ଶ୍ରୀରାମକବଚମ୍

 ଶ୍ରୀରାମକବଚମ୍ 

॥ ଶ୍ରୀମଦାନନ୍ଦରାମାୟଣେ ମନୋହରକାଣ୍ଡାନ୍ତର୍ଗତଂ ଶ୍ରୀରାମକବଚମ୍ ॥

॥ ଓଁ ଶ୍ରୀ ରାମାୟ ତୁଭ୍ୟଂ ନମଃ ॥

ଅଗସ୍ତିରୁବାଚ-

ଆଜାନୁବାହୁମରବିନ୍ଦଦଳାୟତାକ୍ଷମାଜନ୍ମଶୁଦ୍ଧରସହାସମୁଖପ୍ରସାଦମ୍ ।

ଶ୍ୟାମଂ ଗୃହୀତଶରଚାପମୁଦାରରୂପଂ ରାମଂ ସରାମମଭିରାମମନୁସ୍ମରାମି ॥ ୧॥

ଶୃଣୁ ବକ୍ଷ୍ୟାମ୍ୟହଂ ସର୍ୱଂ ସୁତୀକ୍ଷ୍ଣ ମୁନିସତ୍ତମ ।

ଶ୍ରୀରାମକବଚଂ ପୁଣ୍ୟଂ ସର୍ୱକାମପ୍ରଦାୟକମ୍ ॥ ୨॥

ଅଦ୍ୱୈତାନନ୍ଦଚୈତନ୍ୟଶୁଦ୍ଧସତ୍ତ୍ୱୈକଲକ୍ଷଣଃ ।

ବହିରନ୍ତଃ ସୁତୀକ୍ଷ୍ଣାତ୍ର ରାମଚନ୍ଦ୍ରଃ ପ୍ରକାଶତେ ॥ ୩॥

ତତ୍ତ୍ୱବିଦ୍ୟାର୍ଥିନୋ ନିତ୍ୟଂ ରମନ୍ତେ ଚିତ୍ସୁଖାତ୍ମନି ।

ଇତି ରାମପଦେନାସୌ ପରବ୍ରହ୍ମାଭିଧୀୟତେ ॥ ୪॥

ଜୟ ରାମେତି ଯନ୍ନାମ କୀର୍ତୟନ୍ନଭିବର୍ଣୟେତ୍ ।

ସର୍ୱପାପୈର୍ୱିନିର୍ମୁକ୍ତୋ ଯାତି ବିଷ୍ଣୋଃ ପରଂ ପଦମ୍ ॥ ୫॥

ଶ୍ରୀରାମେତି ପରଂ ମନ୍ତ୍ରଂ ତଦେବ ପରମଂ ପଦମ୍ ।

ତଦେବ ତାରକଂ ବିଦ୍ଧି ଜନ୍ମମୃତ୍ୟୁଭୟାପହମ୍ ।

ଶ୍ରୀରାମେତି ବଦନ୍ ବ୍ରହ୍ମଭାବମାପ୍ନୋତ୍ୟସଂଶୟମ୍ ॥ ୬॥

ଓଁ ଅସ୍ୟ ଶ୍ରୀରାମକବଚସ୍ୟ ଅଗସ୍ତ୍ୟ ଋଷିଃ । ଅନୁଷ୍ଟୁପ୍ ଛନ୍ଦଃ ।

ସୀତାଲକ୍ଷ୍ମଣୋପେତଃ ଶ୍ରୀରାମଚନ୍ଦ୍ରୋ ଦେବତା ।

ଶ୍ରୀରାମଚନ୍ଦ୍ରପ୍ରସାଦସିଦ୍ଧ୍ୟର୍ଥଂ ଜପେ ବିନିୟୋଗଃ ॥

ଅଥ ଧ୍ୟାନଂ ପ୍ରବକ୍ଷ୍ୟାମି ସର୍ୱାଭୀଷ୍ଟଫଲପ୍ରଦମ୍ ।

ନୀଲଜୀମୂତସଙ୍କାଶଂ ବିଦ୍ୟୁଦ୍ୱର୍ଣାମ୍ବରାବୃତମ୍ ॥ ୧॥

କୋମଲାଙ୍ଗଂ ବିଶାଲାକ୍ଷଂ ଯୁବାନମତିସୁନ୍ଦରମ୍ ।

ସୀତାସୌମିତ୍ରିସହିତଂ ଜଟାମକୁଟଧାରିଣମ୍ ॥ ୨॥

ସାସିତୂଣଧନୁର୍ବାଣପାଣିଂ ଦାନବମର୍ଦନମ୍ ।

ଯଦା ଚୋରଭୟେ ରାଜଭୟେ ଶତ୍ରୁଭୟେ ତଥା ॥ ୩॥

ଧ୍ୟାତ୍ୱା ରଘୁପତିଂ ଯୁଦ୍ଧେ କାଲାନଲସମପ୍ରଭମ୍ ।

ଚୀରକୃଷ୍ଣାଜିନଧରଂ ଭସ୍ମୋଦ୍ଧୂଳିତବିଗ୍ରହମ୍ ॥ ୪॥

ଆକର୍ଣାକୃଷ୍ଟସଶରକୋଦଣ୍ଡଭୁଜମଣ୍ଡିତମ୍ ।

ରଣେ ରିପୂନ୍ ରାବଣାଦୀନ୍ ତୀକ୍ଷ୍ଣମାର୍ଗଣବୃଷ୍ଟିଭିଃ ॥ ୫॥

ସଂହରନ୍ତଂ ମହାବୀରମୁଗ୍ରମୈନ୍ଦ୍ରରଥସ୍ଥିତମ୍ ।

ଲକ୍ଷ୍ମଣାଦ୍ୟୈର୍ମହାବୀରୈର୍ୱୃତଂ ହନୁମଦାଦିଭିଃ ॥ ୬॥

ସୁଗ୍ରୀବାଦ୍ୟୈର୍ମାହାବୀରୈଃ ଶୈଲବୃକ୍ଷକରୋଦ୍ୟତୈଃ ।

ବେଗାତ୍ କରାଲହୁଙ୍କାରୈଃ ଭୁଗ୍ଭୁକ୍କାରମହାରବୈଃ ॥ ୭॥

ନଦଦ୍ଭିଃ ପରିବାଦଦ୍ଭିଃ ସମରେ ରାବଣଂ ପ୍ରତି ।

ଶ୍ରୀରାମଶତ୍ରୁସଙ୍ଘାନ୍ମେ ହନ ମର୍ଦୟ ଘାତୟ ॥ ୮॥  (ଖାଦୟ)

ଭୂତପ୍ରେତପିଶାଚାଦୀନ୍ ଶ୍ରୀରାମାଶୁ ବିନାଶୟ ।

ଏବଂ ଧ୍ୟାତ୍ୱା ଜପେଦ୍ରାମକବଚଂ ସିଦ୍ଧିଦାୟକମ୍ ॥ ୯॥

ସୁତୀକ୍ଷ୍ଣ ବଜ୍ରକବଚଂ ଶୃଣୁ ବକ୍ଷ୍ୟାମ୍ୟହଂ ଶୁଭମ୍ ।

ଶ୍ରୀରାମଃ ପାତୁ ମେ ମୂର୍ଧ୍ନି ପୂର୍ୱେ ଚ ରଘୁବଂଶଜଃ ॥ ୧୦॥

ଦକ୍ଷିଣେ ମେ ରଘୁବରଃ ପଶ୍ଚିମେ ପାତୁ ପାବନଃ ।

ଉତ୍ତରେ ମେ ରଘୁପତିଃ ଭାଲଂ ଦଶରଥାତ୍ମଜଃ ॥ ୧୧॥

ଭ୍ରୁବୋର୍ଦୂର୍ୱାଦଳଶ୍ୟାମଃ ତୟୋର୍ମଧ୍ୟେ ଜନାର୍ଦନଃ ।

ଶ୍ରୋତ୍ରଂ ମେ ପାତୁ ରାଜେନ୍ଦ୍ରୋ ଦୃଶୌ ରାଜୀବଲୋଚନଃ ॥ ୧୨॥

ଘ୍ରାଣଂ ମେ ପାତୁ ରାଜର୍ଷିଃ ଗଣ୍ଡଂ ମେ ଜାନକୀପତିଃ ।

କର୍ଣମୂଲେ ଖରଧ୍ୱଂସୀ ଭାଲଂ ମେ ରଘୁବଲ୍ଲଭଃ ॥ ୧୩॥

ଜିହ୍ୱାଂ ମେ ବାକ୍ପତିଃ ପାତୁ ଦନ୍ତାବଲ୍ୟୌ ରଘୂତ୍ତମଃ ।

ଓଷ୍ଠୌ ଶ୍ରୀରାମଚନ୍ଦ୍ରୋ ମେ ମୁଖଂ ପାତୁ ପରାତ୍ପରଃ ॥ ୧୪॥

କଣ୍ଠଂ ପାତୁ ଜଗଦ୍ୱନ୍ଦ୍ୟଃ ସ୍କନ୍ଧୌ ମେ ରାବଣାନ୍ତକଃ ।

ଧନୁର୍ବାଣଧରଃ ପାତୁ ଭୁଜୌ ମେ ବାଲିମର୍ଦନଃ ॥ ୧୫॥

ସର୍ୱାଣ୍ୟଙ୍ଗୁଳିପର୍ୱାଣି ହସ୍ତୌ ମେ ରାକ୍ଷସାନ୍ତକଃ ।

ବକ୍ଷୋ ମେ ପାତୁ କାକୁତ୍ସ୍ଥଃ ପାତୁ ମେ ହୃଦୟଂ ହରିଃ ॥ ୧୬॥

ସ୍ତନୌ ସୀତାପତିଃ ପାତୁ ପାର୍ଶ୍ୱୌ ମେ ଜଗଦୀଶ୍ୱରଃ ।

ମଧ୍ୟଂ ମେ ପାତୁ ଲକ୍ଷ୍ମୀଶୋ ନାଭିଂ ମେ ରଘୁନାୟକଃ ॥ ୧୭॥

କୌସଲ୍ୟେୟଃ କଟିଂ ପାତୁ ପୃଷ୍ଠଂ ଦୁର୍ଗତିନାଶନଃ ।

ଗୁହ୍ୟଂ ପାତୁ ହୃଷୀକେଶଃ ସକ୍ଥିନୀ ସତ୍ୟବିକ୍ରମଃ ॥ ୧୮॥

ଊରୂ ଶାର୍ଙ୍ଗଧରଃ ପାତୁ ଜାନୁନୀ ହନୁମତ୍ପ୍ରିୟଃ ।

ଜଙ୍ଘେ ପାତୁ ଜଗଦ୍ୱ୍ୟାପୀ ପାଦୌ ମେ ତାଟକାନ୍ତକଃ ॥ ୧୯॥

ସର୍ୱାଙ୍ଗଂ ପାତୁ ମେ ବିଷ୍ଣୁଃ ସର୍ୱସନ୍ଧୀନନାମୟଃ ।

ଜ୍ଞାନେନ୍ଦ୍ରିୟାଣି ପ୍ରାଣାଦୀନ୍ ପାତୁ ମେ ମଧୁସୂଦନଃ ॥ ୨୦॥

ପାତୁ ଶ୍ରୀରାମଭଦ୍ରୋ ମେ ଶବ୍ଦାଦୀନ୍ ବିଷୟାନପି ।

ଦ୍ୱିପଦାଦୀନି ଭୂତାନି ମତ୍ସମ୍ବନ୍ଧୀନି ଯାନି ଚ ॥ ୨୧॥

ଜାମଦଗ୍ନ୍ୟମହାଦର୍ପଦଲନଃ ପାତୁ ତାନି ମେ ।

ସୌମିତ୍ରିପୂର୍ୱଜଃ ପାତୁ ବାଗାଦୀନୀନ୍ଦ୍ରିୟାଣି ଚ ॥ ୨୨॥

ରୋମାଙ୍କୁରାଣ୍ୟଶେଷାଣି ପାତୁ ସୁଗ୍ରୀବରାଜ୍ୟଦଃ ।

ବାଙ୍ମନୋବୁଦ୍ଧ୍ୟହଙ୍କାରୈଃ ଜ୍ଞାନାଜ୍ଞାନକୃତାନି ଚ ॥ ୨୩॥

ଜନ୍ମାନ୍ତରକୃତାନୀହ ପାପାନି ବିବିଧାନି ଚ ।

ତାନି ସର୍ୱାଣି ଦଗ୍ଧ୍ୱାଽଽଶୁ ହରକୋଦଣ୍ଡଖଣ୍ଡନଃ ॥ ୨୪॥

ପାତୁ ମାଂ ସର୍ୱତୋ ରାମଃ ଶାର୍ଙ୍ଗବାଣଧରଃ ସଦା ।

ଇତି ଶ୍ରୀରାମଚନ୍ଦ୍ରସ୍ୟ କବଚଂ ବଜ୍ରସମ୍ମିତମ୍ ॥ ୨୫॥

ଗୁହ୍ୟାଦ୍ଗୁହ୍ୟତମଂ ଦିବ୍ୟଂ ସୁତୀକ୍ଷ୍ଣ ମୁନିସତ୍ତମ ।

ଯଃ ପଠେତ୍ ଶୃଣୁୟାଦ୍ୱାପି ଶ୍ରାବୟେଦ୍ୱା ସମାହିତଃ ॥ ୨୬॥

ସ ଯାତି ପରମଂ ସ୍ଥାନଂ ରାମଚନ୍ଦ୍ରପ୍ରସାଦତଃ ।

ମହାପାତକୟୁକ୍ତୋ ବା ଗୋଘ୍ନୋ ବା ଭ୍ରୂଣହା ତଥା ॥ ୨୭॥

ଶ୍ରୀରାମଚନ୍ଦ୍ରକବଚପଠନାତ୍ ସିଦ୍ଧିମାପ୍ନୁୟାତ୍ ।  (ଶୁଦ୍ଧିମାପ୍ନୁୟାତ୍)

ବ୍ରହ୍ମହତ୍ୟାଦିଭିଃ ପାପୈର୍ମୁଚ୍ୟତେ ନାତ୍ର ସଂଶୟଃ ॥ ୨୮॥

ଇତି ଶ୍ରୀଶତକୋଟିରାମଚରିତାନ୍ତର୍ଗତେ ଶ୍ରୀମଦାନନ୍ଦରାମାୟଣେ

ବାଲ୍ମିକୀୟେ ମନୋହରକାଣ୍ଡେ ତ୍ରୟୋଦଶସର୍ଗାନ୍ତର୍ଗତଂ ଶ୍ରୀରାମକବଚଂ

ସମ୍ପୂର୍ଣମ୍ ॥

ହନୁମତ୍-ଲକ୍ଷ୍ମଣ-ସୀତା-ରାମ-ଭରତ-ଶତ୍ରୁଘ୍ନ

ଷଟ୍ କବଚାନି ପଠନୀୟମ୍ ।

ଷଟ୍ କବଚାନି ପଠିତୁଂ ଅଶକ୍ତଶ୍ଚେତ୍ 

ହନୁମତ୍-ଲକ୍ଷ୍ମଣ-ସୀତା-ରାମ – 

ଅଥବା ହନୁମତ୍-ସୀତା-ରାମ

ଅଥବା ହନୁମତ୍-ରାମ / ସୀତା-ରାମ କବଚାନି ।

ଅଥବା ଶ୍ରୀରାମକବଚମେବ ପଠନୀୟମ୍ ॥

.