
ଅଷ୍ଟପଦୀ ୨୩ ଗୀତଂ ତ୍ରୟୋବିଂଶମ୍
ପଶ୍ୟତ ରାମଚନ୍ଦ୍ରମତିଶୋଭମ୍ ।
ବିଧିହରିହରଦିନନାଥନାକପତିମୁନିଗଣମାନସଲୋଭମ୍ ॥ ୧॥
ନୀଲଶକଲସନିମଶରୀରରୁଚିଶୁକ୍ତିସୁବିଦ୍ରୁମହାରମ୍ ।
ବାମଭାଗସୀତାଶୁଭଶୋଭିତମନୁଗତହରିପରିବାରମ୍ ॥ ୨॥
ଭାନୁସମାନପୁଷ୍ପରଥସଙ୍ଗତମନୁଜସହିତମସୁରଘ୍ନମ୍ ।
ଚଣ୍ଡବିଶିଖକୋଦଣ୍ଡବିନାଶିତସକଲଚରାଚରବିଘ୍ନମ୍ ॥ ୩॥
ମରତାଲିଙ୍ଗନଗୁରୁପାଦାମ୍ବୁଜପ୍ରଣତିବିକମ୍ପିତଭାଲମ୍ ।
ଦ୍ୱିଜନତିକରଣବିଧାନପରସ୍ପରପୃଚ୍ଛଂ ଚଲବନମାଲମ୍ ॥ ୪॥
ମାତୃଭବନକୃତଗମନମନିନ୍ଦିତମଣିମୟପୀଠନିବାସମ୍ ।
ଚାମରୟୁଗଲସିତାତପବାରଣମଣ୍ଡିତମଞ୍ଜୁଲହାସମ୍ ॥ ୫॥
ହସଦୁକୂଲପୁଞ୍ଜମୁକୁଟପ୍ରଭୟାପ୍ରତିମାସିକପୋଲମ୍ ।
ନିଜଜନମୁପରିକୃପାମୟଶୁଭ୍ରକଟାକ୍ଷନିବେଶନଲୋଲମ୍ ॥ ୬॥
ବନ୍ଦିବେଷଧରବେଦଚତୁଷ୍ଟୟବିହିତବିଜୟଗୁଣଗାଥମ୍ ।
କନକରତ୍ନମୟପାଣିବିଶେଷକୃତାଖିଲଲୋକସନାଥମ୍ ॥ ୭॥
ଶ୍ରୀଜୟଦେବବିନିର୍ମିତମତିଶୟରଘୁପତିଚରିତମନୂପମ୍ ।
ହରିଚରଣସ୍ୟ ତନୋତୁ ଶିବଂ ହୃଦି ମାନସହଂସସରୂପମ୍ ॥ ୮॥
ଅଷ୍ଟପଦୀ ୨୪ ଗୀତଂ ଚତୁର୍ୱିଂଶମ୍
ଜହିହି ଶୟନମରବିନ୍ଦବିଲୋଚନ ଖଗକେତୋ ।
କରୁଣାପୂରିତ ଶୁଭନୟନେନ ବିଲୋକୟ ମଙ୍ଗଲହେତୋ ॥ ୧॥
ଉଦୟତି ଭାନୁରୟଂ ବିଧୁନା ସମମେତି ସମସ୍ତତମିସ୍ରମ୍ ।
ଦଧତି ନଭୋରୁଣତାମରୁଣରୁଣେନ ବଭୂବ ସଦୋଜସମିଶ୍ରମ୍ ॥ ୨॥
ବିକସତି ପଦ୍ମବନଂ ସକଲଂ ବିହଗାବଲିଦାତିନିନାଦମ୍ ।
ହଂସବିରାବବିବୋଧିତଚକ୍ରନିଚପଗତସର୍ୱବିଷାଦମ୍ ॥ ୩॥
ଦୀପଶିଖାତିବିଶୁଦ୍ଧତରା ମଲିନତ୍ୱମୁପୈତି ବିଶାଲା ।
ସୀଦତି କୁମୁଦମୁଲୂକତତିଃ ପ୍ରତିଗଚ୍ଛତି ଲୟମୁଡୁମାଲା ॥ ୪॥
କର୍ଷତି ଶ୍ରୃଙ୍ଖଲକଂ ଗଜତା ଯୁଗଭାଗବିଭାଜିତନିଦ୍ରା ।
ନମତି ମହୀପସଭାଽମିମୁଖଂ ତବ ରାଘବ ଦୂରଦରିଦ୍ରା ॥ ୫॥
ଗାୟତି ସାମଖିଲାମଖିଲାମୃଷିରାଜଖଣ୍ଡିତବୀଣା ।
ନୃତ୍ୟତି ଦେବବଧୂ ରୁଚିରାୟୁତଭାବଭରେଣ ନବୀଣା ॥ ୬॥
ଶୀତଲମନ୍ଦସୁଗନ୍ଧସମୀରଗଲିତକୁସୁମାବଲିରେଖା ।
ପଠତି ପରସ୍ପରମେବ ପଟୁଃ ଶ୍ରୁତିପାଠମବାରିତବେଷା ॥ ୭॥
ଶ୍ରୀକବିରାଜଶିରୋମଣିଦାମଲସଜ୍ଜୟଦେବବିଗୀତମ୍ ।
ମୋଦଭରଂ ସୁଜନସ୍ୟ ତନୋତି କରୋତୁ ମନୋ ରସନୀତମ୍ ॥ ୮॥
ଇତି ଶ୍ରୀମଦ୍ରାମଗୀତଗୋବିନ୍ଦେ ମହାକାବ୍ୟେ ଶ୍ରୀଜୟଦେବକୃତୌ
ରାମାଭିଷେକୋ ନାମ ଷଷ୍ଠଃ ସର୍ଗଃ ।
ଇତି କବି ଜୟଦେବକୃତଂ ରାମଗୀତଗୋବିନ୍ଦଂ ସମ୍ପୂର୍ଣମ୍ ।
.
Comments
Post a Comment