ଶ୍ରୀରଙ୍ଗନାଥପାଦୁକାସହସ୍ରମ୍

 ଶ୍ରୀରଙ୍ଗନାଥପାଦୁକାସହସ୍ରମ୍ 

      ଶ୍ରୀଃ ।

ଶ୍ରୀମତ୍ପ୍ରଣତାର୍ତିହରବରଦପରବ୍ରହ୍ମଣେ ନମଃ ।

ଶ୍ରୀମତେ ନିଗମାନ୍ତମହାଦେଶିକାୟ ନମଃ ।

ପାଦୁକାସହସ୍ରସ୍ୟ ଅନୁକ୍ରମଣିକା

    ପଦ୍ଧତି କ୍ରମାଙ୍କ ସୂଚୀ (ଶ୍ଲୋକସଙ୍ଖ୍ୟା)

     ୧. ପ୍ରସ୍ତାବପଦ୍ଧତିଃ (୨୦)

     ୨. ସମାଖ୍ୟାପଦ୍ଧତିଃ (୧୦)

     ୩. ପ୍ରଭାବପଦ୍ଧତିଃ (୭୦)

     ୪. ସମର୍ପଣପଦ୍ଧତିଃ (୨୦)

     ୫. ପ୍ରତିପ୍ରସ୍ଥାନପଦ୍ଧତିଃ (୨୦)

     ୬. ଅଧିକାରପରିଗ୍ରହପଦ୍ଧତିଃ (୪୦)

     ୭. ଅଭିଷେକପଦ୍ଧତିଃ (୩୦)

     ୮. ନିର୍ୟାତନାପଦ୍ଧତିଃ (୩୦)

     ୯. ବନ୍ଦିବୈତାଲିକପଦ୍ଧତିଃ (୧୦)

     ୧୦. ଶୃଙ୍ଗାରପଦ୍ଧତିଃ (୧୦)

     ୧୧. ସଞ୍ଚାରପଦ୍ଧତିଃ (୬୦)

     ୧୨. ପୁଷ୍ପପଦ୍ଧତିଃ (୩୦)

     ୧୩. ପରାଗପଦ୍ଧତିଃ (୩୦)

     ୧୪. ନାଦପଦ୍ଧତିଃ (୧୦୦)

     ୧୫. ରତ୍ନସାମାନ୍ୟପଦ୍ଧତିଃ (୫୦)

     ୧୬. ବହୁରତ୍ନପଦ୍ଧତିଃ (୫୦)

     ୧୭. ପଦ୍ମରାଗପଦ୍ଧତିଃ (୩୦)

     ୧୮. ମୁକ୍ତାପଦ୍ଧତିଃ (୫୦)

     ୧୯. ମରତକପଦ୍ଧତିଃ (୨୦)

     ୨୦. ଇନ୍ଦ୍ରନୀଲପଦ୍ଧତିଃ (୩୦)

     ୨୧. ବିମ୍ବପ୍ରତିବିମ୍ବପଦ୍ଧତିଃ (୨୦)

     ୨୨. କାଞ୍ଚନପଦ୍ଧତିଃ (୨୦)

     ୨୩. ଶେଷପଦ୍ଧତିଃ (୧୦)

     ୨୪. ଦ୍ୱନ୍ଦ୍ୱପଦ୍ଧତିଃ (୨୦)

     ୨୫. ସନ୍ନିବେଶପଦ୍ଧତିଃ (୨୦)

     ୨୬. ଯନ୍ତ୍ରିକାପଦ୍ଧତିଃ (୧୦)

     ୨୭. ରେଖାପଦ୍ଧତିଃ (୧୦)

     ୨୮. ସୁଭାଷିତପଦ୍ଧତିଃ (୧୦)

     ୨୯. ପ୍ରକୀର୍ଣକପଦ୍ଧତିଃ (୮୦)

     ୩୦. ଚିତ୍ରପଦ୍ଧତିଃ (୪୦)

     ୩୧. ନିର୍ୱେଦପଦ୍ଧତିଃ (୨୦)

     ୩୨. ଫଲପଦ୍ଧତିଃ (୩୮)

ଶ୍ରୀରଙ୍ଗନାଥ ଦିବ୍ୟମଣିପାଦୁକାଭ୍ୟାଂ ନମଃ ।

ଶ୍ରୀମତେ ରାମାନୁଜାୟ ନମଃ ।

ଶ୍ରୀମାନ୍ୱେଙ୍କଟନାଥାର୍ୟଃ କବିତାର୍କିକକେସରୀ ।

ବେଦାନ୍ତାଚାର୍ୟବର୍ୟୋ ମେ ସନ୍ନିଧତ୍ତାଂ ସଦା ହୃଦି ॥

୧. ପ୍ରସ୍ତାବପଦ୍ଧତିଃ (୨୦)

ସନ୍ତଃ ଶ୍ରୀରଙ୍ଗପୃଥ୍ୱୀଶଚରଣତ୍ରାଣଶେଖରାଃ ।

ଜୟନ୍ତି ଭୁବନତ୍ରାଣପଦପଙ୍କଜରେଣବଃ ॥ ୧.୧॥ ୧॥

ଭରତାୟ ପରଂ ନମୋଽସ୍ତୁ ତସ୍ମୈ ପ୍ରଥମୋଦାହରଣାୟ ଭକ୍ତିଭାଜାମ୍ ।

ଯଦୁପଜ୍ଞମଶେଷତଃ ପୃଥିବ୍ୟାଂ ପ୍ରଥିତୋ ରାଘବପାଦୁକାପ୍ରଭାବଃ ॥ ୧.୨॥ ୨॥

ବର୍ଣସ୍ତୋମୈର୍ୱକୁଲସୁମନୋବାସନାମୁଦ୍ୱହନ୍ତୀ-

     ମାମ୍ନାୟାନାଂ ପ୍ରକୃତିମପରାଂ ସଂହିତାଂ ଦୃଷ୍ଟବନ୍ତମ୍ ।

ପାଦେ ନିତ୍ୟପ୍ରଣିହିତଧିୟଂ ପାଦୁକେ ରଙ୍ଗଭର୍ତୁ-

     ସ୍ତ୍ୱନ୍ନାମାନଂ ମୁନିମିହ ଭଜେ ତ୍ୱାମହଂ ସ୍ତୋତୁକାମଃ ॥ ୧.୩॥ ୩॥

ଦିବ୍ୟସ୍ଥାନାତ୍ ତ୍ୱମିବ ଜଗତୀଂ ପାଦୁକେ ଗାହମାନା

     ପାଦନ୍ୟାସଂ ପ୍ରଥମମନୟା ଭାରତୀ ଯତ୍ର ଚକ୍ରେ ।  var  ମନଘା

ଯୋଗକ୍ଷେମଂ ସକଲଜଗତାଂ ତ୍ୱୟ୍ୟଧୀନଂ ସ ଜାନ-

     ନ୍ୱାଚଂ ଦିବ୍ୟାଂ ଦିଶତୁ ବସୁଧାଶ୍ରୋତ୍ରଜନ୍ମା ମୁନିର୍ମେ ॥ ୧.୪॥ ୪॥

ନୀଚେଽପି ହନ୍ତ ମମ ମୂର୍ଧନି ନିର୍ୱିଶେଷଂ

     ତୁଙ୍ଗେଽପି ଯନ୍ନିବେଶତେ ନିଗମୋତ୍ତମାଙ୍ଗେ ।

ପ୍ରାଚେତସପ୍ରଭୃତିଭିଃ ପ୍ରଥମୋପଗୀତଂ

     ସ୍ତୋଷ୍ୟାମି ରଙ୍ଗପତିପାଦୁକୟୋର୍ୟୁଗଂ ତତ୍ ॥ ୧.୫॥ ୫॥

ଧତ୍ତେ ମୁକୁନ୍ଦମଣିପାଦୁକୟୋର୍ନିବେଶା-

     ଦ୍ୱଲ୍ମୀକସମ୍ଭବଗିରାଂ ସମତାଂ ମମୋକ୍ତିଃ ।

ଗଙ୍ଗାପ୍ରବାହପତିତସ୍ୟ କିୟାନିବ ସ୍ୟା-

     ଦ୍ରଥ୍ୟୋଦକସ୍ୟ ଯମୁନାସଲିଲାଦ୍ୱିଶେଷଃ ॥ ୧.୬॥ ୬॥

ବିଜ୍ଞାପୟାମି କିମପି ପ୍ରତିପନ୍ନଭୀତିଃ

     ପ୍ରାଗେବ ରଙ୍ଗପତିବିଭ୍ରମପାଦୁକେ ତ୍ୱାମ୍ ।

ବକ୍ତୁଂ କ୍ଷମାଃ ସଦସତୀ ବିଗତାଭ୍ୟସୂୟାଃ  var  ବ୍ୟଙ୍କ୍ତୁଂ

     ସନ୍ତଃ ସ୍ପୃଶନ୍ତୁ ସଦୟୈର୍ହୃଦୟୈଃ ସ୍ତୁତିଂ ତେ ॥ ୧.୭॥ ୭॥

ଅଶ୍ରଦ୍ଦଧାନମପି ନନ୍ୱଧୁନା ସ୍ୱକୀୟେ

     ସ୍ତୋତ୍ରେ ନିୟୋଜୟସି ମାଂ ମଣିପାଦୁକେ ତ୍ୱମ୍ ।

ଦେବଃ ପ୍ରମାଣମିହ ରଙ୍ଗପତିସ୍ତଥାତ୍ୱେ

     ତସ୍ୟୈବ ଦେବି ପଦପଙ୍କଜୟୋର୍ୟଥା ତ୍ୱମ୍ ॥ ୧.୮॥ ୮॥

ଯଦାଧାରଂ ବିଶ୍ୱଂ ଗତିରପି ଚ ଯସ୍ତସ୍ୟ ପରମା

     ତମପ୍ୟେକା ଧତ୍ସେ ଦିଶି ବରଗତିଂ ତସ୍ୟ ରୁଚିରାମ୍ ।  var  ଦିଶସି ଚ ଗତିଂ

କଥଂ ସା କଂସାରେର୍ଦ୍ରୁହିଣହରଦୁର୍ବୋଧମହିମା

     କବୀନାଂ କ୍ଷୁଦ୍ରାଣାଂ ତ୍ୱମସି ମଣିପାଦୁ ସ୍ତୁତିପଦମ୍ ॥ ୧.୯॥ ୯॥

ଶ୍ରୁତପ୍ରଜ୍ଞାସମ୍ପନ୍ମହିତମହିମାନଃ କତିକତି

     ସ୍ତୁବନ୍ତି ତ୍ୱାଂ ସନ୍ତଃ ଶ୍ରୁତିକୁହରକଣ୍ଡୂହରଗିରଃ ।

ଅହଂ ତ୍ୱଲ୍ପସ୍ତଦ୍ୱଦିହ ବହୁ ଚ ଜଲ୍ପାମି ତଦପି  var  ତ୍ୱଲ୍ପସ୍ତଦ୍ୱଦ୍ୟଦିହ

     ତ୍ୱଦାୟତ୍ତଂ ରଙ୍ଗକ୍ଷିତିରମଣପାଦାବନି ବିଦୁଃ ॥ ୧.୧୦॥ ୧୦॥

ଯଦେଷ ସ୍ତୌମି ତ୍ୱାଂ ତ୍ରିୟୁଗଚରଣତ୍ରାୟିଣି ତତୋ  var  ଯଦେଷାଂ

     ମହିମ୍ନଃ କା ହାନିସ୍ତବ ମମ ତୁ ସମ୍ପନ୍ନିରବଧିଃ ।

ଶୁନା ଲୀଢା କାମଂ ଭବତୁ ସୁରସିନ୍ଧୁର୍ଭଗବତୀ

     ତଦେଷା କିମ୍ଭୂତା ସ ତୁ ସପଦି ସନ୍ତାପରହିତଃ ॥ ୧.୧୧॥ ୧୧॥

ମିତପ୍ରେକ୍ଷାଲାଭକ୍ଷଣପରିଣମତ୍ପଞ୍ଚଷପଦା

     ମଦୁକ୍ତିସ୍ତ୍ୱୟ୍ୟେଷା ମହିତକବିସଂରମ୍ଭବିଷୟେ ।

ନ କସ୍ୟେୟଂ ହାସ୍ୟା ହରିଚରଣଧାତ୍ରି କ୍ଷିତିତଲେ

     ମୁହୁର୍ୱାତ୍ୟାଧୂତେ ମୁଖପବନବିସ୍ଫୂର୍ଜିତମିବ ॥ ୧.୧୨॥ ୧୨॥

ନିଃସନ୍ଦେହନିଜାପକର୍ଷବିଷୟୋତ୍କର୍ଷୋଽପି ହର୍ଷୋଦୟ-

     ପ୍ରତୂହକ୍ରମଭକ୍ତିବୈଭବଭବଦ୍ୱୈୟାତ୍ୟବାଚାଲିତଃ ।  var  ପ୍ରତ୍ୟୂଢ

ରଙ୍ଗାଧୀଶପଦତ୍ରବର୍ଣନକୃତାରମ୍ଭୈର୍ନିଗୁମ୍ଭୈର୍ଗିରାଂ

     ନର୍ମାସ୍ୱାଦିଷୁ ବେଙ୍କଟେଶ୍ୱରକବିର୍ନାସୀରମାସୀଦତି ॥ ୧.୧୩॥ ୧୩॥

ରଙ୍ଗକ୍ଷ୍ମାପତିରତ୍ନପାଦୁ ଭବତୀଂ ତୁଷ୍ଟୂଷତୋ ମେ ଜବା-

     ଜ୍ଜୃମ୍ଭନ୍ତାଂ ଭବଦୀୟଶିଞ୍ଜିତସୁଧାସନ୍ଦୋହସନ୍ଦେହଦାଃ ।

ଶ୍ଲାଘାଘୂର୍ଣିତଚନ୍ଦ୍ରଶେଖରଜଟାଜଙ୍ଘାଲଗଙ୍ଗାପୟ-

     ସ୍ତ୍ରାସାଦେଶବିଶୃଙ୍ଖଲପ୍ରସରଣୋତ୍ସିକ୍ତାଃ ସ୍ୱୟଂ ସୂକ୍ତୟଃ ॥ ୧.୧୪॥ ୧୪॥

ହିମବନ୍ନଲସେତୁମଧ୍ୟଭାଜାଂ ଭରତାଭ୍ୟର୍ଚିତପାଦୁକାବତଂସଃ ।  var  ହିମବଦଚଲ

ଅତପୋଧନଧର୍ମତଃ କବୀନାମଖିଲେଷ୍ୱସ୍ମି ମନୋରଥେଷ୍ୱବାହ୍ୟଃ ॥ ୧.୧୫॥ ୧୫॥

ଅନିଦମ୍ପ୍ରଥମସ୍ୟ ଶବ୍ଦରାଶେରପଦଂ ରଙ୍ଗଧୁରୀଣପାଦୁକେ ତ୍ୱାମ୍ ।

ଗତଭୀତିରଭିଷ୍ଟୁବନ୍ ବିମୋହାତ୍ପରିହାସେନ ବିନୋଦୟାମି ନାଥମ୍ ॥ ୧.୧୬॥ ୧୬॥

ବୃତ୍ତିଭିର୍ବହୁବିଧାଭିରାଶ୍ରିତା ବେଙ୍କଟେଶ୍ୱରକବେଃ ସରସ୍ୱତୀ ।

ଅଦ୍ୟ ରଙ୍ଗପତିରତ୍ନପାଦୁକେ ନର୍ତକୀବ ଭବତୀଂ ନିଷେବତାମ୍ ॥ ୧.୧୭॥ ୧୭॥

ଅପାରକରୁଣାମ୍ବୁଧେସ୍ତବ ଖଲୁ ପ୍ରସାଦାଦହଂ

     ବିଧାତୁମପି ଶକ୍ନୁୟାଂ ଶତସହସ୍ରିକାଂ ସଂହିତାମ୍ ।

ତଥାପି ହରିପାଦୁକେ ତବ ଗୁଣୌଘଲେଶସ୍ଥିତେ-

     ରୁଦାହୃତିରିୟଂ ଭବେଦିତି ମିତାଽପି ଯୁକ୍ତା ସ୍ତୁତିଃ ॥ ୧.୧୮॥ ୧୮॥

ଅନୁକୃତନିଜନାଦାଂ ସୂକ୍ତିମାପାଦୟନ୍ତୀ

     ମନସି ବଚସି ଚ ତ୍ୱଂ ସାବଧାନା ମମ ସ୍ୟାଃ ।

ନିଶମୟତି ଯଥାଽସୌ ନିଦ୍ରୟା ଦୂରମୁକ୍ତଃ

     ପରିଷଦି ସହ ଲକ୍ଷ୍ମ୍ୟା ପାଦୁକେ ରଙ୍ଗନାଥଃ ॥ ୧.୧୯॥ ୧୯॥

ତ୍ୱୟି ବିହିତା ସ୍ତୁତିରେଷା ପଦରକ୍ଷିଣି ଭବତି ରଙ୍ଗନାଥପଦେ ।

ତଦୁପରି କୃତା ସପର୍ୟା ନମତାମିବ ନାକିନାଂ ଶିରସି ॥ ୧.୨୦॥ ୨୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ପ୍ରସ୍ତାବପଦ୍ଧତିଃ ପ୍ରଥମା ॥

୨. ସମାଖ୍ୟାପଦ୍ଧତିଃ (୧୦)

ବନ୍ଦେ ବିଷ୍ଣୁପଦାସକ୍ତଂ ତମୃଷିଂ ତାଂ ଚ ପାଦୁକାମ୍ ।  var  ପାଦୁକାମ୍ ଚ ତାମ୍

ଯଥାର୍ଥା ଶଠଜିତ୍ସଞ୍ଜ୍ଞା ମଚ୍ଚିତ୍ତବିଜୟାଦ୍ୟଯୋଃ ॥ ୨.୧॥ ୨୧॥  var  ଯଥାର୍ଥଶଠଜିତ୍ସଞ୍ଜ୍ଞା

ଦ୍ରବିଡୋପନିଷନ୍ନିବେଶଶୂନ୍ୟାନପି ଲକ୍ଷ୍ମୀରମଣାୟ ରୋଚୟିଷ୍ୟନ୍ ।  var  ଦ୍ରମିଡୋ

ଧ୍ରୁବମାବିଶତି ସ୍ମ ପାଦୁକାତ୍ମା ଶଠକୋପଃ ସ୍ୱୟମେବ ମାନନୀୟଃ ॥ ୨.୨॥ ୨୨॥

ନିୟତଂ ମଣିପାଦୁକେ ଦଧାନଃ ସ ମୁନିସ୍ତେ ଶଠକୋପ ଇତ୍ୟଭିଖ୍ୟାମ୍ ।

ତ୍ୱଦୁପାଶ୍ରିତପାଦଜାତବଂଶପ୍ରତିପତ୍ୟୈ ପରମାତତାନ ରୂପମ୍ ॥ ୨.୩॥ ୨୩॥

ମୁନିନା ମଣିପାଦୁକେ ତ୍ୱୟା ଚ ପ୍ରଥିତାଭ୍ୟାଂ ଶଠକୋପସଞ୍ଜ୍ଞୟୈବ ।

ଦ୍ୱିତୟଂ ସକଲୋପଜୀବ୍ୟମାସୀତ୍ପ୍ରଥମେନ ଶ୍ରୁତିରନ୍ୟତସ୍ତଦର୍ଥଃ ॥ ୨.୪॥ ୨୪॥

ଆକର୍ଣ୍ୟ କର୍ଣାମୃତମାତ୍ମବନ୍ତୋ ଗାଥାସହସ୍ରଂ ଶଠକୋପସୂରେଃ ।

ମଞ୍ଜୁପ୍ରଣାଦାଂ ମଣିପାଦୁକେ ତ୍ୱାଂ ତଦେକନାମାନମନୁସ୍ମରନ୍ତି ॥ ୨.୫॥ ୨୫॥

ଯଃ ସପ୍ତପର୍ୱବ୍ୟବଧାନତୁଙ୍ଗାଂ ଶେଷତ୍ୱକାଷ୍ଠାମଭଜନ୍ମୁରାରେଃ ।  var  ସ ସପ୍ତ

ତସ୍ୟାପି ନାମୋଦ୍ୱହନାତ୍ ତ୍ୱୟାଽସୌ ଲଘୂକୃତୋଽଭୂଚ୍ଛଠକୋପସୂରିଃ ॥ ୨.୬॥ ୨୬॥

ଶୟ୍ୟାତ୍ମନା ମଧୁରିପୋରସି ଶେଷଭୂତା

     ପାଦାଶ୍ରୟେଣ ଚ ପୁନର୍ଦ୍ୱିଗୁଣୀକୃତଂ ତତ୍ ।

ଭୂୟୋଽପି ଭାଗବତଶେଷତୟା ତଦେବ

     ବ୍ୟଙ୍କ୍ତୁଂ ପଦାବନି ଶଠାରିପଦଂ ବିଭର୍ଷି ॥ ୨.୭॥ ୨୭॥

ପଦ୍ୟେନ ଦେବି ଶଠକୋପମୁନିସ୍ତବାସୀ-

     ତ୍ତସ୍ୟାପି ନାମବହନାନ୍ମଣିପାଦୁକେ ତ୍ୱମ୍ ।

ଶେଷୀବଭୂବ ଯୁବୟୋରପି ଶେଷଶାୟୀ

     ଶେଷଂ ତ୍ୱଶେଷମପି ଶେଷପଦେ ସ୍ଥିତଂ ବଃ ॥ ୨.୮॥ ୨୮॥

ବିନ୍ଧ୍ୟସ୍ତମ୍ଭାଦବିହତଗତେର୍ୱିଷ୍ୱଗାଚାନ୍ତସିନ୍ଧୋଃ

     କୁମ୍ଭୀସୂନୋରସୁରକବଲଗ୍ରାସିନଃ ସ୍ୱୈରଭାଷା ।

ନିତ୍ୟଂ ଜାତା ଶଠରିପୁତନୋର୍ନିଷ୍ପତନ୍ତୀ ମୁଖାତ୍ ତେ

     ପ୍ରାଚୀନାନାଂ ଶ୍ରୁତିପରିଷଦାଂ ପାଦୁକେ ପୂର୍ୱଗଣ୍ୟା ॥ ୨.୯॥ ୨୯॥

ଶଠକୋପ ଇତି ସମାଖ୍ୟା ତବ ରଙ୍ଗଧୁରୀଣପାଦୁକେ ଯୁକ୍ତା ।

ସୂତେ ସହସ୍ରମେବଂ ସୂକ୍ତୀଃ ସ୍ୱୟମେବ ଯନ୍ମୟା ଭବତୀ ॥ ୨.୧୦॥ ୩୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ସମାଖ୍ୟାପଦ୍ଧତିର୍ଦ୍ୱିତୀୟା ॥

୩. ପ୍ରଭାବପଦ୍ଧତିଃ (୭୦)

ବନ୍ଦେ ତଦ୍ରଙ୍ଗନାଥସ୍ୟ ମାନ୍ୟଂ ପାଦୁକୟୋର୍ୟୁଗମ୍ ।

ଉନ୍ନତାନାମବନତିର୍ନତାନାଂ ଯତ୍ର ଚୋନ୍ନତିଃ ॥ ୩.୧॥ ୩୧॥

ନିଶ୍ଶେଷମମ୍ବରତଲଂ ଯଦି ପତ୍ରିକା ସ୍ୟା-

     ତ୍ସପ୍ତାର୍ଣବୀ ଯଦି ସମେତ୍ୟ ମଷୀ ଭବିତ୍ରୀ ।

ବକ୍ତା ସହସ୍ରବଦନଃ ପୁରୁଷଃ ସ୍ୱୟଂ ଚେ-

     ଲ୍ଲିଖ୍ୟେତ ରଙ୍ଗପତିପାଦୁକୟୋଃ ପ୍ରଭାବଃ ॥ ୩.୨॥ ୩୨॥

ବେଦୋପବୃଂହଣକୁତୂହଲିନା ନିବଦ୍ଧଂ

     ବିଶ୍ୱମ୍ଭରାଶ୍ରୁତିଭବେନ ମହର୍ଷିଣା ଯତ୍ ।

ବ୍ୟାସେନ ଯଚ୍ଚ ମଧୁସୂଦନପାଦରକ୍ଷେ

     ଦ୍ୱେ ଚକ୍ଷୁଷୀ ତ୍ୱଦନୁଭାବମବେକ୍ଷିତୁଂ ନଃ ॥ ୩.୩॥ ୩୩॥

ପ୍ରତ୍ୟକ୍ଷୟନ୍ତି ପରିଶୁଦ୍ଧଧିୟୋ ଯଥାବ-

     ଦ୍ରାମାୟଣେ ରଘୁପୁରନ୍ଦରପାଦରକ୍ଷେ ।

ଶଶ୍ୱତ୍ପ୍ରପଞ୍ଚିତମିଦମ୍ପରୟୈବ ବୃତ୍ତ୍ୟା

     ସଙ୍କ୍ଷେପବିସ୍ତରଦଶାସୁ ତବାନୁଭାବମ୍ ॥ ୩.୪॥ ୩୪॥

ଅଲ୍ପଶ୍ରୁତୈରପି ଜନୈରନୁମୀୟସେ ତ୍ୱଂ

     ରଙ୍ଗେଶପାଦୁ ନିୟତଂ ନିଗମୋପଗୀତା ।

ସାରଂ ତଦର୍ଥମୁପବୃଂହୟିତୁଂ ପ୍ରଣୀତଂ

     ରାମାୟଣଂ ତବ ମହିମ୍ନି ଯତଃ ପ୍ରମାଣମ୍ ॥ ୩.୫॥ ୩୫॥

ତିଷ୍ଠନ୍ତୁ ଶ୍ରୁତୟସ୍ତତୋଽପି ମହିତଂ ଜାଗର୍ତି ତତ୍ପାଦୁକେ

     ତତ୍ତାଦୃକ୍ପ୍ରଥନାୟ ତାବକଗୁଣଗ୍ରାମାୟ ରାମାୟଣମ୍ ।

ଯସ୍ୟାସୀଦରବିନ୍ଦସମ୍ଭବବଧୂମଞ୍ଜୀରଶିଞ୍ଜାରବ-

     ସ୍ପର୍ଧାଦୁର୍ଧରପାଦବଦ୍ଧଭଣତିର୍ୱଲ୍ମୀକଜନ୍ମା କବିଃ ॥ ୩.୬॥ ୩୬॥  var  ଫଣିତି

ଭକ୍ତିପ୍ରହ୍ୱପୁରପ୍ରଭଞ୍ଜନଜଟାବାଟୀସନୀଡସ୍ଫୁର-

     ଚ୍ଚୂଡାରଗ୍ୱଧବାସନାପରିମଲସ୍ତ୍ୟାନେ ସ୍ତୁମଃ ପାଦୁକେ ।

ରଙ୍ଗକ୍ଷୋଣିଭୃଦଙ୍ଘ୍ରିପଦ୍ମୟୁଗଲୀପୂର୍ଣପ୍ରପତ୍ତେଃ ଫଲଂ

     ନିଶ୍ଚିନ୍ୱନ୍ତି ବିପଶ୍ଚିତଃ ଶମଧନା ନିତ୍ୟଂ ଯଦୁତ୍ତଂସନମ୍ ॥ ୩.୭॥ ୩୭॥

ମାତର୍ମାଧବପାଦୁକେ ତବ ଗୁଣାନ୍କଃ ସ୍ତୋତୁମସ୍ତୋକଧୀଃ

     କୋଟୀରେଷୁ ଯଦର୍ପଣପ୍ରଣୟିନାଂ ସେବାକ୍ଷଣେ ସ୍ୱର୍ଗିଣାମ୍ ।

ଅନ୍ୟୋନ୍ୟଂ କ୍ଷିପତାମହମ୍ପ୍ରଥମିକାସମ୍ମର୍ଦକୋଲାହଲଂ

     ବିଷ୍ୱକ୍ସେନବିହାରବେତ୍ରଲତିକାକମ୍ପଶ୍ଚିରାଲ୍ଲୁମ୍ପତି ॥ ୩.୮॥ ୩୮॥

ଯୋଷିଦ୍ଭୂତଦୃଷନ୍ତ୍ୟପୋଢଶକଟସ୍ଥେମାନି ବୈମାନିକ-

     ସ୍ରୋତସ୍ୱିନ୍ୟୁପଲମ୍ଭନାନି ଭସିତୋଦଞ୍ଚତ୍ପରୀକ୍ଷିନ୍ତି ଚ ।

ଦୂତ୍ୟାଦିଷ୍ୱପି ଦୁର୍ୱଚାଂସି ପଦୟୋଃ କୃତ୍ୟାନି ମତ୍ୱେବ ଯ-  var  ଦୁର୍ୱଚାନି

     ଦ୍ଧତ୍ତେ ତତ୍ପ୍ରଣୟଂ ତଦେବ ଚରଣତ୍ରାଣଂ ବୃଣେ ରଙ୍ଗିଣଃ ॥ ୩.୯॥ ୩୯॥  var  ତ୍ତଦ୍ୱତ୍ତତ୍ପ୍ରଣୟଂ

ବନ୍ଦେ ତନ୍ମଧୁକୈଟଭାରିପଦୟୋର୍ମିତ୍ରଂ ପଦତ୍ରଦ୍ୱୟଂ

     ଯତ୍ତଦ୍ଭକ୍ତିଭରାନତେନ ଶିରସା ଯତ୍ର କ୍ୱଚିତ୍ ବିଭ୍ରତି ।

ଦ୍ୱିତ୍ରବ୍ରହ୍ମବିନାଡିକାବଧିପଦବ୍ୟତ୍ୟାସଶଙ୍କାଭର-

     ତ୍ରାସୋତ୍କମ୍ପଦଶାବିସଂସ୍ଥୁଲଧୃତିସ୍ତ୍ରୈବିଷ୍ଟପାନାଂ ଗଣଃ ॥ ୩.୧୦॥ ୪୦॥

ପଦ୍ମାକାନ୍ତପଦାନ୍ତରଙ୍ଗବିଭବୋଦ୍ରିକ୍ତଂ ପଦତ୍ରଂ ଭଜେ

     ଯଦ୍ଭକ୍ତ୍ୟା ନମତାଂ ତ୍ରିବିଷ୍ଟପସଦାଂ ଚୂଡାପଦେଷ୍ୱର୍ପିତମ୍ ।  var  ଚ ସତାଂ

ନିତ୍ୟାପୀତନଖେନ୍ଦୁଦୀଧିତିସୁଧାସନ୍ଦୋହମୁଚ୍ଚୈର୍ୱମ-

     ତ୍ୟନ୍ତର୍ନୂନମମାନ୍ତମନ୍ତିକଲଗଚ୍ଛେଷାପଟଚ୍ଛଦ୍ମନା ॥ ୩.୧୧॥ ୪୧॥   var  କଲସ

ତଦ୍ୱିଷ୍ଣୋଃ ପରମଂ ପଦତ୍ରୟୁଗଲଂ ତ୍ରୟ୍ୟନ୍ତପର୍ୟନ୍ତଗଂ

     ଚିନ୍ତାତୀତବିଭୂତିକଂ ବିତରତୁ ଶ୍ରେୟାଂସି ଭୂୟାଂସି ନଃ ।

ଯଦ୍ୱିକ୍ରାନ୍ତିଦଶାସମୁତ୍ଥିତପଦପ୍ରସ୍ୟନ୍ଦିପାଥସ୍ୱିନୀ-

     ସଖ୍ୟେନେବ ସଦାନତସ୍ୟ ତନୁତେ ମୌଲୌ ସ୍ଥିତିଂ ଶୂଲିନଃ ॥ ୩.୧୨॥ ୪୨॥

ଅମ୍ବୁନ୍ୟମ୍ବୁନିଧେରନନ୍ୟଗତିଭିର୍ମୀନୈଃ କିୟଦ୍ ଗମ୍ୟତେ

     କ୍ଲେଶେନାପି କିୟଦ୍ୱ୍ୟଲଙ୍ଘି ରଭସୋତ୍ତୁଙ୍ଗୈଃ ପ୍ଲବଙ୍ଗେଶ୍ୱରୈଃ ।

ବିଜ୍ଞାତା କିୟତୀ ପୁନଃ କ୍ଷିତିଭୃତା ମନ୍ଥେନ ଗମ୍ଭୀରତା

     କିଂ ତୈଃ କେଶବପାଦୁକାଗୁଣମହାମ୍ବୋଧେସ୍ତଟସ୍ଥା ବୟମ୍ ॥ ୩.୧୩॥ ୪୩॥

ପଦକମଲରଜୋଭିର୍ୱାସିତେ ରଙ୍ଗଭର୍ତୁଃ

     ପରିଚିତନିଗମାନ୍ତେ ପାଦୁକେ ଧାରୟନ୍ତଃ ।

ଅବିଦିତପରିପାକଂ ଚନ୍ଦ୍ରମୁତ୍ତଂସୟନ୍ତେ

     ପରିଣତଭୁବନଂ ତତ୍ପଦ୍ମମଧ୍ୟାସତେ ବା ॥ ୩.୧୪॥ ୪୪॥

ସକୃଦପି ଭୁବନେଽସ୍ମିଞ୍ଶାର୍ଙ୍ଗିଣଃ ପାଦୁକେ ତ୍ୱାଂ  var  କିଲ ମୂର୍ଧ୍ନା ଶାର୍ଙ୍ଗିଣଃ

     ମନୁଜମନୁବହନ୍ତଂ ଦେହବନ୍ଧବ୍ୟପାୟେ ।

ଉପଚରତି ଯଥାର୍ହଂ ଦେବବର୍ଗସ୍ତ୍ୱଦୀୟଃ

     ସ ତୁ ନିୟମିତଭୃତ୍ୟୋ ଜୋଷମାସ୍ତେ କୃତାନ୍ତଃ ॥ ୩.୧୫॥ ୪୫॥

ପଦସରସିଜମେତତ୍ପାଦୁକେ ରଙ୍ଗଭର୍ତୁଃ

     ପ୍ରତିନିଧିପଦବୀଂ ତେ ଗାହତେ ସ୍ୱେନ ଭୂମ୍ନା ।

ତଦିଦମପରଥା ଚେତ୍ ତିଷ୍ଠତସ୍ତସ୍ୟ ନିତ୍ୟଂ

     କଥମିବ ବିଦିତାର୍ଥାସ୍ତ୍ୱାଂ ଭଜନ୍ତେ ମହାନ୍ତଃ ॥ ୩.୧୬॥ ୪୬॥

ଶ୍ରୁତିଶିରସି ନିଗୂଢଂ କର୍ମଣାଂ ଚୋଦିତାନାଂ

     ତ୍ୱଦବଧି ବିନିବେଶଂ ନାଧିଗନ୍ତୁଂ କ୍ଷମାଣାମ୍ ।

ପରିହସତି ମୁରାରେଃ ପାଦୁକେ ବାଲିଶାନାଂ

     ପଶୁବଧପରିଶେଷାନ୍ପଣ୍ଡିତୋ ନାମୟଜ୍ଞାନ୍ ॥ ୩.୧୭॥ ୪୭॥

ଜନୟିତୁମଲମର୍ଘ୍ୟଂ ଦୈତ୍ୟଜିତ୍ପାଦରକ୍ଷେ

     ନମତି ମହତି ଦେବେ ନାକସିନ୍ଧୋର୍ୱିଶୀର୍ଣାଃ ।

ମୁହୁରହିପତିଚୂଡାମୌଲିରତ୍ନାଭିଘାତା-

     ତ୍ପରିଣତଲଘିମାନଃ ପାଥସାମୂର୍ମୟସ୍ତେ ॥ ୩.୧୮॥ ୪୮॥

ପଦସରସିଜୟୋସ୍ତ୍ୱଂ ପାଦୁକେ ରଙ୍ଗଭର୍ତୁ-

     ର୍ମନସି ମୁନିଜନାନାଂ ମୌଲିଭାଗେ ଶ୍ରୁତୀନାମ୍ ।  var  ମୌଲିଦେଶେ

ବଚସି ଚ ସୁକବୀନାଂ ବର୍ତସେ ନିତ୍ୟମେକା

     ତଦିଦମବଗତଂ ତେ ଶାଶ୍ୱତଂ ବୈଶ୍ୱରୂପ୍ୟମ୍ ॥ ୩.୧୯॥ ୪୯॥

ପରିସରବିନତାନାଂ ମୂର୍ଧ୍ନି ଦୁର୍ୱର୍ଣପଙ୍କ୍ତିଂ

     ପରିଣମୟସି ଶୌରେଃ ପାଦୁକେ ତ୍ୱଂ ସୁବର୍ଣମ୍ ।

କୁହକଜନବିଦୂରେ ସତ୍ପଥେ ଲବ୍ଧବୃତ୍ତେଃ

     କ୍କ ନୁ ଖଲୁ ବିଦିତସ୍ତେ କୋଽପ୍ୟସୌ ଧାତୁବାଦଃ ॥ ୩.୨୦॥ ୫୦॥

ବଲିମଥନବିହାରାଦ୍ୱର୍ଧମାନସ୍ୟ ବିଷ୍ଣୋ-

     ରଖିଲମତିପତଦ୍ଭିର୍ୱିକ୍ରମୈରପ୍ରମେୟଃ ।

ଅବଧିମନଧିଗଚ୍ଛନ୍ପାପରାଶିର୍ମଦୀୟଃ

     ସମଜନି ପଦରକ୍ଷେ ସାବଧିସ୍ତ୍ୱନ୍ମହିମ୍ନା ॥ ୩.୨୧॥ ୫୧॥

ତଟଭୁବି ଯମୁନାୟାସ୍ତସ୍ଥୁଷୀ ଯନ୍ନିବେଶା-

     ଦ୍ଭଜତି ନିଗମଶାଖାବୈଭବଂ ନୀପଶାଖା ।

ପଦକମଲୟ୍ଗୁଗଂ ତତ୍ପାଦୁକେ ରଙ୍ଗଭର୍ତୁ-

     ସ୍ତ୍ୱୟି ଭଜତି ବିଭୂତିଂ ପଶ୍ୟ ଶାଖାନୁଶାଖାମ୍ ॥ ୩.୨୨॥ ୫୨॥

ଶିରସି ବିନିହିତାୟାଂ ଭକ୍ତିନମ୍ରୈର୍ଭବତ୍ୟାଂ  var  ଭକ୍ତିନମ୍ରେ ଭବତ୍ୟାଂ

     ସପଦି ତନୁଭୃତସ୍ତାମୁନ୍ନତିଂ ପ୍ରାପ୍ନୁବନ୍ତି ।

ମଧୁରିପୁପଦରକ୍ଷେ ଯଦ୍ୱଶେନୈବ ତେଷା-

     ମନିତରସୁଲଭଂ ତଦ୍ଧାମ ହସ୍ତାପଚେୟମ୍ ॥ ୩.୨୩॥ ୫୩॥

ସକୃଦପି ଭୁବନେଽସ୍ମିନ୍ ଶାର୍ଙ୍ଗିଣଃ ପାଦୁକେ ତ୍ୱା-

     ମୁପନିଷଦନୁକଲ୍ପୈରୁତ୍ତମାଙ୍ଗୈର୍ଦଧାନାଃ ।

ନରକମିବ ମହାନ୍ତୋ ନାକମୁଲ୍ଲଙ୍ଘୟନ୍ତଃ

     ପରିଷଦି ନିବିଶନ୍ତେ ପ୍ରାକ୍ତନାନାଂ ଗୁରୂଣାମ୍ ॥ ୩.୨୪॥ ୫୪॥

ଶମଦମଗୁଣଦାନ୍ତୋଦନ୍ତବୈଦେଶିକାନାଂ

     ଶରଣମଶରଣାନାଂ ମାଦୃଶାଂ ମାଧବସ୍ୟ ।

ପଦକମଲମିଦଂ ତେ ପାଦୁକେ ରକ୍ଷ୍ୟମାସୀ-

     ଦନୁଦୟନିଧନାନାମାଗମାନାଂ ନିଧାନମ୍ ॥ ୩.୨୫॥ ୫୫॥

ପରିଚିତପଦପଦ୍ମାଂ ପାଦୁକେ ରଙ୍ଗିଣସ୍ତ୍ୱାଂ

     ତ୍ରିଭୁବନମହନୀୟାଂ ସାଦରଂ ଧାରୟନ୍ତଃ ।

ନିଜଶିରସି ନିଲୀନଂ ଦେବି ମନ୍ଦାରମାଲ୍ୟଂ

     ନିଗମପରିମଲୈସ୍ତେ ବାସୟନ୍ତୀବ ଦେବାଃ ॥ ୩.୨୬॥ ୫୬॥

କନକସରିଦନୂପେ କଲ୍ପବୃକ୍ଷସ୍ୟ ଭୂଷ୍ଣୋଃ

     ପଦକିସଲୟଲଗ୍ନା ପାଦୁକେ ମଞ୍ଜରୀ ତ୍ୱମ୍ ।

ପରିଣତିମଧୁରାଣାଂ ଯା ଫଲାନାଂ ସବିତ୍ରୀ

     ବହସି ନିଗମବୃନ୍ଦୈଃ ସମ୍ପଦଂ ଷଟ୍ପଦାନାମ୍ ॥ ୩.୨୭॥ ୫୭॥

ପରିକଲୟସି ଚେନ୍ମାଂ ପଦ୍ମବାସାନିଷେବ୍ୟେ

     ପଦକମଲୟୁଗେ ତ୍ୱଂ ପାଦୁକେ ରଙ୍ଗଭର୍ତୁଃ ।

ଅବିଦିତନିଗମାନାଂ ନୂନମସ୍ମାଦୃଶାନା-

     ମଘଟିତଘଟନୀ ତେ ଶକ୍ତିରାବିଷ୍କୃତା ସ୍ୟାତ୍ ॥ ୩.୨୮॥ ୫୮॥

ଶ୍ରୁତିଶତଶିରଶ୍ଚୂଡାପୀଡେ ନିପୀଡୟିତୁଂ କ୍ଷମେ

     ଦୁରିତସରିତାମୋଘାନେତାନମୋଘବିସର୍ପିଣଃ ।

କ୍ରମପରିଣମଦ୍ୱେଧଃଶ୍ରେଣୀଶିଖାମଣିଘଟ୍ଟନା-

     ନ୍ମସୃଣିତତଲେ ରଙ୍ଗକ୍ଷୋଣୀଭୃତୋ ମଣିପାଦୁକେ ॥ ୩.୨୯॥ ୫୯॥

ଜଗଜ୍ଜନନରକ୍ଷଣପଣସଙ୍ଗିନୋ ରଙ୍ଗିଣଃ

     ପବିତ୍ରତମମାଦ୍ରିୟେ ଭଗବତଃ ପଦତ୍ରଦ୍ୱୟମ୍ ।

ଶିବତ୍ୱକରଣକ୍ଷମତ୍ରିଦିବସିନ୍ଧୁସମ୍ବନ୍ଧିନଂ

     ପ୍ରଧାବ୍ୟ ଚରଣଂ ନିଜଂ ପ୍ରଣିଦଧାତି ଯତ୍ର ପ୍ରଭୁଃ ॥ ୩.୩୦॥ ୬୦॥

ଯଦଧ୍ୱରଭୁଜାଂ ଶିରଃ ପଦୟୁଗଂ ଚ ରଙ୍ଗେଶିତୁ-

     ର୍ଦୃଢଂ ଘଟୟିତୁଂ କ୍ଷମଂ ଭବତି ଶେଷଶେଷିତ୍ୱତଃ ।

ଶିରସ୍ତ୍ରମିଦମସ୍ତୁ ମେ ଦୁରିତସିନ୍ଧୁମୁଷ୍ଟିନ୍ଧୟଂ

     କଦଧ୍ୱବିହତିକ୍ଷମଂ କିମପି ତତ୍ପଦତ୍ରଦ୍ୱୟମ୍ ॥ ୩.୩୧॥ ୬୧॥

ସମୁତ୍କ୍ଷିପତି ଚେତସି ସ୍ଥିରନିବେଶିତା ତାବକୀ

     ମୁକୁନ୍ଦମଣିପାଦୁକେ ମୁହୁରୁପାସନାବାସନା ।

ଉଦର୍କପରିକର୍କଶାନୁପରିପର୍ୱଣାଖର୍ୱିତା-

     ନନର୍ଥଶତଗର୍ଭିତାନମରଶମ୍ଭଲୀବିଭ୍ରମାନ୍ ॥ ୩.୩୨॥ ୬୨॥

ବିଗାହନ୍ତେ ରଙ୍ଗକ୍ଷିତିପତିପଦତ୍ରାୟିଣି ସକୃ-

     ଦ୍ୱହନ୍ତସ୍ତ୍ୱାମନ୍ତର୍ୱିନିହିତକୁଚେଲବ୍ୟତିକରାଃ ।

ମଦୋଦ୍ଦାମସ୍ତମ୍ବେରମକରଟନିର୍ୟନ୍ମଧୁଝରୀ-

     ପରୀବାହପ୍ରେଙ୍ଖଦ୍ଭ୍ରମରମୁଖରାମଙ୍ଗଣଭୁବମ୍ ॥ ୩.୩୩॥ ୬୩॥

ଅଧିଦୈବତମାପତତ୍ସୁ କଲ୍ପେଷ୍ୱଧିକାରଂ ଭଜତାଂ ପିତାମହାନାମ୍ ।

ଅଭିରକ୍ଷତୁ ରଙ୍ଗଭର୍ତୁରେଷା କରୁଣା କାଚନ ପାଦୁକାମୟୀ ନଃ ॥ ୩.୩୪॥ ୬୪॥

ଧ୍ରୁବମିନ୍ଦ୍ରିୟନାଗଶୃଙ୍ଖଲା ବା ନିରୟଦ୍ୱାରନିବାରଣାର୍ଗଲା ବା ।

ଅନୟାପପଦାଧିରୋହଣୀ ବା ମମ ରଙ୍ଗେଶବିହାରପାଦୁକେ ତ୍ୱମ୍ ॥ ୩.୩୫॥ ୬୫॥

ଶରଣାଗତସାର୍ଥବାହଶୀଲାଂ ଶ୍ରୁତିସୀମନ୍ତପଦପ୍ରସାଦନାର୍ହାମ୍ ।

ଅଧିରଙ୍ଗମୁପାସ୍ମହେ ମୁରାରେର୍ମହନୀୟାଂ ତପନୀୟପାଦୁକେ ତ୍ୱାମ୍ ॥ ୩.୩୬॥ ୬୬॥

ଇହ ଯେ ଭବତୀଂ ଭଜନ୍ତି ଭକ୍ତ୍ୟା

     କୃତିନଃ କେଶବପାଦୁକେ ନିୟୁକ୍ତାଃ ।

କଥୟାମ୍ବ ତିରୋହିତଂ ତୃତୀୟଂ ନୟନଂ

     ତ୍ରୀଣି ମୁଖାନି ବା କିମେଷାମ୍ ॥ ୩.୩୭॥ ୬୭॥

ମଧୁବୈରିପରିଗ୍ରହେଷୁ ନିତ୍ୟଂ କ୍ଷମୟା ତ୍ୱଂ ମଣିପାଦୁକେ ସମେତା ।

ତଦପି କ୍ଷମସେ ନ କିଂ ପରେଷାଂ ତ୍ରିଦଶାଧୀଶ୍ୱରଶେଖରେ ନିବେଶମ୍ ॥ ୩.୩୮॥ ୬୮॥

ଦ୍ୱିତୟଂ ପ୍ରତିୟନ୍ତି ରଙ୍ଗଭର୍ତୁଃ କତିଚିତ୍ କାଞ୍ଚନପାଦୁକେ ଶରଣ୍ୟମ୍ ।

ଅଭୟାନ୍ୱିତମଗ୍ରିମଂ କରଂ ବା ଭବତୀଶେଖରିତଂ ପଦାମ୍ବୁଜଂ ବା ॥ ୩.୩୯॥ ୬୯॥

ଭରତାଶ୍ୱସନେଷୁ ପାଦଶବ୍ଦଂ ବସୁଧାଶ୍ରୋତ୍ରସମୁଦ୍ଭବୋ ମୁନୀନ୍ଦ୍ରଃ ।

ପଠତି ତ୍ୱୟି ପାଦୁକେ ତତସ୍ତ୍ୱଂ ନିୟତଂ ରାମପଦାଦଭିନ୍ନଭୂମା ॥ ୩.୪୦॥ ୭୦॥

ମକୁଟେଷୁ ନିବିଶ୍ୟ ଦିକ୍ପତୀନାଂ ପଦମେବ ପ୍ରତିପଦ୍ୟ ରଙ୍ଗଭର୍ତୁଃ ।

ପରିରକ୍ଷସି ପାଦୁକେ ପଦଂ ତ୍ୱଂ କ୍ୱ ନୁ ଭିଦ୍ୟେତ ଗରୀୟସାଂ ପ୍ରଭାବଃ ॥ ୩.୪୧॥ ୭୧॥

ଜଗତାମଭିରକ୍ଷଣେ ତ୍ରୟାଣାମଧିକାରଂ ମଣିପାଦୁକେ ବହନ୍ତ୍ୟୋଃ ।

ଯୁବୟୋଃ ପରିକର୍ମକୋଟିଲଗ୍ନଂ ଚରଣଦ୍ୱନ୍ଦ୍ୱମବୈମି ରଙ୍ଗଭର୍ତୁଃ ॥ ୩.୪୨॥ ୭୨॥

ପଦରକ୍ଷିଣି ବତ୍ସଲା ନିକାମଂ ରଘୁବୀରସ୍ୟ ପଦାମ୍ବୁଜାଦପି ତ୍ୱମ୍ ।

ଯଦସୌ ଭରତସ୍ତ୍ୱୟାଂଶବତ୍ତ୍ୱାନ୍ନ ପୁନସ୍ତାଦୃଶମନ୍ୱଭୂଦ୍ୱିୟୋଗମ୍ ॥ ୩.୪୩॥ ୭୩॥

ଅଭିଗମ୍ୟ ମୁକୁନ୍ଦପାଦୁକେ ତ୍ୱାମପନୀତାତପବାରଣୈଃ ଶିରୋଭିଃ ।

ହରିତାଂ ପତୟୋ ଦୁରାପମନ୍ୟୈରନଘଚ୍ଛାୟମବାନ୍ପୁବନ୍ତି ଭୋଗମ୍ ॥ ୩.୪୪॥ ୭୪॥

ଅପହାୟ ସିତାସିତାନୁପାୟାନରବିନ୍ଦେକ୍ଶଣପାଦୁକେ ମହାନ୍ତଃ ।

ତ୍ୱଦନନ୍ୟତୟା ଭଜନ୍ତି ବୃତ୍ତିଂ ତ୍ୱଦସାଧାରଣଭୋଗସାଭିଲାଷାଃ ॥ ୩.୪୫॥ ୭୫॥

ପ୍ରଣମନ୍ତି ନ ବା ବିଧେର୍ୱିପାକାଦ୍ୟ ଇମେ ରଙ୍ଗନରେନ୍ଦ୍ରପାଦୁକେ ତ୍ୱାମ୍ ।

ଉପଜାତମନୁତ୍ତମାଙ୍ଗମେଷାମୁଭୟେଷାମପି ଚିତ୍ରମୁତ୍ତମାଙ୍ଗମ୍ ॥ ୩.୪୬॥ ୭୬॥

ତବ କେଶବପାଦୁକେ ପ୍ରଭାବୋ ମମ ଦୁଷ୍କର୍ମ ଚ ନନ୍ୱନନ୍ତସାରେ ।

ନିୟମେନ ତଥାଽପି ପଶ୍ଚିମସ୍ୟ ପ୍ରଥମେନୈବ ପରାଭବଂ ପ୍ରତୀମଃ ॥ ୩.୪୭॥ ୭୭॥

ଅସ୍ତ୍ରଭୂଷଣତୟୈବ କେବଲଂ ବିଶ୍ୱମେତଦଖିଲଂ ବିଭର୍ତି ଯଃ ।

ଅକ୍ଲମେନ ମଣିପାଦୁକେ ତ୍ୱୟା ସୋଽପି ଶେଖରତୟୈବ ଧାର୍ୟତେ ॥ ୩.୪୮॥ ୭୮॥

ରାମପାଦସହଧର୍ମଚାରିଣୀଂ ପାଦୁକେ ନିଖିଲପାତକଚ୍ଛିଦମ୍ ।

ତ୍ୱାମଶେଷଜଗତାମଧୀଶ୍ୱରୀଂ ଭାବୟାମି ଭରତାଧିଦେବତାମ୍ ॥ ୩.୪୯॥ ୭୯॥

ଚୂଡାକପାଲବ୍ୟତିଷଙ୍ଗଦୋଷଂ ବିମୋଚୟିଷ୍ୟନ୍ନିବ ବିଷ୍ଣୁପଦ୍ୟାଃ ।

କୃତାଦରଃ କେଶବପାଦରକ୍ଷେ ବିଭର୍ତି ବାଲେନ୍ଦୁବିଭବଣସ୍ତ୍ୱାମ୍ ॥ ୩.୫୦॥ ୮୦॥

ତ୍ୱୟୈବନିତ୍ୟଂ ମଣିପାଦରକ୍ଷେ ରାଜନ୍ୱତୀ ସୃଷ୍ଟିରିୟଂ ପ୍ରଜାନାମ୍ ।

ସ୍ତ୍ରୀରାଜ୍ୟଦୋଷପ୍ରଶମାୟ ନୂନଂ ନିର୍ଦିଶ୍ୟସେ ନାଥବିଶେଷଣେନ ॥ ୩.୫୧॥ ୮୧॥

ବିଭର୍ଷି ନିତ୍ୟଂ ମଣିପାଦୁକେ ତ୍ୱଂ ବିଶ୍ୱମ୍ଭରଂ ଧାମ ନିଜେନ ଭୂମ୍ନା ।

ତବାନୁଭାବଶ୍ଚୁଲକୀକୃତୋଽୟଂ ଭକ୍ତୈରଜସ୍ରଂ ଭବତୀଂ ଦଧାନୈଃ ॥ ୩.୫୨॥ ୮୨॥

ପରସ୍ୟ ପୁଂସଃ ପଦସନ୍ନିକର୍ଷେ ତୁଲ୍ୟାଧିକାରାଂ ମଣିପାଦୁକେ ତ୍ୱାମ୍ ।

ଉତ୍ତଂସୟନ୍ତି ସ୍ୱୟମୁତ୍ତମାଙ୍ଗୈଃ ଶେଷାସମଂ ଶେଷଗରୁତ୍ମଦାଦ୍ୟାଃ ॥ ୩.୫୩॥ ୮୩॥

ମୁକୁନ୍ଦ ପାଦାମ୍ବୁଜଧାରିଣି ତ୍ୱାଂ ମୋହାଦନୁତ୍ତଂସୟତାଂ ଜନାନାମ୍ ।

ମୂର୍ଧ୍ନି ସ୍ଥିତା ଦୁର୍ଲିପୟୋ ଭବନ୍ତି ପ୍ରଶସ୍ତବର୍ଣାବଲୟସ୍ତଦୀୟାଃ ॥ ୩.୫୪॥ ୮୪॥

ଭୂମିଃ ଶ୍ରୁତୀନାଂ ଭୁବନସ୍ୟ ଧାତ୍ରୀ ଗୁଣୌରନନ୍ତା ବିପୁଲା ବିଭୂତ୍ୟା ।

ସ୍ଥିରା ସ୍ୱୟଂ ପାଲୟିତୁଂ କ୍ଷମା ନଃ ସର୍ୱଂସହା ଶୌରିପଦାବନି ତ୍ୱମ୍ ॥ ୩.୫୫॥ ୮୫॥

ସ୍ଥୈର୍ୟଂ କୁଲକ୍ଷୋଣିଭୃତାଂ ବିଧତ୍ସେ

     ଶେଷାଦୟସ୍ତ୍ୱାଂ ଶିରସା ବହନ୍ତି ।

ପଦପ୍ରସୂତା ପରମସ୍ୟ ପୁଂସଃ

     ପୃଥ୍ୱୀମହିମ୍ନା ମଣିପାଦୁକେ ତ୍ୱମ୍ ॥ ୩.୫୬॥ ୮୬॥

ଦୈତ୍ୟାଧିପାନାଂ ବଲିନାଂ କିରୀଟା

     ନିକ୍ଷେପଣଂ ତେ ଯଦି ନାଭ୍ୟନନ୍ଦନ୍ ।

ରଙ୍ଗେଶପାଦାବନି ରଙ୍ଗଧାମ୍ନଃ

     ସୋପାନତାଂ ପ୍ରାପ୍ୟ ବହନ୍ତ୍ୟମୀ ତ୍ୱାମ୍ ॥ ୩.୫୭॥ ୮୭॥

ଶେଷୋ ଗରୁତ୍ମାନ୍ ମଣିପାଦପୀଠୀ

     ତ୍ୱଂ ଚେତି ପାଦାବନି ବିଶ୍ୱମାନ୍ୟାଃ ।

ତୁଲ୍ୟାଧିକାରା ଯଦି କିନ୍ତୁ ସନ୍ତ-

     ସ୍ତ୍ୱାମେବ ନିତ୍ୟଂ ଶିରସା ବହନ୍ତି ॥ ୩.୫୮॥ ୮୮॥

ପରସ୍ୟ ପୁଂସଃ ପରମଂ ପଦଂ ତ-

     ଦ୍ବିଭର୍ଷି ନିତ୍ୟଂ ମୁଣିପାଦୁକେ ତ୍ୱମ୍ ।  var  ମନିପାଦରକ୍ଷେ

ଅନ୍ୟାଦୃଶାଂ ବ୍ୟୋମସଦାଂ ପଦାନି

     ତ୍ୱୟ୍ୟାୟତନ୍ତେ ଯଦିଦଂ ନ ଚିତ୍ରମ୍ ॥ ୩.୫୯॥ ୮୯॥

ପାଦୌ ମୁରାରେଃ ଶରଣଂ ପ୍ରଜାନାଂ ତୟୋସ୍ତଦେବାସି ପାଦାବନି ତ୍ୱମ୍ ।

ଶରଣ୍ୟତାୟାସ୍ତ୍ୱମନନ୍ୟରକ୍ଷା ସନ୍ଦୃଶ୍ୟସେ ବିଶ୍ରମଭୂମିରେକା ॥ ୩.୬୦॥ ୯୦॥

ଅନ୍ୟେଷୁ ପଦ୍ମାକମଲାସନାଦ୍ୟୈରଙ୍ଗେଷୁ ରଙ୍ଗାଧିପତେଃ ଶ୍ରିତେଷୁ ।

ପଦାବନି ତ୍ୱାମଧିଗମ୍ୟ ଜାତଂ ପଦଂ ମୁରାରେରଧିଦୈବତଂ ନଃ ॥ ୩.୬୧॥ ୯୧॥

କ୍ଷଣଂ ସରୋଜେକ୍ଷଣପାଦୁକେ ଯଃ କୃତାଦରଃ କିଙ୍କୁରୁତେ ଭବତ୍ୟାଃ ।

ଅକିଞ୍ଚିନସ୍ୟାପି ଭବନ୍ତି ଶୀଘ୍ରଂ ଭ୍ରୂକିଙ୍କରାସ୍ତସ୍ୟ ପୁରନ୍ଦରାଦ୍ୟାଃ ॥ ୩.୬୨॥ ୯୨॥

ବହନ୍ତି ଯେ ମାଧବପାଦୁକେ ତ୍ୱାମୁହ୍ୟନ୍ତ ଏତେ ଦିବି ନିର୍ୱିଘାତାଃ ।

ହଂସେନ ନିତ୍ୟଂ ଶରଦଭ୍ରଭାସା କୈଲାସଗୌରେଣ କକୁଦ୍ମତା ବା ॥ ୩.୬୩॥ ୯୩॥

ରୁଦ୍ରଂ ଶ୍ରିତୋ ଦେବଗଣଃ ସ ରୁଦ୍ରଃ

     ପଦ୍ମାସନଂ ସୋଽପି ଚ ପଦ୍ମନାଭମ୍ ।

ସ ତ୍ୱାମନନ୍ତୋ ନ ପୁନସ୍ତ୍ୱମନ୍ୟଂ

     କ ଏଷ ପାଦାବନି ତେ ପ୍ରଭାବଃ ॥ ୩.୬୪॥ ୯୪॥

ପରସ୍ୟ ଧାମ୍ନଃ ପ୍ରତିପାଦନାର୍ହାଂ ବଦନ୍ତି ବିଦ୍ୟାଂ ମଣିପାଦୁକେ ତ୍ୱାମ୍ ।

ଯତସ୍ତବୈବାଧିଗମେ ପ୍ରଜାନାଂ ଦୂରୀଭବତ୍ୟୁତ୍ତରପୂର୍ୱମଂହଃ ॥ ୩.୬୫॥ ୯୫॥

ଧନ୍ୟା ମୁକୁନ୍ଦସ୍ୟ ପଦାନୁଷଙ୍ଗାଦ୍ ଧନୀୟତା ଯେନ ସମର୍ଚିତା ତ୍ୱମ୍ ।

ବାସସ୍ତଦୀୟୋ ମଣିପାଦରକ୍ଷେ ଲକ୍ଷ୍ମ୍ୟାଽଲକାମପ୍ୟଧରୀକରୋତି ॥ ୩.୬୬॥ ୯୬॥

ପଦେନ ବିଷ୍ଣୋଃ କିମୁତେତରେଷାଂ

     ବିସୃଜ୍ୟ ସଙ୍ଗଂ ସମୁପାସତେ ତ୍ୱାମ୍ ।  var  ଯ ଉପାସତେ

କରୋଷି ତାନ୍କିଂ ତ୍ୱମପେତକାମାନ୍

     କାଲେନ ପାଦାବନି ସତ୍ୟକାମାନ୍ ॥ ୩.୬୭॥ ୯୭॥

ଅଭ୍ୟାସୟୋଗେନ ନିଗୃହ୍ୟମାଣୈରନ୍ତର୍ମୁଖୈରାତ୍ମବିଦୋ ମନୋଭିଃ ।

ମାତସ୍ତ୍ୱୟା ଗୁପ୍ତପଦଂ ପ୍ରଭାବାଦନ୍ୱେଷୟନ୍ତ୍ୟାଗମିକଂ ନିଧାନମ୍ ॥ ୩.୬୮॥ ୯୮॥  var  ଗୁପ୍ତପଦପ୍ରଭାବାଦ୍

ମୂର୍ଧ୍ନା ଦଧାନାଂ ମଣିପାଦୁକେ ତ୍ୱାମୁତ୍ତଂସିତଂ ବା ପୁରୁଷଂ ଭବତ୍ୟା ।

ବଦନ୍ତି କେଚିଦ୍ୱୟମାମନାମସ୍ତ୍ୱାମେବ ସାକ୍ଷାଦଧିଦୈବତଂ ନଃ ॥ ୩.୬୯॥ ୯୯॥

ମୂର୍ଧ୍ନା ସତାମଧସ୍ତାଦୁପରିଚ ବିଷ୍ଣୋଃ ପଦେନ ସଙ୍ଘଟିତାମ୍ ।

ଅଦବୀୟସୀଂ ବିମୁକ୍ତେଃ ପଦବୀମବୟନ୍ତି ପାଦୁକେ ଭବତୀମ୍ ॥ ୩.୭୦॥ ୧୦୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ପ୍ରଭାବପଦ୍ଧତିସ୍ତୃତୀୟା ॥

୪. ସମର୍ପଣପଦ୍ଧତିଃ (୨୦)

ଭଜାମଃ ପାଦୁକେ ଯାଭ୍ୟାଂ ଭରତସ୍ୟାଗ୍ରଜସ୍ତଦା ।

ପ୍ରାୟଃ ପ୍ରତିପ୍ରୟାଣାୟ ପ୍ରାସ୍ଥାନିକମକଲ୍ପୟତ୍ ॥ ୪.୧॥ ୧୦୧॥

ରାଜ୍ୟଂ ବିହାୟ ରଘୁବଂଶମହୀପତୀନାଂ

     ପୌରାଂଶ୍ଚ ପାଦରସିକାନ୍ପୃଥିବୀଂ ଚ ରକ୍ତାମ୍ ।

ତ୍ୱାମେବ ହନ୍ତ ଚରଣାବନି ସମ୍ପ୍ରୟାସ୍ୟନ୍

     ଆଲମ୍ବତ ପ୍ରଥମମୁତ୍ତରକୋସଲେନ୍ଦ୍ରଃ ॥ ୪.୨॥ ୧୦୨॥

ପ୍ରାପ୍ତେ ପ୍ରୟାଣସମୟେ ମଣିପାଦରକ୍ଷେ

     ପୌରାନବେକ୍ଷ୍ୟ ଭବତୀ କରୁଣପ୍ରଲାପାନ୍ ।

ମଞ୍ଜୁପ୍ରଣାଦମୁଖରା ବିନିବର୍ତନାର୍ଥଂ

     ରାମଂ ପଦଗ୍ରହଣପୂର୍ୱମୟାଚତେବ ॥ ୪.୩॥ ୧୦୩॥

ମତ୍ୱା ତୃଣାୟ ଭରତୋ ମଣିପାଦରକ୍ଷେ  var  ତୃଣଂ ସ ଭରତୋ

     ରାମେଣ ତାଂ ବିରହିତାଂ ରଘୁରାଜଧାନୀମ୍ ।

ତ୍ୱାମେବ ସପ୍ରଣୟମୁଜ୍ଜୟିନୀମବନ୍ତୀଂ

     ମେନେ ମହୋଦୟମୟୀଂ ମଧୁରାମୟୋଧ୍ୟାମ୍ ॥ ୪.୪॥ ୧୦୪॥

ରାମାତ୍ମନଃ ପ୍ରତିପଦଂ ମଣିପାଦରକ୍ଷେ

     ବିଶ୍ୱମ୍ଭରସ୍ୟ ବହନେନ ପରୀକ୍ଷିତାଂ ତ୍ୱାମ୍ ।

ବିଶ୍ୱସ୍ୟ ଦେବି ବହନେ ବିନିବେଶୟିଷ୍ୟନ୍

     ବିସ୍ରବ୍ଧ ଏବଂ ଭରତୋ ଭବତୀଂ ଯୟାଚେ ॥ ୪.୫॥ ୧୦୫॥

ଭକ୍ତ୍ୟା ପରଂ ଭବତୁ ତଦ୍ଭରତସ୍ୟ ସାଧୋ-

     ସ୍ତ୍ୱତ୍ପ୍ରାର୍ଥନଂ ରଘୁପତୌ ମଣିପାଦରକ୍ଷେ ।

କେନାଶୟେନ ସ ମୁନିଃ ପରମାର୍ଥଦର୍ଶୀ

     ଭଦ୍ରାୟ ଦେବି ଜଗତାଂ ଭବତୀମବାଦୀତ୍ ॥ ୪.୬॥ ୧୦୬॥

ରାମେ ବନଂ ବ୍ରଜତି ପଙ୍କ୍ତିରଥେ ପ୍ରସୁପ୍ତେ

     ରାଜ୍ୟାପବାଦଚକିତେ ଭରତେ ତଦାନୀମ୍ ।

ଆଶ୍ୱାସୟେତ୍ କ ଇବ କୋସଲବାସିନସ୍ତାନ୍

     ସୀତେବ ଚେତ୍ ତ୍ୱମପି ସାହସବୃତ୍ତିରାସୀଃ ॥ ୪.୭॥ ୧୦୭॥

ପାଦାବନି ପ୍ରଭବତୋ ଜଗତାଂ ତ୍ରୟାଣାଂ

     ରାମାଦପି ତ୍ୱମଧିକା ନିୟତଂ ପ୍ରଭାବାତ୍ ।

ନୋ ଚେତ୍ କଥନ୍ନୁ ଭରତସ୍ୟ ତମେବ ଲିପ୍ସୋଃ

     ପ୍ରତ୍ୟାୟନଂ ପରିପଣଂ ଭବତୀ ଭବିତ୍ରୀ ॥ ୪.୮॥ ୧୦୮॥

ମନ୍ୟେ ନିୟୁଜ୍ୟ ଭବତୀଂ ମଣିପାଦରକ୍ଷେ

     ପାର୍ଷ୍ଣିଗ୍ରହସ୍ୟ ଭରତସ୍ୟ ନିବର୍ତନାର୍ଥମ୍ ।

ରତ୍ନାକରଂ ସପଦି ଗୋଷ୍ପଦୟନ୍ ବିଜିଗ୍ୟେ

     ରାମଃ କ୍ଷଣେନ ରଜନୀଚରରାଜଧାନୀମ୍ ॥ ୪.୯॥ ୧୦୯॥

ପାଦାବନି ପ୍ରଭୁତରାନପରାଧବର୍ଗାନ୍

     ସୋଢୁଂ କ୍ଷମା ତ୍ୱମସି ମୂର୍ତିମତୀ କ୍ଷମୈବ ।  var  କ୍ଷମେବ

ଯତ୍ ତ୍ୱାଂ ବିହାୟ ନିହତାଃ ପରିପନ୍ଥିନସ୍ତେ

     ଦେବେନ ଦାଶରଥିନା ଦଶକଣ୍ଠମୁଖ୍ୟାଃ ॥ ୪.୧୦॥ ୧୧୦॥

ବାକ୍ୟେ ଗରୀୟସି ପିତୁର୍ୱିହିତେଽପ୍ୟତୃପ୍ତ୍ୟା

     ମାତୁର୍ମନୋରଥମଶେଷମବନ୍ଧ୍ୟଯିଷ୍ୟନ୍ ।

ମନ୍ୟେ ତଦା ରଘୁପତିର୍ଭରତସ୍ୟ ତେନେ

     ମାତସ୍ତ୍ୱୟୈବ ମଣିମୌଲିନିବେଶଲକ୍ଷ୍ମୀମ୍ ॥ ୪.୧୧॥ ୧୧୧॥

ପାଦାମ୍ବୁଜାଦ୍ୱିଗଲିତାଂ ପରମସ୍ୟ ପୁଂସ-

     ସ୍ତ୍ୱାମାଦରେଣ ବିନିବେଶ୍ୟ ଜଟାକଲାପେ ।

ଅଙ୍ଗୀଚକାର ଭରତୋ ମଣିପାଦରକ୍ଷେ

     ଗଙ୍ଗାଧିରୂଢଶିରସୋ ଗିରିଶସ୍ୟ କାନ୍ତିମ୍ ॥ ୪.୧୨॥ ୧୧୨॥

ଅବିକଲମଧିକର୍ତୁଂ ରକ୍ଷଣେ ସପ୍ତଲୋକ୍ୟା

     ରଘୁପତିଚରଣେନ ନ୍ୟସ୍ତଦିବ୍ୟାନୁଭାବାମ୍ ।

ଅଭଜତ ଭରତସ୍ତ୍ୱାମଞ୍ଜସା ପାଦରକ୍ଷେ

     ମଣିମକୁଟନିବେଶତ୍ୟାଗଧନ୍ୟେନ ମୂର୍ଧ୍ନା ॥ ୪.୧୩॥ ୧୧୩॥

ଇୟମବିକଲୟୋଗକ୍ଷେମସିଦ୍ଧ୍ୟୈ ପ୍ରଜାନା-

     ମଲମିତି ଭରତେନ ପ୍ରାର୍ଥିତାମାଦରେଣ ।

ରଘୁପତିରଧିରୋହନ୍ନଭ୍ୟଶିଞ୍ଚତ୍ ସ୍ୱୟଂ ତ୍ୱାଂ

     ଚରଣନଖମଣୀନାଂ ଚନ୍ଦ୍ରିକାନିର୍ଝରେଣ ॥ ୪.୧୪॥ ୧୧୪॥

ପ୍ରଣୟିନି ପଦପଦ୍ମେ ଗାଢମାଶ୍ଲିଷ୍ୟତି ତ୍ୱାଂ

     ବିଧିସୁତକଥିତଂ ତଦ୍ୱୈଭବଂ ତେ ବିଦନ୍ତଃ ।

ଅନୁଦିନମୃଷୟସ୍ତ୍ୱାମର୍ଚୟନ୍ତ୍ୟଗ୍ନ୍ୟଗାରେ

     ରଘୁପତିପଦରକ୍ଷେ ରାମଗିର୍ୟାଶ୍ରମସ୍ଥାଃ ॥ ୪.୧୫॥ ୧୧୫॥

ନିୟତମଧିରୁରୋହ ତ୍ୱାମନାଧେୟଶକ୍ତିଂ

     ନିଜଚରଣସରୋଜେ ଶକ୍ତିମାଧାତୁକାମଃ ।

ସ କଥମିତରଥା ତ୍ୱାଂ ନ୍ୟସ୍ୟ ରାମୋ ବିଜହ୍ରେ

     ଦୃଷଦୁପଚିତଭୂମୌ ଦଣ୍ଡକାରଣ୍ୟଭାଗେ ॥ ୪.୧୬॥ ୧୧୬॥

ରଘୁପତିପଦପଦ୍ମାଦ୍ରନ୍ତପୀଠେ ନିବେଷ୍ଟୁଂ

     ଭରତଶିରସି ଲଗ୍ନାଂ ପ୍ରେକ୍ଷ୍ୟ ପାଦାବନି ତ୍ୱାମ୍ ।

ପରିଣତପୁରୁଷାର୍ଥଃ ପୌରବର୍ଗଃ ସ୍ୱୟଂ ତେ

     ବିଧିମଭଜତ ସର୍ୱୋ ବନ୍ଦିବୈତାଲିକାନାମ୍ ॥ ୪.୧୭॥ ୧୧୭॥

ଅନନ୍ୟରାଜନ୍ୟନିଦେଶନିଷ୍ଠାଂ

     ଚକାର ପୃଥ୍ୱୀଂ ଚତୁରର୍ଣବାନ୍ତାମ୍ ।

ଭ୍ରାତୁର୍ୟିୟାସୋର୍ଭରତସ୍ତଦା ତ୍ୱାଂ

     ମୂର୍ଧ୍ନା ବହନ୍ ମୂର୍ତିମତୀମିବାଜ୍ଞାମ୍ ॥ ୪.୧୮॥ ୧୧୮॥

ଯଦ୍ଭ୍ରାତ୍ରେ ଭରତାୟ ରଙ୍ଗପତିନା ରାମତ୍ୱମାତସ୍ଥୁଷା

     ନିତ୍ୟୋପାସ୍ୟନିଜାଙ୍ଘ୍ରିନିଷ୍କ୍ରୟତୟା ନିଶ୍ଚିତ୍ୟ ବିଶ୍ରାଣିତମ୍ ।

ଯୋଗକ୍ଷେମବହଂ ସମସ୍ତଜଗତାଂ ଯଦ୍ଗୀୟତେ ଯୋଗିଭିଃ

     ପାଦତ୍ରାଣମିଦଂ ମିତମ୍ପଚକଥାମହ୍ନାୟ ମେ ନିହ୍ନୁତାମ୍ ॥ ୪.୧୯॥ ୧୧୯॥

ଭରତସ୍ୟେବ ମମାପି ପ୍ରଶମିତବିଶ୍ୱାପବାଦଦୁର୍ଜାତା ।

ଶେଷେବ ଶିରସି ନିତ୍ୟଂ ବିହରତୁ ରଘୁବୀରପାଦୁକେ ଭବତୀ ॥ ୪.୨୦॥ ୧୨୦॥

ଇତି କବିତାର୍ତ୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ସମର୍ପଣପଦ୍ଧତିଶ୍ଚତୁର୍ଥୀ ॥

୫. ପ୍ରତିପ୍ରସ୍ଥାନପଦ୍ଧତିଃ (୨୦)

ପ୍ରଶସ୍ତେ ରାମପାଦାଭ୍ୟାଂ ପାଦୁକେ ପର୍ୟୁପାସ୍ମହେ ।

ଆନୃଶଂସ୍ୟଂ ଯୟୋରାସୀଦାଶ୍ରିତେଷ୍ୱନବଗ୍ରହମ୍ ॥ ୫.୧॥ ୧୨୧॥

ଭୃଶାତୁରସହୋଦରପ୍ରଣୟଖଣ୍ଡନସ୍ୱୈରିଣା

     ପଦେନ କିମନେନ ମେ ବନମିହାବନାଦିଚ୍ଛତା ।

ଇତୀବ ପରିହାୟ ତନ୍ନିବବୃତେ ସ୍ୱୟଂ ଯତ୍ପୁରା

     ପଦତ୍ରମିଦମାଦ୍ରିୟେ ଧୃତଜଗତ୍ରୟଂ ରଙ୍ଗିଣଃ ॥ ୫.୨॥ ୧୨୨॥

ଦଶବଦନବିନାଶଂ ବାଞ୍ଛତୋ ଯସ୍ୟ ଚକ୍ରେ

     ଦଶରଥମନଘୋକ୍ତିଂ ଦଣ୍ଡକାରଣ୍ୟଯାତ୍ରା ।

ସ ଚ ଭରତବିମର୍ଦେ ସତ୍ୟସନ୍ଧସ୍ତ୍ୱୟାଽଽସୀ-

     ତ୍ରଘୁପତିପଦରକ୍ଷେ ରାଜଧାନୀଂ ପ୍ରୟାନ୍ତ୍ୟା ॥ ୫.୩॥ ୧୨୩॥

ଅଭ୍ୟୁପେତବିନିବୃତ୍ତିସାହସା ଦେବି ରଙ୍ଗପତିରତ୍ନପାଦୁକେ ।

ଅତ୍ୟଶେତ ଭବତୀ ମହୀୟସା ପାରତନ୍ତ୍ର୍ୟବିଭବେନ ମୈଥିଲୀମ୍ ॥ ୫.୪॥ ୧୨୪॥

ଅବ୍ୟାହତାଂ ରଘୁପତେର୍ୱହତଃ ପ୍ରତିଜ୍ଞା-

     ମଂସାଧିରୋହଣରସେ ବିହତେ ଧରଣ୍ୟାଃ ।

ପ୍ରାଦାନ୍ନିବୃତ୍ୟ ଭବତୀ ମଣିପାଦରକ୍ଷେ

     ସ୍ପର୍ଶଂ ପଦେନ ବିଗତବ୍ୟବଧାନଖେଦମ୍ ॥ ୫.୫॥ ୧୨୫॥

ମନ୍ତ୍ରାଭିଷେକବିରହାଦ୍ଭଜତା ବିଶୁଦ୍ଧିଂ

     ସଂସ୍କାରବର୍ଜନବଶାଦଭିସଂସ୍କୃତେନ ।

ମୂର୍ଧ୍ନା ନିନାୟ ଭରତୋ ମଣିପାଦୁକେ ତ୍ୱାଂ

     ରାମାଜ୍ଞୟା ବିନିହିତାମିବ ରାଜ୍ୟଲକ୍ଷ୍ମୀମ୍ ॥ ୫.୬॥ ୧୨୬॥

ରକ୍ଷାର୍ଥମସ୍ୟ ଜଗତୋ ମଣିପାଦରକ୍ଷେ

     ରାମସ୍ୟ ପାଦକମଲଂ ସମୟେ ତ୍ୟଜନ୍ତ୍ୟୋଃ ।

କିଂ ଦୁଷ୍କରଂ ତବ ବିଭୂତିପରିଗ୍ରହୋ ବା

     କିଂ ବା ବିଦେହଦୁହିତୁଃ କୃପଣା ଦଶା ସା ॥ ୫.୭॥ ୧୨୭॥

ସୀତାସଖସ୍ୟ ସହସା ଚରଣାରବିନ୍ଦା-

     ତ୍ଭକ୍ତ୍ୟା ନତେ କୃତପଦା ଭରତୋତ୍ତମାଙ୍ଗେ ।

ଆରୁହ୍ୟ ନାଗମଭିତୋ ଭବତୀ ବିତେନେ

     ମାୟୂରଚାମରଭରଂ ମଣିରଶ୍ମିଜାଲୈଃ ॥ ୫.୮॥ ୧୨୮॥

ମୂର୍ଧ୍ନା ମୁକୁନ୍ଦପଦରକ୍ଷିଣି ବିଭ୍ରତସ୍ତ୍ୱା-

     ମାବିର୍ମଦସ୍ୟ ରଘୁବୀରମଦାବଲସ୍ୟ ।

ଆମୋଦିଭିଃ ସପଦି ଦାନଜଲପ୍ରବାହୈ-

     ର୍ଲେଭେ ଚିରାଦ୍ୱସୁମତୀ ରୁଚିରଂ ବିଲେପମ୍ ॥ ୫.୯॥ ୧୨୯॥

ଆଶାଃ ପ୍ରସାଧୟିତୁମମ୍ବ ତଦା ଭବତ୍ୟାଂ

     ଦୈବାଦକାଣ୍ଡଶରଦୀବ ସମୁତ୍ଥିତାୟାମ୍ ।

ସ୍ତୋକାବଶେଷସଲିଲାଃ ସହସା ବଭୂବୁଃ

     ସାକେତୟୌବତବିଲୋଚନବାରିବାହାଃ ॥ ୫.୧୦॥ ୧୩୦॥

ଅନ୍ତେବସନ୍ନଚରମସ୍ୟ କବେଃ ସ ଯୋଗୀ

     ବନ୍ୟାନ୍ପ୍ରଗୃହ୍ୟ ବିବିଧାନୁପଦାବିଶେଷାନ୍ ।

ଆତସ୍ଥୁଷୀଂ ରଘୁକୁଲୋଚିତମୌପବାହ୍ୟଂ

     ପ୍ରତ୍ୟୁଜ୍ଜଗାମ ଭବତୀଂ ଭରତୋପନୀତାମ୍ ॥ ୫.୧୧॥ ୧୩୧॥

ମାତସ୍ତ୍ୱଦାଗମନମଙ୍ଗଲଦର୍ଶିନୀନାଂ

     ସାକେତପକ୍ଷ୍ମଲଦୃଶାଂ ଚଟୁଲାକ୍ଷିଭୃଙ୍ଗୈଃ ।

ଜାତାନି ତତ୍ର ସହସା ମଣିପାଦରକ୍ଷେ

     ବାତାୟନାନି ବଦନୈଃ ଶତପତ୍ରିତାନି ॥ ୫.୧୨॥ ୧୩୨॥

ସାକେତସୀମ୍ନି ଭବତୀ ମଣିପାଦରକ୍ଷେ

     ମାଙ୍ଗଲ୍ୟଲାଜନିକରୈରବକୀର୍ୟମାଣା ।

କୀର୍ତିସ୍ୱୟମ୍ବରପତେର୍ଭରତସ୍ୟ କାଲେ  var  କୀର୍ତ୍ୟାଃ ସ୍ୱୟମ୍ବରପତେଃ

     ବୈବାହିକୀ ଜନନି ବହ୍ନିଶିଖେବ ରେଜେ ॥ ୫.୧୩॥ ୧୩୩॥

ଛତ୍ରେନ୍ଦୁମଣ୍ଡଲବତୀ ମଣିପାଦୁକେ ତ୍ୱଂ

     ବ୍ୟାଧୂତଚାମରକଲାପଶରପ୍ରସୂନା ।

ସଦ୍ୟୋ ବଭୂବିଥ ସମଗ୍ରବିକାସହେତୁଃ

     ସାକେତପୌରବନିତାନୟନୋତ୍ପଲାନାମ୍ ॥ ୫.୧୪॥ ୧୩୪॥

ପ୍ରୈକ୍ଷନ୍ତ ବକ୍ତ୍ରୈର୍ମଣିପାଦରକ୍ଷେ ଶତ୍ରୁଞ୍ଜୟଂ ଶୈଲମିବାଧିରୂଢାମ୍ ।

ରାମାଭିଧାନପ୍ରତିପନ୍ନହର୍ଷୈରୁତ୍ତାନିତୈରୁତ୍ତରକୋସଲାସ୍ତ୍ୱାମ୍ ॥ ୫.୧୫॥ ୧୩୫॥

ଦ୍ରଷ୍ଟୁଂ ତଦା ରାଘବପାଦରକ୍ଷେ ସୀତାମିବ ତ୍ୱାଂ ବିନିବର୍ତମାନାମ୍ ।

ଆସନ୍ନୟୋଧ୍ୟାପୁରସୁନ୍ଦରୀଣାମୌତ୍ସୁକ୍ୟଲୋଲାନି ବିଲୋଚନାନି ॥ ୫.୧୬॥ ୧୩୬॥

ଆସ୍ଥାୟ ତତ୍ର ସ୍ଫୁଟବିନ୍ଦୁନାଦଂ ସ୍ତମ୍ବେରମଂ ତାଦୃଶସନ୍ନିବେଶମ୍ ।

ଅଦର୍ଶୟସ୍ତ୍ୱଂ ପୁରମଧ୍ୟଭାଗେ ପାଦାବନି ତ୍ୱତ୍ପ୍ରଣବାଶ୍ରୟତ୍ୱମ୍ ॥ ୫.୧୭॥ ୧୩୭॥

ଦଶଗ୍ରୀବସ୍ତମ୍ବେରମଦଲନଦୁର୍ଦାନ୍ତହୃଦୟେ

     ବିହାରସ୍ୱାଚ୍ଛନ୍ଦ୍ୟାଦ୍ୱିଶତି ରଘୁସିଂହେ ବନଭୁବମ୍ ।

ସ୍ୱାବାତ୍ସଲ୍ୟକ୍ରୋଡୀକୃତଭରତଶାବୈବ ଭବତୀ  var  ଭରତଶାବେବ

     ନିରାବାଧାଂ ପାଦାବନି ନ ବିଜହୌ କୋସଲଗୁହାମ୍ ॥ ୫.୧୮॥ ୧୩୮॥

କୈକେୟୀବରଦାନଦୁର୍ଦିନନିରାଲୋକସ୍ୟ ଲୋକସ୍ୟ ଯ-

     ତ୍ତ୍ରାଣାର୍ଥଂ ଭରତେନ ଭବ୍ୟମନସା ସାକେତମାନୀୟତେ ।

ରାମତ୍ୟାଗସହୈରସହ୍ୟବିରହଂ ରଙ୍ଗକ୍ଷିତୀନ୍ଦ୍ରସ୍ୟ ତ-

     ତ୍ପାଦତ୍ରାଣମନନ୍ୟତନ୍ତ୍ରଫଣିତେରାପୀଡମୀଡୀମହି ॥ ୫.୧୯॥ ୧୩୯॥

ସମୁପସ୍ଥିତେ ପ୍ରଦୋଷେ ସହସା ବିନିବୃତ୍ୟ ଚିତ୍ରକୂଟବନାତ୍ ।

ଅଭଜତ୍ପୁନର୍ଜନପଦଂ ବତ୍ସଂ ଧେନୁରିବ ପାଦୁକେ ଭବତୀ ॥ ୫.୨୦॥ ୧୪୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ପ୍ରତିପ୍ରସ୍ଥାନପଦ୍ଧତିଃ ପଞ୍ଚମୀ ॥

୬. ଅଧିକାରପରିଗ୍ରହପଦ୍ଧତିଃ (୪୦)

ଅଧୀଷ୍ଟେ ପାଦୁକା ସା ମେ ଯସ୍ୟାଃ ସାକେତବାସିଭିଃ ।

ଅନ୍ୱୟବ୍ୟତିରେକାଭ୍ୟାମନ୍ୱମୀୟତ ବୈଭବମ୍ ॥ ୬.୧॥ ୧୪୧॥

ମୋଚିତସ୍ଥିରଚରାନୟତ୍ନତଃ କୋସଲାନ୍ ଜନପଦାନୁପାସ୍ମହେ ।

ଯେଷୁ କାଂଶ୍ଚନ ବଭୂବ ବତ୍ସରାନ୍ ଦୈବତଂ ଦନୁଜବୈରିପାଦୁକା ॥ ୬.୨॥ ୧୪୨॥

ସାମ୍ରାଜ୍ୟସମ୍ପଦିବ ଦାସଜନୋଚିତା ତ୍ୱଂ

     ରାମେଣ ସତ୍ୟବଚସା ଭରତାୟ ଦତ୍ତା ।

ସ ତ୍ୱାଂ ନିବେଶ୍ୟ ଚରଣାବନି ଭଦ୍ରପୀଠେ

     ପୃଥ୍ୱୀଂ ବୁଭୋଜ ବୁଭୁଜେ ଚ ଶୋବିଭୂତିମ୍ ॥ ୬.୩॥ ୧୪୩॥

ଭୋଗାନନନ୍ୟମନସାଂ ମଣିପାଦୁକେ ତ୍ୱଂ

     ପୁଷ୍ଣାସି ହନ୍ତ ଭଜନାମନୁଷଙ୍ଗସିଦ୍ଧାନ୍ ।

ତେନୈବ ନୂନମଭବଦ୍ଭରତସ୍ୟ ସାଧୋ-

     ରପ୍ରାର୍ଥିତଂ ତଦିହ ରାଜ୍ୟମବର୍ଜନୀୟମ୍ ॥ ୬.୪॥ ୧୪୪॥

ରାମପ୍ରୟାଣଜନିତଂ ବ୍ୟପନୀୟ ଶୋକଂ

     ରତ୍ନାସନେ ସ୍ଥିତବତୀ ମଣିପାଦରକ୍ଷେ ।

ପୃଥ୍ୱୀଂ ନିଜେନ ଯଶସା ବିହିତୋତ୍ତରୀୟା-

     ମେକାତପତ୍ରତିଲକାଂ ଭବତୀ ବିତେନେ ॥ ୬.୫॥ ୧୪୫॥

ରାମାଜ୍ଞୟା ପରବତୀ ପରିଗୃହ୍ୟ ରାଜ୍ୟଂ

     ରତ୍ନାସନଂ ରଘୁକୁଲୋଚିତମାଶ୍ରୟନ୍ତୀ ।

ଶୁଦ୍ଧାଂ ପଦାବନି ପୁନର୍ଭବତୀ ବିତେନେ

     ସ୍ୱାତନ୍ତ୍ର୍ତ୍ୟଲେଶକଲୁଷାଂ ଭରତସ୍ୟ କୀର୍ତିମ୍ ॥ ୬.୬॥ ୧୪୬॥

ପୌଲସ୍ତ୍ୟବୀରବଦନସ୍ତବକାବସାନା-

     ତ୍ପୁଷ୍ପାଣି ଦଣ୍ଡକବନେଷ୍ୱପଚେତୁମିଚ୍ଛୋଃ ।

ରକ୍ଷାଧୁରଂ ଧୃତବତୀ ମଣିପାଦୁକେ ତ୍ୱଂ

     ରାମସ୍ୟ ମୈଥିଲସୁତାସହିତେ ପ୍ରଚାରେ ॥ ୬.୭॥ ୧୪୭॥

ପାଦାବନି ପ୍ରଚଲଚାମରବୃନ୍ଦମଧ୍ୟେ

     ଭଦ୍ରାସନାସ୍ତରଗତା ଭବତୀ ବିରେଜେ ।

ଆକୀର୍ଣଦିବ୍ୟସଲିଲେ କଟକେ ସୁମେରୋ-

     ରମ୍ଭୋଜିନୀବ କଲହାୟିତହଂସୟୂଥା ॥ ୬.୮॥ ୧୪୮॥

ମାନ୍ୟେ ରଘୂଦ୍ୱହପଦେ ମଣିପାଦୁକେ ତ୍ୱାଂ

     ବିନ୍ୟସ୍ୟ ବିଗ୍ରହବତୀମିବ ରାଜ୍ୟଲକ୍ଷ୍ମୀମ୍ ।

ଆଲୋଲମକ୍ଷବଲୟୀ ଭରତୋ ଜଟାବା-

     ନାଲମ୍ବ୍ୟ ଚାମରମନନ୍ୟମନାଃ ସିଷେବେ ॥ ୬.୯॥ ୧୪୯॥

ପ୍ରାପ୍ତେ ଦିବଂ ଦଶରଥେ ଭରତେ ବିଲକ୍ଷେ

     ପର୍ୟାକୁଲେଷୁ ପରମୁତ୍ତରକୋସଲେଷୁ ।

ତ୍ୱଂ ଚେଦୁପେକ୍ଷିତବତୀ କ ଇବାଭବିଷ୍ୟ-

     ତ୍ଗୋପାୟିତା ଗୁହ୍ୟସଖସ୍ୟ ବିଭୋଃ ପଦଂ ତତ୍ ॥ ୬.୧୦॥ ୧୫୦॥  var  ଗୋପାୟିତୁଂ

ଭ୍ରାତୁର୍ୟଦମ୍ବ ବିରହାଦ୍ଭରତେ ବିଷଣ୍ଣେ

     ଦାକ୍ଷିଣ୍ୟମାଶ୍ରିତବତୀ ମଣିପାଦୁକେ ତ୍ୱମ୍ ।

ଆସୀଦଶେଷଜଗତାଂ ଶ୍ରବଣାମୃତଂ ତ-

     ଦ୍ୱାଚାଲକାହଲସହଂ ବିରୁଦଂ ତଦା ତେ ॥ ୬.୧୧॥ ୧୫୧॥

ରାଜ୍ୟଂ ତଦା ଦଶରଥାଦନୁ ରାମତଃ ପ୍ରାକ୍

     ବିଭ୍ରାଣୟା ଚରଣରକ୍ଷିଣି ବୀତଖେଦମ୍ ।

ତୁଲ୍ୟାଧିକାରଭଜନେନ ବଭୂବ ଧନ୍ୟୋ

     ବଂଶସ୍ତ୍ୱୟାଽମ୍ବ ମନୁବଂଶମହୀପତୀନାମ୍ ॥ ୬.୧୨॥ ୧୫୨॥

ବର୍ଷାଣି ତାନି ବୃଷଲୋ ନ ତପାଂସି ତେପେ

     ବାଲୋ ନ କଶ୍ଚିଦପି ମୃତ୍ୟୁବଶଂ ଜଗାମ ।

ରାଜ୍ୟେ ତବାମ୍ବ ରଘୁପୁଙ୍ଗବପାଦରକ୍ଷେ

     ନୈବାପରଂ ପ୍ରତିବିଧେୟମଭୂତ୍ପ୍ରସକ୍ତମ୍ ॥ ୬.୧୩॥ ୧୫୩॥

ବିଶ୍ୱଂ ତ୍ୱଦାଶ୍ରିତପଦାମ୍ବୁଜସମ୍ଭବାୟାଂ

     ଯସ୍ୟାଂ ପ୍ରତିଷ୍ଠିତମିଦଂ ମଣିପାଦରକ୍ଷେ ।

ଆସୀଦନନ୍ୟଶରଣା ସମୟେ ଯଥାବ-

     ତ୍ସାଽପି ତ୍ୱୟା ବସୁମତୀ ବିହିତପ୍ରତିଷ୍ଠା ॥ ୬.୧୪॥ ୧୫୪॥

ପ୍ରାୟେଣ ରାମବିରହାବ୍ଦ୍ୟଥିତା ତଦାନୀ-

     ମୁତ୍ସଙ୍ଗମାଶ୍ରିତବତୀ ତବ ରାଜ୍ୟଲକ୍ଷ୍ମୀଃ ।

ତାମେବ ଦେବି ନନୁ ଜୀବୟିତୁଂ ଜଲାର୍ଦ୍ରା-

     ମଙ୍ଗୀଚକାର ଭବତୀ ଭରତୋପନୀତାମ୍ ॥ ୬.୧୫॥ ୧୫୫॥

ବୀରବ୍ରତପ୍ରଣୟିନି ପ୍ରଥମେ ରଘୂଣାଂ

     ପ୍ରାପ୍ତେ ଚିରାୟ ଭରତେ ବ୍ରତମାସିଧାରମ୍ ।

ତ୍ୟକ୍ତ୍ୱା ପଦାବନି ତଦା ବିବିଧାନ୍ ବିହାରା-

     ନେକାସିକାବ୍ରତମପୂର୍ୱମବର୍ତୟସ୍ତ୍ୱମ୍ ॥ ୬.୧୬॥ ୧୫୬॥

କାକୁତ୍ସ୍ଥପାଦବିରହପ୍ରତିପନ୍ନମୌନାଂ

     ନିଷ୍ପନ୍ଦତାମୁପଗତାଂ ମଣିପାଦରକ୍ଷେ ।

ଆଶ୍ୱାସୟନ୍ନିବ ମୁହୁର୍ଭରତସ୍ତଦାନୀଂ

     ଶୀତୈରବୀଜୟତ ଚାମରମାରୁତୈସ୍ତ୍ୱାମ୍ ॥ ୬.୧୭॥ ୧୫୭॥

ଯତ୍ର କ୍ୱଚିଦ୍ୱିହରତୋଽପି ପଦାରବିନ୍ଦଂ

     ରକ୍ଷ୍ୟଂ ମୟା ରଘୁପତେରିତି ଭାବୟନ୍ତ୍ୟା ।

ନିଶ୍ଶେଷମେବ ସହସା ମଣିପାଦରକ୍ଷେ

     ନିଷ୍କଣ୍ଟକଂ ଜଗଦିଦଂ ବିଦଧେ ଭବତ୍ୟା ॥ ୬.୧୮॥ ୧୫୮॥

ରାମଂ ତ୍ୱୟା ବିରହିତଂ ଭରତଂ ଚ ତେନ

     ତ୍ରାତୁଂ ପଦାବନି ତଦା ଯଦଭୂତ୍ପ୍ରତୀତମ୍ ।

ରାମାନୁଜସ୍ୟ ତବ ଚାମ୍ବ ଜଗତ୍ସମସ୍ତଂ  var  ଚାନୁ 

     ଜାଗର୍ତି ତେନ ଖଲୁ ଜାଗରଣବ୍ରତେନ ॥ ୬.୧୯॥ ୧୫୯॥

ଅନ୍ତଃପୁରେ ପରିଜନୈଃ ସମୟୋପୟାତୈ

     ରଭ୍ୟର୍ଚିତା ଭବସି ଯା ବିନୟୋପପନ୍ନୈଃ ।

ସା କୋସଲେଶ୍ୱରପଦାବନି ଭୂପତୀନାଂ

     ସଙ୍ଘଟ୍ଟନଂ ମକୁଟପଙ୍କ୍ତିଭିରନ୍ୱଭୂସ୍ତ୍ୱମ୍ ॥ ୬.୨୦॥ ୧୬୦॥

ପ୍ରାପ୍ୟାଧିକାରମୁଚିତଂ ଭୁବନସ୍ୟ ଗୁପ୍ତ୍ୟୈ

     ଭଦ୍ରାସନଂ ଭରତବନ୍ଦିତମାଶ୍ରୟନ୍ତ୍ୟା ।

ମଧ୍ୟେଽବତୀର୍ଣମିବ ମାଧବପାଦରକ୍ଷେ

     ମାତସ୍ତ୍ୱୟାଽପି ମନୁବଂଶମହୀପତୀନାମ୍ ॥ ୬.୨୧॥ ୧୬୧॥

ରାଜାସନେ ରଘୁକୁଲୋଦ୍ୱହପାଦରକ୍ଷେ

     ନୀରାଜନଂ ସମଭବତ୍ ସମୟୋଚିତଂ ତେ ।

ଶ୍ଲାଘାବଶେନ ବହୁଶଃ ପରିଘୂର୍ଣିତାଭିଃ

     ସାମନ୍ତମୌଲିମଣିମଙ୍ଗଲଦୀପିକାଭିଃ ॥ ୬.୨୨॥ ୧୬୨॥

ପୃଥ୍ୱୀପତୀନାଂ ଯୁଗପତ୍ କିରୀଟାଃ

     ପ୍ରତ୍ୟର୍ଥିନାଂ ପ୍ରାଣିତୁମର୍ଥିନାଂ ଚ ।

ପ୍ରାପୁସ୍ତଦା ରାଘବପାଦରକ୍ଷେ

     ତ୍ୱଦୀୟମାସ୍ଥାନିକପାଦପୀଠମ୍ ॥ ୬.୨୩॥ ୧୬୩॥

ପ୍ରଣମ୍ୟ ରଙ୍ଗେଶ୍ୱରପାଦରକ୍ଷେ

     ଦୂରୋପନୀତୈରୁପଦାବିଶେଷୈଃ ।

ସଭାଜୟନ୍ତି ସ୍ମ ତଦା ସଭାୟା-

     ମୁଚ୍ଚୈସ୍ତରାମୁତ୍ତରକୋସଲାସ୍ତ୍ୱାମ୍ ॥ ୬.୨୪॥ ୧୬୪॥

ଅପାବୃତଦ୍ୱାରମୟନ୍ତ୍ରିତାଶ୍ୱଂ

     ରଙ୍ଗେଶପାଦାବନି ପୂର୍ୱମାସୀତ୍ ।

ତ୍ୱୟା ଯଦୃଚ୍ଛାସୁଖସୁପ୍ତପାନ୍ଥଂ

     ରାମେ ବନସ୍ଥେଽପି ପଦଂ ରଘୂଣାମ୍ ॥ ୬.୨୫॥ ୧୬୫॥

ଅନନ୍ୟଭକ୍ତିର୍ମଣିପାଦୁକେ ତ୍ୱାମଭ୍ୟର୍ଚୟନ୍ ଦାଶରଥିର୍ଦ୍ୱିତୀୟଃ ।

ବିକଲ୍ପ୍ୟମାନଃପ୍ରଥମେନ କୀର୍ତ୍ୟା ବନ୍ଦ୍ୟଃ ସ୍ୱୟଂ ବ୍ୟୋମସଦାଂ ବଭୂବ ॥ ୬.୨୬॥ ୧୬୬॥

ଅରଣ୍ୟଯୋଗ୍ୟଂ ପଦମସ୍ପୃଶନ୍ତୀ ରାମସ୍ୟ ରାଜାର୍ହପଦେ ନିବିଷ୍ଟା ।

ଆସ୍ଥାନନିତ୍ୟାସିକୟା ନିରାସ୍ଥଃସ୍ୱର୍ଗୌକସାଂ ସ୍ୱୈରଗତେର୍ୱିଘାତମ୍ ॥ ୬.୨୭॥ ୧୬୭॥

ରାଜାସନେ ଚେଦ୍ଭବତୀ ନିଷଣ୍ଣା ରଙ୍ଗେଶପାଦାବନି ତନ୍ନ ଚିତ୍ରମ୍ ।

ଯତ୍ରାଧିରୂଢାଃ କ୍ରମଶଃ ପୁରା ତ୍ୱାମୁତ୍ତଂସୟନ୍ତେ ରଘୁସାର୍ୱଭୌମାଃ ॥ ୬.୨୮॥ ୧୬୮॥

ଭଦ୍ରାସନଂ ଚେତ୍ପରିବୃତ୍ତମାସୀତ୍ ଦେବି କ୍ଷଣଂ ଦକ୍ଷିଣତୋମୁଖଂ ତେ ।

କଥଂ ଭବେତ୍ କାଞ୍ଚନପାଦରକ୍ଷେ ରାମସ୍ୟ ରକ୍ଷୋମୃଗୟାବିହାରଃ ॥ ୬.୨୯॥ ୧୬୯॥

ଯାବତ୍ତ୍ୱୟା ରାଘବପାଦରକ୍ଷେ ଜିଗୀଷିତା ରାକ୍ଷସରାଜଧାନୀ ।

ମାଲେବ ତାବଲ୍ଲୁଲିତା ମଦାନ୍ଧୈରୁଦ୍ୟାନଶାଖାମୃଗୟୂଥପୈସ୍ତେ ॥ ୬.୩୦॥ ୧୭୦॥

ମହୀକ୍ଷିତାଂ ରାଘବପାଦରକ୍ଷେ ଭଦ୍ରାସନସ୍ଥାଂ ଭବତୀଂ ସ୍ପୃଶନ୍ତଃ ।

ପୂର୍ୱଂ ତଥାତ୍ୱେ ନିୟତେଽପି ଭୂୟଃ କଲ୍ୟାଣତାମାନିଶିରେ କିରୀଟାଃ ॥ ୬.୩୧॥ ୧୭୧॥

ଅନିଚ୍ଛତଃ ପାଣ୍ଡରମାତପତ୍ରଂ ପିତ୍ରା ବିତୀର୍ଣଂ ମଣିପାଦରକ୍ଷେ ।

ଆସୀତ୍ ତ୍ୱଦର୍ଥଂ ବିଧୃତେନ ତେନ ଛାୟା ସମଗ୍ରା ଭରତସ୍ୟ ମୌଲୌ ॥ ୬.୩୨॥ ୧୭୨॥

ପାଦୁକେ ରଘୁପତୌ ଯଦୃଚ୍ଛୟା ପ୍ରସ୍ଥିତେ ବନବିହାରକୌତୁକାତ୍ ।

ଆଧିରାଜ୍ୟମଧିଗମ୍ୟତେ ଯୁବାମକ୍ଷତଂ ବସୁମତୀମରକ୍ଷତମ୍ ॥ ୬.୩୩॥ ୧୭୩॥

ରଘୁବୀରପଦାନୁଷଙ୍ଗମାତ୍ରାତ୍ପରିବର୍ହେଷୁ ନିବେଶିତା ଯଦି ତ୍ୱମ୍ ।

ଅଧିକାରଦିନେ କଥଂ ପୁନସ୍ତେ ପରିବାରାସ୍ତବ ପାଦୁକେ ବଭୂବୁଃ ॥ ୬.୩୪॥ ୧୭୪॥

ପୁରୁଷାର୍ଥଚତୁଷ୍ଟୟାର୍ଥିନୀନାଂ ପରିଷତ୍ ତେ ମହିତା ବସିଷ୍ଠମୁଖ୍ୟୈଃ ।

କ୍ରୟବିକ୍ରୟପଟ୍ଟଣଂ ପ୍ରଜାନାମଭବତ୍ କାଞ୍ଚନପାଦୁକେ ତଦାନୀମ୍ ॥ ୬.୩୫॥ ୧୭୫॥

ମନୁଜତ୍ୱତିରୋହିତେନ ଶକ୍ୟେ ବପୁଷୈକେନ ବିରୋଧିନାଂ ନିରାସେ ।

ଅଭଜଦ୍ଭରତାଦିଭେଦମୀଶଃ ସ୍ୱୟମାରାଧୟିତୁଂ ପଦାବନି ତ୍ୱାମ୍ ॥ ୬.୩୬॥ ୧୭୬॥

ମଗଧାଙ୍ଗକଲିଙ୍ଗବଙ୍ଗମୁଖ୍ୟାନ୍

     ବିମତାନ୍ ରନ୍ଧ୍ରଗବେଷିଣଃ ସସୈନ୍ୟାନ୍ ।

ରଘୁପୁଙ୍ଗବପାଦୁକେ ବିଜିଗ୍ୟେ

     ଭରତଃ ଶାସନମୁଦ୍ୱହନ୍ ଭବତ୍ୟାଃ ॥ ୬.୩୭॥ ୧୭୭॥

ଅନିତରବହନୀୟଂ ମନ୍ତ୍ରିମୁଖ୍ୟୈର୍ୟଦା ତ-

     ତ୍ତ୍ୱୟି ବିନିହିତମାସୀତ୍ ସୂର୍ୟବଂଶାଧିରାଜ୍ୟମ୍ ।

ରଘୁପତିପଦରକ୍ଷେ ରତ୍ନପୀଠେ ତଦାନୀଂ

     ଶ୍ରିୟମିବ ଦଦୃଶୁସ୍ତ୍ୱାଂ ସାଦରଂ ଲୋକପାଲାଃ ॥ ୬.୩୮॥ ୧୭୮॥

ପରିହୃତଦଣ୍ଡକାଧ୍ୱଗମନଂ ପଦରକ୍ଷିଣି ତ-

     ତ୍ପରିଣତବିଶ୍ୱସମ୍ପଦୁଦୟଂ ଯୁବୟୋର୍ଦ୍ୱିତୟମ୍ ।

ରଘୁପତିରତ୍ନପୀଠମଧିରୁହ୍ୟ ତଦା ବିଦଧେ

     ବ୍ୟପଗତବୈରିଭୂପନିଲୟଂ ବସୁଧାବଲୟମ୍ ॥ ୬.୩୯॥ ୧୭୯॥

ପ୍ରାପ୍ତୋଦୟା ତଦାନୀଂ କିମପି ତମସ୍ତନ୍ନିରାକରୋଦ୍ଭବତୀ ।

ତନୁରିବ ମନୁକୁଲଜନୁଷାଂ ପ୍ରସବିତ୍ରୀ ରତ୍ନପାଦୁକେ ସବିତୁଃ ॥ ୬.୪୦॥ ୧୮୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଅଧିକାରପରିଗ୍ରହପଦ୍ଧତିଃ ଷଷ୍ଠୀ ॥

୭. ଅଭିଷେକପଦ୍ଧତିଃ (୩୦)

ପାହି ନଃ ପାଦୁକେ ଯସ୍ୟା ବିଧାସ୍ୟନ୍ନଭିଷେଚନମ୍ ।

ଆଭିଷେଚନିକଂ ଭାଣ୍ଡଂ ଚକ୍ରେ ରାମଃ ପ୍ରଦକ୍ଷିଣମ୍ ॥ ୭.୧॥ ୧୮୧॥

ରାଘବସ୍ୟ ଚରଣୌ ପଦାବନି ପ୍ରେକ୍ଷିତୁଂ ତ୍ୱଦଭିଷେକମୀଷତୁଃ ।

ଆଭିଷେଚନିକଭାଣ୍ଡସନ୍ନିଧୌ ଯତ୍ପ୍ରଦକ୍ଷିଣଗତିଃ ଶନୈର୍ୟଯୌ ॥ ୭.୨॥ ୧୮୨॥

ମୂର୍ଧାଭିଷିକ୍ତୈର୍ନିୟମେନ ବାହ୍ୟୌ

     ବିଚିନ୍ତ୍ୟ ନୂନଂ ରଘୁନାଥପାଦୌ ।

ରତ୍ନାସନସ୍ଥାଂ ମଣିପାଦୁକେ ତ୍ୱାଂ

     ରାମାନୁଜନ୍ମା ଭରତୋଽଭ୍ୟଷିଞ୍ଚତ୍ ॥ ୭.୩॥ ୧୮୩॥

ଭ୍ରାତୁର୍ନିୟୋଗେଽପ୍ୟନିବର୍ତମାନଂ ରାଜ୍ୟାଭିଷେକଂ ଚ ପରିତ୍ୟଜନ୍ତମ୍ ।

ରାମାନୁଜୌ ତୌ ନନୁ ପାରତନ୍ତ୍ର୍ୟାଦୁଭାବୁଭାଭ୍ୟାଂ ଭବତୀ ଜିଗାୟ ॥ ୭.୪॥ ୧୮୪॥

ନିବେଶ୍ୟ ରଙ୍ଗେଶ୍ୱରପାଦରକ୍ଷେ ଭଦ୍ରାସନେ ସାଦରମଭ୍ୟଶିଞ୍ଚତ୍ ।

ବଶୀ ବସିଷ୍ଠୋ ମନୁବଂଶଜାନାଂ ମହୀକ୍ଷିତାଂ ବଂଶପୁରୋହିତସ୍ତ୍ୱାମ୍ ॥ ୭.୫॥ ୧୮୫॥

କୃତାଭିଷେକା ଭବତୀ ଯଥାବତ୍ ରଙ୍ଗେଶପାଦାବନି ରତ୍ନପୀଠେ ।

ଗଙ୍ଗାନିପାତସ୍ନପିତାଂ ସୁମେରୋରଧିତ୍ୟକାଭୂମିମଧଶ୍ଚକାର ॥ ୭.୬॥ ୧୮୬॥

ବସିଷ୍ଠମୁଖ୍ୟୈର୍ୱିହିତଭିଷେକାଂ ରାଜ୍ୟାସନେ ରାମନିବେଶୟୋଗ୍ୟେ ।

ତୁଷ୍ଟାବ ରଙ୍ଗେଶ୍ୱରପାଦରକ୍ଷେ ପ୍ରାଚେତସସ୍ତ୍ୱାଂ ପ୍ରଥମଃ କବୀନାମ୍ ॥ ୭.୭॥ ୧୮୭॥

ରକ୍ଷୋବଧାର୍ଥଂ ମଣିପାଦରକ୍ଷେ ରାମାତ୍ମନୋ ରଙ୍ଗପତେଃ ପ୍ରବାସେ ।

ରକ୍ଷୋଽପକାରାଦ୍ଭବତୀ ବିତେନେ ରାଜନ୍ୱତୀଂ କୋସଲରାଜଧାନୀମ୍ ॥ ୭.୮॥ ୧୮୮॥

ପ୍ରାପ୍ତାଭିଷେକା ମଣିପାଦରକ୍ଷେ ପ୍ରତାପମୁଗ୍ରଂ ପ୍ରତିପଦ୍ୟମାନା ।

ଶଶାସ ପୃଥ୍ୱୀଂ ଭବତୀ ଯଥାବତ୍ସାକେତସିଂହାସନସାର୍ୱଭୌମୀ ॥ ୭.୯॥ ୧୮୯॥

ଦଶାନନାଦୀନ୍ମଣିପାଦରକ୍ଷେ ଜିଗୀଷତୋ ଦାଶରଥେର୍ୱିୟୋଗାତ୍ ।

ଜାତୋପତାପା ତ୍ୱୟି ସମ୍ପ୍ରୟୁକ୍ତୈସ୍ତୀର୍ଥୋଦକୈରୁଚ୍ଛ୍ୱସିତା ଧରିତ୍ରୀ ॥ ୭.୧୦॥ ୧୯୦॥

ଅଧ୍ୟାସିତଂ ମନୁମୁଖୈଃକ୍ରମଶୋନରେନ୍ଦ୍ରୈ-

     ରାରୋପ୍ୟ ଦେବି ଭବତୀଂ ତପନୀୟପୀଠମ୍ ।

ରାଜ୍ୟାଭିଷେକମନଘଂ ମଣିପାଦରକ୍ଷେ

     ରାମୋଚିତଂ ତବ ବଶଂ ଭରତୋ ବିତେନେ ॥ ୭.୧୧॥ ୧୯୧॥

ସ୍ନେହେନ ଦେବି ଭବତୀଂ ବିଷୟେଽଭିଷିଞ୍ଚନ୍

     ଦ୍ୱିସ୍ସପ୍ତସଙ୍ଖ୍ୟଭୁବନୋଦରଦୀପରେଖାମ୍ ।

ଜାତଂ ରଘୂଦ୍ୱହଦିବାକରବିପ୍ରୟୋଗା-

     ଦନ୍ଧଂ ତମିସ୍ରମହରଦ୍ଭରତଃ ପ୍ରଜାନାମ୍ ॥ ୭.୧୨॥ ୧୯୨॥

ହସ୍ତାପଚେୟପୁରୁଷାର୍ଥଫଲପ୍ରସୂତେ

     ର୍ମୂଲଂ ପଦାବନି ମୁକୁନ୍ଦମହୀରୁହସ୍ତ୍ୱମ୍ ।

ଛାୟାବିଶେଷମଦିଶଦ୍ୟଦସୌ ପ୍ରଜାନା-

     ମାବର୍ଜିତୈସ୍ତ୍ୱୟି ଶୁଭୈରଭିଷେକତୋୟୈଃ ॥ ୭.୧୩॥ ୧୯୩॥

ଅହ୍ନାୟ ରାମବିରହାତ୍ପରିଖିନ୍ନବୃତ୍ତେ-

     ରାଶ୍ୱାସନାୟ ଭବତୀ ମଣିପାଦରକ୍ଷେ ।

ତୀର୍ଥାଭିଷେକମପଦିଶ୍ୟ ବସୁନ୍ଧରାୟା-

     ଶ୍ଚକ୍ରେ ତଦା ସମୁଚିତଂ ଶିଶିରୋପଚାରମ୍ ॥ ୭.୧୪॥ ୧୯୪॥

ମାଲିନ୍ୟମାଶ୍ରିତବତୀ ମଣିପାଦରକ୍ଷେ

     ପଙ୍କେନ କେକୟସୁତାକଲହୋତ୍ଥିତେନ ।

ଶୁଦ୍ଧିଂ ପରାମଭିଜଗାମ ବସୁନ୍ଧରେୟଂ

     ତ୍ୱତ୍ତଃ କ୍ଷଣାନ୍ନିପତିତୈରଭିଷେକତୋୟୈଃ ॥ ୭.୧୫॥ ୧୯୫॥

ଆବର୍ଜିତଂ ମୁନିଗଣେନ ଜଗଦ୍ୱିଭୂତ୍ୟୈ

     ତୋୟଂ ପଦାବନି ତଦା ତ୍ୱୟି ମନ୍ତ୍ରପୂତମ୍ ।

ମୂଲାବସେକସଲିଲଂ ନିଗମଦ୍ରୁମାଣାଂ

     ଶାପୋଦକଂ ଚ ସମଭୂତ୍କ୍ଷଣଦାଚାରାଣାମ୍ ॥ ୭.୧୬॥ ୧୯୬॥

ବିପ୍ରୋଷିତେ ରଘୁପତୌ ଭବତୀ ଯଥାର୍ହଂ

     ମାନ୍ୟେ ପଦେ ସ୍ଥିତିମତୀ ମନୁବଂଶଜାନାମ୍ ।

ଆତ୍ମନ୍ୟଥର୍ୱନିପୁଣୈଃ ପ୍ରହିତୈଃ ପ୍ରଜାନା-

     ମଶ୍ରୂଣ୍ୟପାସ୍ୟଦଭିଷେକଜଲପ୍ରବାହୈଃ ॥ ୭.୧୭॥ ୧୯୭॥

ପ୍ରାୟୋ ବିଶୋଷିତରସା ପତିବିପ୍ରୟୋଗା-

     ତ୍ପର୍ୟାକୁଲୀକୃତସମୁଦ୍ରପୟୋଧରା ଗୌଃ ।

ଅମ୍ବ ତ୍ୱଦିୟମଭିଷେକଜଲଂ ପିବନ୍ତୀ

     ଧେନୁର୍ବଭୂବ ଜଗତାଂ ଧନଧାନ୍ୟଦୋଗ୍ଧ୍ରୀ ॥ ୭.୧୮॥ ୧୯୮॥

ବୃତ୍ତେ ଯଥାବଦଭିଷେକବିଧୌ ବଭାସେ

     ପଶ୍ଚାତ୍ତବାମ୍ବ ଭରତେନ ଧୃତଃ କିରୀଟଃ ।

ଆକସ୍ମିକସ୍ୱକୁଲବିପ୍ଲବଶାନ୍ତିହର୍ଷା-

     ତ୍ପ୍ରାପ୍ତସ୍ତ୍ୱିଷାମିବ ପତିର୍ମଣିପାଦୁକେ ତ୍ୱାମ୍ ॥ ୭.୧୯॥ ୧୯୯॥

ମନୁବଂଶପୁରୋହିତେନ ମନ୍ତ୍ରୈ-

     ରଭିମନ୍ତ୍ର୍ୟ ତ୍ୱୟି ପାଦୁକେ ପ୍ରୟୁକ୍ତମ୍ ।

ଅଭିଷେକଜଲଂ କ୍ଷଣେନ ରାଜ୍ଞାଂ

     ଶମୟାମାସ ସମୁତ୍ଥିତାନ୍ପ୍ରତାପାନ୍ ॥ ୭.୨୦॥ ୨୦୦॥

ପାଦପାଦୁପହୃତା ରଘୂଦ୍ୱହା-

     ଦାଲବାଲମିବ ପୀଠମାଶ୍ରିତା ।

ଅଭ୍ୟଷେଚି ଭବତୀ ତପୋଧନୈଃ

     ପାରିଜାତଲତିକେବ ପାଦୁକେ ॥ ୭.୨୧॥ ୨୦୧॥

ଅଲଘୁଭିରଭିଷେକବ୍ୟାପୃତୈରମ୍ବୁଭିସ୍ତେ

     ଦିନକରକୁଲଦୈନ୍ୟଂ ପାଦୁକେ କ୍ଷାଲୟିଷ୍ୟନ୍ ।

ସ ଖଲୁ କମଲୟୋନେଃ ସୂନୁରାଧତ୍ତ ମନ୍ତ୍ରେ-

     ଶ୍ୱଧିକନିୟମୟୋଗାଂ ଶକ୍ତିମାଥର୍ୱଣେଷୁ ॥ ୭.୨୨॥ ୨୦୨॥

ଦିନକରକୁଲଜାନାଂ ଦେବି ପୃଥ୍ୱୀପତୀନାଂ

     ନିରୁପଧିମଧିକାରଂ ପ୍ରାପ୍ନୁବତ୍ୟାଂ ଭବତ୍ୟାମ୍ ।

ଅଜନିଷତ ସମସ୍ତାଃ ପାଦୁକେ ତାବକୀନ-

     ସ୍ନପନସଲିଲୟୋଗାନ୍ନିମ୍ନଗାସ୍ତୁଙ୍ଗଭଦ୍ରାଃ ॥ ୭.୨୩॥ ୨୦୩॥

ତବ ବିଧିବଦୁପାତ୍ତେ ସାର୍ୱଭୌମାଭିଷେକେ

     ଭରତସମୟବିଦ୍ଭିଃ ପାଦୁକେ ମନ୍ତ୍ରିମୁଖ୍ୟୈଃ ।

ତ୍ୱଦବଧି ନିଜକର୍ମସ୍ଥାୟିନୀନାଂ ପ୍ରଜାନାଂ

     ପ୍ରଥମୟୁଗବିଶେଷାଃ ପ୍ରାଦୁରାସନ୍ ବିଚିତ୍ରାଃ ॥ ୭.୨୪॥ ୨୦୪॥

ଅବସିତରିପୁଶବ୍ଦା ନନ୍ୱଭୂସ୍ତ୍ୱଂ ତଦାନୀଂ

     ରଘୁପତିପଦରକ୍ଷେ ଲବ୍ଧରାଜ୍ୟାଭିଷେକା ।

ଚଲିତଭୁଜଲତାନାଂ ଚାମରଗ୍ରାହିଣୀନାଂ

     ମଣିବଲୟନିନାଦୈର୍ମେଦୁରାନ୍ ମନ୍ତ୍ରଘୋଷାନ୍ ॥ ୭.୨୫॥ ୨୦୫॥

ସମୁଚିତମଭିଷେକଂ ପାଦୁକେ ପ୍ରପ୍ନୁବତ୍ୟାଂ

     ତ୍ୱୟି ବିନିପତିତାନାଂ ଦେବି ତୀର୍ଥୋଦକାନାମ୍ ।

ଧ୍ୱନିରନୁଗତମନ୍ତ୍ରଃ ସୀଦତାଂ କୋସଲାନାଂ

     ଶମୟିତୁମଲମାସୀତ୍ ସଙ୍କୁଲାନାର୍ତନାଦାନ୍ ॥ ୭.୨୬॥ ୨୦୬॥

ଦିବିଷଦନୁବିଧେୟଂ ଦେବି ରାଜ୍ୟାଭିଷେକଂ

     ଭରତ ଇବ ଯଦି ତ୍ୱଂ ପାଦୁକେ ନାନ୍ୱମଂସ୍ଥାଃ ।

କଥମିବ ରଘୁବୀରଃ କଲ୍ପୟେଦଲ୍ପୟତ୍ନ-

     ସ୍ତ୍ରିଚତୁରଶରପାତୈସ୍ତାଦୃଶଂ ଦେବକାର୍ୟମ୍ ॥ ୭.୨୭॥ ୨୦୭॥

କତିଚନ ପଦପଦ୍ମସ୍ପର୍ଶସୌଖ୍ୟଂ ତ୍ୟଜନ୍ତୀ

     ବ୍ରତମତୁଲମଧାସ୍ତ୍ୱଂ ବତ୍ସରାନ୍ ସାବଧାନା ।

ରଘୁପତିପଦରକ୍ଷେ ରାକ୍ଷସୈସ୍ତ୍ରାସିତାନାଂ

     ରଣରଣକବିମୁକ୍ତଂ ଯେନ ରାଜ୍ୟଂ ସୁରାଣାମ୍ ॥ ୭.୨୮॥ ୨୦୮॥

ଅଥର୍ୱୋପଜ୍ଞଂ ତେ ବିଧିବଦଭିଷେକଂ ବିଦଧତାଂ

     ବସିଷ୍ଠାଦୀନାମପ୍ୟୁପଚିତଚମତ୍କାରଭରୟା ।

ତ୍ୱଦାସ୍ଥାନ୍ୟା ରଙ୍ଗକ୍ଷିତିରମଣପାଦାବନି ତଦା

     ଲଘୀୟସ୍ୟୋ ଜାତା ରଘୁପରିଷଦାହୋପୁରୁଷିକାଃ ॥ ୭.୨୯॥ ୨୦୯॥

ଅଭିଷେଚୟତୁ ସ ରାମଃ

     ପଦେନ ବା ସ୍ପୃଶତୁ ପାଦୁକେ ଭବତୀମ୍ ।

ଅବିଶେଷିତମହିମା ତ୍ୱଂ

     କ୍ୱ ବା ବିଶେଷଃ କ୍ଷମାସମେତାନାମ୍ ॥ ୭.୩୦॥ ୨୧୦॥

ଇତି କବିତାର୍ତ୍କିକସିହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୁତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଅଭିଷେକପଦ୍ଧତିଃ ସପ୍ତମୀ ॥

୮. ନିର୍ୟାତନାପଦ୍ଧତିଃ (୩୦)

ଅଭିଷେକୋତ୍ସବାତ୍ ତସ୍ମାଦ୍ୟସ୍ୟା ନିର୍ୟାତନୋତ୍ସବଃ ।

ଅତ୍ୟରିଚ୍ୟତ ତାଂ ବନ୍ଦେ ଭବ୍ୟାଂ ଭରତଦେବତାମ୍ ॥ ୮.୧॥ ୨୧୧॥

ଉପାସ୍ୟ ବର୍ଷାଣି ଚତୁର୍ଦଶ ତ୍ୱାମୁତ୍ତାରିକାମୁତ୍ତରକୋସଲସ୍ଥାଃ ।

ସନନ୍ଦନାଦ୍ୟୈରପି ଦୁର୍ୱିଗାହଂ ସାନ୍ତାନିକଂ ଲୋକମବାପୁରଗ୍ର୍ୟମ୍ ॥ ୮.୨॥ ୨୧୨॥

ପାଦାବନି ପ୍ରତ୍ୟଯିତୋ ହନୂମାନ୍ ସୀତାମିବ ତ୍ୱାଂ ଚିରବିପ୍ରୟୁକ୍ତାମ୍ ।

ପ୍ରଣମ୍ୟ ପୌଲସ୍ତ୍ୟରିପୋରୁଦନ୍ତଂ ବିଜ୍ଞାପୟାମାସ ବିନୀତବେଷଃ ॥ ୮.୩॥ ୨୧୩॥

ତବାଭିଷେକାନ୍ମଣିପାଦରକ୍ଷେ ମୂଲେ ନିଷେକାଦିବ ବୃଦ୍ଧିୟୋଗ୍ୟାତ୍ ।

ଜହୁସ୍ତଦୈବ ତ୍ରିଦଶାଙ୍ଗନାନାଂ ପ୍ରମ୍ଲାନତାଂ ପତ୍ରଲତାଙ୍କୁରାଣି  ॥ ୮.୪॥ ୨୧୪॥

ସର୍ୱତସ୍ତ୍ୱଦଭିଷେକବାସରେ ସମ୍ୟଗୁଦ୍ଧୃତସମସ୍ତକଣ୍ଟକେ ।

ରାଘବସ୍ୟ ବିପିନେଷୁ ପାଦୁକେ ଯତ୍ରକାମଗମତା ବ୍ୟବସ୍ଥିତା ॥ ୮.୫॥ ୨୧୫॥

କିଂ ଚତୁର୍ଦଶଭିରେବ ବତ୍ସରୈର୍ନିତ୍ୟମେବ ମଣିପାଦୁକେ ଯୁବାମ୍ ।

ପାଦୟୋସ୍ତ୍ରିଭୁବନାଧିରାଜୟୋର୍ୟୌବରାଜ୍ୟମଧିଗଚ୍ଛତଂ ସ୍ୱୟମ୍ ॥ ୮.୬॥ ୨୧୬॥

ରାମସ୍ୟ ରାକ୍ଷସବଧତ୍ୱରିତସ୍ୟ କାଲେ 

     ପାଦାବନି ପ୍ରକଟୟନ୍ନିବ ପାର୍ଷ୍ଣିଗୁପ୍ତିମ୍ ।

ଆଚିତ୍ରକୂଟମଧିଗମ୍ୟ ଶଶଂସ ବାର୍ତା-

     ମବ୍ୟାହତତ୍ୱଦଭିଷେକମୃଦଙ୍ଗନାଦଃ ॥ ୮.୭॥ ୨୧୭॥

ଭଦ୍ରାଣି ଦେବି ଜଗତାଂ ପ୍ରତିପାଦୟିଷ୍ୟନ୍ 

     ପ୍ରାଗେବ ଯେନ ଭବତୀଂ ଭରତୋଽଭ୍ୟଷିଞ୍ଚତ୍ ।

ମନ୍ୟେ କପୀଶ୍ୱରବିଭୀଷଣୟୋର୍ୟଥାବତ୍-

     ସନ୍ତନ୍ୟତେ ସ୍ମ ତତ ଏବ କିଲାଭିଷେକଃ ॥ ୮.୮॥ ୨୧୮॥

ସମ୍ଭିଦ୍ୟମାନତମସାସରୟୂପନୀତୈଃ

     ସମ୍ବର୍ଧିତସ୍ତବ ଶୁଭୈରଭିଷେକତୋୟୈଃ ।

ମନ୍ୟେ ବଭୂବ ଜଲଧିର୍ମଣିପାଦରକ୍ଷେ 

     ରାମାସ୍ତ୍ରପାବକଶିକାଭିରଶୋଷଣୀୟଃ  ॥ ୮.୯॥ ୨୧୯॥

ପାଦାବନି ତ୍ୱଦଭିଷେଚନମଙ୍ଗଲାର୍ଥଂ

     ଭେରୀଶତଂ ଭୃଶମତାଡ୍ୟତ ଯତ୍ପ୍ରତୀତୈଃ ।

ଆକର୍ଣ୍ୟ ତସ୍ୟ ସହସା ତୁମୁଲଂ ନିନାଦଂ

     ଲଙ୍କାକପାଟନୟନାନି ନିମୀଲିତାନି  ॥ ୮.୧୦॥ ୨୨୦॥

ତାପୋଦ୍ଗମସ୍ତ୍ୱଦଭିଷେକଜଲପ୍ରବାହୈ-

     ରୁତ୍ସାରିତସ୍ତ୍ୱରିତମୁତ୍ତରକୋସଲେଭ୍ୟଃ ।

ଲେଭେ ଚିରାୟ ରଘୁପୁଙ୍ଗବପାଦରକ୍ଷେ

     ଲଙ୍କାବରୋଧସୁଦୃଶାଂ ହୃଦୟେଷୁ ବାସମ୍ ॥ ୮.୧୧॥ ୨୨୧॥

ଆବର୍ଜିତଂ ବିଧିବିଦା ମଣିପାଦରକ୍ଷେ 

     ପଦ୍ମାସନପ୍ରିୟସୁତେନ ପୁରୋହିତେନ ।

ଆସୀନ୍ନିଦାନମଭିଷେକଜଲଂ ତ୍ୱଦୀୟଂ

     ନକ୍ତଞ୍ଚରପ୍ରଣୟିନୀନୟନୋଦକାନାମ୍ ॥ ୮.୧୨॥ ୨୨୨॥

ଦେବି ତ୍ୱୟା ସ୍ନପନସମ୍ପଦି ସଂଶ୍ରିତାୟାଂ 

     ଦଗ୍ଧେ ପୁରେ ଦଶମୁଖସ୍ୟ ବଲୀମୁଖେନ ।

ଆସୀତ୍ ତତଃ ପ୍ରଭୃତି ବିଶ୍ୱଜନପ୍ରତୀତ-

     ମଦ୍ଭ୍ୟୋଽଗ୍ନିରିତ୍ୟବିତଥଂ ବଚନଂ ମୁନୀନାମ୍ ॥ ୮.୧୩॥ ୨୨୩॥

ଆୟୋଧ୍ୟକୈସ୍ତ୍ୱଦଭିଷେକସମିଦ୍ଧହର୍ଷୈ-

     ରାଧ୍ମାପିତାଃ ଶ୍ରୁତିସୁଖଂ ନନୁ ତେ ତଦାନୀମ୍ ।

ରାମସ୍ୟ ରାକ୍ଷସଶିରୋଲବନେଽପ୍ୟଶାମ୍ୟନ୍ 

     ଯେଷାଂ ଧ୍ୱନିର୍ୱିଜୟଶଙ୍ଖରବୋ ବଭୂବ ॥ ୮.୧୪॥ ୨୨୪॥

ପ୍ରଥୟିତୁମଭିଷେକଂ ପାଦୁକେ ତାବକୀନଂ

     ଦୁରିତଶମନଦକ୍ଷେ ଦୁନ୍ଦୁଭୌ ତାଡ୍ୟମାନେ ।

ସପଦି ପରିଗୃହୀତଂ ସାଧ୍ୱସଂ ଦେବି ନୂନଂ

     ଦଶବଦନଧୂନାଂ ଦକ୍ଷିଣୈର୍ନେତ୍ରକୋଶୈଃ ॥ ୮.୧୫॥ ୨୨୫॥

ରଘୁପତିପଦରକ୍ଷେ ରତ୍ନପୀଠେ ଯଦା ତ୍ୱା-

     ମଖିଲଭୁବନମାନ୍ୟାମଭ୍ୟଷିଞ୍ଚଦ୍ୱସିଷ୍ଠଃ ।

ଦଶମୁଖମହିଷୀଭିର୍ଦେବି ବାଷ୍ପାୟିତାଭିଃ

     ସ୍ତନୟୁଗମଭିଷେକ୍ତୁଂ ତତ୍କ୍ଷଣାଦନ୍ୱମଂସ୍ଥାଃ ॥ ୮.୧୬॥ ୨୨୬॥

ରାମାସ୍ତ୍ରାଣି ନିମିତ୍ତମାତ୍ରମିହ ତେ ଲବ୍ଧାଭିଷେକା ସ୍ୱୟମ୍

     ରକ୍ଷସ୍ତତ୍ କ୍ଷପୟାଞ୍ଚକାର ଭବତୀ ଭଦ୍ରାସନସ୍ଥାୟିନୀ ।

ଯଦ୍ଦୋଷ୍ଣାମତିବେଲଦର୍ପଦବଥୁଜ୍ୱାଲୋଷ୍ମଲାନାଂ ତଦା 

     ନିଷ୍ପିଷ୍ଟୈଃ କଲଧୌତଶୈଲଶିଖରୈଃ କର୍ପୂରଚୂର୍ଣାୟିତମ୍ ॥ ୮.୧୭॥ ୨୨୭॥

ଶ୍ରୁତ୍ୱୈବଂ ହନୁମନ୍ମୁଖାଦ୍ରଘୁପତେଃ ପ୍ରତ୍ୟାଗତିଂ ତତ୍କ୍ଷଣା-

     ଦାସୀଦଦ୍ଭରତାନୁବର୍ତନବଶାଦାରୂଢକୁମ୍ଭସ୍ଥଲାମ୍ ।

କାଲୋନ୍ନିଦ୍ରକଦୁଷ୍ଣଦାନମଦିରାମାଦ୍ୟଦ୍ଦ୍ୱିରେଫଧ୍ୱନି-

     ଶ୍ଲାଘାଚାଟୁଭିରସ୍ତୁତେବ ଭବତୀଂ ଶତ୍ରୁଞ୍ଜୟଃ କୁଞ୍ଜରଃ ॥ ୮.୧୮॥ ୨୨୮॥

ପ୍ରତ୍ୟାଗତସ୍ୟ ଭବତୀମବଲୋକ୍ୟ ଭର୍ତୁଃ 

     ପାଦାରବିନ୍ଦସବିଧେ ଭରତୋପନୀତାମ୍ ।

ପୂର୍ୱାଭିଷେକବିଭବାଭ୍ୟୁଚିତାଂ ସପର୍ୟାଂ 

     ମଧ୍ୟେ ସତାମକୃତ ମୈଥିଲରାଜକନ୍ୟା ॥ ୮.୧୯॥ ୨୨୯॥

ସମ୍ପ୍ରେକ୍ଷ୍ୟ ମୈଥିଲସୁତା ମଣିପାଦରକ୍ଷେ 

     ପ୍ରତ୍ୟୁଦ୍ଗତସ୍ୟ ଭବତୀଂ ଭରତସ୍ୟ ମୌଲୌ ।

ନିର୍ଦିଶ୍ୟ ସା ନିଭୃତମଞ୍ଜଲିନା ପୁରସ୍ତାତ୍-

     ତାରାଦିକାଃ ପ୍ରିୟସଖୀରଶିଷତ୍ ପ୍ରଣନ୍ତୁମ୍ ॥ ୮.୨୦॥ ୨୩୦॥

ତୁଲ୍ୟେଽପି ଦେବି ରଘୁବୀରପଦାଶ୍ରୟତ୍ୱେ

     ପୂର୍ୱାଭିଶେକମଧିଗମ୍ୟ ଗରୀୟସୀ ତ୍ୱମ୍ ।

ତେନୈବ ଖଲ୍ୱଭଜତାଂ ମଣିପାଦରକ୍ଷେ 

     ରକ୍ଷଃପ୍ଲବଙ୍ଗମପତୀ ଭବତୀଂ ସ୍ୱମୂର୍ଧ୍ନା ॥ ୮.୨୧॥ ୨୩୧॥

ନିର୍ୱୃତ୍ତରାକ୍ଷସଚମୂମୃଗୟାବିହାରୋ 

     ରଙ୍ଗେଶ୍ୱରଃ ସ ଖଲୁ ରାଘବବଂଶଗୋପ୍ତା ।

ବଂଶକ୍ରମାଦୁପନତଂ ପଦମାଦଦାନୋ

     ମାନ୍ୟଂ ପୁନସ୍ତ୍ୱୟି ପଦଂ ନିଦଧେ ସ୍ୱକୀୟମ୍ ॥ ୮.୨୨॥ ୨୩୨॥

ତତ୍ତାଦୃଶୋଶ୍ଚରଣୟୋଃ ପ୍ରଣିପତ୍ୟ ଭର୍ତୁଃ

     ପୌରାସ୍ତ୍ୱୟା ବିଧୃତୟୋଃ ପ୍ରତିପନ୍ନସତ୍ତ୍ୱାଃ ।

ପ୍ରାପ୍ତାଭିଷେକବିଭବାମପି ପାଦୁକେ ତ୍ୱା-

     ମାନନ୍ଦବାଷ୍ପସଲିଲୈଃ ପୁନରଭ୍ୟଷିଞ୍ଚନ୍ ॥ ୮.୨୩॥ ୨୩୩॥

ମାତସ୍ତ୍ୱୟୈବ ସମୟେ ବିଷମେଽପି ସମ୍ୟକ୍

     ରାଜନ୍ୱତୀଂ ବସୁମତୀମବଲୋକ୍ୟ ରାମଃ  ।

ସଞ୍ଜୀବନାୟ ଭରତସ୍ୟ ସମଗ୍ରଭକ୍ତେଃ

     ସତ୍ୟପ୍ରତିଶ୍ରବତୟୈବ ଚକାର ରାଜ୍ୟମ୍ ॥ ୮.୨୪॥ ୨୩୪॥

ପାଦାବନି ପ୍ରତିଗତସ୍ୟ ପୁରୀମୟୋଧ୍ୟାଂ

     ପୌଲସ୍ତ୍ୟହନ୍ତୁରଭିଷେକଜଲାର୍ଦ୍ରମୂର୍ତେଃ ।

ଅଂସେ ଯଥାର୍ହମଧିବାସ୍ୟ ନିଜୈର୍ୟଶୋଭିଃ

     କସ୍ତୂରିକେବ ନିହିତା ବସୁଧା ତ୍ୱୟୈବ ॥ ୮.୨୫॥ ୨୩୫॥

ଯାଽସୌ ଚତୁର୍ଦଶ ସମାଃ ପତିବିପ୍ରୟୁକ୍ତା

     ବିଶ୍ୱମ୍ଭରା ଭଗବତୀ ବିଧୃତା ଭବତ୍ୟା  ।

ବିନ୍ୟସ୍ୟ ତାଂ ରଘୁପତେର୍ଭୁଜଶୈଲଶୃଙ୍ଗେ

     ଭୂୟୋଽପି ତେନ ସହିତାଂ ଭବତୀ ବଭାର ॥ ୮.୨୬॥ ୨୩୬॥

ନିସ୍ତୀର୍ଣଦୁଃଖଜଲଧେରନଘସ୍ୟ ଦେବି

     ତ୍ୱତ୍ସମ୍ପ୍ରୟୁକ୍ତରଘୁନାଥପଦାନ୍ୱୟେନ ।

ସଦ୍ୟଃ ସନନ୍ଦନମୁଖୈରପି ଦୁର୍ନିରୀକ୍ଷା

     ସାମ୍ରାଜ୍ୟସମ୍ପଦପରା ଭରତସ୍ୟ ଜଜ୍ଞେ॥ ୮.୨୭॥ ୨୩୭॥

ନିର୍ଗତ୍ୟ ଦେବି ଭରତାଞ୍ଜଲିପଦ୍ମମଧ୍ୟାଦ୍

     ଭୂୟଃ ସମାଗତବତୀ ପୁରୁଷୋତ୍ତମେନ ।

ପଦ୍ମେବ ଭଦ୍ରମଖିଲଂ ମଣିପାଦରକ୍ଷେ 

     ପ୍ରାଦୁଶ୍ଚକାର ଭବତୀ ଜଗତାଂ ତ୍ରୟାଣାମ୍ ॥ ୮.୨୮॥ ୨୩୮॥

ରଘୁପତିମଧିରୋପ୍ୟ ସ୍ୱୋଚିତେ ରତ୍ନପୀଠେ 

     ପ୍ରଗୁଣମଭଜଥାସ୍ତ୍ୱଂ ପାଦୁକେ ପାଦପୀଠମ୍ ।

ତଦପି ବହୁମତିସ୍ତେ ତାଦୃଶୀ ନିତ୍ୟମାସୀତ୍

     କ୍କ ନୁ ଖଲୁ ମହିତାନାଂ କଲ୍ପ୍ୟତେ ତାରତମ୍ୟମ୍ ॥ ୮.୨୯॥ ୨୩୯॥

ଅନୁବୃତ୍ତରାମଭାବଃ ଶଙ୍କେ ନିର୍ୱିଷ୍ଟଚକ୍ରବର୍ତିପଦାମ୍ ।

ଅଧୁନାଽପି ରଙ୍ଗନାଥଃ ସଚମତ୍କାରଂ ପଦେନ ଭଜତି ତ୍ୱାମ୍ ॥ ୮.୩୦॥ ୨୪୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଅଷ୍ଟମୀ ନିର୍ୟାତନାପଦ୍ଧତିଃ ॥

୯. ବନ୍ଦିବୈତାଲିକପଦ୍ଧତିଃ (୧୦)

ନମସ୍ତେ ପାଦୁକେ ପୁଂସାଂ ସଂସାରାର୍ଣବସେତବେ ।

ଯଦାରୋହସ୍ୟ ବେଦାନ୍ତା ବନ୍ଦିବୈତାଲିକାଃ ସ୍ୱୟମ୍ ॥ ୯.୧॥ ୨୪୧॥

ଉଚିତମୁପଚରିଷ୍ୟନ୍ ରଙ୍ଗନାଥ ପ୍ରଭାତେ

     ବିଧିଂଶିବସନକାଦ୍ୟାନ୍ ବାହ୍ୟକକ୍ଷ୍ୟାନିରୁଦ୍ଧାନ୍ ।

ଚରଣକମଲସେବାସୌଖ୍ୟସାମ୍ରାଜ୍ୟଭାଜାଂ

     ପ୍ରଥମବିହିତଭାଗାଂ ପାଦୁକାମାଦ୍ରିୟେଥାଃ ॥ ୯.୨॥ ୨୪୨॥

ପଦ୍ମାଜୁଷ୍ଟଂ ଭଜତୁ ଚରଣଂ ପାଦୁକା ଲବ୍ଧବାରା

     ପ୍ରତ୍ୟାସନ୍ନାସ୍ତବ ପରିଜନାଃ ପ୍ରାତରାସ୍ଥାନୟୋଗ୍ୟାଃ ।

ଅର୍ଧୋନ୍ମେଷାଦଧିକସୁଭଗାମର୍ଧନିଦ୍ରାନୁଷଙ୍ଗାଂ

     ନାଭୀପଦ୍ମେ ତବ ନୟନୟୋର୍ନାଥ ପଶ୍ୟନ୍ତୁ ଶୋଭାମ୍ ॥ ୯.୩॥ ୨୪୩॥

ଉପନମତି ମୁହୂର୍ତଂ ଶେଷସିଦ୍ଧାନ୍ତସିଦ୍ଧଂ

     ତଦିହ ଚରଣରକ୍ଷା ରଙ୍ଗନାଥ ତ୍ୱୟୈଷା ।

ମୃଦୁପଦମଧିରୂଢା ମଞ୍ଜୁଭିଃ ଶିଞ୍ଜିତୈଃ ସ୍ୱୈ-

     ରୁପଦିଶତୁ ଜନାନାମୁତ୍ସବାରମ୍ଭବାର୍ତାମ୍ ॥ ୯.୪॥ ୨୪୪॥

ରଙ୍ଗାଧୀଶ ମରୁଦ୍ଗଣସ୍ୟ ମକୁଟାଦାମ୍ନାୟବୃନ୍ଦସ୍ୟ ବା

     ପ୍ରତ୍ୟାନୀୟ ସମର୍ପିତା ବିଧିମୁଖୈର୍ୱାରକ୍ରମାଦାଗତୈଃ ।

ବାହାରୋହଣସମ୍ଭୃତଂ ଶ୍ରମଭରଂ ସମ୍ୟଗ୍ୱିନେତୁଂ କ୍ଷମା

     ଲୀଲାସଞ୍ଚରଣପ୍ରିୟା ସ୍ପୃଶତୁ ତେ ପାଦାମ୍ବୁଜଂ ପାଦୁକା ॥ ୯.୫॥ ୨୪୫॥

ବୃତ୍ତଂ କ୍ରମେଣ ବହୁଧା ନିୟୁତଂ ବିଧୀନା-

     ମର୍ଧଂ ଦ୍ୱିତୀୟମିଦମଙ୍କୁରିତଂ ତବାହ୍ନଃ ।

ନୀଲାସଖୀଭିରୁପନୀୟ ନିବେଶ୍ୟମାନା

     ମଙ୍କ୍ତୁଂ ପ୍ରଭୋ ତ୍ୱରୟତେ ମଣିପାଦୁକା ତ୍ୱାମ୍ ॥ ୯.୬॥ ୨୪୬॥

ଦିବ୍ୟାପ୍ସରୋଭିରୁପଦର୍ଶିତଦୀପବର୍ଗେ

     ରଙ୍ଗାଧିରାଜ ସୁଭଗେ ରଜନୀମୁଖେଽସ୍ମିନ୍ ।

ସଂରକ୍ଷିଣୀ ଚରଣୟୋଃ ସବିଲାସବୃତ୍ତି-

     ନୀରାଜନାସନମସୌ ନୟତୁ ସ୍ୱୟଂ ତ୍ୱାମ୍ ॥ ୯.୭॥ ୨୪୭॥

ଆସନାଦୁଚିତମାସନାନ୍ତରଂ ରଙ୍ଗନାଥ ଯଦି ଗନ୍ତୁମୀହସେ ।

ସନ୍ନତେନ ବିଧିନା ସମର୍ପିତାଂ ସପ୍ରସାଦମଧିରୋହ ପାଦୁକାମ୍ ॥ ୯.୮॥ ୨୪୮॥

ପରିଜନବନିତାଭିଃ ପ୍ରେଷିତଃ ପ୍ରାଞ୍ଜଲିସ୍ତ୍ୱାଂ

     ପ୍ରଣମତି ମଦନୋଽୟଂ ଦେବ ଶୁଦ୍ଧାନ୍ତଦାସଃ ।

ଫଣିପତିଶୟନୀୟଂ ପ୍ରାପୟିତ୍ରୀ ସଲୀଲଂ

     ପଦକମଲମିୟଂ ତେ ପାଦୁକା ପର୍ୟୁପାସ୍ତାମ୍ ॥ ୯.୯॥ ୨୪୯॥

ଇତି ନିଗମବନ୍ଦିବଚସା ସମୟେ ସମୟେ ଗୃହୀତସଙ୍କେତଃ ।

ଅଭିସରତି ରଙ୍ଗନାଥଃ ପ୍ରତିପଦଭୋଗାୟ ପାଦୁକେ ଭବତୀମ୍ ॥ ୯.୧୦॥ ୨୫୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ବୈତାଲିକପଦ୍ଧତିର୍ନବମୀ ॥

୧୦. ଶୃଙ୍ଗାରପଦ୍ଧତିଃ (୧୦)

ଶୌରେଃ ଶୃଙ୍ଗାରଚେଷ୍ଟାନାଂ ପ୍ରସୂତିଂ ପାଦୁକାଂ ଭଜେ ।

ଯାମେଷ ଭୁଙ୍କ୍ତେ ଶୁଦ୍ଧାନ୍ତାତ୍ପୂର୍ୱଂ ପଶ୍ଚାଦପି ପ୍ରଭୁଃ ॥ ୧୦.୧॥ ୨୫୧॥

ପ୍ରଣତତ୍ରିଦଶେନ୍ଦ୍ରମୌଲିମାଲାମକରନ୍ଦାର୍ଦ୍ରପରାଗପଙ୍କିଲେନ ।

ଅନୁଲିମ୍ପତି ପାଦୁକେ ସ୍ୱୟଂ ତ୍ୱାମନୁରୂପେଣ ପଦେନ ରଙ୍ଗନାଥ ॥ ୧୦.୨॥ ୨୫୨॥

ଅବଦାତହିମାଂଶୁକାନୁଷକ୍ତଂ

     ପଦରକ୍ଷେ ତ୍ୱୟି ରଙ୍ଗିଣଃ କଦାଚିତ୍ ।

କିମପି ସ୍ଥିତମଦ୍ୱିତୀୟମାଲ୍ୟଂ

     ବିରଲାବସ୍ଥିତମୌକ୍ତିକଂ ସ୍ମରାମି ॥ ୧୦.୩॥ ୨୫୩॥

ଅସହାୟଗୃହୀତରଙ୍ଗନାଥାମବରୋଧାଙ୍ଗଣସୀମ୍ନି ପାଦୁକେ ତ୍ୱାମ୍ ।

ସୁଦୃଶଃ ସ୍ୱୟମର୍ଚୟନ୍ତି ଦୂରାଦବତଂସୋତ୍ପଲବାସିତୈରପାଙ୍ଗୈଃ ॥ ୧୦.୪॥ ୨୫୪॥

ନିର୍ୱିଶ୍ୟମାନମପି ନୂତନସନ୍ନିବେଶଂ

     କୈବଲ୍ୟକଲ୍ପିତବିଭୂଶଣକାୟକାନ୍ତିମ୍ ।

କାଲେଷୁ ନିର୍ୱିଶସି ରଙ୍ଗୟୁବାନମେକା

     ଶୃଙ୍ଗାରନିତ୍ୟରସିକଂ ମଣିପାଦରକ୍ଷେ ॥ ୧୦.୫॥ ୨୫୫॥

ନିଦ୍ରାୟିତସ୍ୟ କମିତୁର୍ମଣିପାଦୁକେ ତ୍ୱଂ

     ପର୍ୟଙ୍କିକାପରିସରଂ ପ୍ରତିପଦ୍ୟମାନା ।

ଶ୍ୱାସାନିଲପ୍ରଚଲିତେନ ଭଜସ୍ୟଭୀକ୍ଷ୍ଣଂ

     ନାଭୀସରୋଜରଜସା ନବମଙ୍ଗରାଗମ୍ ॥ ୧୦.୬॥ ୨୫୬॥

ଶୟିତବତି ରଜନ୍ୟାଂ ପାଦୁକେ ରଙ୍ଗବନ୍ଧୌ

     ଚରଣକମଲପାର୍ଶ୍ୱେ ସାଦରଂ ବର୍ତସେ ତ୍ୱମ୍ ।

ଫଣିପତିଶୟନୀୟାଦୁତ୍ଥିତସ୍ୟ ପ୍ରଭାତେ

     ପ୍ରଥମନୟନପାତଂ ପାବନଂ ପ୍ରାପ୍ତୁକାମା ॥ ୧୦.୭॥ ୨୫୭॥

ଚରଣକମଲସଙ୍ଗାଦ୍ରଙ୍ଗନାଥସ୍ୟ ନିତ୍ୟଂ

     ନିଗମପରିମଲଂ ତ୍ୱଂ ପାଦୁକେ ନିର୍ୱମନ୍ତୀ ।

ନିୟତମତିଶୟାନା ବର୍ତସେ ସାବରୋଧଂ

     ହୃଦୟମଧିବସନ୍ତୀଂ ମାଲିକାଂ ବୈଜୟନ୍ତୀମ୍ ॥ ୧୦.୮॥ ୨୫୮॥

ଉପନିଷଦବଲାଭିର୍ନିତ୍ୟମୁତ୍ତଂସନୀୟଂ

     କିମପି ଜଲଧିକନ୍ୟାହସ୍ତସମ୍ବାହନାର୍ହମ୍ ।

ତବ ତୁ ଚରଣରକ୍ଷେ ଦେବି ଲୀଲାରବିନ୍ଦଂ

     ଚରଣସରସିଜଂ ତଚ୍ଚାରୁ ଚାଣୂରହନ୍ତୁଃ ॥ ୧୦.୯॥ ୨୫୯॥

ଅଖିଲାନ୍ତଃପୁରବାରେଷ୍ୱନେକବାରଂ ପଦାବନି ସ୍ୱୈରମ୍ ।

ଅନୁଭବତି ରଙ୍ଗନାଥୋ ବିହାରବିକ୍ରାନ୍ତିସହଚରୀଂ ଭବତୀମ୍ ॥ ୧୦.୧୦॥ ୨୬୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଶୃଙ୍ଗାରପଦ୍ଧତିର୍ଦଶମୀ ॥

୧୧. ସଞ୍ଚାରପଦ୍ଧତିଃ (୬୦)

``ଅଗ୍ରତସ୍ତେ ଗମିଶ୍ୟାମି ମୃଦ୍ନନ୍ତୀ କୁଶକଣ୍ଟକାନ୍'' ।

ଇତି ସୀତାଽପି ଯଦ୍ୱୃତ୍ତିମିୟେଷ ପ୍ରଣମାମି ତାମ୍ ॥ ୧୧.୧॥ ୨୬୧॥

ଶରଦଃ ଶତମମ୍ବ ପାଦୁକେ ସ୍ୟାଂ

     ସମୟାହୂତପିତାମହସ୍ତୁତାନି ।

ମଣିମଣ୍ଟପିକାସୁ ରଙ୍ଗଭର୍ତୁ

     ସ୍ତ୍ୱଦଧୀନାନି ଗତାଗତାନି ପଶ୍ୟନ୍ ॥ ୧୧.୨॥ ୨୬୨॥

ତ୍ୱଦଧୀନପରିକ୍ରମୋ ମୁକୁନ୍ଦସ୍ତଦଧୀନସ୍ତବ ପାଦୁକେ ବିହାରଃ ।

ଇତରେତରପାରତନ୍ତ୍ର୍ୟମିତ୍ଥଂ ଯୁବୟୋଃ ସିଦ୍ଧମନନ୍ୟତନ୍ତ୍ରଭୂମ୍ନୋଃ ॥ ୧୧.୩॥ ୨୬୩॥

ରଜସା ତମସା ଚ ଦୁଷ୍ଟସତ୍ୱେ

     ଗହନେ ଚେତସି ମାମକେ ମୁକୁନ୍ଦଃ ।

ଉଚିତଂ ମୃଗୟାବିହାରମିଚ୍ଛନ୍

     ଭବତୀମାଦୃତ ପାଦୁକେ ପଦାଭ୍ୟାମ୍ ॥ ୧୧.୪॥ ୨୬୪॥

କ୍ଷମୟା ଜଗତାମପି ତ୍ରୟାଣା

     ମବନେ ଦେବି ପଦାବନି ତ୍ୱୟୈବ ।

ଅଭିଗମ୍ୟତମୋଽପି ସଂଶ୍ରିତାନା-

     ମଭିଗନ୍ତା ଭବତି ସ୍ୱୟଂ ମୁକୁନ୍ଦଃ ॥ ୧୧.୫॥ ୨୬୫॥

ଶିରସା ଭବତୀଂ ଦଧାତି କଶ୍ଚି-

     ଦ୍ୱିଧୃତଃ କୋଽପି ପଦସ୍ପୃଶା ଭବତ୍ୟା ।

ଉଭୟୋର୍ମଧୁବୈରିପାଦରକ୍ଷେ ତ୍ୱଦଧୀନାଂ

     ଗତିମାମନନ୍ତି ସନ୍ତଃ ॥ ୧୧.୬॥ ୨୬୬॥

ସ୍ପୃଶତଃ ଶିରସା ପଦେନ ଚ ତ୍ୱାଂ

     ଗତିମୁଦ୍ଦିଶ୍ୟ ମୁକୁନ୍ଦପାଦୁକେ ଦ୍ୱୌ ।

ଅବରୋହତି ପଶ୍ଚିମଃ ପଦାତ୍ ସ୍ୱା-

     ଦଧିରୋହତ୍ୟନଘସ୍ତଦେବ ପୂର୍ୱଃ ॥ ୧୧.୭॥ ୨୬୭॥

ସମୟେଷ୍ୱପଦିଶ୍ୟ ଜୈତ୍ରୟାତ୍ରାଂ ବିବିଧାନ୍ତଃପୁରବାଗୁରାବ୍ୟତୀତଃ ।

ନିୟତଂ ମଣିପାଦୁକେ ଭବତ୍ୟା ରମତେ ବର୍ତ୍ମନି ରଙ୍ଗସାର୍ୱଭୌମଃ ॥ ୧୧.୮॥ ୨୬୮॥

ନିଜସଂହନନପ୍ରସକ୍ତଲାସ୍ୟଂ ଚରତି ତ୍ୱାମଧିରୁହ୍ୟ ରଙ୍ଗନାଥଃ ।

ପଦରକ୍ଷିଣି ପାବନତ୍ୱମାସ୍ତାଂ ରସିକାସ୍ୱାଦମତଃ ପରଂ ନ ବିଦ୍ମଃ ॥ ୧୧.୯॥ ୨୬୯॥

ପଦୟୋରନୟୋଃ ପରସ୍ୟ ପୁଂସ-

     ସ୍ତଦନୁଗ୍ରାହ୍ୟବିହାରପଦ୍ଧତେର୍ୱା ।

ଶିରସୋ ମଣିପାଦୁକେ ଶ୍ରୁତୀନାଂ

     ମନସୋ ବା ମମ ଭୂଷଣଂ ତ୍ୱମେକା ॥ ୧୧.୧୦॥ ୨୭୦॥

କୃପୟା ମଧୁବୈରିପାଦରକ୍ଷେ

     କଠିନେ ଚେତସି ମାମକେ ବିହର୍ତୁମ୍ ।

ମକୁଟେଷୁ ଦିବୌକସାଂ ବିଧତ୍ତେ

     ଭବତୀ ରତ୍ନବିସଂସ୍ଥୁଲେଷୁ ଯୋଗ୍ୟାମ୍ ॥ ୧୧.୧୧॥ ୨୭୧॥

ଚରଣଦ୍ୱୟମର୍ଭକସ୍ୟ ଶୌରେଃ

     ଶରଦମ୍ଭୋରୁହଚାତୁରୀଧୁରୀଣମ୍ ।

ଶକଟାସୁରତାଡନେଽପି ଗୁପ୍ତଂ

     ତବ ଶକ୍ତ୍ୟା କିଲ ପାଦୁକେ ତଦାସୀତ୍ ॥ ୧୧.୧୨॥ ୨୭୨॥

ଉତ୍ତସ୍ଥୁଷୋ ରଙ୍ଗଶୟସ୍ୟ ଶେଷାଦାସ୍ଥାନସିଂହାସନମାରୁରୁକ୍ଷୋଃ ।

ମଧ୍ୟେନିଶାନ୍ତଂ ମଣିପାଦୁକେ ତ୍ୱାଂ ଲୀଲାପଦନ୍ୟାସସଖୀଂ ପ୍ରପଦ୍ୟେ ॥ ୧୧.୧୩॥ ୨୭୩॥

ପ୍ରାପ୍ତାଧିକାରାଃ ପତୟଃ ପ୍ରଜାନାମୁତ୍ତଂସିତାମୁତ୍ତମପାଦୁକେ ତ୍ୱାମ୍ ।

ରଙ୍ଗେଶିତୁଃ ସ୍ୱୈରବିହାରକାଲେ ସଂୟୋଜୟନ୍ତ୍ୟଙ୍ଘ୍ରିସରୋଜୟୁଗ୍ମେ ॥ ୧୧.୧୪॥ ୨୭୪॥

ତ୍ୱୟାଽନୁବଦ୍ଧାଂ ମଣିପାଦରକ୍ଷେ ଲୀଲାଗତିଂ ରଙ୍ଗଶୟସ୍ୟ ପୁଂସଃ ।

ନିଶାମୟନ୍ତୋ ନ ପୁନର୍ଭଜନ୍ତେ ସଂସାରକାନ୍ତାରଗତାଗତାନି ॥ ୧୧.୧୫॥ ୨୭୫॥

ବ୍ୟୂହାନୁପୂର୍ୱୀରୁଚିରାନ୍ ବିହାରାନ୍

     ପଦକ୍ରମେଣ ପ୍ରତିପଦ୍ୟମାନା ।

ବିଭର୍ଷି ନିତ୍ୟଂ ମଣିପାଦୁକେ ତ୍ୱଂ

     ମୁରଦ୍ୱିଷୋ ମୂର୍ତିରିବ ତ୍ରିଲୋକୀମ୍ ॥ ୧୧.୧୬॥ ୨୭୬॥

ପଦେଷୁ ମନ୍ଦେଷୁ ମହତ୍ସ୍ୱପି ତ୍ୱଂ

     ନୀରନ୍ଧ୍ରସଂଶ୍ଲେଷବତୀ ମୁରାରେଃ ।

ପ୍ରତ୍ୟାୟନାର୍ଥଂ କିଲ ପାଦୁକେ ନଃ

     ସ୍ୱାଭାବିକଂ ଦର୍ଶୟସି ପ୍ରଭାବମ୍ ॥ ୧୧.୧୭॥ ୨୭୭॥

କୃପାବିଶେଷାତ୍ କ୍ଷମୟା ସମେତାଂ

     ପ୍ରବର୍ତମାନାଂ ଜଗତୋ ବିଭୂତ୍ୟୈ ।

ଅବୈମି ନିତ୍ୟଂ ମଣିପାଦୁକେ ତ୍ୱା-

     ମାକସ୍ମିକୀଂ ରଙ୍ଗପତେଃ ପ୍ରସତ୍ତିମ୍ ॥ ୧୧.୧୮॥ ୨୭୮॥

ଉପାଗତାନାମୁପତାପଶାନ୍ତ୍ୟୈ

     ସୁଖାବଗାହାଂ ଗତିମୁଦ୍ୱହନ୍ତୀମ୍ ।

ପଶ୍ୟାମି ଶୌରେଃ ପଦବାହିନୀଂ ତ୍ୱାଂ

     ନିମ୍ନେଷୁ ତୁଙ୍ଗେଷୁ ଚ ନିର୍ୱିଶେଷାମ୍ ॥ ୧୧.୧୯॥ ୨୭୯॥

ସହ ପ୍ରୟାତା ସତତଂ ପ୍ରୟାଣେ

     ପ୍ରାପ୍ତାସନେ ସଂଶ୍ରିତପାଦପୀଠା ।

ଅଲଙ୍ଘନୀୟା ସହଜେନ ଭୂମ୍ନା

     ଛାୟେବ ଶୌରେର୍ମଣିପାଦୁକେ ତ୍ୱମ୍ ॥ ୧୧.୨୦॥ ୨୮୦॥

ପଦସ୍ପୃଶା ରଙ୍ଗପତିର୍ଭବତ୍ୟା ବିଚକ୍ରମେ ବିଶ୍ୱମିଦଂ କ୍ଷଣେନ ।

ତଦସ୍ୟ ମନ୍ୟେ ମଣିପାଦରକ୍ଷେ ତ୍ୱୟୈବ ବିଖ୍ୟାତମୁରୁକ୍ରମତ୍ୱମ୍ ॥ ୧୧.୨୧॥ ୨୮୧॥

ସଞ୍ଚାରୟନ୍ତୀ ପଦମନ୍ୱତିଷ୍ଠଃ ସହାୟକୃତ୍ୟଂ ମଣିପାଦରକ୍ଷେ ।

ମାତସ୍ତ୍ୱମେକା ମନୁବଂଶଗୋପ୍ତୁର୍ଗୋପାୟତୋ ଗୌତମଧର୍ମାଦାରାନ୍ ॥ ୧୧.୨୨॥ ୨୮୨॥

ତ୍ୱତ୍ତସ୍ତ୍ରିବିଷ୍ଟପଚରାନସପତ୍ନୟିଷ୍ୟ-

     ନ୍ନାରୁହ୍ୟ ତାର୍କ୍ଷ୍ୟମବରୁହ୍ୟ ଚ ତତ୍କ୍ଷଣେନ ।

ଶୁଦ୍ଧାନ୍ତଭୂମିଷୁ ପୁନର୍ମଣିପାଦରକ୍ଷେ

     ବିଶ୍ରାମ୍ୟତି ତ୍ୱୟି ବିହାରବଶେନ ଶୌରିଃ ॥ ୧୧.୨୩॥ ୨୮୩॥

ବିକ୍ରମ୍ୟ ଭୂମିମଖିଲାଂ ବଲିନା ପ୍ରଦିଷ୍ଟାଂ

     ଦେବେ ପଦାବନି ଦିବଂ ପରିମାତୁକାମେ ।

ଆସୀଦତୋ ଦିନକରସ୍ୟ କରୋପତାପା-

     ତ୍ସଂରକ୍ଷିତୁଂ ପଦସରୋଜମୁପର୍ୟଭୂସ୍ତ୍ୱମ୍ ॥ ୧୧.୨୪॥ ୨୮୪॥

ତ୍ୱତ୍ସଙ୍ଗମାନ୍ନନୁ ସକୃଦ୍ୱିଧିସମ୍ପ୍ରୟୁକ୍ତା

     ଶୁଦ୍ଧିଂ ପରାମଧିଜଗାମ ଶିବତ୍ୱହେତୁମ୍ ।

ରଙ୍ଗାଧିରାଜପଦରକ୍ଷିଣି କୀଦୃଶୀ ସା

     ଗଙ୍ଗା ବଭୂବ ଭବଦୀୟଗତାଗତେନ ॥ ୧୧.୨୫॥ ୨୮୫॥

ବୃଦ୍ଧିଂ ଗବାଂ ଜନୟିତୁଂ ଭଜତା ବିହାରାନ୍

     କୃଷ୍ଣେନ ରଙ୍ଗରସିକେନ କୃତାଶ୍ରୟାୟାଃ ।

ସଞ୍ଚାରତସ୍ତବ ତଦା ମଣିପାଦରକ୍ଷେ

     ବୃନ୍ଦାବନଂ ସପଦି ନନ୍ଦନତୁଲ୍ୟମାସୀତ୍ ॥ ୧୧.୨୬॥ ୨୮୬॥

ମାତସ୍ତ୍ରୟୀମୟତୟା ଚରଣପ୍ରମାଣେ

     ଦ୍ୱେ ବିକ୍ରମେଷୁ ବିବିଧେଷୁ ସହାୟଭୂତେ ।

ନାଥସ୍ୟ ସାଧୁପରିରକ୍ଷଣକର୍ମଣି ତ୍ୱଂ

     ଦୁଷ୍କୃଦ୍ୱିନାଶନଦଶାସୁ ବିହଙ୍ଗରାଜଃ ॥ ୧୧.୨୭॥ ୨୮୭॥

ପାଦାବନି କ୍ୱଚନ ବିକ୍ରମଣେ ଭୁଜାନାଂ

     ପଞ୍ଚାୟୁଧୀ କରରୁହୈର୍ଭଜତେ ବିକଲ୍ପମ୍ ।

ନିତ୍ୟଂ ତ୍ୱମେବ ନିୟତା ପଦୟୋର୍ମୁରାରେ-

     ସ୍ତେନାସି ନୂନମବିକଲ୍ପସମାଧିୟୋଗ୍ୟା ॥ ୧୧.୨୮॥ ୨୮୮॥

ଅକ୍ଷେତ୍ରବିଦ୍ଭିରଧିଗନ୍ତୁମଶକ୍ୟବୃତ୍ତି-

     ର୍ମାତସ୍ତ୍ୱୟା ନିରବଧିର୍ନିଧିରପ୍ରମେୟଃ ।

ରଥ୍ୟାନ୍ତରେଷୁ ଚରଣାବନି ରଙ୍ଗସଙ୍ଗୀ

     ବାତ୍ସଲ୍ୟନିଘ୍ନମନସା ଜନସାତ୍ କୃତୋଽସୌ ॥ ୧୧.୨୯॥ ୨୮୯॥

ସମ୍ପଦ୍ୟତେ ସମୁଚିତଂ କ୍ରମମାଶ୍ରୟନ୍ତ୍ୟା

     ସଦ୍ୱର୍ତ୍ମନା ଭଗବତୋଽପି ଗତିର୍ଭବତ୍ୟା ।

ଈଷ୍ଟେ ପଦାବନି ପୁନଃ କ ଇବେତରେଷାଂ

     ବ୍ୟାବର୍ତନସ୍ୟ ବିଷମାଦପଥପ୍ରଚାରାତ୍ ॥ ୧୧.୩୦॥ ୨୯୦॥

ରଙ୍ଗେଶ୍ୱରେଣ ସହ ଲାସ୍ୟବିଶେଷଭାଜୋ

     ଲୀଲୋଚିତେଷୁ ତବ ରତ୍ନଶିଲାତଲେଷୁ ।

ମଧ୍ୟେ ସ୍ଥିତାନି କତିଚିନ୍ମଣିପାଦରକ୍ଷେ

     ସଭ୍ୟାନ୍ ବିଶେଷମନୁୟୋକ୍ତୁମିତି ପ୍ରତୀମଃ ॥ ୧୧.୩୧॥ ୨୯୧॥

ନିତ୍ୟଂ ପଦାବନି ନିବେଶ୍ୟ ପଦଂ ଭବତ୍ୟାଂ

     ନିଷ୍ପନ୍ଦକଲ୍ପପରିମେୟପରିଚ୍ଛଦାନି ।

ଶୃଙ୍ଗାରଶୀତଲତରାଣି ଭବନ୍ତି କାଲେ

     ରଙ୍ଗେଶ୍ୱରସ୍ୟ ଲଲିତାନି ଗତାଗତାନି ॥ ୧୧.୩୨॥ ୨୯୨॥

ଭୋଗାର୍ଚନାନି କୃତିଭିଃ ପରିକଲ୍ପିତାନି

     ପ୍ରୀତ୍ୟୈବ ରଙ୍ଗନୃପତିଃ ପ୍ରତିପଦ୍ୟମାନଃ ।

ପଶ୍ୟତ୍ସୁ ନିତ୍ୟମିତରେଷୁ ପରିଚ୍ଛଦେଷୁ

     ପ୍ରତ୍ୟାସନଂ ଭଜତି କାଞ୍ଚନପାଦୁକେ ତ୍ୱାମ୍ ॥ ୧୧.୩୩॥ ୨୯୩॥

ଅନ୍ତସ୍ତୃତୀୟନୟନୈଃ ସ୍ୱୟମୁତ୍ତମାଙ୍ଗୈ-

     ରାବିର୍ଭବିଷ୍ୟଦତିରିକ୍ତମୁଖାମ୍ବୁଜୈର୍ୱା ।

ନ୍ୟସ୍ୟନ୍ତି ରଙ୍ଗରସିକସ୍ୟ ବିହାରକାଲେ

     ବାରକ୍ରମେଣ କୃତିନୋ ମଣିପାଦୁକେ ତ୍ୱାମ୍ ॥ ୧୧.୩୪॥ ୨୯୪॥

ରଙ୍ଗେଶ୍ୱରେ ସମଧିରୂଢବିହଙ୍ଗରାଜେ

     ମାତଙ୍ଗରାଜବିଧୃତାଂ ମଣିପାଦୁକେ ତ୍ୱାମ୍ ।

ଅନ୍ୱାସତେ ବିଧୃତଚାରୁସିତାତପତ୍ରାଃ

     ସ୍ୱର୍ଗୌକସଃ ସୁଭଗଚାମରଲୋଲହସ୍ତାଃ ॥ ୧୧.୩୫॥ ୨୯୫॥

ବିଷ୍ଣୋଃ ପଦଂ ଗତିବଶାଦପରିତ୍ୟଜନ୍ତୀଂ

     ଲୋକେଷୁ ନିତ୍ୟବିଷମେଷୁ ସମପ୍ରଚାରାମ୍ ।

ଅନ୍ୱେତୁମର୍ହତି ଧୃତାମଖିଲୈଃ ସୁରେନ୍ଦ୍ରୈ-

     ର୍ଗଙ୍ଗା କଥଂ ନୁ ଗରୁଡଧ୍ୱଜପାଦୁକେ ତ୍ୱାମ୍ ॥ ୧୧.୩୬॥ ୨୯୬॥

ଭିକ୍ଷାମପେକ୍ଷ୍ୟ ଦନୁଜେନ୍ଦ୍ରଗୃହଂ ପ୍ରୟାତୁ-

     ର୍ଗୁପ୍ତ୍ୟୈ ଗବାଂ ବିହରତୋ ବହତଶ୍ଚ ଦୂତ୍ୟମ୍ ।

ତତ୍ତାଦୃଶାନି ଚରଣାବନି ରଙ୍ଗଭର୍ତୁ-

     ସ୍ତ୍ୱତ୍ସଙ୍ଗମେନ ସୁଭଗାନି ବିଚେଷ୍ଟିତାନି ॥ ୧୧.୩୭॥ ୨୯୭॥

ନିର୍ୱ୍ୟଜ୍ୟମାନନବତାଲଲୟପ୍ରଥିମ୍ନା

     ନିର୍ୟନ୍ତ୍ରଣେନ ନିଜସଞ୍ଚରଣକ୍ରମେଣ ।

ମୃଦ୍ନାସି ରଙ୍ଗନୃପତେର୍ମଣିପାଦୁକେ ତ୍ୱଂ

     ଦୁଃଖାତ୍ମକାନ୍ପ୍ରଣମତାଂ ଦୁରିତପ୍ରରୋହାନ୍ ॥ ୧୧.୩୮॥ ୨୯୮॥

ନିତ୍ୟଂ ଯ ଏବ ଜଗତୋ ମଣିପାଦରକ୍ଷେ

     ସତ୍ତାସ୍ଥିତିପ୍ରୟତନେଷୁ ପରଂ ନିଦାନମ୍ ।

ସୋଽପି ସ୍ୱତନ୍ତ୍ରଚରିତସ୍ତ୍ୱଦଧୀନବୃତ୍ତିଃ

     କା ବା କଥା ତଦିତରେଷୁ ମିତମ୍ପଚେଷୁ ॥ ୧୧.୩୯॥ ୨୯୯॥

ନିର୍ୱିଷ୍ଟନାଗଶୟନେନ ପରେଣ ପୁଂସା

     ନ୍ୟସ୍ତେ ପଦେ ତ୍ୱୟି ପଦାବନି ଲୋକହେତୋଃ ।

ସ୍ୱର୍ଗୌକସାଂ ତ୍ୱଦନୁଧାବନତତ୍ପରାଣାଂ

     ସଦ୍ୟଃ ପଦାନି ବିପଦାମପଦଂ ଭବନ୍ତି ॥ ୧୧.୪୦॥ ୩୦୦॥

ଶରଦୁପଗମକାଲେ ସନ୍ତ୍ୟଜନ୍ ଯୋଗନିଦ୍ରାଂ

     ଶରଣମୁପଗତାନାଂ ତ୍ରାଣହେତୋଃ ପ୍ରୟାସ୍ୟନ୍ ।

ଜଲଧିଦୁହିତୁରଙ୍କାନ୍ମନ୍ଦମାଦାୟ ଦେବି

     ତ୍ୱୟି ଖଲୁ ନିଦଧାତି ସ୍ୱଂ ପଦଂ ରଙ୍ଗନାଥଃ ॥ ୧୧.୪୧॥ ୩୦୧॥

ସ୍ପୃଶସି ପଦସରୋଜଂ ପାଦୁକେ ନିର୍ୱିଘାତଂ

     ପ୍ରବିଶସି ଚ ସମସ୍ତାଂ ଦେବି ଶୁଦ୍ଧାନ୍ତକକ୍ଷ୍ୟାମ୍ ।

ଅପରମପି ମୁରାରେଃ ପୂର୍ୱମାଭୀରକନ୍ୟା-

     ସ୍ୱଭିସରଣବିଧୀନାମଗ୍ରିମା ସାକ୍ଷିଣୀ ତ୍ୱମ୍ ॥ ୧୧.୪୨॥ ୩୦୨॥

ପ୍ରତିଭବନମନନ୍ୟେ ପାଦୁକେ ତ୍ୱତ୍ପ୍ରଭାବା-

     ଦ୍ୱିବିଧବପୁଷି ଦେବେ ବିଭ୍ରମଦ୍ୟୂତକାଲେ ।

ଅଭିଲଷିତସପତ୍ନୀଗେହୟାତ୍ରାବିଘାତଂ

     ଗ୍ଲହୟତି ରହସି ତ୍ୱାଂ ଷୋଡଶସ୍ତ୍ରୀସହସ୍ରମ୍ ॥ ୧୧.୪୩॥ ୩୦୩॥

ତଟଭୁବି ଯମୁନାୟାଶ୍ଛନ୍ନବୃତ୍ତେ ମୁକୁନ୍ଦେ

     ମୁହୁରଧିଗମହେତୋର୍ମୁହ୍ୟତାଂ ଯୌବନାନାମ୍ ।

ଶମୟିତୁମଲମାସୀଚ୍ଛଙ୍ଖଚକ୍ରାଦିଚିହ୍ନା

     ପ୍ରତିପଦବିଚିକିତ୍ସାଂ ପାଦୁକେ ପଦ୍ଧତିସ୍ତେ ॥ ୧୧.୪୪॥ ୩୦୪॥

ଅଧିଗତବହୁଶାଖାନ୍ ମଞ୍ଜୁବାଚଃ ଶୁକାଦୀନ୍

     ସରସିଜନିଲୟାୟାଃ ପ୍ରୀତୟେ ସଙ୍ଗ୍ରହୀତୁମ୍ ।

ପ୍ରକଟିତଗୁଣଜାଲଂ ପାଦୁକେ ରଙ୍ଗବନ୍ଧୋ-

     ରୁପନିଷଦଟବୀଷୁ କ୍ରୀଡିତଂ ତ୍ୱତ୍ସନାଥମ୍ ॥ ୧୧.୪୫॥ ୩୦୫॥

ମୁନିପରିଷଦି ଗୀତଂ ଗୌତମୀରକ୍ଷଣଂ ତେ

     ମୁହୁରନୁକଲୟନ୍ତୋ ମଞ୍ଜୁବାଚଃ ଶକୁନ୍ତାଃ ।

ଉଷସି ନିଜକୁଲାୟାଦୁତ୍ଥିତା ଦଣ୍ଡକେଷୁ

     ସ୍ୱୟମପି ପଦରକ୍ଷେ ସ୍ୱୈରମାମ୍ରେଡୟନ୍ତି ॥ ୧୧.୪୬॥ ୩୦୬॥

ଯମନିୟମବିଶୁଦ୍ଧୈର୍ୟନ୍ନ ପଶ୍ୟନ୍ତି ଚିତ୍ତୈଃ

     ଶ୍ରୁତିଷୁ ଚୁଲୁକମାତ୍ରଂ ଦୃଶ୍ୟତେ ଯସ୍ୟ ଭୂମା ।

ସୁଲଭନିଖିଲଭାବଂ ମାଂସଦୃଷ୍ଟେର୍ଜନସ୍ୟ

     ସ୍ୱୟମୁପହରସି ତ୍ୱଂ ପାଦୁକେ ତଂ ପୁମାଂସମ୍ ॥ ୧୧.୪୭॥ ୩୦୭॥

ନିଧିମିବ ନିରପାୟଂ ତ୍ୱାମନାଦୃତ୍ୟ ମୋହା-

     ଦହମିବ ମମ ଦୋଷଂ ଭାବୟନ୍ କ୍ଷୁଦ୍ରମର୍ଥମ୍ ।

ମୟି ସତି କରୁଣାୟାଃ ପୂର୍ଣପାତ୍ରେ ତ୍ୱୟା କିଂ

     ପରମୁପଗମନୀୟଃ ପାଦୁକେ ରଙ୍ଗନାଥ ॥ ୧୧.୪୮॥ ୩୦୮॥

କମପି କନକସିନ୍ଧୋଃ ସୈକତେ ସଞ୍ଚରନ୍ତଂ

     କଲଶଜଲଧିକନ୍ୟାମେଦିନୀଦତ୍ତହସ୍ତମ୍ ।

ଅନିଶମନୁଭବେୟଂ ପାଦୁକେ ତ୍ୱୟ୍ୟଧୀନଂ

     ସୁଚରିତପରିପାକଂ ସୂରିଭିଃ ସେବନୀୟମ୍ ॥ ୧୧.୪୯॥ ୩୦୯॥

ପରିସରମୁପୟାତା ପାଦୁକେ ପଶ୍ୟ ମାତଃ

     କରଣବିଲୟଖେଦାତ୍ କାନ୍ଦିଶୀକେ ବିବେକେ ।

ପୁରୁଷମୁପନୟନ୍ତୀ ପୁଣ୍ଡରୀକାକ୍ଷମଗ୍ରେ

     ପୁନରୁଦରନିବାସକ୍ଲେଶବିଚ୍ଛେଦନଂ ନଃ ॥ ୧୧.୫୦॥ ୩୧୦॥

ସା ମେ ଭୂୟାତ୍ ସପଦି ଭବତୀ ପାଦୁକେ ତାପଶାନ୍ତ୍ୟୈ

     ଯାମାରୂଢୋ ଦିବମିବ ଶୁଭୈଃ ସେବ୍ୟମାନୋ ମରୁଦ୍ଭିଃ ।

ସୌଦାମିନ୍ୟା ସହ କମଲୟା ସହ୍ୟଜାବୃଦ୍ଧିହେତୁଃ

     କାଲେ କାଲେ ଚରତି କରୁଣାବର୍ଷୁକଃ କୃଷ୍ଣମେଘଃ ॥ ୧୧.୫୧॥ ୩୧୧॥

ସତ୍ୟାଲ୍ଲୋକାତ୍ ସକଲମହିତାତ୍ ସ୍ଥାନତୋ ବା ରଘୂଣାଂ

     ଶଙ୍କେ ମାତଃ ସମଧିକଗୁଣଂ ସୈକତଂ ସହ୍ୟଜାୟାଃ ।

ପୂର୍ୱଂ ପୂର୍ୱଂ ଚିରପରିଚିତଂ ପାଦୁକେ ଯତ୍ ତ୍ୟଜନ୍ତ୍ୟା

     ନୀତୋ ନାଥସ୍ତଦିଦମିତରନ୍ନୀୟତେ ନ ତ୍ୱୟାଽସୌ ॥ ୧୧.୫୨॥ ୩୧୨॥

ଅଗ୍ରେ ଦେବି ତ୍ୱୟି ସୁମନସାମଗ୍ରିମୈରନ୍ତରଙ୍ଗୈ-

     ର୍ୱିନ୍ୟସ୍ତାୟାଂ ବିନୟଗରିମାବର୍ଜିତାଦୁତ୍ତମାଙ୍ଗାତ୍ ।

ଦତ୍ତେ ପାଦଂ ଦରମୁକୁଲିତଂ ତ୍ୱତ୍ପ୍ରଭାବାତିଶଙ୍କୀ

     ଦେବଃ ଶ୍ରୀମାନ୍ ଦନୁଜମଥନୋ ଜୈତ୍ରୟାତ୍ରାସ୍ୱନନ୍ୟଃ ॥ ୧୧.୫୩॥ ୩୧୩॥

ପୌରୋଦନ୍ତାନ୍ପରିକଲୟିତୁଂ ପାଦୁକେ ସଞ୍ଚରିଷ୍ଣୋ-

     ର୍ୱ୍ୟକ୍ତାବ୍ୟକ୍ତା ବଶିକବିଶିଖାବର୍ତିନୀ ରଙ୍ଗଭର୍ତୁଃ ।

ବେଲାତୀତଶ୍ରୁତିପରିମଲୈର୍ୱ୍ୟକ୍ତିମଭ୍ୟେତି କାଲ୍ୟେ

     ବିନ୍ୟାସସ୍ତେ ବିବୁଧପରିଷନ୍ମୌଲିବିନ୍ୟାସଦୃଶ୍ୟୈଃ ॥ ୧୧.୫୪॥ ୩୧୪॥

ଆସଂସ୍କାରାଦ୍ ଦ୍ୱିଜପରିଷଦା ନିତ୍ୟମଭ୍ୟସ୍ୟମାନା

     ଶ୍ରେୟୋହେତୁଃ ଶିରସି ଜଗତଃ ସ୍ଥାୟିନୀ ସ୍ୱେନ ଭୂମ୍ନା ।

ରଙ୍ଗାଧୀଶେ ସ୍ୱୟମୁଦୟିନି କ୍ଷେପ୍ତୁମନ୍ଧଂ ତମିସ୍ରଂ

     ଗାୟତ୍ରୀବ ତ୍ରିଚତୁରପଦା ଗଣ୍ୟସେ ପାଦୁକେ ତ୍ୱମ୍ ॥ ୧୧.୫୫॥ ୩୧୫॥

ଭବତୀଂ ପରସ୍ୟ ପୁରୁଷସ୍ୟ ରଙ୍ଗିଣୋ

     ମହିମାନମେବ ମଣିପାଦୁ ମନ୍ମହେ ।

କଥମନ୍ୟଥା ସ୍ୱମହିମପ୍ରତିଷ୍ଠିତଃ

     ପ୍ରତିତିଷ୍ଠତି ତ୍ୱୟି ପଦାତ୍ପଦଂ ପ୍ରଭୁଃ ॥ ୧୧.୫୬॥ ୩୧୬॥

ତିଥିରଷ୍ଟମୀ ଯଦବତାରବୈଭବା-

     ତ୍ପ୍ରଥମା ତିଥିସ୍ତ୍ରିଜଗତାମଜାୟତ ।

ମଣିପାଦୁକେ ତମୁପନୀୟ ବୀଥିକା-

     ସ୍ୱତିଥୀକରୋଷି ତଦନନ୍ୟଚକ୍ଷୁଷାମ୍ ॥ ୧୧.୫୭॥ ୩୧୭॥

ଅପାରପ୍ରଖ୍ୟାତେରଶରଣଶରଣ୍ୟତ୍ୱୟଶସା

     ନନୁ ତ୍ୱଂ ରଙ୍ଗେନ୍ଦୋଶ୍ଚରଣକମଲସ୍ୟାପି ଶରଣମ୍ ।

ଯୟା ଲଭ୍ୟଃ ପଙ୍ଗୁପ୍ରଭୃତିଭିରସୌ ରଙ୍ଗନଗର-

     ପ୍ରତୋଲୀପର୍ୟନ୍ତେ ନିଧିରନଘବାଚାଂ ନିରବଧିଃ ॥ ୧୧.୫୮॥ ୩୧୮॥

ତତ୍ତଦ୍ୱାସଗୃହାଙ୍ଗଣପ୍ରଣୟିନଃ ଶ୍ରୀରଙ୍ଗଶୃଙ୍ଗାରିଣୋ

     ବାଲ୍ଲଭ୍ୟାଦବିଭକ୍ତମନ୍ଥରଗତିସ୍ତ୍ୱଂ ମେ ଗତିଃ ପାଦୁକେ ।

ଲୀଲାପଙ୍କଜହଲ୍ଲକୋତ୍ପଲଗଲନ୍ମାଧ୍ୱୀକସେକୋତ୍ଥିତା

     ଯତ୍ରାମୋଦବିକଲ୍ପନା ବିବୃଣୁତେ ଶୁଦ୍ଧାନ୍ତବାରକ୍ରମମ୍ ॥ ୧୧.୫୯॥ ୩୧୯॥

ସମ୍ଭବତୁ ପାଦରକ୍ଷେ ସତ୍ୟସୁପର୍ଣାଦିରୌପବାହ୍ୟଗଣଃ ।

ଯାତ୍ରାସୁ ରଙ୍ଗଭର୍ତୁଃ ପ୍ରଥମପରିସ୍ପନ୍ଦକାରଣଂ ଭବତୀ ॥ ୧୧.୬୦॥ ୩୨୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ସଞ୍ଚାରପଦ୍ଧତିରେକାଦଶୀ ॥

୧୨. ପୁଷ୍ପପଦ୍ଧତିଃ (୩୦)

ଶୌରେଃ ସଞ୍ଚାରକାଲେଷୁ ପୁଷ୍ପବୃଷ୍ଟିର୍ଦିବଶ୍ଚ୍ୟୁତା ।

ପର୍ୟବସ୍ୟତି ଯତ୍ରୈବ ପ୍ରପଦ୍ୟେ ତାଂ ପଦାବନୀମ୍ ॥ ୧୨.୧॥ ୩୨୧॥

ଦୈବତଂ ମମ ଜଗତ୍ତ୍ରୟାର୍ଚିତା ଦିବ୍ୟଦମ୍ପତିବିହାରପାଦୁକା ।

ପାଣିପାଦକମଲାର୍ପଣାତ୍ ତୟୋର୍ୟା ଭଜତ୍ୟନୁଦିନଂ ସଭାଜନମ୍ ॥ ୧୨.୨॥ ୩୨୨॥

ତବ ରଙ୍ଗରାଜମଣିପାଦୁ ତତୋ ବିହିତାର୍ହଣଃ ସୁରସରିତ୍ପୟସା ।

ଅବତଂସଚନ୍ଦ୍ରକଲୟା ଗିରିଶୋ ନବକେତକୀଦଲମିବାର୍ଚୟତି ॥ ୧୨.୩॥ ୩୨୩॥

କୁସୁମେଷୁ ସମର୍ପିତେଷୁ ଭକ୍ତୈ-

     ସ୍ତ୍ୱୟି ରଙ୍ଗେଶପଦାବନି ପ୍ରତୀମଃ ।

ଶଠକୋପମୁନେସ୍ତ୍ୱଦେକନାମ୍ନଃ

     ସୁଭଗଂ ଯତ୍ ସୁରଭିତ୍ୱମସ୍ୟ ନିତ୍ୟମ୍ ॥ ୧୨.୪॥ ୩୨୪॥

ପଦେ ପରସ୍ମିନ୍ ଭୁବନେ ବିଧାତୁଃ

     ପୁଣ୍ୟୈଃ ପ୍ରସୂନୈଃ ପୁଲିନେ ସରୟ୍ୱାଃ ।

ମଧ୍ୟେ ଚ ପାଦାବନି ସହ୍ୟସିନ୍ଧୋ-

     ରାସୀଚ୍ଚତୁଃସ୍ଥାନମିବାର୍ଚନଂ ତେ ॥ ୧୨.୫॥ ୩୨୫॥

ତବୈବ ରଙ୍ଗେଶ୍ୱରପାଦରକ୍ଷେ ସୌଭାଗ୍ୟମବ୍ୟାହତମାପ୍ତୁକାମାଃ ।

ସୁରଦ୍ରୁମାଣାଂ ପ୍ରସବୈଃ ସୁଜାତୈରଭ୍ୟର୍ଚୟନ୍ତ୍ୟପ୍ସରସୋ ମୁହୁସ୍ତ୍ୱାମ୍ ॥ ୧୨.୬॥ ୩୨୬॥

ନିବେଶିତାଂ ରଙ୍ଗପତେଃ ପଦାବ୍ଜେ ମନ୍ୟେ ସପର୍ୟାଂ ମଣିପାଦରକ୍ଷେ ।

ତ୍ୱଦର୍ପଣାଦାପତିତାମପଶ୍ୟଦ୍ ଗାଣ୍ଡୀବଧନ୍ୱା ଗିରିଶୋତ୍ତମାଙ୍ଗେ ॥ ୧୨.୭॥ ୩୨୭॥

ପତ୍ରାଣି ରଙ୍ଗନୃପତେର୍ମନିପାଦରକ୍ଷେ

     ଦ୍ୱିତ୍ରାଣ୍ୟପି ତ୍ୱୟି ସମର୍ପ୍ୟ ବିଭୂତିକାମାଃ ।

ପର୍ୟାୟଲବ୍ଧପୁରୁହୂତପଦାଃ ଶଚୀନାଂ

     ପତ୍ରାଙ୍କୁରାଣି ବିଲିଖନ୍ତି ପୟୋଧରେଷୁ ॥ ୧୨.୮॥ ୩୨୮॥

ନିର୍ୱର୍ତୟନ୍ତି ତବ ଯେ ନିଚିତାନି ପୁଷ୍ପୈ-

     ର୍ୱୈହାରିକାଣ୍ୟୁପବନାନି ବସୁନ୍ଧରାୟାମ୍ ।

କାଲେନ ତେ କମଲଲୋଚନପାଦରକ୍ଷେ

     କ୍ରୀଡନ୍ତି ନନ୍ଦନବନେ କୃତିନଃ ପୁମାଂସଃ ॥ ୧୨.୯॥ ୩୨୯॥

ଅର୍ଚନ୍ତି ଯେ ମୁରଭିଦୋ ମଣିପାଦରକ୍ଷେ

     ଭାବାତ୍ମକୈରପି ପରଂ ଭବତୀଂ ପ୍ରସୂନୈଃ ।

ମନ୍ଦାରଦାମସୁଭଗୈର୍ମୁକୁଟୈରଜସ୍ରଂ

     ବୃନ୍ଦାରକାଃ ସୁରଭୟନ୍ତି ପଦଂ ତଦୀୟମ୍ ॥ ୧୨.୧୦॥ ୩୩୦॥

ଅସ୍ପୃଷ୍ଟଦୋଷପରିମର୍ଷମଲଙ୍ଘ୍ୟମନ୍ୟୈ-

     ର୍ହସ୍ତାପଚେୟମଖିଲଂ ପୁରୁଷାର୍ଥବର୍ଗମ୍ ।

ଚିତ୍ରଂ ଜନାର୍ଦନପଦାବନି ସାଧକାନାଂ

     ତ୍ୱୟ୍ୟର୍ପିତାଃ ସୁମନସଃ ସହସା ଫଲନ୍ତି ॥ ୧୨.୧୧॥ ୩୩୧॥

ବନ୍ଦାରୁଭିଃ ସୁରଗଣୈସ୍ତ୍ୱୟି ସମ୍ପ୍ରୟୁକ୍ତା

     ମାଲା ବିଭାତି ମଧୁସୂଦନପାଦରକ୍ଷେ ।

ବିକ୍ରାନ୍ତବିଷ୍ଣୁପଦସଂଶ୍ରୟବଦ୍ଧସଖ୍ୟା

     ଭାଗୀରଥୀବ ପରିରମ୍ଭଣକାଙ୍କ୍ଷିଣୀ ତେ ॥ ୧୨.୧୨॥ ୩୩୨॥

ଯେ ନାମ ରଙ୍ଗନୃପତେର୍ମଣିପାଦୁକେ ତ୍ୱା-

     ମଭ୍ୟର୍ଚୟନ୍ତି କମଲୈରଧିକର୍ତୁକାମାଃ ।

ଆରୋପୟତ୍ୟବହିତା ନିୟତିଃ କ୍ରମାତ୍ ତାନ୍

     କଲ୍ପାନ୍ତରୀୟକମଲାସନପତ୍ରିକାସୁ ॥ ୧୨.୧୩॥ ୩୩୩॥

ତ୍ୱୟ୍ୟର୍ପିତାନି ମନୁଜୈର୍ମଣିପାଦରକ୍ଷେ

     ଦୂର୍ୱାଙ୍କୁରାଣି ସୁଲଭାନ୍ୟଥବା ତୁଲସ୍ୟଃ ।

ସାରାଧିକାଃ ସପଦି ରଙ୍ଗନରେନ୍ଦ୍ରଶକ୍ତ୍ୟା

     ସଂସାରନାଗଦମନୌଷଧୟୋ ଭବନ୍ତି ॥ ୧୨.୧୪॥ ୩୩୪॥

ଆରାଧ୍ୟ ନୂନମସୁରାର୍ଦନପାଦୁକେ ତ୍ୱା-

     ମାମୁଷ୍ମିକାୟ ବିଭବାୟ ସହସ୍ରପତ୍ରୈଃ ।

ମନ୍ୱନ୍ତରେଷୁ ପରିବର୍ତିଷୁ ଦେବି ମର୍ତ୍ୟାଃ

     ପର୍ୟାୟତଃ ପରିଣମନ୍ତି ସହସ୍ରନେତ୍ରାଃ ॥ ୧୨.୧୫॥ ୩୩୫॥

ଧନ୍ୟୈସ୍ତ୍ୱୟି ତ୍ରିଦଶରକ୍ଷକପାଦରକ୍ଷେ

     ପୁଷ୍ପାଣି କାଞ୍ଚନମୟାନି ସମର୍ପିତାନି ।

ବିସ୍ରଂସିନା ବିନମତୋ ଗିରିଶୋତ୍ତମାଙ୍ଗା-

     ଦାରଗ୍ୱଧେନ ମିଲିତାନ୍ୟପୃଥଗ୍ଭବନ୍ତି ॥ ୧୨.୧୬॥ ୩୩୬॥

ବିଶ୍ୱୋପସର୍ଗଶମନଂ ତ୍ୱୟି ମନ୍ୟମାନୈ-

     ର୍ୱୈମାନିକୈଃ ପ୍ରଣିହିତଂ ମଣିପାଦରକ୍ଷେ ।

ପଦ୍ମାସହାୟପଦପଦ୍ମନଖାର୍ଚିଷସ୍ତେ

     ପୁଷ୍ପୋପହାରବିଭବଂ ପୁନରୁକ୍ତୟନ୍ତି ॥ ୧୨.୧୭॥ ୩୩୭॥

ନାକୌକସାଂ ଶମୟିତୁଂ ପରିପନ୍ଥିବର୍ଗାନ୍

     ନାଥେ ପଦଂ ତ୍ୱୟି ନିବେଶୟିତୁଂ ପ୍ରବୃତ୍ତେ ।

ତ୍ୱତ୍ସଂଶ୍ରିତାଂ ବିଜହତସ୍ତୁଲସୀଂ ବମନ୍ତି

     ପ୍ରସ୍ଥାନକାହଲରବାନ୍ପ୍ରଥମଂ ଦ୍ୱିରେଫାଃ ॥ ୧୨.୧୮॥ ୩୩୮॥

ରଙ୍ଗେଶପାଦପରିଭୋଗସୁଜାତଗନ୍ଧାଂ

     ସମ୍ପ୍ରାପ୍ୟ ଦେବି ଭବତୀଂ ସହ ଦିବ୍ୟପୁଷ୍ପୈଃ ।

ନିତ୍ୟୋପଦର୍ଶିତରସଂ ନ କିଲାଦ୍ରିୟନ୍ତେ

     ନାଭୀସରୋଜମପି ନନ୍ଦନଚଞ୍ଚରୀକାଃ ॥ ୧୨.୧୯॥ ୩୩୯॥

ପ୍ରାଗେବ କାଞ୍ଚନପଦାବନି ପୁଷ୍ପବର୍ଷା-

     ତ୍ସମ୍ବର୍ତିତେ ଶମିତଦୈତ୍ୟଭୟୈଃ ସୁରେନ୍ଦ୍ରୈଃ ।

ପଦ୍ମେକ୍ଷଣସ୍ୟ ପଦପଦ୍ମନିବେଶଲାଭେ

     ପୁଷ୍ପାଭିଷେକମୁଚିତଂ ପ୍ରତିପଦ୍ୟସେ ତ୍ୱମ୍ ॥ ୧୨.୨୦॥ ୩୪୦॥

ଦିଶିଦିଶି ମୁନିପତ୍ନ୍ୟୋ ଦଣ୍ଡକାରଣ୍ୟଭାଗେ

     ନ ଜହତି ବହୁମାନାନ୍ନୂନମଦ୍ୟାପି ମୂଲମ୍ ।

ରଘୁପତିପଦରକ୍ଷେ ତ୍ୱତ୍ପରିଷ୍କାରହେତୋ-

     ରପଚିତକୁସୁମାନାମାଶ୍ରମାନୋକହାନାମ୍ ॥ ୧୨.୨୧॥ ୩୪୧॥

ଘଟୟସି ପରିପୂର୍ଣାନ୍ କୃଷ୍ଣମେଘପ୍ରଚାରେ

     କୃତିଭିରୁପହୃତୈସ୍ତ୍ୱଂ କେତକୀଗର୍ଭପତ୍ରୈଃ ।

ବରତନୁପରିଣାମାଦ୍ୱାମତଃ ଶ୍ୟାମଲାନାଂ

     ପ୍ରଣତିସମୟଲଗ୍ନାନ୍ପାଦୁକେ ମୌଲିଚନ୍ଦ୍ରାନ୍ ॥ ୧୨.୨୨॥ ୩୪୨॥

ପରିଚରଣନିୟୁକ୍ତୈଃ ପାଦୁକେ ରଙ୍ଗଭର୍ତୁଃ

     ପବନତନୟମୁଖ୍ୟୈରର୍ପିତାଂ ତ୍ୱତ୍ସମୀପେ ।

ବିନତବିଧିମୁଖେଭ୍ୟୋ ନିର୍ୱିଶେଷାଂ ଦ୍ୱିରେଫାଃ

     କଥମପି ବିଭଜନ୍ତେ କାଞ୍ଚନୀଂ ପଦ୍ମପଙ୍କ୍ତିମ୍ ॥ ୧୨.୨୩॥ ୩୪୩॥

ବିଧିଶିବପୁରୁହୂତସ୍ପର୍ଶିତୈର୍ଦିବ୍ୟପୁଷ୍ପୈ-

     ସ୍ତ୍ୱୟି ସହ ନିପତନ୍ତସ୍ତତ୍ତଦୁଦ୍ୟାନଭୃଙ୍ଗାଃ ।

ମଧୁରିପୁପଦରକ୍ଷେ ମଞ୍ଜୁଭିଃ ସ୍ୱୈର୍ନିନାଦୈ-

     ରବିଦିତପରମାର୍ଥାନ୍ ନୂନମଧ୍ୟାପୟନ୍ତି ॥ ୧୨.୨୪॥ ୩୪୪॥

ପ୍ରଶମୟତି ଜନାନାଂ ସଞ୍ଜ୍ୱରଂ ରଙ୍ଗଭର୍ତୁଃ

     ପରିସରଚଲିତାନାଂ ପାଦୁକେ ଚାମରାଣାମ୍ ।

ଅନୁଦିନମୁପୟାତୈରୁତ୍ଥିତଂ ଦିବ୍ୟପୁଷ୍ପୈ-

     ର୍ନିଗମପରିମଲଂ ତେ ନିର୍ୱିଶନ୍ ଗନ୍ଧବାହଃ ॥ ୧୨.୨୫॥ ୩୪୫॥

ଅଖିଲଭୁବନରକ୍ଷାନାଟିକାଂ ଦର୍ଶୟିଷ୍ୟ-

     ନ୍ନନିମିଷତରୁପୁଷ୍ପୈରର୍ଚିତେ ରଙ୍ଗମଧ୍ୟେ ।

ଅଭିନୟମନୁରୂପଂ ଶିକ୍ଷୟତ୍ୟାତ୍ମନା ତ୍ୱାଂ

     ପ୍ରଥମବିହିତଲାସ୍ୟଃ ପାଦୁକେ ରଙ୍ଗନାଥଃ ॥ ୧୨.୨୬॥ ୩୪୬॥

ଅଗଲିତନିଜରାଗାଂ ଦେବି ବିଷ୍ଣୋଃ ପଦଂ ତ-

     ତ୍ତ୍ରିଭୁବନମହନୀୟାଂ ପ୍ରାପ୍ୟ ସନ୍ଧ୍ୟାମିବ ତ୍ୱାମ୍ ।

ଭବତି ବିବୁଧମୁକ୍ତୈଃ ସ୍ପଷ୍ଟତାରାନୁଷଙ୍ଗଂ

     ପରିସରପତିତୈସ୍ତେ ପାରିଜାତପ୍ରସୂନୈଃ ॥ ୧୨.୨୭॥ ୩୪୭॥

ବ୍ୟଞ୍ଜନ୍ତ୍ୟେତେ ବିଭବମନଘଂ ରଞ୍ଜୟନ୍ତଃ ଶ୍ରୁତୀର୍ନଃ

     ପ୍ରାଧ୍ୱଂ ରଙ୍ଗକ୍ଷିତିପତିପଦଂ ପାଦୁକେ ଧାରୟନ୍ତ୍ୟାଃ ।

ନାଦୈରନ୍ତର୍ନିହିତନିଗମୈର୍ନନ୍ଦନୋଦ୍ୟାନଭୃଙ୍ଗା

     ଦିବ୍ୟୈଃ ପୁଷ୍ପୈଃ ସ୍ନପିତବପୁଷୋ ଦେବି ସୌସ୍ନାତିକାସ୍ତେ ॥ ୧୨.୨୮॥ ୩୪୮॥

କିଂ ପୁଷ୍ପୈସ୍ତୁଲସୀଦଲୈରପି କୃତଂ ଦୂର୍ୱାଽପି ଦୂରେ ସ୍ଥିତା

     ତ୍ୱତ୍ପୂଜାସୁ ମୁକୁନ୍ଦପାଦୁ କୃପୟା ତ୍ୱଂ କାମଧେନୁଃ ସତାମ୍ ।

ପ୍ରତ୍ୟଗ୍ରାହୃତଦର୍ଭପଲ୍ଲବଲବଗ୍ରାସାଭିଲାଷୋନ୍ମୁଖୀ

     ଧେନୁସ୍ତିଷ୍ଠତୁ ସା ବସିଷ୍ଠଭବନଦ୍ୱାରୋପକଣ୍ଠସ୍ଥଲେ ॥ ୧୨.୨୯॥ ୩୪୯॥

ଚୂଡାରଗ୍ୱଧରଜସା ଚୂର୍ଣସ୍ନପନଂ ବିଧାୟ ତେ ପୂର୍ୱମ୍ ।

ରଙ୍ଗେଶପାଦୁକେ ତ୍ୱାମଭିଷିଞ୍ଚତି ମୌଲିଗଙ୍ଗୟା ଶମ୍ଭୁଃ ॥ ୧୨.୩୦॥ ୩୫୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ପୁଷ୍ପପଦ୍ଧତିର୍ଦ୍ୱାଦଶୀ ॥

୧୩. ପରାଗପଦ୍ଧତିଃ (୩୦)

ପାନ୍ତୁ ବଃ ପଦ୍ମନାଭସ୍ୟ ପାଦୁକାକେଲିପାଂସବଃ ।

ଅହଲ୍ୟାଦେହନିର୍ମାଣପର୍ୟାୟପରମାଣବଃ ॥ ୧୩.୧॥ ୩୫୧॥

ତବ ସଞ୍ଚରଣାଦ୍ରଜୋ ବିଧୂତଂ ଯଦିଦଂ ରଙ୍ଗନରେନ୍ଦ୍ରପାଦରକ୍ଷେ ।

ଅଲମେତଦନାବିଲାନି କର୍ତୁଂ କତକକ୍ଷୋଦ ଇବାଶୁ ମାନସାନି ॥ ୧୩.୨॥ ୩୫୨॥

ପୁନରୁକ୍ତପିତାମହାନୁଭାବାଃ ପୁରୁଷାଃ କେଚିଦମୀ ପୁନନ୍ତି ବିଶ୍ୱମ୍ ।

ମଧୁବୈରିପଦାରବିନ୍ଦବନ୍ଧୋରପରାଗାସ୍ତବ ପାଦୁକେ ପରାଗୈଃ ॥ ୧୩.୩॥ ୩୫୩॥

ଅଭିୟୁକ୍ତଜନୋ ନିଜାର୍ଭକାଣାଂ ବହୁଶୋ ରଙ୍ଗନରେନ୍ଦ୍ରପାଦରକ୍ଷେ ।

ଅବଲେପପିଶାଚମୋଚନାର୍ଥଂ ରଜସା ଲିମ୍ପତି ତାବକେନ ଦେହାନ୍ ॥ ୧୩.୪॥ ୩୫୪॥

ଶିରସା ପରିଗୃହ୍ୟ ଲୋକପାଲାସ୍ତବ ରଙ୍ଗେଶ୍ୱରପାଦୁକେ ରଜାଂସି ।

ବିଷମେଷୁ ବଲେଷୁ ଦାନବାନାଂ ବ୍ୟପନୀତାନ୍ୟଶିରସ୍ତ୍ରମାବିଶନ୍ତି ॥ ୧୩.୫॥ ୩୫୫॥

କୃତିନଃ ଶିରସା ସମୁଦ୍ୱହନ୍ତଃ କତିଚିତ୍ କେଶବପାଦୁକେ ରଜସ୍ତେ ।

ରଜସରତମସୋଽପି ଦୂରଭୂତଂ ପରିପଶ୍ୟନ୍ତି ବିଶୁଦ୍ଧମେବ ସତ୍ୱମ୍ ॥ ୧୩.୬॥ ୩୫୬॥

ଅଧିକଂ ପଦମାଶ୍ରିତୋଽପି ବେଧାଃ ପ୍ରୟତୋ ରଙ୍ଗଧୁରୀଣପାଦରକ୍ଷେ ।

ଅଭିବାଞ୍ଛତି ସଙ୍ଗମଂ ପରାଗୈରଭିଜାତୈସ୍ତବ ଦେବି ନାଭିଜାତଃ ॥ ୧୩.୭॥ ୩୫୭॥

ଶୁଦ୍ଧସତ୍ତ୍ୱବପୁଷୈବ ଭବତ୍ୟା ପାଦୁକେ ବିରଜସୌ ହରିପାଦୌ ।

ଅସ୍ତୁ କିଂ ପୁନରିଦଂ ରଜସା ତେ ଶୁଦ୍ଧସତ୍ତ୍ୱମୟତା ମନୁଜାନାମ୍ ॥ ୧୩.୮॥ ୩୫୮॥

ତଦ୍ରଜସ୍ତବ ତନୋତି ପାଦୁକେ

     ମାନସାନ୍ୟକଠିନାନି ଦେହିନାମ୍ ।

ପ୍ରସ୍ତରସ୍ୟ ପଦବୀଗତସ୍ୟ ଯ-

     ଦ୍ୱ୍ୟାଚକାର ମୁନିଧର୍ମଦାରତାମ୍ ॥ ୧୩.୯॥ ୩୫୯॥

ରଙ୍ଗେଶୟସ୍ୟ ପୁରୁଷସ୍ୟ ଜଗଦ୍ୱିଭୂତ୍ୟୈ

     ରଥ୍ୟାପରିକ୍ରମବିଧୌ ମନିପାଦରକ୍ଷେ ।

ସୀମନ୍ତଦେଶମନବଦ୍ୟସରସ୍ୱତୀନାଂ

     ସିନ୍ଦୂରୟନ୍ତି ଭବତୀଚରିତାଃ ପରାଗାଃ ॥ ୧୩.୧୦॥ ୩୬୦॥

ମାନ୍ୟେନ ରଙ୍ଗନୃପତେର୍ମଣିପାଦରକ୍ଷେ

     ଚୂଡାପଦାନି ରଜସା ତବ ଭୂଷୟନ୍ତଃ ।

କାଲକ୍ରମେଣ ଭଜତାଂ କମଲାସନତ୍ୱଂ

     ନାଭୀସରୋଜରଜସାଂ ନିବସନ୍ତି ମଧ୍ୟେ ॥ ୧୩.୧୧॥ ୩୬୧॥

ମାତର୍ମୁକୁନ୍ଦଚରଣାବନି ତାବକୀନା-

     ଶ୍ଚିନ୍ତାବଶୀକରଣଚୂର୍ଣବିଶେଷକଲ୍ପାଃ ।

ସଞ୍ଚାରପାଂସୁକଣିକାଃ ଶିରସା ବହନ୍ତୋ

     ବିଶ୍ୱଂ ପୁନନ୍ତି ପଦପଦ୍ମପରାଗଲେଶୈଃ ॥ ୧୩.୧୨॥ ୩୬୨॥

ଆୟୋଜିତାନ୍ୟମଲଧୀଭିରନନ୍ୟଲଭ୍ୟେ

     ପାଦାବନି ଶ୍ରୁତିବଧୂପଟବାସକୃତ୍ୟେ ।

ତ୍ୱତ୍ସଞ୍ଚରପ୍ରଚଲିତାନି ରଜାଂସି ଶୌରେଃ

     ପ୍ରଖ୍ୟାପୟନ୍ତି ପଦପଦ୍ମପରାଗଶୋଭାମ୍ ॥ ୧୩.୧୩॥ ୩୬୩॥

ମୂର୍ଧାନମମ୍ବ ମୁରଭିନ୍ମଣିପାଦରକ୍ଷେ

     ଯେଷାଂ କଦାଽପି ରଜସା ଭବତୀ ପୁନାତି ।

ତ୍ୱାମେବ ତେ ସୁକୃତିନଃ ସ୍ନପୟନ୍ତି କାଲେ

     ମନ୍ଦାରଦାମରଜସା ମକୁଟଚ୍ୟୁତେନ ॥ ୧୩.୧୪॥ ୩୬୪॥

ରଥ୍ୟାବିହାର ରଜସା ପରିଧୂସରାଙ୍ଗୀଂ

     ରଙ୍ଗେଶ୍ୱରସ୍ୟ ଲଲିତେଷୁ ମହୋତ୍ସବେଷୁ ।

ପ୍ରସ୍ଫୋଟୟତ୍ୟବନତୋ ମଣିପାଦୁକେ ତ୍ୱାଂ

     ଗୌରୀପତିଃ ସ୍ୱୟମିଭାଜିନପଲ୍ଲବେନ ॥ ୧୩.୧୫॥ ୩୬୫॥

ନେଦୀୟସାଂ ନିଜପରାଗନିବେଶପୂର୍ୱଂ

     ସ୍ପୃଷ୍ଟ୍ୱା ଶିରାଂସି ଭବତୀ ଭବରୋଗଭାଜାମ୍ ।

ଗାଢଂ ନିପୀଡ୍ୟ ଗରୁଡଧ୍ୱଜପାଦରକ୍ଷେ

     ମାନଗ୍ରହଂ ଶମୟତୀବ ପରୈରସାଧ୍ୟମ୍ ॥ ୧୩.୧୬॥ ୩୬୬॥

ଆପାତବଲ୍ଲବତନୋରକୁମାରୟୂନଃ

     ପାଦାବନି ପ୍ରବିଶତୋ ଯମୁନାନିକୁଞ୍ଜାନ୍ ।

ଆସୀଦନଙ୍ଗସମରାତ୍ପୁରତଃ ପ୍ରବୃତ୍ତଃ

     ସେନାପରାଗ ଇବ ତେ ପଦବୀପରାଗଃ ॥ ୧୩.୧୭॥ ୩୬୭॥

ଗଙ୍ଗାପଗାତଟଲତାଗୃହମାଶ୍ରୟନ୍ତ୍ୟାଃ

     ପାଦାବନି ପ୍ରଚଲିତଂ ପଦବୀରଜସ୍ତେ ।

ପ୍ରାୟେଣ ପାବନତମଂ ପ୍ରଣତସ୍ୟ ଶମ୍ଭୋର୍-

     ଉଦ୍ଧୂଲନଂ କିମପି ନୂତନମାତନୋତି ॥ ୧୩.୧୮॥ ୩୬୮॥

ଅନ୍ତେ ତଦା ତ୍ୱମବିଲମ୍ବିତମାନୟନ୍ତୀ

     ରଙ୍ଗାଦ୍ଭୁଜଙ୍ଗଶୟନଂ ମଣିପାଦରକ୍ଷେ ।

କାମଂ ନିବର୍ତୟିତୁମର୍ହସି ସଜ୍ଜ୍ୱରଂ ମେ

     କର୍ପୂରଚୂର୍ଣପଟଲୈରିବ ଧୂଲିଭିସ୍ତେ ॥ ୧୩.୧୯॥ ୩୬୯॥

ରଙ୍ଗେଶପାଦସହଧର୍ମଚରି ତ୍ୱଦୀୟାନ୍

     ମୌଲୌ ନିବେଶ୍ୟ ମହିତାନ୍ପଦବୀପରାଗାନ୍ ।

ସନ୍ତସ୍ତ୍ରିବର୍ଗପଦବୀମତିଲଙ୍ଘୟନ୍ତୋ

     ମୌଲୌ ପଦଂ ବିଦଧତେ ବିବୁଧେଶ୍ୱରାଣାମ୍ ॥ ୧୩.୨୦॥ ୩୭୦॥

ମାତସ୍ତଦା ମାଧବପାଦରକ୍ଷେ ତ୍ୱୟି ପ୍ରସକ୍ତଂ ତ୍ୱରୟୋପୟାନ୍ତ୍ୟାମ୍ ।

ପରାମୃଶେୟଂ ପଦବୀପରାଗଂ ପ୍ରାଣୈଃ ପ୍ରୟାଣାୟ ସମୁଜ୍ଜିହାନୈଃ ॥ ୧୩.୨୧॥ ୩୭୧॥

ତଥାଗତା ରାଘବପାଦରକ୍ଷେ ସମ୍ପଶ୍ୟମାନେଷୁ ତପୋଧନେଷୁ ।

ଆସୀଦହଲ୍ୟା ତବ ପାଂସୁଲେଶୈରପାଂସୁଲାନାଂ ସ୍ୱୟମଗ୍ରଗଣ୍ୟା ॥ ୧୩.୨୨॥ ୩୭୨॥

ପଶ୍ୟାମି ପଦ୍ମେକ୍ଷଣପାଦରକ୍ଷେ ଭବାମ୍ବୁଧିଂ ପାତୁମିବ ପ୍ରବୃତ୍ତାନ୍ ।

ଭକ୍ତୋପୟାନତ୍ୱରୟା ଭବତ୍ୟାଃ ପର୍ୟସ୍ୟମାନାନ୍ପଦବୀପରାଗାନ୍ ॥ ୧୩.୨୩॥ ୩୭୩॥

ପଞ୍ଚାୟୁଧୀ ଭୂଷଣମେବ ଶୌରେର୍ୟତସ୍ତବୈତେ ମଣିପାଦରକ୍ଷେ ।

ବିତନ୍ୱତେ ବ୍ୟାପ୍ତଦିଶଃ ପରାଗାଃ ଶାନ୍ତୋଦୟାଞ୍ଛତ୍ରୁଚମୂପରାଗାନ୍ ॥ ୧୩.୨୪॥ ୩୭୪॥

ପରିଣତିମକଠୋରାଂ ପ୍ରାପ୍ତୟା ଯତ୍ପ୍ରଭାବା-

     ଦଲଭ ଶିଲୟା ସ୍ୱାନ୍ ଗୌତମୋ ଧର୍ମଦାରାନ୍ ।

ପୁନରୁପଜନିଶଙ୍କାବାରକଂ ପାଦୁକେ ତ-

     ତ୍ପ୍ରଶମୟତି ରଜସ୍ତେ ରାଗୟୋଗଂ ପ୍ରଜାନାମ୍ ॥ ୧୩.୨୫॥ ୩୭୫॥

ରଜନିବିଗମକାଲେ ରାମଗାଥାଂ ପଠନ୍ତଃ

     କୁଶିକତନୟମୁଖ୍ୟାଃ ପାଦୁକେ ଭାବୟନ୍ତେ ।

ଉପଲଶକଲସକ୍ତୈସ୍ତ୍ୱତ୍ପରାଗୈରକାଣ୍ଡେ

     ଜନିତମୁନିକଲତ୍ରାନ୍ ଦଣ୍ଡକାରଣ୍ୟଭାଗାନ୍ ॥ ୧୩.୨୬॥ ୩୭୬॥

ଶୁଭସରଣିରଜୋଭିଃ ଶୋଭୟନ୍ତୀ ଧରିତ୍ରୀଂ

     ପରିଣତିରମଣୀୟାନ୍ପ୍ରକ୍ଷରନ୍ତୀ ପୁମର୍ଥାନ୍ ।

ଭବସି ଭୁବନବନ୍ଦ୍ୟା ପାଦୁକେ ରଙ୍ଗଭର୍ତୁଃ

     ଶରଣମୁପଗତାନାଂ ଶାଶ୍ୱତୀ କାମଧେନୁଃ ॥ ୧୩.୨୭॥ ୩୭୭॥

ପବନତରଲିତସ୍ତେ ପାଦୁକେ ରଙ୍ଗଭର୍ତୁ-

     ର୍ୱିହରଣସମୟେଷୁ ବ୍ୟାପ୍ତବିଶ୍ୱଃ ପରାଗଃ ।

ବିଷମବିଷୟବର୍ତ୍ମବ୍ୟାକୁଲାନାମଜସ୍ରଂ

     ବ୍ୟପନୟତି ଜନାନାଂ ବାସନାରେଣୁଜାଲମ୍ ॥ ୧୩.୨୮॥ ୩୭୮॥

ନିଷ୍ପ୍ରତ୍ୟୂହମୁପାସିଷୀମହି ମୁହୁର୍ନିଶ୍ଶେଷଦୋଷଚ୍ଛିଦୋ

     ନିତ୍ୟଂ ରଙ୍ଗଧୁରନ୍ଧରସ୍ୟ ନିଗମସ୍ତୋମାର୍ଚିତେ ପାଦୁକେ ।

ଧତ୍ତେ ମୂର୍ଧଭିରାଦିପଦ୍ମଜନିତା ତତ୍ତାଦୃଶୀ ସନ୍ତତି-

     ର୍ୟତ୍ସଞ୍ଚାରପବିତ୍ରିତକ୍ଷିତିରଜଃପଙ୍କ୍ତିଂ ଚତୁଃପଞ୍ଚଷୈଃ ॥ ୧୩.୨୯॥ ୩୭୯॥

ରଜସା ପରୋରଜସ୍ତ-ନ୍ନ ଖଲୁ ନ ଲଙ୍ଘ୍ୟେତ ଭଗବତୋଽପି ପଦମ୍ ।

କିମୁତ ହୃଦୟଂ ମଦୀୟଂ ଭବତୀ ଯଦି ନାମ ପାଦୁକେ ନ ସ୍ୟାତ୍ ॥ ୧୩.୩୦॥ ୩୮୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ପରାଗପଦ୍ଧତିସ୍ତ୍ରୟୋଦଶୀ ॥

୧୪. ନାଦପଦ୍ଧତିଃ (୧୦୦)

ଶ୍ରୁତୀନାଂ ଭୂଷଣାନାଂ ତେ ଶଙ୍କେ ରଙ୍ଗେନ୍ଦ୍ରପାଦୁକେ ।

ମିଥଃ ସଙ୍ଘର୍ଷସଞ୍ଜାତଂ ରଜଃ କିମପି ଶିଞ୍ଜିତମ୍ ॥ ୧୪.୧॥ ୩୮୧॥

ମୁରଭିନ୍ମଣିପାଦୁକେ ଭବତ୍ୟାଃ ସ୍ତୁତିମାକର୍ଣୟତାଂ ମୟା ନିବଦ୍ଧାମ୍ ।

ଅବଧୀରୟସୀବ ମଞ୍ଜୁନାଦୈରଚମତ୍କାରବଚାଂସି ଦୁର୍ଜନାନାମ୍ ॥ ୧୪.୨॥ ୩୮୨॥

ବିହିତେଷ୍ୱଭିବାଦନେଷୁ ବେଦୈର୍ଗମନୋଦୀରିତଗର୍ଭରତ୍ନନାଦା ।

ମଧୁରଂ ମଧୁବୈରିପାଦରକ୍ଷେ ଭବତୀ ପ୍ରତ୍ୟଭିବାଦନଂ ବିଧତ୍ତେ ॥ ୧୪.୩॥ ୩୮୩॥

ସ୍ୱଦତେ କିମିହୈବ ରଙ୍ଗନାଥୋ

     ମୟି ତିଷ୍ଠନ୍ ଯଦି ବା ପଦେ ପରସ୍ମିନ୍ ।

ଇତି ପୃଚ୍ଛସି ଦେବି ନୂନମସ୍ମାନ୍

     ମଧୁରୈସ୍ତ୍ୱଂ ମଣିପାଦୁକେ ନିନାଦୈଃ ॥ ୧୪.୪॥ ୩୮୪॥

ଅବରୋଧଗତସ୍ୟ ରଙ୍ଗଭର୍ତୁର୍ଗୁତିଷୁ ବ୍ୟଞ୍ଜିତଗର୍ଭରତ୍ନନାଦା ।

ପ୍ରତିସଁଲ୍ଲପସୀବ ପାଦୁକେ ତ୍ୱଂ କମଲାନୂପୁରମଞ୍ଜୁଶିଞ୍ଜିତାନାମ୍ ॥ ୧୪.୫॥ ୩୮୫॥

ମୁରଭିଚ୍ଚରଣାରବିନ୍ଦରୂପଂ ମହିତାନନ୍ଦମବାପ୍ୟ ପୂରୁଷାର୍ଥମ୍ ।

ଅନଘୈର୍ମଣିପାଦୁକେ ନିନାଦୈରହମନ୍ନାଦ ଇତୀବ ଗାୟସି ତ୍ୱମ୍ ॥ ୧୪.୬॥ ୩୮୬॥

ମଦୁବୈରିପଦାମ୍ବୁଜଂ ଭଜନ୍ତୀ ମଣିପାଦାବନି ମଞ୍ଜୁଶିଞ୍ଜିତେନ ।

ପଠସୀବ ମୁହୁଃ ସ୍ୱୟଂ ପ୍ରଜାନାମପରୋପଜ୍ଞମରିଷ୍ଟଶାନ୍ତିମନ୍ତ୍ରମ୍ ॥ ୧୪.୭॥ ୩୮୭॥

ଶ୍ରୁତିଭିଃ ପରମଂ ପଦଂ ମୁରାରେରନିଦଙ୍କାରମନେବମିତ୍ୟୁପାତ୍ତମ୍ ।

ଇଦମିତ୍ଥମିତି ବ୍ରବୀଷି ନୂନଂ ମଣିପାଦାବନି ମଞ୍ଜୁଭିଃ ପ୍ରଣାଦୈଃ ॥ ୧୪.୮॥ ୩୮୮॥

ମୁନୟଃ ପ୍ରଣିଧାନସନ୍ନିରୁଦ୍ଧେ ହୃଦି ରଙ୍ଗେଶ୍ୱରରତ୍ନପାଦୁକେ ତ୍ୱାମ୍ ।

ବିନିବେଶ୍ୟ ବିଭାବୟନ୍ତ୍ୟନନ୍ୟାଃ ପ୍ରଣବସ୍ୟ ପ୍ରଣିଧିଂ ତବ ପ୍ରଣାଦମ୍ ॥ ୧୪.୯॥ ୩୮୯॥

ମଧୁରଂ ମଣିପାଦୁକେ ପ୍ରବୃତ୍ତେ ଭବତୀ ରଙ୍ଗେପତେର୍ୱିହାରକାଲେ ।

ଅଭୟାର୍ଥନୟା ସମଭ୍ୟୁପେତାନବିସମ୍ବାଦୟତୀବ ମଞ୍ଜୁନାଦୈଃ ॥ ୧୪.୧୦॥ ୩୯୦॥

ଶ୍ରବସୋର୍ମମ ପାରଣାଂ ଦିଶନ୍ତୀ ମଣିପାଦାବନି ମଞ୍ଜୁଲୈଃ ପ୍ରଣାଦୈଃ ।

ରମୟା କ୍ଷମୟା ଚ ଦତ୍ତହସ୍ତଂ ସମୟେ ରଙଧୁରୀଣମାନୟେଥାଃ ॥ ୧୪.୧୧॥ ୩୯୧॥

ଅନୁୟାତି ନିତ୍ୟମମୃତାତ୍ମିକାଂ କଲାଂ

     ତବ ରଙ୍ଗଚନ୍ଦ୍ରମଣିପାଦୁ ଝଙ୍କୃତମ୍ ।

ଶ୍ରବସା ମୁଖେନ ପରିଭୁଜ୍ୟ ଯତ୍କ୍ଷଣା-

     ଦଜରାମରତ୍ୱମୁପୟାନ୍ତି ସାଧବଃ ॥ ୧୪.୧୨॥ ୩୯୨॥

ପରୁଷୈରଜସ୍ରମସତାମନର୍ଥକୈଃ ପରିବାଦପୈଶୁନବିକତ୍ଥନାଦିଭିଃ ।

ମଧୁକୈଟଭାରିମଣିପାଦୁକେ ମମ ଶ୍ରୁତିଦୁଷ୍କୃତାନି

                  ବିନିବାରୟ ସ୍ୱନୈଃ ॥ ୧୪.୧୩॥ ୩୯୩॥

ପାଦୁକେ ପରିଜନସ୍ୟ ଦୂରତଃ ସୂଚୟନ୍ତି ଖଲୁ ତାବକାଃ ସ୍ୱନାଃ ।

ଲୀଲୟା ଭୁଜଗତଲ୍ପମୁଜ୍ଜ଼ତଃ ଶ୍ରୀମତସ୍ତ୍ରିଚତୁରାନ୍ପଦକ୍ରମାନ୍ ॥ ୧୪.୧୪॥ ୩୯୪॥

ଦେବି ଦୈତ୍ୟଦମନାୟ ସତ୍ୱରଂ ପ୍ରସ୍ଥିତସ୍ୟ ମଣିପାଦୁକେ ପ୍ରଭୋଃ ।

ବିଶ୍ୱମଙ୍ଗଲବିଶେଷସୂଚକଂ ଶାକୁନଂ ଭବତି ତାବକଂ ରୁତମ୍ ॥ ୧୪.୧୫॥ ୩୯୫॥

ଦାତୁମର୍ହସି ତଦା ମମ ଶ୍ରୁତୌ ଦେବି ରଙ୍ଗପତିରତ୍ନପାଦୁକେ ।

ବିହ୍ୱଲସ୍ୟ ଭବଦୀୟଶିଞ୍ଜିତଂ ସ୍ୱାଦୁକର୍ଣରସନାରସାୟନମ୍ ॥ ୧୪.୧୬॥ ୩୯୬॥

ଅହମୁପରିସମସ୍ତଦେବତାନାମୁପରି ମମୈଷ ବିଭାତି ବାସୁଦେବଃ ।

ତଦିହ ପରତରଂ ନ କିଞ୍ଚିଦସ୍ମାଦିତି ବଦସୀବ ପଦାବନି ପ୍ରଣାଦୈଃ ॥ ୧୪.୧୭॥ ୩୯୭॥

ଅବନତବିବୁଧେନ୍ଦ୍ରମୌଲିମାଲାମ-

     ଧୁମଦଶିକ୍ଷିତମନ୍ଥରପ୍ରୟାତା ।

ପ୍ରଥୟସି ପରିରବ୍ଧଶୌରିପାଦା

     ମଣିକଲହେନ ବିୟାତଜଲ୍ପିତାନି ॥ ୧୪.୧୮॥ ୩୯୮॥

ଆସ୍ଥାନେଷୁ ତ୍ରିଦଶମହିତାନ୍ ବର୍ତୟିତ୍ୱା ବିହାରାନ୍

     ସ୍ଥାନେ ସ୍ଥାନେ ନିଜପରିଜନଂ ବାରୟିତ୍ୱା ଯଥାର୍ହମ୍ ।

ବାସାଗାରଂ ସ୍ୱୟମୁପସରନ୍ପାଦୁକେ ମଞ୍ଜୁନାଦା-

     ମାପର୍ୟଙ୍କାନ୍ନ ଖଲୁ ଭବତୀଂ ରଙ୍ଗନାଥୋ ଜହାତି ॥ ୧୪.୧୯॥ ୩୯୯॥

ଅନ୍ତର୍ନ୍ୟସ୍ତୈର୍ମଣିଭିରୁଦିତଂ ପାଦୁକେ ରଙ୍ଗବନ୍ଧୌ

     ମନ୍ଦଂ ମନ୍ଦଂ ନିହିତଚରଣେ ମଞ୍ଜୁଲଂ ତେ ନିନାଦମ୍ ।

ପଶ୍ୟନ୍ତ୍ୟାଦିକ୍ରମପରିଣତେଃ ପ୍ରାକ୍ତନୀଂ ତାଂ ପରାୟା

     ମନ୍ୟେ ମିତ୍ରାବରୁଣବିଷୟାଦୁଚ୍ଚରନ୍ତୀମବସ୍ଥାମ୍ ॥ ୧୪.୨୦॥ ୪୦୦॥

ପ୍ରଖ୍ୟାତାନାଂ ପରିଷଦି ସତାଂ କାରୟିତ୍ୱା ପ୍ରତିଜ୍ଞାଂ

     ପ୍ରାୟେଣ ତ୍ୱାଂ ପ୍ରଥିତବିଭବାଂ ବର୍ଣୟନ୍ତୀ ମୟା ତ୍ୱମ୍ ।

ପାଦନ୍ୟାସକ୍ରମମନୁଗୁଣଂ ପ୍ରାପ୍ୟ ରଙ୍ଗାଧିରାଜା-

     ତ୍ପଦ୍ୟାରମ୍ଭାନ୍ ଗଣୟସି ପରଂ ପାଦୁକେ ସ୍ୱୈର୍ନିନାଦୈଃ ॥ ୧୪.୨୧॥ ୪୦୧॥

ବିଷ୍ଣୋରସ୍ମିନ୍ପଦସରସିଜେ ବୃତ୍ତିଭେଦୈର୍ୱିଚିତ୍ରୈ-

     ରୈଦମ୍ପର୍ୟଂ ନିଗମବଚସାମୈକକଣ୍ଠ୍ୟେନ ସିଦ୍ଧମ୍ ।

ଇତ୍ଥଂ ପୁଂସାମନିପୁଣଧିୟାଂ ପାଦୁକେ ତ୍ୱଂ ତଦେବ

     ସ୍ପୃଷ୍ଟ୍ୱା ସତ୍ୟଂ ବଦସି ନିୟତଂ ମଞ୍ଜୁନା ଶିଞ୍ଜିତେନ ॥ ୧୪.୨୨॥ ୪୦୨॥

ଆମ୍ନାୟୈସ୍ତ୍ୱାମନିତରପରୈଃ ସ୍ତୋତୁମଭ୍ୟୁଦ୍ୟତାନାଂ

     ମଧ୍ୟେ ଭକ୍ତ୍ୟା ମଧୁବିଜୟିନଃ ପାଦୁକେ ମୋହଭାଜାମ୍ ।

ଶିକ୍ଷାତତ୍ତ୍ୱସ୍ଖଲିତବଚସାଂ ଶିକ୍ଷୟସ୍ୟେବ ପୁଂସାଂ

     ମାତ୍ରାଦୀନି ସ୍ୱୟମନୁପଦଂ ମଞ୍ଜୁଭିଃ ସ୍ୱୈର୍ନିନାଦୈଃ ॥ ୧୪.୨୩॥ ୪୦୩॥

ଲକ୍ଷ୍ମୀକାନ୍ତଂ କମପି ତରୁଣଂ ରଥ୍ୟଯା ନିଷ୍ପତନ୍ତଂ

     ରାଗାଦ୍ ଦ୍ରଷ୍ଟୁଂ ତ୍ୱରିତମନସାଂ ରାଜଧାନୀବଧୂନାମ୍ ।

ପ୍ରତ୍ୟାଦେଶଂ ଭଜତି ମଧୁରୈଃ ପାଦୁକେ ଶିଞ୍ଜିତୈସ୍ତେ

     ଚେତୋହାରୀ କୁସୁମଧନୁଷଃ ଶିଂଞ୍ଜିନୀମଞ୍ଜୁନାଦଃ ॥ ୧୪.୨୪॥ ୪୦୪॥

ରଙ୍ଗାଧୀଶେ ସହ କମଲୟା ସାଦରଂ ଯାୟଜୂକୈଃ

     ସାରଂ ଦିବ୍ୟଂ ସବନହବିଷାଂ ଭୋକ୍ତୁମାହୂୟମାନେ ।

ନେଦୀୟୋଭିର୍ନିଗମବଚସାଂ ନିତ୍ୟମଂହଃପ୍ରତୀପୈଃ

     ପ୍ରତ୍ୟାଲାପଂ ଦିଶତି ଭବତୀ ପାଦୁକେ ଶିଞ୍ଜିତୈଃ ସ୍ୱୈଃ ॥ ୧୪.୨୫॥ ୪୦୫॥

ଉପାସ୍ୟ ନୂନଂ ମଣିପାଦୁକେ ତ୍ୱାଂ ରଙ୍ଗେଶପାଦାମ୍ବୁଜରାଜହଂସୀମ୍ ।

ପତ୍ୟୁଃ ପ୍ରଜାନାମଲଭନ୍ତ ପୂର୍ୱଂ ମଞ୍ଜୁସ୍ୱନଂ ବାହନରାଜହଂସାଃ ॥ ୧୪.୨୬॥ ୪୦୬॥

ଅନାଦିମାୟାରଜନୀବଶେନ ପ୍ରସ୍ୱାପଭାଜାଂ ପ୍ରତିବୋଧନାର୍ହାମ୍ ।

ପଶ୍ୟାମି ନିତ୍ୟୋଦିତବାସରସ୍ୟ ପ୍ରଭାତନାନ୍ଦୀମିବ ପାଦୁକେ ତ୍ୱାମ୍ ॥ ୧୪.୨୭॥ ୪୦୭॥

ଶୃଣୋତୁ ରଙ୍ଗାଧିପତିଃ ପ୍ରଜାନାମାର୍ତଧ୍ୱନିଂ କ୍ୱାପି ସମୁଜ୍ଜିହାନମ୍ ।

ଇତୀବ ମତ୍ୱା ମଣିପାଦୁକେ ତ୍ୱଂ ମନ୍ଦପ୍ରଚାରୈର୍ମୃଦୁଶିଞ୍ଜିତାଽସି ॥ ୧୪.୨୮॥ ୪୦୮॥

ଅନ୍ତେ ମମାର୍ତିଂ ଶମୟିଷ୍ୟତସ୍ତାମଗ୍ରେସରାଣ୍ୟାପତତୋ ମୁରାରେଃ ।

ଶ୍ରମୋପପନ୍ନଃ ଶୃଣୁୟାଂ ଭବତ୍ୟାଃ ଶୀତାନି ପାଦାବନି ଶିଞ୍ଜିତାନି ॥ ୧୪.୨୯॥ ୪୦୯॥

ସ୍ୱାଦୂନି ରଙ୍ଗେଶ୍ୱରପାଦରକ୍ଷେ ଶ୍ରୋତ୍ରୈଃ ପିବନ୍ତସ୍ତବ ଶିଞ୍ଜିତାନି ।

ପଚନ୍ତ୍ୟବିଦ୍ୟୋପଚିତାନଶେଷାନ୍ତର୍ଗତାନାତ୍ମବିଦଃ କଷାୟାନ୍ ॥ ୧୪.୩୦॥ ୪୧୦॥

ଅବୈମି ରଙ୍ଗାଧିପତେଃ ସକାଶାଦବେକ୍ଷମାଣେଷୁ ଜନେଷୁ ରକ୍ଷାମ୍ ।

ଉଦାରନାଦାଂ ମଣିପାଦୁକେ ତ୍ୱାମୋମିତ୍ୟନୁଜ୍ଞାକ୍ଷରମୁଦ୍ଗିରନ୍ତୀମ୍ ॥ ୧୪.୩୧॥ ୪୧୧॥

ମଧୁଦ୍ୱିଷଃ ସ୍ୱୈରବିହାରହେତୁର୍ମଞ୍ଜୁସ୍ୱନାନ୍ ଶିକ୍ଷୟସୀବ ମାତଃ ।

ପର୍ୟନ୍ତଭାଜୋର୍ମଣିପାଦରକ୍ଷେ ପଦ୍ମାଧରଣ୍ୟୋର୍ମଣିନୂପୁରାଣି ॥ ୧୪.୩୨॥ ୪୧୨॥

ପ୍ରାସ୍ଥାନିକେଷୁ ସମୟେଷୁ ସମାଗତେଷୁ

     ପ୍ରାପ୍ତା ପଦଂ ପରିଚିତଂ ଦ୍ୱିଜପୁଙ୍ଗବେନ ।

ପୁଷ୍ଣାସି ରଙ୍ଗନୃପତେର୍ମଣିପାଦୁକେ ତ୍ୱଂ

     ପୁଣ୍ୟାହଘୋଷମିବ ଗର୍ଭମଣିପ୍ରଣାଦୈଃ ॥ ୧୪.୩୩॥ ୪୧୩॥

ଆର୍ତଧ୍ୱନେରୁଚିତମୁତ୍ତରମନ୍ତକାଲେ

     କର୍ଣେଷୁ ମଞ୍ଜୁନିନଦେନ କରିଷ୍ୟସୀତି ।

ବାସଂ ଭଜନ୍ତି କୃତିନୋ ମଣିପାଦରକ୍ଷେ

     ପୁଣ୍ୟେଷୁ ଦେବି ପୁଲିନେଷୁ ମରୁଦ୍ୱୃଧାୟାଃ ॥ ୧୪.୩୪॥ ୪୧୪॥

ଦୂତ୍ୟେ ବଲେର୍ୱିମଥନେ ଶକଟସ୍ୟ ଭଙ୍ଗେ

     ଯାତ୍ରୋତ୍ସବେଷୁ ଚ ବିଭୋଃ ପ୍ରତିପନ୍ନସଖ୍ୟା ।

ବୀରାୟିତାନି ବିରୁଦୋପହିତାନି ନୂନଂ

     ମଞ୍ଜୁସ୍ୱନୈଃ ପ୍ରଥୟସେ ମଣିପାଦୁକେ ତ୍ୱମ୍ ॥ ୧୪.୩୫॥ ୪୧୫॥

ସ୍ତୋତୁଂ ପ୍ରବୃତ୍ତମପି ମାଂ ନିଗମସ୍ତୁତାଂ ତ୍ୱାଂ

     ବ୍ୟାସଜ୍ୟମାନକରଣଂ ବିଷୟେଷ୍ୱଜସ୍ରମ୍ ।

ଅନ୍ତର୍ମଣିଧ୍ୱନିଭିରଚ୍ୟୁତପାଦୁକେ ତ୍ୱଂ

     ସମ୍ବୋଧୟସ୍ୟନୁକଲଂ ସହଜାନୁକମ୍ପା ॥ ୧୪.୩୬॥ ୪୧୬॥

ଦେବସ୍ୟ ଦାନବରିପୋର୍ମଣିପାଦରକ୍ଷେ

     ପ୍ରସ୍ଥାନମଙ୍ଗଲବିଧୌ ପ୍ରତିପନ୍ନନାଦାମ୍ ।

ମା ଭୈଷ୍ଟ ସାଧବ ଇତି ସ୍ୱୟମାଲପନ୍ତୀଂ

     ଜାନେ ଜଗତ୍ରିତୟରକ୍ଷଣଦୀକ୍ଷିତାଂ ତ୍ୱାମ୍ ॥ ୧୪.୩୭॥ ୪୧୭॥

ସ୍ୱଞ୍ଛନ୍ଦବିଭ୍ରମଗତୌ ମଣିପାଦୁକେ ତ୍ୱଂ

     ପାଦାରବିନ୍ଦମଧିଗମ୍ୟ ପରସ୍ୟ ପୁଂସଃ ।

ଜାତସ୍ୱନା ପ୍ରତିପଦଂ ଜପସୀବ ସୂକ୍ତଂ

     ବିଦ୍ରାବଣଂ କିମପି ବୈରିବରୂଥିନୀନାମ୍ ॥ ୧୪.୩୮॥ ୪୧୮॥

ରକ୍ଷାର୍ଥମାଶ୍ରିତଜନସ୍ୟ ସମୁଜ୍ଜିହାନେ

     ରଙ୍ଗେଶ୍ୱରେ ଶରଦି ଶେଷଭୁଜଙ୍ଗତଲ୍ପାତ୍ ।

ନାଦାସ୍ତବ ଶ୍ରୁତିସୁଖା ମଣିପାଦରକ୍ଷେ

     ପ୍ରସ୍ଥାନଶଙ୍ଖନିନଦାତ୍ପ୍ରଥମେ ଭବନ୍ତି ॥ ୧୪.୩୯॥ ୪୧୯॥

ନିତ୍ୟଂ ପଦାମ୍ବୁରୁହୟୋରିହ ଗୋପିକାଂ ତ୍ୱାଂ

     ଗୋପୀଜନପ୍ରିୟତମୋ ମଣିପାଦରକ୍ଷେ ।

ସମ୍ବନ୍ନଘୋଷବିଭବାଂ ଗତିଭିର୍ନିଜାଭିଃ

     ପ୍ରୀତ୍ୟୈବ ନ ତ୍ୟଜତି ରଙ୍ଗସମାଶ୍ରିତୋଽପି ॥ ୧୪.୪୦॥ ୪୨୦॥

ପ୍ରାୟଃ ପଦାବନି ବିଭୋଃ ପ୍ରଣତାର୍ତିହନ୍ତୁଃ

     ପ୍ରସ୍ଥାନମଙ୍ଗଲବିଧୌ ପ୍ରଥମୋଦ୍ୟତାନି ।

ତ୍ୱଚ୍ଛିଞ୍ଜିତାନି ସପଦି ସ୍ୱୟମାରଭନ୍ତେ

     କାଲୋଚିତାନ୍ କନକକାହଲଶଙ୍ଗନାଦାନ୍ ॥ ୧୪.୪୧॥ ୪୨୧॥

ଆମ୍ରେଡିତଶ୍ରୁତିଗଣୈର୍ନିନଦୈର୍ମଣୀନା-

     ମାମ୍ନାୟବେଦ୍ୟମନୁଭାବମଭଙ୍ଗୁରଂ ତେ ।

ଉଦ୍ଗାସ୍ୟତାଂ ନିୟତମିଚ୍ଛସି ସାମଗାନାଂ

     ତାନପ୍ରଦାନମିବ ଶୌରିପଦାବନି ତ୍ୱମ୍ ॥ ୧୪.୪୨॥ ୪୨୨॥

ରଥ୍ୟାସୁ ରଙ୍ଗନୃପତେର୍ମଣିପାଦରକ୍ଷେ

     ତ୍ୱଦ୍ଗର୍ଭରତ୍ନଜନିତୋ ମଧୁରଃ ପ୍ରଣାଦଃ ।

ସନ୍ଦର୍ଶନୋତ୍ସୁକଧିୟାଂ ପୁରସୁନ୍ଦରୀଣାଂ

     ସମ୍ପଦ୍ୟତେ ଶ୍ରବଣମୋହନମନ୍ତ୍ରଘୋଷଃ ॥ ୧୪.୪୩॥ ୪୨୩॥

ଆକସ୍ମିକେଷୁ ସମୟେଷ୍ୱପବାର୍ୟ ଭୃତ୍ୟା-

     ନନ୍ତଃପୁରଂ ବିଶତି ରଙ୍ଗପତୌ ସଲୀଲମ୍ ।

ବ୍ୟାମୋହନେନ ଭବତୀ ସୁଦୃଶାମଧୀତେ

     ମଞ୍ଜୁସ୍ୱନେନ ମଦନୋପନିଷଦ୍ରହସ୍ୟମ୍ ॥ ୧୪.୪୪॥ ୪୨୪॥

ଯାତ୍ରାବିହାରସମୟେଷୁ ସମୁତ୍ଥିତଂ ତେ

     ରଙ୍ଗାଧିପସ୍ୟ ଚରଣାବନି ମଞ୍ଜୁନାଦମ୍ ।

ପର୍ୟାକୁଲେନ୍ଦ୍ରିୟମୃଗଗ୍ରହଣାୟ ପୁଂସାଂ

     ସମ୍ମୋହନଂ ଶବରଗୀତମିବ ପ୍ରତୀମଃ ॥ ୧୪.୪୫॥ ୪୨୫॥

ପ୍ରାୟେଣ ସହ୍ୟଦୁହିତର୍ନଦରାଜକନ୍ୟା

     ଜାମାତୁରାଗମନସୂଚନମୀହମାନା ।

ମଞ୍ଜୁପ୍ରଣାଦସୁଭଗୈର୍ମଣିପାଦୁକେ ତ୍ୱା-

     ମନ୍ତର୍ୟୁତାମକୃତ ଯୌତକରତ୍ନଖଣ୍ଡୈଃ ॥ ୧୪.୪୬॥ ୪୨୬॥

ନିତ୍ୟଂ ବିହାରସମୟେ ନିଗମାନୁୟାତୈଃ-

     ର୍ୱିକ୍ଷେପତାଣ୍ଡବିତଗର୍ଭମଣିପ୍ରସୂତୈଃ ।

ନାଦୈଃ ସ୍ୱୟଂ ନରକମର୍ଦନପାଦରକ୍ଷେ

     ନାଦାବସାନନିଲୟଂ ବଦସୀବ ନାଥମ୍ ॥ ୧୪.୪୭॥ ୪୨୭॥

ସାଧାରଣେଷୁ ଯୁବୟୋର୍ମଣିପାଦରକ୍ଷେ

     ଦେବସ୍ୟ ଦାନବରିପୋସ୍ତ୍ରିଷୁ ବିକ୍ରମେଷୁ ।

ଅଦ୍ୟାପି ଶିଞ୍ଜିତମିଷାଦନୁବର୍ତମାନଂ

     ନ୍ୟୂନାଧିକତ୍ୱବିଷୟଂ କଲହଂ ପ୍ରତୀମଃ ॥ ୧୪.୪୮॥ ୪୨୮॥

ପ୍ରାୟଃ ପଦାବନି ବିଭୋଃ ପ୍ରଣୟାପରାଧେ

     ମାନଗ୍ରହଂ ଶମୟିତୁଂ ମହିଷୀଜନାନାମ୍ ।

ଉଚ୍ଚାରୟନ୍ତି ନିନଦୈସ୍ତବ ଗର୍ଭରତ୍ନା-

     ନ୍ୟୁଦ୍ଧାତମକ୍ଷରମୁପାଶ୍ରୟଭାରତୀନାମ୍ ॥ ୧୪.୪୯॥ ୪୨୯॥

ଅନ୍ତଶ୍ଚରେଷୁ ପବନେଷୁ ଜିତେଷ୍ୱଭିଜ୍ଞାଃ

     ପ୍ରତ୍ୟଡ୍ମୁଖୀଂ ପରିଣମୟ୍ୟ ମନଃପ୍ରବୃତ୍ତିମ୍ ।

ଆସ୍ୱାଦୟନ୍ତି ସରସଂ ମଣିପାଦରକ୍ଷେ

     ନାଦାବସାନସମୟେ ଭବତୀନିନାଦମ୍ ॥ ୧୪.୫୦॥ ୪୩୦॥

ଦାକ୍ଷିଣ୍ୟମତ୍ର ନିୟତଂ ନିୟତା ସୁଧାଽସ୍ମି-

     ନ୍ନିତ୍ୟୁଦ୍ଗତୋ ନିୟତମଚ୍ୟୁତପାଦରକ୍ଷେ ।

ପ୍ରତ୍ୟେକସଂଶ୍ରିତପଦସ୍ତୁତୟେ ଭବତ୍ୟୋଃ

     ସଙ୍ଘର୍ଷବାଦ ଇବ ମଧ୍ୟମଣିପ୍ରଣାଦଃ ॥ ୧୪.୫୧॥ ୪୩୧॥

ସଞ୍ଚାରକେଲିକଲହାୟିତଗର୍ଭରତ୍ନା

     ସାଂସିଦ୍ଧିକଂ ସକଲଜନ୍ତୁଷୁ ସାର୍ୱଭୌମମ୍ ।

ରକ୍ଷାର୍ଥିନାଂ ପ୍ରଥୟସୀବ ପଦାବନି ତ୍ୱଂ

     ରଙ୍ଗେଶ୍ୱରସ୍ୟ ନିରବଗ୍ରହମାନୃଶଂସ୍ୟମ୍ ॥ ୧୪.୫୨॥ ୪୩୨॥

ପ୍ରାପ୍ତୁଂ ପରଂ ପୁରିଶୟଂ ପୁରୁଷଂ ମୁନୀନା-

     ମଭ୍ୟସ୍ୟତାମନୁଦିନଂ ପ୍ରଣବଂ ତ୍ରିମାତ୍ରମ୍ ।

ଶ୍ରୀରଙ୍ଗରାଜଚରଣାବନି ଶିଞ୍ଜିତଂ ତେ

     ଶଙ୍କେ ସମୁନ୍ନୟନସାମବିଶେଷଘୋଷମ୍ ॥ ୧୪.୫୩॥ ୪୩୩॥

ନିତ୍ୟଂ ସମାହିତଧିୟାମୁପନ୍ଦର୍ଶୟନ୍ତୀ

     ନାଗେଶୟଂ କିମପି ଧାମ ନିଜୋର୍ଧ୍ୱଭାଗେ ।

ହୃତ୍କର୍ଣିକାମନୁଗତା ମଣିପାଦୁକେ ତ୍ୱଂ

     ମଞ୍ଜୁସ୍ୱନା ସ୍ଫୁରସି ବାଗ୍ଭ୍ରମରୀ ପରେବ ॥ ୧୪.୫୪॥ ୪୩୪॥

ମାନେଷୁ ଦାନବରିପୋର୍ମଣିପାଦରକ୍ଷେ

     ତ୍ୱାମାଶ୍ରିତେଷୁ ନିଗମେଷ୍ୱବଧୀରିତେଷୁ ।

ମଞ୍ଜୁସ୍ୱନୈର୍ୱଦସି ମୈବମିତୀବ ମାତ-

     ର୍ୱେଲାଂ ଲିଲଙ୍ଘୟିଷତୋ ମନୁଜାନ୍ନିରୋଦ୍ଧୁମ୍ ॥ ୧୪.୫୫॥ ୪୩୫॥

କ୍ରନ୍ଦତ୍ସୁ କାତରତୟା କରଣବ୍ୟପାୟେ

     ରଙୋପଶଲ୍ୟଶୟିତେଷୁ ଜନେଷ୍ୱଲକ୍ଷ୍ୟମ୍ ।

ଆସୀଦସି ତ୍ୱରିତମସ୍ଖଲିତାନୁକମ୍ପା

     ମାତେବ ମଞ୍ଜୁନିନଦା ମଣିପାଦ୍କେ ତ୍ୱମ୍ ॥ ୧୪.୫୬॥ ୪୩୬॥

ଭାସ୍ୱତ୍ସୁବର୍ଣବପୁଷାଂ ମଣିପାଦରକ୍ଷେ

     ପଦ୍ମାସହାୟପଦପଦ୍ମବିଭୂଷଣାନାମ୍ ।

ମଞ୍ଜୀରଶିଞ୍ଜିତବିକଲ୍ପିତମଞ୍ଜୁନାଦା

     ମଞ୍ଜୂଷିକେବ ଭବତୀ ନିଗମାନ୍ତବାଚାମ୍ ॥ ୧୪.୫୭॥ ୪୩୭॥

ରଙ୍ଗେଶପାଦକମଲାତ୍ ତ୍ୱଦଧୀନବୃତ୍ତେ-

     ରନ୍ୟେଷୁ କେଷୁଚିଦଲକ୍ଷ୍ୟମନନ୍ୟବେଦ୍ୟମ୍ ।

ଆମ୍ନାୟଗୂଢମବହିର୍ମଣିଭିଃ କ୍ୱଣଦ୍ଭି-

     ର୍ନେଦୀୟସାଂ ପ୍ରଥୟସୀବ ନିଜାନୁଭାବମ୍ ॥ ୧୪.୫୮॥ ୪୩୮॥

କାଲୋପପନ୍ନକରଣାତ୍ୟଯନିର୍ୱିଚେଷ୍ଟେ

     ଜାତଶ୍ରମେ ମୟି ଜନାର୍ଦନପାଦରକ୍ଷେ ।

ଆଶ୍ୱାସନାୟ ପୁରତଃ ପ୍ରସରନ୍ତୁ ମାତ-

     ର୍ୱାର୍ତାହରାସ୍ତବ ରବାଃ ଶମିତାର୍ତୟୋ ମେ ॥ ୧୪.୫୯॥ ୪୩୯॥

ସଂରକ୍ଷଣାୟ ସମୟେ ଜଗତାଂ ତ୍ରୟାଣାଂ

     ଯାତ୍ରାସୁ ରଙ୍ଗନୃପତେରୁପତସ୍ଥୁଷୀଷୁ ।

ସମ୍ପତ୍ସ୍ୟତେ ଶ୍ରୁତିସୁଖୈର୍ମଣିପାଦରକ୍ଷେ

     ମଙ୍ଗଲ୍ୟସୂକ୍ତିରନଘା ତବ ମଞ୍ଜୁନାଦୈଃ ॥ ୧୪.୬୦॥ ୪୪୦॥

ଗର୍ଭୋପଲୈର୍ଗମନବେଗବଶାଦ୍ୱିଲୋଲୈ-

     ର୍ୱାଚାଲିତା ମଧୁଭିଦୋ ମଣିପାଦୁକେ ତ୍ୱମ୍ ।

ପ୍ରସ୍ତୌଷି ଭାବିତଧିୟାଂ ପଥି ଦେବୟାନେ

     ପ୍ରସ୍ଥାନମଙ୍ଗଲମୃଦଙ୍ଗବିଶେଷଘୋଷମ୍ ॥ ୧୪.୬୧॥ ୪୪୧॥

ପର୍ୟଙ୍କମାଶ୍ରିତବତୋ ମଣିପାଦୁକେ ତ୍ୱଂ

     ପାଦଂ ବିହାୟ ପରିକଲ୍ପିତମୌନମୁଦ୍ରା ।

ଶ୍ରୋତୁଂ ପ୍ରଭୋରବସରଂ ଦିଶସୀବ ମାତ-

     ର୍ନାଭୀସରୋଜଶୟିତାର୍ଭକସାମଗୀତିମ୍ ॥ ୧୪.୬୨॥ ୪୪୨॥

ଭୋଗାୟ ଦେବି ଭବତୀ ମଣିପାଦରକ୍ଷେ

     ପଦ୍ମାସହାୟମଧିରୋପ୍ୟ ଭୁଜଙ୍ଗତଲ୍ପେ ।

ବିଶ୍ୱସ୍ୟ ଗୁପ୍ତିମଧିକୃତ୍ୟ ବିହାରହୀନା

     ବାଚଂୟମା କିମପି ଚିନ୍ତୟତୀବ କାର୍ୟମ୍ ॥ ୧୪.୬୩॥ ୪୪୩॥

ନିତ୍ୟପ୍ରବୋଧସୁଭଗେ ପୁରୁଷେ ପରସ୍ମିନ୍

     ନିଦ୍ରାମୁପେୟୁଷି ତଦେକବିହାରଶୀଲା ।

ମଞ୍ଜୁସ୍ୱନଂ ବିଜହତୀ ମଣିପାଦୁକେ ତ୍ୱଂ

     ସମ୍ବେଶମିଚ୍ଛସି ପରଂ ଚରଣାନ୍ତିକସ୍ଥା ॥ ୧୪.୬୪॥ ୪୪୪॥

ଲାସ୍ୟଂ ବିହାୟ କିମପି ସ୍ଥିତମାଶ୍ରୟନ୍ତୀ

     ରଙ୍ଗେଶ୍ୱରେଣ ସହିତା ମଣିମଣ୍ଡପେଷୁ ।

ମଞ୍ଜୁସ୍ୱନେଷୁ ବିରତେଷ୍ୱପି ବିଶ୍ୱମେତ-

     ନ୍ମୌନେନ ହନ୍ତ ଭବତୀ ମୁଖରୀକରୋତି ॥ ୧୪.୬୫॥ ୪୪୫॥

ବିସ୍ମାପିତେବ ଭବତୀ ମଣିପାଦରକ୍ଷେ

     ବୈରୋଚନେର୍ୱିତରଣେନ ତଥାବିଧେନ ।

ଏତାବତାଽଲମିତି ଦେବି ଗୃହୀତପାଦା

     ନାଥଂ ତ୍ରିବିକ୍ରମମବାରୟତେବ ନାଦୈଃ ॥ ୧୪.୬୬॥ ୪୪୬॥

ସାମାନି ରଙ୍ଗନୃପତିଃ ସରସଂ ଚ ଗୀତଂ

     ଲୀଲାଗତେଷୁ ବିନିବାରୟତି ସ୍ୱତନ୍ତ୍ରଃ ।

ଶ୍ରୋତୁଂ ତବ ଶ୍ରୁତିସୁଖାନି ବିଶେଷବେଦୀ

     ମଞ୍ଜୂନି କାଞ୍ଚନପଦାବନି ଶିଞ୍ଜିତାନି ॥ ୧୪.୬୭॥ ୪୪୭॥

ତତ୍ତାଦୃଶୀଂ ପ୍ରଥୟତା ରୁଚିରାଂ ସ୍ୱରେଖାଂ

     ବର୍ଣାଧିକେନ ମଧୁସୂଦନପାଦରକ୍ଷେ ।

ପଶ୍ୟନ୍ତି ଚିତ୍ତନିକଷେ ବିନିବେଶ୍ୟ ସନ୍ତୋ

     ମଞ୍ଜୁସ୍ୱନେନ ତବ ନୈଗମିକଂ ସୁବର୍ଣମ୍ ॥ ୧୪.୬୮॥ ୪୪୮॥

ମୁଗ୍ଧସ୍ୟ ହନ୍ତ ଭବତୀଂ ସ୍ତୁବତୋ ମମୈତା-

     ନ୍ୟାକର୍ଣ୍ୟ ନୂନମୟଥାୟଥ ଜଥଲ୍ପିତାନି ।

ଇତ୍ଥଂ ବଦ ତ୍ୱମିତି ଶିକ୍ଷୟିତୁଂ ପ୍ରଣାଦାନ୍

     ମଞ୍ଜୂନୁଦୀରୟସି ମାଧବପାଦୁକେ ତ୍ୱମ୍ ॥ ୧୪.୬୯॥ ୪୪୯॥

ଆଦୌ ସହସ୍ରମିତି ଯତ୍ସହସା ମୟୋକ୍ତଂ

     ତୂଷ୍ଟୂଷତା ନିରବଧିଂ ମହିମାର୍ଣବଂ ତେ ।

ଆମ୍ରେଡୟସ୍ୟଥ କିମେତଦମୃଷ୍ୟମାଣା

     ମଞ୍ଜୁସ୍ୱନେନ ମଧୁଜିନ୍ମଣିପାଦୁକେ ତ୍ୱମ୍ ॥ ୧୪.୭୦॥ ୪୫୦॥

ପରିମିତପରିବର୍ହଂ ପାଦୁକେ ସଞ୍ଚରିଷ୍ଣୌ

     ତ୍ୱୟି ବିନିହିତପାଦେ ଲୀଲୟା ରଙ୍ଗନାଥେ ।

ନିୟମୟତି ବିପଞ୍ଚୀଂ ନିତ୍ୟମେକାନ୍ତସେବୀ

     ନିଶମୟିତୁମୁଦାରାନ୍ନାରଦସ୍ତେ ନିନାଦାନ୍ ॥ ୧୪.୭୧॥ ୪୫୧॥

ବିହରତି ବିଶିଖାୟାଂ ରଙ୍ଗନାଥେ ସଲୀଲଂ

     ଗମନବଶବିଲୋଲୈର୍ଗର୍ଭରତ୍ନୈଃ କ୍ୱଣନ୍ତ୍ୟାଃ ।

ମଣିବଲୟନିନାଦୈର୍ମଞ୍ଜୁଲୈସ୍ତେ ଦିଶନ୍ତି

     ପ୍ରତିବଚନମୁଦାରଂ ପାଦୁକେ ପୌରନାର୍ୟଃ ॥ ୧୪.୭୨॥ ୪୫୨॥

ଅନୁକୃତସବନୀୟସ୍ତୋତ୍ରଶସ୍ତ୍ରାଂ ନିନାଦୈ-

     ରନୁଗତନିଗମାଂ ତ୍ୱାମାସ୍ଥିତୋ ରଙ୍ଗନାଥଃ ।

ଅନିତରବିବୁଧାର୍ହଂ ହବ୍ୟମାସ୍ୱାଦୟିଷ୍ୟନ୍

     ବିଶତି ଚରଣରକ୍ଷେ ଯଜ୍ଞବାଟଂ ଦ୍ୱିଜାନାମ୍ ॥ ୧୪.୭୩॥ ୪୫୩॥

ଚରଣକମଲମେତଦ୍ରଙ୍ଗନାଥସ୍ୟ ନିତ୍ୟଂ

     ଶରଣମିତି ଜନାନାଂ ଦର୍ଶୟନ୍ତୀ ଯଥାବତ୍ ।

ପ୍ରତିପଦମପି ହୃଦ୍ୟଂ ପାଦୁକେ ସ୍ୱାଦୁଭାବା-

     ଦନୁବଦତି ପରଂ ତେ ନାଦମାମ୍ନାୟପଙ୍କ୍ତିଃ ॥ ୧୪.୭୪॥ ୪୫୪॥

ରହିତଭୁଜଗତଲ୍ପେ ତ୍ୱତ୍ସନାଥେ ପ୍ରଜାନାଂ

     ପ୍ରତିଭୟଶମନାୟ ପ୍ରସ୍ଥିତେ ରଙ୍ଗନାଥେ ।

ପ୍ରଥମମୁଦୟମାନଃ ପାଦୁକେ ତୂର୍ୟଘୋଷା-

     ତ୍ପ୍ରତିଫଲତି ନିନାଦଃ ପାଞ୍ଚାଜନ୍ୟେ ତ୍ୱଦୀୟଃ ॥ ୧୪.୭୫॥ ୪୫୫॥

ବକୁଲଧରତନୁସ୍ତ୍ୱଂ ସଂହିତାଂ ଯାମପଶ୍ୟଃ

     ଶ୍ରୁତିପରିଷଦି ତସ୍ୟାଃ ସୌରଭଂ ଯୋଜୟନ୍ତି ।

ହରିଚରଣସରୋଜାମୋଦସମ୍ମୋଦିତାୟାଃ

     ପ୍ରତିପଦରମଣୀୟାଃ ପାଦୁକେ ତେ ନିନାଦାଃ ॥ ୧୪.୭୬॥ ୪୫୬॥

ଦନୁତନୟନିହନ୍ତୁର୍ଜୈତ୍ରୟାତ୍ରାନୁକୂଲେ

     ଶରଦୁପଗମକାଲେ ସହ୍ୟଜାମାପତନ୍ତି ।

ଶ୍ରୁତିମଧୁରମୁଦାରଂ ଶିକ୍ଷିତୁଂ ତେ ନିନାଦଂ

     ପରିହୃତନିଜବାସାଃ ପାଦୁକେ ରାଜହଂସାଃ ॥ ୧୪.୭୭॥ ୪୫୭॥

ବିହରଣସମୟେଷୁ ପ୍ରତ୍ୟହଂ ରଙ୍ଗଭର୍ତୁ-

     ଶ୍ଚରଣନଖମୟୂଖୈଃ ସୋତ୍ତରୀୟା ବିଶୁଦ୍ଧୈଃ ।

ପରିଣମୟସି ନାଦଂ ପାଦୁକେ ଗର୍ଭରତ୍ନୈ-

     ର୍ଦମୟିତୁମିବ ଶିଷ୍ୟାନ୍ ଦୀର୍ଘିକାରାଜହଂସାନ୍ ॥ ୧୪.୭୮॥ ୪୫୮॥

ପରିଷଦି ବିରତାୟାଂ ପାଦୁକେ ରଙ୍ଗଭର୍ତୁଃ

     ପରିଜନମପବାର୍ୟ ପ୍ରସ୍ଥିତସ୍ୟାବରୋଧାନ୍ ।

ମଣିନିକରସମୁଦ୍ୟନ୍ମଞ୍ଜୁନାଦାପଦେଶା-

     ଦଭିଲପସି ଯଥାର୍ହଂ ନୂନମାଲୋକଶବ୍ଦମ୍ ॥ ୧୪.୭୯॥ ୪୫୯॥

ଗୁରୁଜନନିୟତଂ ତଦ୍ଗୋପିକାନାଂ ସହସ୍ରଂ

     ଦିନକରତନୟାୟାଃ ସୈକତେ ଦିବ୍ୟଗୋପଃ ।

ବଶମନୟଦୟତ୍ନାଦ୍ୱଂଶନାଦାନୁୟାତୈ-

     ସ୍ତବ ଖଲୁ ପଦରକ୍ଷେ ତାଦୃଶୈର୍ମଞ୍ଜୁନାଦୈଃ ॥ ୧୪.୮୦॥ ୪୬୦॥

ନିଜପଦବିନିବେଶାନ୍ନିର୍ୱିଶେଷପ୍ରଚାରାନ୍

     ପରିଣମୟତି ଭକ୍ତାନ୍ ରଙ୍ଗନାଥୋ ଯଥା ମାମ୍ ।

ଇତି ବିହରଣକାଲେ ମଞ୍ଜୁଶିଞ୍ଜାବିଶେଷୈ-

     ର୍ହିତମୁପଦିଶସୀବ ପ୍ରାଣିନାଂ ପାଦୁକେ ତ୍ୱମ୍ ॥ ୧୪.୮୧॥ ୪୬୧॥

ଅୟମୟମିତି ତୈସ୍ତୈଃ କଲ୍ପିତାନଧ୍ୱଭେଦାନ୍

     ପ୍ରତିପଦମବଲୋକ୍ୟ ପ୍ରାଣିନାଂ ବ୍ୟାକୁଲାନାମ୍ ।

ଚଟୁଲମଣିକଲାପୈଃ ଶୌରିପାଦାବନି ତ୍ୱଂ

     ମୁଖରୟସି ବିହାରୈର୍ମୁକ୍ତିଘଣ୍ଟାପଥାଗ୍ର୍ୟମ୍ ॥ ୧୪.୮୨॥ ୪୬୨॥

ପଦକମଲମୁଦାରଂ ଦର୍ଶୟନ୍ତୀ ମୁରାରେଃ

     କଲମଧୁରନିନାଦା ଗର୍ଭରତ୍ନୈର୍ୱିଲୋଲୈଃ ।

ବିଷମବିଷୟତୃଷ୍ଣାବ୍ୟାକୁଲାନି ପ୍ରଜାନା-

     ମଭିମୁଖୟସି ନୂନଂ ପାଦୁକେ ମାନସାନି ॥ ୧୪.୮୩॥ ୪୬୩॥

ମଧୁରିପୁପଦରକ୍ଷେ ମନ୍ଦବୁଦ୍ଧୌ ମୟି ତ୍ୱା-

     ମନବଧିମହିମାନଂ ତ୍ୱତ୍ପ୍ରସାଦାତ୍ ସ୍ତୁବାନେ ।

ମଣିନିକରସମୁତ୍ଥୈର୍ମଞ୍ଜୁନାଦୈଃ କବୀନା-

     ମୁପରମୟସି ତାଂସ୍ତାନ୍ନୂନମୁତ୍ସେକବାଦାନ୍ ॥ ୧୪.୮୪॥ ୪୬୪॥

ଶରଣମୁପଗତେ ତ୍ୱାଂ ଶାର୍ଙ୍ଗିଣଃ ପାଦରକ୍ଷେ

     ସକୃଦିତି ବିଧିସିଦ୍ଧଂ ତ୍ୟକ୍ତୁକାମେ ବିମୋହାତ୍ ।

ପ୍ରଚଲିତମଣିଜାଲବ୍ୟଞ୍ଜିତୈଃ ଶିଞ୍ଜିତୈଃ ସ୍ୱୈ-

     ରଲମଲମିତି ନୂନଂ ବାରୟସ୍ୟାଦରେଣ ॥ ୧୪.୮୫॥ ୪୬୫॥

ବିକଲକରଣବୃତ୍ତୌ ବିହ୍ୱଲାଙ୍ଗେ ବିଲକ୍ଷଂ

     ବିଲପତି ମୟି ମୋହାଦ୍ବିଭ୍ରତୀ ଶୌରିପାଦମ୍ ।

ପରିସରମଧିଗନ୍ତୁଂ ପଶ୍ୟ ପାଦାବନି ତ୍ୱଂ

     ପ୍ରତିଭୟମଖିଲଂ ମେ ଭର୍ତ୍ସୟନ୍ତୀ ନିନାଦୈଃ ॥ ୧୪.୮୬॥ ୪୬୬॥

କରଣବିଗମକାଲେ କାଲହୁଙ୍କାରଶଙ୍କୀ

     ଦ୍ରୁତପଦମୁପଗଚ୍ଛନ୍ ଦତ୍ତହସ୍ତଃ ପ୍ରିୟାଭ୍ୟାମ୍ ।

ପରିଣମୟତୁ କର୍ଣେ ରଙ୍ଗନାଥଃ ସ୍ୱୟଂ ନଃ

     ପ୍ରଣବମିବ ଭବତ୍ୟାଃ ପାଦୁକେ ମଞ୍ଜୁନାଦମ୍ ॥ ୧୪.୮୭॥ ୪୬୭॥

କମଲବନସଖୀଂ ତାଂ କୌମୁଦୀମୁଦ୍ୱହନ୍ତଂ

     ସବିଧମୁପନୟନ୍ତୀ ତାଦୃଶଂ ରଙ୍ଗଚନ୍ଦ୍ରମ୍ ।

ପ୍ରଲୟଦିନସମୁତ୍ଥାନ୍ପାଦୁକେ ମାମକୀନାନ୍

     ପ୍ରଶମୟ ପରିତାପାନ୍ ଶୀତଲୈଃ ଶିଞ୍ଜିତୈଃ ସ୍ୱୈଃ ॥ ୧୪.୮୮॥ ୪୬୮॥

ପ୍ରଶମୟତୁ ଭୟଂ ନଃ ପଶ୍ଚିମଶ୍ୱାସକାଲେ

     ରହସି ବିହରଣଂ ତେ ରଙ୍ଗନାଥେନ ସାର୍ଧମ୍ ।

ନିୟତମନୁବିଧତ୍ତେ ପାଦୁକେ ଯନ୍ନିନାଦୋ

     ନିଖିଲଭୁବନରକ୍ଶାଘୋଷଣାଘୋଷଲୀଲାମ୍ ॥ ୧୪.୮୯॥ ୪୬୯॥

ତ୍ରିକବିନିହିତହସ୍ତଂ ଚିନ୍ତୟିତ୍ୱା କୃତାନ୍ତଂ

     ଗତବତି ହୃଦି ମୋହଂ ଗଚ୍ଛତା ଜୀବିତେନ ।

ପରିକଲୟତୁ ବୋଧଂ ପାଦୁକେ ଶିଞ୍ଜିତଂ ତେ

     ତ୍ୱରୟିତୁମିବ ସଜ୍ଜଂ ତ୍ୱଦ୍ୱିଧେୟଂ ମୁକୁନ୍ଦମ୍ ॥ ୧୪.୯୦॥ ୪୭୦॥

ଉପଘ୍ନଂ ସମ୍ବିତ୍ତେରୁପନିଷଦୁପୋଦ୍ଧାତବଚନଂ

     ତବ ଶ୍ରାବଂ ଶ୍ରାବଂ ଶ୍ରୁତିସୁଭଗମନ୍ତର୍ମଣିରବମ୍ ।

ବିଜୃମ୍ଭନ୍ତେ ନୂନଂ ମଧୁମଥନପାଦାବନି ମମ

     ଦ୍ରବୀଭୂତଦ୍ରାକ୍ଷାମଧୁରିମଧୁରୀଣାଃ ଫଣିତୟଃ ॥ ୧୪.୯୧॥ ୪୭୧॥

ବିଲାସୈଃ କ୍ରୀଣନ୍ତୋ ନିଖିଲଜନଚେତାଂସି ବିବିଧା

     ବିହାରାସ୍ତେ ରଙ୍ଗକ୍ଷିତିରମଣପାଦାବନି ମୁହୁଃ ।

ବିଗାହନ୍ତାମନ୍ତର୍ମମ ବିଲୁଠଦନ୍ତର୍ମଣିଶିଲା-

     ଖଲାତ୍କାରବ୍ୟାଜକ୍ଷରଦମୃତଧାରାଧମନୟଃ ॥ ୧୪.୯୨॥ ୪୭୨॥

ଶ୍ରୁତିଶ୍ରେଣୀସ୍ଥେୟଶ୍ରୁତିସୁଭଗଶିଞ୍ଜାମୁଖରିତାଂ

     ଭଜେମ ତ୍ୱାଂ ପଦ୍ମାରମଣଚରଣତ୍ରାୟିଣି ପରମ୍ ।

ନ ମୁଦ୍ରାନିଦ୍ରାଣଦ୍ରବିଣକଣବିଶ୍ରାଣନଦଶା-

     ବିଶାଲାହଙ୍କାରଂ କମପି ଘନହୁଙ୍କାରପରୁଷମ୍ ॥ ୧୪.୯୩॥ ୪୭୩॥

ତବୈତଚ୍ଛ୍ରୀରଙ୍ଗକ୍ଷିତିପତିପଦତ୍ରାୟିଣି ନୃଣାଂ

     ଭବତ୍ୟାଗଶ୍ଚିନ୍ତାରଣରଣକଭଙ୍ଗାୟ ରଣିତମ୍ ।

ଶରୀରେ ସ୍ୱଂ ଭାବଂ ପ୍ରଥୟତି ଯଦାକର୍ଣନବଶା-

     ନ୍ନ ନଃ କର୍ଣେ ଭାବୀ ଯମମହିଷଘନ୍ଟାଘଣଘଣଃ ॥ ୧୪.୯୪॥ ୪୭୪॥

ପରିତ୍ରସ୍ତାଃ ପୁଣ୍ୟଦ୍ରବପତନବେଗାତ୍ପ୍ରଥମତଃ

     କ୍ଷରଦ୍ଭିଃ ଶ୍ରୀରଙ୍ଗକ୍ଷିତିରମଣପାଦାବନି ତଦା ।

ବିଦାମାସୁର୍ଦେବା ବଲିମଥନସଂରମ୍ଭମନଘୈଃ

     ପ୍ରଣାଦୈସ୍ତେ ସଦ୍ୟଃ ପଦକମଲବିକ୍ରାନ୍ତିପିଶୁନୈଃ ॥ ୧୪.୯୫॥ ୪୭୫॥

ସ୍ୱେଷୁ ସ୍ୱେଷୁ ପଦେଷୁ କିଂ ନିୟମୟସ୍ୟଷ୍ଟୌ ଦିଶାମୀଶ୍ୱରାନ୍

     ସ୍ୱୈରାଲାପକଥାଃ ପ୍ରବର୍ତୟସି କିଂ ତ୍ରୟ୍ୟା ସହାସୀନୟା ।

ରଙ୍ଗେଶସ୍ୟ ସମସ୍ତଲୋକମହିତଂ ପ୍ରାପ୍ତା ପଦାମ୍ଭୋରୁହଂ

     ମା ଭୈଷୀରିତି ମାମୁଦୀରୟସି ବା ମଞ୍ଜୁସ୍ୱନୈଃ ପାଦୁକେ ॥ ୧୪.୯୬॥ ୪୭୬॥

ରଙ୍ଗେ ଦେବି ରଥାଙ୍ଗପାଣିଚରଣସ୍ୱଚ୍ଛନ୍ଦଲୀଲାସଖି

     ସ୍ତୋକସ୍ପନ୍ଦିତରମ୍ୟବିଭ୍ରମଗତିପ୍ରସ୍ତାବକଂ ତାବକମ୍ ।

କାଲୋପାଗତକାଲକିଙ୍କରଚମୂହୁଙ୍କାରପାରମ୍ପରୀ-

     ଦୁର୍ୱାରପ୍ରତିବାବଦୂକମନଘଂ ଶ୍ରୋଷ୍ୟାମି ଶିଞ୍ଜାରବମ୍ ॥ ୧୪.୯୭॥ ୪୭୭॥

ତ୍ୱଚ୍ଛିଞ୍ଜାରବଶର୍କରାରସସଦାସ୍ୱାଦାତ୍ ସତାମୁନ୍ମଦା

     ମାତର୍ମାଧବପାଦୁକେ ବହୁବିଦାଂ ପ୍ରାୟଃ ଶ୍ରୁତିର୍ମୁହ୍ୟତି ।

ସାରାସାରସକୃଦ୍ୱିମର୍ଶନପରିମ୍ଲାନାକ୍ଷରଗ୍ରନ୍ଥିଭି-

     ର୍ଗ୍ରନ୍ଥୈସ୍ତ୍ୱାମିହ ବର୍ଣୟାମ୍ୟହମତସ୍ତ୍ରାସତ୍ରପାବର୍ଜିତଃ ॥ ୧୪.୯୮॥ ୪୭୮॥

ତବାମ୍ବ କିଲ ଖେଲତାଂ ଗତିବଶେନ ଗର୍ଭାଶ୍ମନାଂ

     ରମାରମଣପାଦୁକେ କିମପି ମଞ୍ଜୁଭିଃ ଶିଞ୍ଜିତୈଃ ।

ପଦସ୍ତୁତିବିଧାୟିଭିସ୍ତ୍ୱଦନୁଭାବସିଦ୍ଧାନ୍ତିଭିଃ

     ସୟୂଥ୍ୟକଲହାୟିତଂ ଶ୍ରୁତିଶତଂ ସମାପଦ୍ୟତେ ॥ ୧୪.୯୯॥ ୪୭୯॥

କ୍ଷିପତି ମଣିପାଦରକ୍ଷେ ନାଦୈର୍ନୂନଂ ସମାଶ୍ରିତତ୍ରାଣେ ।

ରଙ୍ଗେଶ୍ୱରସ୍ୟ ଭବତୀ ରକ୍ଷାପେକ୍ଷାପ୍ରତୀକ୍ଷଣବିଲମ୍ବମ୍ ॥ ୧୪.୧୦୦॥ ୪୮୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ନାଦପଦ୍ଧତିଶ୍ଚତୁର୍ଦଶୀ ॥

୧୫. ରତ୍ନସାମାନ୍ୟପଦ୍ଧତିଃ (୫୦)

ଉଦର୍ଚିଷସ୍ତେ ରଙ୍ଗେନ୍ଦ୍ରପାଦାବନି ବହିର୍ମଣୀନ୍ ।

ଅନ୍ତର୍ମଣିରବଂ ଶ୍ରୁତ୍ୱା ମନ୍ୟେ ରୋମାଞ୍ଚିତାକୃତୀନ୍ ॥ ୧୫.୧॥ ୪୮୧॥

ବିଧେହି ଶୌରେର୍ମଣିପାଦୁକେ ତ୍ୱଂ

     ବିପଦ୍ୟମାନେ ମୟି ରଶ୍ମିଜାଲୈଃ ।

ଆସୀଦତାମନ୍ତକକିଙ୍କରାଣାଂ

     ବିତ୍ରାସନାନ୍ ବେତ୍ରଲତାବିଶେଷାନ୍ ॥ ୧୫.୨॥ ୪୮୨॥

ମୁକୁନ୍ଦପାଦାବନି ମଧ୍ୟନାଡ୍ୟା

     ମୂର୍ଧନ୍ୟଯା ନିଷ୍ପତତୋ ମୁମୁକ୍ଷୋଃ ।

ଆବ୍ରହ୍ମଲୋକାଦବଲମ୍ବନାର୍ଥଂ

     ରତ୍ନାନି ତେ ରଶ୍ମିଗଣଂ ସୃଜନ୍ତି ॥ ୧୫.୩॥ ୪୮୩॥

ଅସୂର୍ୟଭେଦ୍ୟାଂ ରଜନୀଂ ପ୍ରଜାନାମ୍

     ଆଲୋକମାତ୍ରେଣ ନିବାରୟନ୍ତୀ ।

ଅମୋଘବୃତ୍ତିର୍ମଣିପାଦରକ୍ଷେ

     ମୁରଦ୍ୱିଷୋ ମୂର୍ତିମତୀ ଦୟା ତ୍ୱମ୍ ॥ ୧୫.୪॥ ୪୮୪॥

ରଙ୍ଗେଶପାଦାବନି ତାବକାନାଂ

     ରତ୍ନୋପଲାନାଂ ଦ୍ୟୁତୟଃ ସ୍ଫୁରନ୍ତି ।

ଶ୍ରେୟଃଫଲାନାଂ ଶ୍ରୁତିବଲ୍ଲରୀଣାମ୍

     ଉପଘ୍ନଶାଖା ଇବ ନିର୍ୱ୍ୟପାୟାଃ ॥ ୧୫.୫॥ ୪୮୫॥

କସ୍ୟାପି ପୁଂସଃ କନକାପଗାୟାଃ

     ପୁଣ୍ୟେ ସଲୀଲଂ ପୁଲିନେ ଶୟାଲୋଃ ।

ସମୀପବୃତ୍ତିର୍ମଣିପାଦୁକେ ତ୍ୱଂ

     ସମ୍ବାହୟନ୍ତୀବ ପଦଂ କରୈଃ ସ୍ୱୈଃ ॥ ୧୫.୬॥ ୪୮୬॥

ଦିଦୃକ୍ଷମାଣସ୍ୟ ପରଂ ନିଧାନଂ

     ସ୍ନେହାନ୍ୱିତେ ଯୋଗଦଶାବିଶେଷେ ।

ସମ୍ବିତ୍ପ୍ରଦୀପଂ ମଣିପାଦରକ୍ଷେ

     ସନ୍ଧୁକ୍ଷୟନ୍ତୀବ ମରୀଚୟସ୍ତେ ॥ ୧୫.୭॥ ୪୮୭॥

ସମାଧିଭାଜାଂ ତନୁତେ ତ୍ୱଦୀୟା

     ରଙ୍ଗେଶପାଦାବନି ରତ୍ନପଙ୍କ୍ତିଃ ।

ସ୍ଥାନଂ ପ୍ରୟାତୁଂ ତମସଃ ପରଂ ତ-

     ତ୍ପ୍ରଦୀପକୃତ୍ୟଂ ପ୍ରଭୟା ମହତ୍ୟା ॥ ୧୫.୮॥ ୪୮୮॥

ବଧ୍ନାସି ରଙ୍ଗେଶ୍ୱରପାଦରକ୍ଷେ

     ମନ୍ୟେ ଯଥାର୍ହଂ ମଣିରଶ୍ମିଜାଲୈଃ ।

ସେବାନତାନାଂ ତ୍ରିଦଶେଶ୍ୱରାଣାଂ

     ଶେଷାପଟୀଂ ଶେଖରସନ୍ନିକୃଷ୍ଟାମ୍ ॥ ୧୫.୯॥ ୪୮୯॥

ଭଜନ୍ତି ରଙ୍ଗେଶ୍ୱରପାଦରକ୍ଷେ

     ପ୍ରକଲ୍ପୟନ୍ତୋ ବିବିଧାନ୍ପୁମର୍ଥାନ୍ ।

ଉଦର୍ଚିଷଶ୍ଚିନ୍ତୟତାଂ ଜନାନାଂ

     ଚିନ୍ତାମଣିତ୍ୱଂ ମଣୟସ୍ତ୍ୱଦୀୟାଃ ॥ ୧୫.୧୦॥ ୪୯୦॥

ନାଥସ୍ୟ ଦତ୍ତେ ନଦରାଜକନ୍ୟା

     ପାତୁଂ ଶୁଭାନ୍ପାଦନଖେନ୍ଦୁରଶ୍ମୀନ୍ ।

ମଣିପ୍ରଭାଭିଃ ପ୍ରତିପନ୍ନପକ୍ଷାଂ

     ଲୀଲାଚକୋରୀମିବ ପାଦୁକେ ତ୍ୱାମ୍ ॥ ୧୫.୧୧॥ ୪୯୧॥

ଜନସ୍ୟ ରଙ୍ଗେଶ୍ୱରପାଦୁକେ ତ୍ୱଂ

     ଜାତାନୁକମ୍ପା ଜନୟସ୍ୟଯତ୍ନାତ୍ ।

ଆକୃଷ୍ୟ ଦୂରାନ୍ମଣିରଶ୍ମିଜାଲୈ-

     ରନନ୍ୟଲକ୍ଷାଣି ବିଲୋଚନାନି ॥ ୧୫.୧୨॥ ୪୯୨॥

ରଙ୍ଗେଶପାଦାବନି ତାବକୀନୈଃ

     ସ୍ପୃଷ୍ଟାଃ କଦାଚିନ୍ମଣିରଶ୍ମିପାଶୈଃ ।

କାଲସ୍ୟ ଘୋରଂ ନ ଭଜନ୍ତି ଭୂୟଃ

     କାରାଗୃହାନ୍ତେଷୁ କଶାଭିଘାତମ୍ ॥ ୧୫.୧୩॥ ୪୯୩॥

ରତ୍ନାନି ରଙ୍ଗେଶ୍ୱରପାଦରକ୍ଷେ

     ତ୍ୱଦାଶ୍ରିତାନ୍ୟପ୍ରତିଘୈର୍ମୟୂଖୈଃ ।

ଆସେଦୁଷୀଣାଂ ଶ୍ରୁତିସୁନ୍ଦରୀଣାଂ

     ବିତନ୍ୱତେ ବର୍ଣନିଚୋଲଲକ୍ଷ୍ମୀମ୍ ॥ ୧୫.୧୪॥ ୪୯୪॥

ନିଦ୍ରାରସପ୍ରଣୟିନୋ ମଣିପାଦରକ୍ଷେ

     ରଙ୍ଗେଶ୍ୱରସ୍ୟ ସବିଧଂ ପ୍ରତିପଦ୍ୟମାନା ।

ଶୟ୍ୟାଫଣୀନ୍ଦ୍ରମଭିତୋ ଭବତୀ ବିଧତ୍ତେ

     ରତ୍ନାଂଶୁଭିର୍ୟବନିକାମିବ ଦର୍ଶନୀୟାମ୍ ॥ ୧୫.୧୫॥ ୪୯୫॥

ସଦ୍ୟସ୍ତ୍ୱଦୁଦ୍ଗ୍ରହଦଶାନମିତାକୃତୀନାଂ

     ସ୍ରସ୍ତାଂଶୁକଂ ନିଜରୁଚା ମଣିପାଦୁକେ ତ୍ୱମ୍ ।

ପଦ୍ମାସହାୟପରିବାରବିଲାସିନୀନାଂ

     ପଟ୍ଟାଂଶୁକୈରିବ ପୟୋଧରମାବୃଣୋଷି ॥ ୧୫.୧୬॥ ୪୯୬॥

ଦେବସ୍ୟ ରଙ୍ଗବସତେଃ ପୁରତଃ ପ୍ରବୃତ୍ତୈ-

     ରୁଦ୍ଧୂତବିଶ୍ୱତିମିରାଂ ମଣିରଶ୍ମିଜାଲୈଃ ।

ମନ୍ୟେ ମଦୀୟହୃଦୟାୟତନପ୍ରବେଶ-

     ମାଙ୍ଗଲ୍ୟଦୀପକଣିକାଂ ମଣିପାଦୁକେ ତ୍ୱାମ୍ ॥ ୧୫.୧୭॥ ୪୯୭॥

ଆକୀର୍ଣରତ୍ନନିକରାଂ ମଣିପାଦୁକେ ତ୍ୱାଂ

     ରଙେଶ୍ୱରସ୍ୟ ଲଲିତାଂ ବିପଣିଂ ପ୍ରତୀମଃ ।

ଯତ୍ସଂଶ୍ରୟେଣ ଭବତି ସ୍ଥିରଭକ୍ତିମୂଲ୍ୟଂ

     କୈବଲ୍ୟମତ୍ର ଜଗତାଂ କ୍ରୟବିକ୍ରୟାର୍ହମ୍ ॥ ୧୫.୧୮॥ ୪୯୮॥

ବ୍ୟଙ୍କ୍ତୁଂ କ୍ଷମଂ ଭଗବତୋ ଜଗଦୀଶ୍ୱରତ୍ୱଂ

     ବଜ୍ରାଙ୍କୁଶଧ୍ୱଜସରୋରୁହଚକ୍ରଚିହ୍ନମ୍ ।

ଆଶ୍ଲିଷ୍ୟ ନିର୍ଭରରୁଚିଂ ମଣିପାଦୁକେ ତ୍ୱା-

     ମାସୀଦନାଭରଣସୁନ୍ଦରମଙ୍ଘ୍ରିପଦ୍ମମ୍ ॥ ୧୫.୧୯॥ ୪୯୯॥

ରତ୍ନପ୍ରଭାପଟଲଚକ୍ରମନୋହରା ତ୍ୱଂ

     ପଦ୍ମାରୁଣଂ ପଦମିଦଂ ତ୍ୱୟି ରଙ୍ଗଭର୍ତୁଃ ।

ମନ୍ୟେ ତଦେତଦୁଭୟଂ ମଣିପାଦରକ୍ଷେ

     ଚକ୍ରାବ୍ଜମଣ୍ଡଲମକିଞ୍ଚନରକ୍ଷଣାର୍ଥମ୍ ॥ ୧୫.୨୦॥ ୫୦୦॥

ତ୍ରାସାତ୍ସ୍ୱୟଂ ପ୍ରଣମତାଂ ଦନୁଜେଶ୍ୱରାଣାଂ

     ସଙ୍ଖ୍ୟେଽବଲୂନଶିରସାମପି ମୌଲିରତ୍ନୈଃ ।

ଆୟୋଜୟତ୍ୟନୁକଲଂ ମଣିପାଦୁକେ ତ୍ୱାଂ

     ସୈରନ୍ଧ୍ରିକେବ ମୁରବୈରିକୃପାଣଧାରା ॥ ୧୫.୨୧॥ ୫୦୧॥

ଆସ୍କନ୍ଦନାନି ବିବୁଧେନ୍ଦ୍ରଶିଖାମଣୀନାଂ

     ତ୍ୱାମାଶ୍ରିତାନ୍ୟସୁରସୂଦନପାଦରକ୍ଷେ ।

ରତ୍ନାନି ତେ ସ୍ତୁତିସୁବର୍ଣପରୀକ୍ଷଣାର୍ଥେ

     ନୂନଂ ଭଜନ୍ତି ନିକଷୋପଲତାଂ କବୀନାମ୍ ॥ ୧୫.୨୨॥ ୫୦୨॥

ପାଦାବନି ପ୍ରଣୟିନାଂ ପ୍ରତିପାଦିତାର୍ଥାଂ

     କ୍ରୀଡାସରୋଜମିବ ଶୌରିପଦଂ ବହନ୍ତୀମ୍ ।

ପ୍ରତ୍ୟୁପ୍ତରତ୍ନନିକରପ୍ରତିପନ୍ନଶୋଭାଂ

     ପଶ୍ୟାମି ରୋହଣଗିରେରଧିଦେବତାଂ ତ୍ୱାମ୍ ॥ ୧୫.୨୩॥ ୫୦୩॥

ଯାମେବ ରତ୍ନକିରଣୈର୍ମଣିପାଦାକ୍ଷେ

     କ୍ରୀଡାସରୋଜମିବ ଶୌରିପଦଂ ଭଜନ୍ତୀମ୍ ।  var  ବହନ୍ତୀମ୍

ପ୍ରତ୍ୟୁପ୍ତରତ୍ନନିକରପ୍ରତିପନ୍ନଶୋଭାଂ

     ପଶ୍ୟାମି ରୋହଣଗିରେରଧିଦେବତାଂ ତ୍ୱାମ୍ ॥ ୧୫.୨୪॥ ୫୦୪॥

ରତ୍ନାଙ୍କୁରୈରବିରଲା ମଣିପାଦରକ୍ଷେ

     ପାକୋନ୍ମୁଖୈଃ ପରିଗତା ପୁରୁଷାର୍ଥସସ୍ୟୈଃ ।

ଦେବେନ ରଙ୍ଗପତିନା ଜଗତାଂ ବିଭୂତ୍ୟୈ

     କେଦାରିକେବ କୃପୟା ପରିକଲ୍ପିତା ତ୍ୱମ୍ ॥ ୧୫.୨୫॥ ୫୦୫॥

ନିର୍ଧୂତମୋହତିମିରାସ୍ତବ ରତ୍ନଦୀପୈ-

     ର୍ନିର୍ୱିଶ୍ୟମାନବିଭବଂ ନଦରାଜପୁତ୍ର୍ୟା ।

ପ୍ରତ୍ୟକ୍ଷୟନ୍ତି ନିଗମାନ୍ତନିଗୂଧମର୍ଥଂ

     ପାଦାବନି ତ୍ୱୟି ନିବେଶିତଭାବବନ୍ଧାଃ ॥ ୧୫.୨୬॥ ୫୦୬॥

ରତ୍ନୋପଲପ୍ରକରସମ୍ଭବ ଏଷ ଦୂରା-

     ଦ୍ରଙ୍ଗାଧିରାଜଚରଣାବନି ତାବକୀନଃ ।

ଆର୍ଦ୍ରାପରାଧପରିଖିନ୍ନଧିୟାଂ ପ୍ରଜାନା-

     ମାଶ୍ୱାସନାର୍ଥ ଇବ ଭାତି କରପ୍ରସାରଃ ॥ ୧୫.୨୭॥ ୫୦୭॥

ବ୍ୟାମୁହ୍ୟତୋ ବିଷୟିବାଲମୃଗାନ୍ମଦୀୟାନ୍

     ସଂସାରଘର୍ମଜନିତାସୁ ମରୀଚିକାସୁ ।

ପାଦାବନି ପ୍ରଗୁଣରତ୍ନମରୀଚିଜାଲୈ-

     ରାକୃଷ୍ୟ ବିଶ୍ରମୟ କେଶବକାନ୍ତିସିନ୍ଧୌ ॥ ୧୫.୨୮॥ ୫୦୮॥

ଅନ୍ତର୍ନିଧାୟ ମୁନିଭିଃ ପରିରକ୍ଷମାଣାମ୍-

     ଆତ୍ମୀୟରଶ୍ମିଗୁଣିତାଂ ମଣିପାଦରକ୍ଷେ ।

ରଙ୍ଗେଶପାଦକମଲପ୍ରତିପନ୍ନମୁଦ୍ରାଂ

     ନୀବୀମବୈମି ଭବତୀଂ ନିଗମାନ୍ତବାଚାମ୍ ॥ ୧୫.୨୯॥ ୫୦୯॥

ରାମସ୍ୟ ରଙ୍ଗବସତେଶ୍ଚରଣାନୁଷଙ୍ଗା-

     ତ୍କାଷ୍ଠାଂ ଗତାଂ ପରମପାବନତାଂ ଦଧାନା ।  var  ଭୁବନପାବନତାମ୍

ପାଦାବନି ପ୍ରଚୁରରତ୍ନଶିଲାନିବଦ୍ଧା

     ସଂସାରସନ୍ତରଣସେତୁରସି ପ୍ରଜାନାମ୍ ॥ ୧୫.୩୦॥ ୫୧୦॥

ଦିବିଷନ୍ମକୁଟେଷୁ ସଞ୍ଚରନ୍ତ୍ୟାଃ ପ୍ରଚୁରସ୍ତେ ମଣିପାଦୁକେ ପ୍ରକାଶଃ ।

ଦିବି ରଙ୍ଗପତେର୍ମହୋତ୍ସବାର୍ଥଂ ବିତତା ବନ୍ଦନମାଲିକେବ ଭାତି ॥ ୧୫.୩୧॥ ୫୧୧॥

ପ୍ରଭବନ୍ତି ଦବୀୟସାଂ ସ୍ୱଭାବା-

     ତ୍ତବ ରତ୍ନାନି ମୁକୁନ୍ଦପାଦରକ୍ଷେ ।

ଅୟସାମିବ ହନ୍ତ ଲୋହକାନ୍ତାଃ

     କଠିନାନାଂ ମନସାଂ ବିକର୍ଷଣାୟ ॥ ୧୫.୩୨॥ ୫୧୨॥

ପରିପଶ୍ୟତି ଦେବି ରଙ୍ଗନାଥେ ରହସି ତ୍ୱଂ ସବିଧେ ନିବିଶ୍ୟ ଲକ୍ଷ୍ମ୍ୟାଃ ।

ପରିପୁଷ୍ୟସି ରତ୍ନଧାମଭିଃ ସ୍ୱୈରନସୂୟେବ ମନୋଜ୍ଞମଙ୍ଗରାଗମ୍ ॥ ୧୫.୩୩॥ ୫୧୩॥

ତବ ରତ୍ନକରାର୍ପିତଂ ନବୀନଂ ପରିଗୃହ୍ୟ ସ୍ଥିରମଂଶୁକଂ ମନୋଜ୍ଞମ୍ ।

ଜରଦଂଶୁକତ୍ସୁଖେନ ଦେହଂ କୃତିନଃ କେଶବପାଦୁକେ ତ୍ୟଜନ୍ତି ॥ ୧୫.୩୪॥ ୫୧୪॥

ଅଭିତୋ ମଣିପାଦୁକେ ନିବଦ୍ଧୈଃ

     କୃତସଂସ୍କାରବିଶେଷମାତ୍ମରତ୍ନୈଃ ।

କୁରୁତେ ଭବତୀ ପଦଂ ମୁରାରେଃ

     କଠିନେଽସ୍ମିନ୍ ହୃଦି ମେ ନିବେଶୟୋଗ୍ୟମ୍ ॥ ୧୫.୩୫॥ ୫୧୫॥

ନିଜରତ୍ନକରାଞ୍ଚଲୈର୍ମଦୀୟାନପରାଧାନବଧୂୟ ଦତ୍ତସାମ୍ୟା ।

ରମୟା ସହିତସ୍ୟ ରଙ୍ଗଭର୍ତୁଃ ପଦୟୋରର୍ପୟ ପାଦୁକେ ସ୍ୱୟଂ ମାମ୍ ॥ ୧୫.୩୬॥ ୫୧୬॥

ରଶ୍ମିଜାଲପରିବେଷବନ୍ଧୁରା ରଙ୍ଗଭୂମିପତିରତ୍ନପାଦୁକେ ।

ବିଶ୍ୱଲୋଚନବିହଙ୍ଗହାରିଣୀ ବାଗୁରେବ ବିତତା ବିରାଜସେ ॥ ୧୫.୩୭॥ ୫୧୭॥

ମାନସାମ୍ବୁଜବିକାସହେତୁଭିଃ ସେବିତା ମଣିଗଣୈଃ ପ୍ରଭାକରୈଃ ।

ପାଦୁକେ ବହସି ସଦ୍ଭିରାଶ୍ରିତାଂ ଦେବି ବିଷ୍ଣୁପଦସମ୍ପଦଂ ନବାମ୍ ॥ ୧୫.୩୮॥ ୫୧୮॥

ଅଧିଶୟିତଫଣିଶ୍ୱରସ୍ୟ ଶୌରେଃ

     ସ୍ୱୟମଧିରୂଢପଦୋପଧାନପାର୍ଶ୍ୱା ।

ମଣିବଲୟଜୁଷା କରେଣ ମନ୍ଦଂ

     ସ୍ପୃଶସି ପଦାବନି ପାଦୟୋର୍ୟୁଗଂ ତତ୍ ॥ ୧୫.୩୯॥ ୫୧୯॥

ଭବତ୍ୟନ୍ତେ ତ୍ୱାଂ ପ୍ରଣତସ୍ୟ ଜନ୍ତୋ-

     ସ୍ତଦୋକୋଽଗ୍ରଜ୍ୱଲନଂ ତ୍ୱତ୍ପ୍ରକାଶୈଃ ।

ଯତୋ ନାଡ୍ୟା ମଧ୍ୟମୟା ବିନିର୍ୟନ୍

     ଗତିଂ ବିନ୍ଦେତ୍ କେଶବପାଦରକ୍ଷେ ॥ ୧୫.୪୦॥ ୫୨୦॥

ଅଶିଥିଲପରିଣଦ୍ଧା ରଶ୍ମିଜାଲୈର୍ମଣୀନାଂ

     ଦୁରଧିଗମତମଂ ନଃ ପାରମାରୋପୟନ୍ତୀ ।

କମଲନୟନମାଦ୍ୟଂ କର୍ଣଧାରଂ ଦଧାନା

     ଭବସି ଭବପୟୋଧେଃ ପାଦୁକେ ପୋତପାତ୍ରୀ ॥ ୧୫.୪୧॥ ୫୨୧॥

ମଣିଗଣକିରଣୈସ୍ତେ କଲ୍ପିତେ ଗୁଲ୍ମଭେଦେ

     ମୃଗୟୁରିବ କୁରଙ୍ଗୀଂ ତ୍ୱାଂ ପୁରସ୍କୃତ୍ୟ ଭବ୍ୟାମ୍ ।

ହରତି ଚରଣରକ୍ଷେ ଭକ୍ତିପାଶାବରୁଦ୍ଧଂ

     ହୃଦୟହରିଣୟୂଥଂ ପ୍ରାଣିନାଂ ରଙ୍ଗନାଥଃ ॥ ୧୫.୪୨॥ ୫୨୨॥

ପରିଚିତପଦମୂଲା ପାଦୁକେ ରଙ୍ଗିଣସ୍ତ୍ୱଂ

     ପ୍ରଭବତି ଭୁଜମଧ୍ୟେ କୌସ୍ତୁଭୋଽୟଂ ତଥାଽପି ।

ଭବତି ଭୃଶମଧସ୍ତାତ୍ ତେଜସା ଭବ୍ୟଭୂମ୍ନା

     ଶଲଭିତଦୁରିତାନାଂ ତାବକାନାଂ ମଣୀନାମ୍ ॥ ୧୫.୪୩॥ ୫୨୩॥

କଲ୍ପଶ୍ରେଣୀଦିନପରିଣତୌ ଜନ୍ତୁଜାଲେ ପ୍ରସୁପ୍ତେ

     ବିଷ୍ୱଗ୍ୱ୍ୟାପ୍ତେ ଜଗତି ତମସା ପାଦୁକେ ତାଦୃଶେନ ।

ସ୍ତ୍ୟାନାଲୋକୈସ୍ତବ ମଣିଗଣୈର୍ୱାସଗେହପ୍ରଦୀପାଃ

     ସମ୍ପଦ୍ୟନ୍ତେ ସହ କମଲୟା ଜାଗରୂକସ୍ୟ ଯୂନଃ ॥ ୧୫.୪୪॥ ୫୨୪॥

ଶ୍ରୀରଙ୍ଗେନ୍ଦୋଶ୍ଚରଣକମଲଦ୍ୱନ୍ଦ୍ୱସେବାବଲେପା-

     ଦାରୂଢାୟାଂ ତ୍ୱୟି ମଖଭୁଜାମାନତାନ୍ ମୌଲିଭାଗାନ୍ ।

ତେଷାଂ ଚୂଡାମଣିଭିରନଘୈସ୍ତାବକାନାଂ ମଣୀନାଂ

     କେଶାକେଶି ପ୍ରଭବତି ମିଥସ୍ତ୍ରାସଲେଶୋଜ୍ଝିତାନାମ୍ ॥ ୧୫.୪୫॥ ୫୨୫॥

ତ୍ୱଦ୍ରତ୍ନୋପଲରଶ୍ମିପଞ୍ଜରତନୁତ୍ରାଣଂ ସ୍ଥିରଂ ବିଭ୍ରତୋ

     ମାତର୍ମାଧବପାଦୁକେ ନ ତୁ ପୁନର୍ହସ୍ତୈଃ ସ୍ପୃଶନ୍ତ୍ୟାକୁଲୈଃ ।

ଦୂରୋତ୍ସିକ୍ତଦୁରାଢ୍ୟଜିହ୍ମଗବିଲଦ୍ୱାଃପାଲକୋପାନଲ-

     ଜ୍ୱାଲାମିତ୍ରକଠୋରବେତ୍ରଲତିକାଦତ୍ତାର୍ଧଚନ୍ଦ୍ରଂ ବପୁଃ ॥ ୧୫.୪୬॥ ୫୨୬॥

ସମ୍ବର୍ତୋଦିତସୂର୍ୟକୋଟିସଦୃଶୀଂ ରଙ୍ଗେଶପାଦାବନି

     ପ୍ରସ୍ତୌଷି ପ୍ରତିୟତ୍ନରତ୍ନନିକରଜ୍ୟୋତିଶ୍ଛଟାମୁଦ୍ଭଟାମ୍ ।

ତନ୍ମନ୍ୟେ ତ୍ୱଦନନ୍ୟସୂରିପରିଷନ୍ମଧ୍ୟେ ନିବେଶାୟ ନ-

     ସ୍ତାଦୃଗ୍ୱାସରସେଽପି ଭେତ୍ତୁମଚିରାଦସ୍ମାକମନ୍ଧନ୍ତମଃ ॥ ୧୫.୪୭॥ ୫୨୭॥

ସଲୀଲଂ ବିନ୍ୟସ୍ୟ ତ୍ୱୟି ଚରଣରକ୍ଷେ ନିଜପଦଂ

     ଯଦୃଚ୍ଛାନିଷ୍କ୍ରାନ୍ତେ ବିହରତି ହରୌ ରଙ୍ଗରସିକେ ।

ଦିଶାସୌଧାନଷ୍ଟୌ ଜନୟସି ତଦା ନିର୍ଭରମିଲ-

     ନ୍ମଣିଚ୍ଛାୟାମାୟାଘନଘଟିତକେତୁବ୍ୟତିକରାନ୍ ॥ ୧୫.୪୮॥ ୫୨୮॥

ମହାର୍ଘୈରାଶ୍ଲିଷ୍ଟାଂ ମଣିଭିରବଧୂତଦ୍ୟୁମଣିଭିଃ

     କଥଞ୍ଚିତ୍ କ୍ଷେତ୍ରଜ୍ଞୈରଧିଗତପଦାମମ୍ବ ଭବତୀମ୍ ।

ମୁକୁନ୍ଦେନ ତ୍ରାତୁଂ ପଦକମଲମୂଲେ ବିନିହିତାଂ

     ନିରାବାଧାଂ ମନ୍ୟେ ନିଧିମନଘବାଚାଂ ନିରବଧିମ୍ ॥ ୧୫.୪୯॥ ୫୨୯॥

ତାପତ୍ରୟଂ ନିରୁନ୍ଧେ ପଚତି କଷାୟାନ୍ ବିଶୋଷୟତି ପଙ୍କମ୍ ।

ତେଜସ୍ତ୍ରିତୟମିଦଂ ତେ ଶଙ୍କେ ରଙ୍ଗେନ୍ଦ୍ରପାଦୁକେ ତେଜଃ ॥ ୧୫.୫୦॥ ୫୩୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ରତ୍ନସାମାନ୍ୟପଦ୍ଧତିଃ ପଞ୍ଚଦଶୀ ॥

୧୬. ବହୁରତ୍ନପଦ୍ଧତିଃ (୫୦)

ମୁଖବାହୂରୁପାଦେଭ୍ୟୋ ବର୍ଣାନ୍ ସୃଷ୍ଟବତଃ ପ୍ରଭୋଃ ।

ପ୍ରପଦ୍ୟେ ପାଦୁକାଂ ରତ୍ନୈର୍ୱ୍ୟକ୍ତବର୍ଣବ୍ୟବସ୍ଥିତିମ୍ ॥ ୧୬.୧॥ ୫୩୧॥

ମଣିଭିଃ ସିତରକ୍ତପୀତକୃଷ୍ଣୈର୍ଭବତୀ କାଞ୍ଚନପାଦୁକେ ବିଚିତ୍ରା ।

ଯୁଗଭେଦବିକଲ୍ପିତଂ ମୁରାରେର୍ୟୁଗପଦ୍ଦର୍ଶୟତୀବ ବର୍ଣଭେଦମ୍ ॥ ୧୬.୨॥ ୫୩୨॥

ନବରତ୍ନବିଚିତ୍ରିତା ମୁରାରେଃ ପଦୟୋସ୍ତ୍ୱଂ ମଣିପାଦୁକେ ବିଭାସି ।

ନବଖଣ୍ଡବତୀ ବସୁନ୍ଧରେବ ପ୍ରଣୟାଜ୍ଜନ୍ମପଦଂ ସମାଶ୍ରୟନ୍ତୀ ॥ ୧୬.୩॥ ୫୩୩॥

ସହସା ବିନିବେଦ୍ୟ ସାପରାଧାନ୍

     ତ୍ୱଦଧୀନସ୍ୱପଦେ ମୁକୁନ୍ଦପାଦେ ।

ଅରୁଣୋପଲସକ୍ତମୌକ୍ତିକଶ୍ରୀଃ

     ସ୍ମୟମାନେବ ବିଭାସି ପାଦୁକେ ତ୍ୱମ୍ ॥ ୧୬.୪॥ ୫୩୪॥

ବହୁରତ୍ନସମୁଦ୍ଭବଂ ମୟୂଖଂ ତବ ମନ୍ୟେ ମଣିପାଦୁକେ ମୁରାରେଃ ।

ଚରଣୋପଗତଂ ମୟୂରପିଞ୍ଛଂ ମକୁଟାରୋହଣସାହସଂ ପ୍ରମାର୍ଷ୍ଟୁମ୍ ॥ ୧୬.୫॥ ୫୩୫॥

ପ୍ରଭୟା ହରିନୀଲମୌକ୍ତିକାନାଂ

     ବିକସନ୍ତ୍ୟା ଦିଶସୀବ ପାଦୁକେ ତ୍ୱମ୍ ।

ମଧୁଭିଚ୍ଚରଣାରବିନ୍ଦଲକ୍ଷ୍ମ୍ୟାଃ

     ସ୍ରଜମିନ୍ଦୀବରପୁଣ୍ଡରୀକବଦ୍ଧାମ୍ ॥ ୧୬.୬॥ ୫୩୬॥

ତବ ମାଧବପାଦୁକେ ମଣୀନାଂ ପ୍ରଭୟା ଦେବି ସିତାସିତାରୁଣାନାମ୍ ।

ବହତେ ଗିରିଶସ୍ୟ ମୌଲିଗଙ୍ଗା କୁମୁଦେନ୍ଦୀବରପଦ୍ମକାନନାନି ॥ ୧୬.୭॥ ୫୩୭॥

ପୃଥଗ୍ୱିଧାନାଂ ଦ୍ୟୁତିଭିର୍ମଣୀନାଂ ତ୍ୱାଂ ପାଦୁକେ ଲୋହିତଶୁକ୍ଲକୃଷ୍ଣାମ୍ ।

ବିହାରହେତୋରିହ ରଙ୍ଗଭର୍ତୁଃ ପାଦାନୁଷକ୍ତାଂ ପ୍ରକୃତିଂ ପ୍ରତୀମଃ ॥ ୧୬.୮॥ ୫୩୮॥

ତମାଲନୀଲଦ୍ୟୁତିମିନ୍ଦ୍ରନୀଲୈର୍ମୁକ୍ତାନୁବିଦ୍ଧାଂ ମଣିପାଦୁକେ ତ୍ୱାମ୍ ।

ଅବୈମି ରଙ୍ଗେଶ୍ୱରକାନ୍ତିସିନ୍ଧୋର୍ୱେଲାମବିଶ୍ରାନ୍ତଗତାଗତାର୍ହାମ୍ ॥ ୧୬.୯॥ ୫୩୯॥

ଅବୈମି ରଙ୍ଗେଶ୍ୱରପାଦୁକାଭ୍ୟାମକାଲକାଲ୍ୟଂ ବିଭବଂ ବିଧାତୁମ୍ ।

ବଜ୍ରେନ୍ଦ୍ରନୀଲବ୍ୟପଦେଶଦୃଶ୍ୟଂ ବନ୍ଦୀକୃତଂ ନୂନମହସ୍ସ୍ତ୍ରିୟାମମ୍ ॥ ୧୬.୧୦॥ ୫୪୦॥

ପଦସ୍ୟ ଗୋପ୍ତ୍ରୀ ଭବତୀ ମୁରାରେର୍ମଣିସ୍ପୃଶା ମୌକ୍ତିକରତ୍ନଭାସା ।

ଅନ୍ତର୍ଦୃଶଂ ସାଞ୍ଜନୟା ମୁନୀନାମନକ୍ତି କର୍ପୂରଶଲାକୟେବ ॥ ୧୬.୧୧॥ ୫୪୧॥

ମୁକ୍ତାମୟୂଖପ୍ରକରୈଃ ସୁଭଦ୍ରା କୃଷ୍ଣା ମହେନ୍ଦ୍ରୋପଲରଶ୍ମିଜାଲୈଃ ।

ମାନ୍ୟା ମୁରାରେର୍ମଣିପାଦୁକେ ତ୍ୱଂ ବିହାରୟୁକ୍ତା ବିଜୟଂ ବୃଣୋଷି ॥ ୧୬.୧୨॥ ୫୪୨॥

ବିଚିତ୍ରବର୍ଣାଂ ମଣିପାଦୁକେ ତ୍ୱାଂ

     ଛନ୍ଦୋମୟୀଂ ସାମନିବଦ୍ଧଗୀତିମ୍ ।

ମୁନୀନ୍ଦ୍ରଜୁଷ୍ଟାଂ ଦ୍ୱିପଦାଂ ମୁରାରେଃ

     ପ୍ରତ୍ୟାୟିକାଂ କାଞ୍ଚିଦୃଚଂ ପ୍ରତୀମଃ ॥ ୧୬.୧୩॥ ୫୪୩॥

ପ୍ରସେଦୁଷୀ ଗୋତ୍ରଭିଦଃ ପ୍ରଣାମୈଃ ପୁଷ୍ଣାସି ରଙ୍ଗେଶ୍ୱରପାଦୁକେ ତ୍ୱମ୍ ।

ମଣିପ୍ରଭାସମ୍ବଲନାପଦେଶାତ୍ପ୍ରାୟସ୍ତଦର୍ହାଣି ଶରାସନାନି ॥ ୧୬.୧୪॥ ୫୪୪॥

ଶୋଣାଶ୍ମନାଂ ତବ ହରିନ୍ମଣିରଶ୍ମିଭିନ୍ନଂ

     ବାଲାତପଂ ବଲିବିମର୍ଦନପାଦରକ୍ଷେ ।

ଶ୍ୟାମୀକୃତଂ ଶୁକଶକୁନ୍ତଗଣପ୍ରବେଶା-

     ଚ୍ଛଙ୍କେ ସତାଂ କିମପି ଶାଲିବନଂ ବିପକ୍ୱମ୍ ॥ ୧୬.୧୫॥ ୫୪୫॥

ସମ୍ଭିଦ୍ୟମାନମଣିବିଦ୍ରୁମମୌକ୍ତିକଶ୍ରୀଃ ।

     ସୈରନ୍ଧ୍ରିକେବ ଭବତୀ ମଣିପାଦରକ୍ଷେ ।

ପ୍ରସ୍ତୌତି ରଙ୍ଗନୃପତେଶ୍ଚରଣାରବିନ୍ଦେ

     କସ୍ତୂରିକାଘୁସୃଣଚନ୍ଦନପଙ୍କଚର୍ଚାମ୍ ॥ ୧୬.୧୬॥ ୫୪୬॥

ଆତନ୍ୱତୀମସୁରମର୍ଦନପାଦରକ୍ଷେ

     ଶୁଦ୍ଧାନ୍ତପକ୍ଷ୍ମଲଦୃଶାଂ ମଦନେନ୍ଦ୍ରଜାଲମ୍ ।

ବୈହାରିକୀଂ ବିବିଧରତ୍ନମୟୂଖଲକ୍ଷା-

     ନ୍ମନ୍ୟେ ସମୁଦ୍ୱହସି ମୋହନପିଞ୍ଛିକାଂ ତ୍ୱମ୍ ॥ ୧୬.୧୭॥ ୫୪୭॥

ରତ୍ନୈର୍ୱ୍ୟବସ୍ଥିତସିତାସିତଶୋଣବର୍ଣୈ-

     ରାଲୋକବଦ୍ଭିରଜହଚ୍ଛ୍ରୁତିସନ୍ନିକର୍ଷୈଃ ।

ଦ୍ରଷ୍ଟୁଂ ମୁକୁନ୍ଦଚରଣାବନିମେଷଦୃଶ୍ୟୌ

     ସନ୍ଦୃଶ୍ୟସେ ଜନନି ସମ୍ଭୃତନେତ୍ରପଙ୍କ୍ତିଃ ॥ ୧୬.୧୮॥ ୫୪୮॥

ଗାରୁତ୍ମତାନ୍ତରିତମୌକ୍ତିକପଙ୍କ୍ତିଲକ୍ଷା-

     ଦ୍ଦୂର୍ୱାମଧୂକରଚିତଂ ଦୁରିତୋପଶାନ୍ତ୍ୟୈ ।

ମାତଃ ସ୍ୱୟଂ ବହସି ମୁଗ୍ଧଧିୟାଂ ପ୍ରଜାନାଂ

     ମଙ୍ଗଲ୍ୟମାଲ୍ୟମିବ ମାଧବପାଦୁକେ ତ୍ୱମ୍ ॥ ୧୬.୧୯॥ ୫୪୯॥

ରଙ୍ଗାଧିରାଜପଦରକ୍ଷିଣି ରାଜତେ ତେ

     ବଜ୍ରୋପସଙ୍ଘଟିତମୌକ୍ତିକବିଦ୍ରୁମଶ୍ରୀଃ ।

ସକ୍ତା ଚିରଂ ମନସି ସଂୟମିନାଂ ନିବାସା-

     ତ୍ସୂର୍ୟେନ୍ଦୁବହ୍ନିମୟମଣ୍ଡଲବାସନେବ ॥ ୧୬.୨୦॥ ୫୫୦॥

ଆସକ୍ତବାସବଶିଲାଶକଲାସ୍ତ୍ୱଦୀୟାଃ

     ପଦ୍ମାସହାୟପଦରକ୍ଷିଣି ପଦ୍ମରାଗାଃ ।

ପ୍ରତ୍ୟକ୍ଷୟନ୍ତି କମପି ଭ୍ରମରାଭିଲୀନଂ

     ପାଦାରବିନ୍ଦକମରନ୍ଦରସପ୍ରବାହମ୍ ॥ ୧୬.୨୧॥ ୫୫୧॥

ଅନ୍ତଃପୁରାଣି ସମୟେଷ୍ୱଭିଗନ୍ତୁମେକା

     ରଙ୍ଗେଶିତୁର୍ଜ୍ଞପୟସୀବ ପଦାବନି ତ୍ୱମ୍ ।

ମୁକ୍ତାଂଶୁଜାଲମିଲନାଦ୍ରୁଚିରୈଃ ପ୍ରବାଲୈ-

     ର୍ବିମ୍ବାଧରଂ ସ୍ମିତବିଶେଷୟୁତଂ ପ୍ରିୟାଣାମ୍ ॥ ୧୬.୨୨॥ ୫୫୨॥

ରଙ୍ଗେଶ୍ୱରସ୍ୟ ମୃଗୟୋଶ୍ଚରଣାବସକ୍ତାଂ

     ରକ୍ଷଃକପୀନ୍ଦ୍ରମକୁଟେଷୁ ନିବେଶୟୋଗ୍ୟାମ୍ ।

ମନ୍ୟେ ପଦାବନି ନିବଦ୍ଧବିଚିତ୍ରରତ୍ନାଂ

     ମାୟାମୃଗସ୍ୟ ରଚିତାମିବ ଚର୍ମଣା ତ୍ୱାମ୍ ॥ ୧୬.୨୩॥ ୫୫୩॥

ବଧ୍ନାସି ରଙ୍ଗପତିବିଭ୍ରମପାଦୁକେ ତ୍ୱଂ

     ମାୟାକିରାତମକୁଟେ ନବବର୍ହମାଲାମ୍ ।

ଆକୃଷ୍ଟବାସବଧନୁଶ୍ଶକଲୈର୍ମଣୀନା-

     ମନ୍ୟୋନ୍ୟସଙ୍ଘଟିତକର୍ବୁରିତୈର୍ମୟୂଖୈଃ ॥ ୧୬.୨୪॥ ୫୫୪॥

ଅନ୍ୟୋନ୍ୟବନ୍ଧୁରହରିନ୍ମଣିପଦ୍ମରାଗା

     ରଙ୍ଗେଶ୍ୱରସ୍ୟ ଚରଣାବନି ରାଜସେ ତ୍ୱମ୍ ।

ଆତ୍ମୋପମାନବିଭବାଚ୍ଚରିତାର୍ଥୟନ୍ତୀ

     ଶୈଲାତ୍ମଜାଗିରିଶୟୋରିବ ମୂର୍ତିମେକାମ୍ ॥ ୧୬.୨୫॥ ୫୫୫॥

ତାପତ୍ରୟପ୍ରଶମନାୟ ସମାଶ୍ରିତାନାଂ

     ସନ୍ଦର୍ଶିତାରୁଣସିତାସିତରତ୍ନପଙ୍କ୍ତିଃ ।

ପୁଷ୍ଣାସି ରଙ୍ଗନୃପତେର୍ମଣିପାଦୁକେ ତ୍ୱଂ

     ପ୍ରାୟଃ ସରୋଜକୁମୁଦୋତ୍ପଲକାନନାନି ॥ ୧୬.୨୬॥ ୫୫୬॥

ଦେହଦ୍ୟୁତିଂ ପ୍ରକଟୟନ୍ତି ମହେନ୍ଦ୍ରନୀଲାଃ

     ଶୌରେଃ ପଦାମ୍ବୁଜରୁଚିଂ ତବ ପଦ୍ମରାଗାଃ ।

ଅନ୍ୟୋନ୍ୟଲବ୍ଧପରଭାଗତୟା ତ୍ୱମୀଷା-

     ମାଭାତି କାନ୍ତିରପରା ମଣିପାଦରକ୍ଷେ ॥ ୧୬.୨୭॥ ୫୫୭॥

ଆକୀର୍ଣମୌକ୍ତ୍କହରିନ୍ମଣିପଦ୍ମରାଗା-

     ମମ୍ଭୋଜଲୋଚନପଦାବନି ଭାବୟେ ତ୍ୱାମ୍ ।

ତତ୍ପାଦବିଶ୍ରମଜୁଷାଂ ଶ୍ରୁତିସୁନ୍ଦରୀଣାଂ

     ବର୍ଣୋପଧାନମିବ ମୌଲିନିବେଶୟୋଗ୍ୟମ୍ ॥ ୧୬.୨୮॥ ୫୫୮॥

ଆସନ୍ନବାସବଶିଲାଶକଲାସ୍ତ୍ୱଦୀୟାଃ

     ପଦ୍ମେକ୍ଷଣସ୍ୟ ପଦରକ୍ଷିଣି ପଦ୍ମରାଗାଃ ।

ସମ୍ଭାବୟନ୍ତି ସମୟେ କ୍ୱଚିଦୁଷ୍ଣଭାନୋଃ

     ସଦ୍ୟଃପ୍ରସୂତୟମୁନାସୁଭଗାମାସ୍ଥାମ୍ ॥ ୧୬.୨୯॥ ୫୫୯॥

ମୁକ୍ତେନ୍ଦ୍ରନୀଲମଣିଭିର୍ୱିହିତେ ଭବତ୍ୟାଃ

     ପଙ୍କ୍ତୀ ଦୃଢେ ପରମପୂରୁଷପାଦରକ୍ଷେ ।

ମନ୍ୟେ ସମାଶ୍ରିତଜନସ୍ୟ ତବାନୁଭାବା-

     ଦୁନ୍ମୋଚିତେ ସୁକୃତଦୁଷ୍କୃତଶୃଙ୍ଖଲେ ଦ୍ୱେ ॥ ୧୬.୩୦॥ ୫୬୦॥

ଉଦ୍ଗୀର୍ଣଗାଢତମସୋ ହରିନୀଲଭଙ୍ଗା-

     ସ୍ତାରାବିଶେଷରୁଚିରାଣି ଚ ମୌକ୍ତିକାନି ।

ତ୍ୱତ୍ସଙ୍ଗମାତ୍ସରସିଜେକ୍ଷଣପାଦରକ୍ଷେ

     ସଂୟୋଜୟନ୍ତି ନିଶୟା ଭବମୌଲିଚନ୍ଦ୍ରମ୍ ॥ ୧୬.୩୧॥ ୫୬୧॥

ବିଷ୍ଣୋଃ ପଦେନ ଘଟିତା ମଣିପାଦୁକେ ତ୍ୱଂ

     ବ୍ୟକ୍ତେନ୍ଦ୍ରନୀଲରୁଚିରୁଜ୍ଜ୍ୱଲମୌକ୍ତିକଶ୍ରୀଃ ।

କାଲେଷୁ ଦୀବ୍ୟସି ମରୁଦ୍ଭିରୁଦୀର୍ୟମାଣା

     କାଦମ୍ବିନୀବ ପରିତଃ ସ୍ଫୁଟବାରିବିନ୍ଦୁଃ ॥ ୧୬.୩୨॥ ୫୬୨॥

ଭାସା ସ୍ୱୟଂ ଭଗବତୋ ମଣିପାଦରକ୍ଷେ

     ମୁକ୍ତାନ୍ୱିତା ମରତକୋପଲପଦ୍ଧତିସ୍ତେ ।

ନିତ୍ୟାବଗାହନସହଂ ସକଲସ୍ୟ ଜନ୍ତୋ-

     ର୍ଗଙ୍ଗାନ୍ୱିତଂ ଜନୟତୀବ ସମୁଦ୍ରମନ୍ୟମ୍ ॥ ୧୬.୩୩॥ ୫୬୩॥

ସୂର୍ୟାତ୍ମଜା ହରିଶିଲାମଣିପଙ୍କ୍ତିଲକ୍ଷା-

     ତ୍ତ୍ୱାଂ ନିତ୍ୟମାଶ୍ରିତବତୀ ମଣିପାଦରକ୍ଷେ ।

ଆଦୌ ଜନାର୍ଦନପଦେ କ୍ଶଣମାତ୍ରଲଗ୍ନା-

     ମାସନ୍ନମୌକ୍ତିକରୁଚା ହସତୀବ ଗଙ୍ଗାମ୍ ॥ ୧୬.୩୪॥ ୫୬୪॥

ପର୍ୟନ୍ତସଙ୍ଘଟିତଭାସୁରପଦ୍ମରାଗାଃ

     ପଦ୍ମୋଦରଭ୍ରମକାନ୍ତିମୁଶସ୍ତ୍ୱଦୀୟାଃ ।

ତ୍ୱତ୍ସଂଶ୍ରୟେଣ ଚରଣାବନି ଶକ୍ରନୀଲାଃ

     ପୀତାମ୍ବରେଣ ପୁରୁଷେଣ ତୁଲାଂ ଲଭନ୍ତେ ॥ ୧୬.୩୫॥ ୫୬୫॥

ଶଙ୍କେ ପଦାବନି ସଦା ପରିଚିନ୍ୱତୀ ତ୍ୱଂ

     ରଙ୍ଗେଶିତୁଶ୍ଚରଣପଙ୍କଜସୌକୁମାର୍ୟମ୍ ।

ଅଗ୍ରେ ମହୋଭିରରୁଣୋପଲମୌକ୍ତିକାନାଂ

     ପ୍ରାଜ୍ୟାଂ ବିନିକ୍ଷିପସି ପଲ୍ଲବପୁଷ୍ପପଙ୍କ୍ତିମ୍ ॥ ୧୬.୩୬॥ ୫୬୬॥

ନିର୍ଗଚ୍ଛତା ଚରଣରକ୍ଷିଣି ନୀୟମାନା

     ରଙ୍ଗେଶ୍ୱରେଣ ଭବତୀ ରଣଦୀକ୍ଷିତେନ ।

ସୂତେ ସୁରାରିସୁଭଟୀନୟନାମ୍ବୁଜାନାଂ

     ଜ୍ୟୌତ୍ସ୍ନୀଂ ନିଶାମିବ ସିତାସିତରତ୍ନଭାସା ॥ ୧୬.୩୭॥ ୫୬୭॥

ମରକତହରିତାଙ୍ଗୀ ମେଦୁରା ପଦ୍ମରାଗୈ-

     ରଭିନବଜଲବିନ୍ଦୁବ୍ୟକ୍ତମୁକ୍ତାଫଲଶ୍ରୀଃ ।

କଲୟସି ପଦରକ୍ଷେ କୃଷ୍ଣମେଘପ୍ରଚାରାତ୍-

     କନକସରିଦନୂପେ ଶାଦ୍ୱଲଂ ସେନ୍ଦ୍ରଗୋପମ୍ ॥ ୧୬.୩୮॥ ୫୬୮॥

ବିରଚିତସୁରସିନ୍ଧୋବିଷ୍ଣୁପାଦରବିନ୍ଦା-

     ତ୍ସମଧିକମନୁଭାବଂ ପାଦୁକେ ଦର୍ଶୟନ୍ତୀ ।

ବଲଭିଦୁପଲମୁକ୍ତାପଦ୍ମରାଗପ୍ରକାଶୈଃ

     ପରିଣମୟସି ନୂନଂ ପ୍ରାପ୍ତଶୋଣଂ ପ୍ରୟାଗମ୍ ॥ ୧୬.୩୯॥ ୫୬୯॥

ବିବିଧମଣିମୟୂଖୈର୍ୱ୍ୟକ୍ତପକ୍ଷାଂ ବିଚିତ୍ରୈ-

     ର୍ଜଲନିଧିଦୁହିତୁସ୍ତ୍ୱାଂ ବେଦ୍ମି ଲୀଲାଚକୋରୀମ୍ ।

ଅନିଶମବିକଲାନାଂ ପାଦୁକେ ରଙ୍ଗଭର୍ତୁ-

     ଶ୍ଚରଣନଖମଣୀନାଂ ଚନ୍ଦ୍ରିକାମାପିବନ୍ତୀମ୍ ॥ ୧୬.୪୦॥ ୫୭୦॥

ଚରଣକମଲସେବାସଙ୍ଗିନାଂ ରଙ୍ଗଭର୍ତୁ-

     ର୍ୱିନୟଗରିମଭାଜାଂ ବର୍ଜିତୈରାତପତ୍ରୈଃ ।

ପୁନରପି ପଦରକ୍ଷେ ପୁଷ୍ୟସି ତ୍ୱଂ ସୁରାଣାଂ

     ବହୁବିଧମଣିକାନ୍ତ୍ୟା ବର୍ହିପିଞ୍ଛାତପତ୍ରମ୍ ॥ ୧୬.୪୧॥ ୫୭୧॥

ମରକତରୁଚିପତ୍ରା ମୌକ୍ତିକସ୍ମେରପୁଷ୍ପା

     ସ୍ଫୁଟକିସଲୟଶୋଭାଭାସୁରୈଃ ପଦ୍ମରାଗୈଃ ।

ଫଲମଖିଲମୁଦାରା ରଙ୍ଗନାଥସ୍ୟ ପାଦେ

     କଲୟତି ଭବତୀ ନଃ କଲ୍ପବଲ୍ଲୀବ କାଚିତ୍ ॥ ୧୬.୪୨॥ ୫୭୨॥

ବହୁମଣିରୁଚିରାଙ୍ଗୀଂ ରଙ୍ଗନାଥସ୍ୟ ପାଦା-

     ନ୍ନିଜଶିରସି ଗିରୀଶୋ ନିକ୍ଷିପନ୍ପାଦୁକେ ତ୍ୱାମ୍ ।

ସ୍ମରତି ଲଲିତମନ୍ତର୍ଲାଲନୀୟଂ ଭବାନ୍ୟା-

     ସ୍ତରଲଘନକଲାପଂ ଶଣ୍ମୁଖସ୍ୟୌପବାହ୍ୟମ୍ ॥ ୧୬.୪୩॥ ୫୭୩॥

ବିବିଧମଣିସମୁତ୍ଥୈର୍ୱ୍ୟକ୍ତମାପାଦୟନ୍ତୀଂ

     ଦିବସରଜନିସନ୍ଧ୍ୟାୟୌଗପଦ୍ୟେ ମୟୂଖୈଃ ।

ଉପନିଷଦୁପଗୀତାଂ ପାଦୁକେ ରଙ୍ଗିଣସ୍ତ୍ୱା-

     ମଘଟିତଘଟନାର୍ହାଂ ଶକ୍ତିମାଲୋଚୟାମଃ ॥ ୧୬.୪୪॥ ୫୭୪॥

ସକଲମିଦମବନ୍ଧ୍ୟେ ଶାସନେ ସ୍ଥାପୟନ୍ତୀ

     ମୁରମଥନପଦସ୍ଥା ମୌକ୍ତିକାଦିପ୍ରକାରା ।

ପ୍ରକଟୟସି ବିଶୁଦ୍ଧଶ୍ୟାମରକ୍ତାଦିରୂପାନ୍

     ଫଲପରିଣତିଭେଦାନ୍ପ୍ରାଣିନାଂ ପାଦୁକେ ତ୍ୱମ୍ ॥ ୧୬.୪୫॥ ୫୭୫॥

ପ୍ରଦିଶତି ମୁଦମକ୍ଷ୍ଣୋଃ ପାଦୁକେ ଦେହଭାଜାଂ

     ଶତମଖମଣିପଙ୍କ୍ତିଃ ଶାର୍ଙ୍ଗିଣସ୍ତୁଲ୍ୟବର୍ଣା ।

ପରିସରନିହିତୈସ୍ତେ ପଦ୍ମରାଗପ୍ରଦୀପୈ-

     ର୍ଘନତରପରିଣଦ୍ଧା କଜ୍ଜଲଶ୍ୟାମିକେବ ॥ ୧୬.୪୬॥ ୫୭୬॥

କଲୟାଽପି ହାନିରହିତେଷୁ ସଦା

     ତବ ମୌକ୍ତିକେଷୁ ପରିତଃ ପ୍ରଥତେ ।

ଉପରଜ୍ୟମାନହରିଣାଙ୍କୁତୁଲା

     ହରିପାଦୁକେ ହରିଶିଲାମହସା ॥ ୧୬.୪୭॥ ୫୭୭॥

ମରକତପତ୍ରଲା ରୁଚିରବିଦ୍ରୁମପଲ୍ଲବିତା

     ପୃଥୁତରମୌକ୍ତିକସ୍ତବକିତା ନିଗମୈଃ ସୁରଭିଃ ।

ଉପବନଦେବତେବ ଚରଣାବନି ରଙ୍ଗପତେ-

     ରଭିଲଷତୋ ବିହାରମଭିଗମ୍ୟ ପଦଂ ସ୍ପୃଶସି ॥ ୧୬.୪୮॥ ୫୭୮॥

ସଦୋତ୍ତୁଙ୍ଗେ ରଙ୍ଗକ୍ଷିତିରମଣପାଦପ୍ରଣୟିନି

     ତ୍ୱଦାଲୋକେ ତତ୍ତନ୍ମଣିକିରଣସମ୍ଭେଦକଲୁଷେ ।

ପ୍ରତିସ୍ରୋତୋବୃତ୍ତ୍ୟା ପ୍ରଥିତରୁଚିଭେଦଂ ନ ସହତେ

     ନବାମ୍ଭଃସ୍ୱାଚ୍ଛନ୍ଦ୍ୟଂ ନମଦମରକୋଟୀରମକରଃ ॥ ୧୬.୪୯॥ ୫୭୯॥

ଜନୟସି ପଦାବନି ତ୍ୱଂ ମୁକ୍ତାଶୋଣମଣିଶକ୍ରନୀଲରୁଚା ।

ନଖରୁଚିସନ୍ତତିରୁଚିରାଂ ନନ୍ଦକନିସ୍ତ୍ରିଂଶସମ୍ପଦଂ ଶୌରେଃ ॥ ୧୬.୫୦॥ ୫୮୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ବହୁରତ୍ନପଦ୍ଧତିଃଷୋଡଶୀ ॥

୧୭. ପଦ୍ମରାଗପଦ୍ଧତିଃ (୩୦)

ପ୍ରପଦ୍ୟେ ରଙ୍ଗନାଥସ୍ୟ ପାଦୁକାଂ ପଦ୍ମରାଗିଣୀମ୍ ।

ପଦୈକନିୟତାଂ ତସ୍ୟ ପଦ୍ମବାସାମିବାପରାମ୍ ॥ ୧୭.୧॥ ୫୮୧॥

ଅତିବାଡ୍ମନସଂ ବିଚିନ୍ତ୍ୟ ଶୌରେଃ ପଦରକ୍ଷେ ପଦପଦ୍ମସୌକୁମାର୍ୟମ୍ ।

ପରିପୁଷ୍ୟସି ପଦ୍ମରାଗଭାସା ପଦବୀମାହିତପଲ୍ଲବାମିବ ତ୍ୱମ୍ ॥ ୧୭.୨॥ ୫୮୨॥

ପଦପଲ୍ଲବସଙ୍ଗିଭିଃ ପ୍ରଦୀପ୍ତୈରଧିକୋଲ୍ଲାସିଭିରମ୍ବ ପଦ୍ମରାଗୈଃ ।

ଅନଲେ ଶୟନଂ କ୍ୱଚିନ୍ମୁରାରେରବିସମ୍ବାଦୟସୀବ ପାଦୁକେ ତ୍ୱମ୍ ॥ ୧୭.୩॥ ୫୮୩॥

ବିବୃଣୋତି ରଙ୍ଗପତିରତ୍ନପାଦୁକେ ତ୍ୱୟି ପଦ୍ମରାଗମନିପଦ୍ଧତିଃ ଶୁଭା ।

ନିବିଡୋରୁସଙ୍ଘଟନପୀଡନକ୍ଷରନ୍ମଧୁକୈଟଭକ୍ଷତଜପଙ୍କବାସନାମ୍ ॥ ୧୭.୪॥ ୫୮୪॥

ପ୍ରତିୟନ୍ତି ରଙ୍ଗପତିପାଦୁକେ ଜନା-

     ସ୍ତବ ପଦ୍ମରାଗମଣିରଶ୍ମିସନ୍ତତିମ୍ ।

ଅଭିଜଗ୍ମୁଷାଂ ତ୍ୱଦନୁଭାବଖଣ୍ଡିତା-

     ଦଘସଞ୍ଚୟାଦ୍ୱିଗଲିତାମସୃକ୍ଛଟାମ୍ ॥ ୧୭.୫॥ ୫୮୫॥

ପଶ୍ୟନ୍ତି ରଙ୍ଗେଶ୍ୱରପାଦୁକେ ତ୍ୱାଂ ପୌରାଙ୍ଗନାଃ ସ୍ପର୍ଶିତରାଗବନ୍ଧାମ୍ ।

ଶୃଙ୍ଗାରୟୋନେର୍ଜ୍ୱଲନସ୍ୟ ଦୀପ୍ତୈରଙ୍ଗାରଜାଲୈରିବ ପଦ୍ମରାଗୈଃ ॥ ୧୭.୬॥ ୫୮୬॥

ଅବୈମି ଦୋଷାପଗମସ୍ୟ ହେତୁଂ ତମୋପହାଂ ସମ୍ଭୃତପଦ୍ମରାଗାମ୍ ।

ଅଶେଷବନ୍ଦ୍ୟାଂ ମଣିପାଦୁକେ ତ୍ୱାଂ ରଙ୍ଗେଶସୂର୍ୟୋଦୟପୂର୍ୱସନ୍ଧ୍ୟାମ୍ ॥ ୧୭.୭॥ ୫୮୭॥

ଅବାପ୍ୟ ପାଦାବନି ରଙ୍ଗଭର୍ତୁଃପାଦାମ୍ବୁଜେ ପଲ୍ଲବସଂସ୍ତରାଭାମ୍ ।

ତ୍ୱତ୍ପଦ୍ମରାଗଦ୍ୟୁତୟୋ ଭଜନ୍ତେ କାଲାନଲତ୍ୱଂ କଲୁଶାମ୍ବୁଧେର୍ନଃ ॥ ୧୭.୮॥ ୫୮୮॥

ନିସର୍ଗସିଦ୍ଧଂ ମଣିପାଦରକ୍ଷେ ଦେବସ୍ୟ ରଙ୍ଗାବସଥପ୍ରିୟସ୍ୟ ।

ବାଲାର୍କବର୍ଣାଃ ପଦପଦ୍ମରାଗଂ ତ୍ୱତ୍ପଦ୍ମରାଗାଃ ପୁନରୁକ୍ତୟନ୍ତି ॥ ୧୭.୯॥ ୫୮୯॥

ପଦେନ ବିଶ୍ୱଂ ମଣିପାଦରକ୍ଷେ ପତ୍ନ୍ୟା ସମଂ ପାଲୟତୋ ମୁରାରେଃ ।

ଯଶଃପୟୋଧୌ ପରିକଲ୍ପୟନ୍ତି ପ୍ରବାଲଶୋଭାଂ ତବ ପଦ୍ମରାଗାଃ ॥ ୧୭.୧୦॥ ୫୯୦॥

ଅର୍ଚିଷ୍ମତୀ କାଞ୍ଚନପାଦରକ୍ଷେ ପ୍ରସ୍ତୌତି ତେ ପାଟଲରତ୍ନପଙ୍କ୍ତିଃ ।

ରେଖାରଥାଙ୍ଗସ୍ୟ ମହଃପ୍ରପଞ୍ଚଂ ରଙ୍ଗେଶପାଦାମ୍ବୁଜମଧ୍ୟଭାଜଃ ॥ ୧୭.୧୧॥ ୫୯୧॥

ତ୍ୱୟୈବ ପାଦାବନି ଶୋଣରତ୍ନୈର୍ବାଲାତପଂ ନୂନମୁଦୀରୟନ୍ତ୍ୟା ।

ପଦ୍ମାପତେଃ ପାଦତଲପ୍ରରୂଢଂ ରେଖାମ୍ବୁଜଂ ନିତ୍ୟମଭୂଦନିଦ୍ରମ୍ ॥ ୧୭.୧୨॥ ୫୯୨॥

ନିତ୍ୟଂ ନିଜାଲୋକପଥଂ ଗତାନାଂ ଶ୍ରେୟୋ ଦିଶନ୍ତୀ ଶ୍ରିତପଦ୍ମରାଗାମ୍ ।

ମହୀୟସୀଂ ମାଧବପାଦରକ୍ଷେ ମନ୍ୟାମହେ ମଙ୍ଗଲଦେବତାଂ ତ୍ୱାମ୍ ॥ ୧୭.୧୩॥ ୫୯୩॥

ଦେବସ୍ୟ ରଙ୍ଗରସିକସ୍ୟ ବିହାରହେତୋ-

     ରାତ୍ମାନମଙ୍ଘ୍ରିକମଲେ ବିନିବେଦ୍ୟ ପୂର୍ୱମ୍ ।

ପ୍ରାୟୋ ନିବେଦୟସି ଶୋଣମଣିପ୍ରକାଶୈଃ

     ପ୍ରତ୍ୟୂଷପଦ୍ମକଲିକାଂ ପଦରକ୍ଷିଣି ତ୍ୱମ୍ ॥ ୧୭.୧୪॥ ୫୯୪॥

ପ୍ରତ୍ୟଡ୍ମୟସ୍ୟ ହବିଷଃ ପ୍ରଣବେନ ଦେବି

     ପ୍ରକ୍ଷେପଣାୟ ପରମାର୍ଥବିଦାଂ ମୁନୀନାମ୍ ।

ପ୍ରାଜ୍ୟାଂ ମୁକୁନ୍ଦଚରଣାବନି ପଦ୍ମରାଗୈଃ

     ପର୍ୟାୟପାବକଶିଖାଂ ଭବତୀଂ ପ୍ରତୀମଃ ॥ ୧୭.୧୫॥ ୫୯୫॥

ସମ୍ପଦ୍ୟତେ ତବ ପଦାବନି ପଦ୍ମରାଗୈଃ

     ପ୍ରସ୍ଥାନମାଙ୍ଗଲିକହୋମହୁତାଶନଶ୍ରୀଃ ।

କ୍ଷୀରାହୁତିର୍ଭବତି ଯତ୍ର ବିକଲ୍ପଗଙ୍ଗା

     ରଙ୍ଗେଶ୍ୱରସ୍ୟ ରୁଚିରା ନଖରଶ୍ମିଧାରା ॥ ୧୭.୧୬॥ ୫୯୬॥

ଆମୁଞ୍ଚତାମରୁଣୟାବକପଙ୍କଲକ୍ଷ୍ମୀଂ

     ଶୋଣାଶ୍ମନାଂ ତବ ପଦାବନି କାନ୍ତିୟୋଗାତ୍ ।

ପଦ୍ମାସହାୟପଦପଦ୍ମନଖାଃ ଶ୍ରୟନ୍ତେ

     ସନ୍ଧ୍ୟାନୁରଞ୍ଜିତସୁଧାକରବିମ୍ବଶୋଭାମ୍ ॥ ୧୭.୧୭॥ ୫୯୭॥

ସ୍ଥାନେ ତବାଚ୍ୟୁତପଦାବନି ପଦ୍ମରାଗା-

     ସ୍ତେଜୋମୟାଃ ପ୍ରଶମୟନ୍ତି ତମୋ ମଦୀୟମ୍ ।

ଚିତ୍ରଂ ତଦେତଦିହ ଯଜ୍ଜନୟନ୍ତି ନିତ୍ୟଂ

     ରାଗାତ୍ମକେନ ମହସା ରଜସୋ ନିବୃତ୍ତିମ୍ ॥ ୧୭.୧୮॥ ୫୯୮॥

ପଦ୍ମାକରାନ୍ତରବିକାସିନି ରଙ୍ଗଭର୍ତୁଃ

     ପୀତ୍ୱା ପଦାବନି ମଧୂନି ପଦାରବିନ୍ଦେ ।

ଶୋଣୋପଲଦ୍ୟୁତିମୟୀଂ ସୁଭଗପ୍ରଚାରାଂ

     ମନ୍ୟେ ବିଭର୍ଷି ମହତୀଂ ମଦରାଗଶୋଭାମ୍ ॥ ୧୭.୧୯॥ ୫୯୯॥

ପାଦାବନି ପ୍ରସୃମରସ୍ୟ କଲେର୍ୟୁଗସ୍ୟ

     ପ୍ରାୟେଣ ସମ୍ପ୍ରତି ନିବାରୟିତୁଂ ପ୍ରବେଶମ୍ ।

ଶ୍ରୀରଙ୍ଗସୀମ୍ନି ତବ ଶୋଣମଣିପ୍ରସୂତଃ

     ପ୍ରାକାରମଗ୍ନିମୟମାରଭତେ ପ୍ରକାଶଃ ॥ ୧୭.୨୦॥ ୬୦୦॥

ଲୀଲାଗୃହାନ୍ତରବିହାରିଣି ରଙ୍ଗନାଥେ

     ଲାକ୍ଷାରସୈରରୁଣରତ୍ନମୟୂଖଲକ୍ଷ୍ୟୈଃ ।

ପ୍ରାୟେଣ ରଞ୍ଜୟତି ପାଦସରୋଜୟୁଗ୍ମଂ

     ସୈରନ୍ଧ୍ରିକେବ ଭବତୀ ମଣିପାଦରକ୍ଷେ ॥ ୧୭.୨୧॥ ୬୦୧॥

ରଙ୍ଗେଶିତୁର୍ୱିହରତୋ ମଣିପାଦରକ୍ଷେ

     ରଥ୍ୟାନ୍ତରେ ସୁମନସଃ ପରିକୀର୍ୟମାଣାଃ ।

ତ୍ୱତ୍ପଦ୍ମରାଗକିରଣଚ୍ଛୁରଣାଦ୍ଭଜନ୍ତେ

     ସନ୍ଧ୍ୟାତପାନ୍ତରିତତାରକପଙ୍କ୍ତିଲକ୍ଷ୍ମୀମ୍ ॥ ୧୭.୨୨॥ ୬୦୨॥

ରଙ୍ଗାଧିରାଜପଦରକ୍ଷିଣି ବିଭ୍ରତସ୍ତ୍ୱାଂ

     ଗଙ୍ଗାତରଙ୍ଗବିମଲେ ଗିରିଶସ୍ୟ ମୌଲୌ ।

ସମ୍ବର୍ଧୟନ୍ତି ମହସା ତବ ପଦ୍ମରାଗାଃ

     ଶୈଲାତ୍ମଜାଚରଣୟାବକପଙ୍କଲକ୍ଷ୍ମୀମ୍ ॥ ୧୭.୨୩॥ ୬୦୩॥

ଶରଣମୁପଗତାନାଂ ଶର୍ୱରୀଂ ମୋହରୂପାଂ

     ଶମୟିତୁମୁଦୟସ୍ଥାନ୍ମନ୍ମହେ ବାଲସୂର୍ୟାନ୍ ।

ପଦସରସିଜୟୋଗାଦ୍ରଙ୍ଗନାଥସ୍ୟ ଭୂୟଃ

     ପରିଣମଦରୁଣିମ୍ନଃ ପାଦୁକେ ପଦ୍ମରାଗାନ୍ ॥ ୧୭.୨୪॥ ୬୦୪॥

ହରିପଦରୁଚିରାଣାଂ ପାଦୁକେ ତାବକାନା-

     ମରୁଣମଣିଗଣାନାଂ ନୂନମର୍ଧେନ୍ଦୁମୌଲିଃ ।

ପ୍ରଣତିସମୟଲଗ୍ନାଂ ବାସନାମେବ ଧତ୍ତେ

     କଲମକଣିଶକାନ୍ତିରପର୍ଧିନୀଭିର୍ଜଟାଭିଃ ॥ ୧୭.୨୫॥ ୬୦୫॥

ପ୍ରତିବିହରଣମେତେ ପାଦୁକେ ରଙ୍ଗଭର୍ତୁଃ

     ପଦକମଲସଗନ୍ଧାଃ ପଦ୍ମରାଗାସ୍ତ୍ୱଦୀୟାଃ ।

ତରୁଣତପନମୈତ୍ରୀମୁଦ୍ୱହଦ୍ଭିର୍ମୟୂଖୈଃ

     ସ୍ଥଲକମଲବିଭୂତିଂ ସ୍ଥାପୟନ୍ତ୍ୟବ୍ୟବସ୍ଥାମ୍ ॥ ୧୭.୨୬॥ ୬୦୬॥

ଅୟମନିତରଭୋଗାନ୍ ରଞ୍ଜୟନ୍ ବୀତରାଗା-

     ନରୁଣମଣିଗଣାନାଂ ତାବକାନାଂ ପ୍ରକାଶଃ ।

ମଧୁରିପୁପଦରକ୍ଷେ ମଙ୍କ୍ଷୁ ଜାଜ୍ୱଲ୍ୟମାନଃ

     ଶଲଭୟତି ଜନାନାଂ ଶାଶ୍ୱତଂ ପାପରାଶିମ୍ ॥ ୧୭.୨୭॥ ୬୦୭॥

ପ୍ରଚୁରନିଗମଗନ୍ଧାଃ ପାଦୁକେ ରଙ୍ଗଭର୍ତୁଃ

     ପଦକମଲସମୃଦ୍ଧିଂ ପ୍ରତ୍ୟହଂ ଭାବୟନ୍ତଃ ।

ଦଧତି ଶକଲୟନ୍ତୋ ଗାଢମନ୍ତସ୍ତମିସ୍ରଂ

     ସମୁଚିତମରୁଣତ୍ୱଂ ତାବକାଃ ପଦ୍ମରାଗାଃ ॥ ୧୭.୨୮॥ ୬୦୮॥

ଲାକ୍ଷାଲକ୍ଷ୍ମୀମଧୁରରୁଚକେ ରଙ୍ଗିଣଃ ପାଦରକ୍ଷେ

     ବକ୍ତ୍ରାମ୍ଭୋଜେ ମଦପରିଣତିଂ ପଦ୍ମରାଗଦ୍ୟୁତିସ୍ତେ ।

କର୍ଣୋପାନ୍ତେ କିସଲୟରୁଚିଂ ଦେବି ସେବାନତାନାଂ

     ସୀମନ୍ତେ ଚ ତ୍ରିଦଶସୁଦୃଶାଂ ସୌତି ସିନ୍ଧୂରଶୋଭାମ୍ ॥ ୧୭.୨୯॥ ୬୦୯॥

ଅରୁଣମଣୟସ୍ତବୈତେ ହରିପଦରାଗେଣ ଲବ୍ଧମହିମାନଃ ।

ଗମୟନ୍ତି ଚରଣରକ୍ଷେ ଦ୍ୟୁମଣିଗଣଂ ଜ୍ୟୋତିରିଙ୍ଗଣତାମ୍ ॥ ୧୭.୩୦॥ ୬୧୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗାନାଥପାଦୁକାସହସ୍ରେ

ପଦ୍ମରାଗପଦ୍ଧତିଃ ସପ୍ତଦଶୀ ॥

୧୮. ମୁକ୍ତାପଦ୍ଧତିଃ (୫୦)

ବଦ୍ଧାନାଂ ଯତ୍ର ନିତ୍ୟାନାଂ ମୁକ୍ତାନାମୀଶ୍ୱରସ୍ୟ ଚ ।

ପ୍ରତ୍ୟକ୍ଷଂ ଶେଷଶେଷିତ୍ୱଂ ସା ମେ ସିଦ୍ଧ୍ୟତୁ ପାଦୁକା ॥ ୧୮.୧॥ ୬୧୧॥

ତବ ରଙ୍ଗଧୁରୀଣପାଦରକ୍ଷେ

     ବିମଲା ମୌକ୍ତିକପଦ୍ଧତିର୍ୱିଭାତି ।

ସୁହୃଦି ତ୍ୱୟି ସାଧିତାପବର୍ଗୈଃ

     ସମୟେ ସଙ୍କ୍ରମିତେବ ସାଧୁକୃତ୍ୟା ॥ ୧୮.୨॥ ୬୧୨॥

ଶରଣାଗତସସ୍ୟମାଲିନୀୟଂ ତବ ମୁକ୍ତାମଣିରଶ୍ମିନିର୍ଝରୌଘୈଃ ।

ନନୁ ରଙ୍ଗଧୁରୀଣପାଦରକ୍ଷେ ଜଗତୀ ନିତ୍ୟମଦୈବମାତୃକାଽଭୂତ୍ ॥ ୧୮.୩॥ ୬୧୩॥

ଅଧିବିଷ୍ଣୁପଦଂ ପରିସ୍ଫୁରନ୍ତୀ

     ନବମୁକ୍ତାମଣିନିର୍ମଲପ୍ରକାଶା ।

ପରିପୁଷ୍ୟସି ମଙ୍ଗଲାନି ପୁଂସାଂ

     ପ୍ରତିପଚ୍ଚନ୍ଦ୍ରକଲେବ ପାଦୁକେ ତ୍ୱମ୍ ॥ ୧୮.୪॥ ୬୧୪॥

ନିହିତା ନବମୌକ୍ତିକାବଲିସ୍ତ୍ୱା-

     ମଭିତଃ କାଞ୍ଚନପାଦୁକେ ମୁରାରେଃ ।

ନଖଚନ୍ଦ୍ରମସାଂ ପଦାଶ୍ରିତାନାଂ

     ପ୍ରତିମାଚନ୍ଦ୍ରପରମ୍ପରେବ ଭାତି ॥ ୧୮.୫॥ ୬୧୫॥

ସମତାମୁପୈତି ବପୁଷାଽପି ସଦା

     ଭବଦୀୟମୌକ୍ତିକମହଶ୍ଛୁରିତା ।

ହରିପାଦୁକେ ହରିପଦୋଦ୍ଭବୟା

     କନକାପଗା ସୁରପୁରାପଗୟା ॥ ୧୮.୬॥ ୬୧୬॥

ତବ ରଙ୍ଗଚନ୍ଦ୍ରତପନୀୟପାଦୁକେ

     ବିମଲା ସମୁଦ୍ୱହତି ମୌକ୍ତିକାବଲିଃ ।

ଚରଣାରବିନ୍ଦନଖଚନ୍ଦ୍ରମଣ୍ଡଲ-

     ପ୍ରଣୟୋପୟାତନବତାରକାରୁଚିମ୍ ॥ ୧୮.୭॥ ୬୧୭॥

ଚନ୍ଦ୍ରଚୂଡମକୁଟେନ ଲାଲିତା ଚାରୁମୌକ୍ତିକମୟୂଖପାଣ୍ଡରା ।

ରଙ୍ଗନାଥପଦପଦ୍ମସଙ୍ଗିନୀ ଲକ୍ଷ୍ୟସେ ସୁରଧୁନୀବ ପାଦୁକେ ॥ ୧୮.୮॥ ୬୧୮॥

ଯେ ଭଜନ୍ତି ଭବତୀଂ ତବୈବ ତେ

     ମୌକ୍ତିକଦ୍ୟୁତିବିକଲ୍ପଗଙ୍ଗୟା ।

ବର୍ଧୟନ୍ତି ମଧୁବୈରିପାଦୁକେ

     ମୌଲିଚନ୍ଦ୍ରଶକଲସ୍ୟ ଚନ୍ଦ୍ରିକାମ୍ ॥ ୧୮.୯॥ ୬୧୯॥

ମୁକ୍ତାମୟୂଖୈର୍ନିୟତଂ ତ୍ୱଦୀୟୈ-

     ରାପୂରୟିଷ୍ୟନ୍ନବତଂସଚନ୍ଦ୍ରମ୍ ।

ବିଭର୍ତି ରଙ୍ଗେଶ୍ୱରପାଦରକ୍ଷେ

     ଦେବୋ ମହାନ୍ ଦର୍ଶିତସନ୍ନତିସ୍ତ୍ୱାମ୍ ॥ ୧୮.୧୦॥ ୬୨୦॥

ପରିଷ୍କୃତା ମୌକ୍ତିକରଶ୍ମିଜାଲୈଃ

     ପଦସ୍ୟ ଗୋପ୍ତ୍ରୀ ଭବତୀ ମୁରାରେଃ ।

ଭବତ୍ୟନେକୋର୍ମିସମାକୁଲାନାଂ

     ପୁଂସାଂ ତମସ୍ସାଗରପୋତପାତ୍ରୀ ॥ ୧୮.୧୧॥ ୬୨୧॥

ରଙ୍ଗେଶପାଦପ୍ରତିପନ୍ନଭୋଗାଂ

     ରତ୍ନାନୁବିଦ୍ଧୈର୍ମହିତାଂ ଶିରୋଭିଃ ।

ମୁକ୍ତାବଦାତାଂ ମଣିପାଦୁକେ ତ୍ୱାଂ

     ମୂର୍ତିଂ ଭୁଜଙ୍ଗାଧିପତେଃ ପ୍ରତୀମଃ ॥ ୧୮.୧୨॥ ୬୨୨॥

ମୁକୁନ୍ଦପାଦାବନି ମୌକ୍ତିକୈସ୍ତେ

     ଜ୍ୟୋତ୍ସ୍ନାମୟଂ ବିଶ୍ୱମିଦଂ ଦିବାଽପି ।

ବୈମାନିକାନାଂ ନ ଭଜନ୍ତି ଯେନ

     ବ୍ୟାକୋଚତାମଞ୍ଜଲିପଦ୍ମକୋଶାଃ ॥ ୧୮.୧୩॥ ୬୨୩॥

ସମାଶ୍ରିତାନାମନଘାଂ ବିଶୁଦ୍ଧିଂ

     ତ୍ରାସବ୍ୟପାୟଂ ଚ ବିତନ୍ୱତୀ ତ୍ୱମ୍ ।

ସାୟୁଜ୍ୟମାପାଦୟସି ସ୍ୱକୀୟୈ-

     ର୍ମୁକ୍ତାଫଲୈର୍ମାଧବପାଦୁକେ ନଃ ॥ ୧୮.୧୪॥ ୬୨୪॥

ଅବୈମି ପାଦାବନି ମୌକ୍ତିକାନାଂ

     କୀର୍ଣାମୁଦଗ୍ରୈଃ କିରଣପ୍ରରୋହୈଃ ।

ଯାତ୍ରୋତ୍ସବାର୍ଥଂ ବିହିତାଂ ମୁରାରେ-

     ରଭଙ୍ଗୁରାମଙ୍କ୍ରୁରପାଲିକାଂ ତ୍ୱାମ୍ ॥ ୧୮.୧୫॥ ୬୨୫॥

ଶିବତ୍ୱହେତୁଂ ସକଲସ୍ୟ ଜନ୍ତୋଃ

     ସ୍ରୋତୋବିଶେଷୈଃ ସୁଭଗାମସଙ୍ଖ୍ୟୈଃ ।

ମୁକ୍ତାମୟୂଖୈଃ ସୁରସିନ୍ଧୁମନ୍ୟାଂ

     ପୁଷ୍ଣାସି ରଙ୍ଗେଶ୍ୱରପାଦୁକେ ତ୍ୱମ୍ ॥ ୧୮.୧୬॥ ୬୨୬॥

ରଙ୍ଗେଶୟାନସ୍ୟ ପଦାବନି ତ୍ୱାଂ

     ଲାବଣ୍ୟସିନ୍ଧୋଃ ସବିଧେ ନିଷଣ୍ଣାମ୍ ।

ପରିସ୍ଫୁରନ୍ମୌକ୍ତିକଜାଲଦୃଶ୍ୟାଂ

     ପ୍ରସୂତିଭିନ୍ନାଂ ପ୍ରତିୟନ୍ତି ଶୁକ୍ତିମ୍ ॥ ୧୮.୧୭॥ ୬୨୭॥

ଅବୈମି ରଙ୍ଗେଶ୍ୱରପାଦରକ୍ଷେ

     ମୁକ୍ତାଫଲାନି ତ୍ୱୟି ନିସ୍ତୁଲାନି ।

ତେନୈବ କଲ୍ପାନ୍ତରତାରକାଣା-

     ମୁପ୍ତାନି ବୀଜାନି ଜଗଦ୍ୱିଧାତ୍ରା ॥ ୧୮.୧୮॥ ୬୨୮॥

ବିକ୍ରମ୍ୟମାଣମଭବତ୍ କ୍ଶଣମନ୍ତରିକ୍ଷଂ

     ମାୟାବିନା ଭଗବତା ମଣିପାଦରକ୍ଷେ ।

ବ୍ୟୋମାପଗାବିପୁଲବୁଦ୍ବୁଦଦର୍ଶନୀୟୈ-

     ର୍ମୁକ୍ତାଫଲୈସ୍ତବ ଶୁଭୈଃ ପୁନରୁକ୍ତତାରମ୍ ॥ ୧୮.୧୯॥ ୬୨୯॥

ଲକ୍ଷ୍ମୀବିହାରରସିକେନ ପଦାବନି ତ୍ୱଂ

     ରକ୍ଷାବିଧୌ ଭଗବତା ଜଗତୋ ନିୟୁକ୍ତା ।

ଯତ୍ତ୍ୱଂ ତଦର୍ହମିବ ଦର୍ଶୟସି ପ୍ରଭୂତଂ  var  ସତ୍ତ୍ୱଂ

     ମୁକ୍ତାମୟୂଖନିକରେଣ ବିସୃତ୍ୱରେଣ ॥ ୧୮.୨୦॥ ୬୩୦॥

ପାଦାର୍ପଣେନ ଭବତୀଂ ପ୍ରତିପଦ୍ୟମାନେ

     ଶ୍ରୀରଙ୍ଗଚନ୍ଦ୍ରମସି ସମ୍ଭୃତମୌକ୍ତିକଶ୍ରୀଃ ।

ଅଙ୍ଗୀକରୋଷି ଚରଣାବନି କାନ୍ତିମଗ୍ର୍ୟା-

     ମୁଦ୍ଭିଦ୍ୟମାନକୁମୁଦେବ କୁମୁଦ୍ୱତୀ ତ୍ୱମ୍ ॥ ୧୮.୨୧॥ ୬୩୧॥

ତ୍ରୟ୍ୟନ୍ତହର୍ମ୍ୟତଲବର୍ଣସୁଧାୟିତେନ

     ଜ୍ୟୋତ୍ସ୍ନାଇକଲ୍ପିତରୁଚା ମଣିପାଦୁକେ ତ୍ୱମ୍ ।

ମୁକ୍ତାମୟୀ ମୁରଭିଦଙ୍ଘ୍ରିସରୋଜଭାଜାଂ

     ବର୍ଣେନ ତେ ଶମୟସୀବ ସତାମବର୍ଣମ୍ ॥ ୧୮.୨୨॥ ୬୩୨॥

ବୈକୁଣ୍ଠପାଦନଖବାସନୟେବ ନିତ୍ୟଂ

     ପାଦାବନି ପ୍ରସୁବତେ ତବ ମୌକ୍ତିକାନି ।

ଅଚ୍ଛିନ୍ନତାପଶମନାୟ ସମାଶ୍ରିତାନା-

     ମାଲୋକମଣ୍ଡଲମିଷାଦମୃତପ୍ରବାହମ୍ ॥ ୧୮.୨୩॥ ୬୩୩॥

ରାମାନୁବୃତ୍ତିଜଟିଲେ ଭରତସ୍ୟ ମୌଲୌ

     ରଙ୍ଗାଧିରାଜପଦପଙ୍କଜରକ୍ଷିଣି ତ୍ୱମ୍ ।

ଏକାତପତ୍ରିତଜଗତ୍ରିତୟା ଦ୍ୱିତୀୟଂ

     ମୁକ୍ତାଂଶୁଭିଃ କୃତବତୀ ନବମାତପତ୍ରମ୍ ॥ ୧୮.୨୪॥ ୬୩୪॥

ପାଦାବନି ସ୍ଫୁଟମୟୂଖମଧୁପ୍ରବାହା

     ମୁଗ୍ଧା ପରିସ୍ଫୁରତି ମୌକ୍ତିକପଦ୍ଧତିସ୍ତେ ।

ରୂଢସ୍ୟ ରଙ୍ଗପତିପାଦସରୋଜମଧ୍ୟେ

     ରେଖାତ୍ମନଃ ସୁରତରୋରିବ ପୁଷ୍ପପଙ୍କ୍ତିଃ ॥ ୧୮.୨୫॥ ୬୩୫॥

ଆମ୍ରେଡିତୈଃ ପଦନଖେନ୍ଦୁରୁଚା ମନୋଜ୍ଞୈ-

     ର୍ମୁକ୍ତାଂଶୁଭିର୍ମୁରଭିଦୋ ମଣିପାଦୁକେ ତ୍ୱମ୍ ।

ସ୍ୱାଭାବିକୀଂ ସକଲଜନ୍ତୁଷୁ ସାର୍ୱଭୌମୀଂ

     ପ୍ରାୟଃ ପ୍ରସକ୍ତିମମଲାଂ ପ୍ରକଟିକରୋଷି ॥ ୧୮.୨୬॥ ୬୩୬॥

ନିସ୍ସୀମପଙ୍କମଲିନଂ ହୃଦୟଂ ମଦୀୟଂ

     ନାଥସ୍ୟ ରଙ୍ଗବସତେରଧିରୋଢୁମିଚ୍ଛୋଃ ।

ମାତସ୍ତବୈବ ସହସା ମଣିପାଦରକ୍ଷେ

     ମୁକ୍ତାଂଶବଃ ସ୍ଫଟିକସୌଧତୁଲାଂ ନୟନ୍ତି ॥ ୧୮.୨୭॥ ୬୩୭॥

ଶ୍ୟାମା ତନୁର୍ଭଗବତଃ ପ୍ରତିପନ୍ନତାରା

     ତ୍ୱଂ ଚନ୍ଦ୍ରିକା ବିମଲମୌକ୍ତିକଦର୍ଶନୀୟା ।

ସ୍ଥାନେ ତଦେତଦୁଭୟଂ ମଣିପାଦରକ୍ଷେ

     ବୋଧଂ କ୍ଷଣାନ୍ନୟତି ବୁଦ୍ଧିକୁମୁଦ୍ୱତୀଂ ନଃ ॥ ୧୮.୨୮॥ ୬୩୮॥

ଉଦ୍ଗାଢପଙ୍କଶମନୈର୍ମଣିପାଦରକ୍ଷେ

     ମୁକ୍ତାଂଶୁଭିର୍ମୁରଭିଦୋ ନଖରଶ୍ମିଭିନ୍ନୈଃ ।

ଚୂଡାପଦେଷୁ ନିହିତା ତ୍ରିଦଶେଶ୍ୱରାଣାଂ

     ତୀର୍ଥୋଦକୈଃ ସ୍ନପୟସୀବ ପଦାର୍ଥିନସ୍ତାନ୍ ॥ ୧୮.୨୯॥ ୬୩୯॥

ରଙ୍ଗେଶପାଦନଖଚନ୍ଦ୍ରସୁଧାନୁଲେପଂ

     ସମ୍ପ୍ରାପ୍ୟ ସିଦ୍ଧଗୁଲିକା ଇବ ତାବକୀନାଃ ।

ସଂସାରସଞ୍ଜ୍ୱରଜୁଷାଂ ମଣିପାଦରକ୍ଷେ

     ସଞ୍ଜୀବନାୟ ଜଗତାଂ ପ୍ରଭବନ୍ତି ମୁକ୍ତାଃ ॥ ୧୮.୩୦॥ ୬୪୦॥

ଭାବୋତ୍ତରୈରଧିଗତା ଭରତପ୍ରଧାନୈଃ

     ପ୍ରତ୍ୟୁପ୍ତମୌକ୍ତିକମିଷେଣ ବିକୀର୍ଣପୁଷ୍ପା ।

ରଙ୍ଗେଶ୍ୱରସ୍ୟ ନିୟତଂ ତ୍ୱୟି ଲାସ୍ୟଭାଜୋ

     ରଙ୍ଗସ୍ଥଲୀବ ଲଲିତା ମଣିପାଦୁକେ ତ୍ୱମ୍ ॥ ୧୮.୩୧॥ ୬୪୧॥

ମନ୍ୟେ ମୁକୁନ୍ଦଚରଣାବନି ମୌଲିଦେଶେ

     ବିନ୍ୟସ୍ୟ ଦେବି ଭବତୀଂ ବିନତସ୍ୟ ଶମ୍ଭୋଃ ।

ଆପାଦୟନ୍ତ୍ୟଧିକୃତାଃ ପ୍ରତିପନ୍ନତାରଂ

     ଚୂଡାତୁଷାରକିରଣଂ ତବ ମୌକ୍ତିକୌଘୈଃ ॥ ୧୮.୩୨॥ ୬୪୨॥

ପଦ୍ମାପତେର୍ୱିହରତଃ ପ୍ରିୟମାଚରନ୍ତୀ

     ମୁକ୍ତାମୟୂଖନିବହୈଃ ପୁରତୋ ବିକୀର୍ଣୈଃ ।

କନ୍ଦାନି କାଞ୍ଚନପଦାବନି ପଦ୍ମିନୀନାଂ

     ମନ୍ୟେ ବିନିକ୍ଷିପସି ମନ୍ଦିରଦୀର୍ଘିକାସୁ ॥ ୧୮.୩୩॥ ୬୪୩॥

ଆଶାସ୍ୟ ନୂନମନଘାଂ ମଣିପାଦରକ୍ଷେ

     ଚନ୍ଦ୍ରସ୍ୟ ବାରିଧିସୁତାସହଜସ୍ୟ ବୃଦ୍ଧିମ୍ ।

ଧାତ୍ରୀଂ ମୁକୁନ୍ଦପଦୟୋରନପାୟିନୀଂ ତ୍ୱାଂ

     ଜ୍ୟୋତ୍ସ୍ନା ସମାଶ୍ରୟତି ମୌକ୍ତିକପଙ୍କ୍ତିଲକ୍ଷ୍ୟାତ୍ ॥ ୧୮.୩୪॥ ୬୪୪॥

ଯେ ନାମ କେଽପି ଭବତୀଂ ବିନୟାବନମ୍ରୈ-

     ରୁତ୍ତଂସୟନ୍ତି କୃତିନଃ କ୍ଶଣମୁତ୍ତମାଙ୍ଗୈଃ ।

ଇ(ଋ)ଚ୍ଛନ୍ତି ରଙ୍ଗନୃପତେର୍ମଣିପାଦରକ୍ଷେ

     ତ୍ୱନ୍ମୌକ୍ତିକୌଘନିୟତାମିହ ତେ ବିଶୁଦ୍ଧିମ୍ ॥ ୧୮.୩୫॥ ୬୪୫॥

ଅନୁଦିନଲଲିତାନାମଙ୍ଗୁଲୀପଲ୍ଲବାନାଂ

     ଜନିତମୁକୁଲଶୋଭୈର୍ଦେବି ମୁକ୍ତାଫଲୈସ୍ତ୍ୱମ୍ ।

ପ୍ରକଟୟସି ଜନାନାଂ ପାଦୁକେ ରଙ୍ଗଭର୍ତୁଃ

     ପଦସରସିଜରେଖାପାଞ୍ଚଜନ୍ୟପ୍ରସୂତିମ୍ ॥ ୧୮.୩୬॥ ୬୪୬॥

ବଲିବିମଥନବେଲାବ୍ୟାପିନସ୍ତସ୍ୟ ବିଷ୍ଣୋଃ

     ପଦସରସିଜମାଧ୍ୱୀ ପାବନୀ ଦେବି ନୂନମ୍ ।

ଜନନସମୟଲଗ୍ନାଂ ଜାହ୍ୱବୀ ତାବକାନାଂ

     ବହତି ଚରଣରକ୍ଷେ ବାସନାଂ ମୌକ୍ତିକାନାମ୍ ॥ ୧୮.୩୭॥ ୬୪୭॥

ମଧୁରିପୁପଦମିତ୍ରୈର୍ୱୈରମିନ୍ଦୋଃ ସରୋଜୈଃ

     ଶମୟିତୁମିବ ତାରାଃ ସେବମାନାଶ୍ଚିରଂ ତ୍ୱାମ୍ ।

ପ୍ରଚୁରକିରଣପୂରାଃ ପାଦୁକେ ସଂଶ୍ରିତାନାଂ

     କଲିକଲୁଷମଶେଷଂ କ୍ଷାଲୟନ୍ତୀବ ମୁକ୍ତାଃ ॥ ୧୮.୩୮॥ ୬୪୮॥

ମୁକୁଲିତପରିତାପାଂ ପ୍ରାଣିନାଂ ମୌକ୍ତିକୈଃ ସ୍ୱୈ-

ରମୃତମିବ ଦୁହାନାମାଦ୍ରିୟେ ପାଦୁକେ ତ୍ୱାମ୍ ॥ ୧୮.୩୯॥ ୬୪୯॥

ସକୃଦପି ବିନତାନାଂ ତ୍ରାସମୁନ୍ମୂଲୟନ୍ତୀଂ

     ତ୍ରିଭୁବନମହନୀୟାଂ ତ୍ୱାମୁପାଶ୍ରିତ୍ୟ ନୂନମ୍ ।

ନ ଜହତି ନିଜକାନ୍ତିଂ ପାଦୁକେ ରଙ୍ଗଭର୍ତୁ-

     ଶ୍ଚରଣନଖମଣୀନାଂ ସନ୍ନିଧୌ ମୌକ୍ତିକାନି ॥ ୧୮.୪୦॥ ୬୫୦॥

ଭୁବନମିଦମଶେଷଂ ବିଭ୍ରତୋ ରଙ୍ଗଭର୍ତୁଃ

     ପଦକମଲମିଦଂ ତେ ପାଦୁକେ ଧାରୟନ୍ତ୍ୟାଃ ।

ଚିରବିହରଣଖେଦାତ୍ ସମ୍ଭୃତାନାଂ ଭଜନ୍ତି

     ଶ୍ରମଜଲକଣିକାନାଂ ସମ୍ପଦଂ ମୌକ୍ତିକାନି ॥ ୧୮.୪୧॥ ୬୫୧॥

ପ୍ରକଟିତୟଶସାଂ ତେ ପାଦୁକେ ରଙ୍ଗଭର୍ତୁ-

     ର୍ଦ୍ୱିଗୁଣିତନଖଚନ୍ଦ୍ରଜ୍ୟୋତିଷାଂ ମୌକ୍ତିକାନାମ୍ ।

କରଣବିଲୟବେଲାକାତରସ୍ୟାସ୍ୟ ଜନ୍ତୋଃ

     ଶମୟତି ପରିତାପଂ ଶାଶ୍ୱତୀ ଚନ୍ଦ୍ରିକେୟମ୍ ॥ ୧୮.୪୨॥ ୬୫୨॥

ଦିବ୍ୟଂ ଧାମ ସ୍ଥିରମଭିୟତାଂ ଦେବି ମୁକ୍ତାମଣୀନାଂ

     ମଧ୍ୟେ କଶ୍ଚିଦ୍ଭବତି ମଧୁଜିତ୍ପାଦୁକେ ତାବକାନାମ୍ ।

ନ୍ୟସ୍ତୋ ନିତ୍ୟଂ ନିଜଗୁଣଗଣବ୍ୟକ୍ତିହେତୋର୍ଭବତ୍ୟା-

     ମାତ୍ମଜ୍ୟୋତିଶ୍ଶମିତତମସାଂ ଯୋଗିନାମନ୍ତରାତ୍ମା ॥ ୧୮.୪୩॥ ୬୫୩॥

ଶୁଦ୍ଧେ ନିତ୍ୟଂ ସ୍ଥିରପରିଣତାଂ ଦେବି ବିଷ୍ଣୋଃ ପଦେ ତ୍ୱା-

     ମାସ୍ଥାନୀଂ ତାମମିତବିଭବାଂ ପାଦୁକେ ତର୍କୟାମି ।

ଆଲୋକୈଃ ସ୍ୱୈର୍ଭୁବନମଖିଲଂ ଦୀପବଦ୍ୱ୍ୟାପ୍ୟ କାମଂ

     ମୁକ୍ତାଃ ଶୁଦ୍ଧିଂ ଯଦୁପସଦନାଦ୍ ବିଭ୍ରତି ତ୍ରାସହୀନାଃ ॥ ୧୮.୪୪॥ ୬୫୪॥

ପ୍ରାପ୍ତା ଶୌରେଶ୍ଚରଣକମଲଂ ପାଦୁକେ ଭକ୍ତିଭାଜାଂ

     ପ୍ରତ୍ୟାଦେଷ୍ଟୁଂ କିମପି ବୃଜିନଂ ପ୍ରାପିତା ମୌଲିଭାଗମ୍ ।

ଦେବେନ ତ୍ୱଂ ଦଶଶତଦୃଶା ଦନ୍ତିରାଜସ୍ୟ ଧତ୍ସେ

     ମୂର୍ଧ୍ନି ନ୍ୟସ୍ତା ମୁଖପଟରୁଚିଂ ମୌକ୍ତିକାନାମ୍ପ୍ରଭାଭିଃ ॥ ୧୮.୪୫॥ ୬୫୫॥

ତବ ହରିପାଦୁକେ ପୃଥୁଲମୌକ୍ତିକରତ୍ନଭୁବଃ

     ପ୍ରଚଲଦମର୍ତ୍ୟସିନ୍ଧୁଲହରୀସହଧର୍ମଚରାଃ ।

ପଦମଜରାମରଂ ବିଦଧତେ କଥମମ୍ବ ସତାଂ

     ପ୍ରଣତସୁରେନ୍ଦ୍ରମୌଲିପଲିତଙ୍କରଣାଃ କିରଣାଃ ॥ ୧୮.୪୬॥ ୬୫୬॥

କପର୍ଦେ କସ୍ୟାପି କ୍ଷିତିଧରପଦତ୍ରାୟିଣି ତଥା

     ମୁହୁର୍ଗଙ୍ଗାମନ୍ୟାଂ କ୍ଷରତି ତବ ମୁକ୍ତାମଣିମହଃ ।

ମୁଧାରମ୍ଭଃ କୁମ୍ଭସ୍ଥଲମନୁକଲଂ ସିଞ୍ଚତି ଯଥା

     ନିରାଲମ୍ବୋ ଲମ୍ବୋଦରକଲଭଶୁଣ୍ଡାରଚୁଲକଃ ॥ ୧୮.୪୭॥ ୬୫୭॥

ମୁକୁନ୍ଦପଦରକ୍ଷିଣି ପ୍ରଗୁଣଦୀପ୍ତୟସ୍ତାବକାଃ

     କ୍ଷରନ୍ତ୍ୟମୃତନିର୍ଝରଂ କମପି ମୌକ୍ତିକଗ୍ରନ୍ଥୟଃ ।

ମନାଗପି ମନୀଷିଣୋ ଯଦନୁଷଙ୍ଗିନସ୍ତତ୍କ୍ଷଣା-

     ଜ୍ଜରାମରଣଦନ୍ତୁରଂ ଜହତି ହନ୍ତ ତାପତ୍ରୟମ୍ ॥ ୧୮.୪୮॥ ୬୫୮॥

ଦେବଃ ଶ୍ରୀପଦଲାକ୍ଷୟା ତିଲକିତସ୍ତିଷ୍ଠତ୍ୟୁପର୍ୟେବ ତେ

     ଗୌରୀପାଦସରୋଜୟାବକଧନୀ ମୂଲେ ସମାଲକ୍ଷ୍ୟତେ ।

ଇତ୍ଥଂ ଜଲ୍ପତି ଦୁର୍ମଦାନ୍ମୁରଭିଦଃ ଶୁଦ୍ଧାନ୍ତଚେଟୀଜନେ

     ପ୍ରାୟସ୍ତ୍ୱଂ ମଣିପାଦୁକେ ପ୍ରହସିତା ମୁକ୍ତାମୟୂଖଚ୍ଛଲାତ୍ ॥ ୧୮.୪୯॥ ୬୫୯॥

ରଙ୍ଗେଶଚରଣରକ୍ଷା ସା ମେ ବିଦଧାତୁ ଶାଶ୍ୱତୀଂ ଶୁଦ୍ଧିମ୍ ।

ଯନ୍ମୌକ୍ତିକପ୍ରଭାଭିଃ ଶ୍ୱେତଦ୍ୱୀପମିବ ସହ୍ୟଜାଦ୍ୱୀପମ୍ ॥ ୧୮.୫୦॥ ୬୬୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ମୁକ୍ତାପଦ୍ଧତିରଷ୍ଟାଦଶୀ ॥

୧୯. ମରକତପଦ୍ଧତିଃ (୨୦)

ବନ୍ଦେ ଗାରୁତ୍ମତୀଂ ବୃତ୍ତ୍ୟା ମଣିସ୍ତୋମୈଶ୍ଚ ପାଦୁକାମ୍ ।

ଯୟା ନିତ୍ୟଂ ତୁଲସ୍ୟେବ ହରିତତ୍ୱଂ ପ୍ରକାଶ୍ୟତେ ॥ ୧୯.୧॥ ୬୬୧॥

ସବିଲାସଗତେଷୁ ରଙ୍ଗଭର୍ତୁ-

     ସ୍ତ୍ୱଦଧୀନେଷୁ ବହିଷ୍କୃତୋ ଗରୁତ୍ମାନ୍ ।

ଅଧିଗଚ୍ଛତି ନିର୍ୱୃତିଂ କଥଞ୍ଚି-

     ନ୍ନିଜରତ୍ନୈସ୍ତ୍ୱୟି ପାଦୁକେ ନିବିଷ୍ଟୈଃ ॥ ୧୯.୨॥ ୬୬୨॥

ସମୟେ ମଣିପାଦୁକେ ମୁରାରେ-

     ର୍ମୁହୁରନ୍ତଃପୁରମୁଗ୍ଧଚେଟିକାସ୍ତେ ।

ହରିତାନ୍ ହରିଦଶ୍ମନାଂ ମୟୂଖାଂ-

     ସ୍ତୁଲସୀପଲ୍ଲବଶଙ୍କୟା କ୍ଷିପନ୍ତି ॥ ୧୯.୩॥ ୬୬୩॥

ହରିତଃ ସହସା ହରିନ୍ମଣୀନାଂ

     ପ୍ରଭୟା ରଙ୍ଗନରେନ୍ଦ୍ରପାଦରକ୍ଷେ ।

ତୁଲସୀଦଲସମ୍ପଦଂ ଦଧାତି

     ତ୍ୱୟି ଭକ୍ତୈର୍ନିହିତଃ ପ୍ରସୂନରାଶିଃ ॥ ୧୯.୪॥ ୬୬୪॥

ପ୍ରସାଦୟନ୍ତୀ ମଣିପାଦୁକେ ତ୍ୱଂ

     ବିକ୍ଶେପୟୋଗେନ ବିହାରବେଲାମ୍ ।

ହରିନ୍ମନୋଜ୍ଞା ହରିକାନ୍ତିସିନ୍ଧୋଃ

     ସନ୍ଦୃଶ୍ୟସେ ଶୈବଲମଞ୍ଜରୀବ ॥ ୧୯.୫॥ ୬୬୫॥

ବଧ୍ନାସି ରଙ୍ଗେଶ୍ୱରପାଦରକ୍ଷେ

     ହରିନ୍ମଣୀନାଂ ପ୍ରଭୟା ସ୍ଫୁରନ୍ତ୍ୟା ।

ଚୂଡାପଦେଷୁ ଶ୍ରୁତିସୁନ୍ଦରୀଣାଂ

     ମାଙ୍ଗଲ୍ୟଦୂର୍ୱାଙ୍କୁରମାଲ୍ୟପଙ୍କ୍ତିମ୍ ॥ ୧୯.୬॥ ୬୬୬॥

ଅଚ୍ଛେଦ୍ୟରଶ୍ମିନିୟତୈର୍ଘଟିତା ହରିଦ୍ଭିଃ

     ସଦ୍ୱର୍ତ୍ମନା ଗତିମତୀ ମଣିପାଦରକ୍ଷେ ।

ସନ୍ଦୃଶ୍ୟସେ ସବିତୃମଣ୍ଡଲମଧ୍ୟଭାଜୋ

     ରଙ୍ଗେଶ୍ୱରସ୍ୟ ରଥସମ୍ପଦିବାପରା ତ୍ୱମ୍ ॥ ୧୯.୭॥ ୬୬୭॥

ଶ୍ୟାମାୟମାନନିଗମାନ୍ତବନୋପକଣ୍ଠାଃ

     ସ୍ଥାନେ ପଦାବନି ହରିନ୍ମଣୟସ୍ତ୍ୱଦୀୟାଃ ।

ପର୍ୟନ୍ତଶାଦ୍ୱଲବତୀଂ ପ୍ରଥୟନ୍ତି ନିତ୍ୟଂ

     ନାରାୟଣସ୍ୟ ରୁଚିରାଂ ନଖରଶ୍ମିଗଙ୍ଗାମ୍ ॥ ୧୯.୮॥ ୬୬୮॥

ଉଦ୍ଦିଶ୍ୟ କାମପି ଗତିଂ ମଣିପାଦରକ୍ଷେ

     ରଙ୍ଗେଶ୍ୱରସ୍ୟ ଚରଣେ ବିନିବେଶିତାତ୍ମା ।

ପ୍ରାୟୋ ହରିନ୍ମଣିରୁଚା ଦୃଢଭକ୍ତିବନ୍ଧା

     ପ୍ରାଦୁଷ୍କରୋତି ଭବତୀ ତୁଲସୀବନାନି ॥ ୧୯.୯॥ ୬୬୯॥

ସେବାର୍ଥମାଗତବତାଂ ତ୍ରିଦଶେଶ୍ୱରାଣାଂ

     ଚୂଡାମଣିପ୍ରକରଶାଲିଷୁ ମୌଲିଷୁ ତ୍ୱମ୍ ।

ସମ୍ବର୍ତୟସ୍ୟସୁରମର୍ଦନପାଦରକ୍ଷେ

     ସ୍ୱେନାଶ୍ମଗର୍ଭମହସା ଶୁକପଙ୍କ୍ତିଶୋଭାମ୍ ॥ ୧୯.୧୦॥ ୬୭୦॥

ଦରପରିଣତଦୂର୍ୱାବଲ୍ଲରୀନିର୍ୱିଶେଷୈ-

     ର୍ମରକତଶକଲାନାଂ ମାଂସଲୈରଂଶୁଜାଲୈଃ ।

ପଶୁପତିବିଧୃତା ତ୍ୱଂ ତସ୍ୟ ପାଣୌ ନିଷଣ୍ଣଂ

     ମଧୁରିପୁପଦରକ୍ଷେ ବଞ୍ଚୟସ୍ୟେଣଶାବମ୍ ॥ ୧୯.୧୧॥ ୬୭୧॥

ହରିଚରଣସରୋଜନ୍ୟାସୟୋଗ୍ୟଂ ଭବତ୍ୟାଃ

     ପ୍ରଗୁଣମଭିଲଷନ୍ତ୍ୟୋ ବର୍ଣଲାଭଂ ତୁଲସ୍ୟଃ ।

ପ୍ରତିଦିନମୁପହାରୈଃ ପାଦୁକେ ତାବକାନାଂ

     ମରତକଶକଲାନାମାଶ୍ରୟନ୍ତେ ମୟୂଖାନ୍ ॥ ୧୯.୧୨॥ ୬୭୨॥

ହରିତମଣିମୟୂଖୈରଞ୍ଚିତାଧ୍ୟାତ୍ମଗନ୍ଧୈ-

     ର୍ଦିଶସି ଚରଣରକ୍ଷେ ଜାତକୌତୂହଲା ତ୍ୱମ୍ ।

ଦନୁଜମଥନଲୀଲାଦାରିକାଣାମୁଦାରାଂ

     ଦମନକଦଲପଙ୍କ୍ତିଂ ଦେବି ମୌଲୌ ଶ୍ରୁତୀନାମ୍ ॥ ୧୯.୧୩॥ ୬୭୩॥

ଅଧିଗତବହୁଶାଖୈରଶ୍ମଗର୍ଭପ୍ରସୂତୈ-

     ର୍ମଧୁରିପୁପଦରକ୍ଷେ ମେଚକୈରଂଶୁଜାଲୈଃ ।

ଅନିତରଶରଣାନାଂ ନୂନମାରଣ୍ୟକାନାଂ

     କିମପି ଜନୟସି ତ୍ୱଂ କୀଚକାରଣ୍ୟଦୁର୍ଗମ୍ ॥ ୧୯.୧୪॥ ୬୭୪॥

ପ୍ରଚୁରନିଗମଶାଖାଂ ପାଦୁକେ ରଙ୍ଗିଣସ୍ତ୍ୱାଂ

     ଚରଣନଖମୟୂଖୈଶ୍ଚାରୁପୁଷ୍ପାନୁବନ୍ଧାମ୍ ।

ମରତକଦଲରମ୍ୟାଂ ମନ୍ମହେ ସଞ୍ଜରନ୍ତୀଂ

     କନକସରିଦନୂପେ କାଞ୍ଚିଦୁଦ୍ୟାନଲକ୍ଷ୍ମୀମ୍ ॥ ୧୯.୧୫॥ ୬୭୫॥

ନଖକିରଣନିକାୟୈର୍ନିତ୍ୟମାବିର୍ମୃଣାଲେ

     ମହିତରସବିଶେଷେ ମେଚକୈରଂଶୁଭିସ୍ତେ ।

ପରିକଲୟସି ରମ୍ୟାଂ ପାଦୁକେ ରଙ୍ଗଭର୍ତୁଃ

     ପଦକମଲସମୀପେ ପଦ୍ମିନୀପତ୍ରପଙ୍କ୍ତିମ୍ ॥ ୧୯.୧୬॥ ୬୭୬॥

ଅନିମିଷୟୁବତୀନାମାର୍ତନାଦୋପଶାନ୍ତ୍ୟୈ

     ତ୍ୱୟି ବିନିହିତପାଦେ ଲୀଲୟା ରଙ୍ଗନାଥେ ।

ଦଧତି ଚରଣରକ୍ଷେ ଦୈତ୍ୟସୌଧାନି ନୂନଂ

     ମରକତରୁଚିଭିସ୍ତେ ମଙ୍କ୍ଷୁ ଦୂର୍ୱାଙ୍କୁରାଣି ॥ ୧୯.୧୭॥ ୬୭୭॥

ବିପୁଲତମମହୋଭିର୍ୱୀତଦୋଷାନୁଷଙ୍ଗଂ

     ବିଲସଦୁପରିନୈଲ୍ୟଂ ଦେବି ବିଷ୍ଣୋଃ ପଦଂ ତତ୍ ।

ପୃଥୁମରକତଦୃଶ୍ୟାଂ ପ୍ରାପ୍ୟ ପାଦାବନି ତ୍ୱାଂ

     ପ୍ରକଟୟତି ସମନ୍ତାତ୍ ସମ୍ପ୍ରୟୋଗଂ ହରିଦ୍ଭିଃ ॥ ୧୯.୧୮॥ ୬୭୮॥

ପଦ୍ମାଭୂମ୍ୟୋଃ ପ୍ରଣୟସରଣିର୍ୟତ୍ର ପର୍ୟାୟହୀନା

     ଯତ୍ସଂସର୍ଗାଦନଘଚରିତାଃ ପାଦୁକେ କାମଚାରାଃ ।

ତାରାସକ୍ତଂ ତମିହ ତରୁଣଂ ପ୍ରୀଣୟନ୍ତେ ଜରତ୍ୟୋ

     ନିତ୍ୟଶ୍ୟାମାସ୍ତବ ମରତକୈର୍ନୂନମାମ୍ନାୟବାଚଃ ॥ ୧୯.୧୯॥ ୬୭୯॥

ସ୍ଥଲକମଲୀନୀବ କାଚିଚ୍ଚରଣାବନି ଭାସି କମଲବାସିନ୍ୟାଃ ।

ଯନ୍ମରତକଦଲମଧ୍ୟେ ଯଃ କଶ୍ଚିଦସୌ ସମୀକ୍ଷ୍ୟତେ ଶୌରିଃ ॥ ୧୯.୨୦॥ ୬୮୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ମରତକପଦ୍ଧତିରେକୋନବିଂଶୀ ॥

୨୦. ଇନ୍ଦ୍ରନୀଲପଦ୍ଧତିଃ (୩୦)

ହରିଣା ହରିନୀଲୈଶ୍ଚ ପ୍ରତିୟତ୍ନବତୀଂ ସଦା ।

ଅୟତ୍ନଲଭ୍ୟନିର୍ୱାଣାମାଶ୍ରୟେ ମଣିପାଦୁକାମ୍ ॥ ୨୦.୧॥ ୬୮୧॥

ହରିରତ୍ନମରୀଚୟସ୍ତବୈତେ ନବନୀଲୀରସନିର୍ୱିଶେଷବର୍ଣାଃ ।

ଶ୍ରୁତିମୂର୍ଧନି ଶୌରିପାଦରକ୍ଷେ ପଲିତାନୁଦ୍ଭବଭେଷଜଂ ଭବନ୍ତି ॥ ୨୦.୨॥ ୬୮୨॥

ଅଲକୈରିବ ବିମ୍ବିତୈଃ ଶ୍ରୁତୀନାଂ

     ହରିନୀଲୈଃ ସୃଜସି ତ୍ୱମୁନ୍ମୟୂଖୈଃ ।

କମଲାଦୟିତସ୍ୟ ପାଦରକ୍ଷେ

     କରୁଣୋଦନ୍ୱତି ଶୈବଲପ୍ରରୋହାନ୍ ॥ ୨୦.୩॥ ୬୮୩॥

ଅନଘୈର୍ହରିନୀଲପଦ୍ଧତୀନାଂ ପ୍ରଥମାନୈର୍ମଣିପାଦୁକେ ମୟୂଖୈଃ ।

ଅଧରୀକୁରୁଷେ ରଥାଙ୍ଗପାଣେରମିତାମୂର୍ଧ୍ୱମବସ୍ଥିତସ୍ୟ କାନ୍ତିମ୍ ॥ ୨୦.୪॥ ୬୮୪॥

ଚରଣାବନି ଭାତି ସହ୍ୟକନ୍ୟା ହରିନୀଲଦ୍ୟୁତିଭିସ୍ତବାନୁବିଦ୍ଧା ।

ବସୁଦେବସୁତସ୍ୟ ରଙ୍ଗବୃତ୍ତେର୍ୟମୁନେବ ସ୍ୱୟମାଗତା ସମୀପମ୍ ॥ ୨୦.୫॥ ୬୮୫॥

ଅବଧୀରିତଦେବତାନ୍ତରାଣାମନଘୈସ୍ତ୍ୱଂ ମଣିପାଦୁକେ ମୟୂଖୈଃ ।

ହରିନୀଲସମୁଦ୍ଭବୈର୍ୱିଧତ୍ସେ ହରିସାରୂପ୍ୟମୟତ୍ନତୋ ଜନାନାମ୍ ॥ ୨୦.୬॥ ୬୮୬॥

ନେତ୍ରେଷୁ ପୁଂସାଂ ତବ ପାଦରକ୍ଷେ

     ନୀଲାଶ୍ମଭାସା ନିହିତାଞ୍ଜନେଷୁ ।

ଶ୍ରିୟା ସମଂ ସଂଶ୍ରିତରଙ୍ଗକୋଶୋ

     ନିଧିଃ ସ୍ୱୟଂ ବ୍ୟକ୍ତିମୁପୈତି ନିତ୍ୟମ୍ ॥ ୨୦.୭॥ ୬୮୭॥

ଅଭଙ୍ଗୁରାମଚ୍ୟୁତପାଦରକ୍ଷେ ମାନ୍ୟାଂ ମହାନୀଲରୁଚିଂ ତ୍ୱଦୀୟାମ୍ ।

ନିଶ୍ଶ୍ରେୟସଦ୍ୱାରକବାଟିକାୟାଃ ଶଙ୍କେ ସମୁତ୍ପାନକୁଞ୍ଚିକାଂ ନଃ ॥ ୨୦.୮॥ ୬୮୮॥  var  ସମୁଦ୍ଢାଟନ

ଜୀବୟତ୍ୟମୃତବର୍ଷିଣୀ ପ୍ରଜାସ୍ତାବକୀ ଦନୁଜବୈରିପାଦୁକେ ।

ଘୋରସଂସରଣଘର୍ମନାଶିନୀ କାଲିକେବ ହରିନୀଲପଦ୍ଧତିଃ ॥ ୨୦.୯॥ ୬୮୯॥

ଶତମଖୋପଲଭଙ୍ଗମନୋହରା ବିହରସେ ମୁରମର୍ଦନପାଦୁକେ ।

ମଣିକିରୀଟଗଣେଷୁ ଦିବୌକସାଂ ମଧୁକରୀବ ମନୋହରପଙ୍କ୍ତିଷୁ ॥ ୨୦.୧୦॥ ୬୯୦॥

ଅନ୍ୱିଚ୍ଛତାଂ କିମପି ତତ୍ତ୍ୱମନନ୍ୟଦୃଶ୍ୟଂ

     ସମ୍ୟକ୍ପ୍ରକାଶଜନନୀ ଧୃତକୃଷ୍ଣରୂପା ।

ପାଦାବନି ସ୍ଫୁରସି ବାସବରତ୍ନରମ୍ୟା

     ମଧ୍ୟେ ସମାଧିନୟନସ୍ୟ କନୀନିକେବ ॥ ୨୦.୧୧॥ ୬୯୧॥

ମାତଃ ସଲୀଲମଧିଗମ୍ୟ ବିହାରବେଲାଂ

     କାନ୍ତିଂ ସମୁଦ୍ୱହସି କାଞ୍ଚନପାଦୁକେ ତ୍ୱମ୍ ।

ଲକ୍ଷ୍ମୀକଟାକ୍ଷରୁଚିରୈର୍ହରିନୀଲରତ୍ନୈ-

     ର୍ଲାବଣ୍ୟସିନ୍ଧୁପୃଷତୈରିବ ରଙ୍ଗଧାମ୍ନଃ ॥ ୨୦.୧୨॥ ୬୯୨॥

କ୍ଲୃପ୍ତାବକୁଣ୍ଠନବିଧିର୍ମଣିପାଦରକ୍ଷେ

     ନୀଲାଂଶୁକୈର୍ୱଲଭିଦଶ୍ମସମୁଦ୍ଭବୈସ୍ତେ ।

ସଙ୍ଗଚ୍ଛତେ ମୁନିଜନସ୍ୟ ମତିଃ ସମାଧୌ

     ରାତ୍ରୌ ସମସ୍ତଜଗତାଂ ରମଣେନ ଲକ୍ଷ୍ମ୍ୟାଃ ॥ ୨୦.୧୩॥ ୬୯୩॥

ଦ୍ରଷ୍ଟୁଂ କଦାଚନ ପଦାବନି ନୈବ ଜନ୍ତୁଃ

     ଶକ୍ନୋତି ଶାଶ୍ୱତନିଧିଂ ନିହିତଂ ଗୁହାୟାମ୍ ।

କୃଷ୍ଣାନୁରୂପହରିନୀଲବିଶେଷଦୃଶ୍ୟା

     ସିଦ୍ଧାଞ୍ଜନଂ ତ୍ୱମସି ଯସ୍ୟ ନ ଦେବି ଦୃଷ୍ଟେଃ ॥ ୨୦.୧୪॥ ୬୯୪॥

ପ୍ରତ୍ୟେମି ରଙ୍ଗନୃପତେର୍ମଣିପାଦୁକେ ତ୍ୱାଂ

     କୃଷ୍ଣାନ୍ତରଙ୍ଗରୁଚିର୍ଭିର୍ହରିନୀଲରତ୍ନୈଃ ।

ବିଶ୍ୱାପରାଧସହନାୟ ପଦଂ ତଦୀୟଂ

     ବିଶ୍ୱମ୍ଭରାଂ ଭଗବତୀଂ ସମୟେ ଭଜନ୍ତୀମ୍ ॥ ୨୦.୧୫॥ ୬୯୫॥

ମତ୍ୱା ମଷୀଂ ପରିମିତାଂ ଭବତୀ ତଦନ୍ୟାଂ

     ବୈକୁଣ୍ଠପାଦରସିକେ ମଣିପାଦୁକେ ସ୍ୱାନ୍ ।

ଅଙ୍କ୍ତେ ସ୍ୱୟଂ କିରଣଲେପିଭିରିନ୍ଦ୍ରନୀଲୈ-

     ରାଶାତଟେଷୁ ଲଲିତାନପଦାନବର୍ଣାନ୍ ॥ ୨୦.୧୬॥ ୬୯୬॥

ବଲମଥନମଣୀନାଂ ଧାମଭିସ୍ତାବକାନାଂ

     ମଧୁରିପୁପଦରକ୍ଷେ ବାସରୈରବ୍ୟପେତା ।

ଅଭିସରଣପରାଣାଂ ବଲ୍ଲବୀନାଂ ତଦାଽଽସୀ-

     ଚ୍ଛମିତଗୁରୁଭୟାର୍ତିଃ ଶର୍ୱରୀ କାଚିଦନ୍ୟା ॥ ୨୦.୧୭॥ ୬୯୭॥

ଶତମଖମଣିଭଙ୍ଗୈରୁନ୍ମୟୂଖୈର୍ଦିଶନ୍ତୀ

     ଶରଣମୁପଗତାନାଂ ରଙ୍ଗନାଥେନ ସାମ୍ୟମ୍ ।

ପ୍ରଥୟସି ଜଗତି ତ୍ୱଂ ପାଦୁକେ ହୈତୁକାନା-

     ମୁପନିଷଦୁପଗୀତାଂ ତତ୍କ୍ରତୁନ୍ୟାୟବାର୍ତାମ୍ ॥ ୨୦.୧୮॥ ୬୯୮॥

ପରିଚରତି ବିଧୌ ତ୍ୱାଂ ପାଦୁକେ ରଙ୍ଗଭର୍ତୁଃ

     ପଦସରସିଜଭୃଙ୍ଗୈର୍ଭାସୁରୈରିନ୍ଦ୍ରନୀଲୈଃ ।

ପ୍ରକଟିତୟମୁନୌଘା ଭକ୍ତିନମ୍ରସ୍ୟ ଶମ୍ଭୋଃ

     ପରିଣମୟସି ଚୂଡାବିଷ୍ଣୁପଦ୍ୟାଃପ୍ରୟାଗମ୍ ॥ ୨୦.୧୯॥ ୬୯୯॥

ପଦକିସଲୟସଙ୍ଗାତ୍ପାଦୁକେ ପତ୍ରଲଶ୍ରୀ-

     ର୍ନଖମଣିଭିରୁଦାରୈର୍ନିତ୍ୟନିଷ୍ପନ୍ନପୁଷ୍ପା ।

ଶତମଖମଣିନୀଲା ଶୌରିଲାବଣ୍ୟସିନ୍ଧୋ-

     ର୍ନିବିଡତମତମାଲା କାଽପି ବେଲାବନୀ ତ୍ୱମ୍ ॥ ୨୦.୨୦॥ ୭୦୦॥

ତ୍ୱୟି ବିନିହିତମେତତ୍ କେଽପି ପଶ୍ୟନ୍ତି ମନ୍ଦାଃ

     ଶତମଖମଣିଜାଲଂ ଶାର୍ଙ୍ଗିଣଃ ପାଦରକ୍ଷେ ।

ବୟମିଦମିହ ବିଦ୍ମଃ ପ୍ରାଣିନାଂ ଭାବୁକାନାଂ

     ହୃଦୟଗୃହଗୁହାଭ୍ୟଃ ପୀତମନ୍ଧଂ ତମିସ୍ରମ୍ ॥ ୨୦.୨୧॥ ୭୦୧॥

କ୍ଲୃପ୍ତଶ୍ୟାମା ମଣିଭିରସିତୈଃ କୃଷ୍ଣପକ୍ଷେଣ ଜୁଷ୍ଟା

     ଶ୍ରେୟଃ ପୁଂସାଂ ଜନୟସି ଗତିଂ ଦକ୍ଷିଣାମୁଦ୍ୱହନ୍ତୀ ।

ତେନାସ୍ମାକଂ ପ୍ରଥୟସି ପରଂ ପାଦୁକେ ତତ୍ତ୍ୱବିଦ୍ଭି-

     ର୍ମୌଲୌ ଦୃଷ୍ଟାଂ ନିଗମବଚସାଂ ମୁକ୍ତିକାଲାବ୍ୟବସ୍ଥାମ୍ ॥ ୨୦.୨୨॥ ୭୦୨॥

ସଦ୍ଭିର୍ଜୁଷ୍ଟା ସମୁଦିତବିଧୁର୍ଜୈତ୍ରୟାତ୍ରାବିନୋଦେ-

     ଷ୍ୱାତନ୍ୱାନା ରଜନିମନଘାମିନ୍ଦ୍ରନୀଲାଂଶୁଜାଲୈଃ ।

ଚିତ୍ରଂ ଖ୍ୟାତା କୁମୁଦବନତଃ ପାଦୁକେ ପୁଷ୍ୟସି ତ୍ୱଂ

     ବ୍ୟାକୋଚତ୍ୱମ୍ବିବୁଧବନିତାବକ୍ତ୍ରପଙ୍କେରୁହାଣାମ୍ ॥ ୨୦.୨୩॥ ୭୦୩॥

ନିତ୍ୟଂ ଲକ୍ଷ୍ମୀନୟନରୁଚିଭିଃ ଶୋଭିତା ଶକ୍ରନୀଲୈଃ

     ସାଲଗ୍ରାମକ୍ଷିତିରିବ ଶୁଭୈଃ ଶାର୍ଙ୍ଗିଣୋ ରୂପଭେଦୈଃ ।

ସାକେତାଦେଃ ସମଧିକଗୁଣାଂ ସମ୍ପଦଂ ଦର୍ଶୟନ୍ତୀ

     ମୁକ୍ତିକ୍ଷେତ୍ରଂ ମୁନିଭିରଖିଲୈଃ ପାଦୁକେ ଗୀୟସେ ତ୍ୱମ୍ ॥ ୨୦.୨୪॥ ୭୦୪॥

ପାଦନ୍ୟାସପ୍ରିୟସହଚରୀଂ ପାଦୁକେ ବାସଗେହା-

     ତ୍ତ୍ୱାମାରୁହ୍ୟ ତ୍ରିଚତୁରପଦଂ ନିର୍ଗତେ ରଙ୍ଗନାଥେ ।

ଅନ୍ତଃସ୍ନିଗ୍ଧୈରସୁରମହିଲାବେଣିବିକ୍ଷେପମିତ୍ରୈଃ

     ଶ୍ୟାମଚ୍ଛାୟଂ ଭବତି ଭବନଂ ଶକ୍ରନୀଲାଂଶୁଭିସ୍ତେ ॥ ୨୦.୨୫॥ ୭୦୫॥

ଯା ତେ ବାହ୍ୟାଙ୍ଗଣମଭିୟତଃ ପାଦୁକେ ରଙ୍ଗଭର୍ତୁଃ

     ସଞ୍ଚାରେଷୁ ସ୍ଫୁରତି ବିତତିଃ ଶକ୍ରନୀଲପ୍ରଭାୟାଃ ।

ବିଷ୍ୱକ୍ସେନପ୍ରଭୃତିଭିରସୌ ଗୃହ୍ୟତେ ବେତ୍ରହସ୍ତୈ-

     ର୍ଭ୍ରୂବିକ୍ଶେପସ୍ତବ ଦିବିଷଦାଂ ନୂନମାହ୍ୱାନହେତୁଃ ॥ ୨୦.୨୬॥ ୭୦୬॥

ଅକ୍ଷ୍ଣୋରଞ୍ଜନକଲ୍ପନା ଯବନିକା ଲାସ୍ୟପ୍ରସୂତେର୍ଗତେ-

     ଶ୍ଚିଦ୍ଗଙ୍ଗାୟମୁନା ମୁକୁନ୍ଦଜଲଧେର୍ୱେଲାତମାଲାଟବୀ ।

କାନ୍ତାକୁନ୍ତଲସନ୍ତତିଃ ଶ୍ରୁତିବଧୂକସ୍ତୂରିକାଲଙ୍କ୍ରିୟା

     ନିତ୍ୟଂ ରତ୍ନପଦାବନି ସ୍ଫୁରତି ତେ ନୀଲା ମଣିଶ୍ରେଣିକ୍ରା ॥ ୨୦.୨୭॥ ୭୦୭॥

ନିରନ୍ତରପୁରନ୍ଦରୋପଲଭୁବଂ ଦ୍ୟୁତିଂ ତାବକୀ-

     ମବୈମି ମଣିପାଦୁକେ ସରଣିସଙ୍ଗିନୀଂ ରଙ୍ଗିଣଃ ।

ତଦୀୟନବୟୌବନଦ୍ୱିରଦମଲ୍ଲଗଣ୍ଡସ୍ଥଲୀ-

     ଗଲନ୍ମଦଝଲଞ୍ଝଲାବହୁଲକଜ୍ଜଲଶ୍ୟାମିକାମ୍ ॥ ୨୦.୨୮॥ ୭୦୮॥

ପ୍ରତୀମସ୍ତ୍ୱଂ ପାଦାବନି ଭଗବତୋ ରଙ୍ଗବସତେ-

     ର୍ଘନୀଭୂତାମିତ୍ଥଂ ପଦକମଲମାଧ୍ୱୀପରିଣତିମ୍ ।

ସ୍ଫୁରନ୍ତଃ ପର୍ୟନ୍ତେ ମଦଗରିମନିଷ୍ପନ୍ଦମଧୁପ-

     ପ୍ରସକ୍ତିଂ ଯତ୍ରୈତେ ବିଦଧତି ମହାନୀଲମଣୟଃ ॥ ୨୦.୨୯॥ ୭୦୯॥

ନମତାଂ ନିଜେନ୍ଦ୍ରନୀଲ-

     ପ୍ରଭବେନ ମୁକୁନ୍ଦପାଦୁକେ ଭବତୀ ।

ତମସା ନିରସ୍ୟତି ତମଃ

     କଣ୍ଟକମିବ କଣ୍ଟକେନୈବ ॥ ୨୦.୩୦॥ ୭୧୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱଙ୍କେଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଇନ୍ଦ୍ରନୀଲପଦ୍ଧତିର୍ୱିଂଶୀ ॥

୨୧. ବିମ୍ବପ୍ରତିବିମ୍ବପଦ୍ଧତିଃ (୨୦)

ଶୌରେଃ ଶୁଦ୍ଧାନ୍ତନାରୀଣାଂ ବିହାରମଣିଦର୍ପଣମ୍ ।

ପ୍ରସତ୍ତେରିବ ସଂସ୍ଥାନଂ ପଦତ୍ରାଣମୁପାସ୍ମହେ ॥ ୨୧.୧॥ ୭୧୧॥

କମଲାପତିପାଦୁକେ କଦାଚି-

     ଦ୍ୱିହଗେନ୍ଦ୍ରସ୍ତ୍ୱୟି ବିମ୍ବିତୋ ବିଭାତି ।

ସବିଲାସଗତେଽପି ରଙ୍ଗଭର୍ତୁ-

     ର୍ନିଜମାତ୍ମାନମିବୋପଧାତୁକାମଃ ॥ ୨୧.୨॥ ୭୧୨॥

ମଣିପଙ୍କ୍ତିଷୁ ତେ ଦିଶାମଧୀଶାଃ

     ପ୍ରତିବିମ୍ବାନି ନିଜାନି ବୀକ୍ଷମାଣାଃ ।

ଅଭିୟନ୍ତି ମୁକୁନ୍ଦପାଦୁକେ ତ୍ୱା-

     ମଧିକାରାନ୍ତରସୃଷ୍ଟିଶଙ୍କୟେବ ॥ ୨୧.୩॥ ୭୧୩॥

ମଣିମୌଲିଶତେନ ବିମ୍ବିତେନ

     ପ୍ରଣତାନାଂ ପରିତଃ ସୁରାସୁରାଣାମ୍ ।

ମୁରଭିନ୍ମଣିପାଦୁକେ ମହିମ୍ନା

     ଯୁଗପତ୍ ତେଷୁ ସମର୍ପିତେବ ଭାସି ॥ ୨୧.୪॥ ୭୧୪॥

ଉପନୀତମୁପାୟନଂ ସୁରେନ୍ଦ୍ରୈଃ

     ପ୍ରତିବିମ୍ବଚ୍ଛଲତସ୍ତ୍ୱୟି ପ୍ରବିଷ୍ଟମ୍ ।

ସ୍ୱୟମେବ କିଲ ପ୍ରସାଦଭୂମ୍ନା

     ପ୍ରତିଗୃହ୍ଣାସି ମୁକୁନ୍ଦପାଦୁକେ ତ୍ୱମ୍ ॥ ୨୧.୫॥ ୭୧୫॥

ରଙ୍ଗେଶ୍ୱରସ୍ୟ ନବପଲ୍ଲବଲୋଭନୀୟୌ

     ପାଦୌ କଥନ୍ନୁ କଠିନା ସ୍ୱୟମୁଦ୍ୱହେୟମ୍ ।

ଇତ୍ୟାକଲୟ୍ୟ ନିୟତଂ ମଣିପାଦୁକେ ତ୍ୱଂ

     ପଦ୍ମାସ୍ତରଂ ବହସି ତତ୍ପ୍ରତିବିମ୍ବଲକ୍ଷାତ୍ ॥ ୨୧.୬॥ ୭୧୬॥

ପାଦାର୍ପଣାତ୍ପ୍ରଥମତୋ ହରିଦଶ୍ମରମ୍ୟେ

     ମଧ୍ୟେ ତବ ପ୍ରତିଫଲନ୍ମଣିପାଦରକ୍ଷେ ।

ମନ୍ୟେ ନିଦର୍ଶୟତି ରଙ୍ଗପତିର୍ୟୁଗାନ୍ତେ

     ନ୍ୟଗ୍ରୋଧପତ୍ରଶୟିତଂ ନିଜମେବ ରୂପମ୍ ॥ ୨୧.୭॥ ୭୧୭॥

ଯାତ୍ରାବସାନମଧିଗଚ୍ଛତି ରଙ୍ଗନାଥେ

     ବିଶ୍ରାଣୟସ୍ୟନୁପଦଂ ମଣିପାଦୁକେ ତ୍ୱମ୍ ।

ପ୍ରାୟଃ ପ୍ରୟାଣସମୟେ ପ୍ରତିବିମ୍ବିତାନାଂ

     ତୀର୍ଥାବଗାହମପରଂ ତ୍ରିଦଶେଶ୍ୱରାଣାମ୍ ॥ ୨୧.୮॥ ୭୧୮॥

ଉଚ୍ଚାବଚେଷୁ ତବ ରତ୍ନଗଣେଷୁ ମାତ-

     ର୍ୱେଧାଃ ପ୍ରୟାଣସମୟେ ପ୍ରତିବିମ୍ବିତାଙ୍ଗଃ ।

ଆଶଙ୍କତେ ମୁରଭିଦୋ ମଣିପାଦୁକେ ତ୍ୱା-  var  ମଧୁଭିଦୋ

     ମାଗାମିକଲ୍ପକମଲାସନପଙ୍କ୍ତିଗର୍ଭାମ୍ ॥ ୨୧.୯॥ ୭୧୯॥

ଆଲୋକରଶ୍ମିନିୟତାଂ ମଣିପାଦୁକେ ତ୍ୱା-

     ମାରୁହ୍ୟ ସଞ୍ଚରତି ରଙ୍ଗପତୌ ସଲୀଲମ୍ ।

ଅନ୍ତଃପୁରେଷୁ ଯୁଗପତ୍ସୁଦୃଶୋ ଭଜନ୍ତେ

     ଡୋଲାଧିରୋହଣରସଂ ତ୍ୱୟି ବିମ୍ବିତାଙ୍ଗ୍ୟଃ ॥ ୨୧.୧୦॥ ୭୨୦॥

କାଲେଷୁ ରାଘବପଦାବନି ଭକ୍ତିନମ୍ରଃ

     କାର୍ୟାଣି ଦେବି ଭରତୋ ବିନିବେଦୟଂସ୍ତେ ।

ତ୍ୱଦ୍ରତ୍ନବିମ୍ବତତୟାଽପି ମୁହୁଃ ସ୍ୱକୀୟାଂ

     ରାଜାସନସ୍ଥିତିମବେକ୍ଷ୍ୟ ଭୃଶଂ ଲଲଜ୍ଜେ ॥ ୨୧.୧୧॥ ୭୨୧॥

ପ୍ରତ୍ୟାଗତେ ବିଜୟିନି ପ୍ରଥମେ ରଘୂଣାଂ

     ବିନ୍ୟସ୍ୟତି ତ୍ୱୟି ପଦଂ ମଣିପାଦରକ୍ଷେ ।

ରତ୍ନୌଘବିମ୍ବିତନିଶାଚରବାନରାଂ ତ୍ୱାଂ

     ପୂର୍ୱକ୍ଷଣସ୍ଥମିବ ପୁଷ୍ପକମନ୍ୱପଶ୍ୟନ୍ ॥ ୨୧.୧୨॥ ୭୨୨॥

ବୈୟାକୁଲୀଂ ଶମୟିତୁଂ ଜଗତୋ ବହନ୍ତ୍ୟା

     ରକ୍ଷାଧୁରାଂ ରଘୁଧ୍ରୁରନ୍ଧରପାଦରକ୍ଷେ ।

ପ୍ରାଜ୍ୟଂ ଯଶଃ ପ୍ରଚୁରଚାମରବିମ୍ବଲକ୍ଷା-

     ତ୍ପ୍ରାୟସ୍ତ୍ୱୟା କବଲିତଂ ପ୍ରତିଭୂପତୀନାମ୍ ॥ ୨୧.୧୩॥ ୭୨୩॥

ପ୍ରତିଦିଶମୁପୟାତେ ଦେବି ଯାତ୍ରୋତ୍ସବାର୍ଥଂ

     ତ୍ୱୟି ବିହରଣକାଲେ ବିମ୍ବିତେ ଜୀବଲୋକେ ।

ବହସି ମଣିଗଣୈସ୍ତ୍ୱଂ ପାଦୁକେ ରଙ୍ଗଭର୍ତୁଃ

     କବଲିତସକଲାର୍ଥାଂ କାଞ୍ଚିଦନ୍ୟାମବସ୍ଥାମ୍ ॥ ୨୧.୧୪॥ ୭୨୪॥

ଭଗବତି ଗରୁଡସ୍ଥେ ବାହନସ୍ଥାଃ ସୁରେନ୍ଦ୍ରା-

     ସ୍ତ୍ୱୟି ବିନିହିତପାଦେ ଭୂମିମେବାଶ୍ରୟନ୍ତି ।

ତଦପି ଚରଣରକ୍ଷେ ରତ୍ନଜାଲେ ତ୍ୱଦୀୟେ

     ପ୍ରତିଫଲିତନିଜାଙ୍ଗାସ୍ତୁଲ୍ୟବାହା ଭବନ୍ତି ॥ ୨୧.୧୫॥ ୭୨୫॥

ସ୍ୱଚ୍ଛାକାରାଂ ସୁରୟୁବତୟଃ ସ୍ୱପ୍ରତିଚ୍ଛନ୍ଦଲକ୍ଷା-

     ଦ୍ଗାହନ୍ତେ ତ୍ୱାଂ ପ୍ରଣତିସମୟେ ପାଦୁକେ ସାଭିମାନାଃ ।

ସ୍ତ୍ରୀରତ୍ନାନାଂ ପରିଭବବିଘୌ ସୃଷ୍ଟିମାତ୍ରେଣ ଦକ୍ଷାଂ

     ନୀଚୈଃକର୍ତୁଂ ନରସଖମୁନେରୁର୍ୱଶୀମୂରୁଜାତାମ୍ ॥ ୨୧.୧୬॥ ୭୨୬॥

ସ୍ୱେଚ୍ଛାକେଲିପ୍ରିୟସହଚରୀଂ ସ୍ୱଚ୍ଛରତ୍ନାଭିରାମାଂ

     ସ୍ଥାନେ ସ୍ଥାନେ ନିହିତଚରଣୋ ନିର୍ୱିଶନ୍ ରଙ୍ଗନାଥଃ ।

ସଞ୍ଚାରାନ୍ତେ ସହ କମଲୟା ଶେଷଶୟ୍ୟାଧିରୂଢ-

     ସ୍ତ୍ୟକ୍ତ୍ୱାଽପି ତ୍ୱାଂ ତ୍ୟଜତି ନ ପୁନଃ ସ୍ୱପ୍ରତିଚ୍ଛନ୍ଦଲକ୍ଷାତ୍ ॥ ୨୧.୧୭॥ ୭୨୭॥

ତ୍ୱାମେବୈକାମଧିଗତବତଃ କେଲିସଞ୍ଚାରକାଲେ

     ପାର୍ଶ୍ୱେ ସ୍ଥିତ୍ୱା ବିନିହିତଦୃଶୋଃ ପାଦୁକେଽନନ୍ୟଲକ୍ଷ୍ୟମ୍ ।

ତ୍ୱଦ୍ରତ୍ନେଷୁ ପ୍ରତିଫଲିତୟୋର୍ନିତ୍ୟଲକ୍ଷ୍ୟପ୍ରସାଦା

     ପଦ୍ମାଭୂମ୍ୟୋର୍ଦିଶତି ଭବତୀ ପାଦସେବାଂ ମୁରାରେଃ ॥ ୨୧.୧୮॥ ୭୨୮॥

ଏକାମେକଃ କିଲ ନିରବିଶତ୍ପାଦୁକେ ଦ୍ୱାରକାୟାଂ

     କ୍ରୀଡାୟୋଗୀକୃତବହୁତନୁଃ ଷୋଡଶସ୍ତ୍ରୀସହସ୍ରେ ।

ଶୁଦ୍ଧେ ଦେବି ତ୍ୱଦୁପନିହିତେ ବିମ୍ବିତୋରତ୍ନଜାଲେ

     ଭୁଙ୍କ୍ତେ ନିତ୍ୟଂ ସ ଖଲୁ ଭବତୀଂ ଭୂମିକାନାଂ ସହସ୍ରୈଃ ॥ ୨୧.୧୯॥ ୭୨୯॥

ହରିପଦନଖେଷୁ ଭବତୀ ପ୍ରତିଫଲତି ତବୈତଦପି ରତ୍ନେଷୁ ।

ଉଚିତା ମିଥଃ ପଦାବନି ବିମ୍ବପ୍ରତିବିମ୍ବତା ଯୁବୟୋଃ ॥ ୨୧.୨୦॥ ୭୩୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ବିମ୍ବପ୍ରତିବିମ୍ବପଦ୍ଧତିରେକବିଂଶୀ ॥

୨୨. କାଞ୍ଚନପଦ୍ଧତିଃ (୨୦)

କଲ୍ୟାଣପ୍ରକୃତିଂ ବନ୍ଦେ

     ଭଜନ୍ତୀଂ କାଞ୍ଚନଶ୍ରିୟମ୍ ।

ପଦାର୍ହାଂ ପାଦୁକାଂ ଶୌରେଃ

     ପଦ ଏବ ନିବେଶିତାମ୍ ॥ ୨୨.୧॥ ୭୩୧॥

ମଧୁଜିତ୍ତନୁକାନ୍ତିତସ୍କରାଣାଂ ଜଲଦାନାମଭୟମ୍ବିଧାତୁକାମା ।

ଚପଲେବ ତଦଙ୍ଘ୍ରିମାଶ୍ରୟନ୍ତୀ ଭବତୀ କାଞ୍ଚନପାଦୁକେ ବିଭାତି ॥ ୨୨.୨॥ ୭୩୨॥

ନିକଷୀକୃତରମ୍ୟକୃଷ୍ଣରତ୍ନା ଭବତୀ କାଞ୍ଚନସମ୍ପଦଂ ବ୍ୟନକ୍ତି ।

ପରିପୁଷ୍ୟତି ପାଦୁକେ ଯଦୀକ୍ଷା ସହସା ନଃ ସମଲୋଷ୍ଟକାଞ୍ଚନତ୍ୱମ୍ ॥ ୨୨.୩॥ ୭୩୩॥

ସୁରଭିର୍ନିଗମୈଃ ସମଗ୍ରକାମା କନକୋତ୍କର୍ଷବତୀ ପଦାବନି ତ୍ୱମ୍ ।

ଦିଶସି ପ୍ରତିପନ୍ନମାଧବଶ୍ରୀରନିଶୋନ୍ନିଦ୍ରମଶୋକବୈଭବଂ ନଃ ॥ ୨୨.୪॥ ୭୩୪॥

ସତି ବର୍ଣଗୁଣେ ସୁବର୍ଣଜାତେ

     ର୍ଜଗତି ରବ୍ୟାତମସୌରଭାଦବର୍ଣମ୍ ।

ଶ୍ରୁତିସୌରଭଶାଲିନା ସ୍ୱହେମ୍ନା

     ଭବତୀ ଶୌରିପଦାବନି ବ୍ୟୁଦାସ୍ଥତ୍ ॥ ୨୨.୫॥ ୭୩୫॥

ପ୍ରତିପନ୍ନମୟୂରକଣ୍ଠଧାମ୍ନା ପରିଶୁଦ୍ଧେନ ପଦାବନି ସ୍ୱକେନ ।

କମଲାସ୍ତନଭୂଷଣୋଚିତଂ ତଦ୍ଭବତୀ ରତ୍ନମଲଙ୍କରୋତି ହେମ୍ନା ॥ ୨୨.୬॥ ୭୩୬॥

କାନ୍ତ୍ୟା ପରଂ ପୁରୁଷମାପ୍ରଣଖାତ୍ ସୁବର୍ଣଂ

     କର୍ତୁଂ କ୍ଷମା ତ୍ୱମସି କାଞ୍ଚନପାଦରକ୍ଷେ ।

ଅନ୍ୟାଦୃଶୀଂ ଦିଶସି ଯା ବିନତସ୍ୟ ଦୂରା-

     ଦାରଗ୍ୱଧସ୍ତବକସମ୍ପଦମିନ୍ଦୁମୌଲେଃ ॥ ୨୨.୭॥ ୭୩୭॥

ଚନ୍ଦ୍ରାକୃତିଃ କଥମକଲ୍ପୟଥାସ୍ତଦାନୀଂ

     ବୈମାନିକପ୍ରଣୟିନୀବଦନାମ୍ବୁଜାନାମ୍ ।

ବିକ୍ରାନ୍ତିକାଲବିତତେନ ନିଜେନ ଧାମ୍ନା

     ବାଲାତପଂ ବଲିବିମର୍ଦନପାଦୁକେ ତ୍ୱମ୍ ॥ ୨୨.୮॥ ୭୩୮॥

ଲେଭେ ତଦାପ୍ରଭୃତି ନୂନମିୟଂ ଭବତ୍ୟାଃ

     କାନ୍ତ୍ୟା କବେରତନୟା କନକାପଗାତ୍ୱମ୍ ।

ଯାବନ୍ମୁକୁନ୍ଦପଦହେମପଦାବନି ତ୍ୱଂ

     ପୁଣ୍ୟଂ ବିଭୂଷିତବତୀ ପୁଲିନଂ ତଦୀୟମ୍ ॥ ୨୨.୯॥ ୭୩୯॥

ଚିତ୍ରଂ ସରୋଜନିଲୟାସହିତସ୍ୟ ଶୌରେ-

     ର୍ୱାସୋଚିତାନି ଚରଣାବନି ସମ୍ବିଧିତ୍ସୋଃ ।

ସଦ୍ୟୋ ବିକାସମୁପୟାନ୍ତି ସମାଧିଭାଜାଂ

     ଚନ୍ଦ୍ରାତପେନ ତବ ମାନସପଙ୍କଜାନି ॥ ୨୨.୧୦॥ ୭୪୦॥

ତ୍ୱୟ୍ୟେବ ପାଦମଧିରୋପ୍ୟ ନବଂ ପ୍ରବାହଂ

     ନାଥେ ପଦାବନି ନିଶାମୟିତୁଂ ପ୍ରବୃତ୍ତେ ।

ଆତ୍ମୀୟକାଞ୍ଚନରୁଚା ଭବତୀ ବିଧତ୍ତେ

     ହେମାରବିନ୍ଦଭରିତାମିବ ହେମସିନ୍ଧୁମ୍ ॥ ୨୨.୧୧॥ ୭୪୧॥

ବିହରତି ପୁଲିନେଷୁ ତ୍ୱତ୍ସଖେ ରଙ୍ଗନାଥେ

     କନକସରିଦିୟଂ ତେ ପାଦୁକେ ହେମଧାମ୍ନା ।

ବହତି ସଲିଲକେଲୀସ୍ରସ୍ତଚୋଲାବରୋଧ-

     ସ୍ତନକଲଶହରିଦ୍ରାପଙ୍କପିଙ୍ଗାମବସ୍ଥାମ୍ ॥ ୨୨.୧୨॥ ୭୪୨॥

ସୁରଭିନିଗମଗନ୍ଧା ସୌମ୍ୟପଦ୍ମାକରସ୍ଥା

     କନକକମଲିନୀବ ପ୍ରେକ୍ଷ୍ୟସେ ପାଦୁକେ ତ୍ୱମ୍ ।

ଭ୍ରମର ଇବ ସଦା ତ୍ୱାଂ ପ୍ରାପ୍ତନାନାବିହାରଃ

     ଶତମଖମଣିନୀଲଃ ସେବତେ ଶାର୍ଙ୍ଗଧନ୍ୱା ॥ ୨୨.୧୩॥ ୭୪୩॥

କନକରୁଚିରବର୍ଣାଂ ପାଦୁକେ ସହ୍ୟସିନ୍ଧୁଃ

     ଶ୍ରିୟମିବ ମହନୀୟାଂ ସିନ୍ଧୁରାଜସ୍ୟ ପତ୍ନୀ ।

ସ୍ୱୟମିହ ସବିଧସ୍ଥା ସୌମ୍ୟଜାମାତୃୟୁକ୍ତା-

     ମୁପଚରତି ରସେନ ତ୍ୱାମପତ୍ୟାଭିମାନାତ୍ ॥ ୨୨.୧୪॥ ୭୪୪॥

ଅନୁକଲମୁପଜୀବ୍ୟା ଦୃଶ୍ୟସେ ନିର୍ଜରାଣାଂ

     ତ୍ରିପୁରମଥନମୌଲୌ ଶେଖରତ୍ୱଂ ଦଧାସି ।

ପ୍ରତିପଦମଧିଗମ୍ୟ ପ୍ରାପ୍ତଶୃଙ୍ଗାଽସି ଶୌରେ-

     ସ୍ତଦପି ଚରଣରକ୍ଷେ ପୂର୍ଣଚନ୍ଦ୍ରାକୃତିସ୍ତ୍ୱମ୍ ॥ ୨୨.୧୫॥ ୭୪୫॥

କନକମପି ତୃଣଂ ଯେ ମନ୍ୱତେ ବୀତରାଗା-

     ସ୍ତୃଣପି କନକଂ ତେ ଜାନତେ ତ୍ୱତ୍ପ୍ରକାଶୈଃ ।

ମଧୁରିପୁପଦରକ୍ଷେ ଯତ୍ ତ୍ୱଦର୍ଥୋପନୀତାନ୍

     ପରିଣମୟସି ହୈମାନ୍ ଦେବି ଦୂର୍ୱାଙ୍କୁରାଦୀନ୍ ॥ ୨୨.୧୬॥ ୭୪୬॥

ବିଶୁଦ୍ଧିମଧିଗଚ୍ଛତି ଜ୍ୱଲନସଙ୍ଗମାତ୍ କାଞ୍ଚନଂ

     ବିଦନ୍ତି ଚ ଜଗନ୍ତି ତନ୍ନ ଖଲୁ ତଦ୍ୱିପର୍ୟସ୍ୟତି ।

କଥଂ କନକପାଦୁକେ କମଲଲୋଚନେ ସାକ୍ଷିଣି

     ତ୍ୱୟୈବ ପରିଶୁଦ୍ଧତା ହୁତଭୁଜୋଽପି ଜାଘଟ୍ୟତେ ॥ ୨୨.୧୭॥ ୭୪୭॥

ତାରାସଙ୍ଗପ୍ରଥିତବିଭବାଂ ଚାରୁଜାମ୍ବୂନଦାଭାଂ

     ତ୍ୱାମାରୂଧସ୍ତ୍ରିଦଶମହିତାଂ ପାଦୁକେ ରଙ୍ଗନାଥଃ ।

ସଞ୍ଚାରିଣ୍ୟାଂ ସୁରଶିଖରିଣସ୍ତସ୍ଥୁଷା ମେଖଲାୟାଂ

     ଧତ୍ତେ ମତ୍ତଦ୍ୱିରଦପତିନା ସାମ୍ୟକକ୍ଷ୍ୟାଂ ସମୀକ୍ଷ୍ୟାମ୍ ॥ ୨୨.୧୮॥ ୭୪୮॥

କନକରୁଚିରା କାବ୍ୟାଖ୍ୟାତା ଶନୈଶ୍ଚରଣୋଚିତା

     ଶ୍ରିତଗୁରୁବୁଧା ଭାସ୍ୱଦ୍ରୂପା ଦ୍ୱିଜାଧିପସେବିତା ।

ବିହିତବିଭବା ନିତ୍ୟଂ ବିଷ୍ଣୋଃ ପଦେ ମଣିପାଦୁକେ

     ତ୍ୱମସି ମହତି ବିଶ୍ୱେଷାଂ ନଃ ଶୁଭା ଗ୍ରହମଣ୍ଡଲୀ ॥ ୨୨.୧୯॥ ୭୪୯॥

ପ୍ରଜ୍ୱଲିତପଞ୍ଚହେତିର୍ହିରଣ୍ମୟୀଂ ତ୍ୱାଂ ହିରଣ୍ୟବିଲୟାର୍ହଃ ।

ଆବହତୁ ଜାତବେଦାଃ ଶ୍ରିୟମିବ ନଃ ପାଦୁକେ ନିତ୍ୟମ୍ ॥ ୨୨.୨୦॥ ୭୫୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

କାଞ୍ଚନପଦ୍ଧତିର୍ଦ୍ୱାବିଂଶୀ ॥

୨୩. ଶେଷପଦ୍ଧତିଃ (୧୦)

ସୃଷ୍ଟାଂ ଭୂମାବନନ୍ତେନ ନିତ୍ୟଂ ଶେଷସମାଧିନା ।

ଅହଂ ସମ୍ଭାବୟାମି ତ୍ୱାମାତ୍ମାନମିବ ପାଦୁକେ ॥ ୨୩.୧॥ ୭୫୧॥

ପଦ୍ମାଭୋଗାତ୍ପାଦୁକେ ରଙ୍ଗଭର୍ତୁଃ

     ପାଦସ୍ପର୍ଶାଦ୍ଭୋଗମନ୍ୟଂ ପ୍ରପିତ୍ସୋଃ ।

ଶେଷସ୍ୟୈକାଂ ଭୂମିକାମବ୍ରବୀତ୍ ତ୍ୱା-

     ମାଚାର୍ୟାଣାମଗ୍ରଣିର୍ୟାମୁନେୟଃ ॥ ୨୩.୨॥ ୭୫୨॥

ଶେଷତ୍ୱମମ୍ବ ଯଦି ସଂଶ୍ରୟତି ପ୍ରକାମଂ

     ତ୍ୱଦ୍ଭୂମିକାଂ ସମଧିଗମ୍ୟ ଭୁଜଙ୍ଗରାଜଃ ।

ତ୍ୱାମେବ ଭକ୍ତିବିନତୈର୍ୱହତାଂ ଶିରୋଭିଃ

     କାଷ୍ଠାଂ ଗତଂ ତଦିହ କେଶବପାଦରକ୍ଷେ ॥ ୨୩.୩॥ ୭୫୩॥

ମା ଭୂଦିୟଂ ମୟି ନିଷଣ୍ଣପଦସ୍ୟ ନିତ୍ୟଂ

     ବିଶ୍ୱମ୍ଭରସ୍ୟ ବହନାଦ୍ୱ୍ୟଥିତେତି ମତ୍ୱା ।

ଧତ୍ସେ ବଲାଭ୍ୟଧିକୟା ମଣିପାଦୁକେ ତ୍ୱଂ

     ଶେଷାତ୍ମନା ବସୁମତୀଂ ନିଜୟୈବ ମୂର୍ତ୍ୟା ॥ ୨୩.୪॥ ୭୫୪॥

ତତ୍ତାଦୃଶା ନିଜବଲେନ ନିରୂଢକୀର୍ତିଃ

     ଶେଷସ୍ତବୈବ ପରିଣାମବିଶେଷ ଏଷଃ ।

ରାମେଣ ସତ୍ୟବଚସା ଯଦନନ୍ୟବାହ୍ୟାଂ

     ବୋଢୁଂ ପୁରା ବସୁମତୀଂ ଭବତୀ ନିୟୁକ୍ତା ॥ ୨୩.୫॥ ୭୫୫॥

ଶେଷତ୍ୱସୀମନିୟତାଂ ମଣିପାଦରକ୍ଷେ

     ତ୍ୱାମାଗମାଃ କୁଲବଧୂମିବ ବାଲପୁତ୍ରାଃ ।

ତ୍ୱଦ୍ରୂପଶେଷଶୟିତସ୍ୟ ପରସ୍ୟ ପୁଂସଃ

     ପାଦୋପଧାନଶୟିତାମୁପଧାନୟନ୍ତି ॥ ୨୩.୬॥ ୭୫୬॥

ଭରତଶିରସି ଲଗ୍ନାଂ ପାଦୁକେ ଦୂରତସ୍ତ୍ୱାଂ

     ସ୍ୱତନୁମପି ବବନ୍ଦେ ଲକ୍ଷ୍ମଣଃ ଶେଷଭୂତଃ ।

କିମିଦମିହ ବିଚିତ୍ରଂ ନିତ୍ୟଯୁକ୍ତଃ ସିଷେବେ

     ଦଶରଥତନୟଃ ସନ୍ ରଙ୍ଗନାଥଃ ସ୍ୱମେବ ॥ ୨୩.୭॥ ୭୫୭॥

ଭୂୟୋଭୂୟଃ ସ୍ତିମିତଚଲିତେ ଯସ୍ୟ ସଙ୍କଲ୍ପସିନ୍ଧୌ

     ବ୍ରହ୍ମେଶାନପ୍ରଭୃତୟ ଇମେ ବୁଦ୍ବୁଦତ୍ୱଂ ଭଜନ୍ତି ।

ତସ୍ୟାନାଦେର୍ୟୁଗପରିଣତୌ ଯୋଗନିଦ୍ରାନୁରୂପଂ

     କ୍ରୀଡାତଲ୍ପଂ କିମପି ତନୁତେ ପାଦୁକେ ଭୂମିକାଽନ୍ୟା ॥ ୨୩.୮॥ ୭୫୮॥

ଅହୀନାତ୍ମା ରଙ୍ଗକ୍ଷିତିରମଣପାଦାବନି ସଦା

     ସତାମିତ୍ଥଂ ତ୍ରାଣାତ୍ପ୍ରଥିତନିଜସତ୍ରତ୍ୱବିଭବା ।

ଅବିଦ୍ୟାୟାମିନ୍ୟାଃ ସ୍ପୃଶସି ପୁନରେକାହପଦବୀଂ

     କ୍ରତୂନାମାରାଧ୍ୟା କ୍ରତୁରପିଚ ସର୍ୱସ୍ତ୍ୱମସି ନଃ ॥ ୨୩.୯॥ ୭୫୯॥

ବହୁମୁଖଭୋଗସମେତୈର୍ନିର୍ମୁକ୍ତତୟା ବିଶୁଦ୍ଧିମାପନ୍ନୈଃ ।

ଶେଷାତ୍ମିକା ପଦାବନି ନିଷେବ୍ୟସେ ଶେଷଭୂତୈସ୍ତ୍ୱମ୍ ॥ ୨୩.୧୦॥ ୭୬୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଶେଷପଦ୍ଧତିସ୍ତ୍ରୟୋବିଂଶୀ ॥

୨୪. ଦ୍ୱନ୍ଦ୍ୱପଦ୍ଧତିଃ (୨୦)

ପ୍ରପଦ୍ୟେ ପାଦୁକାରୂପଂ ପ୍ରଣବସ୍ୟ କଲାଦ୍ୱୟମ୍ ।

ଓତଂ ମିତମିଦଂ ଯସ୍ମିନ୍ନନନ୍ତସ୍ୟାପି ତତ୍ପଦମ୍ ॥ ୨୪.୧॥ ୭୬୧॥

ମଣିପାଦୁକୟୋର୍ୟୁଗଂ ମୁରାରେର୍ମୟି ନିତ୍ୟଂ ବିଦଧାତୁ ମଙ୍ଗଲାନି ।

ଅଧିକୃତ୍ୟ ଚରାଚରସ୍ୟ ରକ୍ଶାମାନୁକମ୍ପାକ୍ଷମୟୋରିବାବତାରଃ ॥ ୨୪.୨॥ ୭୬୨॥

ଚରଣୌ ମଣିପାଦୁକେ ମୁରାରେଃ ପ୍ରଣତାନ୍ପାଲୟିତୁଂ ପ୍ରପଦ୍ୟମାନମ୍ ।

ବିପଦାମିହ ଦୈବମାନୁଷୀଣାଂ ପ୍ରତିକାରଂ ଯୁବୟୋର୍ଦ୍ୱୟଂ ପ୍ରତୀମଃ ॥ ୨୪.୩॥ ୭୬୩॥

ମୁରଭିନ୍ମଣିପାଦୁକେ ଭବତ୍ୟୋର୍ୱିହିତୋ ନୂନମସୌ ମିଥୋ ବିଭାଗଃ ।

ଭଜତାମପରସ୍ପରପ୍ରିୟାଣାମବିରୋଧାୟ ସୁରାସୁରେଶ୍ୱରାଣାମ୍ ॥ ୨୪.୪॥ ୭୬୪॥

ଅହିତୋନ୍ମଥନାୟ ସଂଶ୍ରିତାନାମଲମାଲୋକବଶେନ ଶବ୍ଦତୋ ବା ।

କରୟୋଶ୍ଚ ରଥାଙ୍ଗପାଞ୍ଚଜନ୍ୟୌ ମଧୁହନ୍ତୁଃ ପଦୟୋଶ୍ଚ ପାଦୁକେ ଯେ ॥ ୨୪.୫॥ ୭୬୫॥

ଅବଧୀରିତସାଧୁପଦ୍ଧତୀନାମଲସାନାଂ ମଧୁବୈରିପାଦୁକେ ଦ୍ୱେ ।

ଇତରେତରସାହଚର୍ୟମିତ୍ଥଂ ପ୍ରତିପନ୍ନେ ଇବ ଦୈବପୌରୁଷେ ନଃ ॥ ୨୪.୬॥ ୭୬୬॥

ପାର୍ଶ୍ୱୟୋଃ ସରସିଜାବସୁନ୍ଧରେ ପାଦୟୋଶ୍ଚ ମଣିପାଦୁକେ ଯୁବାମ୍ ।

ସନ୍ନିକର୍ଷଥ ନ ଚେନ୍ମଧୁଦ୍ୱିଷଃ କିଂ କରିଷ୍ୟତି କୃତାଗସାଂ ଗଣଃ ॥ ୨୪.୭॥ ୭୬୭॥

ପାଦୁକେ ଭବଭୟପ୍ରତୀପୟୋର୍ଭାବୟାମି ଯୁବୟୋଃ ସମାଗମମ୍ ।

ସକ୍ତୟୋର୍ଦନୁଜବୈରିଣଃ ପଦେ ବିଦ୍ୟଯୋରିବ ପରାବରାତ୍ମନୋଃ ॥ ୨୪.୮॥ ୭୬୮॥

ରଙ୍ଗସୀମନି ରଥାଙ୍ଗଲକ୍ଷ୍ମଣଶ୍ଚିନ୍ତୟାମି ତପନୀୟପାଦୁକେ ।

ଶାପଦୋଷଶମନାୟ ତତ୍ପଦେ ଚକ୍ରବାକମିଥୁନଂ କୃତାସ୍ପଦମ୍ ॥ ୨୪.୯॥ ୭୬୯॥

ମାନୟାମି ଜଗତସ୍ତମୋପହେ ମାଧବସ୍ୟ ମଣିପାଦୁକେ ଯୁବାମ୍ ।

ଦକ୍ଷିଣୋତ୍ତରଗତିକ୍ରମୋଚିତେ ପଦ୍ଧତୀ ଇବ ମୟୂଖମାଲିନଃ ॥ ୨୪.୧୦॥ ୭୭୦॥

ରଙ୍ଗନାଥପଦୟୋରଲଙ୍କ୍ରିୟା ରାଜତେ କନକପାଦୁକାଦ୍ୱୟୀ ।

ତଦ୍ୱିଭୂତିୟୁଗଲୀବ ତାଦୃଶୀ ଛନ୍ଦତଃ ସମବିଭାଗମାଶ୍ରିତା ॥ ୨୪.୧୧॥ ୭୭୧॥

ସାକ୍ଷାତ୍ପଦଂ ମଧୁଭିଦଃ ପ୍ରତିପାଦୟନ୍ତ୍ୟୌ

     ମାନୋପପତ୍ତିନିୟତେ ମଣିପାଦୁକେ ଦ୍ୱେ ।

ଅନ୍ୟୋନ୍ୟସଙ୍ଗତିବଶାଦୁପପନ୍ନଚର୍ୟାମ୍-

     ଆଜ୍ଞାଂ ଶ୍ରୁତିସ୍ମୃତିମୟୀମବଧାରୟାମି ॥ ୨୪.୧୨॥ ୭୭୨॥

ବିଶ୍ୱୋପକାରମଧିକୃତ୍ୟ ବିହାରକାଲେ-

     ଷ୍ୱନ୍ୟୋନ୍ୟତଃ ପ୍ରଥମମେବ୍ପରିସ୍ଫୁରନ୍ତ୍ୟୋଃ ।

ଦୃଷ୍ଟାନ୍ତୟନ୍ତି ଯୁବୟୋର୍ମଣିପାଦରକ୍ଷେ

     ଦିବ୍ୟଂ ତଦେବ ମିଥୁନଂ ଦିବିଷନ୍ନିଷେବ୍ୟମ୍ ॥ ୨୪.୧୩॥ ୭୭୩॥

ଦ୍ୱାବେବ ଯତ୍ର ଚରଣୌ ପରମସ୍ୟ ପୁଂସଃ

     ତତ୍ର ଦ୍ୱିଧାସ୍ଥିତବତୀ ମଣିପାଦୁକେ ତ୍ୱମ୍ ।

ଯତ୍ରୈବ ଦର୍ଶୟତି ଦେବି ସହସ୍ରପାତ୍ତ୍ୱଂ

     ତତ୍ରାପି ନୂନମସି ଦର୍ଶିତତାବଦାତ୍ମା ॥ ୨୪.୧୪॥ ୭୭୪॥

ପର୍ୟାୟତୋ ଗତିବଶାନ୍ମଣିପାଦରକ୍ଷେ

     ପୂର୍ୱାପରତ୍ୱନିୟମଂ ବ୍ୟତିବର୍ତୟନ୍ତ୍ୟୌ ।

ମନ୍ୟେ ଯୁବାଂ ମହତି ବିଷ୍ଣୁପଦେ ସ୍ଫୁରନ୍ତ୍ୟୌ

     ସନ୍ଧ୍ୟେ ସମସ୍ତଜଗତାମଭିବନ୍ଦନୀୟେ ॥ ୨୪.୧୫॥ ୭୭୫॥

ଅଶ୍ରାନ୍ତସଞ୍ଚରଣୟୋର୍ନିଜସମ୍ପ୍ରୟୋଗା-

     ଦମ୍ଲାନତାଂ ଚରଣପଙ୍କଜୟୋର୍ଦିଶନ୍ତ୍ୟୌ ।

ମାନ୍ୟେ ଯୁବାଂ ରଘୁପତେର୍ମଣିପାଦରକ୍ଷେ

     ବିଦ୍ୟେ ବଲାମତିବଲାଂ ଚ ବିଚିନ୍ତୟାମି ॥ ୨୪.୧୬॥ ୭୭୬॥

ଅନ୍ତର୍ମୋହାଦବିଦିତବତାମାତ୍ମତତ୍ତ୍ୱଂ ଯଥାବ-

     ତ୍ପଦ୍ୟାମିତ୍ଥଂ ପରିଚିତବତାଂ ପାଦୁକେ ପାପଲୋକ୍ୟାମ୍ ।

ନିତ୍ୟଂ ଭକ୍ତେରନୁଗୁଣତୟା ନାଥପାଦଂ ଭଜନ୍ତ୍ୟୌ

     ନିଷ୍ଠେ ସାକ୍ଷାତ୍ ସ୍ୱୟମିହ ଯୁବାଂ ଜ୍ଞାନକର୍ମାତ୍ମିକେ ନଃ ॥ ୨୪.୧୭॥ ୭୭୭॥

ନ୍ୟସ୍ତଂ ବିଷ୍ଣୋଃ ପଦମିହ ମହତ୍ ସ୍ୱେନ ଭୂମ୍ନା ବହନ୍ତ୍ୟୋ-

     ରାମ୍ନାୟାଖ୍ୟାମବିହତଗତିଂ ବର୍ତୟନ୍ତ୍ୟୋର୍ନିଜାଜ୍ଞାମ୍ ।

ଆସନ୍ନାନାଂ ପ୍ରଣୟପଦବୀମାତ୍ମନା ପୂରୟନ୍ତ୍ୟୋଃ

     ଦ୍ୱୈରାଜ୍ୟଶ୍ରୀର୍ଭବତି ଜଗତାମୈକରାଜ୍ୟେ ଭବତ୍ୟୋଃ ॥ ୨୪.୧୮॥ ୭୭୮॥

ଅପ୍ରାପ୍ତାନାମୁପଜନୟଥଃ ସମ୍ପଦାଂ ପ୍ରାପ୍ତିମେବଂ

     ସମ୍ପ୍ରାପ୍ତାନାଂ ସ୍ୱୟମିହ ପୁନଃ ପାଲନାର୍ଥଂ ଯତେଥେ ।

ସାକ୍ଷାଦ୍ରଙ୍ଗକ୍ଷିତିପତିପଦଂ ପାଦୁକେ ସାଧୟନ୍ତ୍ୟୌ

     ଯୋଗକ୍ଷେମୌ ସୁଚରିତବଶାନ୍ମୂର୍ତିମନ୍ତୌ ଯୁବାଂ ନଃ ॥ ୨୪.୧୯॥ ୭୭୯॥

ବଦ୍ଧହରିପାଦୟୁଗଲଂ ଯୁଗଲଂ ତପନୀୟପାଦୁକେ ଯୁବୟୋଃ ।

ମୋଚୟତି ସଂଶ୍ରିତାନାଂ ପୁଣ୍ୟାପୁଣ୍ୟମୟଶୃଙ୍ଖଲାୟୁଗଲମ୍ ॥ ୨୪.୨୦॥ ୭୮୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଦ୍ୱନ୍ଦ୍ୱପଦ୍ଧତିଶ୍ଚତୁର୍ୱିଶୀ ॥

୨୫. ସନ୍ନିବେଶପଦ୍ଧତିଃ (୨୦)

ଅଣୋରଣୀୟସୀଂ ବିଷ୍ଣୋର୍ମହତୋଽପି ମହୀୟସୀମ୍ ।

ପ୍ରପଦ୍ୟେ ପାଦୁକାଂ ନିତ୍ୟଂ ତତ୍ପଦେନୈବ ସମ୍ମିତାମ୍ ॥ ୨୫.୧॥ ୭୮୧॥

ପ୍ରତିତିଷ୍ଠତି ପାଦସସ୍ମିତାୟାଂ

     ତ୍ୱୟି ନିତ୍ୟଂ ମଣିପାଦୁକେ ମୁକୁନ୍ଦଃ ।

ଇତରେ ତୁ ପରିଚ୍ଛଦାସ୍ତ ଏତେ

     ବିଭବବ୍ୟଞ୍ଜନହେତବୋ ଭବନ୍ତି ॥ ୨୫.୨॥ ୭୮୨॥

ତବ ରଙ୍ଗନରେନ୍ଦ୍ରପାଦରକ୍ଷେ ପ୍ରକୃତିଃ ସନ୍ନପି ଭକ୍ତିପାରତନ୍ତ୍ର୍ୟାତ୍ ।

ଭବତୀଂ ବହତୀବ ପନ୍ନଗେନ୍ଦ୍ରଃ ପ୍ରଥିତସ୍ୱସ୍ତିକଲକ୍ଷଣୈଃ ଶିରୋଭିଃ ॥ ୨୫.୩॥ ୭୮୩॥

ପରସ୍ୟ ପୁଂସଃ ପଦସନ୍ନିବେଶାନ୍ପ୍ରୟୁଞ୍ଜତେ ଭାବିତପଞ୍ଚରାତ୍ରାଃ ।

ଅଘପ୍ରତୀପାନପଦିଶ୍ୟ ପୁଣ୍ଡ୍ରାନଙ୍ଗେଷୁ ରଙ୍ଗେଶୟପାଦୁକେ ତ୍ୱାମ୍ ॥ ୨୫.୪॥ ୭୮୪॥  var  ଅଙ୍କେଷୁ

ବିମୃଶ୍ୟ ରଙ୍ଗେନ୍ଦ୍ରପତିମ୍ବରାୟାଃ ଶ୍ରୁତେଃ ସ୍ଥିତାଂ ମୂର୍ଧନି ପାଦୁକେ ତ୍ୱାମ୍ ।

ବଧ୍ନନ୍ତି ବୃଦ୍ଧାଃ ସମୟେ ବଧୂନାଂ ତ୍ୱନ୍ମୁଦ୍ରିତାନ୍ୟାଭରଣାନି ମୌଲୌ ॥ ୨୫.୫॥ ୭୮୫॥

ବହନ୍ତି ରଙ୍ଗେଶ୍ୱରପାଦରକ୍ଷେ ଦୀର୍ଘାୟୁଶାଂ ଦର୍ଶିତଭକ୍ତିବନ୍ଧାଃ ।

ଆଶାଧିପାନାମବରୋଧନାର୍ୟସ୍ତ୍ୱନ୍ମୁଦ୍ରିକାଂ ମଙ୍ଗଲହେମସୂତ୍ରୈଃ ॥ ୨୫.୬॥ ୭୮୬॥

ବ୍ୟୂହକ୍ରମେଣ ପ୍ରଥିତାରମଗ୍ରେ

     ସନ୍ଦର୍ଶୟନ୍ତୀଂ ମଣିପାଦୁକେ ତ୍ୱାମ୍ ।

ପାତୁଂ ତ୍ରିଲୋକୀଂ ପଦପଦ୍ମଭାଜଂ

     ସୌଦର୍ଶନୀଂ ଶକ୍ତିମବୈମି ଶୌରେଃ ॥ ୨୫.୭॥ ୭୮୭॥

ବଦ୍ଧାସିକା କନକପଙ୍କଜକର୍ଣିକାୟାଂ

     ମଧ୍ୟେ କୃଶା ମୁରରିପୋର୍ମଣିପାଦୁକେ ତ୍ୱମ୍ ।

ସନ୍ଦୃଶ୍ୟସେ ସରସିଜାସନୟା ଗୃହୀତଂ

     ରୂପାନ୍ତରଂ କିମପି ରଙ୍ଗବିହାରୟୋଗ୍ୟମ୍ ॥ ୨୫.୮॥ ୭୮୮॥

ମାନୋଚିତସ୍ୟ ମଦଧୀନଜନସ୍ୟ ନିତ୍ୟଂ

     ମା ଭୂଦତଃ କୃପଣତେତି ବିଚିନ୍ତୟନ୍ତ୍ୟା ।

ବନ୍ଦୀକୃତଂ ଧ୍ରୁବମବୈମି ବଲଗ୍ନଦେଶେ

     କାର୍ଶ୍ୟଂ ତ୍ୱୟା କମଲଲୋଚନପାଦରକ୍ଷେ ॥ ୨୫.୯॥ ୭୮୯॥

ମଧ୍ୟେ କୃଶାମୁଭୟତଃ ପ୍ରତିପନ୍ନବୃଦ୍ଧିଂ

     ମନ୍ୟେ ସମୀକ୍ଷ୍ୟ ଭବତୀଂ ମଣିପାଦରକ୍ଷେ ।

ନିତ୍ୟଂ ମୁକୁନ୍ଦପଦସଙ୍ଗମବିପ୍ରୟୋଗୌ

     ନିଶ୍ଚିନ୍ୱତେ କୃତଧିୟଃ ସୁଖଦୁଃଖକାଷ୍ଠାମ୍ ॥ ୨୫.୧୦॥ ୭୯୦॥

ରଙ୍ଗେଶିତୁଶ୍ଚରଣପଙ୍କଜୟୋର୍ଭଜନ୍ତୀ

     ରକ୍ଷାପ୍ରସାଧନବିକଲ୍ପସହାମବସ୍ଥାମ୍ ।

ମାନ୍ୟାକୃତିର୍ନିବିଶସେ ମଣିପାଦରକ୍ଷେ

     ମଧ୍ୟେ ପରିଚ୍ଛଦବିଭୂଷଣବର୍ଗୟୋତ୍ସ୍ୱମ୍ ॥ ୨୫.୧୧॥ ୭୯୧॥

ଅଙ୍ଗାନ୍ତରେଷୁ ନିହିତାନ୍ୟଖିଲାନି କାମମ୍ ।

     ପର୍ୟାୟକଲ୍ପନସହାନି ବିଭୂଷଣାନି ।

ନିତ୍ୟଂ ମୁକୁନ୍ଦପଦପଦ୍ମତଲାନୁରୂପଂ

     ନୈପଥ୍ୟମମ୍ବ ଭବତୀ ନୟନାଭିରାମମ୍ ॥ ୨୫.୧୨॥ ୭୯୨॥

ଯେ ନାମ ଭକ୍ତିନିୟତୈସ୍ତବ ସନ୍ନିବେଶଂ

     ନିର୍ୱିଶ୍ୟ ନେତ୍ରୟୁଗଲୈର୍ନ ଭଜନ୍ତି ତୃପ୍ତିମ୍ ।

କାଲକ୍ରମେଣ କମଲେକ୍ଷଣପାଦରକ୍ଷେ

     ପ୍ରାୟେଣ ତେ ପରିଣମନ୍ତି ସହସ୍ରନେତ୍ରାଃ ॥ ୨୫.୧୩॥ ୭୯୩॥

ପଦମପ୍ରମାଣମିତି ବାଦିନାଂ ମତଂ

     ମଧୁଜିତ୍ପଦେ ମହତି ମାସ୍ମ ଭୂଦିତି ।

ବ୍ୟୁଦପାଦି ତସ୍ୟ ଚରଣାବନି ତ୍ୱୟା

     ନିଗମାତ୍ମନସ୍ତବ ସମପ୍ରମାଣତା ॥ ୨୫.୧୪॥ ୭୯୪॥

ଅପ୍ରଭୂତମଭବଜ୍ଜଗତ୍ତ୍ରୟଂ ଯସ୍ୟ ମାତୁମୁଦିତସ୍ୟ ପାଦୁକେ ।

ଅପ୍ରମେୟମମିତସ୍ୟ ତତ୍ପଦଂ ନିତ୍ୟମେବ ନନୁ ସମ୍ମିତଂ ତ୍ୱୟା ॥ ୨୫.୧୫॥ ୭୯୫॥

ଆଲବାଲମିବ ଭାତି ପାଦୁକେ ପାଦପସ୍ୟ ଭବତୀ ମଧୁଦ୍ୱିଷଃ ।

ଯତ୍ସମୀପବିନତସ୍ୟ ଶୂଲିନଃ ସାରଣୀ ଭବତି ମୌଲିନିମ୍ନଗା ॥ ୨୫.୧୬॥ ୭୯୬॥

ମୋଦମାନମୁନିବୃନ୍ଦଷଟ୍ପଦା

     ଭାତି ମୁକ୍ତିମକରନ୍ଦବର୍ଷିଣୀ ।

କାଽପି ରଙ୍ଗନୃପତେଃ ପଦାମ୍ବୁଜେ

     କର୍ଣିକା କନକପାଦୁକାମୟୀ ॥ ୨୫.୧୭॥ ୭୯୭॥

ଯୁଗପଦନୁବିଧାସ୍ୟନ୍ ଯୌବତଂ ତୁଲ୍ୟରାଗଂ

     ଯଦୁପତିରଧିଚକ୍ରେ ଯାବତୋ ରୂପଭେଦାନ୍ ।

ତଦିଦମତିବିକଲ୍ପଂ ବିଭ୍ରତୀ ସନ୍ନିବେଶଂ

     ତବ ଖଲୁ ପଦରକ୍ଷେ ତାବତୀ ମୂର୍ତିରାସୀତ୍ ॥ ୨୫.୧୮॥ ୭୯୮॥

ତତ୍ତଦ୍ୱୃତ୍ତେରନୁଗୁଣତୟା ବାମନୀଂ ବ୍ୟାପିନୀଂ ବା

     ପ୍ରାପ୍ତେ ରଙ୍ଗପ୍ରଥିତବିଭବେ ଭୂମିକାଂ ସୂତ୍ରଧାରେ ।

ମନ୍ୟେ ବିଶ୍ୱସ୍ଥିତିମୟମହାନାଟିକାଂ ନେତୁକାମା

     ନାନାସଂସ୍ଥା ଭବତି ଭବତୀ ପାଦୁକେ ନର୍ତକୀବ ॥ ୨୫.୧୯॥ ୭୯୯॥

ମାନେ ପରଂ ସାମନେ ପ୍ରତ୍ୟକ୍ଷେଣାଗମେନାପି ।

ହରିଚରଣସ୍ୟ ତବାପି ତୁ ବୈଷମ୍ୟଂ ରକ୍ଷ୍ୟରକ୍ଷକତ୍ୱାଭ୍ୟାମ୍ ॥ ୨୫.୨୦॥ ୮୦୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ସନ୍ନିବେଶପଦ୍ଧତିଃ ପଞ୍ଚବିଂଶୀ ॥

୨୬. ଯନ୍ତ୍ରିକାପଦ୍ଧତିଃ (୧୦)

ଉଦଗ୍ରୟନ୍ତ୍ରିକାଂ ବନ୍ଦେ ପାଦୁକାଂ ଯନ୍ନିବେଶନାତ୍ ।

ଉପର୍ୟପି ପଦଂ ବିଷ୍ଣୋଃ ପ୍ରତ୍ୟାଦିଷ୍ଟପ୍ରସାଧନମ୍ ॥ ୨୬.୧॥ ୮୦୧॥

ପ୍ରସଭଂ ପ୍ରତିରୁଧ୍ୟ କଣ୍ଟକାଦୀନ୍

     ଭବତୀ ଶୌରିପଦାମ୍ବୁଜାଦଧସ୍ତାତ୍ ।

ଚରାଣାବନି ଧାରୟତ୍ୟମୁଷ୍ମି-

     ନ୍ନୁଚିତଚ୍ଛାୟମୁପର୍ୟପି ପ୍ରତୀକମ୍ ॥ ୨୬.୨॥ ୮୦୨॥

ମୁରଭିନ୍ମଣିପାଦୁକେ ତ୍ୱଦୀୟା-

     ମନଘାମଙ୍ଗୁଲିୟନ୍ତ୍ରିକାମବୈମି ।

ସ୍ୱୟମୁନ୍ନମିତାଂ ପ୍ରଦେଶିନୀଂ ତେ

     ପରମଂ ଦୈବତମେକମିତ୍ୟୃଚନ୍ତୀମ୍ ॥ ୨୬.୩॥ ୮୦୩॥

ସ୍ୱଦତେ ମଣିପାଦୁକେ ତ୍ୱଦୀୟା ପଦଶାଖାୟୁଗୟନ୍ତ୍ରିକା ବିଚିତ୍ରା ।

ପରମଂ ପୁରୁଷଂ ପ୍ରକାଶୟନ୍ତୀ ପ୍ରଣବସ୍ୟେବ ପରେୟମର୍ଧମାତ୍ରା ॥ ୨୬.୪॥ ୮୦୪॥

ଅନୁୟାତମନୋରଥା ମୁରାରେର୍ଭବତୀ କେଲିରଥଶ୍ରିୟଂ ଦଧାତି ।

ଚରଣାବନି ଯନ୍ତ୍ରିକା ତବୈଷା ତନୁତେ କୂବରସମ୍ପଦଂ ପୁରସ୍ତାତ୍ ॥ ୨୬.୫॥ ୮୦୫॥

ଶଙ୍କେ ଭବତ୍ୟାଃ ସୁଭଗଂ ପ୍ରତୀକଂ ରଙ୍ଗେଶପାଦାଙ୍ଗୁଲିସଙ୍ଗ୍ରହାର୍ଥମ୍ ।

ତ୍ରାଣାୟ ପାଦାବନି ବିଷ୍ଟପାନାମାଜ୍ଞାକରୀମଙ୍ଗୁଲିମୁଦ୍ରିକାଂ ତେ ॥ ୨୬.୬॥ ୮୦୬॥

ଅଲଙ୍କୃତଂ କର୍ଣିକୟୋପରିଷ୍ଟା-

     ଦୁଦଗ୍ରନାଲଂ ତବ ଯନ୍ତ୍ରିକାଂଶମ୍ ।

ପଦ୍ମାପତେଃ ପାଦସରୋଜଲକ୍ଷ୍ମ୍ୟାଃ

     ପ୍ରତ୍ୟେମି ପାଦାବନି କେଲିପଦ୍ମମ୍ ॥ ୨୬.୭॥ ୮୦୭॥

ଉପରି ବିନିହିତସ୍ୟ କେଶବାଙ୍ଘ୍ରେ-

     ରୁପରି ପଦାବନି ଯନ୍ତ୍ରିକାତ୍ମିକା ତ୍ୱମ୍ ।

ଇତି ତବ ମହିମା ଲଘୂକରୋତି

     ପ୍ରଣତସୁରେଶ୍ୱରଶେଖରାଧିରୋହମ୍ ॥ ୨୬.୮॥ ୮୦୮॥

ନିତ୍ୟଂ ପଦାବନି ନିବଦ୍ଧକିରୀଟଶୋଭଂ

     ପଦ୍ମାଲୟାପରିଚିତଂ ପଦମୁଦ୍ୱହନ୍ତ୍ୟାଃ ।

ଅଙ୍ଗୀକରୋତି ରୁଚିମଙ୍ଗୁଲିୟନ୍ତ୍ରିକା ତେ

     ସାମ୍ରାଜ୍ୟସମ୍ପଦନୁରୂପମିବାତପତ୍ରମ୍ ॥ ୨୬.୯॥ ୮୦୯॥

ପ୍ରଥମା କଲେବ ଭବତୀ ଚରଣାବନି ଭାତି ରଙ୍ଗଚନ୍ଦ୍ରମସଃ ।

ଶୃଙ୍ଗୋନ୍ନତିରିବ ଯତ୍ର ଶ୍ରିୟଂ ବିଭାବୟତି ଯନ୍ତ୍ରିକାୟୋଗଃ ॥ ୨୬.୧୦॥ ୮୧୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଯନ୍ତ୍ରିକାପଦ୍ଧତିଃ ଷଙ୍ୱିଂଶୀ ॥

୨୭. ରେଖାପଦ୍ଧତିଃ (୧୦)

ସୂଚୟନ୍ତୀଂ ସ୍ୱରେଖାଭିରନାଲେଖ୍ୟସରସ୍ୱତୀମ୍ ।

ଅଲେଖନୀୟସୌନ୍ଦର୍ୟାମାଶ୍ରୟେ ଶୌରିପାଦୁକାମ୍ ॥ ୨୭.୧॥ ୮୧୧॥

ମଣିମୌଲିନିଘର୍ଷଣାତ୍ ସୁରାଣାଂ

     ବହସେ କାଞ୍ଚନପାଦୁକେ ବିଚିତ୍ରମ୍ ।

କମଲାପତିପାଦପଦ୍ମୟୋଗା-

     ଦପରଂ ଲକ୍ଷଣମାଧିରାଜ୍ୟସାରମ୍ ॥ ୨୭.୨॥ ୮୧୨॥

ଅଭିତୋ ମଣିପାଦୁକେ ସ୍ଫୁରନ୍ତ୍ୟା-

     ସ୍ତବ ରେଖାବିତତେସ୍ତଥାବିଧାୟାଃ ।

ମୁରବୈରିପଦାରବିନ୍ଦରୂଢୈ-

     ରନୁକଲ୍ପାୟିତମାଧିରାଜ୍ୟଚିହ୍ନୈଃ ॥ ୨୭.୩॥ ୮୧୩॥

ରେଖୟା ବିନମତାଂ ଦିବୌକସାଂ ମୌଲିରତ୍ନମକରୀମୁଖୋତ୍ଥୟା ।

ପାଦୁକେ ବହସି ନୂନମଦ୍ଭୁତଂ ଶୌରିପାଦପରିଭୋଗଲକ୍ଷଣମ୍ ॥ ୨୭.୪॥ ୮୧୪॥

ତ୍ରିଦଶମକୁଟରତ୍ନୋଲ୍ଲେଖରେଖାପଦେଶା-

     ତ୍ପରିଣମୟସି ପୁଂସାଂ ପାଦୁକେ ମୂର୍ଧ୍ନି ଲଗ୍ନା ।

ନରକମଥନସେବାସମ୍ପଦଂ ସାଧୟିତ୍ରୀ

     ନିୟତିବିଲିଖିତାନାଂ ନିଷ୍କୃତିଂ ଦୁର୍ଲିପୀନାମ୍ ॥ ୨୭.୫॥ ୮୧୫॥

ପଦକମଲତଲାନ୍ତଃସମ୍ଶ୍ରିତାନ୍ୟାତପତ୍ର-

     ଧ୍ୱଜସରସିଜମୁଖ୍ୟାନ୍ୟୈଶ୍ୱରୀଲକ୍ଷଣାନି ।

ଅବଗମୟସି ଶୌରେଃ ପାଦୁକେ ମାଦୃଶାନା-

     ମୁପରି ପରିଣତୈଃ ସ୍ୱୈର୍ଦେବି ରେଖାବିଶେଷୈଃ ॥ ୨୭.୬॥ ୮୧୬॥

ସ୍ନାତା ପଦାବନି ଚିରଂ ପରିଭୁଜ୍ୟ ମୁକ୍ତା

     ପାଦେନ ରଙ୍ଗନୃପତେଃ ଶୁଭଲକ୍ଷଣେନ ।

ରେଖାନ୍ତରୈର୍ନବନବୈରୁପଶୋଭସେ ତ୍ୱଂ

     ସଂସ୍କାରଚନ୍ଦନବିଲେପନପଙ୍କଲଗ୍ନୈଃ ॥ ୨୭.୭॥ ୮୧୭॥

ଭକ୍ତ୍ୟା ମୁହୁଃ ପ୍ରଣମତାଂ ତ୍ରିଦଶେଶ୍ୱରାଣାଂ

     କୋଟୀରକୋଟିକଷଣାଦୁପଜାୟମାନୈଃ ।

ଆଭାତି ଶୌରିଚରଣାଦଧିକାନୁଭାବା

     ରେଖାଶତୈସ୍ତବ ପଦାବନି କାଽପି ରେଖା ॥ ୨୭.୮॥ ୮୧୮॥

ପାଦାବନି ପ୍ରତିପଦଂ ପରମସ୍ୟ ପୁଂସଃ

     ପାଦାରବିନ୍ଦପରିଭୋଗବିଶେଷୟୋଗ୍ୟା ।

ସ୍ୱାଭାବିକାନ୍ ସୁଭଗଭକ୍ତିବିଶେଷଦୃଶ୍ୟାନ୍

     ରେଖାତ୍ମକାନ୍ ବହସି ପତ୍ରଲତାବିଶେଷାନ୍ ॥ ୨୭.୯॥ ୮୧୯॥

ରେଖାପଦେଶତସ୍ତ୍ୱଂ ପ୍ରଶମୟିତୁଂ ପ୍ରଲୟବିପ୍ଲବାଶଙ୍କାମ୍ ।

ବହସି ମଧୁଜିତ୍ପଦାବନି ମନ୍ୟେ ନିଗମସ୍ୟ ମାତୃକାଲେଖ୍ୟମ୍ ॥ ୨୭.୧୦॥ ୮୨୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ରେଖାପଦ୍ଧତିଃ ସପ୍ତବିଂଶୀ ॥

୨୮. ସୁଭାଷିତପଦ୍ଧତିଃ (୧୦)

କଲାସୁ କାଷ୍ଠାମାତିଷ୍ଠନ୍ ଭୂମ୍ନେ ସମ୍ବନ୍ଧିନାମପି ।

ପାଦୁକା ରଙ୍ଗଧୁର୍ୟସ୍ୟ ଭରତାରାଧ୍ୟତାଂ ଗତା ॥ ୨୮.୧॥ ୮୨୧॥

ସନ୍ତଃ ସ୍ୱଦେଶପରଦେଶବିଭାଗଶୂନ୍ୟଂ

     ହନ୍ତ ସ୍ୱବୃତ୍ତିମନଘାଂ ନ ପରିତ୍ୟଜନ୍ତି ।

ରାଜ୍ୟେ ବନେ ଚ ରଘୁପୁଙ୍ଗବପାଦରକ୍ଷା

     ନୈଜଂ ଜହୌ ନ ଖଲୁ କଣ୍ଟକଶୋଧନଂ ତତ୍ ॥ ୨୮.୨॥ ୮୨୨॥

ବ୍ରହ୍ମାସ୍ତ୍ରତାମଧିଜଗାମ ତୃଣଂ ପ୍ରୟୁକ୍ତଂ

     ପୃଥ୍ୱୀଂ ଶଶାସ ପରିମୁକ୍ତପଦଂ ପଦତ୍ରମ୍ ।

କିଂ ବା ନ କିଂ ଭବତି କେଲିବିଧୌ ବିଭୂନାଂ

     ପୁଣ୍ୟଂ ଶରବ୍ୟମଭବତ୍ପୟସାଂ ନିଧିର୍ୱା ॥ ୨୮.୩॥ ୮୨୩॥

ଅନ୍ୟେଷୁ ସତ୍ସ୍ୱପି ନରେନ୍ଦ୍ରସୁତେଷୁ ଦୈବା-

     ଦ୍ଭ୍ରଷ୍ଟଃ ପଦାଦଧିକରୋତି ପଦଂ ପଦାର୍ହଃ ।

ପ୍ରାୟୋ ନିଦର୍ଶୟତି ତତ୍ପ୍ରଥମୋ ରଘୂଣାଂ

     ତତ୍ପାଦୟୋଃ ପ୍ରତିନିଧୀ ମଣିପାଦୁକେ ବା ॥ ୨୮.୪॥ ୮୨୪॥

ଚରଣମନଘବୃତ୍ତେଃ କସ୍ୟଚିତ୍ପ୍ରାପ୍ୟ ନିତ୍ୟଂ

     ସକଲଭୁବନଗୁପ୍ତ୍ୟୈ ସତ୍ପଥେ ବର୍ତତେ ଯଃ ।

ନରପତିବହୁମାନଂ ପାଦୁକେବାଧିଗଚ୍ଛନ୍

     ସ ଭବତି ସମୟେଷୁ ପ୍ରେକ୍ଷିତଜ୍ଞୈରୁପାସ୍ୟଃ ॥ ୨୮.୫॥ ୮୨୫॥

ରାମେ ରାଜ୍ୟଂ ପିତୁରଭିମତଂ ସମ୍ମତଂ ଚ ପ୍ରଜାନାଂ

     ମାତା ବବ୍ରେ ତଦହି ଭରତେ ସତ୍ୟବାଦୀ ଦଦୌ ଚ ।

ଚିନ୍ତାତୀତଃ ସମଜନି ତଦା ପାଦୁକାଗ୍ର୍ୟାଭିଷେକୋ

     ଦୁର୍ୱିଜ୍ଞାନସ୍ୱହୃଦୟମହୋ ଦୈବମତ୍ର ପ୍ରମାଣମ୍ ॥ ୨୮.୬॥ ୮୨୬॥

ନାତିକ୍ରାମେଚ୍ଚରଣବହନାତ୍ପାଦୁକା ପାଦପୀଠଂ

     ଯଦ୍ୱାଽଽସନ୍ନଂ ପରମିହ ସଦା ଭାତି ରାଜାସନସ୍ୟ ।

ପୂର୍ୱତ୍ରୈବ ପ୍ରଣିହିତମଭୂଦ୍ଧନ୍ତ ରାମେଣ ରାଜ୍ୟଂ

     ଶଙ୍କେ ଭର୍ତୁର୍ବହୁମତିପଦଂ ବିକ୍ରମେ ସାହଚର୍ୟମ୍ ॥ ୨୮.୭॥ ୮୨୭॥

ପ୍ରତିପଦଚପଲାଽପି ପାଦୁକା ରଘୁପତିନା ସ୍ୱପଦେ ନିବେଶିତା ।

ସମଜନି ନିଭୃତସ୍ଥିତିସ୍ତଦା ଭବତି ଗୁଣଃ ଶ୍ରିୟମଭ୍ୟୁପେୟୁଷାମ୍ ॥ ୨୮.୮॥ ୮୨୮॥

ଗତିହେତୁରଭୂତ୍ କ୍ୱଚିତ୍ପଦେ ସ୍ଥିତିହେତୁର୍ମଣିପାଦୁକା କ୍ୱଚିତ୍ ।

ନ ହି ବସ୍ତୁଶୁଶକ୍ତିନିଶ୍ଚୟୋ ନିୟତିଃ କେବଲମୀଶ୍ୱରେଚ୍ଛୟା ॥ ୨୮.୯॥ ୮୨୯॥

ଅଧରୀକୃତୋଽପି ମହତା ତମେବ ସେବେତ ସାଦରଂ ଭୂଷ୍ଣୁଃ ।

ଅଲଭତ ସମୟେ ରାମାତ୍ପାଦାକ୍ରାନ୍ତାଽପି ପାଦୁକା ରାଜ୍ୟମ୍ ॥ ୨୮.୧୦॥ ୮୩୦॥

ଇତି କବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ସୁଭାଷିତପଦ୍ଧତିରଷ୍ଟାବିଂଶୀ ॥

୨୯. ପ୍ରକୀର୍ଣକପଦ୍ଧତିଃ (୮୦)

ବିଧୌ ପ୍ରବୃତ୍ତେ ଯଦ୍ଦ୍ରବ୍ୟଂ ଗୁଣସଂସ୍କାରନାମଭିଃ ।

ଶ୍ରେୟଃସାଧନମାମ୍ନାତଂ ତତ୍ପଦତ୍ରଂ ତଥାଽସ୍ତୁ ମେ ॥ ୨୯.୧॥ ୮୩୧॥

ମଧୁରସ୍ମିତରମ୍ୟମୌକ୍ତିକଶ୍ରୀର୍ୱିଶସି ବ୍ୟଞ୍ଜିତମଞ୍ଜୁଲପ୍ରଣାଦା ।

ସହ ରଙ୍ଗନୃପେଣ ବାସଗେହଂ ତନୁମଧ୍ୟା ମଣିପାଦୁକେ ତ୍ୱମେକା ॥ ୨୯.୨॥ ୮୩୨॥

ଶୁଭଶବ୍ଦବିଶେଷସଂଶ୍ରିତାଭି-

     ର୍ଭବତୀ ଶୌରିପଦାବନି କ୍ରିୟାଭିଃ ।

ଅନୁତିଷ୍ଠତି ନୂନମାଶ୍ରିତାନା-

     ମଖିଲୋପଦ୍ରବଶାନ୍ତିକଂ ନବୀନମ୍ ॥ ୨୯.୩॥ ୮୩୩॥

ମଣିଭିର୍ମଧୁବୈରିପାଦରକ୍ଷେ

     ଭବତୀ ବିକ୍ରମଣେ ପ୍ରବର୍ଧମାନା ।

ଯୁଗପଦ୍ଭବତାଂ ଯୁଗାନ୍ତକାଲେ

     ଦିବି ଲକ୍ଷ୍ମୀଂ ବିଦଧେ ଦିବାକରାଣାମ୍ ॥ ୨୯.୪॥ ୮୩୪॥

ମଞ୍ଜୁସ୍ୱନାଂ ମଣିମୟୂଖକଲାପିନୀଂ ତ୍ୱାଂ

     ଦୃଷ୍ଟ୍ୱା କପର୍ଦସବିଧେ ବିନିବେଶ୍ୟମାନାମ୍ ।

ଗୂଢୀଭବନ୍ତି ଗରୁଦଧ୍ୱଜପାଦରକ୍ଷେ

     ଫୂତ୍କାରବନ୍ତି ପୁରବୈରିବିଭୂଷଣାନି ॥ ୨୯.୫॥ ୮୩୫॥

ମଧ୍ୟେ ପରିସ୍ଫୁରିତନିର୍ମଲଚନ୍ଦ୍ରତାରା

     ପ୍ରାନ୍ତେଷୁ ରତ୍ନନିକରେଣ ବିଚିତ୍ରବର୍ଣା ।

ପୁଷ୍ଣାସି ରଙ୍ଗନୃପତେର୍ମଣିପାଦୁକେ ତ୍ୱଂ

     ଚକ୍ଷୁର୍ୱଶୀକରଣୟନ୍ତ୍ରବିଶେଷଶଙ୍କାମ୍ ॥ ୨୯.୬॥ ୮୩୬॥

ପାଦେନ ରଙ୍ଗନୃପତେଃ ପରିଭୁଜ୍ୟମାନା

     ମୁକ୍ତାଫଲପ୍ରକଟିତଶ୍ରମବାରିବିନ୍ଦୁଃ ।

ଉତ୍କଣ୍ଟକା ମଣିମୟୂଖଶତୈରୁଦଗ୍ରୈଃ

     ସୀତ୍କାରିଣୀବ ଚରଣାବନି ଶିଞ୍ଜିତୈସ୍ତ୍ୱମ୍ ॥ ୨୯.୭॥ ୮୩୭॥

ଦୂରପ୍ରସାରିତକରା ନିନଦୈର୍ମଣୀନା-

     ମାୟାତି ଦୈତ୍ୟରିପୁରିତ୍ୟସକୃଦ୍ବ୍ରୁବାଣା ।

ଦୈତ୍ୟେଶ୍ୱରାନଭିମୁଖାନ୍ ଜନିତାନୁକମ୍ପା

     ମନ୍ୟେ ନିବାରୟସି ମାଧବପାଦୁକେ ତ୍ୱମ୍ ॥ ୨୯.୮॥ ୮୩୮॥

ଅଚ୍ଛେଦ୍ୟରଶ୍ମିନିୟତକ୍ରମରତ୍ନଧୁର୍ୟା

     ନିଷ୍କମ୍ପକୂବରନିଭଂ ଦଧତୀ ପ୍ରତୀକମ୍ ।

କ୍ରୀଡାଗତେଷୁ ମଧୁଜିତ୍ପଦପଦ୍ମଲକ୍ଷ୍ମ୍ୟାଃ

     କର୍ଣୀରଥସ୍ତ୍ୱମସି କାଞ୍ଚନପାଦରକ୍ଷେ ॥ ୨୯.୯॥ ୮୩୯॥

ମଞ୍ଜୁସ୍ୱନା ମରତକୋପଲମେଚକାଙ୍ଗୀ

     ଶୋଣାଶ୍ମତୁଣ୍ଡରୁଚିରା ମଣିପାଦୁକେ ତ୍ୱମ୍ ।

ପଦ୍ମାବିହାରରସିକସ୍ୟ ପରସ୍ୟ ଯୂନଃ

     ପର୍ୟାୟତାଂ ଭଜସି ପଞ୍ଜରଶାରିକାଣାମ୍ ॥ ୨୯.୧୦॥ ୮୪୦॥

ଶୋଣୋପଲୈଶ୍ଚରଣରକ୍ଷିଣି ସଂଶ୍ରିତେଷୁ

     ଚ୍ଛାୟାତ୍ମନା ମରକତେଷୁ ତବାବଗାଢଃ ।

ଅନ୍ୱେତି ଶୌରିରଭିତଃ ଫଲପଙ୍କ୍ତିଶୋଭି-

     ନ୍ୟାତ୍ମାନମେବ ଶୟିତଂ ବଟପତ୍ରମଧ୍ୟେ ॥ ୨୯.୧୧॥ ୮୪୧॥

ସ୍ଫୀତଂ ପଦାବନି ତବ ସ୍ନପନାର୍ଦ୍ରମୂର୍ତେ-

     ରାସାଗରଂ ତତମଭୂନ୍ମଣିରଶ୍ମିଜାଲମ୍ ।

ଲୀଲୋଚିତଂ ରଘୁସୁତସ୍ୟ ଶରବ୍ୟମାସନ୍

     ଯାତୂନି ଯସ୍ୟ ବଲୟେନ ବିବେଷ୍ଟିତାନି ॥ ୨୯.୧୨॥ ୮୪୨॥

ରତ୍ନାଂଶୁଭିସ୍ତବ ତଦା ମଣିପାଦରକ୍ଷେ

     ସଂରଜ୍ୟମାନବପୁଷାଂ ରଜନୀମୁଖେଷୁ ।

ଆକସ୍ମିକାଗତମଦର୍ଶିଂ ମହୌଷଧିତ୍ୱଂ

     ସାକେତପତ୍ତନସମୀପରୁହାଂ ଦ୍ରୁମାଣାମ୍ ॥ ୨୯.୧୩॥ ୮୪୩॥

ରାମେ ବନଂ ଦଶରଥେ ଚ ଦିବଂ ପ୍ରୟାତେ

     ନିର୍ଧୂତବିଶ୍ୱତିମିରା ସହସା ବଭୂବ ।

ଭୂୟିଷ୍ଠରତ୍ନକିରଣା ଭବତୀ ରଘୂଣାଂ

     ଭୂୟଃ ପ୍ରତାପତପନୋଦୟପୂର୍ୱସନ୍ଧ୍ୟା ॥ ୨୯.୧୪॥ ୮୪୪॥

ପ୍ରୀତେନ ଦେବି ବିଭୁନା ପ୍ରତିପାଦନୀୟାଂ

     ପାଦାବନି ପ୍ରତିପଦୋଦିତମଞ୍ଜୁନାଦାମ୍ ।

ବିଦ୍ୟାଂ ବିଦୁର୍ଭଗବତଃ ପ୍ରତିପାଦନାର୍ହାଂ

     ପାରାୟଣାଗମପୟୋନିଧିପାରଗାସ୍ତ୍ୱାମ୍ ॥ ୨୯.୧୫॥ ୮୪୫॥

ମୁକ୍ତାଂଶୁକେସରବତୀ ସ୍ଥିରବଜ୍ରଦଂଷ୍ଟ୍ରା

     ପ୍ରହ୍ଲାଦସମ୍ପଦନୁରୂପହିରଣ୍ୟଭେଦା ।

ମୂର୍ତିଃ ଶ୍ରିୟୋ ଭବସି ମାଧବପାଦରକ୍ଷେ

     ନାଥସ୍ୟ ନୂନମୁଚିତା ନରସିଂହମୂର୍ତେଃ ॥ ୨୯.୧୬॥ ୮୪୬॥

ସମ୍ଭାବୟନ୍ତି କବୟଶ୍ଚତୁରପ୍ରଚାରାଂ

     ମଞ୍ଜୁସ୍ୱନାଂ ମହିତମୌକ୍ତିକପତ୍ରଲାଙ୍ଗୀମ୍ ।

ସ୍ୱାଧୀନସର୍ୱଭୁବନାଂ ମଣିପାଦୁକେ ତ୍ୱାଂ

     ରଙ୍ଗାଧିରାଜପଦପଙ୍କଜରାଜହଂସୀମ୍ ॥ ୨୯.୧୭॥ ୮୪୭॥

ମୁକ୍ତାମୟୂଖରୁଚିରାଂ ମଣିପାଦରକ୍ଷେ

     ମଞ୍ଜୁସ୍ୱନାଂ ମଣିଭିରାହିତବର୍ଣବର୍ଗାମ୍ ।

ମନ୍ୟେ ମୁକୁନ୍ଦପଦପଦ୍ମମଧୁବ୍ରତୀନା-

     ମନ୍ୟାମକୃତ୍ରିମଗିରାମଧିଦେବତାଂ ତ୍ୱାମ୍ ॥ ୨୯.୧୮॥ ୮୪୮॥

ଆସାଦ୍ୟ କେକୟସୁତାବରଦାନମୂଲଂ

     କାଲଂ ପ୍ରଦୋଷମନିରୀକ୍ଷ୍ୟରମାସହାୟମ୍ ।

ମଞ୍ଜୁପ୍ରଣାଦରହିତା ମଣିପାଦରକ୍ଷେ

     ମୌନବ୍ରତଂ କିମପି ନୂନମବର୍ତୟସ୍ତ୍ୱମ୍ ॥ ୨୯.୧୯॥ ୮୪୯॥

ବୈଡୂର୍ୟରମ୍ୟସଲିଲା ମହିତା ମରୁଦ୍ଭି-

     ଶ୍ଛାୟାବତୀ ମରକତୋପଲରଶ୍ମିଜାଲୈଃ ।

ଅଶ୍ରାନ୍ତମୋହପଦବୀପଥିକସ୍ୟ ଜନ୍ତୋ-

     ର୍ୱିଶ୍ରାନ୍ତିଭୂମିରିବ ଶୌରିପଦାବନି ତ୍ୱମ୍ ॥ ୨୯.୨୦॥ ୮୫୦॥

ଆଦ୍ୟୋ ରଘୁକ୍ଷିତିଭୁଜାମଭିଷେକଦୀପ୍ତୈ-

     ରାପ୍ୟାୟିତସ୍ତବ ପଦାବନି ରଶ୍ମିଜାଲୈଃ ।

ମନ୍ଦୀଚକାର ତପନୋ ବ୍ୟପନୀତଭୀତି-

     ର୍ମନ୍ଦୋଦରୀବଦନଚନ୍ଦ୍ରମସୋ ମୟୂଖାନ୍ ॥ ୨୯.୨୧॥ ୮୫୧॥

ମାନ୍ୟା ସମସ୍ତଜଗତାଂ ମଣିଭଙ୍ଗନୀଲା

     ପାଦେ ନିସର୍ଗଘଟିତା ମଣିପାଦୁକେ ତ୍ୱମ୍ ।

ଅନ୍ତଃପୁରେଷୁ ଲଲିତାନି ଗତାଗତାନି

     ଚ୍ଛାୟେବ ରଙ୍ଗନୃପତେରନୁବର୍ତସେ ତ୍ୱମ୍ ॥ ୨୯.୨୨॥ ୮୫୨॥

ରଙ୍ଗାଧିରାଜପଦପଙ୍କଜମାଶ୍ରୟନ୍ତୀ

     ହୈମୀ ସ୍ୱୟଂ ପରିଗତା ହରିନୀଲରତ୍ନୈଃ ।

ସମ୍ଭାବ୍ୟସେ ସୁକୃତିଭିର୍ମଣିପାଦୁକେ ତ୍ୱଂ

     ସାମାନ୍ୟମୂର୍ତିରିବ ସିନ୍ଧୁସୁତାଧରଣ୍ୟୋଃ ॥ ୨୯.୨୩॥ ୮୫୩॥

ଅଭ୍ୟର୍ଚିତା ସୁମନସାଂ ନିବହୈରଜସ୍ରଂ

     ମୁକ୍ତାରୁଣୋପଲନସ୍ୱାଙ୍ଗୁଲିପଲ୍ଲବଶ୍ରୀଃ ।

ଶ୍ରେୟସ୍କରୀଂ ମୁରଭିଦଶ୍ଚରଣଦ୍ଧୟୀବ

     କାନ୍ତିଂ ସମାଶ୍ରୟସି କାଞ୍ଚନପାଦୁକେ ତ୍ୱମ୍ ॥ ୨୯.୨୪॥ ୮୫୪॥

ନିର୍ମୃଷ୍ଟଗାତ୍ରରୁଚିରା ମଣିପାଦୁକେ ତ୍ୱଂ

     ସ୍ନାତାନୁଲେପସୁରଭିର୍ନବମାଲ୍ୟଚିତ୍ରା ।

ପ୍ରାପ୍ତେ ବିହାରସମୟେ ଭଜସେ ମୁରାରେଃ

     ପାଦାରବିନ୍ଦପରିଭୋଗମଧନ୍ୟଲଭ୍ୟମ୍ ॥ ୨୯.୨୫॥ ୮୫୫॥

ନାଦେ ପଦାବନି ତଥା ତବ ସନ୍ନିବେଶେ

     ନିର୍ୱେଶନକ୍ରମମସହ୍ୟମପାଚିକୀର୍ଷୁଃ ।

ଯୈରେବ ଲୋଚନଶତୈରଭିବୀକ୍ଷତେ ତ୍ୱାଂ

     ତୈରେବ ପନ୍ନଗପତିଃ ଶ୍ରୁତିମାନ୍ ବଭୂବ ॥ ୨୯.୨୬॥ ୮୫୬॥

ପାଦାବନି ସ୍ଫୁଟମୟୂଖସହସ୍ରଦୃଶ୍ୟା

     ବିଷ୍ଣୋଃ ପଦେନ ଭବତୀ ବିହିତପ୍ରଚାରା ।

ତ୍ୱଦ୍ଭକ୍ତିୟନ୍ତ୍ରିତଜନପ୍ରଥମସ୍ୟ ଶମ୍ଭୋ-

     ର୍ୱୈକର୍ତନୀମନୁକରୋତି ବିହାରମୂର୍ତିମ୍ ॥ ୨୯.୨୭॥ ୮୫୭॥

ରାଜ୍ୟେ ବନେପି ରଘୁବୀରପଦୋଚିତାୟାଃ

     ସଂସ୍ମୃତ୍ୟ ଗୌତମବଧୂପରିରକ୍ଷଣଂ ତେ ।

ମନ୍ୟେ ସମାହିତଧିୟୋ ମଣିପାଦୁକେ ତ୍ୱାଂ

     ମୂର୍ଧ୍ନା ଭଜନ୍ତ୍ୟନୁଦିନଂ ମୁନିଧର୍ମଦାରାଃ ॥ ୨୯.୨୮॥ ୮୫୮॥

ତ୍ୱାମାଶ୍ରିତୋ ମଣିମୟୂଖସହସ୍ରଦୃଶ୍ୟାଂ

     ତ୍ୱଚ୍ଛିଞ୍ଜିତେନ ସହ ରଙ୍ଗପତିଃ ସମୁଦ୍ୟନ୍ ।

ଆଶଙ୍କ୍ୟତେ ସୁମତିଭିର୍ମଣିପାଦରକ୍ଷେ

     ବିଦ୍ୟାସଖଃ ସବିତୃମଣ୍ଡଲମଧ୍ୟବର୍ତୀ ॥ ୨୯.୨୯॥ ୮୫୯॥

ରତ୍ନାଶ୍ରିତୈର୍ହରିପଦଂ ମଣିପାଦୁକେ ତ୍ୱଂ

     ସ୍ପୃଷ୍ଟ୍ୱା କରୈଃ ଶ୍ରୁତିରସାୟନମଞ୍ଜୁନାଦା ।

ତତ୍ତ୍ୱଂ ତଦେତଦିତି ବୋଧୟସୀବ ସମ୍ୟ-

     ଗ୍ୱେଦାନ୍ପ୍ରତାରିତବତୋ ବିବିଧାନ୍ କୁଦୃଷ୍ଟୀନ୍ ॥ ୨୯.୩୦॥ ୮୬୦॥

ଆନନ୍ଦସୂଃ ପ୍ରଣୟିନାମନଘପ୍ରସାଦା

     ରଙ୍ଗାଧିରାଜପଦରକ୍ଷିଣି ରତ୍ନଭାସା ।

ନ୍ୟସ୍ତେ ମୁହୁର୍ନିଜଭରେ ସ୍ଥିରତାଂ ଭଜନ୍ତ୍ୟା

     ବର୍ଣାଂଶୁକଂ ବିତରସୀବ ବସୁନ୍ଧରାୟାଃ ॥ ୨୯.୩୧॥ ୮୬୧॥

ତ୍ୱଂ ଚିତ୍ରଭାନୁରସି ରତ୍ନବିଶେଷୟୋଗା-

     ଦ୍ଭୂମ୍ନା ନିଜେନ ପରିପୁଷ୍ୟସି ପାବକତ୍ୱମ୍ ।

ସ୍ୱେନୈବ ଶୌରିଚରଣାବନି ଚନ୍ଦ୍ରରୂପା

     ତେଜସ୍ତ୍ରୟୀବ ମିଲିତାଽସି ତମୋପହା ନଃ ॥ ୨୯.୩୨॥ ୮୬୨॥

ପ୍ରୌଢପ୍ରବାଲରୁଚିରା ଭୁବନୈକବନ୍ଦ୍ୟା

     ରଙ୍ଗାଧିରାଜଚରଣାବନି ରମ୍ୟଚନ୍ଦ୍ରା ।

ସମ୍ଭିନ୍ନମୌକ୍ତିକରୁଚିଃ ସତତଂ ପ୍ରଜାନାଂ

     ତାପାତ୍ୟଯଂ ଦିଶସି ତାରକିତେବ ସନ୍ଧ୍ୟା ॥ ୨୯.୩୩॥ ୮୬୩॥

ରଙ୍ଗେଶ୍ୱରସ୍ୟ ପୁରତୋ ମଣିପାଦୁକେ ତ୍ୱଂ

     ରତ୍ନାଂଶୁଭିର୍ୱିକିରସି ସ୍ଫୁଟଭକ୍ତିବନ୍ଧା ।

ପାଦୌ ବିହାରୟିତୁମଦ୍ଭୁତସୌକୁମାର୍ୟୌ

     ପ୍ରାୟଃ ସରୋଜକୁମୁଦୋତ୍ପଲପତ୍ରପଙ୍କ୍ତିମ୍ ॥ ୨୯.୩୪॥ ୮୬୪॥

ଆସନ୍ନବୃତ୍ତିରବରୋଧଗୃହେଷୁ ଶୌରେ-

     ରାପାଦୟସ୍ୟନୁପଦଂ ବରବର୍ଣିନୀନାମ୍ ।

ଆଲଗ୍ନରତ୍ନକିରଣା ମଣିପାଦୁକେ ତ୍ୱଂ

     ମଞ୍ଜୁସ୍ୱନା ମଦନବାଣନିଘର୍ଷଶଙ୍କାମ୍ ॥ ୨୯.୩୫॥ ୮୬୫॥

ପର୍ୟାପ୍ତମୌକ୍ତିକନଖା ସ୍ଫୁଟପଦ୍ମରାଗା

     ରେଖାବିଶେଷରୁଚିରା ଲଲିତପ୍ରଚାରା ।

ରଙାଧିରାଜପଦୟୋର୍ମଣିପାଦୁକେ ତ୍ୱଂ

     ସାୟୁଜ୍ୟମାଶ୍ରିତବତୀବ ସମସ୍ତବନ୍ଦ୍ୟା ॥ ୨୯.୩୬॥ ୮୬୬॥

ପ୍ରାପ୍ତାଭିଷେକା ମଣିପାଦୁକେ

     ତ୍ୱଂ ପ୍ରଦୀପ୍ତରତ୍ନା ରଘୁରାଜଧାନ୍ୟାଃ ।

ପ୍ରଦକ୍ଷିଣପ୍ରକମଣାଦକାର୍ଷୀଃ

     ପ୍ରାକାରମାଗ୍ନେୟମିବ ପ୍ରଭାଭିଃ ॥ ୨୯.୩୭॥ ୮୬୭॥

ରତ୍ନାସନେ ରାଘବପାଦରକ୍ଷେ

     ପ୍ରଦୀପ୍ୟମାନାସ୍ତବ ପଦ୍ମରାଗାଃ ।

ପ୍ରାୟୋ ନରେନ୍ଦ୍ରାନ୍ ଭରତସ୍ୟ ଜେତୁଃ

     ପ୍ରତାପବହ୍ନେରଭବନ୍ପ୍ରରୋହାଃ ॥ ୨୯.୩୮॥ ୮୬୮॥

ଶୁଭପ୍ରଣାଦା ଭବତୀ ଶ୍ରୁତୀନାଂ

     କଣ୍ଠେଶୁବୈକୁଣ୍ଠପତିମ୍ବରାଣାମ୍ ।

ବଧ୍ନାସି ନୂନଂ ମଣିପାଦରକ୍ଷେ

     ମଙ୍ଗଲ୍ୟସୂତ୍ରଂ ମଣିରଶ୍ମିଜାଲୈଃ ॥ ୨୯.୩୯॥ ୮୬୯॥

ବିଚିତ୍ରବର୍ଣା ଶ୍ରୁତିରମ୍ୟଶବ୍ଦା

     ନିଷେବ୍ୟସେ ନାକସଦାଂ ଶିରୋଭିଃ ।

ମଧୁଦ୍ୱିଷସ୍ତ୍ୱଂ ମଣିପାଦରକ୍ଷେ

     ଶ୍ରେୟସ୍କରୀଶାସନପତ୍ରିକେୟ ॥ ୨୯.୪୦॥ ୮୭୦॥

ସ୍ଥିରା ସ୍ୱଭାବାନ୍ମଣିପାଦୁକେ ତ୍ୱଂ

     ସର୍ୱଂସହା ସ୍ୱାଦୁଫଲପ୍ରସୂତିଃ ।

ପୃଥ୍ୱୀବ ପଦ୍ଭାଂ ପରମସ୍ୟ ପୁଂସଃ

     ସଂସୃଜ୍ୟସେ ଦେବି ବିଭଜ୍ୟସେ ଚ ॥ ୨୯.୪୧॥ ୮୭୧॥

ପଶ୍ୟନ୍ତି ରଙ୍ଗେଶ୍ୱରପାଦରକ୍ଷେ

     ପୂଜାସୁ ତେ ସଂହିତପୁଷ୍ପଜାଲାମ୍ ।

ମୃଗୀଦୃଶୋ ବାସବରତ୍ନରେଖାଂ

     ସଚିତ୍ରପୁଙ୍ଖାମିବ ମନ୍ମଥଜ୍ୟାମ୍ ॥ ୨୯.୪୨॥ ୮୭୨॥

କରୈରୁଦଗ୍ରୈଃ ସ୍ଫୁରତାଂ ମଣୀନାଂ

     ମଞ୍ଜୁସ୍ୱନା ମାଧବପାଦୁକେ ତ୍ୱମ୍ ।

ଅନୂପଦେଶେ କନକାପଗାୟାଃ

     କଲେଃ ପ୍ରବେଶଂ ପ୍ରତିଷେଧସୀବ ॥ ୨୯.୪୩॥ ୮୭୩॥

ଆକ୍ରାନ୍ତବେଦିର୍ଭବତୀ ତଦାନୀ-

     ମଦର୍ଶି ମୁକ୍ତାନ୍ୱିତଶୋଣରତ୍ନା ।

କରଗ୍ରହାର୍ଥଂ ଭରତେନ ଭୂମ୍ୟା

     ଲାଜୋତ୍କରୈର୍ୱହ୍ନିଶିଖେବ କୀର୍ଣା ॥ ୨୯.୪୪॥ ୮୭୪॥

ପତ୍ରଲା ମଣିଗଣୈର୍ହିରଣ୍ମୟୀ

     ଭାସି ରଙ୍ଗପତିରତ୍ନପାଦୁକେ ।

କେଲିମଣ୍ଟପଗତାଗତୋଚିତା

     ଭୂମିକେବ ଗରୁଡେବ କଲ୍ପିତା ॥ ୨୯.୪୫॥ ୮୭୫॥

ଉନ୍ନତଂ ବଲିବିରୋଧିନସ୍ତଦା

     ପାଦୁକେ ପଦସରୋଜମାଶ୍ରିତା ।

ମୌକ୍ତିକସ୍ତବକମଧ୍ୟସମ୍ମିତଂ

     ବ୍ୟୋମ ଷଟ୍ପଦତୁଲାମଲମ୍ଭୟଃ ॥ ୨୯.୪୬॥ ୮୭୬॥

କୋମଲାଙ୍ଗୁଲିନିବେଶୟନ୍ତ୍ରିକା-

     ନ୍ୟସ୍ତମୌକ୍ତିକମୟୂଖଦନ୍ତୁରା ।

ମଙ୍ଗଲାନି ବମସୀବ ଦେହିନାଂ

     ରଙ୍ଗରାଜମଣିପାଦୁକେ ସ୍ୱୟମ୍ ॥ ୨୯.୪୭॥ ୮୭୭॥

ପଙ୍କଜାସହଚରସ୍ୟ ରଙ୍ଗିଣଃ

     ପାଦୁକେ ନିଜପଦାଦନନ୍ତରମ୍ ।

ନ୍ୟସ୍ୟତସ୍ତ୍ୱୟି ଜଗନ୍ତି ଜାୟତେ

     ନାଗଭୋଗଶୟନଂ ନିରଙ୍କୁଶମ୍ ॥ ୨୯.୪୮॥ ୮୭୮॥

ସାଧୟନ୍ତି ମଧୁବୈରିପାଦୁକେ

     ସାଧବଃ ସ୍ଥିରମୁପାୟମୁତ୍ତମମ୍ ।  var  ମନ୍ତିମମ୍

ତ୍ୱତ୍ପ୍ରବୃତ୍ତିବିନିତବର୍ତନୋଚିତ-

     ସ୍ୱପ୍ରବୃତ୍ତିବିନିବର୍ତନାନ୍ୱିତମ୍ ॥ ୨୯.୪୯॥ ୮୭୯॥

ନନ୍ଦସୂନୁପଦପଦ୍ମମିନ୍ଦିରାପାଣିପଲ୍ଲବନିପୀଡନାସହମ୍ ।

ପାଦୁକେ ତବ ବଲେନ ପର୍ୟଭୃଦୂଷ୍ମଲାମୁରଗମୌଲିଶର୍କରାମ୍ ॥ ୨୯.୫୦॥ ୮୮୦॥

ମଣିନିକରସମୁତ୍ଥୈଃ ସର୍ୱବର୍ଣା ମୟୂଖୈଃ

     ପ୍ରକଟିତଶୁଭନାଦା ପାଦୁକେ ରଙ୍ଗଭର୍ତୁଃ ।

ନିଖିଲନିଗମସୂତେର୍ବ୍ରହ୍ମଣସ୍ତତ୍ସନାଥା-

     ମବଗମୟସି ହୃଦ୍ୟାମର୍ଧମାତ୍ରାଂ ଚତୁର୍ଥୀମ୍ ॥ ୨୯.୫୧॥ ୮୮୧॥

ଶ୍ରୁତିବିଷୟଗୁଣା ତ୍ୱଂ ପାଦୁକେ ଦୈତ୍ୟହନ୍ତୁଃ

     ସତତଗତିମନୋଜ୍ଞା ସ୍ୱେନ ଧାମ୍ନା ଜ୍ୱଲନ୍ତୀ ।

ଜନିତଭୁବନବୃଦ୍ଧିର୍ଦୃଶ୍ୟସେ ସ୍ଥୈର୍ୟଯୁକ୍ତା

     ବିଧୃତନିଖିଲଭୂତା ବୈଜୟନ୍ତୀବ ମାଲା ॥ ୨୯.୫୨॥ ୮୮୨॥

ରଘୁପତିପଦସଙାଦ୍ରାଜ୍ୟଖେଦଂ ତ୍ୟଜନ୍ତୀ

     ପୁନରପି ଭବତୀ ସ୍ୱାନ୍ ଦର୍ଶୟନ୍ତୀ ବିହାରାନ୍ ।

ଅଭିସମଧିତ ବୃଦ୍ଧିଂ ହର୍ଷକୋଲାହଲାନାଂ

     ଜନପଦଜନିତାନାଂ ଜ୍ୟାୟସା ଶିଞ୍ଜିତେନ ॥ ୨୯.୫୩॥ ୮୮୩॥

ହରିଚରଣମୁପଘ୍ନଂ ପାଦୁକେ ସଂଶ୍ରିତାୟା-

     ମଧିଗତବହୁଶାଖଂ ବୈଭବଂ ଦର୍ଶୟନ୍ତ୍ୟାମ୍ ।  var  ଶାଖା

ଅଭଜତ ବିଧିହସ୍ତନ୍ୟସ୍ତଧର୍ମଦ୍ରବାୟାଂ

     ତ୍ୱୟି ମୁକୁଲସମୃଦ୍ଧିଂ ମୌକ୍ତିକଶ୍ରୀସ୍ତଦାନୀମ୍ ॥ ୨୯.୫୪॥ ୮୮୪॥

କନକରୁଚିରକାନ୍ତିଃ କଲ୍ପିତାଶୋକଭାରା

     କୃତପଦକମଲଶ୍ରୀଃ କ୍ରୀଡତା ମାଧବେନ ।

ଦିଶିଦିଶି ସୁମନୋଭିର୍ଦର୍ଶନୀୟାନୁଭାବା

     ସୁରଭିସମୟଲକ୍ଷ୍ମୀଂ ପାଦୁକେ ପୁଷ୍ୟସି ତ୍ୱମ୍ ॥ ୨୯.୫୫॥ ୮୮୫॥

ପ୍ରଣିହିତପଦପଦ୍ମା ପାଦୁକେ ରଙ୍ଗଭର୍ତୁଃ

     ଶୁଭତରଗତିହେତୁଶ୍ଚାରୁମୁକ୍ତାପ୍ରବାଲା ।

ସ୍ଥିରପରିଣତରାଗାଂ ଶୁଦ୍ଧବୋଧାନୁବଦ୍ଧାଂ

     ସ୍ୱଜନୟସି ମୁନୀନାଂ ତ୍ୱନ୍ମୟୀଂ ଚିତ୍ତବୃତ୍ତିମ୍ ॥ ୨୯.୫୬॥ ୮୮୬॥

ବିରଚିତନବଭାଗା ରତ୍ନଭେଦୈର୍ୱିଚିତ୍ରୈ-

     ର୍ୱିବିଧବିତତରେଖାବ୍ୟକ୍ତସୀମାବିଭାଗା ।

ହରିଚରଣସରୋଜଂ ପ୍ରେପ୍ସତାମର୍ଚନୀୟଂ

     ପ୍ରଥୟସି ନବନାଭଂ ମଣ୍ଡଲଂ ପାଦୁକେ ତ୍ୱମ୍ ॥ ୨୯.୫୭॥ ୮୮୭॥

ପରିଣତଗୁଣଜାଲା ପଙ୍କ୍ତିଭିର୍ମୌକ୍ତିକାନାଂ

     ବହୁବିଧମଣିରଶ୍ମିଗ୍ରନ୍ଥବନ୍ଧାଭିରାମା ।

ରଘୁପତିପଦରକ୍ଷେ ରାଜବାହ୍ୟସ୍ୟ କୁମ୍ଭେ

     କଲିତରୁଚିରଭୂସ୍ତ୍ୱଂ କାଽପି ନକ୍ଷତ୍ରମାଲା ॥ ୨୯.୫୮॥ ୮୮୮॥

ଚରିତନିଖିଲବୃତ୍ତିଶ୍ଚାରୁପଦ୍ମାସନସ୍ଥା

     ଗୁଣନିବିଡିତମୁକ୍ତାପଙ୍କ୍ତିବଦ୍ଧାକ୍ଷମାଲା ।

ସବିଧମଧିବସନ୍ତୀ ପାଦୁକେ ରଙ୍ଗଭର୍ତୁ-

     ଶ୍ଚରଣକମଲମନ୍ତର୍ବିମ୍ବିତଂ ଧ୍ୟାୟସୀବ ॥ ୨୯.୫୯॥ ୮୮୯॥

ଅନୁପଧି ପରିରକ୍ଷନ୍ନେକପୁତ୍ରାଭିମାନାଦ୍-

     ଭୁବନମିଦମଶେଷଂ ପାଦୁକେ ରଙ୍ଗନାଥଃ ।

ନିଜପଦନିହିତାୟାଂ ଦେବି ତିଷ୍ଠନ୍ ବ୍ରଜନ୍ ବା

     ତ୍ୱୟି ନିହିତଭରୋଽଭୃତ୍ କିଂ ପୁନଃ ସ୍ୱାପମୃଚ୍ଛନ୍ ॥ ୨୯.୬୦॥ ୮୯୦॥

ତ୍ୱରିତମୁପଗତାନାଂ ଶ୍ରୀମତୋ ରଙ୍ଗଭର୍ତୁ-

     ସ୍ତ୍ୱଦୁପହିତପଦସ୍ୟ ସ୍ୱୈରୟାତ୍ରୋତ୍ସବେଷୁ ।

ମୁଖରୟତି ଦିଗନ୍ତାନ୍ମୁହ୍ୟତାଂ ତ୍ୱତ୍ପ୍ରଶସ୍ତୌ

     ବିହିତକୁସୁମବୃଷ୍ଟିର୍ୱ୍ୟାବଘୋଷୀ ସୁରାଣାମ୍ ॥ ୨୯.୬୧॥ ୮୯୧॥

ମନସି ନିୟମୟୁକ୍ତେ ବର୍ତମାନା ମୁନୀନାଂ

     ପ୍ରତିପଦମୁପୟାନ୍ତୀ ଭାବନୀୟକ୍ରମତ୍ୱମ୍ ।

ଶ୍ରୁତିରିବ ନିଜଶବ୍ଦୈଃ ପାଦୁକେ ରଙ୍ଗଭର୍ତୁଃ

     ପଦମନିତରଗମ୍ୟଂ ବ୍ୟଙ୍କୁମର୍ହା ତ୍ୱମେବ ॥ ୨୯.୬୨॥ ୮୯୨॥

ଅବିକଲନିଜଚନ୍ଦ୍ରାଲୋକସନ୍ଦର୍ଶନୀୟା

     ପ୍ରତିକଲମୁପଭୋଗ୍ୟା ପାଦୁକେ ରଙ୍ଗଭର୍ତୁଃ ।

ମୁକୁଲୟିତୁମଶେଷଂ ମୌକ୍ତିକଜ୍ୟୋତ୍ସ୍ନୟା ନଃ

     ପ୍ରଭବସି ତିମିରୌଘଂ ପୌର୍ଣମାସୀ ନିଶେବ ॥ ୨୯.୬୩॥ ୮୯୩॥

ହଂସଶ୍ରେଣୀପରିଚିତଗତିର୍ହାରିଣୀ କଲ୍ମଷାଣାଂ

     ମୌଲୌ ଶମ୍ଭୋଃ ସ୍ଥିତିମଧିଗତା ମୁଗ୍ଧଚନ୍ଦ୍ରାନୁବଦ୍ଧା ।

ରାଜ୍ଞାମେକା ରଘୁକୁଲଭୁବାଂ ସମ୍ୟଗୁତ୍ତାରିକା ତ୍ୱଂ

     କାଲେ ତସ୍ମିନ୍ କ୍ଷିତିମଧିଗତା ପାଦୁକେ ଜାହ୍ନବୀବ ॥ ୨୯.୬୪॥ ୮୯୪॥

ସ୍ୱଚ୍ଛାକାରାଂ ଶ୍ରୁତିସୁରଭିତାଂ ସ୍ୱାଦୁଭାବୋପପନ୍ନାଂ

     ମାର୍ଗେମାର୍ଗେ ମହିତବିଭବାଂ ପାଦୁକେ ତୀର୍ଥଭେଦୈଃ ।

ଶୀତସ୍ପର୍ଶାଂ ଶ୍ରମବିନୟିନୀଂ ଗାହତେ ମନ୍ଦମନ୍ଦଂ

     କ୍ରୀଡାଲୋଲଃ କମଲନିଲୟାଦତ୍ତହସ୍ତୋ ଯୁବା ତ୍ୱାମ୍ ॥ ୨୯.୬୫॥ ୮୯୫॥

ଅଭ୍ୟସ୍ୟନ୍ତ୍ୟୋଃ କ୍ରମମନୁପମଂ ରଙ୍ଗଭର୍ତୁର୍ୱିହାରେ

     ସ୍ଥାନେସ୍ଥାନେ ସ୍ୱରପରିଣତିଂ ଲମ୍ଭିତସ୍ତତ୍ତଦର୍ହାମ୍ ।

ପର୍ୟାୟେଣ ପ୍ରହିତପଦୟୋଃ ପାଦୁକେ ଶ୍ରୁତ୍ୟୁଦାରଃ

     ଶିଞ୍ଜାନାଦଃ ସ୍ଫୁରତି ଯୁବୟୋଃ ଶୃଙ୍ଖଲାବନ୍ଧରମ୍ୟଃ ॥ ୨୯.୬୬॥ ୮୯୬॥

ଆସନ୍ନାନାଂ ଦିବସମପୁନର୍ନକ୍ତମାପାଦୟନ୍ତୀ

     ସ୍ଫୀତାଲୋକା ମୁନିଭିରଭିତଃ ପ୍ରାଣିନାମସ୍ତଦୋଷା ।

ପ୍ରହ୍ୱୈର୍ଜୁଷ୍ଟା ବିବୁଧନିବହୈଃ ପାଦୁକେ ରଙ୍ଗଭର୍ତୁଃ

     ପାଦାମ୍ଭୋଜେ ଦିଶତି ଭବତି ପୂର୍ୱସନ୍ଧ୍ୟେବ କାନ୍ତିମ୍ ॥ ୨୯.୬୭॥ ୮୯୭॥

ରମ୍ୟାଲୋକା ଲଲିତଗମନା ପଦ୍ମରାଗାଧରୋଷ୍ଠୀ

     ମଧ୍ୟେ କ୍ଷାମା ମଣିବଲୟିନୀ ମୌକ୍ତିକବ୍ୟକ୍ତହାସା ।

ଶ୍ୟାମା ନିତ୍ୟଂ ହରିତମଣିଭିଃ ଶାର୍ଙ୍ଗିଣଃ ପାଦରକ୍ଷେ

     ମନ୍ୟେ ଧାତୁର୍ଭବସି ମହିଲାନିର୍ମିତୌ ମାତୃକା ତ୍ୱମ୍ ॥ ୨୯.୬୮॥ ୮୯୮॥

ସ୍ଥିତ୍ୱା ପୂର୍ୱଂ କ୍ୱଚନଭବତୀ ଭଦ୍ରପୀଠସ୍ୟ ମଧ୍ୟେ

     ରତ୍ନୋଦଞ୍ଚତ୍କିରଣନିକରା ରଙ୍ଗିଣଃ ପାଦରକ୍ଷେ ।

ବ୍ୟାକୀର୍ଣାନାଂ ନୃପତିବିରହାଦ୍ଦେବି ବର୍ଣାଶ୍ରମାଣାଂ

     ନୂନଂ ସୀମାବିଭଜନସହଂ ନିର୍ମମେ ସୂତ୍ରପାତମ୍ ॥ ୨୯.୬୯॥ ୮୯୯॥

ମାତର୍ମଞ୍ଜୁସ୍ୱନପରିଣତପାର୍ଥନାବାକ୍ୟପୂର୍ୱଂ

     ନିକ୍ଷିପ୍ତାୟାଂ ତ୍ୱୟି ଚରଣୟୋଃ ପାଦୁକେ ରଙ୍ଗଭର୍ତୁଃ ।

ତ୍ୱୟ୍ୟାୟତ୍ତଂ କିମପି କୁଶଲଂ ଜାନତୀନାଂ ପ୍ରଜାନାଂ

     ପର୍ୟାପ୍ତଂ ତନ୍ନ ଖଲୁ ନ ଭବତ୍ୟାତ୍ମନିକ୍ଷେପକୃତ୍ୟମ୍ ॥ ୨୯.୭୦॥ ୯୦୦॥

ନିତ୍ୟଂ ରଙ୍ଗକ୍ଷିତିପତିପଦନ୍ୟାସଧନ୍ୟାତ୍ମନସ୍ତେ

     ଶିଞ୍ଜାନାଦଂ ଶ୍ରବଣମଧୁରଂ ପାଦୁକେ ଦୀର୍ଘୟନ୍ତଃ ।

କାଲେ ତସ୍ମିନ୍ କରଣବିଗମକ୍ଲେଶଜାତଂ ବିହନ୍ୟୁଃ

     ସନ୍ତାପଂ ନସ୍ତରୁଣତୁଲସୀଗନ୍ଧିନୋ ଗନ୍ଧବାହାଃ ॥ ୨୯.୭୧॥ ୯୦୧॥

ସଂସାରାଧ୍ୱଶ୍ରମପରିଣତଂ ସଂଶ୍ରିତାନାଂ ଜନାନାଂ

     ତାପଂ ସଦ୍ୟଃ ଶମୟିତୁମଲଂ ଶାର୍ଙ୍ଗିଣଃ ପାଦୁକେ ତ୍ୱମ୍ ।

ଚନ୍ଦ୍ରାପୀଡେ ପ୍ରଣମତି ନବାଂ ଚନ୍ଦ୍ରିକାମାପିବଦ୍ଭି-

     ର୍ଧାରାନିର୍ୟତ୍ସଲିଲକଣିକାଶୀକରୈଶ୍ଚନ୍ଦ୍ରକାନ୍ତୈଃ ॥ ୨୯.୭୨॥ ୯୦୨॥

ବଜ୍ରୋପେତାଂ ବଲଭିଦୁପଲଶ୍ୟାମଲାଂ ମଞ୍ଜୁଘୋଷାଂ

     ମୁକ୍ତାସାରାଂ ମଧୁରଚପଲାଂ ବୀକ୍ଷ୍ୟ ବିଷ୍ଣୋଃ ପଦେ ତ୍ୱାମ୍ ।

ହର୍ଷୋତ୍କର୍ଷାଦୁପରି ଚଲୟନ୍ପାଦୁକେ ଚନ୍ଦ୍ରକାନ୍ତଂ

     ଧତ୍ତେ ନିତ୍ୟଂ ଧୃତଘନରୁଚିସ୍ତାଣ୍ଡବଂ ନୀଲକଣ୍ଠଃ ॥ ୨୯.୭୩॥ ୯୦୩॥

ଶ୍ରୀରଙ୍ଗେନ୍ଦୋଶ୍ଚରଣକମଲଂ ତାଦୃଶଂ ଧାରୟନ୍ତୀ

     କାଲେକାଲେ ସହ କମଲୟା କ୍ଲୃପ୍ତୟାତ୍ରୋତ୍ସବଶ୍ରୀଃ ।

ଗତ୍ୱାଗତ୍ୱା ସ୍ୱୟମନୁଗୃହଦ୍ୱାରମୁନ୍ନିଦ୍ରନାଦା

     ପୌରାନ୍ନିତ୍ୟଂ କିମପି କୁଶଲଂ ପାଦୁକେ ପୃଚ୍ଛସୀବ ॥ ୨୯.୭୪॥ ୯୦୪॥

ଚତୁରବିହାରିଣୀଂ ରୁଚିରପକ୍ଷରୁଚିଂ ଭବତୀଂ

     ମନସିଜସାୟକାସନଗୁଣୋଚିତମଞ୍ଜୁରବାମ୍ ।

ଅନୁପଦମାଦ୍ରିୟେମହି ମହେନ୍ଦ୍ରଶିଲାମହିତାଂ

     ହରିଚରଣାବିନ୍ଦମକରନ୍ଦମଧୁବ୍ରତିକାମ୍ ॥ ୨୯.୭୫॥ ୯୦୫॥

କନକରୁଚା ଜଟାମୁରଗମୌଲିମଣୀନ୍ମଣିଭି-

     ସ୍ତ୍ରିଦିବତରଙ୍ଗିଣୀଂ ତରଲମୌକ୍ତିକଦୀଧିତିଭିଃ ।

କୁଟିଲତୟା କ୍ୱଚିଚ୍ଛଶିକଲାମଧରୀକୁରୁଷେ

     ମୁରରିପୁପାଦୁକେ ପୁରଭିଦଃ ଶିରସା ବିଧୃତା ॥ ୨୯.୭୬॥ ୯୦୬॥

କାଲେ ତଲ୍ପଭୁଜଙ୍ଗମସ୍ୟ ଭଜତଃ କାଷ୍ଠାଂ ଗତାଂ ଶେଷତାଂ

     ମୂର୍ତିଂ କାମପି ବେଦ୍ମି ରଙ୍ଗନୃପତେଶ୍ଚିତ୍ରାଂ ପଦତ୍ରଦ୍ୱୟୀମ୍ ।

ସେବାନମ୍ରସୁରାସୁରେନ୍ଦ୍ରମକୁଟୀଶେଷାପଟୀସଙ୍ଗମେ

     ମୁକ୍ତାଚନ୍ଦ୍ରିକୟେବ ଯା ପ୍ରଥୟତେ ନିର୍ମୋକୟୋଗଂ ପୁନଃ ॥ ୨୯.୭୭॥ ୯୦୭॥

ଚନ୍ଦ୍ରାପୀଡଶିଖଣ୍ଡଚନ୍ଦ୍ରଶିଖରଚ୍ୟୋତତ୍ସୁଧାନିର୍ଝର-

     ସ୍ତୋକାଶ୍ଲିଷ୍ଟସୁରେନ୍ଦ୍ରଶେଖରରଜଃସ୍ତ୍ୟାନାଂ ସ୍ତୁମଃ ପାଦୁକାମ୍ ।

ବ୍ରହ୍ମସ୍ତମ୍ବବିଭକ୍ତସୀମବିବିଧକ୍ଷେତ୍ରଜ୍ଞସର୍ଗସ୍ଥିତି-

     ଧ୍ୱଂସାନୁଗ୍ରହନିଗ୍ରହପ୍ରଣୟିନୀ ଯା ସା କ୍ରିୟା ରଙ୍ଗିଣଃ ॥ ୨୯.୭୮॥ ୯୦୮॥

ଲକ୍ଷ୍ମୀନୂପୁରଶିଞ୍ଜିତେନ ଗୁଣିତଂ ନାଦଂ ତବାକର୍ଣୟ-

     ନ୍ନାଜିଘ୍ରନ୍ନିଗମାନ୍ତଗନ୍ଧତୁଲସୀଦାମୋତ୍ଥିତଂ ସୌରଭମ୍ ।

କାଲେ କୁତ୍ରଚିଦାଗତଂ କରୁଣୟା ସାର୍ଧଂ ତ୍ୱୟା ଚାଗ୍ରତଃ

     ପଶ୍ୟେୟଂ ମଣିପାଦୁକେ ପରତରଂ ପଦ୍ମେକ୍ଷଣଂ ଦୈବତମ୍ ॥ ୨୯.୭୯॥ ୯୦୯॥

ବହତି କ୍ଷିତିବ୍ୟବହିତାଂ ସୋଽପି ତ୍ୱାଂ ଗତିଷୁ ପାଦୁକେ ରଙ୍ଗୀ ।

କମଠପତିଭୁଜଗପରିବୃଢକରିବରକୁଲଶିଖରିଭୂମିକାଭେଦୈଃ ॥ ୨୯.୮୦॥ ୯୧୦॥

ଇତି ଶ୍ରୀକବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ପ୍ରକୀର୍ଣକପଦ୍ଧତିଃ ଏକୋନତ୍ରିଂଶୀ ॥

୩୦. ଚିତ୍ରପଦ୍ଧତିଃ (୪୦)

ପ୍ରତିଷ୍ଠାଂ ସର୍ୱଚିତ୍ରାଣାଂ ପ୍ରପଦ୍ୟେ ମଣିପାଦୁକାମ୍ ।

ବିଚିତ୍ରଜଗଦାଧାରୋ ବିଷ୍ଣୁର୍ୟତ୍ର ପ୍ରତିଷ୍ଠିତଃ ॥ ୩୦.୧॥ ୯୧୧॥

ଶୃଣୁ ତେ ପାଦୁକେ ଚିତ୍ରଂ ଚିତ୍ରାଭିର୍ମଣିଭିର୍ୱିଭୋଃ

ଯୁଗକ୍ରମଭୁବୋ ବର୍ଣାନ୍ ଯୁଗପଦ୍ୱହସେ ସ୍ୱୟମ୍ ॥ ୩୦.୨॥ ୯୧୨॥

ସୁରାସୁରାର୍ଚିତା ଧନ୍ୟା ତୁଙ୍ଗମଙ୍ଗଲପାଲିକା ।

ଚରାଚରାର୍ଚିତା ମାନ୍ୟା ରଙ୍ଗପୁଙବପାଦୁକା ॥ ୩୦.୩॥ ୯୧୩॥

ପଦ୍ମେବ ମଙ୍ଗଲସରିତ୍ପାରଂ ସଂସାରସନ୍ତତେଃ ।

ଦୁରିତକ୍ଷେପିକା ଭୂୟାତ୍ପାଦୁକା ରଙ୍ଗଭୂପତେଃ ॥ ୩୦.୪॥ ୯୧୪॥

ଅନନ୍ୟଶରଣଃ ସୀଦୁନ୍ନନନ୍ତକ୍ଲେଶସାଗରେ ।

ଶରଣଂ ଚରଣତ୍ରାଣଂ ରଙ୍ଗନାଥସ୍ୟ ସଂଶ୍ରୟେ ॥ ୩୦.୫॥ ୯୧୫॥

ପ୍ରତିଭାୟାଃ ପରଂ ତତ୍ତ୍ୱଂ ବିଭ୍ରତୀ ପଦ୍ମଲୋଚନମ୍ ।

ପଶ୍ଚିମାୟାମବସ୍ଥାୟାଂ ପାଦୁକେ ମୁହ୍ୟତୋ ମମ ॥ ୩୦.୬॥ ୯୧୬॥

ଯାମଃ ଶ୍ରୟତି ଯାଂ ଧତ୍ତେ ଯେନ ଯାତ୍ୟାୟ ଯାଚ୍ଚ ଯା ।

ଯାଽସ୍ୟ ମାନାୟ ଯୈବାନ୍ୟା ସା ମାମବତୁ ପାଦୁକା ॥ ୩୦.୭॥ ୯୧୭॥

ଚର୍ୟା ନଃ ଶୌରିପାଦୁ ତ୍ୱଂ ପ୍ରାୟଶ୍ଚିତ୍ତେଷ୍ୱନୁତ୍ତମା ।

ନିବେଶ୍ୟସେ ତତଃ ସଦ୍ଭିଃ ପ୍ରାୟଶ୍ଚିତ୍ତେଷ୍ୱନୁତ୍ତମା ॥ ୩୦.୮॥ ୯୧୮॥

ରାମପାଦଗତା ଭାସା ସା ଭାତାଗଦପାମରା ।

କାଦୁପାନଞ୍ଚ କାସହ୍ୟା ହ୍ୟାସକାଞ୍ଚନପାଦୁକା ॥ ୩୦.୯॥ ୯୧୯॥

ବାଢାଘାଳୀଝାଟତୁଚ୍ଛେ ଗାଥାଭାନାୟ ଫୁଲ୍ଲଖେ ।

ସମାଧୌ ଶଠଜିଚ୍ଚୂଡାଂ ବୃଣୋଷି ହରିପାଦୁକେ ॥ ୩୦.୧୦॥ ୯୨୦॥

ସା ଭୂପା ରାମପାରସ୍ଥା ବିଭୂପାସ୍ତିସପାରତା ।

ତାରପା ସକୃପା ଦୁଷ୍ଟିପୂରପା ରାମପାଦୁକା ॥ ୩୦.୧୧॥ ୯୨୧॥

କାରିକା ନ ନ ଯାତ୍ରାୟା ଯାଗେୟାସ୍ୟସ୍ୟଭାନୁଭା ।

ପାଦପା ହହ ସିଦ୍ଧାସି ଯଜ୍ଞାୟ ମମ ସାଞ୍ଜସା ॥ ୩୦.୧୨॥ ୯୨୨॥

ସରାଘବା ଶ୍ରୁତୌ ଦୃଷ୍ଟା ପାଦୁକା ସନୃପାସନା ।

ସଲାଘବା ଗତୌ ଶ୍ଲିଷ୍ଟା ସ୍ୱାଦୁର୍ମେ ସଦୁପାସନା ॥ ୩୦.୧୩॥ ୯୨୩॥

କାବ୍ୟାୟାସ୍ଥିତ ମାବର୍ଗବ୍ୟାଜୟାତଗମାର୍ଗକା

କାମଦା ଜଗତଃ ସ୍ଥିତ୍ୟୈ ରଙ୍ଗପୁଙବପାଦୁକା ॥ ୩୦.୧୪॥ ୯୨୪॥

ସୁରକାର୍ୟକରୀ ଦେବୀ ରଙ୍ଗଧୁର୍ୟସ୍ୟ ପାଦୁକା ।

କାମଦା କଲିତାଦେଶା ଚରନ୍ତୀ ସାଧୁବର୍ତ୍ମସୁ ॥ ୩୦.୧୫॥ ୯୨୫॥

ଭରତାରାଧିତାଂ ତାରାଂ ବନ୍ଦେ ରାଘବପାଦୁକାମ୍ ।

ଭବତାପାଧିତାନ୍ତାନାଂ ବନ୍ଦ୍ୟାଂ ରାଜୀବମେଦୁରାମ୍ ॥ ୩୦.୧୬॥ ୯୨୬॥

କାଦୁପାସ୍ୟ ସଦାଲୋକା କାଲୋଦାହୃତଦାମକା ।

କାମଦାଧ୍ୱରିରଂସାକାଽକାସା ରଙ୍ଗେଶପାଦୁକା ॥ ୩୦.୧୭॥ ୯୨୭॥

ପାପାକୂପାରପାଲୀପା ତ୍ରିପାଦୀପାଦପାଦପା ।

କୃପାରୂପା ଜପାଲାପା ସ୍ୱାପା ମାଽପାନ୍ନୃପାଧିପା ॥ ୩୦.୧୮॥ ୯୨୮॥

ସ୍ଥିରାଗସାଂ ସଦାରାଧ୍ୟା ବିହତାକତତାମତା  ।

ସତ୍ପାଦୁକେ ସରାସାମା ରଙ୍ଗରାଜପଦଂ ନୟ ॥ ୩୦.୧୯॥ ୯୨୯॥

ସ୍ଥିତା ସମୟରାଜପତ୍ପା ଗତରାମାଦକେ ଗବି ।

ଦୁରଂହସାଂ ସନ୍ନତାଦା ସାଧ୍ୟା ତାପକରାସରା ॥ ୩୦.୨୦॥ ୯୩୦॥

ଲୋକତାରା କାମଚାରା କବିରାଜଦୁରାବଚା ।

ତାରାଗତେ ପାଦରାମ ରାଜତେ ରାମପାଦୁକା ॥ ୩୦.୨୧॥ ୯୩୧॥

ଜୟାମପାପାମୟାଜୟାମହେ ଦୁଦୁହେବ ମୟା ।

ମହେଶକାକାଶହେମ ପାଦୁକା ମମ କାଦୁପା ॥ ୩୦.୨୨॥ ୯୩୨॥

ପାପାଦପାପାଦପାପା ପାଦପାଦଦପାଦପା ।

ଦପାଦପାପାଦପାଦ ପାଦପା ଦଦପାଦପା ॥ ୩୦.୨୩॥ ୯୩୩॥

କୋପୋଦ୍ଦୀପକପାପେଽପି କୃପାପାକୋପପାଦିକା ।

ପୂଦପାଦୋଦକାପାଦୋଦ୍ଦୀପିକା କାଽପି ପାଦୁକା ॥ ୩୦.୨୪॥ ୯୩୪॥

ତତାତତ୍ତାତିତତ୍ତେତା ତାତତୀତେତିତାତିତୁତ୍ ।

ତତ୍ତତ୍ତତ୍ତାତତିତତା ତତେତାତେତତାତୁତା ॥ ୩୦.୨୫॥ ୯୩୫॥

ଯାୟାୟାୟାୟାୟାୟାୟା ଯାୟାୟାୟାୟାୟାୟାୟା

ଯାୟାୟାୟାୟାୟାୟାୟା ଯାୟାୟାୟାୟାୟାୟାୟା ॥ ୩୦.୨୬॥ ୯୩୬॥

ରଘୁପତିଚରଣାବନୀ ତଦା ବିରଚିତସଞ୍ଚରଣା ବନୀପଥେ ।

କୃତପରିଚରଣା ବନୀପକୈର୍ନିଗମମୁଖୈଶ୍ଚ ରଣାବନୀଗତା ॥ ୩୦.୨୭॥ ୯୩୭॥

ଦତ୍ତକେଲିଂ ଜଗତ୍କଲ୍ପନାନାଟିକା-

     ରଙ୍ଗିଣା ରଙ୍ଗିଣା ରଙ୍ଗିଣା ରଙ୍ଗିଣା ।

ତାଦୃଶେ ଗାଧିପୁତ୍ରାଧ୍ୱରେ ତ୍ୱାଂ ବିନାଽ-

     ପାଦୁକ ଅପାଦୁକା ପାଦୁକା ପାଦୁକା ॥ ୩୦.୨୮॥ ୯୩୮॥

ପାଦପାପାଦପାପାଦପାପାଦପା ପାଦପା ପାଦପାପାଦପାପାଦପା ।

ପାଦପାପାଦପାପାଦପାପାଦପାପାଦପାପାଦପାପାଦପାପାଦପା ॥ ୩୦.୨୯॥ ୯୩୯॥

ସାକେତତ୍ରାନବେଲାଜନିତତତନିଜପ୍ରାଙ୍କଣଶ୍ରୀପ୍ରଭାସା

     ସାଭାପ୍ରଶ୍ରୀରଟବ୍ୟାମିୟମମମୟମିବ୍ୟାପଦୁଚ୍ଛେଦିଲାସା ।

ସାଲାଦିଚ୍ଛେଦତିଗ୍ମାହବରୁରୁରୁବହ ହ୍ରୀକରସ୍ୟାମରାସା-

     ସା ରାମସ୍ୟାଙ୍ଘ୍ରିମଭ୍ୟାଜତିନନନତିଜସ୍ଥୂଲମୁତ୍ରାତକେସା ॥ ୩୦.୩୦॥ ୯୪୦॥

ରମ୍ୟେ ବେଶ୍ମନି ପାପରାକ୍ଷସଭିଦାସ୍ୱାସତ୍ତଧୀନାୟିକା

     ନନ୍ତୁଂ କର୍ମଜଦୁର୍ମଦାଲସଧିୟାଂ ସା ହନ୍ତନାଥୀକୃତା ।

ସଦ୍ୱାଟଭ୍ରମିକାସୁ ତାପସତପୋବିସ୍ରମ୍ଭଭୂୟନ୍ତ୍ରିକା

     କାଚିତ୍ସ୍ୱୈରଗମେନ କେଲିସମୟେ କାମବ୍ରତା ପାଦୁକା ॥ ୩୦.୩୧॥ ୯୪୧॥

ଶ୍ରୀସମ୍ବେଦନକର୍ମକୃଦ୍ୱସୁ ତବ ସ୍ୟାମୃଦ୍ଧଧୈର୍ୟସ୍ଫୁଟଃ

     ଶ୍ରୀପାଦାବନି ବିସ୍ତୃତାସି ସୁଖିନୀ ତ୍ୱଂ ଗେୟଯାତାୟନା ।

ବେଦାନ୍ତାନୁଭବାତିପାତିସୁତନୁଃ ସାନ୍ଦ୍ରେଡ୍ୟଭାବପ୍ରଥେଽ-

     ଙ୍କସ୍ଥା ଚାଚ୍ୟୁତଦିବ୍ୟଦାସ୍ୟସୁମତିଃ ପ୍ରାଣସ୍ଥସୀତାଧନ ॥ ୩୦.୩୨॥ ୯୪୨॥

କନକପୀଠନିବିଷ୍ଟତନୁସ୍ତଦା ସୁମତିଦାୟିନିଜାନୁଭବସ୍ମୃତା ।

ବିଧିଶିବପ୍ରମୁଖୈରଭିବନ୍ଦିତା ବିଜୟତେ ରଘୁପୁଙ୍ଗବପାଦୁକା ॥ ୩୦.୩୩॥ ୯୪୩॥

ଦୀନଗୋପୀଜନି କ୍ଲିଷ୍ଟଭୀନୁତ୍ସଦା

     ରାମପାଦାବନି ସ୍ୱାନୁଭାବସ୍ଥିତା ।

ଏଧି ମେଽବଶ୍ୟମୁତ୍ତାରଭାବଶ୍ରିତା

     ତେଜସା ତେନ ଘୁଷ୍ଟିଂ ଗତା ପାଲିକା ॥ ୩୦.୩୪॥ ୯୪୪॥

ଧାମନିରାକୃତ ତାମସଲୋକା ଧାତୃମୁଖୈର୍ୱିନତା ନିଜଦାସୈଃ ।

ପାପମଶେଷମପାକୁରୁଷେ ମେ ପାଦୁ ବିଭୂଷିତରାଘବପାଦା ॥ ୩୦.୩୫॥ ୯୪୫॥

କୃପାନଘତ୍ରାତସୁଭୂରଦୁଷ୍ଟା

     ମେଧ୍ୟା ରୁଚା ପାରିଷଦାମଭୂପା ।

ପଦାବନି ସ୍ତ୍ୟାନସୁଖୈର୍ନ ତୃପ୍ତା

     କାନ୍ତ୍ୟା ସମେତାଧିକୃତାଽନିରୋଧା ॥ ୩୦.୩୬॥ ୯୪୬॥

ସାରସସୌଖ୍ୟସମେତା ଖ୍ୟାତା ପଦପା ଭୁବି ସ୍ୱାଜ୍ଞା ।

ସାହସକାର୍ୟବନାଶା ଧୀରା ବସୁଦା ନବନ୍ୟାସା ॥ ୩୦.୩୭॥ ୯୪୭॥

ସାନ୍ୟାଽବନଦା ସୁରବରାଽଧୀଶାନା ବର୍ୟକା ସହସା ।

ଜ୍ଞା ସ୍ୱା ବିଭୁପାଦପତାଖ୍ୟାତା ମେ ସଖ୍ୟସୌ ସରସା ॥ ୩୦.୩୮॥ ୯୪୮॥

ତାରସ୍ଫାରତରସ୍ୱରରସଭରରା ସା ପଦାବନୀ ସାରା ।

ଧୀରସ୍ୱୈରଚରସ୍ଥିର ରଘୁପୁରବାସରତିରାମସବା ॥ ୩୦.୩୯॥ ୯୪୯॥

ଚରମଚରଂ ଚ ନିୟନ୍ତୁଶ୍ଚରଣାବନିଦମ୍ପରେତରା ଶୌରେଃ ।

ଚରମପୁରୁଷାର୍ଥଚିତ୍ରୌ ଚରଣାବନି ଦିଶସି ଚତ୍ୱରେଷୁ ସତାମ୍ ॥ ୩୦.୪୦॥ ୯୫୦॥

ଇତି ଶ୍ରୀକବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଚିତ୍ରପଦ୍ଧତିଃ ତ୍ରିଂଶୀ ॥

୩୧. ନିର୍ୱେଦପଦ୍ଧତିଃ (୨୦)

ପ୍ରପଦ୍ୟେ ପାଦୁକାଂ ଦେବୀ ପରବିଦ୍ୟାମିବ ସ୍ୱୟମ୍ ।

ଯାମର୍ପୟତି ଦୀନାନାଂ ଦୟମାନୋ ଜଗଦ୍ଗୁରୁଃ ॥ ୩୧.୧॥ ୯୫୧॥

ଅପି ଜନ୍ମନି ପାଦୁକେ ପରସ୍ମି-

     ନ୍ନନଘୈଃ କର୍ମଭିରୀଦୃଶୋ ଭବେୟମ୍ ।

ଯ ଇମେ ବିନୟେନ ରଙ୍ଗଭର୍ତୁଃ

     ସମୟେ ତ୍ୱାଂ ପଦୟୋଃ ସମର୍ପୟନ୍ତି ॥ ୩୧.୨॥ ୯୫୨॥

ପରିବର୍ତୟିତା ପିତାମହାଦୀନ୍ ।

     ତ୍ୱମିବାନନ୍ତମସୌ ବହତ୍ୟନେହା ।

ଅଧୁନାଽପି ନ ଶୌରିପାଦୁକେ ତ୍ୱା-

     ମନଘାଲମ୍ବନମଭ୍ୟୁପୈତି ଚିତ୍ତମ୍ ॥ ୩୧.୩॥ ୯୫୩॥

କମଲାଧ୍ୟୁଷିତେ ନିଧୌ ନିରୀହେ

     ସୁଲଭେ ତିଷ୍ଠତି ରଙ୍ଗକୋଶମଧ୍ୟେ ।

ତ୍ୱୟି ତତ୍ପ୍ରତିଲମ୍ଭନେ ସ୍ଥିତାୟାଂ

     ପରମନ୍ୱିଚ୍ଛତି ପାଦୁକେ ମନୋ ମେ ॥ ୩୧.୪॥ ୯୫୪॥

ଯଦ୍ୟପ୍ୟହଂ ତରଲଧୀସ୍ତବ ନ ସ୍ମରେୟଂ

     ନ ସ୍ମର୍ତୁମର୍ହସି କଥଂ ଭବତୀ ସ୍ୱୟଂ ମେ ।

ବତ୍ସେ ବିହାରକୁତୁକଂ କଲୟତ୍ୟବସ୍ଥା

     କା ନାମ କେଶବପଦାବନି ବତ୍ସଲାୟାଃ ॥ ୩୧.୫॥ ୯୫୫॥

ମାତର୍ମୁକୁନ୍ଦକରୁଣାମପି ନିହ୍ନୁବାନା-

     ତ୍କିଂ ବା ପରଂ କିମପି କିଲ୍ବିଷତୋ ମଦୀୟାତ୍ ।

ଗାଢଂ ଗୃହୀତଚରଣା ଗମନାପଦେଶା-

     ତ୍ତତ୍ପ୍ରେରଣପ୍ରଣୟିନୀ ତବ ଚେନ୍ନ ଲୀଲା ॥ ୩୧.୬॥ ୯୫୬॥

କ୍ଷୀବାଽସି କାଞ୍ଚନପଦାବନି କୈଟଭାରେଃ

     ପାଦାରବିନ୍ଦମକରନ୍ଦନିଷେବଣେନ ।

ଦେବି ତ୍ୱଦନ୍ତିକଜୁଷଃ କଥମନ୍ୟଥା ମେ

     ଦୀନାକ୍ଷରାଣି ନ ଶୃଣୋଷି ଦୟାଧିକା ତ୍ୱମ୍ ॥ ୩୧.୭॥ ୯୫୭॥

ମାତସ୍ତ୍ୱଦର୍ପିତଭରସ୍ୟ ମୁକୁନ୍ଦପାଦେ

     ଭଦ୍ରେତରାଣି ଯଦି ନାମ ଭବନ୍ତି ଭୂୟଃ ।

କୀର୍ତିଃ ପ୍ରପନ୍ନପରିରକ୍ଷଣଦୀକ୍ଷିତାୟାଃ

     କିଂ ନ ତ୍ରପେତ ତବ କାଞ୍ଚନପାଦରକ୍ଷେ ॥ ୩୧.୮॥ ୯୫୮॥

ଦୌବାରିକଦ୍ୱିରସନପ୍ରବଲାନ୍ତରାୟୈ-

     ର୍ଦୂୟେ ପଦାବନି ଦୁରାଢ୍ୟବିଲପ୍ରବେଶୈଃ ।

ତଦ୍ରଙ୍ଗଧାମନିରପାୟଧନୋତ୍ତରାୟାଂ

     ତ୍ୱୟ୍ୟେବ ବିଶ୍ରମୟ ମଙ୍କ୍ଷୁ ମନୋରଥଂ ମେ ॥ ୩୧.୯॥ ୯୫୯॥

ବ୍ୟାମୁହ୍ୟତାଂ ତ୍ରିବିଧତାପମୟେ ନିଦାଘେ

     ମାୟାବିଶେଷଜନିତାସୁ ମରୀଚିକାସୁ ।

ସଂସ୍ପୃଷ୍ଟଶୌରିଚରଣା ଚରଣାବନି ତ୍ୱଂ

     ସ୍ଥେୟା ସ୍ୱୟଂ ଭବସି ନଶ୍ଚରମେ ପୁମର୍ଥେ ॥ ୩୧.୧୦॥ ୯୬୦॥

ଅଚ୍ଛେଦ୍ୟଯା ବିଷୟବାଗୁରୟା ନିବଦ୍ଧାନ୍

     ଦୀନାନ୍ ଜନାର୍ଦନପଦାବନି ସତ୍ପଥସ୍ଥା ।

ପ୍ରାୟଃ କ୍ରମେଣ ଭବତୀ ପରିଗୃହ୍ୟ ମୌଲୌ

     କାଲେନ ମୋଚୟତି ନଃ କୃପୟା ସନାଥା ॥ ୩୧.୧୧॥ ୯୬୧॥

ସମ୍ବାହିକା ଚରଣୟୋର୍ମଣିପାଦରକ୍ଷେ

     ଦେବସ୍ୟ ରଙ୍ଗବସତେର୍ଦୟିତା ନନୁ ତ୍ୱମ୍ ।

କସ୍ତ୍ୱାଂ ନିବାରୟିତୁମର୍ହତି ଯୋଜୟନ୍ତୀଂ

     ମାତଃ ସ୍ୱୟଂ ଗୁଣଗଣେଷୁ ମମାପରାଧାନ୍ ॥ ୩୧.୧୨॥ ୯୬୨॥

କିଂ ବା ଭବିଷ୍ୟତି ପରଂ କଲୁଶୈକବୃତ୍ତେ-

     ରେତାବତାଽପ୍ୟନୁପଜାତମନେହସା ମେ ।

ଏକଂ ତଦସ୍ତି ଯଦି ପଶ୍ୟସି ପାଦୁକେ ତେ

     ପଦ୍ମାସହାୟପଦପଙ୍କଜଭୋଗସାମ୍ୟମ୍ ॥ ୩୧.୧୩॥ ୯୬୩॥

ବିବିଧବିଷୟଚିନ୍ତାସନ୍ତତାଭିଶ୍ଚିରଂ ମାଂ

     ଜନିତକଲୁଷମିତ୍ଥଂ ଦେବି ଦୁର୍ୱାସନାଭିଃ ।

ପଦସରସିଜୟୋତ୍ସ୍ୱଂ ପାଦୁକେ ରଙ୍ଗଭର୍ତୁଃ

     ପରିମଲପରିବାହୈଃ ପାବନୈର୍ୱାସୟେଥାଃ ॥ ୩୧.୧୪॥ ୯୬୪॥

ଶରଣମଧିଗତସ୍ତ୍ୱାଂ ଶାର୍ଙ୍ଗିଣଃ ପାଦରକ୍ଷେ

     ସକୃଦପି ବିନିୟୁକ୍ତଂ ତ୍ୱତ୍ସପର୍ୟାଧିକାରେ ।

ପୁନରପି କଥମେନଂ ହସ୍ତମୁତ୍ତାନୟେୟଂ

     ଧନମଦମୁଦିତାନାଂ ମାନବାନାଂ ସମାଜେ ॥ ୩୧.୧୫॥ ୯୬୫॥

ଯଦି କିମପି ସମୀହେ କର୍ମ କର୍ତୁଂ ଯଥାବ-

     ତ୍ପ୍ରତିପଦମୁପଜାତୈଃ ପ୍ରତ୍ୟବେୟାଂ ନିମିତ୍ତୈଃ ।

ଅବଧିରସି ଯଦି ତ୍ୱଂ ତତ୍ର ନୈମିତ୍ତିକାନାଂ

     ଶରଣମିହ ନ କିଂ ମେ ଶୌରିପାଦାବନି ସ୍ୟାଃ ॥ ୩୧.୧୬॥ ୯୬୬॥

ଅନ୍ତର୍ଲୀନୈରଘପରିକରୈରାବିଲା ଚିତ୍ତବୃତ୍ତିଃ

     ଶବ୍ଦାଦୀନାଂ ପରବଶତୟା ଦୁର୍ଜୟାନୀନ୍ଦ୍ରିୟାଣି ।

ବିଷ୍ଣୋଃ ପାଦପ୍ରଣୟିନି ଚିରାଦସ୍ୟ ମେ ଦୁଃଖସିନ୍ଧୋଃ

     ପାରଂ ପ୍ରପ୍ୟଂ ଭବତି ପରୟା ବିଦ୍ୟଯା ବା ତ୍ୱୟା ବା ॥ ୩୧.୧୭॥ ୯୬୭॥

ଗୋମାୟୂନାଂ ମଲୟପବନେ ତସ୍କରାଣାଂ ହିମାଂଶୌ

     ଦୁର୍ୱୃତ୍ତାନାଂ ସୁଚରିତମୟେ ସତ୍ପଥେ ତ୍ୱତ୍ସନାଥେ ।

ତତ୍ତ୍ୱଜ୍ଞାନେ ତରଲମନସାଂ ଶାର୍ଙ୍ଗିଣଃ ପାଦରକ୍ଷେ

     ନିତ୍ୟୋଦ୍ୱେଗୋ ଭବତି ନିୟତେରୀଦୃଶୀ ଦୁର୍ୱିନୀତିଃ ॥ ୩୧.୧୮॥ ୯୬୮॥

କାଲେ ଜନ୍ତୂନ୍ କଲୁଷକରଣେ କ୍ଷିପ୍ରମାକାରୟନ୍ତ୍ୟା

     ଘୋରଂ ନାହଂ ଯମପରିଷଦୋ ଘୋଷମାକର୍ଣୟେୟମ୍ ।

ଶ୍ରୀମଦ୍ରଙ୍ଗେଶ୍ୱରଚରଣୟୋରନ୍ତରଙ୍ଗୈଃ ପ୍ରୟୁକ୍ତଂ

     ସେବାହ୍ୱାନଂ ସପଦି ଶୃଣୁୟାଂ ପାଦୁକାସେବକେତି ॥ ୩୧.୧୯॥ ୯୬୯॥

ପାଷାଣକଲ୍ପମନ୍ତେ ପରିଚିତଗୌତମପରିଗ୍ରହନ୍ୟାୟାତ୍ ।

ପତିପଦପରିଚରଣାର୍ହଂ ପରିଣମୟ ମୁକୁନ୍ଦପାଦରକ୍ଷିଣି ମାମ୍ ॥ ୩୧.୨୦॥ ୯୭୦॥

ଇତି ଶ୍ରୀକବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ନିର୍ୱେଦପଦ୍ଧତିରେକତ୍ରିଂଶୀ ॥

୩୨. ଫଲପଦ୍ଧତିଃ (୩୮)

ଉପାଖ୍ୟାତାଂ ତଥାତ୍ୱେନ ବସିଷ୍ଠାଦ୍ୟୈର୍ମହର୍ଷିଭିଃ ।

ଉପାୟଫଲୟୋଃ କାଷ୍ଠାମୁପାସେ ରାମପାଦୁକାମ୍ ॥ ୩୨.୧॥ ୯୭୧॥

ନିବିଶେୟ ନିରନ୍ତରଂ ପ୍ରତୀତସ୍ତ୍ରିଦଶାନାଂ ବିଭବଂ ତୃଣାୟ ମତ୍ୱା ।

ସବିଧେ ତବ ଦେବି ରଙ୍ଗଭର୍ତୁଃ ପଦଲୀଲାକମଲଂ ସମୁଦ୍ୱହନ୍ତ୍ୟାଃ ॥ ୩୨.୨॥ ୯୭୨॥

କିମହଂ ମଣିପାଦୁକେ ତ୍ୱୟା ମେ ସୁଲଭେ ରଙ୍ଗନିଧୌ ଶ୍ରିୟା ସନାଥେ ।

କରଣାନି ପୁନଃ କଦର୍ଥୟେୟଂ କୃପଣଦ୍ୱାରଦୁରାସିକାଦିଦୁଃଖୈଃ ॥ ୩୨.୩॥ ୯୭୩॥

ସକୃଦପ୍ୟନୁଭୂୟ ରଙ୍ଗଭର୍ତୁସ୍ତ୍ୱଦୁପଶ୍ଲେଷମନୋହରଂ ପଦାବ୍ଜମ୍ ।

ଅପୁନର୍ଭବକୌତୁକଂ ତଦୈବ ପ୍ରଶମଂ ଗଚ୍ଛତି ପାଦୁକେ ମୁନୀନାମ୍ ॥ ୩୨.୪॥ ୯୭୪॥

ଅପରସ୍ପରପାତିନାମମୀଷା-

     ମନିଦମ୍ପୂର୍ୱନିରୂଢସନ୍ତତୀନାମ୍ ।

ଭରତବ୍ୟସନାଦନୂନସୀମ୍ନାଂ

     ଦୁରିତାନାଂ ମମ ନିଷ୍କୃତିସ୍ତ୍ୱମାସୀଃ ॥ ୩୨.୫॥ ୯୭୫॥

ତ୍ୱଦୁପାସନସମ୍ପ୍ରଦାୟବିଦ୍ଭିଃ

     ସମୟେ ସାତ୍ତ୍ୱତସେବିତେ ନିୟୁକ୍ତାଃ ।

ଭରତବ୍ରତିନୋ ଭବାମ୍ବୁରାଶିଂ

     କତିଚିତ୍ କାଞ୍ଚନପାଦୁକେ ତରନ୍ତି ॥ ୩୨.୬॥ ୯୭୬॥

ଅଲମଚ୍ୟୁତପାଦୁକେ ଯଥାବ-

     ତ୍ଭବତୀ ଯଚ୍ଚ ପଦଂ ତ୍ୱଦେକଧାର୍ୟମ୍ ।

ଇତରେତରଭୂଷିତଂ ତଦେତ-

     ତ୍ଦ୍ୱିତୟଂ ସମ୍ବନନାୟ ଚେତସୋ ନଃ ॥ ୩୨.୭॥ ୯୭୭॥

ଅନନ୍ୟସାମାନ୍ୟତୟା ମୁରାରେ-

     ରଙ୍ଗେଷ୍ୱବାପ୍ତେଷୁ କିରୀଟମୁଖ୍ୟୈଃ ।

ପାଦାବନି ତ୍ୱଂ ନିଜମେବ ଭାଗଂ

     ସର୍ୱାତ୍ମସାଧାରଣତାମନୈଷୀଃ ॥ ୩୨.୮॥ ୯୭୮॥

ସମାଶ୍ରିତାନାଂ ମଣିପାଦୁକେ ତ୍ୱାଂ

     ବିପଶ୍ଚିତାଂ ବିଷ୍ଣୁପଦେଽପ୍ୟନାସ୍ଥା ।

କଥଂ ପୁନସ୍ତେ କୃତିନୋ ଭଜେରନ୍

     ବାସାଦରଂ ବାସବରାଜଧାନ୍ୟାମ୍ ॥ ୩୨.୯॥ ୯୭୯॥

ବିମୃଶ୍ୟ ରଙ୍ଗେଶ୍ୱରପାଦରକ୍ଷେ

     ବାରକ୍ରମଂ ନୂନମବାରଣୀୟମ୍ ।

ପଦ୍ମାଗ୍ରହେଽପି ସ୍ପୃଶତୀ ପ୍ରତୀତା

     ସ୍ଥୂଲେନ ରୂପେଣ ବସୁନ୍ଧରା ତ୍ୱାମ୍ ॥ ୩୨.୧୦॥ ୯୮୦॥

ଅଭିରକ୍ଷସି ତ୍ୱମନପାୟନିଧିଂ

     ମଣିପାଦୁକେ ମଧୁଭିଦଶ୍ଚରଣମ୍ ।

ଅତ ଏବ ଦେବି ତଦନନ୍ୟଧନାଃ

     ଶିରସା ବହନ୍ତି ଭବତୀଂ କୃତିନଃ ॥ ୩୨.୧୧॥ ୯୮୧॥

ପଦୟୁଗମିବ ପାଦୁକେ ମୁରାରେ-

     ର୍ଭବତି ବିଭୂତିରକଣ୍ଟକା ତ୍ୱୟୈବ ।

କଥମିବ ହୃଦୟାନି ଭାବୁକାନାଂ

     ତ୍ୱଦନୁଭବାଦୁପଜାତକଣ୍ଟକାନି ॥ ୩୨.୧୨॥ ୯୮୨॥

ଜ୍ଞାନକ୍ରିୟାଭଜନସୀମବିଦୂରବୃତ୍ତେ-

     ର୍ୱୈଦେଶିକସ୍ୟ ତଦବାପ୍ତିକୃତାଂ ଗୁଣାନାମ୍ ।

ମୌଲୌ ମମାସି ମଧୁସୂଦନପାଦୁକେ ତ୍ୱଂ

     ଗଙ୍ଗେବ ହନ୍ତ ପତିତା ବିଧିନୈବ ପଙ୍ଗୋଃ ॥ ୩୨.୧୩॥ ୯୮୩॥

ରଙ୍ଗେଶ୍ୱରସ୍ୟ ଯଦିୟଂ ମଣିପାଦରକ୍ଷେ

     ପାଦାରବିନ୍ଦୟୁଗଲଂ ଭବତୀସମେତମ୍ ।

ପୁଂସାମୁପୋଷିତବିଲୋଚନପାରଣାର୍ହଂ

     କ୍ଷୀରଂ ତଦେତଦିହ ଶର୍କରୟା ସମେତମ୍ ॥ ୩୨.୧୪॥ ୯୮୪॥

କାମାଦିଦୋଷରହିତଂ ତ୍ୱଦନନ୍ୟକାମାଃ

     କର୍ମ ତ୍ରୟୋଦଶବିଧଂ ପରିଶୀଲୟନ୍ତଃ ।

ପାଦାବନି ତ୍ୱଦନୁଷଙ୍ଗବିଶେଷଦୃଶ୍ୟ-

     ମେକାନ୍ତିନଃ ପରିଚରନ୍ତି ପଦଂ ମୁରାରେଃ ॥ ୩୨.୧୫॥ ୯୮୫॥

ମୌଲୌ ସ୍ଥିତା ମଖଭୁଜାମଥବା ଶ୍ରୁତୀନାଂ

     ତଦ୍ରଙ୍ଗରାଜଚରଣାବନି ବୈଭବଂ ତେ ।

ଅସ୍ମାଦୃଶାମପି ଯଦି ପ୍ରଥିତଂ ତତଃସ୍ୟା-

     ତ୍ସୌଲଭ୍ୟମମ୍ବ ତଦିଦଂ ତବ ସାର୍ୱଭୌମମ୍ ॥ ୩୨.୧୬॥ ୯୮୬॥

ସ୍ୱପ୍ନେଽପି ଚେତ୍ ତ୍ୱମସି ମୂର୍ଧନି ସନ୍ନିବିଷ୍ଟା

     ନମ୍ରସ୍ୟ ମେ ନରକମର୍ଦନପାଦରକ୍ଷେ ।

ସ୍ଥାନେ ତଦେତଦିହ ଦେବି ଯତଃ ସମାଧୌ

     ସନ୍ତୋ ବିଦୁସ୍ତମପି ତାଦୃଶବୁଦ୍ଧିଗମ୍ୟମ୍ ॥ ୩୨.୧୭॥ ୯୮୭॥

ବଦ୍ଧାଞ୍ଜଲିଃ ପରିଚରନ୍ନିୟମେବ ରଙ୍ଗେ

     ବିଶ୍ରାଣିତାଚ୍ୟୁତନିଧିଂ ମଣିପାଦୁକେ ତ୍ୱାମ୍ ।

କସ୍ୟାପି କୂଣିତଦୃଶୋ ଧନିନଃ ପୁରସ୍ତା-

     ଦୁତ୍ତାନୟେୟ ନ କଦାଽପି କରଂ ବିକୋଶମ୍ ॥ ୩୨.୧୮॥ ୯୮୮॥

ତ୍ୱୟ୍ୟର୍ପିତେନ ଚରଣେନ ସଦଧ୍ୱଭାଜଃ

     ପାଦାବନି ପ୍ରଥିତସାତ୍ତ୍ୱିକଭାବଦୃଶ୍ୟାଃ ।

ରଙ୍ଗେଶବଦ୍ୱିଦଧତେ ମୁହୁରଙ୍ଗହାରାନ୍

     ରଙ୍ଗେ ମହୀୟସି ନଟା ଇବ ଭାବୁକାସ୍ତେ ॥ ୩୨.୧୯॥ ୯୮୯॥

ଯେନ ସ୍ଥିତା ଶିରସି ମେ ବିଧିନାଽଧୁନା ତ୍ୱଂ

     ତେନୈବ ଦେବି ନିୟତଂ ମମ ସାମ୍ପରାୟେ ।

ଲକ୍ଷ୍ୟୀକରିଷ୍ୟସି ପଦାବନି ରଙ୍ଗନାଥଂ

     ଲକ୍ଷ୍ମୀପଦାମ୍ବୁରୁହୟାବକପଙ୍କଲକ୍ଷ୍ୟମ୍ ॥ ୩୨.୨୦॥ ୯୯୦॥

ହରିଚରଣସରୋଜେ ଭକ୍ତିଭାଜାଂ ଜନାନା-

     ମନୁକରଣବିଶେଷୈରାତ୍ମନୈବୋପହାସ୍ୟମ୍ ।

ପରିଣମୟ ଦୟାର୍ଦ୍ରା ପାଦୁକେ ତାଦୃଶଂ ମାଂ

     ଭରତପରିଷଦନ୍ତର୍ୱର୍ତିଭିଃ ପ୍ରେକ୍ଷଣୀୟମ୍ ॥ ୩୨.୨୧॥ ୯୯୧॥

ଦୁରିତମପନୟନ୍ତୀ ଦୂରତଃ ପାଦୁକେ ତ୍ୱଂ

     ଦନୁଜମଥନଲୀଲାଂ ଦେବତାମାନୟନ୍ତୀ ।

ଅନିତରଶରଣାନାମଗ୍ରିମସ୍ୟାସ୍ୟ ଜନ୍ତୋ-

     ରବଶକରଣବୃତ୍ତେରଗ୍ରତଃ ସନ୍ନିଧେୟାଃ ॥ ୩୨.୨୨॥ ୯୯୨॥

ଚରମନିଗମଗୀତେ ସପ୍ତତନ୍ତୌ ସମାପ୍ତେ

     ନିଜସଦନସମୀପେ ପ୍ରାପୟିଷ୍ୟନ୍ ବିହାରମ୍ ।

ଜ୍ୱଲନମିବ ଭବତ୍ୟୋଃ ସମ୍ୟଗାରୋପୟେନ୍ମାଂ

     ପ୍ରଥମବରଣବଶ୍ୟଃ ପାଦୁକେ ରଙ୍ଗନାଥଃ ॥ ୩୨.୨୩॥ ୯୯୩॥

ପୁନରୁଦରନିବାସଚ୍ଛେଦନଂ ସହ୍ୟସିନ୍ଧୋଃ

     ପୁଲିନମଧିବସେୟଂ ପୁଣ୍ୟମାବ୍ରହ୍ମଲାଭାତ୍ ।

ପରିଣମତି ଶରୀରେ ପାଦୁକେ ଯତ୍ର ପୁଂସାଂ

     ତ୍ୱମସି ନିଗମଗୀତା ଶାଶ୍ୱତଂ ମୌଲିରତ୍ନମ୍ ॥ ୩୨.୨୪॥ ୯୯୪॥

ବହୁବିଧପୁରୁଷାର୍ଥଗ୍ରାମସୀମାନ୍ତରେଖାଂ

     ହରିଚରଣସରୋଜନ୍ୟାସଧନ୍ୟାମନନ୍ୟଃ ।

ଭରତସମୟସିଦ୍ଧାଂ ପାଦୁକେ ଭାବୟଂସ୍ତ୍ୱାଂ

     ଶତମିହ ଶରଦସ୍ତେ ଶ୍ରାବୟେୟଂ ସମୃଦ୍ଧିମ୍ ॥ ୩୨.୨୫॥ ୯୯୫॥

ତିଲକୟସି ଶିରୋ ମେ ଶୌରିପାଦବନି ତ୍ୱଂ

     ଭଜସି ମନସି ନିତ୍ୟଂ ଭୂମିକାଂ ଭାବନାଖ୍ୟାମ୍ ।

ବଚସି ଚ ବିଭବୈଃ ସ୍ୱୈର୍ୱ୍ୟକ୍ତିମିତ୍ଥଂ ପ୍ରୟାତା

     ତଦିହ ପରିଣତଂ ମେ ତାଦୃଶଂ ଭାଗଧେୟମ୍ ॥ ୩୨.୨୬॥ ୯୯୬॥

ଅଜନିଷି ଚିରମାଦୌ ହନ୍ତ ଦେହେନ୍ଦ୍ରିୟାଦି-

     ସ୍ତଦନୁ ତଦଧିକଃ ସନ୍ନୀଶ୍ୱରୋଽହଂ ବଭୂବ ।

ଅଥ ଭଗବତ ଏବାଭୂବମର୍ଥାଦିଦାନୀଂ

     ତବ ପୁନରହମାସଂ ପାଦୁକେ ଧନ୍ୟଜନ୍ମା ॥ ୩୨.୨୭॥ ୯୯୭॥

ତ୍ୱୟ୍ୟାୟତ୍ତୌ ଭଗବତି ଶିଲାଭସ୍ମନୋଃ ପ୍ରାଣଦାନାଂ-

     ଦାସ୍ତ୍ରୀବାଲଂ ପ୍ରଥିତବିଭବୌ ପାଦପଦ୍ମୌ ମୁରାରେଃ ।

ତାମେବାହଂ ଶିରସିନି ହିତାମଦ୍ୟ ପଶ୍ୟାମିଂ ଦୈବା-

     ଦାତ୍ମାଧାରାଂ ଜନନି ଭବତୀମାତ୍ମଲାଭପ୍ରସୂତିମ୍ ॥ ୩୨.୨୮॥ ୯୯୮॥

କଥଙ୍କାରଂ ଲକ୍ଶ୍ମୀକରକମଲୟୋଗ୍ୟଂ ନିଜପଦଂ

     ନିଦଧ୍ୟାଦ୍ରଙ୍ଗେଶଃ କୁଲିଶକଠିନେଽସ୍ମିନ୍ମନସି ନଃ ।

ନ ଚେଦେବଂ ମଧ୍ୟେ ବିଶତି ଦୟଯା ଦେବି ଭବତୀ

     ନିଜାକାନ୍ତିକ୍ଷୁଣ୍ଣସ୍ମରଶରଶିଖାକଣ୍ଟକତତିଃ ॥ ୩୨.୨୯॥ ୯୯୯॥

କ୍ରୀଡାଲୌଲ୍ୟଂ କିମପି ସମୟେ ପାଦୁକେ ବର୍ଜୟନ୍ତୀ

     ନିର୍ୱେଶଂ ସ୍ୱଂ ଦିଶସି ଭବତୀନାଥୟୋଃ ଶ୍ରୀଧରଣ୍ୟୋଃ ।

ମାମପ୍ୟେବଂ ଜନୟ ମଧୁଜିତ୍ପାଦୟୋରନ୍ତରଙ୍ଗଂ

     ରଙ୍ଗଂ ଯାଽସୌ ଜନୟସି ଗୁଣୈର୍ଭାରତୀନୃତ୍ତରଙ୍ଗମ୍ ॥ ୩୨.୩୦॥ ୧୦୦୦॥

ଇତି ରଙ୍ଗଧୁରୀଣପାଦୁକେ ତ୍ୱଂ

     ସ୍ତୁତିଲକ୍ଷେଣ ସହସ୍ରଶୋ ବିମୃଷ୍ଟା ।

ସଫଲଂ ମମ ଜନ୍ମ ତାବଦେତ-

     ତ୍ୟଦିହାଶାସ୍ୟମତଃପରଂ କିମେତତ୍ ॥ ୩୨.୩୧॥ ୧୦୦୧॥

ମାତଃ ସ୍ୱରୂପମିବ ରଙ୍ଗପତେର୍ନିବିଷ୍ଟଂ

     ବାଚାମସୀମନି ପଦାବନି ବୈଭବଂ ତେ ।

ମୋହାଦମିଷ୍ଟୁତବତୋ ମମ ମନ୍ଦବୁଦ୍ଧେ-

     ର୍ବାଲସ୍ୟ ସାହସମିଦଂ ଦୟଯା ସହେଥାଃ ॥ ୩୨.୩୨॥ ୧୦୦୨॥

ଯେ ନାମ ଭକ୍ତିନିୟତାଃ କବୟୋ ମଦନ୍ୟେ

     ମାତଃ ସ୍ତୁବନ୍ତି ମଧୁସୂଦନପାଦୁକେ ତ୍ୱାମ୍ ।

ଲପ୍ସ୍ୟେ ଗୁଣାଂଶବିନିବେଶିତମାନସାନାଂ

     ତେଷାମହଂ ସବହୁମାନବିଲୋକିତାନି ॥ ୩୨.୩୩॥ ୧୦୦୩॥

ସଙ୍ଘର୍ଷୟନ୍ତି ହୃଦୟାନ୍ୟସତାଂ ଗୁଣାଂଶେ

     ସନ୍ତସ୍ତୁ ସନ୍ତମପି ନ ପ୍ରଥୟନ୍ତି ଦୋଷମ୍ ।

ତଦ୍ରଙ୍ଗନାଥଚରଣାବନି ତେ ସ୍ତୁତୀନା-

     ମେକା ପରଂ ସହସତୋରିହ ସାକ୍ଷିଣୀ ତ୍ୱମ୍ ॥ ୩୨.୩୪॥ ୧୦୦୪॥

ଇତ୍ଥଂ ତ୍ୱମେବ ନିଜକେଲିବଶାଦକାର୍ଷୀ-

     ରିକ୍ଷ୍ୱାକୁନାଥପଦପଙ୍କଜୟୋରନନ୍ୟା ।

ସ୍ୱୀୟଂ ପଦାବନି ମୟା ସୁମହଚ୍ଚରିତ୍ରଂ

     ସୀତେବ ଦେବି ସହଜେନ କବୀଶ୍ୱରେଣ ॥ ୩୨.୩୫॥ ୧୦୦୫॥

ପୃଥୁକବଦନଶଙ୍ଖସ୍ପର୍ଶନୀତ୍ୟା କଦାଚି-

     ଚ୍ଛିରସି ବିନିଂହିତାୟାଃ ସ୍ୱେନ ଭୂମ୍ନା ତବୈବ ।

ସ୍ତୁତିରିୟମୁପଜ୍ଞାତା ମନ୍ମୁଖେନେତ୍ୟଧୀୟୁଃ

     ପରିଚରଣପରାସ୍ତେ ପାଦୁକେଽପାସ୍ତଦୋଷାଃ ॥ ୩୨.୩୬॥ ୧୦୦୬॥

ଯଦିସ୍ଫୀତା ଭକ୍ତିଃ ପ୍ରଣୟ(ବ)ମୁଖବାଣୀପରିପଣଂ

     ପଦତ୍ରାଣସ୍ତୋତ୍ରଂ ହୃଦି ବିଭୃତ ରଙ୍ଗକ୍ଷିତିଭୃତଃ ।

ନିରୁନ୍ମାଦୋ ଯଦ୍ୱା ନିରବଧିସୁଧାନିର୍ଝରମୁଚୋ

     ବଚୋଭଙ୍ଗୀରେତା ନ କଥମନୁରୁନ୍ଧେ ସହୃଦୟଃ ॥ ୩୨.୩୭॥ ୧୦୦୭॥

ଜୟତି ଯତିରାଜସୂକ୍ତିର୍ଜୟତି ମୁକୁନ୍ଦସ୍ୟ ପାଦୁକାୟୁଗଲୀ ।

ତଦୁଭୟଧନାସ୍ତ୍ରିବେଦୀମବନ୍ଧ୍ୟଯନ୍ତୋ ଜୟନ୍ତି ଭୁବି ସନ୍ତଃ ॥ ୩୨.୩୮॥ ୧୦୦୮॥

ଇତି ଶ୍ରୀକବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରେ

ଫଲପଦ୍ଧତିଃ ଦ୍ୱାତ୍ରିଂଶୀ ॥

ଇତି ଶ୍ରୀକବିତାର୍କିକସିଂହସ୍ୟ ସର୍ୱତନ୍ତ୍ରସ୍ୱତନ୍ତ୍ରସ୍ୟ ଶ୍ରୀମଦ୍ୱେଙ୍କଟନାଥସ୍ୟ

ଶ୍ରୀମଦ୍ୱେଦାନ୍ତାଚାର୍ୟସ୍ୟ କୃତିଷୁ ଶ୍ରୀରଙ୍ଗନାଥପାଦୁକାସହସ୍ରଂ ସମ୍ପୂର୍ଣମ୍ ॥

.